<style>
.hidden {
  display: none;
}
</style>
<a href="javascript:window.close();">CLOSE WINDOW</a>
<br><br>
D4158: rgyal po la gtam bya ba rin po che'i phreng ba<br><table><tr><td>
<input type="button" onclick="location.href='tcompletep.php?id=D4158&coll=TD&volcur=0';" value="show page break" />
<td width=150><td>
<input type="button" onclick="location.href='tcompletel.php?id=D4158&coll=TD&volcur=0';" value="show line break" />

<td width=150><td>
<a href="tcompleteu.php?coll=TD&id=D4158&volcur=0" style=font-size:25px;">བོད་ཡིག</a><td width=150><td>e-texts based on the ACIP/ALL <img src="../data/scanner/ALL.png" width=70> Input <a href="https://asianlegacylibrary.org/library/" target="_blank"><img src="../sub/link.png" width=20></table><hr><p style="font-size:18px;">chos kyi rje sa'i steng na 'gran zla dang bral ba'i paN+Di ta chen po kha che shAkya shrI bzang po dang / lo tsA ba dge slong byams pa'i dpal gyis bsgyur/ / @##/ /rgya gar skad du/ rA dza pa ri ka thA rat+na mA lI / bod skad du/ rgyal po la gtam
 bya ba rin po che'i phreng ba/ sangs rgyas dang byang chub sems dpa' thams cad la phyag 'tshal lo/ /nyes pa kun las rnam grol zhing / /yon tan kun gyis brgyan pa po/ /sems can kun gyi gnyen gcig po/ /thams cad mkhyen la bdag phyag 'tshal/ /rgyal po khyod la chos
 sgrub phyir/ /gcig tu dge ba'i chos bshad de/ /dam pa'i chos kyi snod la ni/ /chos 'grub 'gyur te gang zhig la/ /dang por mngon par mtho ba'i chos/ /phyis ni nges par legs 'byung ba/ /gang phyir mngon par mtho thob nas/ /rim gyis nges par legs pa 'ong / /
 de la mngon mtho bde ba ste/ /nges par legs pa thar par 'dod/ /de yi bsgrub pa mdor bsdu na/ /mdor na dad dang shes rab po/ /dad can nyid phyir chos la brten/ /shes rab ldan phyir yang dag rig /'di gnyis gtso bo shes rab ste/ /'di sngon 'gro ba dad pa yin/ /'dun dang
 zhe sdang 'jigs pa dang / /rmongs pas gang zhig chos mi 'da'/ /de ni dad pa can zhes bya/ /nges par legs pa'i snod mchog yin/ /gang zhig lus ngag yid kyi las/ /thams cad legs par yongs brtags te/ /bdag dang gzhan la phan shes nas/ /rtag tu byed pa de
 mkhas pa/ /mi gsod pa dang rku spong dang / /gzhan gyi chung ma sbod ba dang / /log dang phra ma rtsub nyid dang / /ma 'brel smra ba yang dag sdom/ /chags dang gnod sems med pa la/ /nyid kyi lta ba yongs spong ba/ /'di dag las lam dkar bcu ste/ /bzlog pa dag ni nag po
 yin/ /chang mi 'thung dang 'tsho ba bzang / /rnam mi 'tshe dang gus sbyin dang / /mchod 'os mchod dang byams pa ste/ /mdor na chos ni de yin no / /lus gdung byed pa 'ba' zhig las/ /chos med 'di ltar de yis ni/ /gzhan la gnod pa spong med cing / /gzhan la phan 'dogs
 yod ma yin/ /sbyin dang tshul khrims bzod gsal ba/ /dam chos lam po che la gang / /ma gus lus gdung gnag lam lta'i/ /lam gol dag nas 'gro ba de/ /'khor ba'i 'brog ni mi bzad pa'i/ /mtha' yas skye bo shing can du/ /nyon mongs gdug pas 'khyud pa'i lus/ /
 shin tu yun ring 'jug par 'gyur/ /gsod pa yis ni tshe thung 'gyur/ /rnam par 'tshe bas gnod pa mang / /rku ba yis ni longs spyod phongs/ /byi bo byed pas dgra dang bcas/ /brdzun du smra bas skur ba ste/ /phra ma yis ni bshes dang 'bye / /tshig rtsub nyid kyis mi snyan thos/ /
 ma 'brel pa yis tshig mi btsun/ /brnab sems yid la re ba 'joms/ /gnod sems 'jigs pa sbyin par byed/ /log par lta bas lta ngan nyid/ /chang 'thungs pas ni blo 'khrul te/ /sbyin pa ma btang dbul ba nyid/ /log par 'tsho bas bslus pa ste/ /khengs pa yis ni
 rigs ngan nyid/ /phrag dog gis ni gzi chung nyid/ /khro bas kha dog ngan pa nyid/ /mkhas la mi 'dri blun pa nyid/ /mi nyid la ni 'bras bu 'di/ /kun gyi dang po ngan 'gror ro/ /mi dge zhes bya de dag gi /rnam smin bsgrags pa gang yin pa/ /dge ba dag ni thams cad
 la/ /'bras bu de ni bzlog ste 'byung / /chags dang zhe sdang gti mug dang / /des bskyed las ni mi dge ba/ /ma chags zhe sdang gti mug med/ /des bskyed las de dge ba yin/ /mi dge ba las sdug bsngal kun/ /de bzhin ngan 'gro thams cad do/ /dge las
 bde 'gro thams cad dang / /skye ba kun du bde ba dag /yid dang lus dang ngag gis ni/ /mi dge kun las ldog bya zhing / /dge la rtag tu 'jug bya ba/ /chos 'di rnam pa gnyis su bshad/ /chos 'dis dmyal ba yi dgas dang / /dud 'gro dag las rnam grol zhing / /
 lha dang mi yi nang dag tu/ /bde dpal rgyal srid rgyas pa 'thob/ /bsam gtan tshad med gzugs med kyi/ /tshangs stsogs bde ba myong bar byed/ /de ltar mngon mtho'i chos 'di dang / /de yi 'bras bu mdor bsdus pa'o/ /nges par legs pa'i chos dag kyang / /phra zhing
 zab par snang ba dang / /byis pa thos dang mi ldan la/ /skrag par byed par rgyal bas gsungs/ /bdag yod ma yin yod mi 'gyur/ /bdag gi yod min mi 'gyur zhes/ /byis pa dag ni de ltar skrag /mkhas pa la ni skrag pa zad/ /skye dgu 'di ni ma lus
 pa/ /ngar 'dzin pa las byung ba dang / /nga yir 'dzin ldan skye dgu la/ /phan pa gcig tu gsung bas gsungs/ /bdag yod bdag gir yod ces pa/ /'di ni dam pa'i don du log /gang phyir yang dag ji lta ba/ /yongs su shes pas gnyis mi 'byung / /ngar 'dzin las byung phung
 po rnams/ /ngar 'dzin de ni don du brdzun/ /gang gis sa bon brdzun pa de'i/ /skye ba bden pa ga la zhig /phung po de ltar mi bden par/ /mthong nas ngar 'dzin spong bar 'gyur/ /ngar 'dzin pa dag spangs nas ni/ /phyis ni phung po 'byung mi 'gyur/ /ji ltar me long brten nas su/ /
 rang bzhin gzugs brnyan snang mod kyi/ /de ni yang dag nyid du na/ /cung zad kyang ni yod min pa/ /de bzhin phung po rnams brten nas/ /ngar 'dzin pa ni dmigs par 'gyur/ /rang gi bzhin gyi gzugs brnyan bzhin/ /yang dag nyid du de 'ga' med/ /ji ltar me long ma brten
 par/ /rang bzhin gzugs brnyan mi snang ltar/ /phung po rnams la ma brten par/ /ngar 'dzin pa yang de dang 'dra/ /'phags pa kun dga' bo yis ni/ /de lta bu yi don thos nas/ /chos la mig 'thob bdag nyid kyis / /dge slong rnams la bzlas te smras/ /ji srid phung por
 'dzin yod par / /de srid de la ngar 'dzin yod/ /ngar 'dzin yod na yang las te/ /de las yang ni skye ba yin/ /lam gsum thog mtha' dbus med pa/ /'khor ba'i dkyil 'khor mgal me yi/ /dkyil 'khor lta bur phan tshun gyi / /rgyu can 'di ni 'khor bar 'gyur/ /de ni rang gzhan
 gnyis ka dang / /dus gsum nyid du'ang ma thob phyir/ /ngar 'dzin pa ni zad par 'gyur/ /de nas las dang skye ba yang / /de ltar rgyu 'bras skye ba dang / /de dag zad pa nyid mthong nas/ /yang dag nyid du 'jig rten la/ /yod med nyid du mi sems so/ /sdug bsngal thams cad zad pa yis/ /
 chos 'di thos nas rtog med pa/ /mi 'jigs gnas la sdar ba dag /yongs su mi shes phyir skrag go/ /mya ngan 'das la 'di dag kun/ /med par gyur na khyod mi 'jigs/ /'dir ni med par bshad pa la/ /khyod ni ji ste 'jigs par byed/ /thar la bdag med phung po
 med/ /gal te thar pa de 'drar 'dod/ /bdag dang phung po gsal ba la/ /'dir ni khyod ko cis mi dga'/ /mya ngan 'das pa dngos med pa'ang / /min na de dngos ga la yin/ /dngos dang dngos med der 'dzin pa/ /zad pa mya ngan 'das shes bya'o/ /mdor na med par lta ba
 nyid/ /las kyi 'bras bu med ces pa/ /bsod nams ma yin ngan song ba/ /de ni log par lta zhes bshad/ /mdor na yod par lta ba nyid/ /las kyi 'bras bu yod ces pa/ /bsod nams bde 'gro rgyu mthun pa/ /yang dag lta ba zhes bshad do/ /shes pas med dang yod
 zhi'i phyir/ /sdig dang bsod nams las 'das pa/ /de yis ngan 'gro bde 'gro la/ /de ni thar par dam pas bshad/ /rgyu dang bcas pas skye mthong bas/ /med pa nyid las 'das pa yin/ /rgyu dang bcas pas 'gag mthong bas/ /yod pa nyid du'ang khas mi len/ /sngar
 skyes pa dang lhan cig skyes/ /rgyu min don du rgyu med do/ /btags dang yang dag nyid du na/ /skye ba'ang rab tu ma grags phyir/ /'di yod pas na 'di 'byung dper/ /ring po yod pas thung ngu bzhin/ /'di skyes pas na 'di skye dper/ /mar me byung bas 'od bzhin no/ /
 ring bo yod na thung ngu nyid/ /rang gi ngo bo las ma yin/ /mar me byung ba med pa'i phyir/ /'on kyang 'byung ba med pa bzhin/ /de ltar rgyu 'bras skye mthong zhing / /'jig rten 'di na ji bzhin du/ /spros las byung bar khas blangs nas / /med pa nyid du khas mi len/ /'gog
 pa spros las ma byung ba/ /yang dag ji bzhin nyid gyur pa/ /khas len yod pa nyid mi 'gyur/ /des na gnyis mi brten pa grol/ /thag ring nas ni mthong ba'i gzugs/ /nye ba rnams kyis gsal bar mthong / /smig rgyu gal te chu yin na/ /nye ba rnams kyis cis mi mthong / /
 ji ltar ring ba rnams kyis ni/ /'jig rten 'di ni yang dag mthong / /de ltar de dang nye rnams kyis / /mi mthong mtshan med smig rgyu bzhin/ /ji ltar smig rgyu chu 'dra ba/ /chu min don du ma yin pa/ /de bzhin phung po bdag 'dra ba/ /de dag bdag min don
 du min/ /smig rgyu la ni 'di chu zhes/ /bsam de de ni song ba las/ /gal te chu de med do zhes/ /'dzin pa de ni blun pa nyid/ /de bzhin smig rgyu lta bu yi/ /'jig rten yod pa'am med pa zhes/ /'dzin pa de ni rmongs pa ste/ /rmongs pa yod na mi grol lo/ /med pa
 pa ni ngan 'gror 'gro/ /yod pa pa ni bde 'gror 'gro/ /yang dag ji bzhin yongs shes phyir/ /gnyis la mi brten thar par 'gyur/ /yang dag ji bzhin yongs shes pas/ /med dang yod par mi 'dod pa/ /de phyir med pa par 'gyur na/ /ci phyir yod pa par mi 'gyur/ /
 gal te yod pa sun phyung bas/ /don gyis 'di ni med par bslan/ /de bzhin med pa sun phyung bas/ /yod par ci yi phyir mi bslan/ /gang dag don gyi med nyid du/ /dam mi 'cha' zhing mi spyod pa/ /byang chub rten phyir sems med na/ /de dag ji ltar med par bshad/ /gang
 zag phung por smra ba yi/ /'jig rten grangs can 'ug phrug dang / /gos med bcas la gal te zhig /yod med 'das pa smra na dris/ /de phyir sangs rgyas rnams kyi ni/ /bstan pa 'chi med yod med las/ /'das pa zab mo 'di bshad pa/ /chos kyi khud pa yin
 zhes gyis/ /zhig nas 'gro med 'ong med cing / /skad cig kyang ni mi gnas pa/ /de ltar dus gsum 'das pa'i bdag /'jig rten don du ci yod dam/ /gang phyir gnyis ka'ang yang dag tu/ /'gro dang 'ong dang gnas med pa/ /de phyir 'jig rten mya ngan
 'das/ /don du khyad par ji lta bu/ /gnas pa med phyir skye ba dang / /'gag pa yang dag nyid min na/ /skye ba dang ni gnas pa dang / /'gag pa don du ga la zhig /gal te rtag tu 'gyur na ni/ /ji ltar skad cig ma yin dngos/ /gal te 'gyur ba med na ni/ /don
 du gzhan nyid ga la 'gyur/ /phyogs gcig gam ni thams cad du/ /zad pas skad cig 'gyur grang na/ /mi 'dra ba nyid mi dmigs phyir/ /de rnams gnyis ka'ang rigs ldan min/ /skad cig yin na ril med phyir/ /rnying pa 'ga' lta ga la zhig / ji ltar skad cig mtha'
 yod pa/ /de bzhin thog ma dbus brtag go/ /de ltar skad cig gsum bdag phyir/ /'jig rten skad cig gnas pa min/ /thog ma dbus dang tha ma yang / /skad cig bzhin du bsam par bya/ /thog ma dbus dang tha ma nyid/ /rang bzhin las kyang ma yin no/ /tha dad
 phyogs phyir gcig pu min/ /phyogs med pa ni 'ga' yang med/ /gcig med par ni du ma'ang med/ /yod pa med phyir med pa'ang med/ /zhig pa'am ni gnyen po yis/ /yod nyid med par 'gyur grang na/ /yod pa srid pa ma yin phyir/ /'jig pa'am gnyen por ji ltar
 'gyur/ /de phyir mya ngan 'das pa yis/ /'jig rten don du 'grib mi 'gyur/ /'jig rten mtha' dang ldan nam zhes/ /zhus na rgyal ba mi gsung phyir/ /de ltar zab mo'i chos rnams ni/ /snod min 'gro la mi gsung ba/ /de nyid phyir na mkhas rnams kyis/ /kun mkhyen thams cad mkhyen
 par shes/ /de ltar nges par legs pa'i chos/ /zab mo yongs su 'dzin med cing /gnas med ces ni rdzogs sangs rgyas/ /thams cad gzigs pa rnams kyis gsungs/ /gnas med chos 'dis skrag pa yis/ /skye bo gnas la mngon dga' zhing / /yod dang med las ma
 'das pa/ /mi mkhas rnams ni phung bar 'gyur/ /'jigs min gnas 'jigs de dag ni/ /phung la gzhan yang phung bar byed/ /rgyal po phung ba de dag gis/ /ci nas mi phung de ltar gyis/ /rgyal po khyod ni mi phung bar/ /bgyi slad 'jig rten 'das kyi tshul/ /gnyis la mi
 brten yang dag pa/ /ji bzhin lung gi dbang gis bshad/ /sdig dang bsod nams bya ba 'das/ /zab mo bkrol ba'i don dang ldan/ /mu stegs gzhan dang rang gi yang / /gnas med 'jigs pas ma myangs pa'o/ /skyes bu sa min chu ma yin/ /me min rlung min nam
 mkha' min/ /rnam shes ma yin kun min na/ /de las gzhan don skyes bu gang / /skyes bu khams drug 'dus pa'i phyir/ /yang dag ma yin ji lta ba/ /de bzhin khams ni re re la'ang / /'dus phyir yang dag nyid du min/ /phung po bdag min der de min/ /de la
 de min de med min/ /phung bdag me shing ltar 'dres min/ /de phyir bdag ni ji ltar yod/ /'byung gsum sa min 'di la min/ /de la 'di min de med min/ /re re'ang de bzhin de yi phyir/ /'byung ba rnams kyang bdag bzhin brdzun/ /sa chu me dang rlung rnams ni/ /re re'ang ngo bo nyid du
 med/ /gang gsum med par re re med/ /gcig med par yang gsum med do/ /gal te gsum med re re med/ /gcig med par yang gsum med na / /so sor yod pa ma yin te/ /ji ltar 'dus pa skyed par 'gyur/ /'on te so sor rang yod na/ /bud shing med par me cis
 med/ /g.yo dang thogs dang sdud pa dang / /chu dang rlung dang sa de bzhin/ /'on te me 'di grags yin na/ /ji ltar khyod kyis gsum gzhan rang / /gsum po rten cing 'byung ba dang / /chos mi mthun par rung ba'ang min/ /so sor rang yod de dag ni/ /ji lta bur na phan tshun yod/ /so sor
 rang yod ma yin pa/ /de dag ji ltar phan tshun yod/ /so so rang gi yod ce na/ /gang na gcig der lhag ma rnams/ / ma 'dres pa rnams gcig gnas med/ /'dres pa so sor rang yod min/ /so sor rang med 'byung ba rnams/ /so so'i rang mtshan ga la yod/ /so so rang med shas
 cher 'ang med/ /mtshan nyid dag ni kun rdzob bshad/ /kha dog dri ro reg pa dag /de dag la yang tshul 'di yin/ /mig dang rnam shes gzugs rnams dang / /ma rig las dang skye ba dang / /byed po las dang bya ba grangs/ /ldan dang rgyu 'bras dus dang ni/ /thung dang ring sogs
 shes bya dang / /ming dang ming can de bzhin no/ /sa dang chu dang me dang rlung / /ring thung phra dang sbom nyid dang / /dge sogs nyid ni rnam shes su/ /'gag par 'gyur zhes thub pas gsungs/ /rnam shes bstan med mtha' yas pa/ /kun du bdag po de la ni/ /sa dang chu dang
 me dang ni/ /rlung gis gnas thod 'gyur ma yin/ /'dir ni ring dang thung ba dang / /phra sbom dge dang mi dge dang / /'dir ni ming dang gzugs dag kyang / /ma lus par ni 'gag par 'gyur/ /gang ma shes phyir rnam shes la/ /sngon chad 'byung ba de kun ni/ /de shes phyir na rnam
 shes su/ /phyis ni de ltar 'gag par 'gyur/ /rnam shes me yi bud shing ni/ /'gro chos 'di kun yin par 'dod/ /de dag ji bzhin rab 'byed pa'i/ /'od dang ldan pas bsregs nas zhi / /mi shes pa ni sngon brtags pa/ /phyis ni de nyid nges pa dang / /gang tshe dngos po mi
 rnyed pa/ /de tshe dngos med ga la 'gyur/ /gzugs kyi dngos po ming tsam phyir/ /nam mkha' yang ni ming tsam mo/ /'byung med gzugs lta ga la yod/ /de phyir ming tsam nyid kyang yin/ /tshor dang 'du shes 'du byed dang / /rnam shes 'byung ba lta bu dang / /bdag nyid du ni bsam
 bya ste/ /de phyir khams drug bdag med do/ /rin po che'i phreng ba las mngon par mtho ba dang nges par legs pa bstan pa ste le'u dang po'o// //ji ltar chu shing yan lag dag /ma lus bcas te bshig byas na/ /ci yang med ltar skyes bu yang / /khams
 bcas bshig na de dang 'dra/ /chos rnams thams cad bdag med ces/ /de phyir rgyal ba rnams kyis gsungs/ /khams drug de kun bdag med par/ /khyod la gtan la phab pa yin/ /de ltar bdag dang bdag med par/ /yang dag ji bzhin dmigs su med/ /bdag
 dang bdag med lta ba dag / de phyir thub pa chen pos bzlog /mthong dang thos sogs thub pa yis/ /bden min brdzun pa min par gsungs/ /phyogs las mi mthun phyogs 'gyur na/ /de ni gnyi ga don du min/ /de ltas dam pa'i don du na/ /'jig rten 'di ni
 bden brdzun 'das/ /de nyid phyir na yang dag tu/ /yod ces med ces zhal mi bzhes / /gang zhig de ltar rnam kun du/ /yod min de ni kun mkhyen gyis/ /mtha' yod mtha' med gnyi ga dang / /gnyis ma yin zhes ji skad bstan/ /sangs rgyas grangs med gshegs de
 bzhin/ /byon gyur pa dang da ltar bzhugs/ /sems can mtha' ni dus gsum skyes/ /bye ba de dag las 'dod cing / /'jig rten 'phel ba'i rgyu med la/ /zad pa dus gsum du srid na/ /thams cad mkhyen pas ji ltar de'i/ /phyin chad lung ma bstan
 par mdzad/ /so so'i skye bo la gsang ba/ /gang yin de ni zab mo'i chos/ /'jig rten sgyu ma lta bu nyid/ /sangs rgyas bstan pa bdud rtsi yin/ /ji ltar sgyu ma'i glang po la/ /skye dang 'jig pa nyid snang yang / /de la don gyi yang dag tu/ /skye dang 'jig pa nyid med ltar/ /de
 bzhin sgyu 'dra'i 'jig rten la/ /skye dang 'jig pa nyid snang yang / /dam pa'i don du skye ba dang / /'jig pa nyid ni yod ma yin/ /ji ltar sgyu ma'i glang po ni/ /gang nas ma 'ongs gar mi 'gro/ /sems rmongs tsam du zad pas na / /yang dag nyid du gnas pa med/ /de bzhin sgyu
 ma'i 'jig rten ni/ /gang nas ma 'ongs gar mi 'gro/ /sems rmongs tsam du zad pas na / /yang dag nyid du gnas pa med/ /de ltar dus gsum 'das bdag nyid/ /tha snyad gdags pa ma gtogs par/ /gang zhig yod dam med 'gyur ba'i/ /'jig rten don du ci zhig yod/ /
 sangs rgyas kyis ni rgyu 'di las/ /mtha' yod pa dang mtha' med dang / /gnyis dang gnyis min rnam pa bzhi/ /lung bstan ma mdzad gzhan las min/ /re zhig lus 'di mi gtsang nyid/ /rags shing mngon gsum spyod yul ba/ /rtag tu snang ba gang gi tshe/ /sems la
 gnas pa ma yin pa/ /de tshe dam chos gnas med pa/ /phra rab mngon sum ma yin pa/ /zab mo de go ji lta bur/ /sems la bde blag 'char bar 'gyur/ /chos 'di zab phyir skye bo yis/ /shes par dka' bar thugs chud de/ /des na thub pa sangs rgyas nas/ /chos bstan
 pa las log par gyur/ /chos 'di log par shes gyur na/ /mi mkhas rnams ni chud kyang za/ /'di ltar med par lta ba yi/ /mi gtsang der ni bying bar 'gyur/ /gzhan yang de ni log bzung nas/ /blun pa mkhas pa'i nga rgyal can/ /spong bas ma rungs bdag nyid can/ /mnar
 med par ni spyi'u tshugs 'gro/ /ji ltar kha zas bza' nyes pas/ /phung ba dag tu 'gyur ba dang / /bza' legs tshe dang nad med dang / /stobs dang bde bar 'gyur ba ltar / /de bzhin log par bzung ba des / /phung ba dag ni thob 'gyur zhing / /legs par shes pas bde ba dang / /
 byang chub bla na med pa thob/ /de phyir 'di la spong ba dang / /med pa'i lta ba spangs nas ni/ /don kun bsgrub phyir yang dag pa'i/ /shes la nan tan mchog mdzod cig /chos 'di yongs su ma shes na/ /ngar 'dzin pa ni rjes su 'jug /de las dge dang mi dge'i las/ /de las
 skye ba bzang dang ngan/ /de phyir ji srid ngar 'dzin pa / /sel pa'i chos 'di ma shes pa/ /de srid sbyin dang tshul khrims dang / /bzod pa'i chos la gus par mdzod/ /las rnams sngon du chos gtong zhing / /bar du chos ldan tha mar yang / /chos ldan bsgrub pa'i sa bdag ni/ /
 'di dang gzhan du gnod mi 'gyur/ /chos kyis 'dir grags bde ba dang / /'di dang 'chi kar 'jigs pa med/ /'jig rten gzhan du bde ba rgyas/ /de bas rtag tu chos brten mdzod/ /chos ni lugs kyi dam pa ste/ /chos kyis 'jig rten mngon dgar 'gyur/ /'jig
 rten dga' bar gyur pas kyang / /'di dang gzhan du bslus mi 'gyur/ /chos min pas ni lugs 'dod gang / /de yis 'jig rten mi dgar 'gyur/ /'jig rten mi dga' nyid kyi phyir/ /'di dang gzhan du dga' mi 'gyur/ /don med rig pa ngan 'gro'i lam/ /gzhan bslu
 lhur len mi bzad pa/ /shes rab 'chal pa rnams kyis ni/ /ji ltar don gyis rig par byas/ /pha rol slu ba lhur len pa/ /don du ji ltar lugs ldan yin/ /des ni tshe rabs stong phrag tu/ /bdag nyid kho na bslus par 'gyur/ /dgra la gnod pa bya na yang / /skyon rnams
 btang ste yon tan bsten/ /des ni khyod kyis rang phan 'thob/ /dgra bo yang ni mi dgar 'gyur/ /sbyin dang snyan par smra ba dang / /phan dang don gcig spyod pa ste/ /de dag rnams kyis 'jig rten dang / /chos kyang bsdu ba nyid du mdzod/ /rgyal po dag la ji lta bur/ /bden gcig yid
 ches brtan bskyed pa/ /de las bzlog ste brdzun pa ni/ /yid mi ches par byed pa'i mchog /slu ba med ldan bden min te/ /sems pas bsgyur ba don du min/ /gzhan la gcig tu phan pas bden/ /mi phan phyir ni cig shos min/ /ji ltar
 rgyal po'i nyes pa dag / sbyin gsal gcig gis sbed pa ltar/ /de bzhin 'jungs pa'ang de dag gi /yon tan bdog pa thams cad 'joms/ /nye bar zhi ba zab pa'i phyir/ /mchog tu gus pa byed par 'gyur/ /gus pas brjid la bka' yang brtsan/ /de bas nye bar zhi ba
 bsten/ /shes rab ldan pas blo mi 'phrogs/ /gzhan gyi dring mi 'jog cing brtan/ /slu bas mi tshugs rgyal po ste/ /de bas shes rab lhur blang mdzod/ /bden gtong zhi dang shes rab dang / /bzang po bzhi ldan mi dbang ni/ /chos bzangs rnam pa bzhi lta bur/ /lha mi rnams
 kyis bstod par 'gyur / /phebs par smra zhing dag gyur pa/ /shes rab snying rje dri med dang / /lhan cig 'grogs na rtag tu yang / /shes rab dang ni chos kyang 'phel/ /phan par smra ba dkon pa ste/ /nyan par byed pa shin tu dkon/ /de dag bas kyang mi snyan yang / /phan
 pa'i rjes su byed pa dkon/ /de lta bas na mi snyan yang / /phan par mkhyen nas myur du spyad/ /nad gso'i don du bdag byams pa/ /mi bzad nga ba'i sman yang 'thung / /srog dang nad med rgyal srid dag /mi rtag nyid ni rtag dgongs te/ /de nas yang dag brtson ldan par/ /
 chos la gcig tu nan tan mdzod/ /gdon mi za bar 'chi 'gyur zhing / /shi nas sdig pas sdug bsngal ba/ /gzigs te 'phral du bde na yang / /sdig pa bgyi bar mi rigs so/ /la lar 'jigs pa med mthong zhing / /dus 'gar 'jigs pa mthong gyur pa/ /gal te
 gcig la yid rton na/ /gcig la khyod ko cis mi 'jigs/ /chang gis 'jig rten brnyas 'gyur zhing / /don yal nor yang zad par 'gyur/ /rmongs pas bya ba ma yin byed/ /de bas chang ni rtag tu spongs/ /rgyan po chags dang mi dga' dang / /zhe sdang g.yo sgyu dgong
 pa'i gnas/ /brdzun dang kyal ba tshig rtsub rgyu/ /de bas rtag tu spang bar mdzod/ /bud med chags pa phal cher ni/ /bud med gzugs bzang sems las byung / /bud med lus la don du ni/ /gtsang ba cung zad yod ma yin/ /kha ni kha chu rul pa dang / /so rkyag mi gtsang
 snod yin te/ /sna ni rnag snabs sna chu'i snod/ /mig ni mig rdul mchi ma'i snod/ /lto ba'i khong ni bshang gci dang / /glo ba mchin stsogs snod yin par/ /rmongs pas bud med ma mthong ba/ /de yi lus la chags par byed/ /mi shes 'ga' zhig mi gtsang ba'i/ /bum pa
 rgyan la chags pa ltar/ /'jig rten mi shes rmongs pa yis / /bud med rnams la de bzhin no/ /lus yul shin tu dri nga ba/ /chags bral rgyu ni gang yin pa/ /de la'ang 'jig rten ches chags na/ /gang gi 'dod chags bral bar bkri/ /ji ltar bshang dang gci gzhi
 la/ /ngan skyugs phag rab chags pa ltar/ /de bzhin bshang dang gci gzhi la/ /'dod chags ngan skyugs phag rnams chags/ /lus kyi grong khyer mi gtsang ba/ /'byung ba'i bu ga dod pa gang / /de ni skye bo blun pa yis/ /dga' ba'i don du nye bar brtags / /khyod bdag nyid kyis
 bshang gci stsogs/ /so sor mi gtsang mthong nas ni/ /de 'dus lus la ji lta bur/ /yid du 'ong ba nyid du gyur/ /khrag dang khu ba 'dres pa yi / /sa bon mi gtsang snying pos bskyed/ /mi gtsang ngo bor shes bzhin du/ /'di la 'dod can gang zhig chags/ /mi gtsang phung po de'i
 blan gyis/ /brlan pa'i pags pas g.yogs pa gang / /nyal ba de ni bud med kyi/ /chu so'i khong nas nyal bar zad/ /gzugs bzang ba dang gzugs ngan nam/ /rgan nam yang na gzhon yang rung / /bud med gzugs kun mi gtsang na/ /khyod chags khyad par gang la bskyed/ /
 gal te mi gtsang kha dog bzang / /shin tu gsar la dbyibs legs kyang / /de la chags par mi 'os ltar/ /bud med gzugs la'ang de bzhin no/ /khong rul phyi rol pags pas g.yogs/ /ro myags 'di yi rang bzhin ni/ /shin tu mi bzad snang bzhin du/ /ji lta bur na
 mthong ma gyur/ /pags pa 'di yang mi gtsang min/ /ral gu bzhin du 'dug ce na/ /mi gtsang phung po'i pags pa ltar/ /ji lta bur na gtsang mar 'gyur/ /mi gtsang gang ba'i bum pa ni/ /phyi rol sgra yang smad pa yin/ /mi gtsang ba yi rang bzhin
 lus/ /mi gtsang gang ba cis mi smad/ /gal te khyod ni mi gtsang smod/ /dri dang phreng ba bza' btung ni/ /gtsang ma'ang mi gtsang byed pa gang / /lus 'di ci yi phyir mi smad/ /ji ltar rang ngam gzhan dag gi /mi gtsang smad par bya ba gang / /de bzhin rang dang gzhan dag gi/ /
 mi gtsang gzugs ko cis mi smad/ /ji ltar bud med gzugs mi gtsang / /khyod kyi rang lus de dang 'dra/ /de bas phyi dang nang nyid la/ /'dod chags bral bar rigs min nam/ /rma dgu dag nas 'dzag pa can/ /bdag nyid mngon sum 'khru byed kyang / /lus mi gtsang
 bar mi rtogs na/ /khyod la bshad pas ci zhig phan/ /gang dag mi gtsang lus 'di la/ /steg chos snyan dngags byed pa ni/ /e ma'o gzu lums e ma'o blun/ /e ma'o skye bos khrel du rung / /mi shes mun pas bsgribs pa yi/ /sems can 'dir ni phal
 cher yang / /'dod pa'i don du rtsod 'byung ba/ /mi gtsang don du khyi rnams bzhin/ /g.yan pa phrugs na bder 'gyur ba/ /de bas g.yen pa med na bde/ /de bzhin 'jig rten 'dod ldan bde/ /'dod pa med pa de bas bde/ /gal te de ltar brtags na khyod/ /'dod
 chags bral ba ma grub kyang / /'on kyang 'dod chags bsrabs pa yis/ /bud med chags par mi 'gyur ro/ /tshe thung 'jigs dang sdug bsngal dang / /dmyal ba'i rgyu ni mi bzad pa/ /ri dgas lings te de lta bas/ /rtag tu gsod med brtan por mdzod/ /yan lag
 thams cad mi gtsang bas/ /bskus pa'i sbrul gdug 'jigs pa ltar/ /gang la brten nas lus can rnams/ /skrag par 'gyur ba de re ngan/ /char sprin chen po langs pa na/ /zhing pa rnams ni ji lta bar/ /gang la brten nas lus can rnams/ /dga' bar 'gyur
 ba de re bzang / /de bas chos min spang bya ste/ /g.yel ba med par chos la brten/ /bdag nyid dang ni 'jig rten 'dis/ /bla med byang chub thob 'dod na/ /de yi rtsa ba byang chub sems/ /ri dbang rgyal po ltar brtan dang / /phyogs mthas gtugs pa'i snying rje dang / /gnyis
 la mi brten ye shes lags/ /rgyal po chen po skyes chen gyi / /mtshan ni sum cu rtsa gnyis kyis/ /ji ltar khyod sku brgyan gyur pa/ /de lta bu dag gsan par mdzod/ /mchod rten mchod bya 'phags pa dang / /rgan rabs rnams ni legs bkur bas/ /dpal ldan phyag
 zhabs 'khor lo yis/ /mtshan pa'i 'khor los sgyur bar 'gyur/ /rgyal po chos la rtag par ni/ /yang dag blangs pa brtan par mdzod/ /des ni shin tu zhabs gnas pa'i/ /byang chub sems dpar 'gyur ba lags/ /sbyin dang snyan pa'i tshig dang ni/ /phan dang don
 gcig spyod pa yis/ /dpal ldan phyag sor dra ba yis/ /'brel ba'i phyag ris can du 'gyur/ /bza' ba dang ni btung ba'i mchog /rab tu mang po byin pa yis/ /dpal ldan phyag dang zhabs mnyen zhing / / sku che bdun yang mtho bar 'gyur/ /'tshe med gsad pa thar byas
 pas/ /sku mdzes drang zhing che ba dang / /tshe ring sor mo ring ba dang / /rting pa yangs pa dag tu 'gyur/ /yang dag blangs pa'i chos rnams ni/ /spel bas dpal ldan mdog bzang zhing / /zhabs kyi long bu mi mngon dang / /ba spu gyen du phyogs mtshan 'gyur/ /rig dang bzo la
 sogs pa'i gnas/ /gus pas len dang sbyin pas khyod/ /e na ya yi byin pa dang / /yid rno shes rab chen por 'gyur/ /rang gi nor bdog blangs gyur na/ /myur du btang ba'i brtul zhugs kyis/ /phyag rgya bde dang 'jig rten gyi/ /rnam par 'dren pa nyid du 'gyur / /gnyen
 bshes phan tshun bye ba dag / yang dag bsdum par byas pa yis/ /dpal ldan mdoms kyis sba ba ni/ /sbubs su nub pa'i dam par 'gyur/ /khang bzangs gding ba rgyan dag ni/ /bde zhing bzang ba rab 'byin pas/ /gser ni btso ma dri med pa/ /shin tu 'jam pa'i mdog
 'drar 'gyur/ /bla na med pa'i dbang byin zhing / /rigs par bla ma'i rjes 'jug pa/ /dpal ldan ba spu nyag re dang / /zhal ni mdzod spus brgyan par 'gyur/ /snyan cing dga' bar smras pa dang / /legs par smras dang mthun byas pas/ /khyod ni dpung mgo
 zlum pa dang / /ro stod seng ge'i 'dra bar 'gyur/ /nad pa rnams la rim gro dang / /gsos pas thal gong rgyas pa dang / /bdag nyid rnal du gnas pa dang / /ro bro ba yi mchog tu 'gyur/ /chos dang mthun pa'i bya ba la/ /thog drangs khyod kyi dbu gtsug tor/ /legs gnas n+ya gro d+ha
 lta bur/ /chu zheng gab pa dag tu 'gyur/ /tshig ni bden pa 'jam po dag /yun rings dus su brjod pa yis/ /mi yi dbang po ljags yangs shing / /tshangs pa yi ni dbyangs ldan 'gyur/ /rtag tu rgyun mi 'chad pa ru/ /bden pa'i tshig ni brjod pa yis/ /'gram pa seng ge'i lta bu dang / /
 dpal ldan thub pa dga' bar 'gyur/ /lhag par gus dang bkur sti dang / /ji ltar rigs par rjes 'jug pas / /tshems ni shin tu dkar ba dang / /mdog ldan mnyam pa'i tshems su 'gyur/ /dbyen dang phra ma med pa yi/ /tshig ni yun rings goms pa yis/ /dpal ldan tshems
 ni bzhi bcu tham/ /mnyam par thags kyang bzang bar 'gyur/ /chags dang sdang dang rmongs med cing / /byams pas sems can bltas pa yis/ /spyan ni bkrag can mthon mthing la/ /rdzi ma ba yi lta bur 'gyur/ /de ltar mdor na rgyur byas pa'i/ /sum cu rtsa gnyis de dag ni/ /skyes bu
 seng ge chen po yi / /mtshan rnams legs par mkhyen par mdzod/ /dpe byad bzang po brgyad cu ni/ /byams pa'i rgyu mthun las byung ba/ /gzhung ni mangs su dogs pa yis/ /rgyal po khyod la ma bshad do/ /'khor los sgyur ba thams cad la/ /'di dag yod par 'dod mod kyi/ /dag
 dang mdzes dang gsal ba ni/ /sangs rgyas rnams kyi char mi phod/ /'khor los sgyur ba'i mtshan dang ni/ /dpe byad bzang po gang dag gcig /thub dbang po la sems dang ba'i/ /yan lag gcig las 'byung bshad pa'i/ /bskal pa bye ba brgya phrag ni/ /gcig tu bsags pa'i dge
 pas kyang / /sangs rgyas ba spu nyag gcig kyang / /bskyed par nus pa ma yin no/ /nyi ma rnams kyi 'od byed pa/ /me khyer rnams dang bag 'dra ltar/ /sangs rgyas rnams kyi mtshan yang ni/ /'khor los sgyur ba rnams dang 'dra/ /rin po che'i phreng ba las spel ma zhes bya ba ste
 le'u gnyis pa'o/ / //bsod nams bsam gyis mi khyab las/ /ji ltar sangs rgyas mtshan 'byung ba/ /theg pa chen po'i lung chen las/ /rgyal po chen po de bzhin gson/ /rang sangs rgyas kun las byung dang / /slob dang mi slob las byung ba / /'jig
 rten ma lus kun bsod nams/ /'jig rten bzhin du dpag med gang / /de bcur bsgres par gyur pa yis/ /ba spu'i bu ga gcig 'grub ste/ /sangs rgyas ba spu'i bu ga ni/ /thams cad de dang 'dra bas 'byung / /ba spu'i bu ga thams cad ni/ /skyed par byed pa'i bsod nams
 gang / /de dag brgyar ni bsgyur ba yis/ /dpe byad bzang po gcig tu bzhed/ /bsod nams de snyed de snyed kyis/ /rgyal po dpe byad bzang po ni/ /gcig mthar phyin te de lta bur/ /brgyad cu'i bar du 'byung bar 'gyur/ /dpe byad bzang po brgyad cu dag /'grub pa'i bsod
 nams tshogs gang yin/ /de dag brgyar ni bsgyur ba yis/ /skyes bu chen po'i mtshan gcig go/ /mtshan ni sum cu 'grub pa'i rgyu/ /bsod nams rgya chen gang yin pa/ /de dag stong du bsgyur ba yis/ /zla ba nya 'dra'i mdzod spu'o/ /mdzod spu yi ni bsod nams dag /stong
 phrag brgyar ni bsdoms pa yis/ /spyi gtsug bltar ni mi snang ba/ /skyob pa'i gtsug tor skyed par byed/ /gtsug tor bsod nams bye ba ni/ /'bum phrag brgyar ni bsgyur ba las/ /stobs bcu mnga' ba'i chos kyi dung / /gcig 'byung bar ni shes par bya/ /de ltar bsod nams
 tshad med kyang / /ji ltar 'jig rten phyogs kun du / /bcur bsgres ma lus brjod pa ltar/ /tshad dang ldan par bag tsam brjod/ /gang tshe sangs rgyas gzugs sku yi/ /rgyu yang de ltar 'jig rten bzhin/ /gzhal med de tshe chos sku yi/ /rgyu lta ji ltar gzhal du yod/ /
 thams cad kyi ni rgyu chung las/ /'bras bu rgya chen skyed 'gyur na / /sangs rgyas rgyu ni dpag med las/ /'bras bu dpag yod bsam thag chad/ /sangs rgyas rnams kyi gzugs sku ni/ /bsod nams tshogs las byung ba ste/ /chos kyi sku ni mdor bsdu na/ /
 rgyal po ye shes tshogs las 'khrungs/ /de lta bas na tshogs 'di gnyis/ /sangs rgyas nyid ni thob pa'i rgyu/ /de ltar mdor na bsod nams dang / /ye shes 'di ni rtag brten mdzod/ /rigs pa dang ni lung bstan pa/ /dbugs 'byin byed pa'i rgyu 'di yis/ /byang chub bsgrub pa'i bsod
 nams ni/ /'di la sgyid lug mi bya'o/ /phyogs rnams kun du nam mkha' dang / /sa dang chu dang me dang rlung / /ji ltar mtha' yas de bzhin du/ /sdug bsngal sems can mtha' yas 'dod/ /sems can mtha' yas de dag ni/ /byang chub sems dpa'i snying brtse bas/ /sdug
 bsngal dag las drang byas te / /sangs rgyas nyid la 'god par nges/ /de ltar brtan par gnas de ni/ /mi nyal ba'am nyal yang rung / /yang dag blangs pa nas bzung ste/ /bag med gyur kyang sems can rnams/ /mtha' yas phyir na sems can bzhin/ /bsod nams mtha' yas rtag
 sogs 'gyur/ /mtha' yas des na sangs rgyas nyid/ /mtha' yas thob min dka' zhes bya/ /gang zhig dpag med dus gnas te/ /lus can dpag tu med don du / /byang chub dpag tu med 'dod cing / /dge ba dpag tu med 'dod pa/ /des ko byang chub dpag med kyang / /dpag
 tu med pa rnam bzhi yi/ /tshogs kyis ring po mi thogs par/ /ci yi phyir na 'thob mi 'gyur/ /bsod nams mtha' yas zhes pa dang / /ye shes mtha' yas zhes pa des/ /lus dang sems kyi sdug bsngal dag /myur ba nyid du sel bar byed/ /sdig pas ngan 'gror lus kyis ni/ /
 sdug bsngal bkres skom la sogs 'byung / /des sdig ma byas bsod nams kyis/ /srid pa gzhan na de med do/ /rmongs pas yid kyi sdug bsngal ni/ /chags sdang 'jigs dang 'dod la sogs/ /des rten med pa'i shes pa yis/ /de ni myur ba nyid du spong / /lus dang yid
 kyi sdug bsngal gyis/ /de ltar shin tu ma smas na/ /gal te 'jig rten mthas gtugs par/ /'jig rten 'dren kyang cis te skyo/ /sdug bsngal ba la yun thung yang / /bzod dka' yun ring smos ci dgos/ /sdug bsngal med cing bde ba la/ /mtha' yas dus kyang ji zhig gnod/ /
 de la lus kyi sdug bsngal med/ /yid kyi sdug bsngal ga la yod/ /de ni snying rjes 'jig rten sdug /de nyid kyis ni yun ring gnas/ /de bas sangs rgyas ring thogs shes/ /blo dang ldan pa sgyid mi lug /nyes zad yon tan don du ni/ /'di la rtag tu 'bad par bya/ /chags dang
 zhe sdang gti mug dag / nyes par mkhyen nas yongs su spongs/ /ma chags mi sdang gti mug med/ /yon tan mkhyen nas gus pas brten/ /chags pas yi dgas 'gro bar 'gro/ /zhe sdang gis ni dmyal bar 'phen/ /rmongs pas phal cher dud 'gror 'gro/ /bzlog
 pas lha dang mi nyid do/ /skyon spangs yon tan 'dzin pa ni / /mngon par mtho ba pa yi chos/ /shes pas 'dzin pa spangs zad pa/ /nges par legs pa pa yi chos/ /sangs rgyas sku gzugs mchod rten dang / /gtsug lag khang dag gus tshul du/ /shin tu rgya chen gnas
 mal sogs/ /rgya chen phyug pa bsgrub par mdzod/ /rin chen kun las bgyis pa yis/ /sangs rgyas sku gzugs dbyibs mdzes shing / /legs par bris pa pad+ma la/ /bzhugs pa dag kyang bgyid du stsol / /dam chos dge slong dge 'dun dag /nan tan kun gyis
 bskyang bar mdzod/ /gser dang rin chen dra ba dag /nyid kyis mchod rten rnams la thogs/ /gser dang dngul gyi me tog dang / /rdo rje byi ru mu tig dang / /an+da rnyil dang bai DUR+Ya/ /mthon ka chen pos mchod rten mchod/ /dam chos smra la mchod pa ni/ /rnyed dang bkur sti
 dang ldan pa/ /dga' bar 'gyur ba rnams bgyi zhing / /chos drug gus par bsten par mdzod/ /bla ma rim gro gus nyan dang / /zham ring dang ni mdongs gsol dang / /byang chub sems dpa' rnams la yang / /rtag tu gus pas mchod par mdzod/ /mu stegs gzhan
 la gus pa yis/ /mchod dang phyag kyang mi bgyi ste/ /mi shes pa rnams de'i rkyen gyis/ /skyon dang bcas pa chags 'gyur gda'/ /thub dbang gsung dang des byung ba'i/ /gzhung rnams bri dang glegs bam ni/ /snag tsha dag dang smyu gu dag /sngon du 'gro
 ba sbyin par mdzod/ /yul du yi ge grwa khang du/ /slob dpon 'tsho ba'i bya ba dag /zhing stsal ba yi nges pa ni/ /ye shes spel ba'i slad du mdzod/ /rgan dang byis pa nad pa dang / /sems can sdug bsngal bsal slad du/ /yul du sman pa 'dreg mkhan dag /zhing gi rngan pa
 'jog tu stsol/ /'gron gnas kun dga' chu lon dang / /rdzing dang mdun khang chu ra dag /mal zas rtswa dang shing ldan pa/ /shes rab bzang po bgyid du stsol / /grong dang gtsug lag khang dag dang / /grong khyer kun du 'dun khang dang / /chu dkon lam rnams thams
 cad du/ /chu ra dag ni bgyid du stsol / /nad pa mgon med sdug bsngal gyis/ /nyam thag dman dang ngan pa dag /snying rjes rtag tu yongs bzung zhing / /de dag gso phyir gus bsten mdzod/ /dus su 'byung ba'i zas skom dang / /bca' ba 'bru dang shing
 tog dang / /de dag slong ba'i skye bo la/ /ma stsal bar du gsol mi rigs/ /lham dang gdugs dang chu tshags dang / /tsher ma dbyung ba'i cha sta dang / /khab dang skud dang bsil yab dang / /chu ra yi ni gnas su bzhag /'bras bu gsum dang tsha ba
 gsum/ /mar dang sbrang rtsi mig sman dang / /dug sel chu rar bzhag bgyi zhing / /grub pa'i sman dang sngags kyang bri/ /lus dang rkang pa mgo bsku dang / /bal dang khri'u dang skyo ma dang / /bum pa zangs dang dgra sta sogs/ /chu ra dag tu 'jog tu stsol / /til dang 'bras dang 'bru
 dang zas/ /bu ram snum dang ldan pa yi/ /chu ra chung ngu bsil grib tu/ /rung pa'i chus bkang bgyid du stsol / /grog sbur tshang gi sgo dag tu/ /zas dang chu dang bu ram dang / /'bru yi phung po rtag par ni/ /thugs brtan mi rnams bgyid du stsol / /bshos gsol sngon dang
 'og dag tu/ /yi dwags khyi dang grog sbur dang / /bya la sogs pa ci bde bar/ /rtag tu zas dag stsal bar mdzod/ /gtses pa dang ni lo nyes dang / /gnon pa dang ni yams nad dang / /pham gyur yul du 'jig rten pa/ /rjes su bzung ba rgya chen mdzod/ /zhing pa nyam thag gyur
 rnams la/ /sa bon zas kyis rjes su zung / /nan gyis dpya khral btang ba dang / /shas rnams kyang ni bskyung ba dang / /chags nyen pa las yongs bskyab dang / /sho gam btang dang sho gam dbri/ /de dag sgo na sdod pa yi/ /nyon mongs las kyang bzlog par mdzod/ /rang gi yul dang yul
 gzhan gyi / /chom rkun rnams kyang zhi bar mdzod/ /dbyig gi spobs ni mnyam pa dang / /rin thang rigs par bgyid du stsol / /blon pos ci dang ci gsol pa/ /nyid kyis kun du mkhyen mdzod la/ /'jig rten sman pa gang dang gang / /de dang de kun rtag tu mdzod/ /bdag phan ci
 dang ci bya zhes/ /ji ltar khyed la gus yod pa/ /gzhan phan ci dang ci bya zhes/ /de bzhin khyod ni gus par mdzod/ /sa dang chu dang me dang rlung / /sman dang nags kyi shing bzhin du/ /bdag nyid yud tsam gcig tu yang / /'dod dgur spyad pa nyid du mdzod/ /gom pa bdun pa'i dus su
 yang / /bdog pa kun gtong sems 'chang ba'i/ /byang chub sems dpa' rnams la ni/ /bsod nams mkha' 'dra dpag med skye/ /bu mo gzugs bzang lus mdzes la/ /de don gnyer ba rnams stsal na / /des ni dam chos yongs 'dzin pa'i/ /gzungs ni so sor thob par 'gyur/ /
 rgyan rnams kun dang ldan pa yi/ /bu mo stong phrag brgyad cu dag /yo byad kun dang lhan cig tu/ /thub pa yis ni sngon stsal to/ /sna tshogs pa dang 'od gsal ba'i/ /bgo ba dag dang rgyan rnams dang / /dri dang phreng ba longs spyod dag /slong ba rnams la brtse bas stsol/ /gang
 la chos don gang med na/ /shin tu nyam thag gyur pa de/ /de yi mod la bde stsal na/ /de las sbyin mchog ma mchis so/ /gang la dug ni phan 'gyur na/ /de la dug kyang sbyin par bgyi/ /kha zas mchog kyang mi phan na/ /de la de ni sbyin mi bgyi/ /sbrul gyis zin la ji lta bur/ /sor
 mo bcad la phan bshad pa / /de bzhin thub pas gzhan phan pa/ /mi bde ba yang bya bar gsungs/ /dam pa'i chos dang chos smra la/ /nyid kyis bkur sti mchog dang ni/ /gus par byas te chos nyan zhing / /chos kyi sbyin pa dag kyang mdzod/ /'jig rten gtam
 la dga' ma mdzad/ /'jig rten 'das la dgyes par mdzod/ /bdag la ji ltar de bzhin du/ /gzhan la yon tan bskyed par mdzod/ /gsan pa'i chos kyis mi ngoms shing / /don bzung rnam par dbye ba dang / /bla ma dag la yon dbul ba/ /rtag tu gus par mdzad du gsol/ /
 'jig rten rgyang phan sogs mi gdon/ /rtsod pa'i don gyi nga rgyal spang / /rang gi yon tan mi bsngags shing / /dgra la'ang yon tan brjod par mdzod/ /gnod la dbab par mi bgyi zhing / /ngan sems kyis ni gleng mi bgyi/ /gzhan rnams kyi dang bdag nyid kyi/ /'khrul pa
 so sor brtag par bya/ /nyes pa gang gis gzhan dag la/ /mkhas pas rtag tu kha bya ba/ /de ni rang gis yongs spang zhing / /nus pas gzhan yang bzlog par mdzod/ /gzhan gyis gnod pa bgyis pa la/ /sngon gyi las dgongs khro mi bgyi/ /sdug bsngal yang 'byung
 mi 'gyur bar/ /rang gi nyes pa med par bgyi/ /lan la re ba ma mchis par/ /gzhan dag la ni phan par mdzod/ /sdug bsngal gcig pus gnag bgyi zhing / /bde ba slong dang lhan cig spyad/ /lha yi phun sum tshogs pas kyang / /khengs pa nyid du mi bya zhing / /yi dgas
 bzhin du dbul ba yi/ /rgud pas kyang ni zhum mi bgyi/ /bden pa gang gis rang don la/ /rgyal srid nyams par gyur na yang / /rang gi don la rtag brjod cing / /de las gzhan smra mi bgyi'o/ /ji skad gsungs pa de bzhin du/ /mdzad pa'i brtul zhugs rtag brten mdzod/ /des
 na dpal ldan sa stengs su/ /tshad ma yi ni dam par 'gyur/ /khyod ni rtag tu thams cad la/ /legs par brtags te mdzad pa dang / /yang dag ji bzhin don gzigs pas/ /gzhan gyi dring mi 'jog par mdzod/ /chos las rgyal srid bde ba dang / /phyogs rnams kun du grags
 pa yi/ /bla re rgya chen 'byung 'gyur zhing / /blon po rnams kyang kun du 'dun/ /'chi ba'i rkyen ni mang ba ste/ /gson pa yi ni nyung zad cig /de dag nyid ni 'chi ba yin/ /de bas rtag tu chos mdzod cig /'di ltar rtag tu chos mdzad na/ /'jig rten kun dang bdag nyid la/ /nyams
 bder 'gyur ba gang lags pa/ /de nyid re zhig ltog mo lags/ /chos kyis bde bar gnyid log cing / /bde bar sang pa dag tu 'gyur/ /nang gi bdag nyid skyon med pas / /rmi lam dag kyang bde ba mthong / /pha ma sri zhu lhur len dang / /rigs kyi gtso la rim gro dang / /longs
 spyod legs spyod bzod gtong dang / /tshig 'jam phra ma med bden pa'i/ /brtul zhugs rtse gcig byas pa des / /lha yi dbang po nyid thob nas/ /da dung du yang lha dbang bgyid/ /de bas de 'dra'i chos bsten mdzod/ /rje'u chos sum brgya'i kha zas dag /nyin re dus gsum byin
 ba bas/ /byams pa yud tsam thang cig gi /bsod nams dag la char mi phod/ /lha mi byams par 'gyur ba dang / /de dag kyang ni bsrung ba dang / /yid bde ba dang bde mang dang / /dug dang mtshon gyis gnod med dang / /'bad pa med par don thob dang / /tshangs pa'i 'jig
 rten skye 'gyur te/ /gal te grol bar ma gyur kyang / /byams chos yon tan brgyad 'thob po/ /sems can rnams ni byang chub tu/ /sems bskyed bcug cing brtan byas na / /ri dbang rgyal po ltar brtan zhing / /byang chub sems ni rtag tu 'thob/ /dad pas mi khom 'gro mi 'gyur/ /
 khrims kyis 'gro ba bzang por 'gro/ /stong pa nyid la goms pa yis/ /chos rnams kun la chags med 'thob/ /g.yo med pas ni dran ldan 'thob/ /sems par byed pas blo gros 'thob/ /bkur sti byed pas don rtogs ldan/ /chos srung shes rab can du 'gyur/ /chos mnyan pa dang
 sbyin pa dag / sgrib pa med par byas pa yis/ /sangs rgyas rnams dang 'grogs pa nyid/ /'dod pa myur du 'thob par 'gyur/ /ma chags pas ni don 'grub ste/ /ser sna med pas longs spyod 'phel/ /nga rgyal med pas gtso bor 'gyur/ /chos la bzod pas gzungs 'thob po/ /snying
 po lnga rnams byin pa dang / /'jigs la mi 'jigs byin pa yis/ /bdud rnams kun gyis mi tshugs shing / /stobs po che yi mchog tu 'gyur/ /mchog rten mar me phreng ba dang / /mun pa dag tu sgron ma dang / /mar me 'bru mar byin pa yis / /lha yi mig ni 'thob
 par 'gyur/ /mchod rten mchod pa rol mo dang / /dril bu dag ni phul ba dang / /dung dang rnga ni rab phul bas/ /lha yi rna ba 'thob par 'gyur/ /gzhan gyi 'khrul pa mi gleng zhing / /yan lag nyams pa rnams mi brjod/ /sems ni rjes su bsrungs pas na/ /gzhan gyi sems ni
 shes pa 'thob/ /lham dang bzhon pa byin pa dang / /nyam chung bkur ba byas ba dang / /bzhon pas bla ma bkur ba yis/ /mkhas pas rdzu 'phrul thob par 'gyur/ /chos kyi ched dang de bzhin du/ /chos gzhung don dag dran pa dang / /chos kyi sbyin pa dri med pas/ /tshe rabs dran pa
 'thob par 'gyur/ /dngos rnams ngo bo nyid med par/ /yang dag ji bzhin yongs shes pas/ /mngon shes drug pa zag pa kun/ /zad pa mchog ni 'thob par 'gyur/ /sems can thams cad dgrol ba'i phyir/ /de bzhin nyid shes mnyam ldan pa/ /snying rjes brlan pa bsgoms
 pa yis/ /rnam pa'i mchog ldan rgyal bar 'gyur/ /smon lam sna chogs dag pa yis/ /sangs rgyas zhing ni dag par 'gyur/ /thub dbang rin chen phul ba yis/ /mtha' yas 'od ni rnam par 'phro/ /de bas de ltar las 'bras dag /mthun par mkhyen mdzad don du ni/ /'gro
 la phan pa rtag tu mdzod/ /de nyid khyod la phan pa lags/ /rin po che'i phreng ba las byang chub kyi tshogs bsdus pa zhes bya ba ste le'u gsum pa'o// //gang phyir bzod dam mi bzod pa/ /shes par dka' pas rgyal po ni/ /chos min rigs pa min spyod kyang / /rjes
 su 'tsho ba phal cher stod/ /re zhig gzhan su'ang rung ba la'ang / /mi snyan phan pa brjod dga' na/ /sa chen mnga' ba'i rgyal khyod la/ /dge slong bdag lta smos ci dgos/ /khyod kyis dgyes pa mdzad slad dang / /'gro ba la yang brtse slad du/ /khyod la mi snyan yang sman pa/ /bdag lta
 gcig pus te por gsol/ /bden 'jam don ldan 'phrod pa ni/ /brtse bas dus su slob ma la/ /brjod par bya zhes bcom ldan gsung / /de lta bas na de skad brjod/ /brtan pa khro ba med gyur pa/ /bden pa'i tshig ni bsgrags pa na/ /khrus byed bzang po'i chu bzhin du/ /mnyan 'os nyams
 su len par bgyid/ /khyod la bdag gis 'di dang ni/ /gzhan du phan pa brjod bgyid pa/ /mkhyen par mdzod de bdag nyid dang / /gzhan la sman par 'gyur de mdzod/ /slong la sngon chad sbyin bgyis pas/ /don brnyes gyur na mi sbyin na/ /byas mi gzo dang chags pa yis/ /phyi nas don rnams
 'thob mi 'gyur/ /'jig rten 'di ni las byed pa/ /bla med lam brgyags khyer mi btub/ /slong ba dman pa ma dran par/ /phyi ma'i tshe na brgya 'gyur te / /rtag tu thugs rje chen po dang / /mdzad pa rgya chen las dgyes mdzod/ /rgya chen las las 'bras bu ni/ /thams cad rgya chen 'byung bar 'gyur/ /
 rgyal po dman pa rnams kyis ni/ /yid la'ang bsams par ma gyur pa'i/ /chos bzhin dkon mchog gsum gyi rten/ /grags pa dpal dang ldan pa'i mdzod/ /chos bzhin gang zhig kun 'byor pa'i/ /rgyal po ba spu mi ldang ba/ /shi na'ang snyan bar mi 'gyur bas/ /rgyal po de ni ma byas bla/ /
 rgya rab che phyir rgya chen rnams/ /snyems bral spro ba skyed byed cing / /dman rnams spro ba 'joms byed pa/ /bdog pa thams cad gtugs te mdzod/ /khyod ni bdog pa kun bor nas/ /dbang med ga shed gshegs 'tshal bas/ /chos kyi slad du spyad pa kun/ /khyod kyi mdun du 'dor ba
 nyid/ /mi dbang snga ma'i bdog pa kun/ /sar pa yis ni dbang gyur na/ /snga ma'i chos sam bde ba 'am/ /grags pa dag tu 'gyur ram ci/ /nor spyad pa yis 'di la bde/ /byin pas gzhan du bde bar 'gyur/ /ma spyad ma sbyin chud zos pas/ /sdug bsngal 'ba' zhig ga la bde/ /
 'chi khar blon po rjes ngan can/ /gces par mi 'dzin rgyal po gsar/ /byams par 'dod pa rnams kyis kyang / /dbang med byas pas sbyin mi spyod/ /de bas rnal gnas myur du ni/ /bdog pa kun gyis chos gzhi mdzod/ /'chi bdag rkyen gyi nang gnas pa/ /rlung dmar nang 'dug mar
 me bzhin/ /sngon gyi rgyal pos chos kyi gzhi/ /lha khang la sogs gzhan bgyis pa/ /gang dag lags pa de dag kyang / /snga lugs bzhin du skyong bar mdzod/ /de dag 'tshe med dge spyod cing / /brtul zhugs la gnas glo bur byams/ /bden bzod 'thab
 krol ma mchis pa/ /rtag tu brtson rnams spyod du gsol/ /long ba nad pa dman pa dang / /mgon med sdug phongs yan lag nyams/ /de dag kyang ni zas dang skom/ /dgag pa med par snyoms thob mdzod/ /chos ldan don du mi gnyer ba/ /rgyal po gzhan yul gnas rnams
 la'ang / /rjes su gzung bar bgyid pa dag /ci rigs pa ni rab tu mdzod/ /chos kyi gzhi ni thams cad du/ /chos 'khor sna bos mi g.yel ba/ /mi gzan mkhas shing chos mthun pa/ /de dag rnams la mi gnod skos/ /lugs shes chos dang ldan la 'byar/ /gtsang zhing snying nye mi
 sdang ba/ /rigs bzang ngang tshul phun sum tshogs/ /byas pa gzo ba'i blon po skos/ /gtong phod ma chags dpa' ba dang / /'jam zhing ran spyod brtan pa dang / /rtag tu bag ni yod pa dang / /chos dang ldan pa'i dmag dpon skos/ /chos kyi ngang tshul gtsang la gzo / /don shes
 gtsug lag la mkhas pa/ /tshul ldan snyoms shing ngang 'jam pa/ /rgan rabs rnams ni sna bor skos/ /zla re zhing ni de dag las/ /nyid kyis 'du 'god kun gson te/ /gsan nas chos kyi gzhi sogs kyi/ /don kun nyid kyis bka' stsol cig /khyod kyi rgyal srid chos don du/ /
 grags don 'dod slad ma lags na/ /de ni shin tu 'bras bur bcas/ /de las gzhan du 'gyur ma mchis/ /mi dbang da lta 'jig rten na/ /phal cher phan tshun ltor 'dzud pas/ /ji ltar khyod kyis rgyal srid dang / /chos su 'gyur ba de bzhin gson/ /shes pas rgan zhing rigs
 bzang ba/ /rig pa shes la sdig la 'dzem/ /nang gshin dgos pa mthong 'gyur ba/ /mang po rtag tu khyod kyis sogs/ /chad pa gzung dang brdeg la sogs/ /rigs pa'ang khyod kyis mi bgyi ste/ /snying rjes brlan par bgyis nas ni/ /rtag tu rjes su gzung bar mdzod/ /mi
 bzad sdig pa byed pa yi / /lus can dag ni thams cad la'ang / /rgyal po khyod kyis rtag par yang / /snying rjes phan sems kho na skyed / /mi bzad sdig can gsod byed la/ /khyad par du yang snying rje bgyi/ /bdag nyid nyams pa de bdag nyid/ /bdag nyid chen po'i snying rje'i gnas/ /
 nyin gcig bzhin nam zhag lnga bar/ /nyam chung btson rnams gtong bar mdzod/ /lhag ma rnams kyang ci rigs mdzod/ /'ga' yang mi dgrol min par mdzod/ /khyod ni 'ga' la'ang gtang sems med/ /de las sdom pa min pa skye/ /sdom pa ma yin de las ni/ /rgyun mi 'chad
 par sdig pa sogs/ /btson ni ji srid ma btang ba/ /de yi bar du 'dreg mkhan dang / /khrus dang bza' dang btung ba dang / /sman dang ldan pas bde bar bgyi/ /snod med pa yi bu dag la/ /snod du rung bar bya 'dod ltar/ /snying rje yis ni tshar gcad
 bya'i/ /sdang bas ma yin nor phyir min/ /rab sdang gsod par byed pa'i mi/ /brtags te legs par shes bgyis nas/ /mi gsad gnod par mi bgyi bar/ /yul nas bskrad pa dag tu mdzod/ /rang dbang yod par yul kun yang / /bya ma rta yi spyan gyis gzigs/ /rtag tu bag yod
 dran ldan pas/ /chos dang mthun pa'i don mdzod cig /yon tan gnas la bdag nyid kyis/ /rab sbyin bkur sti rim gro dag /rgya che rjes su mthun sbyar zhing / /lhag ma rnams la'ang ci rigs bgyi/ /rgyal po'i ljon shing bzod grib can/ /bkur sti'i me tog rgyas gyur cing / /
 rab sbyin 'bras bu che ldan la/ /dmangs kyi bya rnams bsten par 'gyur/ /rgyal po gtong ba'i ngang tshul can/ /brjid dang ldan na dga' 'gyur te/ /sug smel na le sham rtsub pa'i/ /sha kha ra yi la du bzhin/ /de ltar rigs pas dpyad na ni/ /khyod kyi rgyal srid 'god mi
 'gyur/ /rigs pa ma yin mi 'gyur zhing / /chos min ma yin chos su 'gyur/ /rgyal srid 'jig rten pha rol nas/ /bsnams te ma byon bsnams mi 'gyur/ /chos kyis snyems pas de'i slad du/ /chos min khyod kyis bgyi mi rigs/ /'tshog chas zong ni rgyal srid kyis/ /sdug
 bsngal 'tshog chas brgyud pa dag / ci nas bsgrub par mi 'gyur bar/ /rgyal po de ltar nan tan mdzod/ /'tshog chas zong ni rgyal srid kyis/ /rgyal srid 'tshog chas brgyud pa dag /rgyal po ci nas mnyes 'gyur ba/ /de lta bur ni nan tan mdzod/ /gling bzhi pa
 yi sa thob kyang / /'khor los sgyur ba'i bde ba ni/ /lus kyi dag dang sems kyi ste/ /'di gnyis kho nar zad par 'dod/ /lus kyi tshor ba bde ba ni/ /sdug bsngal phyir na bcos ma tsam/ /sems kyi 'du shes rang bzhin te/ /rtog pas byas pa kho nar zad/ /'jig rten
 bde bas bdog pa kun/ /sdug bsngal phyir ni bcos tsam dang / /rtog pa tsam nyid yin de'i phyir/ /de ni don du don med do/ /gling dang yul dang gnas dang khyim/ /khyogs dang stan dang gos rnams dang / /mal cha bza' btung glang po rta/ /bud med spyad bya re rer zad/ /gang tshe
 gang la sems 'jug pa/ /de tshe de yis bde zhes grag /lhag ma yid la mi byed pas/ /de tshe don du don med nyid/ /mig la sogs pa'i dbang po lngas/ /yul lnga 'dzin tshe gang gi phyir/ /rtog par mi byed de yi phyir/ /de tshe de la bde ba med/ /gang tshe yul ni gang dang gang / /
 dbang po gang gis shes gyur pa/ /de tshe lhag mas lhag ma min/ /gang tshe de phyir don med nyid/ /dbang po yis ni mig gyur pa/ /'das pa'i yul gyi rnam pa la/ /yid kyis dmigs nas rtogs pa na / /bde'o snyam du rlom par byed/ /'di ni dbang po gcig gis ni/ /don gcig shes
 pa gang yin pa/ /de yang don med par don med/ /don yang de med par don med/ /ji ltar pha dang ma dag la/ /brten nas bu ni 'byung bshad pa/ /de bzhin mig dang gzugs brten nas/ /rnam par shes pa 'byung bar bshad/ /yul ni 'das dang ma 'ongs rnams/ /dbang po dang bcas
 don med la/ /de gnyis las tha dad med phyir/ /gang dag da ltar yang don med/ /ji ltar mig ni 'khrul pa yis/ /mgal me'i 'khor lo 'jig byed pa/ /de bzhin dbang po rnams kyis ni/ /de lta'i yul dag 'dzin par byed/ /dbang po rnams dang dbang don rnams/ /'byung
 ba rnams kyi rang bzhin 'dod/ /'byung ba so sor don med pas/ /'di dag don du don med do/ /'byung rnams so sor tha dad na/ /bud shing med ba'i mer thal 'gyur/ /'dus na mtshan nyid med 'gyur te/ /lhag ma la yang de ltar nges/ /de ltar 'byung rnams rnam gnyis su'ang / /don
 med pas na 'dus don med/ /'dus pa don med nyid kyi phyir/ /gzugs kyang don du don med do/ /rnam shes tshor dang 'du shes dang / /'du byed rnams kyang thams cad du/ /so sor bdag nyid don med phyir/ /dam pa'i don du don med do/ /ji ltar sdug bsngal phyir bcos la/ /don du bde
 bar nga rgyal byed/ /de bzhin bde 'joms 'byung ba la/ /sdug bsngal du yang nga rgyal byed/ /da ltar ngo bo nyid med phyir/ /bde dang phrad pa'i sred pa dang / /sdug bsngal bral ba'i sred pa spong / /de phyir de ltar mthong ba grol/ /gang gis sems mthong 'gyur zhe na/ /tha snyad du ni
 sems brjod de/ /sems byung med par sems mi 'byung / /don med lhan cig mi 'dod do/ /de ltar yang dag ji bzhin du/ /'gro ba don med shes nas ni/ /rgyu med pa yi me bzhin du/ /gnas med len med mya ngan 'da'/ /de ltar byang chub sems dpas kyang / /mthong nas
 byang chub nges par 'dod/ /de ni snying rje 'ba' zhig gis/ /byang chub bar du srid mtshams sbyor/ /de bzhin gshegs pas theg chen las/ /byang chub sems dpa'i tshogs bstan na/ /de la kun du rmongs pa dang / /rab tu sdang bas smod par byed/ /yon tan skyon dag mi shes
 pa'am/ / yon tan skyon du 'du shes pa'am/ /yang na yon tan sdang ba zhig /theg pa che la smod byed grang / /gzhan la gnod pa skyon dang ni/ /gzhan la phan pa yon tan du/ /shes na theg pa chen po la/ /smod byed yon tan sdang zhes brjod/ /rang gi don la mi lta zhing / /gzhan
 don ro gcig dga' ba gang / /yon tan 'byung gnas theg chen te/ /des na des sdang bsreg par 'gyur/ /dad pa can ni bzung nyes pas/ /cig shos sdang zhing khros pa yis/ /dad pa can yang bsreg bshad na/ /sdang bas phyir phyogs smos ci dgos/ /dug gis dug ni bsal bya
 bar/ /ji ltar sman dpyad las bshad bzhin/ /sdug bsngal gyis kyang mi phan pa/ /bsal bar bya ba ci zhig 'gal/ /chos rnams sngon du yid 'gro zhing / /yid ni gtso bo zhes grags pas/ /sdug bsngal gyis kyang phan yid kyis / /phan par byed pa cis mi
 phan/ /mi bde'ang phyis rjes phan 'gyur ba/ /bya na bdag dang gzhan dag la/ /bde phan lta zhig ci smos te/ /chos 'di gna' yi lugs yin no/ /gal te bde chung yongs btang bas/ /bde ba rgya chen mthong 'gyur na/ /brtan pas bde chen yangs gzigs la/ /bde ba chung ngu
 btang bar mdzod/ /gal te de yang mi bzod na/ /des na sman pa la sogs pa/ /mi zhig sman ni sbyin byed pa/ /bcom 'gyur 'di ni rtad ma yin/ /gnod par 'gyur ba gang yin de/ /la lar mkhas pas phan par mthong / /spyir btang dmigs kyis bsal ba dag /bstan
 bcos dag ni kun la bsngags/ /theg pa chen bo gang zhig las/ /snying rje sngon btang spyod yul dang / /ye shes dri ma med bshad pa/ /sems yod su zhig de la smod/ /shin tu rgya che rab zab la/ /sgyid lug bdag nyid ma sbyangs pas/ /bdag gzhan dgra rnams rmongs pa yis/ /
 'di ni theg pa che la smod/ /sbyin dang tshul khrims bzod brtson 'grus/ /bsam gtan shes rab snying rje'i bdag /theg chen yin na de yi phyir/ /'di la nyes bshad ci zhig yod/ /tshul khrims sbyin pas gzhan gyi don/ /brtson 'grus bzod pas bdag nyid kyi / /bsam
 gtan shes rab thar pa'i rgyu/ /theg chen don ni bsdus pa yin/ /bdag dang gzhan phan thar pa'i don/ /mdor sangs rgyas bstan de dag ni / /pha rol phyin drug kho na yin/ /de bas 'di ni sangs rgyas bka'/ /byang chub lam chen bsod nams dang / /ye shes rang bzhin sangs
 rgyas kyis/ /gang las bstan pa'i theg chen de/ /mi shes ldongs rnams mi bzod do/ /yon tan mkha' ltar bsam yas pas/ /rgyal po'i yon tan bsam yas gsungs/ /gang phyir sangs rgyas bdag nyid che/ /theg chen las bshad 'dir bzod kyi / /'phags pa
 sha ra dwa ti'i bus/ /tshul khrims tsam yang mi shes pas/ /des na sangs rgyas bdag nyid che/ /de bsam yas par ci mi bzod/ /theg pa che las skye med bstan/ /gzhan gyi zad pa stong pa nyid/ /zad dang mi skye don du ni/ /gcig pas de phyir bzod par gyis/ /stong nyid
 sangs rgyas che bdag nyid/ /de ltar rigs pas rjes bltas na/ /theg chen cig shos las gsungs pa/ /mkhas pa rnams la cis mi mnyam/ /de bzhin gshegs dgongs gsungs pa rnams/ /shes par bla min de yi phyir/ /theg gcig theg pa gsum gsungs pas/ /
 btang snyoms kyis ni bdag bsrung bya/ /btang snyoms kyis ni sdig mi 'gyur/ /sdang bas sdig 'gyur dger mi 'gyur/ /de bas theg chen zhe sdang ba/ /bdag legs 'dod pas byar mi rigs/ /nyan thos theg pa de las ni/ /byang chub sems dpa'i
 smon lam dang / /spyod pa yongs bsngo ma bshad des/ /byang chub sems dpar ga la 'gyur/ /byang chub sems dpa'i byang chub phyir/ /byin rlabs sangs rgyas kyis ma bshad/ /don 'di la ni rgyal ba las/ /lhag pa'i tshad ma gzhan su yod/ /byin rlabs 'phags pa'i bden don dang / /
 byang chub phyogs mthun ldan pa yi/ /lam ni nyan thos thun mong las/ /sangs rgyas 'bras bu gang gis lhag /byang chub spyod la gnas pa'i don/ /mdo sde las ni bka' ma stsal/ /theg pa che las bka' stsal pas/ /de phyir mkhas pa rnams kyis bzung / /brda sprod pa dag
 ji lta bur/ /yi ge'i phyi mo'ang klog 'jug ltar/ /de bzhin sangs rgyas gdul bya la/ /ji tsam bzod pa'i chos ston to/ /kha cig las ni sdig pa las/ /rnam par bzlog phyir chos ston te/ /kha cig bsod nams 'grub bya'i phyir/ /kha cig la ni gnyis brten pa/ /kha cig
 la ni gnyis mi brten/ /zab mo khu 'phrigs can 'jigs pa/ /stong nyid snying rje'i snying po can/ /byang chub sgrub pa kha cig la/ /de ltar mkhas pas theg chen la/ /khong khro ba ni zad bya zhing / /rdzogs pa'i byang chub 'grub bya'i phyir/ /lhag par rab tu dang bar bya/ /theg pa che
 la rab dang zhing / /de las bshad pa spyad pa yis/ /bla med byang chub thob 'gyur zhing / /bde ba kun kyang zhar la 'grub/ der ni sbyin dang tshul khrims dang / /bzod pa'i chos ni khyad par du/ /khyim pa la bshad snying rje yi/ /snying po can
 de bstan goms mdzod/ /'on te 'jig rten mi srun phyir/ /chos kyi rgyal srid bgyid dka' na/ /des na chos dang grags don du/ /khyod kyis rab byung thob mdzad rigs/ /rin po che'i phreng ba las rgyal po'i tshul bstan pa ste le'u bzhi pa'o// //de nas
 rab tu byung ba yis/ /dang por bslab la rab gus bya/ /so sor thar pa 'dul bcas dang / /mang thos don gtan dbab la bsgrim/ /de nas nyes pa phran tshegs shes/ /nyes pa'i gzhi rnams spang bar bya/ /lnga bcu rtsa bdun bsgrags pa rnams/ /'bad de nges
 par brtag par bya/ /khro ba sems kyi 'khrugs pa ste/ /de dang rjes 'brel khon du 'dzin/ /'chab pa sdig pa 'chab pa ste/ /'tshig pa sdig la zhen pa'o/ /g.yo ni shin tu slu ba ste/ /sgyu ni sems rgyud gya gyu la/ /phrag dog gzhan gyi yon tan gdung / /ser sna gtong
 bas 'jigs pa nyid/ /ngo tsha med dang khrel med pa/ /rang dang gzhan la mi 'dzem pa'o/ /khengs pa 'dud par mi byed pa/ /nyes rtsom khros pas bslad pa'o/ /rgyags pa dregs pa bag med pa/ /dge ba rnams la mi sbyor ba'o/ /nga rgyal rnam pa bdun yin te/ /de ni
 rab tu phye ste bshad/ /de la mngon par rlom byed pa/ /dman pa dman zhing mnyam dang mnyam/ /mnyam pas lhag pa mnyam snyam pa/ /bdag nyid nga rgyal zhes pa'o/ /chos gang bdag nyid khyad 'phags dang / /mnyam par rlom pa gang yin de / /lhag pa'i nga rgyal
 khyad 'phags pas/ /khyad par 'phags par rlom pa gang / /shin tu mtho bas mtho snyam pa/ /nga rgyal las kyang nga rgyal te/ /'bras kyi steng du phol mig dag /byung ba bzhin du thu ba yin/ /nye bar len pa zhes bya ba/ /lnga po stong pa de dag la/ /rmongs pas nga
 snyam 'dzin pa gang / /de ni nga'o snyam par bshad/ /'bras ma thob par thob snyam pa/ /gang yin mngon pa'i nga rgyal te/ /sdig las byed la bstod pa ni/ /mkhas pas log pa'i nga rgyal rtogs/ /bdag dgos med pa nyid do zhes/ /bdag nyid smod pa gang yin des/ /dman
 pa'i nga rgyal zhes bya ste/ /de dag mdor bdun bshad pa'o/ /tshul 'chos rnyed dang bkur sti'i phyir/ /dbang po sdom par byed pa ste/ /kha gsag rnyed dang bkur sti'i phyir / /tshig 'jam sngar ni smra ba'o/ /gzhogs slong de ni thob bya'i phyir/ /gzhan gyi rdzas la bsngags byed pa'o / /
 thob kyis 'jal ba rnyed pa'i phyir/ /mngon sum gzhan la smod byed pa/ /rnyed pas rnyed pa rnam 'dod pa/ /sngar thob pa la bsngags byed pa'o/ /skyon zlos gzhan gyi 'khrul gyur pa/ /de dang de ni gang zlos pa'o/ /sbungs med so sor ma brtags par/ /nad las gyur pa'i slong
 ba'am/ /bdag gi yo byad ngan pa la/ /chags ngan le lo can gyi yin/ /tha dad 'du shes 'du shes gang / /chags sdang mun gyis bsgribs pa'o/ /yid la mi byed gang yin de/ /sems la lta ba med par bshad/ /mthun par bya ba rnams la ni/ /le los bkur sti nyams
 pa gang / bla mar bcos ldan tshul min te/ /skye bo ngan pa yin par 'dod/ /zhen pas kun nas dkris pa chung / /'dod pa'i 'dod chags las byung ba'o/ /yongs zhen 'dod pa las byung ba'i/ /kun nas dkris pa che rab yin/ /chags pa rang gi rdzas la ni/ /chags pas
 'dod chags ldan pa'i yid/ /gzhan gyi rdzas la zhen pa ni/ /mi rigs chags pa zhes bya'o/ /spang bya bud med chags ston pa/ /chags pa ma yin 'dod chags so/ /sdig 'dod yon tan med bzhin du/ /yon tan ldan par tshul 'chos pa'o/ /'dod chen shin tu brkam
 pa ste/ /chog shes dpal las 'da' ba'o/ /thob 'dod bdag nyid ci nas kyang / /yon tan yang dag ldan shes 'dod/ /mi bzod gnod pa byed pa dang / /sdug bsngal dag kyang mi bzod pa'o/ /tshul med slob dpon bla ma yi/ /bya ba rnams la ma gus pa'o/ /bka'
 blo bde ba ma yin gang / /chos mthun tshig smras ma gus pa'o/ /nye du dang 'brel rnam rtog ni/ /nye du la byams chags pa'o/ /de bzhin yul sred de don du/ /de yi yon tan brjod pa'o/ /de bzhin mi 'chi rtogs pa gang / /'chi ba'i 'jigs
 pas mi dogs pa'o / /rjes rnam rig dang ldan rtog ni/ /bdag nyid ci nas gzhan dag gi /yon tan bdog pa'i rnam pa yis/ /bla mar byed par 'gyur snyam pa'o/ /gzhan rjes chags dang ldan pa yi/ /rnam rtog gang yin gzhan dag la/ /chags dang gnod sems reg
 pa yis/ /phan dang mi phan rnams sems pa'o/ /mi dga' brtan pa med pa yi/ /phrag dog rnyogs pa'i yid yin no/ /snyam pa brtson pa med pa'i lus/ /sgyid lug don ni nyes pa yin/ /'gyur ba nyon mongs dbang gis ni/ /lus dang kha dog 'gyur ba'o/ /zas mi
 'dod pa bza' drags pas/ /lus mi bde ba yin par bshad/ /sems ni shin tu dma' ba nyid/ /sems zhum yin pa nyid du bstan / /'dod 'dun yon tan lnga dag pa / /'dod pa don du gnyer ba nyid/ /gnod sems dag dang grogs dang dgra'i/ /phyogs la dus
 gsum don min pa/ /gnod byas gnod pa gnod dogs phyogs/ /dogs pa'i gzhan la gnod pa'i sems/ /rgyu dgu las ni byung ba yin/ /lus sems lci phyir las bral ba/ /gang yin pa ni rmi ba'o/ /gnyid ni gnyid nyid rgod pa ni/ /lus sems rab tu ma zhi ba'o/ /
 'gyod pa ngan par byas la 'gyod/ /phyis gdung ba las byung ba'o/ /bden dang dkon mchog gsum stsogs la/ /blo rnam gnyis ni the tshom mo/ /de dag byang chub sems dpas spang / /sdom brtson can gyis lhag par spang / /nyes pa de rnams dang bral ba / /yon tan rnams
 la bde blag bsten / /de la byang chub sems dpa' yi / /yon tan mdor bstan bya ba ni/ /sbyin dang tshul khrims bzod brtson 'grus/ /bsam gtan shes rab snying brtse sogs/ /sbyin pa rang nor yongs gtong ba/ /tshul khrims gzhan phan bya ba'o/ /bzod pa khro ba spangs pa
 ste/ /brtson 'grus dge la spro ba nyid/ /bsam gtan rtse gcig nyon mongs med/ /shes rab bden don gtan la 'bebs/ /snying brtses sems can thams cad la/ /snying rje ro gcig blo gros so/ /sbyin pas longs spyod khrims kyis bde/ /bzod pas mdangs ldan
 brtson pas brjid/ /bsam gtan gyis zhi blo yis grol/ /snying brtse bas ni don kun 'grub/ /bdun po 'di dag ma lus par/ /cig car pha rol phyin pa yis/ /ye shes bsam gyis mi khyab yul/ /'jig rten mgon po nyid thob 'gyur/ /ji ltar nyan thos theg pa
 la/ /nyan thos sa ni brgyad bshad pa/ /de bzhin theg pa chen po la/ /byang chub sems dpa'i sa bcu'o/ /de dag dang por rab dga' ba/ /byang chub sems dpa' dga' byed phyir/ /kun du sbyor ba gsum spangs shing / /de bzhin gshegs pa'i rigs skyes phyir/ /
 de yi rnam par smin pas na/ /sbyin pa'i pha rol phyin mchog 'gyur/ /'jig rten khams ni brgya g.yo zhing / /'dzam gling dbang phyug chen por 'gyur/ /gnyis pa dri ma med ces bya/ /lus dang ngag dang sems kyi las/ /bcu char dri ma med pa'i phyir/ /ngang gis de
 dag la gnas phyir/ /de yi rnam par smin pas na/ /tshul khrims pha rol phyin mchog 'gyur/ /dpal ldan rin chen bdun gyi bdag /'gro phan 'khor los sgyur bar 'gyur/ /sems can rnams kyi 'chal ba'i khrims/ /spong bar byed la mkhas par 'gyur/ /
 sa gsum pa ni 'od byed pa/ /ye shes zhi ba'i 'od 'byung phyir/ /bsam gtan mngon shes skye ba dang / /'dod chags zhe sdang yongs zad phyir/ /de yi rnam par smin pas ni/ /bzod dang brtson 'grus lhag par spyod/ /lha yi dbang chen mkhas pa ste/ /'dod pa'i
 'dod chags zlog pa yin/ /bzhi pa 'od 'phro can zhes bya/ /yang dag ye shes 'od 'byung phyir/ /byang chub phyogs mthun ma lus pa/ /khyad par du ni bsgoms pa yis/ /de yi rnam par smin pas ni/ /rab 'thab bral gnas lha rgyal 'gyur/ /'jig tshogs lta ba
 rab byung ba/ /kun nas 'joms byed mkhas pa yin/ /lnga pa shin tu sbyang dka' bdud/ /kun gyis shin tu thub dka'i phyir/ /'phags pa'i bden sogs phra mo'i don/ /shes la mkhas pa 'byung ba'i phyir/ /de yi rnam par smin pas ni/ /dga' ldan gnas
 kyi lha rgyal 'gyur/ /mu stegs byed pa thams cad kyi/ /nyon mongs lta gnas zlog byed pa'o/ /drug la mngon phyogs shes bya ste/ /sangs rgyas chos la mngon phyogs phyir/ /zhi gnas lhag mthong goms pa yis/ /'gog pa thob pas rgyas pa'i phyir/ /de yi rnam par smin
 pas ni/ /lha yi rgyal po rab 'phrul 'gyur/ /nyan thos rnams kyis mi 'phrogs pa/ /lhag pa'i nga rgyal can zhi byed/ /bdun pa ring du song ba ste/ /grangs ni ring du song ldan phyir/ /gang phyir skad cig skad cig la/ /der ni 'gog la snyoms par 'jug /de
 yi rnam par smin pas ni/ /dbang sgyur lha yi bdag por 'gyur/ /'phags pa'i bden mngon rtogs shes pa'i/ /slob dpon khyu mchog chen por 'gyur/ /de bzhin brgyad pa gzhon nu'i sa/ /mi g.yo ba de mi rtog phyir/ /mi g.yo de bzhin lus dang ni/ /ngag sems spyod yul
 bsam mi khyab/ /de yi rnam par smin pas ni/ /stong gi bdag po'i tshangs par 'gyur/ /dgra bcom rang sangs rgyas sogs kyis/ /don gtan 'bebs la 'phrogs pa med/ /sa dgu pa ni legs pa yi/ /blo gros zhes bya rgyal tshab bzhin/ /gang phyir so so yang dag
 rig / thob pas 'di la blo gros bzang / /de yi rnam par smin pas ni/ /stong gnyis bdag po tshangs par 'gyur/ /sems can bsam pa dris pa la/ /dgra bcom sogs kyis 'phrogs pa med/ /bcu pa chos kyi sprin yin te/ /dam pa chos kyi char 'bebs phyir/ /byang chub sems
 dpa' sangs rgyas kyis/ /'od zer dag gis dbang bskur phyir/ /de yi rnam par smin pas na/ /gnas gtsang lha yi bdag por 'gyur/ /bsam yas ye shes yul gyi bdag /dbang phyug chen po mchog yin no/ /de ltar bcu po de dag ni/ /byang chub sems dpa'i sa bcur bsgrags/ /
 sangs rgyas rnams kyi sa gzhan te/ /rnam pa kun du gzhal yas par/ /rgya che de ni stobs bcu dang / /ldan pa yin pa tsam zhig brjod/ /de yi stobs ni re re yang / /'gro ba kun bzhin dpag tu med/ /sangs rgyas rnams kyi tshad med nyid/ /phyogs rnams kun gyi nam mkha' dang / /
 sa chu me rlung ji lta ba/ /de tsam zhig tu brjod pa bas/ /gal te rgyu ni de tsam du/ /tshad med nyid du ma mthong na/ /sangs rgyas rnams kyi tshad med pa/ /de la yid ches mi 'gyur bas/ /de phyir sku gzugs mchod rten gyi/ /spyan snga 'am yang na gzhan yang rung / /tshigs su bcad pa
 nyi shu 'di/ /nyin gcig bzhin yang dus gsum brjod/ /sangs rgyas chos dang dge 'dun dang / /byang chub sems dpa' rnams la yang / /rnam kun btud de skyabs mchis nas/ /mchod 'os rnams la phyag 'tshal lo/ /sdig pa las ni ldog bgyid cing / /bsod nams thams
 cad yongs su bzung / /lus can kun gyi bsod nams dag /kun la rjes su yi rang ngo / /bdag ni spyi btud thal sbyar te/ /chos kyi 'khor lo bskor slad dang / /'gro gnas bar du bzhugs slad du/ /rdzogs pa'i sangs rgyas rnams la gsol/ /de ltar bgyis pa'i
 bsod nams dang / /bdag gis bgyis dang ma bgyis gang / /des ni sems can thams cad kyang / /bla med byang chub sems ldan shog /sems can thams cad dri med dbang / /yongs rdzogs mi khom kun 'das shing / /spyod pa rang dbang yod pa dang / /'tsho ba bzang dang
 ldan par shog / lus can dag ni thams cad kyang / /lag na rin chen nyid ldan zhing / /yo byad thams cad mtha' yas pa/ /'khor ba srid du mi zad shog /bud med thams cad dus kun du/ /skyes mchog nyid du 'gyur bar shog /lus can thams cad rig pa dang / /rkang par
 ldan pa nyid du shog / lus can kha dog ldan pa dang / /gzugs bzang gzi brjid che ba dang / /blta na sdug cing nad med dang / /stobs can tshe dang ldan par shog /thams cad thabs la mkhas gyur te/ /sdug bsngal kun las thar pa dang / /dkon mchog gsum la gzhol
 ba dang / /sangs rgyas chos nor che ldan shog /byams dang snying rje dga' ba dang / /nyon mongs btang snyoms gnas pa dang / /sbyin dang tshul khrims bzod brtson 'grus/ /bsam gtan shes rab kyis brgyan cing / /tshogs rnams thams cad yongs
 rdzogs te/ /mtshan dang dpe byad gsal ba dang / /bsam gyis mi khyab sa bcu dag /rgyun mi 'chad par bgrod par shog /bdag kyang yon tan de dag dang / /gzhan kun gyis kyang brgyan ldan te/ /nyes pa kun las grol ba dang / /sems can kun mchog
 byams pa dang / /sems can kun yid re ba yi/ /dge ba thams cad rdzogs bgyid cing / /rtag tu lus can thams cad kyi/ /sdug bsngal sel bar bgyid par shog /'jig rten kun na skye bo gang / /su dag 'jigs pas skye bo kun / /bdag gi ming tsam thos
 pas kyang / /shin tu 'jigs pa med par shog /bdag ni mthong dang dran pa dang / /ming tsam thos pas skye bo rnams/ /rab dang 'khrug med rnal ma dang / /rdzogs pa'i byang chub nges pa dang / /tshe rabs kun du rjes 'brang ba'i/ /mngon shes lnga po thob par shog /
 sems can kun la rnam kun du/ /rtag tu phan bde bgyid par shog /'jig rten kun la skye bo gang / /sdig pa byed par 'dod gyur pa/ /de dag thams cad gnod med par/ /rtag tu cig car zlog gyur cig /sa dang chu dang me dang rlung / /sman dang dgon pa'i shing bzhin
 du/ /rtag tu sangs rgyas thams cad kyis/ /rang dgar dgag med spyod par shog /sems can rnams la srog bzhin phangs / /bdag las de dag ches phangs shog /bdag la de dag sdig smin cing / /bdag dge ma lus der smin shog /ji srid sems can
 'ga' zhig kyang / /gang du ma grol de srid du/ /de phyir bla na med pa yi/ /byang chub thob kyang gnas gyur cig /de ltar brjod pa'i bsod nams gang / /gal te de ni gzugs can gyur/ /gang gA'i bye ma snyed kyi ni/ /'jig rten khams su shong mi 'gyur/ /de ni
 bcom ldan 'das kyis gsungs/ /gtan tshigs kyang ni 'di la snang / /sems can khams ni tshad med la/ /phan 'dod de ni de 'dra'o/ /de ltar bdag gis khyod la ni/ /mdor bsdus chos bshad gang yin de / /khyod la ji ltar rtag tu sku/ /phangs pa bzhin du phangs
 par mdzod/ /gang la chos de phangs gyur pa/ /de la don du bdag lus phangs/ /phangs la phan pa bya dgos na/ /de ni chos kyi byed par 'gyur/ /de bas chos ni bdag bzhin bsten / /chos bzhin du ni bsgrub pa dang / /sgrub pa bzhin du shes rab dang / / shes rab
 bzhin du mkhas pa bsten / /gtsang zhing byams la blo ldan pa/ /phebs pas phan pa smra ba la/ /gang zhig bdag ngan dogs byed pa/ /de ni rang don chud kyang gson / /gtsang zhing byams la blo ldan pa/ /spobs la phan par smra ba la/ /bdag ni mgon dang bcas 'gyur zhes/ /
 mi dbang bdag thul thugs dam mdzod/ /dge ba'i bshes gnyen de dag gi /mtshan nyid mdor bsdus mkhyen par mdzod/ /chog shes snying rje tshul khrims ldan/ /nyon mongs sel ba'i shes rab can/ /de dag gis ni khyod bsten na/ /khyod kyis mkhyen gyi gus par mdzod/ /
 lugs ni phun sum tshogs pa 'dis/ /grub pa yi ni mchog thob 'gyur/ /bden dang sems can 'jam smra zhing / /bde ba'i ngang tshul bsnyen dka' ba/ /tshul ldan khyad du gsod mi 'dod/ /rang dbang legs par smra bar mdzod/ /legs btul bag la nyal gtong dang / /brjid
 bag ldan zhing sems zhi ba/ /rgod pa med cing mtha' mi ring / /g.yo ba med dang nges par mdzod/ /zla ba nya bzhin nges pa dang / /ston gyi nya bzhin gzi ldan dang / /rgya mtsho bzhin du zab pa dang / /ri rab bzhin du ches brtan mdzod/ /nyes pa kun las rnam grol zhing / /yon tan
 kun gyis brgyan gyur te/ /sems can kun gyi nyer 'tsho dang / /thams cad mkhyen pa nyid du mdzod/ /chos 'di rgyal po 'ba' zhig la/ /bstan pa kho nar ma bas kyi / /sems can gzhan la'ang ci rigs par/ /phan par 'dod pas bstan pa lags/ /bdag dang gzhan rnams
 yang dag par/ /rdzogs pa'i sangs rgyas 'grub bgyi slad/ /rgyal po gtam du bgyi ba ni/ /gdugs re zhing yang bsam pa'i rigs/ /tshul khrims skye bo bla ma mchog bkur bzod dang de bzhin phrag dog med/ /ser sna dang bral re ba med par byas nas
 gzhan don nor can dang / /phongs par gyur la phan byed mchog dang mchog min yongs bzung dor ba dang / /don chos yongs bzung byang chub don phyir gnyer ba rnams kyis rtag tu bya/ /rin po che'i phreng ba las byang chub sems dpa'i spyod pa'i le'u ste lnga pa'o// //rgyal
 po la gtam bya ba rin po che'i phreng ba zhes bya ba slob dpon chen po 'phags pa klu sgrub kyis mdzad pa rdzogs so/ / //rgya gar gyi mkhan po dz+nyA na gar+b+ha dang / bod kyi lo tsA ba dge slong klu'i rgyal mtshan gyis bsgyur cing zhus te gtan la phab pa'o/ /slad kyis rgya gar gyi mkhan po ka
 na ka warma dang / bod kyi lo tsA ba pa tshab nyi ma grags kyis rgya dpe gsum la gtugs nas legs par bcos pa'o// @##/ /rgya gar skad du/ rat+nA ba li TI kA/ bod skad du/ rin po che'i phreng ba'i rgya cher bshad pa/ sangs rgyas dang byang chub sems dpa'