བོད་ཡིག

e-texts based on the ACIP/ALL Input

slong rin chen bzang pos bsgyur cing zhus te gtan la phab pa/ /[ ]@##/ /shes rab kyi pha rol tu phyin pa bsgom pa'i man ngag /shes rab kyi pha rol tu phyin pa la phyag 'tshal lo/ /de ltar thos pa dang bsams pa las byung ba'i shes rab bshad zin to/ /de dag rnyed nas shes rab kyi pha rol tu phyin pa bsgom par bya'o zhes sngar bstan pas/ de nas 'di'i bsgom pa brjod par bya'o/ /thos pa dang bsam pa dang bsgom pa rnams kyi rab tu sbyor ba ni gnyis te/ gus par sbyor ba dang / rgyun tu sbyor ba'o/ /rab tu sbyor ba ni goms par sbyor ba'o/ /gus pa dang dga' ba dang spro bas sbyor ba ni gus par sbyor ba yin la/ bar ma chad par sbyor ba ni rgyun du sbyor ba'o/ /bsgom pa la yang rnam pa gsum ste/ zhi gnas dang lhag mthong dang / zhi gnas dang lhag mthong zung du 'brel par 'jug pa'i bsgom pa'o/ /de la ji snyed yod par gyur pa dang / ji lta ba bzhin du gyur pa la rnam par mi rtog pa'i gzugs brnyan du gyur pa ni zhi gnas kyi dmigs pa'o/ /ji snyed yod par gyur pa dang / ji lta ba bzhin du gyur pa la rtog pa dang bcas pa'i gzugs brnyan du gyur pa ni lhag mthong gi dmigs pa'o/ / 'di ni byang chub sems dpa' gcig pu dben par gnas bcas la/ ji ltar bsams pa'i don yid la bya ste/ yid kyi brjod pa spangs nas sems nyid de ltar snang ba lan mang du yid la bya ste/ ji srid lus dang sems shin tu sbyangs pa ma skyes kyi bar du zhi gnas dang rjes su mthun pa yid la byed pa yin la/ gang gi tshe skyes pa de'i tshe zhi gnas yin no/ /lus dang sems shin tu sbyangs pa thob pa yin la de nyid la gnas te/ ji ltar bsams pa de nyid kyi don nang gi ting nge 'dzin gyi gzugs brnyan gyi spyod yul la lhag par mos pas so sor brtags par bya ste/ ji srid du lus dang sems shin tu sbyangs pa ma skyes pa de srid du ni lhag mthong dang rjes su mthun pa yin la/ gang gi tshe skyes pa de'i tshe lhag mthong yin no/ /de'i 'og tu rnam par rtog pa dang bcas pa'i gzugs brnyan nyid la dmigs te/ sems de nyid la gang gi tshe rgyun mi 'chad pa dang / bar ma chad pa'i yid la byed pa'i rgyun gyis gnyis ka yang nyams su myong ba de'i tshe zhi gnas dang lhag mthong zung du 'brel pa'i lam zhes brjod de/ de la zhi gnas dang lhag mthong ni zung yin la/ /'brel pa ni ldan pa ste phan tshun bcings nas 'jug pa'o/ /'dir sgrib pa lnga rnams kyi nang nas/ rgod pa dang 'gyod pa rnams ni zhi gnas la sgrib pa'o/ /rmugs pa dang gnyid dang the tshom ni lhag mthong la sgrib pa'o/ /'dod pa la 'dun pa dang gnod sems ni gnyis ka la sgrib pa'o/ /gang gi tshe rmugs pa dang gnyid yang dag par bsal bar 'gyur ba de'i tshe zhi gnas yongs su dag par gyur pa yin la/ gang gi tshe rgod pa dang 'gyod pa shin tu bsal bar gyur pa de'i tshe lhag mthong yongs su dag par gyur pa yin no/ /de la bcom ldan 'das kyis zhi gnas ni rnam pa dgur bka' stsal te/ ji lta ba bzhin du sems de nang du 'jog par byed/ kun du 'jog par byed/ yongs su 'jog par byed/ nye bar 'jog par byed/ 'dul bar byed/ zhi bar byed/ nye bar zhi bar byed/ rgyud gcig par byed/ sems mnyam par 'jog par byed ces gsungs so/ /de la dang po phyi rol gyi dmigs pa rnams las sems blan te nang du rab tu bsdus nas sems dang por brtag pa ni nang du 'jog pa'o/ /de nas rang bzhin gyis g.yo ba'i sems de nyid rgyun du gtod cing 'jog pa ni kun du 'jog pa'o/ /de nas dran pa nyams pas phyi rol du rnam par g.yeng ba shes par byas la slar blan nas sems de la 'jog pa ni yongs su 'jog pa'o/ /de nas sems rang bzhin gyis rgya che ba las yang dang yang du bsdus te phra rags byas nas gong nas gong du 'jog pa ni nye bar 'jog pa'o/ /de nas ting nge 'dzin gyi yon tan la bltas te de nyid la dga' ba ni 'dul ba'o/ /de nas rnam par g.yo ba'i skyon bltas nas yid phyir phyogs pa rab tu zhi bar byed pa de ni zhi ba'o/ /chags sems dang yid mi bde ba la sogs pa rnams zhi bar byed pa de ni nye bar zhi ba'o/ /de nas dmigs pa gcig la rang gi ngang gis 'jug pa ni rgyud gcig pa ste/ yang dag pa ma yin par gyur pa las 'bad pas yang dag par 'byed pa ni rgyud gcig tu byed pa'o/ /de nas rgyud gcig tu byed pa goms pa lhun gyis grub pas rang gi ngang gis 'jug pa yang dag par rang dbang thob pas 'dzin pa ni sems mnyam par 'jog pa'o/ /de skad du mdo sde rgyan las/ sems ni dmigs pa la sbyar te/ /rgyun de las ni g.yengs mi byed/ /rnam par g.yeng ba shes nas su/ /der ni slar yang myur blan nas/ /nang du sems ni bsdu bar bya/ /blo ldan gong nas gong du sbyor/ /ting 'dzin yon tan la bltas nas/ /de nyid la ni dga' bar bya/ /rnam par g.yengs pa'i skyon bltas nas/ /phyir phyogs pa ni zhi bar bya/ /chags sems yid mi bde ba la sogs/ /langs pa de bzhin du ni 'dul/ /de nas mngon par 'du byed pas/ /sems ni rnal du 'jug par bya/ /sdom brtson can gyis gus byas nas/ /'bad de 'jug pa thob par 'gyur/ /zhes gsungs so/ /lhag mthong yang bzhir gsungs te/ ji ltar yang de'i chos rnams rnam par 'byed do/ /rab tu rnam par 'byed do/ /yongs su rtog go/ /yongs su dpyod par byed do zhes gsungs so/ /de la ji snyed yod par gyur pa la so sor rtog pa ni rnam par 'byed pa'o/ /ji lta ba bzhin du gyur pa la so sor rtog pa ni rab tu rnam par 'byed pa'o/ /rnam par mi rtog pa yid la byed pa shes rab dang lhan cig tu gyur pas mtshan ma'i rnam pa bzung ba ni yongs su rtog pa'o/ /kun tu dpyod pa ni yongs su dpyod pa'o/ /'di dag gi bshad pa ni 'phags pa byams pas theg pa chen po'i chos mngon pa kun las btus pa las/ lhag mthong gang zhe na/ ji ltar yang de chos rnams rnam par 'byed/ rab tu rnam par 'byed/ yongs su rtog par byed/ yongs su dpyod par byed/ gnas ngan len gyi mtshan ma'i gnyen por blang ba dang / phyin ci log nges par bsal ba dang / phyin ci ma log pa la sems mnyam par gzhag pa dag nye bar blangs nas so zhes gsungs te/ 'dir tshig 'di dag gi don ni gnas ngan len ni phyin ci log gi bag chags te/ de yang phyin ci log gong nas gong du skyed par byed pa'i nus pa sems kyi rgyud la gnas pa'i mtshan nyid de/ de'i mtshan ma ni gang gi phyir de yongs su gso bar byed pa ste/ phyin ci log la mngon par zhen pa snga ma snga ma dag go/ /de zad pas gnas ngan len zad do/ /phyin ci log skye bar mi 'gyur te/ mtshan ma'i gnyen po goms pa las mtshan ma zad pa yin te/ gnyen po de ni 'byed pa dang / rab tu rnam par 'byed pa ste/ de bas na 'di gnyis ni gnas ngan len gyi mtshan ma'i gnyen po nye bar blangs te bstan to/ /yongs su rtog pa ni phyin ci log nges par bsal ba nye bar blangs nas bstan to/ /gang gi phyir de ni ji ltar bzhin du rnam par phye bas phyin ci log gi dogs pa gcig tu bsal nas/ brjed pa med pa yid la byed pas yongs su bstsal nas lhag par dmigs pa ste/ de bas na 'di ni phyin ci log nges par bsal ba zhes bya'o/ / de ltar 'dis phyin ci log nges par bsal bas phyin ci ma log par byas la/ phyin ci ma log par der mngon sum bzhin du mthong ba'i don la sems bzhag nas so sor rtog pa ni yongs su dpyod pa ste/ de bas 'di ni phyin ci ma log pa la sems gzhag pa nye bar blangs te bstan pa'o zhes bya ba yin no/ /de ltar lhag mthong rnam pa bzhi'i bsgom pa yongs su rdzogs pas lhag mthong gis ni gnas ngan len gyi 'ching ba las grol ba yin no/ /zhi gnas rnam pa dgu'i bsgom pa yongs su rdzogs pas ni mtshan ma'i 'ching ba las grol bar 'gyur te/ phyin ci log gi mtshan ma phyin ci log gi don gyi rnam pa 'gag pa'i mtshan nyid yin pa'i phyir ro/ /de skad du yang / zhi gnas dang ni lhag mthong dag /bsgoms pas gnas ngan len dang ni/ /mtshan ma yi ni 'ching ba las/ /rnal 'byor pa ni grol bar 'gyur/ /zhes gsungs te/ tshigs su bcad pa 'di'i don ni ci rigs par sbyar la/ /go rims bzhin du ma yin no/ /de bas na rnal 'byor dang bsgom pa ni rnam grangs yin la/ zhi gnas dang / lhag mthong dang / zhi gnas dang lhag mthong zung du 'brel pa ni rnal 'byor gyi thun mong gi dbye ba'o/ /shes rab kyi pha rol tu phyin pa bsgom pa'i man ngag / slob dpon mkhas pa chen po rin chen 'byung gnas zhi ba'i zhal snga nas mdzad pa rdzogs so// //rgya gar gyi mkhan po shAn ti b+ha dra dang / zhu chen gyi lo tsA ba 'gos lhas btsas kyis bsgyur cing zhus te gtan la phab pa// //