<style>
.hidden {
  display: none;
}
</style>
<a href="javascript:window.close();">CLOSE WINDOW</a>
<br><br>
D4038: rnal 'byor spyod pa'i sa rnam par gtan la dbab pa bsdu ba<br><table><tr><td>
<input type="button" onclick="location.href='tcompletep.php?id=D4038&coll=TD&volcur=1';" value="show page break" />
<td width=150><td>
<input type="button" onclick="location.href='tcompletel.php?id=D4038&coll=TD&volcur=1';" value="show line break" />

<td width=150><td>
<a href="tcompleteu.php?coll=TD&id=D4038&volcur=1" style=font-size:25px;">བོད་ཡིག</a><td width=150><td>e-texts based on the ACIP/ALL <img src="../data/scanner/ALL.png" width=70> Input <a href="https://asianlegacylibrary.org/library/" target="_blank"><img src="../sub/link.png" width=20></table><hr><p style="font-size:18px;">text in 2 volumes<br><br><a href="tcomplete.php?id=D4038&coll=TD&volcur=0">volume 1 </a>- <span style="color:red;border: 2px solid red;border-radius: 5px;padding:3px;">volume 2</span> - <br><br>/rnam par gtan la dbab pa bsdu ba/ bam po sum cu gsum pa/ rgyu mtshan las ming gzhan du brjod par bya ba'am/ gzhan ma yin par brjod par bya zhe na/ smras
 pa/ gnyi gar yang brjod par mi bya'o/ /de ci'i phyir zhe na/ gnyi gar yang skyon du thal bar 'gyur ba'i phyir ro/ /gzhan nyid yin na skyon ci yod ce na/ ming rdzas su yod par 'gyur ba'o/ /
 gzhan ma yin pa nyid yin na skyon ci yod ce na/ rgyu mtshan gzung ba na ming yang zin par 'gyur ba'o/ /rgyu mtshan las rnam par rtog pa gzhan du brjod par bya'am / gzhan ma yin par brjod
 par bya zhe na/ smras pa/ gnyi gar yang brjod par mi bya'o/ /de ci'i phyir zhe na/ gnyi gar yang skyon du thal bar 'gyur ba'i phyir ro/ /gzhan nyid yin na skyon ci yod ce na/ rnam par rtog pa
 rnams rgyu mtshan gyi bdag nyid ma yin par 'gyur ba'o/ /gzhan ma yin pa nyid yin na skyon ci yod ce na/ rnam par rtog pa dang bral ba'i rgyu mtshan rnams kyang rnam par rtog pa'i bdag nyid kho nar
 'gyur ba'o/ /rgyu mtshan las de bzhin nyid gzhan du brjod par bya'am/ gzhan ma yin par brjod par bya zhe na/ smras pa/ gnyi gar yang brjod par mi bya'o/ /de ci'i phyir zhe na/ gnyi gar
 yang skyon du 'gyur bar thal bar 'gyur ba'i phyir ro/ /gzhan nyid yin na skyon ci yod ce na/ rgyu mtshan gyi don dam pa nyid de de bzhin nyid du mi 'gyur ba dang / rnal 'byor pa rgyu mtshan la mi ltos par de bzhin nyid yongs su tshol bar
 'gyur ba dang / de bzhin nyid mngon par rdzogs par sangs rgyas na yang rgyu mtshan mngon par rdzogs par sangs rgyas par mi 'gyur ba'o/ /gzhan ma yin pa nyid yin na skyon ci yod ce na/ de bzhin nyid la bye brag med pa bzhin du rgyu
 mtshan thams cad la yang bye brag med par 'gyur ba dang / rgyu mtshan dmigs pa na de bzhin nyid kyang dmigs par 'gyur ba dang / de bzhin nyid dmigs kyang rgyu mtshan bzhin du rnam par dag par mi 'gyur ba ste/ 'di lta ste/ dper na
 'du byed rnams la spyi'i mtshan nyid mi rtag pa dang / sdug bsngal ba dang / bdag med pa yod kyang de dag las gzhan pa'am/ gzhan ma yin par brjod par mi bya ba dang / lus
 dang sems la gnas ngan len dang shin tu sbyangs pa dag yod kyang / lus dang sems las de dag gzhan pa'am/ gzhan ma yin pa brjod par mi bya ba dang / dge ba dang / mi dge ba dang / lung du ma bstan pa'i chos rnams la sa bon yod kyang / de dag las gzhan
 pa'am/ gzhan ma yin par brjod par mi bya ste/ gnyi ga skyon du thal bar 'gyur ba'i phyir dang / 'di lta ste/ dper na nam mkha' ni thams cad du song ba yin pas gzugs kyi phyogs na nam mkha' yod kyang / de las de gzhan pa'am/ gzhan ma yin par brjod
 par mi bya ste/ de ci'i phyir zhe na/ gnyi gar yang skyon du thal bar 'gyur ba'i phyir ro/ /gzhan nyid yin na skyon ci yod ce na/ nam mkha' thams cad du song ba ma yin pa'i phyir mi rtag par 'gyur ba'o/ /gzhan ma yin pa nyid yin na skyon ci yod ce na/ gzugs kyi
 phyogs las nam mkha' gzhan du mi 'gyur ba ste/ de bzhin du 'dir yang tshul ci rigs par blta bar bya'o/ /bcom ldan 'das kyis nyan thos kyi theg pa las brtsams nas kyang / la lar 'du byed rnams las gzhan pa yang ma yin/ gzhan ma yin pa yang ma yin
 par lan gdab pa'i tshul 'di yongs su bstan te/ ji skad du/ dge slong dag phung po rnams nyid kyang nye bar len pa ma yin la/ phung po rnams las logs shig na yang nye bar len pa med mod kyi/ 'on kyang 'di la 'dun pa'i 'dod chags gang yin pa de 'dir nye
 bar len pa yin no zhes gsungs pa lta bu'o/ /de la gzhan pa nyid ma yin na skyon ci yod ce na/ smras pa/ phung po rnams kyi dge ba dang / lung du ma bstan pa la skur pa dang / rnam par mi 'dag pa'i skyon no/ /gzhan nyid yin na skyon ci yod ce na/ smras pa/ nye bar
 len pa rtag pa nyid du sgro btags pa dang / rnam par mi 'dag pa nyid kyi skyon no/ /rgyu mtshan dang de bzhin nyid ji lta ba bzhin du/ ming dang / rnam par rtog pa dang / yang dag pa'i shes pa yang de bzhin du blta bar bya'o/ /rgyu mtshan las yang dag pa'i shes pa gzhan du
 brjod par bya'am/ gzhan ma yin par brjod par bya zhe na/ smras pa/ rnam par rtog pa bzhin du gnyi gar yang brjod par mi bya'o/ /ming las rnam par rtog pa gzhan du brjod par bya'am/ gzhan ma yin par brjod par bya zhe na/ smras pa/
 gzhan du brjod par bya'o/ /ming las yang dag pa'i shes pa gzhan du brjod par bya'am/ gzhan ma yin par brjod par bya zhe na/ smras pa/ gzhan du brjod par bya'o/ /rnam par rtog pa las yang dag pa'i shes pa gzhan du brjod par bya'am/ gzhan ma yin par brjod
 par bya zhe na/ smras pa/ gzhan du brjod par bya'o/ /rgyu mtshan gyi mtshan nyid gang zhe na/ smras pa/ rnam par rtog pa'i spyod yul gyi mtshan nyid do/ /ming gi mtshan nyid gang zhe na/ smras pa/ tha snyad kyi gnas kyi mtshan nyid do/ /rnam par rtog pa'i mtshan nyid gang zhe
 na/ smras pa/ rgyu mtshan spyod yul pa'i mtshan nyid do/ /de bzhin nyid kyi mtshan nyid gang zhe na/ smras pa/ yang dag pa'i shes pa'i spyod yul gyi mtshan nyid do/ /yang dag pa'i shes pa'i mtshan nyid gang zhe na/ smras pa/ de bzhin nyid la spyod yul pa'i mtshan nyid do/ /
 rgyu mtshan gyi rnam pa gang zhe na/ smras pa/ rnam par rtog pa rnams kyi rnam pa sna tshogs dpag tu med pa'i phyir/ de'i rnam pa yang sna tshogs dpag tu med pa yin par rig par bya ste/ 'di lta ste/ gzugs rgyu mtshan dang / sems rgyu mtshan dang / sems las byung ba rgyu
 mtshan dang / sems dang ldan pa ma yin pa rgyu mtshan dang / 'dus ma byas rgyu mtshan dang / 'dus byas rgyu mtshan dang / phung po rgyu mtshan dang / skye mched rgyu mtshan dang / khams rgyu mtshan dang / rten cing 'brel bar 'byung ba rgyu mtshan dang / gnas dang gnas ma yin pa rgyu
 mtshan dang / dbang po rgyu mtshan dang / bden pa rgyu mtshan dang / dran pa nye bar gzhag pa rgyu mtshan dang / yang dag pa'i spong ba dang / rdzu 'phrul gyi rkang pa dang / dbang po dang / stobs dang / byang chub kyi yan lag dang / lam gyi yan lag rgyu mtshan dang / lam rgyu
 mtshan dang / chos kyi gzhi rgyu mtshan dang / zhi gnas rgyu mtshan dang / lhag mthong rgyu mtshan dang / rab tu 'dzin pa rgyu mtshan dang / btang snyoms rgyu mtshan dang / rkyen rgyu mtshan dang / ston pa rgyu mtshan dang / sa rgyu mtshan dang / chu rgyu mtshan dang / me rgyu mtshan dang / rlung
 rgyu mtshan dang / nam mkha' rgyu mtshan dang / rnam par shes pa rgyu mtshan dang / 'jig rten 'di rgyu mtshan dang / 'jig rten pha rol rgyu mtshan dang / nyi ma rgyu mtshan dang / zla ba rgyu mtshan dang / sems can dmyal ba rgyu mtshan dang / dud 'gro dang / yi dwags dang / lha dang /
 mi rgyu mtshan dang / rgyal chen bzhi'i ris kyi lha'i rgyu mtshan dang / sum cu rtsa gsum dang / 'thab bral dang / dga' ldan dang / 'phrul dga' dang / gzhan 'phrul dbang byed kyi lha rgyu mtshan dang / bsam gtan dang po rgyu mtshan dang / bsam gtan gnyis pa dang /
 gsum pa dang / bzhi pa rgyu mtshan dang / nam mkha' mtha' yas skye mched rgyu mtshan dang / rnam shes mtha' yas skye mched dang / ci yang med pa'i skye mched dang / 'du shes med 'du shes med min skye mched rgyu mtshan dang / 'byung ba rgyu mtshan dang / 'jig pa rgyu
 mtshan dang / dngos po rgyu mtshan dang / dngos po med pa rgyu mtshan dang / kun nas nyon mongs pa rgyu mtshan dang / rnam par byang ba rgyu mtshan dang / mthong ba dang / thos pa dang / bye brag phyed pa dang / rnam par shes pa dang / thos pa dang / yongs su btsal ba rgyu mtshan
 dang / yid kyis rjes su brtags pa dang / rjes su dpyad pa rgyu mtshan dang / de ltar de lta bu dang mthun pa rgyu mtshan gzhan gang yin pa dang / gzhan yang rgyu mtshan drug ste/ mtshan ma dang bcas pa rgyu mtshan dang / mtshan ma med pa rgyu mtshan dang / chung ngu rgyu mtshan
 dang / chen por gyur pa rgyu mtshan dang / tshad med pa rgyu mtshan dang / ci yang med pa rgyu mtshan no/ mtshan ma dang bcas pa rgyu mtshan gang zhe na/ dngos po rtogs pa'i ming la rnam par rtog pa'i mtshan ma gang yin pa'o/ /mtshan ma med pa rgyu mtshan gang zhe na/ dngos
 po ma rtogs pa'i ming la rnam par rtog pa'i mtshan ma gang yin pa'o/ /chung ngu rgyu mtshan gang zhe na/ 'dod pa'i khams kyi dngos po la rnam par rtog pa'i mtshan ma gang yin pa'o/ /chen por gyur pa rgyu mtshan gang zhe na/ gzugs kyi khams kyi dngos po
 la rnam par rtog pa'i mtshan ma gang yin pa'o/ /tshad med pa rgyu mtshan gang zhe na/ gzugs med pa'i khams kyi dngos po nam mkha' mtha' yas skye mched dang / rnam shes mtha' yas skyed mched la rnam par rtog pa'i mtshan ma gang yin pa'o/ /ci yang med pa rgyu
 mtshan gang zhe na/ gzugs med pa'i khams kyi dngos po ci yang med pa'i skye mched la rnam par rtog pa'i mtshan ma gang yin pa'o/ /gzhan yang rgyu mtshan lnga ste/ rgyu mtshan rgyu mtshan dang / ming rgyu mtshan dang / rnam par rtog pa rgyu mtshan dang / de bzhin nyid rgyu
 mtshan dang / yang dag pa'i shes pa rgyu mtshan no/ /yang rgyu mtshan gzhan gnyis te/ rang bzhin rgyu mtshan dang / gzugs brnyan rgyu mtshan no/ /rang bzhin rgyu mtshan gang zhe na/ sngon gyi rnam par rtog pas bskyed pa'i mtshan ma dang / mtshan mas bskyed pa grags
 pa'i mtshan ma'o/ /gzugs brnyan rgyu mtshan gang zhe na/ kun brtags pa gang yin pa de ni mos pas snang ba yin gyi/ rang bzhin du gnas pa ni ma yin no/ /ming gi rnam pa gang zhe na/ de yang rgyu mtshan gyi dbang gis rnam pa sna tshogs dpag tu med do/ /de yang
 mdor bsdu na rnam pa bcu gnyis te/ tha snyad las byung ba dang / yang dag pa'i dngos po dang / rigs dang 'brel ba dang / so so dang 'brel ba dang / yon tan las byung ba dang / nye bar brtags pa dang / grags pa dang / ma grags pa dang / gsal ba dang / mi
 gsal ba dang / bsdus pa dang / tha dad pa'o/ /rnam par rtog pa'i rnam pa gang zhe na/ de yang rgyu mtshan dang / ming gi dbang gis rnam pa sna tshogs dpag tu med do/ /de yang mdor bsdu na rnam pa bdun du rig par bya ste/ mtshan ma las byung ba dang / mtshan ma med
 pa las byung ba dang / yul la rang gi ngang gis 'jug pa dang / tshol ba pa dang / so sor rtog pa dang / nyon mongs pa can dang / nyon mongs pa can ma yin pa'o/ /de bzhin nyid kyi rnam pa gang zhe na/ smras pa/ brjod du med pa'i rnam pa yin no/ /yang dag pa'i shes pa'i rnam
 pa gang zhe na/ smras pa/ 'jig rten las 'das pa gang yin pa de ni brjod du med pa'i rnam pa yin no/ /'jig rten pa dang 'jig rten las 'das pa gang yin pa de ni rnam par gzhag pa'i bden pa 'dzin pa'i rnam pa yin no/ /de la mtshan ma dang / gzugs brnyan dang / mig
 yor dang / srid pa dang / spros pa dang / 'jig tshogs dang / 'dus byas dang / bsams pa dang / rten cing 'brel bar 'byung ba dang / de lta bu la sogs pa ni rgyu mtshan gyi rnam grangs yin no/ /de la ming dang / brda dang / gdags pa dang / tha snyad dang /
 kun rdzob dang / nye bar 'dogs pa dang / brjod pa dang / de lta bu la sogs pa ni ming gi rnam grangs yin no/ /de la rnam par rtog pa dang / kun du rtog pa dang / yongs su rtog pa dang / log pa'i lam dang / log pa'i sgrub pa dang / rgyun gol ba dang / yang dag par
 'dzin pa ma yin pa dang / de lta bu la sogs pa ni rnam par rtog pa'i rnam grangs yin no/ /de la de bzhin nyid dang / yang dag pa nyid dang / bden pa nyid dang / ma nor ba nyid dang / phyin ci ma log pa nyid dang / spros pa med pa'i dbyings dang / mtshan ma med
 pa'i dbyings dang / chos kyi dbyings dang / yang dag pa'i mtha' dang / de lta bu la sogs pa ni de bzhin nyid kyi rnam grangs yin no/ /de la yang dag pa'i shes pa dang / yang dag pa'i shes rab dang / yang dag pa'i rtogs pa dang / yang dag pa'i lam dang / yang
 dag pa'i sgrub pa dang / yang dag pa'i rgyun dang / yang dag par 'dzin pa dang / de lta bu la sogs pa ni yang dag pa'i shes pa'i rnam grangs yin no/ /dngos po lnga po gang dag yin pa de dag las du zhig gzugs yin/ du zhig sems yin/ du zhig sems las byung
 ba dag yin/ du zhig sems dang mi ldan pa dag yin/ du zhig 'dus ma byas pa dag yin zhe na/ smras pa/ rgyu mtshan ni rnam pa lnga tshar yin no/ /ming ni sems dang mi ldan pa yin no/ /rnam par rtog pa dang yang dag pa'i shes pa ni/ sems
 dang sems las byung ba dag yin no/ /de bzhin nyid ni 'dus ma byas yin no/ /du zhig phung pos bsdus pa dag yin/ du zhig ma bsdus pa dag yin zhe na/ smras pa/ gsum ni phung pos bsdus pa dag yin no/ /rgyu mtshan ni bsdus pa dang ma bsdus pa yin no/ /de
 bzhin nyid ni ma bsdus pa yin no/ /du zhig khams dang skye mched kyis bsdus pa dag yin/ du zhig ma bsdus pa dag yin zhe na/ smras pa/ thams cad kyang bsdus pa dag yin no/ /du zhig rten cing 'brel bar 'byung bas bsdus pa dag yin/ du zhig ma bsdus pa dag
 yin zhe na/ smras pa/ gsum ni bsdus pa yin no/ /rgyu mtshan ni bsdus pa dang ma bsdus pa yin no/ /de bzhin nyid ni ma bsdus pa yin no/ /rten cing 'brel par 'byung bas bsdus pa dang ma bsdus pa dag ji lta ba bzhin du/ gnas dang gnas ma yin pa dang / dbang pos
 bsdus pa dang ma bsdus pa dag kyang de bzhin du blta bar bya'o/ /du zhig bden pas bsdus pa dag yin/ du zhig ma bsdus pa dag yin zhe na/ smras pa/ bden pa ni rnam pa gnyis te/ rnam par bzhag pa dang / rnam par ma bzhag pa'o/ /de la 'phags pa'i bden pa bzhi
 ni rnam par bzhag pa'i bden pa yin no/ /de bzhin nyid ni rnam par ma bzhag pa'i bden pa yin no/ /de la gsum ni rnam par bzhag pa'i bden pas bsdus pa yin no/ /rgyu mtshan ni bsdus pa dang ma bsdus pa yin no/ /de bzhin nyid ni rnam par ma bzhag pa'i bden pas bsdus
 pa kho na yin no/ /du zhig rgyu'i rkyen gyis bsdus pa dag yin no / /du zhig mtshungs pa de ma thag pa dang / dmigs pa dang / bdag po'i rkyen gyis bsdus pa dag yin zhe na/ smras pa/ rgyu mtshan ni thams cad kyis bsdus pa dag yin no/ /ming ni mtshungs pa de ma thag pa'i
 rkyen gyis ma bsdus pa yin no/ /rnam par rtog pa dang / yang dag pa'i shes pa ni bzhi char gyis bsdus pa yin no/ /de bzhin nyid ni dmigs pa'i rkyen gyis bsdus pa kho na yin no/ /du zhig chos la rton pas bsdus pa dag yin no / /du zhig don dang / nges pa'i don gyi
 mdo sde dang / ye shes la rton pas bsdus pa dag yin zhe na/ smras pa/ rgyu mtshan rtog pa gsum gyis bsdus pa yin no/ /ming ni chos la rton pas bsdus pa kho na yin no/ /rgyu mtshan ji lta ba bzhin du rnam par rtog pa yang de bzhin no/ /de bzhin nyid ni ye shes kyi spyod
 yul yin pas don la rton pas bsdus pa yin no/ /yang dag pa'i shes pa ni ye shes la rton pa kho nas bsdus pa yin no/ /du zhig gzugs can dag yin/ du zhig gzugs can ma yin pa dag yin zhe na/ smras pa/ rgyu mtshan ni rnam pa gnyi ga yin no/ /rnam par rtog pa
 dang yang dag pa'i shes pa ni gzugs can ma yin pa yin no/ /ming dang de bzhin nyid ni gnyi ga ma yin te/ brtags pa'i yod pa yin pa'i phyir dang / brjod du med pa yin pa'i phyir ro/ /gzugs can dang / gzugs can ma yin pa dag ji lta ba bzhin du bstan du yod pa dang / bstan
 du med pa dang / thogs pa dang bcas pa dang / thogs pa med pa dag kyang de bzhin du blta bar bya'o/ /du zhig zag pa dang bcas pa dag yin/ du zhig zag pa med pa dag yin zhe na/ smras pa/ rgyu mtshan ni gnyi ga yin no/ gnyis ni zag pa dang bcas pa yin no/ / gnyis ni zag
 pa med pa yin te/ de bzhin nyid ni zag pa med pa'i dmigs pa'i don gyis zag pa med pa yin gyi/ zag pa zad pa'i mtshan nyid kyi don gyis ni ma yin no/ /yang dag pa'i shes pa ni zag pa zad par bya ba'i phyir gnyen po'i don gyis zag pa med pa yin no/ /du zhig 'dus byas dag
 yin/ du zhig 'dus ma byas pa dag yin zhe na/ smras pa/ rgyu mtshan ni gnyi ga yin no/ /gsum ni 'dus byas yin no/ /de bzhin nyid ni 'dus ma byas yin te/ 'dus byas nye bar zhi ba'i dmigs pa'i don gyis yin gyi/ 'dus byas nye bar zhi ba'i mtshan nyid kyi don gyis ni ma
 yin no/ /du zhig nyon mongs pa dang bcas pa dag yin/ du zhig nyon mongs pa med pa dag yin zhe na/ smras pa/ rgyu mtshan ni gnyi ga yin no/ /gnyis ni nyon mongs pa dang bcas pa yin no/ /gnyis ni nyon mongs pa med pa yin te/ 'dir yang zag pa dang
 bcas pa dang / zag pa med pa'i tshul bzhin du blta bar bya'o/ /nyon mongs pa dang bcas pa dang / nyon mongs pa med pa dag ji lta ba bzhin du/ zang zing dang bcas pa dang / zang zing med pa dag dang / zhen pa la brten pa dang / mngon par 'byung ba la brten pa dag kyang de
 bzhin du blta bar bya'o/ /du zhig 'jig rten pa dag yin/ du zhig 'jig rten las 'das pa dag yin zhe na/ smras pa/ gsum pa ni 'jig rten pa yin no/ /de bzhin nyid ni 'jig rten las 'das pa yin no/ /yang dag pa'i shes pa'i phyogs gcig ni 'jig rten las 'das pa
 yin no/ /phyogs gcig ni 'jig rten pa dang 'jig rten las 'das pa yin no/ /de bzhin nyid kyang tha snyad dang spros pa thams cad nye bar zhi ba'i dmigs pa'i don gyis 'jig rten las 'das pa yin gyi/ tha snyad dang spros pa thams cad las yang dag pa'i 'das pa'i mtshan nyid
 kyi don gyis ni ma yin no/ /'jig rten pa dang 'jig rten las 'das pa dag ji lta ba bzhin du gtogs pa dang / ma gtogs pa dag kyang de bzhin du blta bar bya'o/ /du zhig nang gi dag yin/ du zhig phyi rol gyi dag yin zhe na/ smras pa/ rgyu mtshan ni gnyi ga yin no/ /ming ni
 phyi rol yin no/ /rnam par rtog pa ni skye bar gtogs pa las ni gnyi ga yin no/ /de bzhin nyid ni gnyi ga ma yin no/ /rnam par rtog pa ji lta ba bzhin du/ yang dag pa'i shes pa yang de bzhin no/ /du zhig rags pa dag yin/ du zhig phra ba dag yin zhe na/ smras pa/ gsum ni
 rnam pa gnyi gar yin no/ /de bzhin nyid ni phra ba yin te/ rnam par shes par dka' ba'i don gyis yin gyi/ mtshan ma nyid dbri zhing bskyung ba'i don gyis ni ma yin no/ /yang dag pa'i shes pa yang phra ba nyid yin te/ don cha phra ba rtogs par byed pa'i phyir ro/ /du zhig dman pa
 dag yin/ du zhig gya nom pa dag yin zhe na/ smras pa/ gsum ni gnyi ga yin no/ /de bzhin nyid ni gya nom pa yin te/ rnam par dag pa'i dmigs pa'i don gyis yin gyi/ nyams pa dang / khyad par du 'gro ba'i bdag nyid kyi don gyis ni ma yin no/ /yang dag
 pa'i shes pa yang gya nom pa yin te/ de bzhin nyid kyi spyod yul pa'i don gyis so/ /du zhig thag ring ba dag yin/ du zhig thag nye ba dag yin zhe na/ smras pa/ gcig ni yul thag ring ba dang / dus thag ring bas gnyi ga yin no/ /ming dang rnam par rtog pa dang / yang
 dag pa'i shes pa ni dus thag ring ba kho nas gnyi ga yin no/ /de bzhin nyid ni gnyi gas gnyi ga ma yin te/ 'dus ma byas pa'i phyir ro/ /du zhig zin pa dag yin/ du zhig ma zin pa dag yin zhe na/ smras pa/ rgyu mtshan ni gnyi ga yin no/ /ming dang rnam par rtog
 pa dang / yang dag pa'i shes pa ni ma zin pa yin no/ /de bzhin nyid ni gnyi ga ma yin no/ /du zhig mtshungs pa dag yin/ du zhig de dag dang mtshungs pa dag yin zhe na/ smras pa/ rgyu mtshan ni gnyi ga yin no/ /lhag ma rnams ni gnyi ga ma yin te/ mtshungs par ldan
 pa de dag dang mtshungs pa ni dbang po gzugs can rnams la rnam par gzhag pa yin pa'i phyir ro/ /du zhig rgyu yin/ du zhig rgyu ma yin zhe na/ smras pa/ bzhi ni rgyu yin no/ /de bzhin nyid ni rgyu ma yin no/ /rgyu dang rgyu ma yin pa ji lta ba bzhin du/ 'bras bu dang / 'bras bu ma yin
 pa dang / rgyu dang bcas pa dang / rgyu dang bcas pa ma yin pa dang / 'bras bu dang bcas pa dang / 'bras bu dang bcas pa ma yin pa dag kyang de bzhin du blta bar bya'o/ /du zhig rnam par smin pa yin/ du zhig rnam par smin pa ma yin zhe na/ smras pa/ rgyu mtshan ni gnyi ga yin no/ /
 ming ni rnam par smin pa ma yin no/ /rnam par rtog pa yang gnyi ga yin no/ /de bzhin nyid ni gnyi ga ma yin no/ /yang dag pa'i shes pa yang rnam par smin pa ma yin no/ /du zhig rnam par smin pa dang bcas pa dag yin/ du zhig rnam par smin pa med pa dag yin zhe na/ smras pa/
 rgyu mtshan ni gnyi ga yin no/ /ming ni rnam par smin pa med pa yin no/ /rnam par rtog pa yang gnyi ga yin no/ /de bzhin nyid ni gnyi ga ma yin no/ /yang dag pa'i shes pa ni rnam par smin pa med pa kho na yin no/ /du zhig dmigs pa dang bcas pa dag yin/
 du zhig dmigs pa med pa dag yin zhe na/ smras pa/ rgyu mtshan ni gnyi ga yin no/ /ming ni dmigs pa med pa yin no/ /rnam par rtog pa dang yang dag pa'i shes pa ni dmigs pa dang bcas pa yin no/ /de bzhin nyid ni gnyi ga ma yin no/ /dmigs pa dang bcas pa
 dang dmigs pa med pa dag ji lta ba bzhin du/ mtshungs par ldan pa dang / mtshungs par ldan pa ma yin pa dag dang / rnam pa dang bcas pa dang rnam pa med pa dag dang / gnas dang bcas pa dang gnas med pa dag kyang de bzhin du blta bar bya'o/ /du zhig bla na yod pa dag
 yin/ du zhig bla na med pa dag yin zhe na/ smras pa/ bzhi ni bla na yod pa yin no/ /de bzhin nyid ni bla na med pa yin te/ 'dus ma byas dang rnam par dag pa'i dmigs pa'i don gyis so/ /du zhig 'das pa dang / ma 'ongs pa dang / da ltar byung ba dag yin/ du zhig 'das pa
 yang ma yin/ ma 'ongs pa yang ma yin/ da ltar byung ba yang ma yin pa dag yin zhe na/ smras pa/ bzhi ni rnam pa gsum car yin no/ /de bzhin nyid ni rnam pa gsum char ma yin no/ /du zhig 'dod pa dang ldan pa yin zhe na/ smras pa/ gsum mo/ /du zhig gzugs
 dang ldan pa dag yin zhe na/ smras pa/ gsum kho na'o/ /gzugs med pa dang ldan pa dag kyang de kho na bzhin no/ /du zhig ldan pa ma yin pa dag yin zhe na/ smras pa/ gcig ste/ yang dag pa'i shes pa 'jig rten las 'das pa gang yin pa'o/ /yang dag pa'i shes
 pa 'jig rten pa dang 'jig rten las 'das pa gang yin pa de ni ldan pa dang mi ldan pa yin no/ /de bzhin nyid ni gnyi ga ma yin no/ /du zhig dge ba dag yin/ du zhig mi dge ba dag yin/ du zhig lung du ma bstan pa dag yin zhe na/ smras pa/ rgyu mtshan dang rnam par rtog pa ni rnam
 pa gsum car yin no/ /ming ni lung du ma bstan pa yin no/ /de bzhin nyid ni dge ba yin te/ rnam par dag pa dge ba'i dmigs pa'i don gyis yin gyi/ 'dod pa'i yon tan 'bras bu yongs su 'dzin pa 'byung ba'i mtshan nyid kyi don gyis ni ma yin no/ /yang dag pa'i
 shes pa ni dge ba kho na yin no/ /du zhig thos pa las byung ba dang / du zhig thos pa las byung ba'i spyod yul dag yin/ du zhig bsams pa las byung ba dang / bsgoms pa las byung ba dang / bsams pa las byung ba dang / bsgoms pa las byung ba'i spyod yul dag yin zhe na/
 smras pa/ rgyu mtshan dang rnam par rtog pa ni/ rnam pa gsum char yin la/ rnam pa gsum char gyi spyod yul yang yin no/ /ming ni thos pa dang bsams pa las byung ba yin la/ rnam pa gsum char gyi spyod yul yang yin no/ /de bzhin nyid ni rnam pa gsum char ma yin la/
 bsgoms pa las byung ba'i spyod yul kho na yin no/ /yang dag pa'i shes pa ni bsgoms pa las byung ba yin la/ rnam pa gsum char gyi spyod yul yin no/ /du zhig stong pa nyid dang / stong pa nyid kyi spyod yul dag yin/ du zhig smon pa med pa dang / mtshan ma med pa dang /
 smon pa med pa dang / mtshan ma med pa'i spyod yul dag yin zhe na/ smras pa/ rgyu mtshan ni rnam pa gsum char yin la/ rnam pa gsum char gyi spyod yul yang yin / ming ni rnam pa gsum char ma yin la/ rnam pa gnyis kyi spyod yul yin no/ /rnam par rtog pa ni
 rnam pa gsum char yin la/ rnam pa gnyis kyi spyod yul yin no/ /de bzhin nyid ni rnam pa gsum char yang ma yin la/ stong pa nyid kyi spyod yul dang / mtshan ma med pa'i spyod yul yin no / /yang dag pa'i shes pa ni rnam pa gsum char yin la/ stong pa nyid kyi
 spyod yul yin no/ /gang du stong pa nyid dang / smon pa med pa dang / mtshan ma med pa bye brag med par gsungs pa der ni de dag thos pa dang / bsams pa dang / bsgoms pa las byung ba nyid yin par blta bar bya'o/ /gang du de dag ting nge 'dzin gyi sgra kho nar gsungs pa der
 ni de dag bsgoms pa las byung ba 'jig rten pa dang / 'jig rten las 'das pa yin par blta bar bya'o/ /gang du de dag rnam par thar pa'i sgo'i sgra kho nar gsungs pa der ni de dag 'jig rten las 'das pa nyid yin par blta bar bya'o/ /du zhig lhag pa'i tshul
 khrims dang / lhag pa'i tshul khrims kyi 'khor dag yin/ du zhig lhag pa'i sems dang / lhag pa'i shes rab dang / lhag pa'i sems dang / lhag pa'i shes rab kyi spyod yul dag yin zhe na/ smras pa/ rgyu mtshan ni lhag pa'i tshul khrims kyang yin/ lhag pa'i
 tshul khrims kyi 'khor kyang yin/ lhag pa'i sems dang / lhag pa'i shes rab kyang yin/ de dag gi spyod yul yang yin no/ /ming ni lhag pa'i tshul khrims kyi 'khor dang / lhag pa'i sems dang / lhag pa'i shes rab kyi spyod yul yin no/ /rnam par rtog pa ni
 lhag pa'i sems dang / lhag pa'i shes rab yin la/ de dag gi spyod yul dang lhag pa'i tshul khrims kyi 'khor kyang yin no/ /de bzhin nyid ni rnam pa gsum char ma yin la/ lhag pa'i sems dang / lhag pa'i shes rab kyi spyod yul yin no/ /yang dag pa'i shes pa ni
 lhag pa'i sems dang / lhag pa'i shes rab yin la/ de gnyis kyi spyod yul dang lhag pa'i tshul khrims kyi 'khor kyang yin no/ /du zhig slob pa dag yin/ du zhig mi slob pa dag yin/ du zhig slob pa yang ma yin/ mi slob pa yang ma yin pa dag yin zhe na/ smras pa/
 rgyu mtshan dang / rnam par rtog pa ni rnam pa gsum char yin no/ /ming ni slob pa yang ma yin mi slob pa yang ma yin no/ /de bzhin nyid kyang slob pa yang ma yin mi slob pa yang ma yin te/ 'dus ma byas pa'i phyir ro/ /yang dag pa'i shes pa ni slob pa dang mi slob pa yin no/ /du zhig
 mthong bas spang bar bya ba dag yin/ du zhig bsgoms pas spang bar bya ba dag yin/ du zhig spang bar bya ba ma yin pa dag yin zhe na/ smras pa/ rgyu mtshan ni rnam pa thams cad yin no/ /ming ni bsgoms pas spang bar bya ba yin no/ /rnam par rtog pa ni mthong bas spang bar bya ba
 dang / bsgoms pas spang bar bya ba yin no/ /de bzhin nyid ni spang bar bya ba ma yin no/ /yang dag pa'i shes pa ni spang bar bya ba ma yin pa kho na yin no/ /rgyu mtshan la dmigs nas dran pa nye bar gzhag pa du zhig sgom par byed ce na/ smras pa/ bzhi char ro/ /ming la dmigs
 nas du zhig ce na/ smras pa/ gcig ste/ chos dran pa nye bar gzhag pa'o/ /rnam par rtog pa la dmigs nas du zhig ce na/ smras pa/ gsum ste/ tshor ba dang / sems dang / chos dran pa nye bar gzhag pa'o/ /de bzhin nyid la dmigs nas du zhig ce na/ smras pa/
 gcig ste/ chos dran pa nye bar gzhag pa'o/ /lus kyi mtshan ma'i de bzhin nyid yid la byed pa na yang 'dres pa la dmigs pa'i chos dran pa nye bar gzhag pa sgom par byed do/ /tshor ba dang / sems dang / chos kyis mtshan nyid dag la yang de bzhin no/ /yang dag pa'i shes
 pa la dmigs nas du zhig ce na/ smras pa/ gsum kho na ste rnam par rtog pa bzhin no/ /rgyu mtshan la dmigs nas sdig pa mi dge ba'i chos skyes so cog spong bar brjod par bya'am / mi spong bar brjod par bya zhe na/ smras pa/ rnam par gnon pa'i spong bas spong bar brjod par
 bya'i/ bag la nyal yang dag par 'joms pa'i spong bas ni ma yin no/ /rgyu mtshan la ji lta ba bzhin du ming dang rnam par rtog pa yang de bzhin no/ /de bzhin nyid la dmigs pa dang / yang dag par shes pa la dmigs pa dang / bag la nyal yang dag par 'joms pa'i
 spong bas kyang spong bar brjod par bya'o/ /dngos po lnga po de dag las dngos po du zhig yid la byed pa na 'jig rten pa'i bsam gtan dang po la snyoms par 'jug ce na/ smras pa/ 'dod pa dang ldan pa dang / bsam gtan dang po'i sa pa dang ldan pa'i rgyu mtshan dang / ming dang rnam
 par rtog pa yid la byed pa na'o/ /de bzhin du sa 'og ma pa dang / bsam gtan gnyis pa'i sa pa dang ldan pa'i rgyu mtshan dang / ming dang / rnam par rtog pa yid la byed pa na 'jig rten pa'i bsam gtan gnyis pa la snyoms par 'jug go/ /bsam gtan dang / gzugs med pa'i
 snyoms par 'jug pa lhag ma rnams la yang de bzhin du ci rigs par rig par bya'o/ /dngos po du zhig yid la byed pa na 'jig rten las 'das pa'i bsam gtan dang po la snyoms par 'jug ce na/ smras pa/ 'dod pa dang ldan pa dang / bsam gtan dang po'i sa
 pa dang ldan pa'i rgyu mtshan dang / ming dang rnam par rtog pa de dag nyid kyi de bzhin nyid yid la byed pa na'o/ /ci yang med pa'i skye mched kyi bar du yang de bzhin du ci rigs par rig par bya'o/ /'du shes med 'du shes med min skye mched la ni nges par 'jig rten pa kho nas so/ /
 'du shes med 'du shes med min skye mched dang ldan pa'i rgyu mtshan/ ci rgyu mtshan du brjod par bya'am zhe na/ smras pa/ mtshan ma med pa rgyu mtshan dang / cha phra ba rgyu mtshan du brjod par bya'o/ /dngos po lnga po de dag la dad pa la sogs pa'i chos gang dag yin pa de dag ngo bo
 nyid gang dag dang / dmigs pa gang dag dang / bdag po gang dag gis dbang po'i ming 'thob ce na/ smras pa/ rnam par rtog pa'i ngo bo nyid dang / ming dang rgyu mtshan la dmigs pa dang / de bzhin nyid dang yang dag pa'i shes pa'i bdag pos so/ /dbang po'i ming ji lta ba
 bzhin du stobs rnams kyi ming yang de bzhin no/ /gnas skabs gang la stobs kyi ming 'thob ce na/ smras pa/ gang gi tshe dad pa la sogs pa'i dbang po de dag nyid ma dad pa la sogs pa dang ma 'dres shing ma 'dres pa'i chos nyid du gyur pa na'o/ /dbang po dang / stobs dag ji
 lta ba bzhin du 'jig rten pa'i byang chub kyi yan lag dran pa la sogs pa gang dag yin pa de dag kyang byang chub kyi phyir yan lag yin pas rnam par rtog pa'i ngo bo nyid yin par blta bar bya'o/ /'jig rten las 'das pa'i byang chub kyi yan lag dran pa la sogs pa gang dag yin pa de dag ni
 byang chub kyi yan lag yin pas yang dag pa'i shes pa'i ngo bo nyid dang / de bzhin nyid la dmigs pa dang / rnam par gzhag pa'i bden pa rtog pa'i bdag po yin par blta bar bya'o/ /yang dag pa'i lta ba la sogs pa lam gyi yan lag rnams kyang gang dag 'jig rten pa yin pa
 de dag ni snga ma bzhin du blta bar bya'o/ /gang dag 'jig rten las 'das pa de dag ni yang dag pa'i shes pa las tshul khrims kyi yan lag ma rtogs pa'i ngo bo nyid dang / rnam par ma bzhag pa'i bden pa dang / rnam par bzhag pa'i de bzhin nyid la dmigs pa dang / zag pa thams
 cad zad pa mngon du bya ba dang / tshe 'di la bde bar gnas pa'i bdag po yin no/ /lam gyi yan lag rnams ji lta ba bzhin du/ lam dang / chos kyi gzhi dang / zhi gnas dang / lhag mthong yang de bzhin du blta bar bya'o/ /de la lam ni/ dbang po rtul po dang / rnon po dang /
 rnam par gzhag pa dang / tshe 'di la bde bar gnas pa thob pa dang / ma thob pa las rnam par gzhag go/ /chos kyi gzhi rnams ni brdar btags pa dang / don dam pa pa'i chos 'dzin pa las rnam par gzhag ste/ lhag pa'i tshul khrims kyi brdar btags pa'i dam pa'i chos
 'dzin pa las ni dang po gnyis rnam par gzhag go/ /lhag pa'i sems dang / lhag pa'i shes rab kyi don dam pa'i chos 'dzin pa las ni tha ma gnyis rnam par gzhag go/ /zhi gnas dang / lhag mthong ni dmigs pa las mi g.yo ba dang / de la yongs su rtog pa'i don gyis
 rnam par gzhag go/ /mtshan ma dang gnas ngan len gyi 'ching ba gnyis las rnam par grol ba'i dbang gis rnam par thar pa brgyad de/ dngos po lnga po de dag la rnam par thar pa brgyad kyi ngo bo nyid ni gang dag yin/ dmigs pa ni gang dag yin/ bdag po ni gang dag yin zhe
 na/ smras pa/ 'jig rten pa dang / 'jig rten las 'das pa'i yang dag pa'i shes pa'i ngo bo nyid do/ /dang po dang gnyis pa ni gzugs kyi kha dog gi mtshan ma dang / de bzhin nyid la dmigs pa yin no/ /gsum pa ni gzugs nyid kyi phan 'dogs pa'i mtshan ma dang /
 de'i de bzhin nyid kyi mtshan ma la dmigs pa yin no/ /bzhi ni rang gi mtshan ma la dmigs pa dang / de dag gi de bzhin nyid kyi mtshan ma la dmigs pa yin no/ /tha ma ni dmigs pa med pa yin no/ /thams cad kyang 'phags pa'i rdzu 'phrul gyi yon tan mngon par sgrub pa
 la bdag po yin no/ /de dag kyang gzugs kyi mtshan ma dang / gzugs med pa'i mtshan ma la dbang po'i sgrib pas bsgribs pa'i rnal 'byor pas sgrib pa de dag spang ba'i phyir rtsom par byed do/ /zil gyis gnon pa'i skye mched brgyad kyi/ dang po bzhi ni 'di
 lta ste/ dper na rnam par thar pa dang po gnyis dang 'dra'o/ /tha ma bzhi ni 'di lta ste/ dper na rnam par thar pa gsum pa dang 'dra'o/ /gzugs zil gyis gnon par dka' ba'i phyir gzugs de zil gyis gnon na/ gzugs med pa zil gyis gnon pa'i dbang yang 'thob
 pa'i phyir ro/ /zil gyis mnan nas shes/ zil gyis mnan nas mthong bar byed do zhes gang gsungs pa de la/ 'phags pas ni gzugs kyi mtshan ma dang / de bzhin nyid yid la byed pas zil gyis mnan nas shes/ zil gyis mnan nas mthong ngo / /so so'i skye bo'i
 ni de lta ma yin no/ /so so skye bos ji ltar zil gyis gnon zhe na/ smras pa/ 'du shes gsum gyis te/ gzugs sdug pa dang / mi sdug pa la gcig la gcig ltos pa'i 'du shes dang / gcig la gcig ltos pa'i phyir gcig la gcig 'brel pa'i 'du shes dang / gcig
 la gcig 'brel pa'i phyir gzugs sdug pa dang mi sdug pa la sdug par ro gcig pa'i 'du shes kyis so/ /de ltar so so'i skye bo rnams kyi zil gyis gnon pa tha ma de ni 'phags pa rnams dang thun mong ba yang yin no/ /zad par gyi skye mched bcu ni zil gyis gnon pa'i skye mched kyi
 stobs kyis blta bar bya'o/ /de la bye brag ni 'di yod de/ 'byung ba'i mtshan ma la dmigs pa dang / de dag gis de bzhin nyid kyi mtshan ma la dmigs pa gang dag yin pa dang / nam mkha' dang rnam shes mtha' yas skye mched kyi mtshan ma la dmigs pa dang / de
 dag gi de bzhin nyid kyi mtshan ma la dmigs pa yin no/ /gzhan du na gnas ma khyab par gnas pa khyab par mi 'gyur te/ dmigs pa de ni de bzhin nyid kyi mtshan ma yid la byed pas zad par las khyab par brjod par bya'o/ /zil gyis gnon pa dang zad par khyad par byed pa
 'di gnyis kyis ni rnam par thar par rnam par dag pa dang 'phags pa'i rdzu 'phrul gyi yon tan mngon par sgrub par byed do/ / / /bam po sum cu bzhi pa/ sdom ni/ bsdu dang ngo bo nyid dang ni/ /gzung dang 'jig tshogs srid pa dang / /'jig rten de nyid yongs
 tshol dang / /yang dag dgongs dang go rims so/ /rgyu mtshan bden pa du dag gis bsdus she na/ smras pa/ rnam par gzhag pa'i bden pa bzhis so/ /ming ni gcig gis te/ sdug bsngal gyi bden pas so/ /rnam par rtog pa ni 'gog pa'i bden pa ma gtogs
 pa gsum gyis so/ /de bzhin nyid ni rnam par ma bzhag pa'i bden pa bzhis so/ /yang dag pa'i shes pa ni rnam par ma bzhag pa dang / rnam par bzhag pa'i bden pa la dmigs pa'i lam gyi bden pas bsdus so/ /rgyu mtshan gang yin pa de ming yang yin la/ ming
 gang yin pa de yang rgyu mtshan yin nam zhe na/ re zhig ming gang yin pa de ni rgyu mtshan yin no/ /rgyu mtshan yin la ming ma yin pa yang yod de/ ming rgyu mtshan ma gtogs pa de las gzhan pa'i rgyu mtshan bzhi po dag go/ /lhag ma rnams kyang de bzhin du ci rigs par rig
 par bya'o/ /rgyu mtshan gang yin pa de thams cad rgyu mtshan rgyu mtshan yang yin la/ rgyu mtshan rgyu mtshan gang yin pa de thams cad kyang rgyu mtshan yin nam zhe na/ re zhig rgyu mtshan rgyu mtshan gang yin pa de ni rgyu mtshan yin no/ /rgyu mtshan yin la rgyu mtshan rgyu mtshan ma yin
 pa yang yod de/ ming rgyu mtshan la sogs pa bzhi po dag go/ /rgyu mtshan rgyu mtshan la rnam par rtog par byed pa gang yin pa de thams cad ming dang rgyu mtshan dang ldan pa'i 'brel ba la rnam par rtog par byed pa yin nam/ ming rgyu mtshan la rnam par rtog par byed pa gang yin pa de
 thams cad rgyu mtshan rgyu mtshan dang ldan pa'i 'brel ba la rnam par rtog par byed pa yin nam zhe na/ mu bzhi ste/ rgyu mtshan rgyu mtshan la rnam par rtog par byed la/ ming rgyu mtshan dang ldan pa'i 'brel pa la rnam par rtog par byed pa ma yin pa yang yod de/ ming ma rtogs pa'i rgyu
 mtshan la rnam par rtog pa'i rgyu mtshan dang / ming gi bag la nyal bsal ba gang yin pa'o/ /ming rgyu mtshan la rnam par rtog par byed pa rgyu mtshan rgyu mtshan dang ldan pa'i 'brel pa la rnam par rtog par mi byed pa yang yod de/ dngos po ma rtogs pa'i ming la
 rnam par rtog pa'i rgyu mtshan gang yin pa'o/ /de las bzlog pa ni gnyi ga yin no/ /rnam pa de dag ma gtogs pa ni gnyi ga ma yin no/ /de bzhin nyid yid la byed pa gang yin pa des de bzhin nyid kho na mthong bar 'gyur ram/ de bzhin nyid mthong bar 'gyur ba gang yin pa
 de de bzhin nyid kho na yid la byed pa yin zhe na/ mu bzhi ste/ de bzhin nyid yid la byed la de bzhin nyid mthong bar mi 'gyur ba yang yod de/ rnam par rtog pas bsdus pa'i yid la byed pas de bzhin nyid yid la byed pa na/ ji srid du ma rtogs kyi bar du de bzhin nyid kyi mtshan
 ma ni mthong bar 'gyur / de bzhin nyid ni mthong bar mi 'gyur zhing rtogs par mi 'gyur ba'i bar dang / rtogs par gyur na yang de'i 'og tu rnam par gzhag pa'i de bzhin nyid yid la byed pa'o/ /de bzhin nyid mthong bar 'gyur ba la de bzhin nyid yid la mi byed pa yang yod
 de/ de bzhin nyid rtogs par byed pa'i tshe na don dam par mtshan ma med pa yid la byed pa'o/ /de bzhin nyid kyang mthong la de bzhin nyid kho na yid la byed par 'gyur ba yang yod de/ rtog pa'i 'og tu rnam par ma bzhag pa'i de bzhin nyid rgyun du yid la byed pa'o/ /de bzhin
 nyid kyang mi mthong ba de bzhin nyid yid la byed par yang mi 'gyur ba yang yod de/ rigs pas bskyed pa med pa'i yid la byed pas mtshan ma yid la byed pa'o/ /mtshan ma yid la byed pa gang yin pa des/ mtshan ma nyid yang dag par rjes su mthong bar 'gyur
 ram/ mtshan ma yang dag par rjes su mthong ba des mtshan ma nyid yid la byed ce na/ mu bzhi ste/ mtshan ma yid la byed la mtshan ma mthong bar mi 'gyur ba yang yod de/ 'di lta ste/ dper na mu gnyis pa lta bu'o/ /mtshan ma mthong la mtshan ma yid la byed par
 mi 'gyur ba yang yod de/ 'di lta ste/ dper na mu dang po lta bu'o/ /mtshan ma yang yid la byed la mtshan ma nyid mthong bar 'gyur ba yang yod de/ 'di lta ste/ dper na mu bzhi pa lta bu'o/ /mtshan ma yang yid la byed la mtshan ma mthong bar mi 'gyur ba yang yod de/
 'di lta ste/ dper na mu gsum pa lta bu'o/ /ci dngos po lnga po de dag gis chos thams cad bsdus pa yin nam/ 'on te ma yin zhe na/ smras pa yin no/ /chos de dag gis ngo bo nyid gang yin par brjod par bya zhe na/ smras pa/ brjod du med pa'i ngo bo nyid yin no/ /de dag gi
 mtshan nyid ji lta bu yin par blta bar bya zhe na/ smras pa/ sgyu ma lta bu'i mtshan nyid yin gyi/ med pa nyid ni ma yin te/ 'di lta ste/ dper na sgyu ma'i las nyid kyis ni yod la/ rta dang glang po che dang / shing rta dang / dpung bu chung dang / nor bu dang / mu tig dang / gser
 dang / dngul la sogs pa'i ngo bo nyid du ni yod pa ma yin pa de bzhin du ngo bo nyid kyang ming dang mtshan ma tsam nyid du ni yod la/ ngo bo nyid dang / khyad par du gdags par snang ba'i dngos por ni yod pa ma yin no/ /rgyu mtshan rgyu mtshan zhes bya ba'i ming des rgyu mtshan gyis ngo bo nyid
 dmigs su med do/ /rgyu mtshan ji lta ba de bzhin du ming gis ming gi ngo bo nyid dang / rnam par rtog pas rnam par rtog pa'i ngo bo nyid dang / de bzhin nyid kyis de bzhin nyid kyi ngo bo nyid dang / yang dag pa'i shes pas yang dag pa'i shes pa zhes bya ba'i ming des yang dag pa'i shes
 pa'i ngo bo nyid dmigs su med do/ /de ci'i phyir zhe na/ de'i ngo bo nyid rnam pa thams cad du mi 'thad pa'i phyir ro/ /gal te ngo bo nyid gang gis rgyu mtshan rnam par gzhag pa de la de dang mthun pa nyid kyi ming nye bar 'dogs par byed pa'i phyir nye bar 'dogs pa ni rgyu mtshan la rag las
 pa yin no zhe na/ des na nye bar 'dogs pa'i sngon rol na/ ji ltar ming rnam par gzhag pa bzhin du rgyu mtshan la de'i blo 'byung bar 'gyur ba dang / rgyu mtshan gcig la yang nye bar 'dogs pa mang ba'i phyir dang / sna tshogs pa'i phyir bdag nyid mang po 'thob par 'gyur bas/
 de'i phyir nye bar 'dogs pa rgyu mtshan la rag las par mi rung ngo / / gal te ji ltar rgyu mtshan la ming rnam par 'jog par byed pa de bzhin du ming gi dbang gis rgyu mtshan gyi ngo bo de nyid 'byung bar 'gyur ro zhe na/ des na nye bar 'dogs pa'i sngon rol na rgyu mtshan gyi ngo
 bo nyid med par 'gyur te/ de med na nye bar 'dogs pa yang med par 'gyur bas de'i phyir de gnyi ga yang med par thal bar 'gyur ba dang / nye bar 'dogs pa mang ba'i phyir dang / sna tshogs pa'i phyir bdag nyid mang po nyid dang / gzhan gyi dbang du 'gyur ba'i skyon du
 yang 'gyur ro/ /gzhan gyi dbang du 'gyur ba ni rgyu mtshan la nye bar 'dogs pas de'i phyir nye bar 'dogs pa thams cad kyis/ de'i bdag nyid kyi ngo bo nyid yin par mi rung ste/ sgyu ma'i skyes bu'i lus sna tshogs grub pa dang 'dra ste/ 'di lta ste/ dper na sgyu ma mkhan
 gyis skyes pa dang / bud med dang / glang po che dang / rta dang / dom dang / dred kyi lus la sogs pa'i lus sna tshogs kyis sgyu ma'i skyes bu mngon par 'du byed pa de ni lus gang gi bdag nyid kyang ma yin pa de bzhin du/ rgyu mtshan yang nye bar 'dogs pa thams cad kyis
 de'i bdag nyid ma yin par blta bar bya'o/ /gal te rgyu mtshan dang nye bar 'dogs pa gnyi ga 'dus pas de dang bral ba'i ngo bo nyid skyed par byed na ni des na de'i rgyu mtshan nam/ ming ngam/ de gnyi ga'am/ bar ma do zhig yin par dmigs pa'i rigs ni mi dmigs te/ de'i
 phyir de yang mi rung ngo / /de lta bas na ngo bo nyid ni tha snyad las byung ba yin no/ /gal te nye bar 'dogs pa ni ngo bo nyid rnams kyi mngon par gsal bar byed pa yin par 'dod na/ de ltar yang mi rung ste/ bzung nas sam/ ma bzung bar nye bar 'dogs pa'i skyon du 'gyur
 ba'i phyir ro/ /gal te rgyu mtshan bzung nas nye bar 'dogs par byed na ni mngon par gsal bar byed pa yin par mi rung ngo / /ji ste rgyu mtshan ma bzung bar nye bar 'dogs par byed na ni gzhi med par nye bar 'dogs pa mi rung ngo / /snga ma bzhin du bdag nyid du ma yin pa'i skyon du
 yang 'gyur te/ nye bar 'dogs pa rnams ni mang po sna tshogs yin pa'i phyir ro/ /gsal bar byed pa'i dpe ni mi mthun pa yin pas mi rung ste/ de la mi mthun pa ni 'di yin te/ snang zhing mngon par gsal bar byed pa'i rgyu ni thams cad la bye brag med pa dang / sna
 tshogs pa yang yin la nye bar 'dogs pa ni de ltar 'dzin pa'i rgyu ni de lta ma yin pa'o/ /gang gi phyir brjod du med par brjod pa yang brjod du med pa zhes bya bar brjod par snang ba de'i phyir/ brjod du med pa zhes bya bar mi rung la/ sgyu ma'i skyes bu lus sna tshogs su grub pa de dag
 gis de'i bdag nyid ma yin yang / sgyu ma'i skyes bu lus sna tshogs su grub pa de'i bdag nyid yin pas/ de'i phyir yang dpe mi mthun pa yin no zhe na/ smras pa/ brjod du med pa de brjod du med do zhes dam bcas pa'i tshe kho na dgag pa byas zin pas de la nyes pa med do/ /don
 de nyid rtogs par bya ba'i phyir sbyor bar byed pa yin no/ / 'dra ba'i phyir dpe mi mthun pa yang ma yin la nye bar 'dogs pa dag gis de'i bdag nyid kyang ma yin zhing / brjod du med pa'i don med pa yang ma yin no/ /gal te ming gis nye bar 'dogs par byed na ni rgyu mtshan gyi dngos po srid
 par 'gyur la/ mi byed na ni mi srid par 'gyur na ni de lta na chos mthun pa'i dpe yang rung bar 'gyur la/ brjod du med par rtog pa yang rigs par 'gyur ro/ /gal te de lta ma yin na/ de'i phyir brjod du med par rtog pa ni don med pa yin no zhe na/ smras pa/ sa'i dngos
 gzhir rnam par rtog pa snga ma rnam pa brgyad las da ltar byung ba'i dngos po rnam pa gsum 'byung bar 'gyur ro zhes ji skad bstan pa yin te/ 'byung ba'i dngos po rnam pa gsum po de yang rnam par rtog pa rnams kun tu skyed pa'i phyir 'byung ba yin te/ de ltar 'brel ba'i tshul gyis kun
 nas nyon mongs pa rgyun mi 'chad par 'gyur bas de'i phyir dpe ni chos mthun pa yin no/ /rnam par rtog pa'i nye bar 'dogs pa spangs na/ kun nas nyon mongs pa ldog pa yang rung ste/ de ni 'phags pa'i ye shes kyis dmigs pa yin pas/ de yang tshad ma yin te/ de'i phyir
 brjod du med par rtog pa don med pa ma yin no/ /gal te rgyu mtshan gyi dngos po rnam par gzhag pa'i phyir rnam par rtog pa'i nye bar 'dogs pa spong ba yin na/ de lta na 'phags pa'i ye shes gang yang rung ba gcig gis rgyu mtshan dang rnam par rtog pas bsdus
 pa'i sems can dang / sems can du bgrang ba ma yin pa'i dngos po thams cad 'gog par thal bar 'gyur te/ 'di lta ste/ dper na sgyu ma mkhan dang sgyu ma'i las bzhin no zhe na/ smras pa/ dngos po ni rnam par rtog pa thun mong ma yin pa'i rgyu las byung ba dang / rnam par rtog
 pa thun mong pa'i rgyu las byung ba yin pas/ rnam par rtog pa thun mong ma yin pa'i rgyu las byung ba rnam par brtags pa gang yin pa de ni 'gog par 'gyur la/ rnam par rtog pa thun mong ba'i rgyu las byung ba rnam par ma brtags pa gang yin pa de ni gzhan gyi rnam par rtog pas zin
 pa yin pas mi 'gog ste/ gzhan du na gzhan gyi rnam par rtog pa don med par 'gyur ro/ /de ma 'gags na yang rnam par dag pa'i bdag nyid can gyi mthong ba rnam par dag par 'gyur bar khong du chud par bya ste/ 'di lta ste/ dper na rnal 'byor pa rab tu mang pos dngos po gcig
 la mnyam par gzhag pa'i shes pas sna tshogs su mos par byed pa dag la mthong ba sna tshogs dag dmigs par 'gyur ba de dang 'dra'o/ /dngos po lnga po de dag las du zhig gzung ba dag yin/ du zhig 'dzin pa dag yin zhe na/ smras pa/ gsum ni gzung ba yin no/ /rnam
 par rtog pa dang yang dag pa'i shes pa ni 'dzin pa yang yin/ gzung ba yang yin no/ /dngos po lnga po dag la mdor bsdu na rnam pa du zhig 'dzin pa'i spyod yul gyi don yin par blta bar bya zhe na/ smras pa/ rnam pa gsum ste/ brjod pa dang bcas shing mtshan ma dang bcas
 pa'i 'dzin pa'i spyod yul dang / brjod du med la mtshan ma dang bcas pa'i 'dzin pa'i spyod yul dang / mtshan ma med pa 'dzin pa'i spyod yul lo/ /de la dang po ni tha snyad rjes su sad pa'i 'dzin pa'i spyod yul lo/ /gnyis pa ni tha snyad bag la 'dzin pa'i spyod yul lo/ /
 gsum pa ni tha snyad bag la nyal ba ma yin pa'i 'dzin pa'i spyod yul lo/ /dang po gnyis ni kun rdzob kyi bden pa 'dzin pa yin no/ /tha ma ni don dam pa'i bden pa 'dzin pa yin no/ /gzhan yang bag la nyal med pa de'i rjes las thob pa'i 'dzin pa yang yod de/ de'i spyod
 yul ni bden pa gnyis kar gtogs pa'i gzung ba yin te/ 'di lta ste/ 'jig rten pa dang 'jig rten las 'das pa'i shes pa'o/ /de'i spyod yul ni rnam par gzhag pa'i bden pa yin pa'i phyir de'i spyod yul bden pa gnyi gar gtogs pa yin par rnam par gzhag go/ 'jig
 rten pa dang 'jig rten las 'das pa'i 'dzin pa de gnyis kyang rgyu gnyis kyis rnam par shes par bya ste/ 'dris pa dang ma 'dris pa'i phyir dang / tha snyad dang tha snyad ma yin pa la brten pa'i phyir ro/ /'jig rten na mtshan ma dang bcas pa la 'dzin par ni grags kyi/ mtshan ma med
 pa la 'dzin par ni ma grags pas/ rgyu med pa dang rkyen med par ni mi rung na / de'i rgyu ni gang rkyen ni gang zhe na/ smras pa/ tha snyad kyis yongs su bsgos pa'i 'dzin pa'i 'bras bu ni mtshan ma dang bcas pa la 'dzin par grags pa yin te/ kun nas nyon mongs par 'gyur ba'o/ /
 don dam pa'i shes pas yongs su bsgos pa'i 'dzin pa'i 'bras bu ni mtshan ma med pa la 'dzin pa yin te/ rnam par byang bar 'gyur ba'o/ /de'i phyir de gnyi ga yang rgyu dang bcas pa dang / rkyen dang bcas pa yin te/ mig la rab rib kyi skyon yod pa la skra shad 'dzings pa la sogs
 pa rab rib kyi mtshan ma dmigs pa lta bu dang / skyon med pa la de mi dmigs shing / tha mal par snang ba lta bu'o/ /gal te mtshan ma med pa'i dbyings la mtshan mar 'dzin na ni mtshan ma med pa 'dzin par mi 'gyur ro/ /gal te mi 'dzin na ni de lta na yang mtshan ma med pa
 'dzin par mi 'gyur ro zhe na/ smras pa/ 'dzin pa ni tha snyad bag la nyal med pa'i phyir mtshan ma med pa'i dbyings la 'dzin pa na yang / de la mtshan mar mi 'dzin pas mtshan ma med pa 'dzin par 'thad do/ /mtshan mar mi 'dzin pas de ji ltar 'dzin zhe na/ de'i mtshan ma
 bshig pa'i phyir dang / mngon rtags su 'dzin par sgro 'dogs pa med pas so/ /ji ste mtshan mar mi 'dzin na yang mngon rtags su 'dzin par sgro 'dogs pa med na/ mtshan ma nyid ci 'dra bar rig par bya zhe na/ smras pa/ don dam pa 'dzin pa'i phyir
 dang / mtshan ma med pa 'dzin pa ma yin pa'i phyir dang / dngos po lnga po la mtshan ma thams cad mi snang ba'i mtshan nyid yin no/ /gal te mi gsal bar 'dzin par rnam par bzhag na/ 'dzin pa de 'gog pa kho na yin par ci'i phyir mi rtag ce na/ smras pa/ 'gog par
 ni mngon par 'du bya ba ma yin pa'i phyir rnal 'byor pa ni de 'gog pa'i phyir mngon par 'du mi byed do/ /de'i mtshan nyid ji ltar so sor rig par bya zhe na/ smras pa/ so so rang rig pa'i ye shes kyis so/ /de ji ltar so sor rig par byed pa de ltar ci'i phyir lan 'debs par
 mi byed ce na/ smras pa/ so sor rig pa de ni brjod pa'i gzhi'i gnas ma yin pa'i phyir ro/ /gal te shes pa dang po mtshan ma med pa ma yin na ni/ de med pa'i phyir mtshan ma med pa'i shes pa goms pa yang med par 'gyur la/ de la goms pa med na ni mtshan ma med
 pa rgyu med pa las skye bar mi rung ngo zhe na/ smras pa/ mtshan ma dang bcas pa yang mtshan ma med pa'i rgyur rung ste/ de dang mthun pa'i phyir ro/ /'di lta ste/ dper na 'jig rten pa la brten nas 'jig rten las 'das pa skye ba dang / zag pa dang bcas pa la brten nas zag
 pa med pa dang / sems yod pa'i snyoms par 'jug pa la brten nas sems med pa skye ba dang 'dra'o/ /bcom ldan 'das kyis rnam par dag pa'i rgyur sdug bsngal la sogs pa shes pa gsungs pa la/ gal te sdug bsngal la sogs pa shes pas sdug bsngal la sogs pa'i
 bden pa dag sdug bsngal la sogs par yongs su rtog par byed na ni/ de na mtshan ma dang bcas par 'gyur ro/ /ji ste yongs su rtog par mi byed na ni sdug bsngal la sogs pa shes par mi 'gyur bas/ de med na ji ltar rnam par dag par 'gyur zhe na/ smras pa/ bden pa rnams la
 'jig rten pa dang 'jig rten las 'das pa'i shes pa rnam par dag pa ni mtshan ma med pa'i shes pa'i dbang gis byung ba yin pa'i phyir/ de nyid kyis nyon mongs pa rnam par spangs pas na/ mtshan ma med pa'i shes pa sdug bsngal la sogs pa'i shes pa'i rgyur gyur pa nyon mongs pa spong bar
 byed pa gang yin pa de nyid la rgyu la 'bras bu gdags pa byas nas sdug bsngal la sogs pa shes pas nye bar gdags pas nyes pa med do/ /sngar bzung ba ni 'dzin pa'i 'bras bu can yin no zhes bstan na 'dzin pa de'i 'bras bu gang yin par brjod par bya zhe na/ smras pa/ gnyi ga
 gcig gi 'bras bu gcig yin no/ /gang gi tshe shes bya mi rtag pa 'dris pa brtan pa dang dpag tu med pa/ phal cher lkog tu gyur pa yin pa'i tshe/ rnal 'byor pa des ji ltar de la dmigs par byed cing rnam par zlog par yang byed ce na/ smras pa/ thos pa dang bsam pa'i dbang
 gis ting nge 'dzin thob par 'gyur la/ des shes bya rnam pa lnga'i ting nge 'dzin gyi gzugs brnyan mngon du byas nas/ shes bya de la dmigs par byed do/ /zil gyis gnon pas ni rnam par zlog par byed do/ /shes bya rnam pa lngas zil gyis gnon pa'i mtshan nyid ji lta bu yin par
 brjod par bya zhe na/ smras pa/ gnas par gyur pa/ 'dus ma byas pa mya ngan las 'das pa'i mtshan nyid bla na med pa yin no/ /mya ngan las 'das pa gang zhe na/ chos kyi dbyings rnam par dag pa gang yin pa ste/ nyon mongs pa dang sdug bsngal nye bar zhi ba'i don gyis yin gyi /
 med pa'i don gyis ni ma yin no/ /gang gi tshe nyon mongs pa dang sdug bsngal nye bar zhi ba tsam la mya ngan las 'das pa zhes bya ba'i tshe/ ci'i phyir de med pa'i don gyis ma yin zhe na/ smras pa/ 'di lta ste/ dper na chu'i khams la rnyog pa dngas pa tsam gsal ba yin yang rnyog pa
 dngas par gyur pas gsal ba nyid med pa ma yin pa dang / gser skyon dang bral ba tsam bzang ba nyid yin yang de dang bral bas bzang ba nyid med pa ma yin pa dang / nam mkha' sprin dang / khug rna la sogs pa dang bral ba tsam rnam par dag pa nyid yin yang de dang bral bas rnam par
 dag pa nyid med pa ma yin pa bzhin du/ 'di la yang tshul de bzhin du blta bar bya'o/ /chos kyi dbyings rnam par dag pa gang zhe na/ yang dag pa'i shes pa bsgom pa la brten nas mtshan ma thams cad bsal bas de bzhin nyid gang yin pa ste/ 'di lta ste/ dper
 na mi la zhig gnyid log pa'i tshe bdag nyid chu bo'i chus khyer bar rmis nas de chu bo de las rgal bar bya ba'i phyir brtson 'grus chen po la rtsom par 'gyur ba las/ brtson 'grus rtsom pa de nyid kyis sad par gyur cing / sad nas kyang chu bo'i chu de nyid mi snang bar gyur pa de bzhin du mtshan ma
 sel ba 'di la yang tshul de bzhin du blta bar bya'o/ /ci gang gi tshe tha snyad kyi bag la nyal spong bar byed pa de nyid kyi tshe na/ mtshan ma rnam par 'jig par byed dam/ 'on te spangs pa'i 'og tu dus gzhan gyi tshe na rnam par 'jig par byed ce na/ smras pa/ de spong bar byed pa dang / de
 rnam par 'jig par byed pa ni srang mda'i mthon dman gyi tshul bzhin du mgo mnyam zhing dus gcig tu ste/ 'di lta ste/ dper na ri mo'i dbyibs la tshon rtsi byed pa na/ dbyibs kyang byed par 'gyur ba dang / rab rib kyi skyon bsal ba na skra shad 'dzings pa la sogs pa rab rib kyang
 bsal bar mgo mnyam pa bzhin du/ 'di la yang tshul de bzhin du blta bar bya'o/ /rnal 'byor pas ji ltar dmigs pa zil gyis gnon zhe na/ smras pa/ sems mnyam par gzhag pa la shes bya'i gzugs brnyan byung ba na/ sngar don dam pa legs par rtogs pa yid la byed
 pas mtshan ma dang bcas pa nyid ni rnam par ldog / mtshan ma med pa nyid du 'gyur ro/ /mtshan ma med pa nyid du 'gyur ba de yang gnas skabs lnga ste/ nyi tshe ba dang / thams cad du 'gro ba dang / g.yo ba dang / mngon par 'du byed pa dang bcas pa dang / grub pa'o/ /grub pa de
 yang mtshan nyid ji lta bu yin zhe na/ nyon mongs pa thams cad dang / gnod pa thams cad kyis mi brdzi ba'i phyir/ gtan du gnod pa byar med pa yin pas na gnas grub pa zhes bya ste/ de yang de kho na'i don shin tu rnam par dag pa spyod yul pa
 dang / thams cad mngon sum gyi spyod yul pa dang / thams cad la dbang sgyur ba'i spyod yul ba'o/ /grub pa de yang theg pa dus rnam par 'jog par byed cing / dus ji tsam gyis 'thob ce na/ smras pa/ dbang po rnam pa gsum yod pa'i phyir theg pa gsum gyis rnam par 'jog ste/ theg pa gnyis kyang bla na med pa yang dag
 par rdzogs pa'i byang chub kyi theg pa'i rtsa ba can yin pa'i phyir ro/ /gnyis kyis ni dus nges pa med pa 'thob ste/ rkyen ji lta ba dang / ji ltar yongs su smin pas so/ /tha mas ni gnas ngan len gsum gyi dbang du byas nas bskal pa grangs med pa gsum gyi dus kyis 'thob par
 'gyur ro/ /gnas ngan len rnam pa gsum gang zhe na/ ngan song la mi dga' ba'i phyogs dang mthun pa lpags shun la yod pa lta bu gang spangs pas ngan song du 'gro bar mi 'gyur zhing / sbyor ba byed pas na yang mi dga' ba dang 'dre bar mi 'gyur ba dang / nyon mongs pa'i sgrib pa'i
 phyogs dang mthun pa phra mo yod pa lta bu gang yang spangs pas rnam pa thams cad du nyon mongs pa shin tu phra mo yang kun tu mi 'byung zhing / bag la nyal yang dag par 'joms par ni mi 'gyur ba dang / shes bya'i sgrib pa'i phyogs dang mthun pa snying po la yod pa lta bu gang yang spangs pas
 mi shes pa'i bag la nyal yang dag par 'joms shing shes bya thams cad la sgrib pa med pa'i ye shes 'jug par 'gyur ro/ /ji ltar nyan thos rnam par gzhag ce na/ smras pa/ rgyu gsum gyis te/ sprul pa dang / smon lam dang / chos nyid kyis so/ /de la sprul pa ni 'dul ba'i
 dbang gis de bzhin gshegs pas de dang der nyan thos sprul pa sprul par mdzad pa gang yin pa'o/ /de la smon lam ni gang zag nyan thos kyi theg pa par smon lam btab pa/ nyan thos zhes bya bar rnam par 'jog par mdzad pa gang yin pa'o/ /de la chos nyid ni gang zag gang rang bzhin
 gyis snying rje chung ba dang / sdug bsngal gyis 'jigs pa de rgyu de gnyis kyis gzhan gyi don kyang mi 'dod la/ gzhan dag gi don du 'khor ba yang mi 'dod pas de la chos nyid des nyan thos su 'dogs par mdzad pa ste/ de mngon par rdzogs par byang chub pa'i chos can yin yang rnam par
 gzhag pa'i bden pa dag la skrag pa'i rnam pas shas cher 'jug pas des na de yang dag par 'grub par byed do/ /nyan thos ji lta ba bzhin du rang sangs rgyas rnams kyang de bzhin te/ de ni sangs rgyas rnams 'byung ba med kyang mngon par rdzogs par byang chub
 par 'gyur bas/ khyad par du 'phags pa yin no/ /byang chub sems dpa' ni de las bzlog pa'i rgyu gsum kho nas blta bar bya'o/ /ji ltar nyan thos chos 'dul ba las rab tu nyams pa yin par blta bar bya zhe na/ gal te nyon mongs pa'i rims nad med pa tsam 'gog pa yin
 par yongs su rtog pa na/ bdag chad par 'gyur ro/ /chud zos par 'gyur ro/ /mi 'byung bar 'gyur ro snyam du skrag pa skye bar 'gyur ba ste/ 'di lta ste/ dper na mi la la zhig rims kyis btab par gyur pa na/ de rims nad byung na rnam sa thams cad du nad med par 'gyur ba mi shes
 pas lus thams cad 'gag par 'gyur bar yongs su rtog cing skrag par gyur pa na/ rims kyi nad las yongs su thar bar mi 'gyur bas/ de ltar de rab tu nyams par 'gyur ba dang 'dra bar nyan thos kyang de bzhin du blta bar bya'o/ /ji ltar na byang chub sems dpa' theg pa chen po las
 rab tu nyams pa yin zhe na/ gal te chos rnams kyi zab pa dang ngo bo nyid med pa thos nas rang bzhin gyis nyon mongs pa'i rims nad med par yongs su rtog cing / bdag nyid nad med par rlom par byed pa ste/ 'di lta ste/ dper na mi rims kyis btab par gyur pa de nyid bdag nyid nad
 med par rlom par byed pa na/ rims kyi nad las yongs su thar bar mi 'gyur zhing / rab tu nyams par 'gyur ba dang / 'dra bar byang chub sems dpa' de yang de bzhin du blta bar bya'o/ /dngos po lnga po de dag las du zhig 'jig tshogs yin/ du zhig 'jig tshogs ma yin zhe na/ smras pa/
 rgyu mtshan ni gnyi ga yin no/ /gnyis ni 'jig tshogs yin no/ /gcig ni 'jig tshogs ma yin no/ /de bzhin nyid ni gnyi ga yang ma yin par brjod par bya'o/ /'jig tshogs ji lta ba bzhin du srid pa dang / 'jig rten pa yang de bzhin du blta bar bya'o/ /de kho na bzhi dang dngos
 po lnga po dag las dngos po lngas de kho na du dag bsdus she na/ smras pa/ 'jig rten gyi grags pa'i de kho na dang / rigs pas grags pa'i de kho na ni dngos po gsum gyis bsdus so / /nyon mongs pa'i sgrib pa rnam par dag pa'i ye shes kyi spyod yul gyi de kho na dang / shes bya'i
 sgrib pa rnam par dag pa'i ye shes kyi spyod yul gyi de kho na ni dngos po gnyis kyis bsdus so/ /yongs su tshol ba bzhi dang dngos po lnga po dag las/ dngos po lngas yongs su tshol ba du dag bsdus she na/ smras pa/ rnam par rtog pa tshul bzhin yid la byed pa dang ldan pas yongs
 su tshol ba bzhi po thams cad bsdus so/ /yang dag pa ji lta ba bzhin yongs su shes pa bzhi dang dngos po lnga po dag las dngos po du dag gis yang dag pa ji lta ba bzhin yongs su shes pa du dag bsdus she na/ smras pa/ yang dag pa'i shes pas bzhi po thams cad bsdus so/ /bcom
 ldan 'das kyis ji las dgongs nas chos thams cad gnyis su med pa zhes gsungs she na/ smras pa/ dngos po lnga po de dag nyid la tha snyad las byung ba'i ngo bo nyid kyis ngo bo nyid med pa nyid dang / rang rang gi mtshan nyid kyis ngo bo nyid dang bcas pa nyid las dgongs te gsungs so/ /
 bcom ldan 'das kyis ji las dgongs nas chos thams cad ngo bo nyid med pa zhes gsungs she na/ smras pa/ 'dul ba'i dbang gis de dang der ngo bo nyid med pa nyid rnam pa gsum las dgongs nas gsungs te/ mtshan nyid ngo bo nyid med pa nyid dang / skye ba ngo bo nyid med pa nyid dang /
 don dam pa ngo bo nyid med pa nyid do/ /mtshan nyid ngo bo nyid med pa nyid gang zhe na/ 'di lta ste/ chos rnams kyi tha snyad las byung ba'i ngo bo nyid do/ /skye ba ngo bo nyid med pa nyid gang zhe na/ 'di lta ste/ 'du byed rnams ni rten cing 'brel bar 'byung ba yin pa'i phyir rkyen gyi stobs
 kyis skye ba yin gyi/ rang mi skye ba ni skye ba ngo bo nyid med pa nyid ces bya'o/ /don dam pa ngo bo nyid med pa nyid gang zhe na/ de kho na'i don gyis mtshan nyid dang bral ba'i chos gang yin pa de ni don dam pa ngo bo nyid med pa zhes bya ste/ dper na dge slong rnal 'byor spyod pas rus pa'i keng rus mang po
 la mos par byas nas rnam par 'jig par ma nus pa na/ rus pa'i keng rus de la rtag tu rgyun mi 'chad par don dam pa'i ngo bo nyid med pa'i 'du shes 'byung ba dang 'dra bar/ don dam pa ngo bo nyid med pa nyid kyang / de bzhin du blta bar bya'o/ /de la dngos po lnga po dag
 ni mtshan nyid ngo bo nyid med pas/ ngo bo nyid med pa ma yin pa yang / skye ba ngo bo nyid med pa nyid dang don dam pa ngo bo nyid med pa nyid kyis ngo bo nyid med pa yin te/ de yang ci rigs par 'gyur ro/ /de la rgyu mtshan dang ming dang rnam par rtog pa dang yang dag pa'i shes pa ni gnyis kyis so/ /
 de bzhin nyid ni ngo bo nyid med pa nyid gang gis kyang ngo bo nyid med pa ma yin te/ bcom ldan 'das kyis de las dgongs nas bden pa gcig ste gnyis pa med par smras zhes tshigs su bcad pa las ji skad gsungs pa lta bu'o/ /bcom ldan 'das kyis ji las dgongs nas/ chos thams
 cad ma skyes pa dang / ma 'gags pa dang / gzod ma nas zhi ba dang / rang bzhin gyis yongs su mya ngan las 'das pa zhes gsungs she na/ smras pa/ mtshan nyid ngo bo nyid med pa nyid kho na las dgongs te gsungs so/ /bcom ldan 'das kyis ji las dgongs nas/ chos thams
 cad nam mkha' lta bu zhes gsungs she na/ smras pa/ mtshan nyid ngo bo nyid med pa nyid de kho na las dgongs te gsungs so/ /bcom ldan 'das kyis ci las dgongs nas/ chos thams cad sgyu ma lta bu zhes gsungs she na/ smras pa/ skye ba ngo bo nyid med pa nyid dang / don
 dam pa ngo bo nyid med pa nyid las dgongs te gsungs so/ /bcom ldan 'das kyis ji las dgongs nas/ gzugs na yod do/ /rnam par shes pa'i bar yang yod de/ mi rtag par yang dag par rjes su mthong ngo zhes gsungs she na/ smras pa/ mtshan nyid ngo bo nyid med pa nyid
 las dgongs te gsungs so/ /de ci'i phyir zhe na/ 'di ltar rtag pa med par yang dag par rjes su mthong ngo zhes gang gsungs pa de ni mi rtag par yod par yang dag par rjes su mthong ngo zhes gsungs pa yin pa'i phyir ro/ /bcom ldan 'das kyis ji las dgongs nas/ gzugs ni yod
 do/ /rnam par shes pa'i bar yang yod de/ sdug bsngal bar yang dag par rjes su mthong ngo zhes gsungs she na/ smras pa/ skye ba ngo bo nyid med pa nyid dang / don dam pa ngo bo nyid med pa nyid las dgongs te gsungs so/ /bcom ldan 'das kyis ji las dgongs nas/ gzugs
 ni yod do/ /rnam par shes pa'i bar yang yod de/ stong par yang dag par rjes su mthong ngo zhes gsungs she na/ smras pa/ chos rnams kyi mtshan nyid ngo bo nyid dang bral ba nyid dang / de dag nyid kyi skye ba ngo bo nyid med pa nyid dang / don dam pa ngo bo nyid med pa nyid las dgongs te
 gsungs so/ /bral ba nyid ji lta ba de bzhin du mtshan nyid mi 'dra ba nyid las dgongs nas bdag med par gsungs par blta bar bya'o/ /bcom ldan 'das kyis ji las dgongs nas/ gzugs dang rnam par shes pa'i bar la tshul bzhin du lta ba dang nges par rtog pa dang / nye bar rtog
 pa'i bar du byed pa de la ni tshul bzhin du snang zhing / de la med par yang snang ngo zhes gsungs she na/ smras pa/ mtshan nyid ngo bo nyid med pa nyid las dgongs te gsungs so/ /bcom ldan 'das kyis ji las dgongs nas/ de la gsog dang gsob dang snying po med par yang
 snang ngo zhes gsungs she na/ smras pa/ skye ba ngo bo nyid med pa nyid dang / don dam pa ngo bo nyid med pa nyid las dgongs te gsungs so/ /bcom ldan 'das kyis ji las dgongs nas/ de lta bas na gang la mig kyang 'gag cing kha dog gi 'du shes dang bral bar 'gyur ba dang /
 yid kyi bar yang 'gag cing chos kyi 'du shes dang bral bar 'gyur ba'i gnas de rig par bya'o zhes gsungs she na/ smras pa/ ngo bo nyid med pa nyid gang las kyang ma dgongs par gsungs so/ /bcom ldan 'das kyis ji las dgongs nas/ gang gi phyir thams cad du sems kyi 'du
 shes thams cad rnam par bshig par gyur pa de ci la bsten cing bsam gtan byed pa ni dbang po dang bcas pa'i lha rnams kyis kyang mi shes so zhes gsungs she na/ smras pa/ ngo bo nyid med pa nyid gang las kyang ma dgongs par gsungs so/ /bcom ldan 'das kyis ji las dgongs
 nas/ mig gis rnam par shes par bya ba'i gzugs dang / yid kyis rnam par shes par bya ba'i bar gyi chos yid bde ba dang / yid mi bde ba dang / btang snyoms kyi gnas lta bu dag la yang dag pa nyid dam/ bden pa nyid dam/ ma nor ba nyid dam/ phyin ci ma
 ma log pa nyid med do zhes kyang gsungs la/ 'phags pa 'jig rten las 'das pa ni/ bden pa yin par bka' stsal to zhes gsungs she na/ smras pa/ ngo bo nyid med pa nyid thams cad las dgongs te gsungs pa dang / ngo bo nyid med pa nyid gang las kyang ma dgongs par gsungs
 so/ /bcom ldan 'das kyis ji las dgongs nas/ bsam gtan pa rnams kyi bsam gtan gyi yul dang / sangs rgyas rnams kyi sangs rgyas kyi yul bsam gyis mi khyab bo zhes gsungs she na/ smras pa/ ngo bo nyid med pa nyid thams cad las dgongs te gsungs pa'am/ yang na
 ngo bo nyid med pa nyid gang las kyang ma dgongs par gsungs so/ /dngos po lnga po de dag las ci'i phyir dang po kho nar rgyu mtshan gdags pa la sogs pa go rims de ltar gdags pa mdzad ce na/ smras pa/ gzhi med pa la ming gdags su mi rung bas de'i phyir dang por rgyu mtshan gdags pa
 mdzad do/ /de'i 'og tu gang gis ngo bo nyid du 'dogs pa'am/ bye brag tu 'dogs par las de 'dogs pa byed pas/ de'i phyir ming gdags pa mdzad do/ /de'i 'og tu gang gis rgyu mtshan nam/ ming ngam/ de gnyi ga la rnam par rtog par byed pa'i rnam par rtog pa 'byung bas/ de'i
 phyir rnam par rtog pa gdags pa mdzad do/ /de ltar chos gsum po de dag gis kun nas nyon mongs pa'i phyogs yongs su rdzogs pa'i go rims yongs su bstan pa yin no/ /de'i 'og tu rnam par byang ba'i phyogs kyi skabs yin te/ kun nas nyon mongs pa'i chos de dag gis de bzhin nyid
 mthong ba dang / yang dag pa'i shes pa mthong na rnam par dag par 'gyur bas/ de'i phyir de gnyis kyis ni rnam par byang ba'i phyogs yongs su rdzogs pa'i go rims yongs su bstan pa yin te/ de ltar na de ni de dag gi go rims yin no/ /de kho na'i don gyi le'u'i dngos po'i rnam par gtan
 la dbab pa rdzogs so/ / / /de kho na'i don rnam par shes par 'dod pas/ ngo bo nyid gsum la brtson par bya ba'i sdom ni/ rten dang rnam par dbye ba dang / /rten dang rab dbye brten pa dang / /phra la mngon par zhen pa dang / /ming brjod ji bzhin mngon par zhe na/ /ngo bo nyid
 gsum gang zhe na/ kun brtags pa'i ngo bo nyid dang / gzhan gyi dbang gi ngo bo nyid dang / yongs su grub pa'i ngo bo nyid do/ /kun brtags pa'i ngo bo nyid gang zhe na/ ji tsam du rjes su tha snyad gdags pa'i phyir ming dang brda las byung ba'i ngo bo nyid gang yin pa'o/ /gzhan gyi dbang gis
 ngo bo nyid gang zhe na/ rten cing 'brel par 'byung ba'i ngo bo nyid gang yin pa'o/ /yongs su grub pa'i ngo bo nyid gang zhe na/ 'di lta ste/ rnam par dag par bya ba'i phyir dang / mtshan ma dang / gnas ngan len gyi 'ching ba thams cad las rnam par thar par bya ba'i phyir dang / yon tan
 thams cad mngon par bsgrub par bya ba'i phyir chos rnams kyi de bzhin nyid 'phags pa'i ye shes kyi spyod yul/ 'phags pa'i ye shes kyi dmigs pa gang yin pa'o/ /kun brtags pa'i ngo bo nyid gang la brten nas rab tu shes she na/ smras pa/ rgyu mtshan dang ming 'brel pa la
 brten nas rab tu shes so/ /gzhan gyi dbang gi ngo bo nyid gang la brten nas rab tu shes she na/ smras pa/ kun brtags pa'i ngo bo nyid la mngon par zhen pa la brten nas rab tu shes so/ /yongs su grub pa'i ngo bo nyid gang la brten nas rab tu shes she na/ smras pa/ gzhan gyi
 dbang gi ngo bo nyid la kun brtags pa'i ngo bo nyid de gtan yongs su ma grub pa la brten nas rab tu shes so/ /de la bcom ldan 'das kyis mdo sde las kun brtags pa'i ngo bo nyid la mngon par zhen pa la brten nas shes par 'gyur ro zhes gang gsungs pa der ni de'i rnam par dag pa 'thob
 pa las dgongs te gsungs pa yin gyi/ de'i mtshan nyid las ni ma yin no/ /don 'dir ni de'i mtshan nyid yin par blta bar bya'o/ /de la kun brtags pa'i ngo bo nyid la rnam pa du yod ce na/ smras pa/ mdor bsdu na rnam pa lnga ste/ don gyi ngo bo nyid du yongs su rtog pa dang /
 ming gi ngo bo nyid du yongs su rtog pa dang / kun nas nyon mongs pa'i ngo bo nyid du yongs su rtog pa dang / rnam par byang ba'i ngo bo nyid du yongs su rtog pa dang / kun nas nyon mongs pa yang ma yin / rnam par byang ba yang ma yin pa'i ngo bo nyid du yongs su rtog pa'o/ /de la
 don gyi ngo bo nyid du yongs su rtog pa ni rnam pa bzhi ste/ ngo bo nyid kyi mtshan nyid du yongs su rtog pa dang / bye brag gi mtshan nyid yongs su rtog pa dang / gzung ba'i mtshan nyid du yongs su rtog pa dang / 'dzin pa'i mtshan nyid du yongs su rtog pa'o/ /de la ngo bo nyid kyi mtshan nyid du
 yongs su rtog pa ni 'di lta ste/ dngos po 'di ni gzugs kyi ngo bo nyid do/ /dngos po 'di ni rnam par shes pa'i bar gyi ngo bo nyid do/ /dngos po 'di ni mig gi ngo bo nyid do/ /dngos po 'di ni chos kyi bar gyi ngo bo nyid do zhes bya ba la sogs par yongs su rtog pa'o/ /de la bye brag gi mtshan
 nyid du yongs su rtog pa ni/ 'di lta ste/ gzugs 'di ni yid du 'ong ba'o/ /'di ni yid du mi 'ong ba'o/ /'di ni yid du 'ong ba yang ma yin yid du mi 'ong ba yang ma yin pa'o/ /'di ni bstan du yod pa'o/ /'di ni bstan du med pa'o/ /'di ni thogs pa dang bcas pa'o/ /'di ni
 thogs pa med pa'o/ / 'di ni zag pa dang bcas pa'o/ /'di ni zag pa med pa'o/ /'di ni 'dus byas so/ /'di ni 'dus ma byas so zhes bya ba la sogs pa rab tu dbye ba'i tshul gyis gzugs de gcig pu'i bye brag la yongs su rtog pa gang yin pa ste/ gzugs la ji lta ba bzhin du/
 phung po lhag ma rnams dang skye mched thams cad la yang de bzhin du blta bar bya'o/ /de la gzung ba'i mtshan nyid du yongs su rtog pa ni 'di lta ste/ gzugs 'di ni mig gi gzung ba'o/ /'di ni rna ba dang / sna dang / lce dang / lus dang / yid kyi gzung ba'o zhes bya bar yongs su rtog
 pa gang yin pa dang / tshor ba dang / 'du shes dang / 'du byed 'di dag dang / rnam par shes pa 'di ni 'dod pa na spyod pa'i yid kyi gzung ba'o/ /'di ni gzugs na spyod pa'i yid kyi gzung ba'o/ /'di ni gzugs med pa na spyod pa'i yid kyi gzung ba'o/ /'di ni ldan pa ma yin pa'i yid
 kyi gzung ba'o zhes bya bar yongs su rtog pa gang yin pa'o/ /de la 'dzin pa'i mtshan nyid du yongs su rtog pa ni 'di lta ste/ gzugs 'di ni gzugs 'dzin pa'o/ / gzugs 'di ni sgra dang / dri dang / ro dang / reg bya dang / chos 'dzin pa'o zhes bya bar yongs su rtog pa gang yin pa dang /
 tshor ba dang / 'du shes dang / 'du byed 'di dag dang / rnam par shes pa 'di ni gzugs 'dzin pa'o/ /'di ni sgra dang / dri dang / ro dang / reg bya dang / chos 'dzin pa'o zhes bya bar yongs su rtog pa gang yin pa'o/ /de la ming gi ngo bo nyid du yongs su rtog pa ni rnam pa gnyis te/
 bye brag med pa dang / bye brag can no/ /de la bye brag med pa ni chos thams cad ces bya ba'i ming gang yin pa'o/ /de la bye brag can ni 'di lta ste/ gzugs zhes bya ba dang / tshor ba zhes bya ba dang / 'du shes zhes bya ba dang / 'du byed rnams zhes bya ba dang / rnam par shes pa zhes bya ba
 dang / de lta bu dang mthun pa'i ming rab tu dbye ba'i chos so so ba de dag la ming tshad med grangs med par yongs su rtog pa gang yin pa'o/ /de la kun nas nyon mongs pa'i ngo bo nyid du yongs su rtog pa ni 'di lta ste/ gzugs 'di ni 'dod chags dang bcas pa dang / zhe sdang dang bcas
 pa dang / gti mug dang bcas pa dang / 'dod chags dang / zhe sdang dang / gti mug dang ma bral ba dang / dad pa la sogs pa dge ba'i chos rnams dang bral ba'o zhes bya bar yongs su rtog pa gang yin pa dang / tshor ba dang / 'du shes dang / 'du byed 'di dag dang / rnam par
 shes pa 'di dag ni 'dod chags dang bcas pa dang / zhe sdang dang bcas pa dang / gti mug dang bcas pa dang / 'dod chags dang / zhe sdang dang / gti mug dag dang ma bral ba dang / dad pa la sogs pa'i dge ba'i chos rnams dang bral ba'o zhes bya bar yongs su rtog pa gang yin
 pa'o/ /de la rnam par byang ba'i ngo bo nyid du yongs su rtog pa ni de las bzlog pa las rig par bya'o/ /de la kun nas nyon mongs pa can yang ma yin/ rnam par byang ba yang ma yin pa'i ngo bo nyid du yongs su rtog pa ni 'di lta ste/ gzugs 'di ni gzung ba'o/ /'di ni 'dzin pa'o/ /
 chor ba dang / 'du shes dang / 'du byed 'di dag dang / rnam par shes pa 'di ni gzung ba'o/ /'di ni 'dzin pa'o zhes bya bar yongs su rtog pa gang yin pa dang / gzhan yang lung du ma bstan pa'i chos rnams la lung du ma bstan pa'i chos rnams so zhes bya bar
 yongs su rtog pa gang yin pa'o/ /yang ngo bo nyid du rnam par rtog pa ni rnam pa lngar rig par bya ste/ ming la brten pa'i don gyi ngo bo nyid la yongs su rtog pa dang / don la brten pa'i ming gi ngo bo nyid la yongs su rtog pa dang / ming la brten pa'i ming gi ngo bo nyid la yongs su
 rtog pa dang / don la brten pa'i don gyi ngo bo nyid la yongs su rtog pa dang / de gnyi ga la brten pa'i de gnyi ga'i ngo bo nyid la yongs su rtog pa'o/ /de la ming la brten pa'i don gyi ngo bo nyid la yongs su rtog pa ni 'di lta ste/ gzugs kyi dngos po 'di ni gzugs kyi bdag nyid
 kyis yongs su grub pa yin no zhes yongs su rtog pa gang yin pa dang / tshor ba dang / 'du shes dang / 'du byed rnams kyi dngos po 'di dang / rnam par shes pa'i dngos po 'di ni rnam par shes pa'i bdag nyid kyis yongs su grub pa yin no zhes bya bar yongs su rtog pa gang yin pa'o/ /
 de la don la brten pa'i ming gi ngo bo nyid la yongs su rtog pa ni 'di lta ste/ dngos po 'di'i ming ni gzugs zhes bya'i/ dngos po 'di ni gzugs ma yin no zhes yongs su rtog pa gang yin pa dang / dngos po 'di'i ming ni tshor ba dang / 'du shes dang / 'du byed rnams dang / rnam
 par shes pa zhes bya'i / /dngos po 'di ni rnam par shes pa ma yin no zhes bya bar yongs su rtog pa gang yin pa'o/ /de la ming la brten pa'i ming gi ngo bo nyid la yongs su rtog pa ni/ 'di lta ste/ dngos po ma rtogs pa'i ming gzugs zhes rnam par rtog par byed pa'i yongs su rtog pa
 gang yin pa dang / dngos po ma rtogs pa'i ming tshor ba dang / 'du shes dang / 'du byed rnams dang / rnam par shes pa zhes rnam par rtog par byed pa'i yongs su rtog pa gang yin pa'o/ /de la don la brten pa'i don gyi ngo bo nyid la yongs su rtog pa ni 'di lta ste/ ming las ma gtogs
 pa'i gzugs kyi dngos po la ming dmigs kyis ma bsal bar rnam par rtog par byed pa'i yongs su rtog pa gang yin pa dang / ming ma gtogs pa'i tshor ba dang / 'du shes dang / 'du byed rnams kyi dngos po dang / ming ma gtogs pa'i rnam par shes pa'i dngos po la ming dmigs
 kyis ma bsal bar rnam par rtog par byed pa'i yongs su rtog pa gang yin pa'o/ /de la de gnyi ga la brten pa'i de gnyi ga'i ngo bo nyid la yongs su rtog pa ni 'di lta ste/ gzugs kyi bdag nyid kyi dngos po 'di'i ming ni gzugs zhes bya'o zhes yongs su rtog pa gang yin pa dang / tshor ba
 dang / 'du shes dang / 'du byed rnams dang / rnam par shes pa'i bdag nyid kyi dngos po 'di'i ming ni rnam par shes pa zhes bya'o zhes yongs su rtog pa gang yin pa'o/ /kun brtags pa'i ngo bo nyid du 'dzin pa ni mdor bsdu na/ rnam pa gnyis su rig par bya ste/ mngon par
 'du byed pas 'dzin pa dang / ming gi brdas 'dzin pa'o/ /de la mngon par 'du byed pas 'dzin pa ni rnam pa lngar rig par bya ste/ rjes su chags pa'i mngon par 'du byed pa dang / khong khro ba'i mngon par 'du byed pa dang / phrad pa'i mngon par 'du byed pa dang / 'bral ba'i
 mngon par 'du byed pa dang / btang snyoms su 'jog pa'i mngon par 'du byed pa'o/ /de la ming gi brdas 'dzin pa ni rnam pa gnyis su rig par bya ste/ yi ge med pa las gyur pa dang / yi ge las gyur pa'o/ /de la yi ge med pa las gyur pa ni 'di lta ste/ 'di ci yin/
 'di ci lta bu yin zhes bya bar 'dzin pa gang yin pa'o/ /de la yi ge las gyur pa ni 'di lta ste/ 'di ni 'di dang 'di lta bu yin te/ gzugs zhes bya ba'am/ rnam par shes pa'i bar zhes bya ba'am/ 'dus byas zhes bya ba'am/ 'dus ma byas zhes bya ba'am/ rtag ces bya
 ba'am/ mi rtag ces bya ba'am/ dge zhes bya ba'am/ mi dge zhes bya ba'am/ lung du ma bstan pa zhes bya ba'am/ de lta de lta bu la sogs par 'dzin pa gang yin pa'o/ /phra ba la mngon par zhen pa phra ba ni lnga po 'di dag yin par rig par bya ste/ mi rtag pa la rtag par
 mngon par zhen pa dang / sdug bsngal ba la bde bar mngon par zhen pa dang / mi gtsang ba la gtsang bar mngon par zhen pa dang / bdag med pa la bdag tu mngon par zhen pa dang / mtshan ma la kun brtags pa'i ngo bo nyid du mngon par zhen pa'o/ / / /
 bam po sum cu lnga pa/ de la byis pa rnams ni brjod par bya ba'i dngos po la rgyu lngas ming ji lta ba dang brjod pa ji lta ba bzhin du ngo bo nyid du mngon par zhen par rig par bya ste/ 'di ltar 'di'i dngos po de'i ngo bo nyid gang yin zhes dris na/ ngo bo nyid gzugs yin no zhes lan 'debs
 par byed kyi/ ming gzugs yin no zhes lan 'debs par mi byed pa dang / ngo bo nyid tshor ba dang / 'du shes dang / 'du byed rnams dang / rnam par shes pa yin no zhes lan 'debs par byed kyi/ ming rnam par shes pa yin no zhes lan 'debs par mi byed pa dang / gzhan
 yang gcig pu dben par song ste/ chos rnams kyi rang gi mtshan nyid dang / spyi'i mtshan nyid yongs su brtags pa la zhugs pa na/ dngos po 'di'i mtshan nyid ni gzugs yin gyi/ /ming ni gzugs ma yin no zhes yongs su tshol bar byed pa dang / dngos po 'di'i
 mtshan nyid ni tshor ba dang / 'du shes dang / 'du byed rnams dang / rnam par shes pa yin gyi/ ming ni rnam par shes pa ma yin no zhes yongs su tshol bar byed pa dang / gzhan yang gzugs kyi dngos po de'i mtshan nyid gzugs yin par yongs su tshol bar byed pa'i tshe/ ma
 rnyed pa na mi dga' la/ ming gzugs yin par yongs su tshol bar byed pa'i tshe/ ma rnyed pa ni mi dga' ba med pa dang / tshor ba dang / 'du shes dang / 'du byed rnams dang / rnam par shes pa'i dngos po de'i mtshan nyid rnam par shes pa yin par yongs su tshol bar byed pa'i
 tshe/ ma rnyed pa la mi dga' la/ rnam par shes pa yin par yongs su tshol bar byed pa'i tshe/ ma rnyed na ni mi dga' ba med pa dang / gzhan yang tshig ni ming la 'jug la ming ni don la 'jug ste/ de la ming gang rang gi mtshan nyid kyi don gsal bar byed pa de ni bye brag gi mtshan nyid
 kyi don gsal bar byed pa yang ma yin/ gzung ba'i mtshan nyid kyi don gsal bar byed pa yang ma yin/ 'dzin pa'i mtshan nyid kyi don gsal bar byed pa yang ma yin la/ ming gang 'dzin pa'i mtshan nyid kyi bar gyi don gsal bar byed pa de ni rang gi mtshan nyid kyi don gyi bar gsal
 bar byed pa yang ma yin no/ /gal te ming gang rang gi mtshan nyid kyi don la 'jug par 'gyur ba de 'dzin pa'i mtshan nyid kyi bar gyi don la yang 'jug par 'gyur na ni des na de las gzhan pa'i ming rnams kyi don so so tha dad pa'i rjes su 'jug par 'gyur ba mi dmigs par mi rung ngo / /
 de ltar so so'i don tha dad pa la 'jug pa'i ming de dag las ming gang rang gi mtshan nyid kyi don la 'jug pa dang / ming gang 'dzin pa'i mtshan nyid kyi bar gyi don la yang 'jug par 'gyur ba de/ de ltar yod pa'i don la 'jug par 'gyur ram/ 'on te med pa'i don la 'jug par 'gyur/
 re zhig yod pa'i don la 'jug par ni mi rung ste/ ji ltar mi rung ba de ltar ni sngar dngos po brtags pa'i skabs su bstan zin to/ /gal te de ltar yod pa ma yin pa'i don la 'jug par 'gyur na ni des na mtshan nyid med pa'i don la 'jug par 'gyur ba de lta bur 'gyur te/ gang mtshan
 nyid med pa'i don la 'jug par 'gyur ba de'i don ni de ltar yod pa ma yin la/ de ltar gsal bar byed pa de yang sgro 'dogs par byed pa yin no/ /gang sgro 'dogs shing 'dzin par byed pa de ni mngon par zhen pa yin pas de'i phyir ming ji lta ba dang / brjod pa ji lta ba bzhin du dngos po
 la ngo bo nyid du mngon par zhen par rab tu grub pa yin pa dang / gzhan yang byis pa thams cad ni mtshan ma la brjod pas bcings pa yin pa'i phyir ming ji lta ba dang / brjod pa ji lta ba bzhin du/ dngos po la ngo bo nyid du mngon par zhen pa yin par blta bar bya ste/ ci'i phyir mtshan
 ma la brjod pas bcings pa nyid du rig par bya zhe na/ smras pa/ rigs pa dang lung gis rig par bya ste/ rigs pa gang zhe na/ smras pa/ brjod pa med pa na dngos po la mngon par dga' ba mi dmigs pa dang / brjod pa dang bcas pa na de la mngon par dga' ba mi dmigs
 pa'i phyir te/ de ni rgyu cig yin no/ /gzhan yang gcig gi skye ba'i gnas gcig yin pa'i phyir te/ 'di ltar dngos po la brten nas brjod pa skye ba yang dmigs la/ brjod pa la brten nas kyang dngos po skye ba dmigs pa'i phyir te 'di lta ste/ dper na 'jig rten pa
 dag dngos po yod na/ ming du yang brjod pas rab tu rtog par byed kyi/ dngos po med pa la ni yongs su rtog par mi nus pas/ de ltar na dngos po la brten nas ming dang brjod pa skye bar dmigs pa yin no/ /'di lta ste/ dper na bsam gtan pa so so'i bdag nyid la bsam
 gtan byed pa na/ ji lta ji ltar yid la brjod pa'i yid la byed pa de lta de ltar sems kyi rgyud du gtogs pa'i shes bya'i dngos po dang cha mthun pa'i gzugs brnyan dag snang bar 'gyur ba'i tshul gyis 'byung bar 'gyur bas/ de ltar na brjod pa la brten nas dngos po skye ba yang
 dmigs pa yin no/ /gzhan yang brjod pa'i gnyen po mtshan ma med pa'i dbyings la sems nye bar gtod pa'i mtshan ma thams cad ni mi snang bar 'gyur la/ nye bar mi gtod pa'i sems ni mi 'dod pa bzhin du mtshan ma rnams kyis khrid par 'gyur bas/ rnam grangs des
 kyang mtshan ma la brjod pas bcings pa nyid yin par rig par bya'o/ /lung gang zhe na/ bcom ldan 'das kyis/ byis pa rmongs pa'i sems ldan pa/ /mtshan ma dag la brjod pas bcings/ /brjod pa'i 'ching las rnam grol ba/ /mtshan ma'i dbang ldan thub pa yin/ /
 yang dag mthong ba'i rnal 'byor pa/ /yang dag shes la rab tu gnas/ /ngo bo nyid kyang mi dmigs shing / /de yi gnas kyang mthong mi 'gyur/ /yang dag shes pa rnam dag de / /des na yang dag rig ces bya/ /'dzin pa gnyis dang rnam bral ba/ /des na gnyis su med
 ces bya/ /zhes ji skad gsungs pa lta bu ste/ 'di lta ste/ dper na so so'i skye bo phung po rnams la bdag med pa la mkhas pa ni phung po tsam la bdag tu nye bar 'dogs pa tsam nyid du lta yang / de'i bag la nyal ma spangs pa'i phyir/ de la bdag tu mngon par zhen pa mi 'byung
 ba yang ma yin pa bzhin du 'dir yang tshul de bzhin du blta bar bya'o/ /sdom ni/ bsdu dang ngo bo nyid dang ni/ /yongs su shes dang dgongs pa dang / /spyod yul rtog dang rjes 'jug dang / /rnam par rten ni tha ma yin/ /ngo bo nyid gsum dang rgyu mtshan dang / ming dang
 rnam par rtog pa la sogs pa chos lnga po dag las ngo bo nyid dang po chos lnga po de dag las du dag gis bsdus she na/ smras pa/ gang gis kyang ma bsdus so/ /ngo bo nyid gnyis pa du dag gis bsdus she na/ smras pa/ bzhis so/ /ngo bo nyid gsum pa du dag gis
 bsdus she na/ smras pa/ gcig gis so/ /gal te gzhan gyi dbang gi ngo bo nyid yang dag pa'i shes pas bsdus pa yang yin na/ des na gzhan gyi dbang gi ngo bo nyid ni kun brtags pa'i ngo bo nyid la mngon par zhen pa la brten nas shes par 'gyur ro zhes gang smras pa
 de ji lta bu zhe na/ smras pa/ der ni kun nas nyon mongs par 'gyur ba'i gzhan gyi dbang gi ngo bo nyid la bsams pa yin gyi/ rnam par byang bar 'gyur ba las ni ma yin te/ rnam par byang bar 'gyur ba ni/ de la mngon par ma zhen pa la brten nas shes par 'gyur ba
 yin par rig par bya'o/ /ngo bo nyid gsum dang / ngo bo nyid med pa nyid gsum po mtshan nyid ngo bo nyid med pa nyid dang / skye ba ngo bo nyid med pa nyid dang / don dam pa ngo bo nyid med pa nyid de la/ mtshan nyid ngo bo nyid med pa nyid kyis ni kun brtags pa'i ngo bo
 nyid ngo bo nyid med pa yin no/ /de la skye ba ngo bo nyid med pa nyid dang / don dam pa ngo bo nyid med pa nyid kyis ni/ gzhan gyi dbang gi ngo bo nyid ngo bo nyid med pa yin te/ rang mi skye ba nyid kyi phyir dang / rnam par dag pa'i dmigs pa nyid ma yin pa'i phyir ro/ /
 don dam pa ngo bo nyid med pa nyid kho nas ni yongs su grub pa'i ngo bo nyid ngo bo nyid med pa yin te/ de ci'i phyir zhe na/ chos thams cad kyi don dam pa yin pa dang / ngo bo nyid med pa nyid kyis rab tu phye ba yin pa'i phyir ro/ /ngo bo nyid gsum po de dag las du zhig yongs su
 shes par bya ba dag yin zhe na/ smras pa/ thams cad do/ /du zhig spang bar bya ba dag yin zhe na/ smras pa/ gcig go/ /du zhig thob par bya ba dag yin zhe na/ smras pa/ gcig go/ / ngo bo nyid gsum po de dag gis drang ba'i don gyi mdo sde thams
 cad kyi don kyang drang bar bya'o/ /ngo bo nyid gsum po de dag gis de bzhin gshegs pas dgongs te gsungs pa tshad med pa brtan pa dang ldan pa dag dang byang chub sems dpas dgongs te bshad pa dag gi don kyang rjes su rtogs par bya'o/ /mi skye ba'i chos la bzod pa zhes
 ji skad gsungs pa de'i rnam par gzhag pa ji lta bu yin zhe na/ smras pa/ ngo bo nyid gsum gyis te/ kun brtags pa'i ngo bo nyid la brten nas ni/ gzod ma nas mi skye ba la bzod pa rnam par gzhag go/ /gzhan gyi dbang gi ngo bo nyid la brten nas ni/ rang mi skye
 ba la bzod pa rnam par gzhag go/ /yongs su grub pa'i ngo bo nyid la brten nas ni nyon mongs pa dang / sdug bsngal gyi dri ma mi skye ba la bzod pa rnam par gzhag ste/ de ni phyir mi ldog pa yin par rig par bya'o/ /rnam par thar pa'i sgo gsum po 'di dag ni/ ngo bo nyid
 gsum la brten nas rnam par gzhag ste/ kun brtags pa'i ngo bo nyid la brten nas ni rnam par thar pa'i sgo stong pa nyid rnam par gzhag go/ /gzhan gyi dbang gi ngo bo nyid la brten nas ni rnam par thar pa'i sgo smon pa med pa rnam par gzhag go/ /yongs su grub pa'i ngo bo nyid
 la brten nas ni rnam par thar pa'i sgo mtshan ma med pa rnam par gzhag go/ /kun brtags pa'i ngo bo nyid byis pa'i shes pa'am/ 'phags pa'i ye shes sam/ shes pa gang gi spyod yul ni ma yin zhe na/ smras pa/ gang gi spyod yul yang ma yin te/ mtshan nyid
 med pa nyid yin pa'i phyir ro/ /gzhan gyi dbang gi ngo bo nyid shes pa gang gi spyod yul yin zhe na/ smras pa/ de gnyi ga'i spyod yul ni yin mod kyi/ 'phags pa'i ye shes 'jig rten las 'das pa'i spyod yul ni ma yin no/ /yongs su grub pa'i ngo bo nyid shes pa gang gi
 spyod yul yin zhe na/ smras pa/ 'phags pa'i ye shes kho na'i spyod yul yin no/ /kun brtags pa'i ngo bo nyid rtogs pa'i rnal 'byor pa mtshan ma la spyod par brjod par bya ba'am/ mtshan ma med pa la spyod par brjod par bya zhe na/ smras pa/ 'jig rten pa'i shes pas
 rtogs pa ni mtshan ma la spyod par brjod par bya'o/ /'jig rten las 'das pa'i shes pas rtogs pa ni mtshan ma med pa la spyod par brjod par bya'o/ /kun brtags pa'i ngo bo nyid ji lta ba bzhin du gzhan gyi dbang gi ngo bo nyid dang / yongs su grub pa'i ngo bo nyid kyang de bzhin du blta bar
 bya'o/ /kun brtags pa'i ngo bo nyid la yang dag par zhugs pa'i rnal 'byor pa ngo bo nyid gang gi rjes su 'jug ce na/ smras pa/ yongs su grub pa'i ngo bo nyid kyi rjes su 'jug go/ /yongs su grub pa'i ngo bo nyid kyi rjes su zhugs pa'i rnal 'byor pa ngo bo nyid gang rnam par 'jig
 par byed ce na/ smras pa/ gzhan gyi dbang gi ngo bo nyid rnam par 'jig par byed do/ /kun brtags pa'i ngo bo nyid la rnam pa du yod ce na/ smras pa/ ji tsam du gzhan gyi dbang gi ngo bo nyid la ngo bo nyid dang / bye brag tu 'dogs pa rnam par 'jog pa de tsam du kun brtags
 pa'i ngo bo nyid yin pa'i phyir/ kun brtags pa'i ngo bo nyid kyi rab tu dbye ba ni dpag tu med par rig par bya'o/ /gzhan yang gzhan gyi dbang gi ngo bo nyid la kun brtags pa'i ngo bo nyid du mngon par zhen pa ni rnam pa gnyis su rig par bya ste/ sad pa dang / de la goms
 pa'i bag chags bag la nyal ba'o/ /gzhan gyi dbang gi ngo bo nyid la rnam pa du yod ce na/ smras pa/ 'di'i rnam pa rab tu dbye ba ni rgyu mtshan bzhin du blta bar bya'o/ /gzhan yang gzhan gyi dbang gi ngo bo nyid ni rnam pa gnyis te/ kun brtags pa'i ngo bo nyid la mngon par
 zhen pas kun nas bslang ba dang / de la mngon par zhen pa med pas kun nas bslang ba'o/ /yongs su grub pa'i ngo bo nyid la rnam pa du yod ce na/ smras pa/ yongs su grub pa'i ngo bo nyid ni thams cad du ro gcig pa yin pa'i phyir dang / de la rnam pa rab tu dbye ba rnam par
 gzhag pa med do/ /kun brtags pa'i ngo bo nyid gang la brten par brjod par bya zhe na/ smras pa/ dngos po gsum la ste / rgyu mtshan dang ming dang rnam par rtog pa la'o/ /gzhan gyi dbang gi ngo bo nyid gang la brten par brjod par bya zhe na/ smras pa/
 kun brtags pa'i ngo bo nyid la mngon par zhen pa de nyid dang / bdag gi rgyu mtshan mthun pa la'o/ /yongs su grub pa'i ngo bo nyid gang la brten par brjod par bya zhe na/ mi gnas pa dang / mi rten par brjod par bya'o/ /sdom ni/ med dang las dang phra sogs dang / /
 lus med skye dang mngon zhen dang / /yongs su shes dang kun nyon mongs/ /sdug bsngal 'dra dang brten pa yin/ /gal te kun brtags pa'i ngo bo nyid med na nyes pa cir 'gyur zhe na/ smras pa/ gzhan gyi dbang gi ngo bo nyid la tha snyad med pa dang / tha snyad la mngon par
 zhen pa med par 'gyur te/ de med na kun nas nyon mongs pa yang med la/ rnam par byang ba yang med par 'gyur ro/ /gal te gzhan gyi dbang gi ngo bo nyid med na nyes pa cir 'gyur zhe na/ smras pa/ thams cad kyi thams cad du bstsal mi dgos par kun nas
 nyon mongs pa med pa kho nar 'gyur te/ de med na rnam par byang ba yang med pa kho nar 'gyur ro/ /gal te yongs su grub pa'i ngo bo nyid med na nyes pa cir 'gyur zhe na/ smras pa/ thams cad kyi thams cad du rnam par byang ba med par 'gyur ro/ /kun brtags pa'i ngo bo nyid
 las du dag byed ce na/ smras pa/ lnga ste/ gzhan gyi dbang gi ngo bo nyid skyed par byed pa dang / de nyid la tha snyad 'jug par byed pa dang / gang zag la mngon par zhen pa skyed par byed pa dang / chos la mngon par zhen pa skyed par byed pa dang / de gnyi ga la mngon par
 zhen pa'i bag chags gnas ngan len yongs su 'dzin par byed pa'o/ /gzhan gyi dbang gi ngo bo nyid las du dag byed ce na/ smras pa/ lnga kho na ste/ kun nas nyon mongs pa'i bdag nyid du skye bar byed pa dang / kun brtags pa'i ngo bo nyid dang yongs su grub pa'i ngo bo
 nyid kyi rten byed pa dang / gang zag la mngon par zhen pa'i rten byed pa dang / chos la mngon par zhen pa'i rten byed pa dang / de gnyi ga la mngon par zhen pa'i bag chags gnas ngan len gyi rten byed pa'o/ /yongs su grub pa'i ngo bo nyid las du dag byed ce na/ smras pa/
 lnga ste/ de gnyi ga'i las rnam pa lnga po dag gi gnyen po skye ba'i dmigs pa'i dngos po yin pa'i phyir ro/ /kun brtags pa'i ngo bo nyid phra bar brjod par bya'am/ rags par brjod par bya zhe na/ smras pa/ phra bar brjod par bya'o/ /phra ba ji lta ba bzhin du mthong bar
 dka' ba dang / nye bar mtshon dka' ba yang de bzhin no/ /gzhan gyi dbang gi ngo bo nyid phra bar brjod par bya'am/ rags par brjod par bya zhe na/ smras pa/ rags par brjod par bya ste/ 'on kyang mthong bar dka' ba dang / nye bar mtshon par dka' ba yin no/ /yongs
 su grub pa'i ngo bo nyid phra bar brjod par bya'am/ rags par brjod par bya zhe na/ smras pa/ mchog tu phra bar brjod par bya'o/ /mchog tu phra ba ji lta ba bzhin du mchog tu mthong bar dka' ba dang / mchog tu nye bar mtshon par dka' ba yang de bzhin no/ /ngo bo nyid gsum po de
 dag las du zhig lus med pa yin la/ lus dang bcas pa 'jug par byed pa dag yin zhe na/ smras pa/ gcig go/ /du zhig lus dang bcas pa yin la/ lus dang bcas pa dang / lus med par 'jug par byed pa dag yin zhe na/ smras pa/ gcig go/ /du zhig lus dang
 bcas pa yin la/ 'jug par byed pa ma yin pa dag yin zhe na/ smras pa/ gcig go/ /du zhig ma skyes pa yin la/ skyes pa skyed par byed pa dag yin zhe na/ smras pa/ gcig go/ /du zhig skyes pa yin la/ skyes pa dang ma skyes pa skyed par byed pa dag yin zhe
 na/ smras pa/ gcig go/ /du zhig skyes pa ma yin la/ skyes pa dang ma skyes pa dag skyes par mi byed pa dag yin zhe na/ smras pa/ gcig go/ /kun brtags pa'i ngo bo nyid la/ mngon par zhen pa dang / de la mngon par zhen pa med pa'i mtshan nyid ji lta bur blta
 bar bya zhe na/ smras pa/ de ni rnam pa gnyis su blta bar bya ste/ de sad pa la mngon par zhen pa'am/ de la mngon par zhen pa med pa dang / de bag la nyal ba la mngon par zhen pa'am/ de la mngon par zhen pa med pa'o/ /de la tha snyad kyi
 brda las byung ba'i ming la chos kyi ngo bo nyid yongs su rtog par byed pa yin / de sad pa yin par rig par bya'o/ /de la ming tsam la mkhas pa 'di ni ming tsam yin gyi/ 'di ni chos kyi ngo bo nyid du ma yin no snyam pa ni de la mngon par zhen pa med par yin par rig par bya'o/ /
 bag chags bag la nyal de ma spangs pa'i phyir ji srid du bag chags gnas ngan len de spongs par mi byed pa de srid du ni de bag la nyal ba mngon par zhen pa yin no/ /spangs pa ni de la mngon par zhen pa med pa yin par rig par bya'o/ /gzhan gyi dbang gi ngo bo nyid la mngon
 par zhen pa dang / de la mngon par zhen pa med pa'i mtshan nyid ji lta bur blta bar bya zhe na/ smras pa/ kun brtags pa'i ngo bo nyid sad pas/ de'i rang bzhin dang de'i ngo bo nyid du yongs su rtog par byed pa ni dang po'i de la mngon par zhen pa yin no/ /mtshan ma tsam ste
 de'i rang bzhin dang de'i ngo bo nyid ma yin par yongs su rtog par byed pa ni de la mngon par zhen pa med pa yin no/ /mtshan ma'i 'ching ba ma spangs pa mtshan ma la dmigs pa ni gnyis pa'i de la mngon par zhen pa yin no/ /mtshan ma'i 'ching ba spangs pa mtshan ma med pa'i
 dbyings rab tu shes pa mtshan mar mi dmigs pa dang / de'i 'og tu ji lta ba bzhin du dmigs pa ni de la mngon par zhen pa med pa yin par rig par bya'o/ /yongs su grub pa'i ngo bo nyid la mngon par zhen pa dang / de la mngon par zhen pa med pa'i mtshan nyid ji lta bur blta
 bar bya zhe na/ smras pa/ yongs su grub pa'i ngo bo nyid la ni mngon par zhen pa med pa kho na yin te/ dbyings de ni mngon par zhen pa'i gzhi'i gnas su gyur pa ma yin pa'i phyir ro/ /de mthong ba dang / rig pa dang / mngon du ma byas pa la mngon du byas par mngon pa'i nga rgyal
 dang mngon par zhen pa gang yin pa de ni kun brtags pa'i ngo bo nyid dang / gzhan gyi dbang gi ngo bo nyid la mngon par zhen pa kho na yin par blta bar bya'o/ /kun brtags pa'i ngo bo nyid ji ltar yongs su shes par bya zhe na/ smras pa/ kun brtags pa'i ngo bo nyid ni
 ming tsam du yongs su shes par bya ste/ kun brtags pa tsam dang / mtshan nyid med pa dang / ngo bo nyid med pa dang / ma skyes pa dang / ma 'gags pa dang / kun nas nyon mongs pa can ma yin pa dang / rnam par byang ba ma yin pa dang / gzod ma nas zhi ba dang /
 rang bzhin gyis yongs su mya ngan las 'das pa dang / 'das pa ma yin pa dang / ma 'ongs pa ma yin pa dang / da ltar byung ba ma yin pa dang / ldan pa ma yin pa dang / mi ldan pa ma yin pa dang / ma bcings pa dang / ma grol ba dang / bde ba ma yin pa dang / sdug
 bsngal ba ma yin pa dang / sdug bsngal yang ma yin/ bde ba yang ma yin pa ma yin pa dang / thams cad du nam mkha' ltar ro gcig pa dang / de lta bu la sogs pa'i rnam pa dag gis yongs su shes par bya'o/ /gzhan gyi dbang gi ngo bo nyid ji ltar yongs su shes par bya
 zhe na/ smras pa/ brjod par bya ba 'dus byas kyi dngos po thams cad bsdus pa las yongs su shes par bya ste/ brjod par bya ba'i dngos po thams cad gang zhe na/ 'di lta ste/ phung po'i dngos po dang / khams kyi dngos po dang / skye mched kyi dngos po dang / rten cing
 'brel bar 'byung ba'i dngos po dang / gnas dang gnas ma yin pa'i dngos po dang / dbang po'i dngos po dang / las kyi dngos po dang / nyon mongs pa'i dngos po dang / nye ba'i nyon mongs pa'i dngos po dang / skye ba'i dngos po dang / ngan 'gro'i dngos po dang / bde 'gro'i
 dngos po dang / skye gnas kyi dngos po dang / rigs kyi dngos po dang / sems can dmyal ba'i dngos po dang / dud 'gro'i dngos po dang / yi dags kyi dngos po dang / gling gi dngos po dang / rgyal chen bzhi'i ris kyi dngos po dang / gzhan 'phrul dbang byed kyi bar gyi dngos po
 dang / tshangs ris kyi dngos po dang / 'og min gyi bar gyi dngos po dang / nam mkha' mtha' yas skye mched kyi dngos po dang / 'du shes med 'du shes med min skye mched kyi bar gyi dngos po dang / dad pas rjes su 'brang ba'i dngos po dang / chos kyis rjes
 su 'brang ba'i dngos po dang / nges par 'byed pa'i cha dang mthun pa'i dge ba'i rtsa ba'i dngos po dang / mthong ba'i lam gyi dngos po dang / bsgom pa'i lam gyi dngos po dang / rgyud du zhugs pa'i 'bras bu'i dngos po dang / dgra bcom pa nyid kyi bar gyi dngos po dang / rang byang
 chub kyi dngos po dang / yang dag par rdzogs pa'i byang chub kyi dngos po dang / 'du shes dang tshor ba 'gog pa'i dngos po dang / pha rol tu phyin pa'i dngos po dang / dran pa nye bar gzhag pa'i dngos po dang / lam gyi yan lag gi bar gyi dngos po dang / bsam gtan dang /
 tshad med pa dang / gzugs med pa'i snyoms par 'jug pa'i dngos po dang / 'du shes bsgom pa'i dngos po dang / rjes su dran pa bsgom pa'i dngos po dang / rnam par thar pa dang / zil gyis gnon pa'i skye mched dang / zad par gyi skye mched bsgom pa'i dngos po dang /
 stobs dang / mi 'jigs pa dang / smon nas shes pa dang / bsrungs pa med pa dang / dran pa nye bar gzhag pa dang / thugs rje chen po dang / bag chags yang dag par bcom pa dang / mtshan dang / dpe byad dang / rnam pa thams cad dang / mchog mkhyen pa dang /
 sangs rgyas kyi chos ma 'dres pa thams cad kyi dngos po ste/ de dag kyang sgyu ma dang / rmi lam dang / mig yor dang / brag ca dang / chu zla dang / gzugs brnyan dang / sprul pa lta bur shes par bya'o/ /dbu ba rdos pa lta bu dang / chu'i chu bur lta bu dang / smig rgyu lta bu
 dang / chu shing gi sdong po lta bu dang / smyon pa lta bu dang / myos pa lta bu dang / gshed ma lta bu dang / gcin ldud pa'i dgra bo lta bu dang / gzhan gyi bu lta bu dang / sprul gyi prog ma lta bu dang / stong pa dang / smon pa med pa dang / dben pa dang / gzung ba med pa dang /
 gsog dang / gsob dang / snying po med pa dang / de lta bu la sogs pa'i rnam grangs dag gis yongs su shes par bya'o/ /yongs su grub pa'i ngo bo nyid ji ltar yongs su shes par bya zhe na/ smras pa/ sngar bstan pa'i rnam grangs 'di lta ste/ de bzhin nyid dang / yang
 dag pa'i mtha' dang / chos kyi dbyings shes par bya ba la sogs pa dang / gzhan yang 'di lta ste/ gzugs med pa dang / bstan du med pa dang / gnas med pa dang / gzhi med pa dang / snang ba med pa dang / rnam par rig pa med pa dang / rten med pa dang / brjod
 du med pa dang / spros pa med pa dang / blang ba med pa dang / dor ba med pa dang / de lta bu la sogs pa'i rnam grangs dag gis yongs su shes par bya'o/ /ngo bo nyid gsum po de dag las du zhig bdag nyid kun nas nyon mongs pa can ma yin la/ gzhan kun nas nyon mongs
 par byed pa dag yin zhe na/ smras pa/ gcig go/ /du zhig bdag nyid kun nas nyon mongs pa can kho na yin zhe na/ smras pa/ gcig go/ /du zhig bdag nyid rnam par dag pa yin la/ rnam par byang ba'i phyir 'jug pa dag yin zhe na/ smras pa/ gcig go/ /kun
 nas nyon mongs pa can ji lta ba bzhin du sdug bsngal ba yang de bzhin du rig par bya'o/ /kun brtags pa'i ngo bo nyid ji 'dra ba yin zhe na/ smras pa/ nam mkha' dang 'dra'o/ /gzhan gyi dbang gi ngo bo nyid ji 'dra ba yin zhe na/ smras pa/ gshed ma dang / phyir rgol ba
 dang 'dra'o/ /yongs su grub pa'i ngo bo nyid ji 'dra ba yin zhe na/ smras pa/ mi zad pa'i gter chen po dang 'dra'o/ /kun brtags pa'i ngo bo nyid ji la brten nas yongs su brtags par bya ba yin zhe na/ smras pa/ gzhan gyi dbang gi ngo bo nyid la brten nas so/ /gzhan
 gyi dbang gi ngo bo nyid ji la brten nas gzhan gyi dbang yin zhe na/ smras pa/ rgyu dang rkyen la brten nas so/ /yongs su grub pa'i ngo bo nyid ji la brten nas yongs su grub pa yin zhe na/ smras pa/ nyon mongs pa dang sdug bsngal thams cad kyi kun nas nyon mongs pa med
 pa nyid dang / rtag pa nyid la brten nas so/ /de kho na'i don 'dzin pa'i shes rab ni rnam par mi rtog pa yin no zhes gang gsungs pa de ji ltar rnam par mi rtog pa yin par rig par bya/ ci yid la mi byed pa las sam/ yang dag par 'das pa las sam/ dngos
 po med pa las sam/ rang bzhin las sam/ dmigs pa la mngon par 'du byed pa las rnam par mi rtog pa yin/ gal te yid la mi byed pa las yin na ni des na tshul bzhin yid la byed pa dang ldan pa zhes byar mi rung ste/ gnyid log pa dang / myos pa dang / rab tu
 myos pa rnams la yang de thal bar 'gyur ro/ /gal te yang dag par 'das pa las yin na ni des na khams gsum pa'i sems dang / sems las byung ba'i chos rnams ni rnam par rtog pa yin no zhes gang gsungs pa'i gzhung dang ji ltar 'gal bar mi 'gyur/ gal te
 dngos po med pa las yin na ni des na shes rab sems las byung ba'i chos su mi 'gyur ro/ /gal te rang bzhin las yin na ni des na shes rab ngo bo nyid dang / yang dag par rnyog pa med pa'i mtshan nyid du ji ltar mi 'gyur/ gal te dmigs pa la mngon par 'du byed pa la yin na ni
 ni des na rnam par mi rtog pa'i shes rab mngon par 'du byed pa med pa nyid la ji ltar skur pa btab par mi 'gyur/ de ltar rnam pa de dag mi rigs pa yin na / ji ltar shes rab de rnam par mi rtog pa yin par blta bar bya zhe na/ smras pa/ de ni dmigs pa la mngon par 'du
 byed pa med pa'i phyir te/ de'i dmigs pa ni dngos po dang dngos po med pa dang mi mthun pa'i chos de bzhin nyid yin la/ de yang rnam par mi rtog pa yin no/ /de ni mngon par 'du byed pa med kyang sngon gyi shugs kyis gang gi tshe de bzhin nyid kyi ting nge 'dzin dang ldan pa'i
 shes rab skye bar 'gyur ba'i tshe/ dmigs pa'i mtshan ma des mngon sum du 'dzin par byed de/ de ni rnam par mi rtog pa zhes bya'o/ /de kho na'i don gyi le'u'i rnam par gtan la dbab pa rdzogs so/ / / /byang chub sems dpa' rnams kyi mthu bsam gyis mi khyab
 pa ni rgyu lngas rig par bya ste/ lnga gang zhe na/ rtog ge thams cad las yang dag par 'das pa nyid kyi phyir dang / 'jig rten na dpe dmigs su med pa nyid kyi phyir dang / mthu de sems shin tu sbyang ba byas pa kho na dang 'brel ba nyid kyi phyir dang / mnyam par ma bzhag
 pa'i sa pa'i sems dang gcig tu cha mi mthun pa nyid yin pa'i phyir dang / de mnyam par gzhag pa'i sa pa'i sems dang 'brel pa nyid yin pa'i phyir ro/ /theg pa chen po la byang chub sems dpa' rnams kyi chos spyod pa bcu po 'di dag ni sems can yongs su smin par byed par
 'gyur ba yin te/ bcu gang zhe na/ 'di lta ste/ theg pa chen po dang ldan pa'i mdo sde la sogs pa'i chos byang chub sems dpa'i sde snod kyis bsdus pa dag yi ger 'drir bcug ste 'dzin pa dang / de bzhin du mchod pa dang / gzhan dag la sbyin pa dang / ston pa na gus
 par byas te nyan pa dang / bdag nyid klog pa dang / de bzhin du kun chub par lung nod pa dang / lung phog pa rnams rgya cher dbyangs kyis kha ton byed pa dang / gzhan dag la rgya cher yang dag par ston pa dang / gcig pu dben par song ste sems pa dang / 'jal ba dang /
 nye bar rtog par byed pa dang / bsgom pa'i rnam pas rjes su 'jug par byed pa'o/ /chos spyod pa bcu po de dag las du zhig bsod nams rgya chen po skye ba'i lam yin zhe na/ smras pa/ thams cad do/ /du zhig sbyor ba'i lam yin zhe na/ smras pa/ gcig ste dgu pa'o/ /du
 zhig sgrib pa'i rnam par dag pa'i lam yin zhe na/ smras pa/ gcig ste bcu pa'o/ /de lta bu dang mthun pa'i rnam par gtan la dbab pa'i gzhung lhag ma ni mi snang ngo / /thos pa las byung ba'i sar theg pa chen po bsdus pa'i skabs su byang chub ni rnam pa lnga po ngo bo nyid dang / mthu dang /
 thabs dang / 'jug pa dang / ldog pa las rig par bya'o zhes ji skad bstan pa de'i rab tu dbye ba gang yin/ byang chub chen po'i ngo bo nyid gang zhe na/ nyan thos dang / rang sangs rgyas las khyad par du 'phags pa'i gnas gyur pa gang yin pa'o/ /de yang rnam pa bzhis rig par bya
 ste/ 'jug pa'i gnas dang / mi 'jug pa'i gnas dang / shes bya legs par yongs su brtags pa'i 'bras bu dang / chos kyi dbyings rnam par dag pa'i mtshan nyid kyis so/ /de la 'jug pa'i gnas ni sangs rgyas kyi rgyud la mnga' ba 'jig rten las
 'das pa'i lam gyi 'jug pa'i gnas yin pa'i phyir te/ de de lta ma yin du zin te gnas gyur pa de la ma brten par lam skye bar mi 'gyur zhing 'jug par mi 'gyur ro/ /gal te gnas gyur pa med kyang / 'jug par gyur na ni dang po nyid nas 'jug par 'gyur ro/ /de la mi
 'jug pa'i gnas ni bag chags dang bcas pa'i nyon mongs pa rnams mi 'jug pa'i gnas yin pa'i phyir te/ de de lta ma yin du zin te gnas gyur ba de la ma brten par rkyen tshogs kyang bag chags dang bcas pa'i nyon mongs pa rnams mi 'jug pa dmigs par mi 'gyur ro/ /
 de la shes bya legs par yongs su brtags pa'i 'bras bu ni shes bya'i de kho na shes bya'i de bzhin nyid legs par rtog pa'i 'bras bu ni gnas gyur pa de yin pa'i phyir te/ de de lta ma yin du zin na sangs rgyas rnams kyi chos kyi ngo bo nyid kyang yongs su shes par bya ba dang / spang
 bar bya ba dang / dgag par bya dgos par 'gyur ro/ /de la chos kyi dbyings rnam par dag pa'i mtshan nyid ni mtshan ma thams cad zil gyis mnan pa'i phyir gnas gyur pa de ni chos kyi dbyings shin tu rnam par dag pas rab tu phye ba yin no/ /de de lta bu ma yin du zin na mi rtag pa
 dang bsam du rung bar 'gyur ba zhig na/ de ni rtag pa'i mtshan nyid dang bsam gyis mi khyab pa'i mtshan nyid kyis gnyis su med par bstan pa yin no/ /bsam gyis mi khyab pa de yang rnam pa lngas rig par bya ste/ ngo bo nyid dang / yul dang / gnas pa dang / gcig pa
 nyid dang / tha dad pa nyid dang / bya ba bsgrub pas so/ /de la ji ltar ngo bo nyid las bsam gyis mi khyab pa yin zhe na/ gzugs sam/ gzugs las gzhan zhes bya ba de ltar bsam gyis mi khyab pa dang / tshor ba dang / 'du shes dang / 'du byed rnams dang / rnam par
 shes pa'am/ rnam par shes pa las gzhan zhes bya ba de ltar bsam gyis mi khyab pa dang / sa'i khams sam/ sa'i khams las gzhan zhes bya ba de ltar bsam gyis mi khyab pa dang / chu'i khams dang / me'i khams dang / rlung gi khams sam/ rlung gi khams
 las gzhan zhes bya ba de ltar bsam gyis mi khyab pa dang / mig gi skye mched dam/ mig gi skye mched las gzhan zhes bya ba de lta bur bsam gyis mi khyab pa dang / rna ba dang / sna dang / lce dang / lus dang / yid kyi skye mched dam/ yid kyi skye mched las gzhan zhes
 bya ba de ltar bsam gyis mi khyab pa dang / dngos po'am/ dngos po med pa zhes bya ba de ltar bsam gyis mi khyab pa yin no/ /de la ji ltar yul las bsam gyis mi khyab pa yin zhe na/ 'dod pa'i khams sam/ 'dod pa'i khams las gzhan zhes bya ba de ltar
 bsam gyis mi khyab pa dang / gzugs kyi khams sam/ gzugs kyi khams las gzhan zhes bya ba de ltar bsam gyis mi khyab pa dang / gzugs med pa'i khams sam/ gzugs med pa'i khams las gzhan zhes bya ba de ltar bsam gyis mi khyab pa dang /
 mi rnams sam/ mi rnams las gzhan nam/ lha rnams sam/ lha rnams las gzhan zhes bya ba de ltar bsam gyis mi khyab pa dang / shar phyogs sam/ shar phyogs las gzhan nam/ lho dang / nub dang / byang dang / 'og dang / steng dang / phyogs mtshams
 rnams sam/ phyogs mtshams rnams las gzhan zhes bya ba de ltar bsam gyis mi khyab pa yin no/ /de la ji ltar gnas pa las bsam gyis mi khyab pa yin zhe na/ /bde bar gnas pa 'di dang 'di lta bus gnas so zhes bya ba de ltar bsam gyis mi khyab pa dang / zhi bar
 gnas pa 'di dang 'di lta bus gnas so zhes bya ba de ltar bsam gyis mi khyab pa dang / sems dang bcas pa'i gnas pa 'di dang / 'di lta bus gnas so zhes bya ba de ltar bsam gyis mi khyab pa dang / sems med pa'i gnas pa 'di dang 'di lta bus gnas so zhes bya ba de
 ltar bsam gyis mi khyab pa dang / lha dang tshangs pa'i gnas pa 'di dang 'di lta bus gnas so zhes bya ba de ltar bsam gyis mi khyab pa dang / 'phags pa'i gnas pa 'di dang 'di lta bus gnas so zhes bya ba de ltar bsam gyis mi khyab pa yin no/ /de la
 ji ltar gcig pa nyid dang / tha dad pa nyid las bsam gyis mi khyab pa yin zhe na/ 'di lta ste/ zag pa med pa'i dbyings gcig la gnas pa'i sangs rgyas rnams ci gcig pa nyid yin nam/ tha dad pa nyid yin zhes bya ba de ltar bsam gyis mi khyab pa yin no/ /de la
 ji ltar bya ba bsgrub pa las bsam gyis mi khyab pa yin zhe na/ de bzhin gshegs pa khams mnyam pa dang / ye shes dang / mgyogs pa dang / stobs dang / pha rol gnon pa mnyam pa zag pa med pa'i dbyings la gnas pa rnams gnas gyur pa de nyid la brten
 nas 'di lta 'di ltar sems can gyi don dang sems can gyi bya ba mdzad do zhes bya ba de ltar bsam gyis mi khyab pa yin no/ /de yang rgyu gnyis kyis bsam gyis mi khyab pa nyid du blta bar bya ba ste/ brjod du med pa'i don gyis tshig gi spyod yul las 'das pas de'i phyir bsam
 gyis mi khyab pa dang / 'jig rten las 'das pa nyid kyis 'jig rten na de'i dpe med pas de'i phyir bsam gyis mi khyab pa yin no/ /mthu gang zhe na/ mdor bsdu na dbang bcu la mthu zhes bya ste/ tshe la dbang ba la sogs pa 'di lta ste/ sa'i dngos gzhir bstan pa yin no/ /
 thabs gang zhe na/ mdor bsdu na sprul pa rnam pa bzhi ni thabs zhes bya ste/ sems can yongs su ma smin pa rnams yongs su smin par bya ba'i phyir/ byang chub sems dpa'i spyod pa sprul pa dang / sems can yongs su smin pa rnams rnam par grol bar bya ba'i phyir stong
 gsum gyi stong chen po'i 'jig rten gyi khams kyi 'dzam bu'i gling bye ba phrag brgyar cig car du de bzhin gshegs pa'i sku sprul pa'i thabs yongs su 'dzin pa dang / nyan thos kyis 'dul ba rnams la de sprul pa dang / rang sangs rgyas kyis 'dul ba rnams la de sprul pa ste/
 sangs rgyas bcom ldan 'das rnams ni phyogs bcur sprul pa rnam pa bzhi po de dag la thogs pa med pa'i mthu dang ldan pa yin par blta bar bya'o/ /de la 'jug pa gang zhe na/ de yang rnam pa gnyis su blta bar bya ste/ de'i mod la 'jug pa dang / de gtan du 'jug pa'o/ /
 de la de'i mod la 'jug pa ni ji srid du sems can rnams yongs su ma smin zhing rnam par ma grol ba de srid du sangs rgyas rnams kyi sprul pa 'jug pa'o/ /de la de gtan du 'jug pa ni ji ltar sangs rgyas rnams kyi ngo bo nyid mi zad cing bsam gyis mi khyab pa/ 'jig rten ji srid
 yod kyi bar du sems can rnams kyi bya ba bsgrub pa la rjes su 'jug pa'i phyir 'jug par mdzad pa'o/ /de la ldog pa gang zhe na/ de yang rnam pa gnyis su blta bar bya ste/ de'i mod la ldog pa dang / de gtan ldog pa'o/ /de la de'i mod la ldog pa ni sems can rnams
 yongs su smin cing rnam par grol bar gyur pa ni de'i mod la sangs rgyas rnams yongs su mya ngan las 'das pas ldog par mdzad do/ /de la de gtan ldog pa ni bag chags dang bcas pa'i nyon mongs pa rnams dang sdug bsngal gnas dang bcas pa gtan zad pa las rig par bya'o/ /
 ji ltar na bstod pa byed pa de bzhin gshegs pa la phan 'dogs pa yin zhe na/ ji ltar bstod na bdag nyid la phan par spyod pas yin gyi/ bstod pa dag gis ni ma yin no/ /gzhan du na de bzhin gshegs pa ni bstod pa dag gis g.yo bar mdzad de/ 'di ltar de
 bzhin gshegs pa ni dge ba mi spyoms pa dang / mchog tu 'dod chen chung ba yin pa'i phyir ro/ /de bzhin gshegs pa la bstod pa mngon par brjod pa la ngo mtshar rmad du byung ba'i chos ni gnyis po 'di dag yin te/ bstod pa byed pa bdag nyid kho na 'ba' zhig la phan par kun
 tu spyod pa na bsod nams dpag tu med pa skye bar 'gyur ba gang yin pa dang / de bzhin gshegs pa bzhed pa thams cad dang bral ba la phan gdags par 'gyur ba gang yin pa ste/ ji lta ji ltar de bzhin gshegs pa la bstod pa byed pa de lta de ltar bdag nyid la phan pa sgrub par byed pa
 yin la/ ji lta ji ltar bdag nyid la phan pa sgrub par byed pa de lta de ltar de bzhin gshegs pa la mchod pas phan 'dogs par byed pa yin pas/ de'i phyir dngos po gnyis dang ldan pa'i bsod nams shin tu rgya che zhing mi zad pa skye bar 'gyur te/ de bzhin
 gshegs pa bzhed pa'i dngos po dang ldan pa dang / mi bzhed pa'i dngos po dang ldan pa'o/ /de bzhin gshegs pa'i yon tan ni rnam pa drug gis bsdus par rig par bya ste/ mtha' dag dang / dri ma med pa dag dang / mi g.yo ba dang / mi mnyam pa dang / sems can gyi
 don gyi las can dang / mthus so/ /de la ji ltar mtha' dag gis she na/ 'di la de bzhin gshegs pa ni khams gsum na spyod pa 'jig rten pa dang / 'jig rten las 'das pa'i yon tan thams cad dang ldan pa yin te/ 'jig rten las 'das pa'i yon tan de dag kyang /
 ngag gi spyod yul las yang dag par 'das pa yin pas/ gang gi phyir de bzhin gshegs pa bstod pa thams cad las yang dag par 'das pa de'i phyir bstod par 'os pa kho na yin no/ /ji ltar dri ma med pa yin zhe na/ yon tan gyi dri ma ni bdun po 'di dag yin te/ 'dod pa
 dang / lta ba dang / yid gnyis dang / nga rgyal dang / rgyags pa dang / bag la nyal dang / ser sna'o/ /de bzhin gshegs pa la ni de dag rnam pa thams cad kyi thams cad du mi mnga' ste/ 'di ltar de bzhin gshegs pa ni bdag la gzhan dag gis 'di ni yon tan dang /
 ldan pa yin no zhes shes par gyur na ci ma rung snyam du yon tan dag gis gzhan las shes kyi khe tshol bar mi mdzad pa dang / yon tan de dag la blta bas mngon par zhen par mi mdzad pa dang / yon tan de dag la 'di dag yon tan yin nam skyon yin snyam du yid gnyis mi mnga' ba
 dang / yon tan de dag gis bdag nyid gzhan dag dang bskrun cing yongs su 'jal bar mi mdzad pa dang / bdag nyid kyi yon tan rjes su gzigs pa na rgyags pa dang / rgod pa dang / dga' ba skye ba dang / yid bde ba skye bar mi 'gyur ba dang / yon tan de dag bag chags
 dang bcas pa'i nyon mongs pa thams cad yang dag par bcom pa'i phyir nyon mongs pa'i bag la nyal dang mi ldan pa dang / yon tan de dag la gzhan gyis rtogs par gyur na mi rung ngo snyam du sems shin tu kun tu 'dzin pa'i sems mi mnga' ba'i phyir ro/ /ji ltar mi g.yo bas
 she na/ de bzhin gshegs pa'i yon tan mi zad pa rnams ni mu stegs can rnams kyis mi bskyod pa'i phyir dang / bdud rnams kyis mi bskyod pa'i phyir dang / chom rkun pa dag gis mi 'phrogs pa'i phyir dang / nye du rnams kyis mi bskyod pa'i phyir dang / rgyal po rnams
 kyis mi bskyod pa'i phyir dang / 'byung ba chen pos dang / chu dang / me dang / rlung gis mi bskyod pa'i phyir dang / tshe zad pa las yongs su nyams par mi 'gyur ba'i phyir de bzhin gshegs pa'i yon tan de dag mi zad pa ste/ des na de dag mi g.yo ba'o/ /ji ltar mi mnyam pas
 she na/ mthu rgya chen po phul du phyin pa sna tshogs dag gis sems can dag pa dang ma dag pa rnams dang mi mnyam pa'i phyir te/ des na de dag mi mnyam pa yin no/ /ji ltar sems can gyi don gyi las can gyis she na/ kha na ma tho ba med pa'i bde ba rgya chen po brnyes pa spangs
 nas/ gzhan gyi don la sbyor ba yang dag par ston par mdzad pa'i phyir te/ des na de dag sems can gyi don gyi las can yin no/ /ji ltar mthus she na/ sems can gyi don bya ba'i smon lam yang dag par grub pa'i phyir dang / de'i thabs shes pas yongs su bskor ba'i
 phyir dang / de dang 'brel pa la yang dag par gtod pa'i phyir ro/ /de bzhin gshegs pa rnams ni skyabs kyi 'os yin la/ lha rnams skyabs kyi 'os ma yin pa ni rgyu lngas rig par bya ba ste/ lnga gang zhe na/ rtags dang / ngo bo nyid dang / las dang / chos dang / rgyu dang 'bras
 bus so/ /de la ji ltar rtags las she na/ lha rnams ni bltar mi snang ba'i phyir kun tu tha snyad byar med pa dang / drag po cha byad can yin pa'i phyir 'jigs pa dang bcas pa dang / bag med pa la brten pa'i phyir sred pa dang bcas pa dang / gzhan gyi don la mi blta ba'i phyir
 snying rje med pa dang / byas pa dang ma byas pa mi shes pa'i phyir dang / de kho na'i don ma rtogs pa'i phyir ro/ /de bzhin gshegs pa ji ltar rtags las skyabs kyi 'os yin par rig par bya zhe na/ bltar snang ba'i phyir kun tu tha snyad byar yod pa dang / rab tu
 zhi ba'i cha byad mnga' ba'i phyir 'jigs pa dang bral ba dang / bag yod pa'i phyir sred pa mi mnga' ba dang / gzhan gyi don la gzigs pa'i phyir thugs rje dang bcas pa dang / byas pa dang ma byas pa mkhyen pa'i phyir dang de kho na'i don rtogs pa'i phyir ro/ /gzhan yang de bzhin
 gshegs pa ni rtags lngas skyabs kyi 'os kho na yin par rig par bya ste/ lnga gang zhe na/ sems can gyi don gyi phyir byang chub yang dag par bsgrubs pa dang / rjes su chags pa dang / khong khro ba dang bral zhing bsnyengs pa mi mnga' ba'i phyir chos kyi tshul yang dag par rjes su
 'jug par mdzad pa dang / phan 'dogs pa dang gnod pa byed pa'i sems can rnams la mnyam par phan pa'i thugs mnga' ba dang / pho brang dang btsun mo dang sras dang yongs su gzung ba la chags pa yongs su btang bas dbang po zhi ba dang / sems can thams cad kyi the
 tshom nges par 'grel par mdzad pas so/ /ji ltar ngo bo nyid las she na/ de bzhin gshegs pa rnams ni zag pa thams cad dang bral ba'i phyir bdag nyid kyang dul ba yin la 'dul bar mdzad pa yin par yang 'os kyi/ lha rnams ni zag pa dang ldan pa yin pas gdul bar
 bya ba yin te 'dul bar byed pa'i 'os ma yin no/ /ji ltar las las she na/ de bzhin gshegs pa rnams ni bsam gtan yangs shing rgya che ba la gnas par mdzad pa'i phrin las can dang / sems can gyi don mdzad pa'i phrin las can yin gyi lha rnams ni 'dod pa'i longs
 spyod la gnas par byed pa'i las can dang / sems can rnams la rnam par 'tshe ba'i las can yin par snang ngo / /ji ltar chos las she na/ 'jig rten dang 'jig rten las 'das pa'i phun sum tshogs pa thams cad ni rang gi skyes bu'i byed pa la rag las pa yin pa'i
 phyir skyes bu'i byed pa med na lha rnams la gus pa dam pos zhen pa rnams kyis kyang 'thob par mi 'gyur la/ skyes bu'i byed pa dang ldan pa de la gus pa med pa rnams kyis kyang de 'thob par 'gyur ba'i phyir ro/ /ji ltar rgyu dang 'bras bu las she na/ 'di la lha nyid ni lha nyid du
 'gyur ba'i las kyis sam/ de nyid la mchod pas sam/ rgyu med pas 'thob par 'gyur grang na/ gal te lha nyid du 'gyur ba'i las kyis yin na ni des na rang gi las nyid skyabs kyi 'os yin gyi/ lha rnams ni ma yin no/ /gal te rgyu med pas yin na ni des na rgyu med
 pa nyid skyabs kyi 'os yin gyi/ lha rnams ni ma yin no/ /gal te lha mchod pas yin na ni des na lha nyid kyi rgyu mchod pa nyid dam lha nyid dam de gnyi ga yin par 'gyur grang na/ gal te mchod pa nyid yin na ni des na mchod pa gang yang rung bas lha nyid du 'gyur bas lha nyid don med
 par 'gyur ro/ /gal te lha nyid kyis yin na ni des na lha mchod pa med par yang lha nyid kyis lha nyid du 'gyur bar byed pa'i phyir/ lha mchod pa don med par 'gyur ro/ /gal te de gnyi gas yin na ni des na mchod pas phan btags pa'i lha nyid gang sems par byed pa de ni yang
 dag par 'grub par 'gyur ba'i phyir/ des na lha des bsam pa rnam pa bdun yang dag par 'grub par 'khrul pa kho nar 'gyur bas de yang mi 'thad de/ mchod pa'i rkyen gyis phan btags pa dang / mos pa'i rkyen gyis phan btags pa dang / de la ma mos pa rnams mos
 par byed pa dang / khyad par du 'phags pa'i lha nyid khas blangs pa dang / longs spyod shin tu khyad par du 'phags pa yang dag par 'grub pa dang / lha ma yin pa la sogs pa mi mthun pa'i phyogs 'jig pa dang / 'chi 'pho la bsam pa yang dag par 'grub par 'khrul
 par 'gyur ro / /rnam par dag pa ni bzhi ste/ ming rnam par dag pa dang / ngag rnam par dag pa dang / ngo bo nyid rnam par dag pa dang / rtags rnam par dag pa'o/ /de la rtags ni mthu dang / the tshom gcod pa dang / lung ston pa dang / gdul dka' ba 'dul ba dang /
 lha dang mi rnams mngon par 'du bya ba dang / nges par 'byin pa'i gdams ngag ston pa dang / mu stegs can pham par byed pa'o/ /ji ltar gzugs la sogs pa ming can gyi dngos po la/ gzugs la sogs par 'dogs pa btags pa las yod pa
 yin gyi/ rdzas las ma yin par khong du chud par bya zhe na/ mngon par brjod pa la yongs su goms pa'i ming la gnas pa'i rnam par shes pa'i dmigs pa gzugs la sogs pa'i ming can gyi dngos po gzugs la sogs pa'i bdag nyid gang gis yod pa de ni bdag nyid des
 rdzas dang don dam pa gnyi gar yang med do/ /de lta bas na gzugs la sogs pa'i ming can gyi chos de dag gi ngo bo nyid yod pa ma yin pa las des kun brtags pa gang yin pa de ni btags pa las yod pa yin par rig par bya'o/ /mngon par brjod pa la yongs su goms pa rnam
 par bstsal ba'i ming can gyi rnam par shes pa'i dmigs pa gzugs la sogs pa'i ming can gyi dngos po brjod du med pa'i bdag nyid gang gis yod pa de ni rdzas dang don dam pa gnyi gar yang de bzhin du yod par rig par bya'o/ /de la de rab tu grub par bya ba'i rigs pa brjod pa
 pa ni 'di lta ste/ byang chub sems dpa'i sar bstan pa de bzhin du rig par bya'o/ /de la mngon par brjod pa la yongs su goms pa'i ming la brten pa'i rnam par shes pa'i dmigs pa kun brtags pa'i ngo bo nyid gang yin pa de ni/ nang na yang mi dmigs/ phyi rol na yang
 mi dmigs / gnyi ga med par yang mi dmigs te/ ma skyes pa dang / mi skye ba dang / skye bar mi 'gyur ba dang / ma 'gags pa/ mi 'gag pa/ 'gag par mi 'gyur ba/ gzod ma nas zhi ba rang bzhin gyis yongs su mya ngan las 'das pa zhes bya ste/ 'di
 ltar 'di ni btags pa'i yod pa yin gyi/ don dam par yod pa ma yin pa'i phyir ro/ /brjod du med pa'i bdag nyid kyi ngo bo nyid gang yin pa de ni byis pas bskyed pa'i log par yongs su rtogs pa la brten nas ni skyes pa dang / skye ba dang / skye bar 'gyur ba dang / 'gag pa
 dang / 'gag par 'gyur ba yang yin te/ de ma spangs shing yongs su ma shes pas ni kun nas nyon mongs pa rab tu phye ba yin la/ de spangs shing yongs su shes pas ni rnam par byang ba rab tu phye ba yin no/ / / /bam po sum cu drug pa/ byang chub sems dpa'i
 mang du thos pa yang dag par 'dzin par 'gyur ba'i chos ni bzhi ste/ 'di lta ste/ mang du thos pa'i gzhi dang / mang du thos pa yang dag par 'grub pa dang / mang du thos pa'i 'bras bu dang / mang du thos pa rnam par dag pa'o/ /de dag kyang byang chub kyi smon lam dang / skyes bu
 dam pa la brten pa dang / so sor rtog pa'i stobs dang / rab tu dben par gnas pa dang go rims bzhin no/ /byang chub sems dpa' rnams kyi bsam pa'i khams gang zhe na/ smras pa/ sangs rgyas kyi chos rnams la yod pa nyid du yid ches pas rab tu phye ba gang yin pa'o/ /byang chub
 sems dpa' rnams kyi lhag pa'i bsam pa'i khams gang zhe na/ smras pa/ sangs rgyas kyi chos rnams la yon tan dang ldan pa nyid du yid ches pas rab tu phye ba gang yin pa'o/ /byang chub sems dpa' rnams kyi mos pa'i khams gang zhe na/ smras pa/ sangs rgyas kyi chos
 rnams la thob par nus par yid ches pas rab tu phye ba gang yin pa'o/ /byang chub sems dpa' rnams kyi snying brtse ba gang zhe na/ smras pa/ sdug bsngal bar gnas pa'i sems can rnams la rjes su snying brtse ba gang yin pa'o/ /byang chub sems dpa' rnams kyi snying rje gang zhe na/
 smras pa/ sdug bsngal gyi rgyu la gnas pa'i sems can rnams la rjes su snying brtse ba gang yin pa'o/ /byang chub sems dpa' rnams kyi shes rab gang zhe na/ smras pa/ shes bya ba la ji lta ba bzhin du yod pa nyid kyis rtogs pa yang gang yin pa'o/ /byang chub sems dpa' rnams kyi
 ye shes gang zhe na/ smras pa/ shes bya la ji snyed yod pa nyid kyis rtogs pa gang yin pa'o/ / sems pa'i skyon ni gsum ste/ sems pa lhur len pa dang / gnas pa ma yin pa la sems pa dang / log par sems pa'o/ /byang chub sems dpa' ji ltar sbyin pa sbyin pa de la
 brten nas sbyin pa yongs su dag pa rnam pa bdun du rig par bya ste/ sbyin par bya ba'i dngos po yongs su dag pa dang / tshul khrims yongs su dag pa dang / lta ba yongs su dag pa dang / sems yongs su dag pa dang / ngag yongs su dag pa
 dang / shes pa yongs su dag pa dang / dri ma yongs su dag pa ste/ yongs su dag pa de dag thams cad kyang rnam pa bcu bcur rig par bya'o/ /de la sbyin par bya ba'i dngos po yongs su dag pa rnam pa bcu ni 'di lta ste/ mang po dang sna tshogs pa nyid kyis 'di ltar rgya chen po
 sbyin par byed pa dang / mi mang mi nyung ba nyid kyis mtshungs par sbyin par byed pa dang / 'dod pa'i dus nyid kyis dus su sbyin par byed pa dang / kha dog la sogs pa phun sum tshogs pa nyid kyis gya nom pa sbyin par byed pa dang / mi gtsang ba'i dngos po dang ma 'dres pa nyid kyis
 gtsang ba sbyin par byed pa dang / kha na ma tho ba med pa dang ldan pa nyid kyis rung ba sbyin par byed pa dang / slong mo pa'i bsam pa nyid kyis ci 'dod pa sbyin par byed pa dang / 'phrod pa nyid kyis phan pa sbyin par byed pa dang / slong mo pa la ltos pa nyid cig car ram rim gyis sbyin par
 byed pa dang / rgyun mi 'chad pa nyid kyis rtag tu sbyin par byed pa'o/ /de la tshul khrims rnam par dag pa rnam pa bcu ni 'di lta ste/ bsgrub pa'i brtson 'grus kyis thob pa'i longs spyod rnams sbyin par byed pa dang / rang gi zho shas bsgrubs pa dag sbyin par byed pa dang / rtul zhing
 dri ma chags chags su bsgrubs pa dag sbyin par byed pa dang / chos rnams kyis chos bzhin du thob pa dag sbyin par byed pa dang / sdig pa las log pa dag sbyin par byed pa dang / dbang po thul bas sbyin par byed pa dang / gus par byas te sbyin par byed pa dang / rab tu
 btud de sbyin par byed pa dang / rang gi lag nas sbyin par byed pa dang / dang por rang rang gi tshal za'i 'khor rnams la legs par ri mor byas legs par mchod par byas nas de'i 'og tu slong mo pa gzhan dag la sbyin par byed pa'o/ /de la lta ba rnam par dag pa rnam pa bcu ni 'di
 lta ste/ /bdag ni sbyin par byed pa'o bdag gi sbyin pa'o snyam du rlom sems med par sbyin par byed pa dang / bdag nyid gzhan dag dang mi sgrun par sbyin par byed pa dang / bdag nyid gzhan dag las che ba'am/ mnyam pa'am/ chung ngo snyam du mi sems par sbyin par byed pa dang /
 gzhan dag la lan du phan 'dogs pa la mi lta bar sbyin pa sbyin par byed pa dang / phyi ma la srid pa khyad par can longs spyod khyad par can la mi lta bar sbyin pa sbyin par byed pa dang / sbyin pa'i 'bras bu med do snyam du mi lta bar sbyin pa sbyin par byed pa dang / 'bras bu tshul dang mi
 mthun pa dang 'bras bu phyin ci log yin no snyam du mi lta bar sbyin pa sbyin par byed pa dang / 'tshe ba dang bcas pa ni dge ba'o snyam du mi lta bar sbyin pa sbyin par byed pa dang / ngo mtshar dang bkra shis su mi lta bar sbyin pa sbyin par byed pa dang / grags pa dang sgra dang tshigs su bcad pa la mi
 lta bar sbyin pa sbyin par byed pa'o/ /de la sems rnam par dag pa rnam pa bcu ni 'di lta ste/ rang bzhin gyis sems can thams cad la byams pa'i sems kyis sbyin pa sbyin par byed pa dang / 'di lta ste/ sbyin pa la rin po che'i sems kyis sbyin pa sbyin par byed pa dang / 'di
 lta ste/ mdza' bshes dang / dgra bo dang / tha mal ba dag la snyoms pa'i sems kyis sbyin pa sbyin par byed pa dang / 'di lta ste/ ser sna'i dri ma dang / sogs 'jog gi dri ma gzhan la mi gtong bas ser sna'i dri ma dang / bdag nyid yongs su longs spyod par mi byed pa las sogs 'jog
 gi dri mar rig par bya ba'i dri ma bstsal ba'i sems kyis sbyin pa sbyin par byed pa dang / 'di lta ste/ mngon par dga' ba rnam pa bdun po slong mo pa ma 'ongs pa nas sems mngon par dga' ba dang / slong mo 'ongs pa na mthong ma thag tu sems rab tu dga' ba dang / sbyin pa sbyin par
 byed pa na yid bde ba'i sems dang / mnyam par gzhag pa'i sems dang / ngoms mi shes pa'i sems dang / rnam par 'tshe ba'i bsam pa med pa'i sems dang / byin nas 'gyod pa med pa'i sems kyis/ sems mngon par dga' bas sbyin pa sbyin par byed pa dang / slong mo
 ba'i dngan dus la bzod pa dang skyo ba med pa'i phyir bzod pa'i sems kyis sbyin pa sbyin par byed pa dang / rnam par 'tshe ba rnams la byams pa'i sems kyis sbyin pa sbyin par byed pa dang / sdug bsngal ba rnams la snying rje ba'i sems kyis sbyin pa sbyin par byed pa dang / yon
 tan dang ldan pa rnams la dga' ba'i sems kyis sbyin pa sbyin par byed pa dang / mdza' bshes rnams la btang snyoms kyi sems kyis sbyin pa sbyin par byed pa'o/ /de la ngag rnam par dag pa rnam pa bcu ni 'di lta ste/ sbyin pa'i snga rol nas sbyin pa'i skabs 'byed pa dang / 'ongs pa
 na tshur shog legs par 'ongs so zhes smra ba dang / khro gnyer med cing bzhin gyi mdog gsal la 'dzum pa sngar gtong zhing tshig gi lam 'jam po dag gis gtam 'dre bar byed/ phebs par smra bar byed/ kun dga' bar byed pa dang / slong mo pa rnams kyi mjug thogs su sbyin par
 bya'o snyam du sems shing sbyin par bya ba'i dngos pos kun tu dga' bar byed pa dang / da ni khyod la sbyin par byed pa yin no zhes bya ba tshig kun tu rjod par byed pa dang / dngan dus byed pa na khro bas kun nas slong ba'i tshig rtsub po rjod par mi byed pa dang / slong mo pa la mngon sum dang lkog nas
 mi smod mi sgrogs pa dang / sbyin par bya ba'i chos mi 'dogs na yang legs par shad kyis sbyangs te gtong bar byed pa dang / slong mo pa la mngon sum du smod par mi byed/ khyad du gsod par mi byed/ bsting bar mi byed/ co 'dri bar mi byed pa dang / sma 'bebs pa nye bar sgrub par
 mi byed pa'o/ /de la shes pa rnam par dag pa rnam pa bcu ni 'di lta ste/ sbyin pa la brten pa'i shes pa rnam par dag pa dang / slong mo pa la brten pa'i shes pa rnam par dag pa dang / sbyin par bya ba'i chos la brten pa'i shes pa rnam par dag pa dang / sbyin pa'i sbyor ba la brten
 pa'i shes pa rnam par dag pa dang / sbyin pas sems can yongs su smin par bya ba la brten pa'i shes pa rnam par dag pa dang / thabs la mkhas pa la brten pa'i shes pa rnam par dag pa dang / 'dod pa rnams kyi nyes dmigs la brten pa'i shes pa rnam par dag pa dang /
 dri ma bsal ba la brten pa'i shes pa rnam par dag pa dang / sdig pa'i grogs po yongs su spong ba dang dge ba'i bshes gnyen yongs su gzung ba la brten pa'i shes pa rnam par dag pa dang / phyogs drug gis bkab pa nyid la brten pa'i shes pa rnam par dag pa'o/ /de la shes pa
 rnam par dag pa dang pos ni sbyin pa'i rnam grangs kyang yang dag pa ji lta ba bzhin rab tu shes la/ sbyin pa'i mtshan nyid dang / nges pa'i tshig dang / rab tu dbye ba yang dag pa ji lta ba bzhin du rab tu shes so/ /de la gnyis pas ni sems can dman pa dang / gya nom pa dang / skyon
 dang / yon tan dang ldan pa dang / gnod pa byed pa dang phan 'dogs pa thams cad la sbyin gnas kyi blo nye bar 'jog par byed pa dang / slong mo pa'i 'dod pa nyid kyang zur tsam gyis shes pa dang / sbyin pa'i snga rol nyid nas sbyin par bya ba'i chos thams cad sems can thams cad la bsam pa
 thag pa nas legs par gtong bar byed pa dang / slong mo pa rang gis thug thub du blangs pa thams cad la yang rjes su gnang bar byed do/ /de la gsum pas ni bzo dang las kyi gnas shes pa gang yin pa de dag thams cad la mkhas pas myur ba myur bar longs spyod rnams yang dag par
 bsgrubs nas sbyin pa sbyin par byed pa dang / dge ba'i rtsa ba yongs su gzung ba las kyang 'di lta ste/ tshe snga ma'am/ tshe 'di la myong bar 'gyur ba'am/ rdzu 'phrul mngon par 'grub par 'gyur ba'am/ chos yang dag par blang ba las kyang sbyin pa sbyin par byed do/ /gzhan dag gis bsgrubs
 pa'i longs spyod rnams kyis kyang sbyin pa sbyin par byed de / 'di lta ste/ gzhan dag de yang dag par 'dzin du bcug nas de dag la bya ba'i grogs su 'gro'o/ /de la bzhi pas ni ci nas kyang slong mo pa la yang kun nas nyon mongs par mi 'gyur ba dang / bdag nyid kyang kun nas nyon mongs
 pa can ma yin pa'i sems kyis sbyin pa sbyin par byed pa dang / rab tu phye zhing don du gnyer ba rnams dang / phongs pa rnams dang / ston pa med pa rnams dang / nyes par spyad pa spyod pa rnams dang / legs par spyad pa spyod pa rnams dang / rang gi tshal za rnams la 'di lta ste/ dbul po'am/
 longs spyod 'bring ngam/ longs spyod che bas sbyin par byed pa dang / cho ga ci rigs pas sbyin par byed cing / cho ga ma yin pas ma yin pa de ltar sbyin par bya ba shes par byed do/ /de la lnga pas ni sems can yongs su smin par bya ba'i phyir sbyin pa shes par byas
 shing sbyin par byed pa dang / sbyin pa sbyin pa na skye bo phal po che dang lhan cig tu sbyin pa sbyin par byed cing ji nas kyang skye bo phal po che dag bsod nams chen po bskyed par 'gyur ba de ltar byed pa dang / dbul po sbyin par byed 'dod pa dag la longs spyod kyi bgo bsha' byed pa dang / dbul po ma
 yin pa ser sna can rnams dang / ser sna med pa sbyin pa byed 'dod pa rnams la ni rang gi longs spyod kyi bgo bsha' mi byed par de la grogs byed du 'gro ba dang / sangs rgyas dang / chos dang / dge 'dun gyi bya ba byed 'dod pa gzhan dag la sbyin par bya'i chos dag byin nas/ ji nas
 kyang sgo gnyi ga nas bsod nams skye bar 'gyur ba de ltar gzhan dag kyang byed du 'jug par byed do/ /de la drug pas ni bshad pas kyang sbyin pa sbyin par byed la mthus kyang sbyin pa sbyin par byed/ lan mnod pa las kyang sbyin pa sbyin par byed/ skye ba dang mthus kyang sbyin pa sbyin
 par byed do/ /de la bdun pas ni 'dod pa rnams kyi nyes dmigs yang dag pa ji lta ba bzhin du rab tu shes nas sbyin pa sbyin par byed do/ /de la nyes dmigs rnam pa gnyis kyang shes te/ 'di lta ste/ tshe 'di pa dang / tshe phyi ma pa ste/ 'di lta ste/ sdug bsngal gyi phung po'i
 mdo las byung ba bzhin no/ /rnam pa lnga yang shes te/ 'di lta ste/ nyes dmigs lnga pa'i mdo las byung ba bzhin no/ /rnam pa drug kyang shes te/ 'di lta ste/ 'jigs pa zhes bya ba de ni 'dod pa rnams kyi tshig bla dgas yin no zhes bya ba la sogs pa bstan pa'i mdo las byung
 ba bzhin no/ /rnam pa bdun yang shes te/ 'di lta ste/ 'dod pa rnams ni mi rtag pa dang / gsog dang / gsob ba dang / brdzun pa dang / bslu ba'i chos can dang / sgyu ma lta bu dang / byis pa 'drid pa'o zhes gsungs pa bzhin no/ /rnam pa brgyad kyang shes te/ 'di lta ste/
 rus pa'i keng rus lta bu'o zhes bya ba nas/ rgyas par shing ljon pa'i 'bras bu lta bu'o zhes bya ba'i bar du mdo las ji skad gsungs pa bzhin no/ /de la brgyad pas ni las kyi mtha' dri ma can rnam pa bcu bzhi dang bral ba yang dag pa ji lta ba bzhin shes nas sbyin pa sbyin par
 byed de/ de dag kyang 'di lta ste/ gtsug phud len gyi mdo las gsungs pa bzhin no/ /de la dgu pas ni sdig pa'i grogs po bzhi yongs su spangs shing dge ba'i bshes gnyen bzhi yongs su bzung nas sbyin pa sbyin par byed de/ de dag kyang 'di lta ste/ gtsug phud len
 gyi mdo de nyid las gsungs pa bzhin no/ /de la shes pa rnam par dag pa bcu pas ni phyogs drug gis bkag nas sbyin pa sbyin par byed de/ de dag kyang 'di lta ste/ gtsug phud len gyi mdo de nyid las gsungs pa bzhin no/ /de la dri ma rnam par dag pa rnam pa bcu ni 'di lta ste/
 nang yang rung / phyi rol yang rung / rgyang ring yang rung / thag nye yang rung / lus ngal yang rung / lus ngal ba med kyang rung / lus nyam chung yang rung / lus nyam chung ba ma yin pa yang rung ste/ le lo'i dri ma dang bral ba'i sbyin pa sbyin par byed pa dang / 'di lta ste/ longs spyod rnams la chags pa'i dri ma
 dang bral ba'i sbyin pa sbyin par byed pa dang / 'di lta ste/ slong mo pa rnams la zhe sdang gi dri ma dang bral ba'i sbyin pa sbyin par byed pa dang / 'di lta ste/ rgyu dang 'bras bu la gti mug gi dri ma dang bral ba'i sbyin pa sbyin par byed pa dang / 'di lta ste/ gags bzhi po de dag gis gags
 kyi dri ma dang bral ba'i sbyin pa sbyin par byed pa ste/ de la gags bzhi'i dri ma ni 'di dag yin te/ 'di lta ste/ ma goms pa dang / rgud pa dang / chags pa dang / 'bras bu ma mthong ba'o/ /'di lta ste/ dbul pos rang gi tshal za rnams dang / longs spyod 'bring pos de dag dang
 sdug bsngal ba rnams dang / longs spyod chen pos de dag dang de las gzhan pa'i slong mo pa rnams la shin tu rnam par phye zhing mi rigs pa'i dri ma dang bral ba'i sbyin pa sbyin par byed pa dang / 'di lta ste/ dngos po yongs su rdzogs pa dang / bsam pa yongs su rdzogs pa las yongs su
 rdzogs shing nyung ba'i dri ma dang bral ba'i sbyin pa sbyin par byed de/ de la dngos po yongs su rdzogs pa ni rnam pa bdun te/ yo byad kyi dngos po yang sbyin par byed pa dang / yul gyi dngos po dang / sems can gyi dngos po dang / rgyan gyi dngos po dang / gnas kyi dngos po dang / de'i gnas
 pa'i dngos po dang / nang gi dngos po yang sbyin pa sbyin par byed pa'o/ /de la bsam pa yongs su rdzogs pa ni nang gi lus dang longs spyod dag la rang bzhin gyis chags pa med pa'i bsam pa nyid thob pa gang yin pa'o/ /'di lta ste/ yongs su dag pa rnam pa bcu po 'di lta ste/
 chags pa med pa dang / nag nog med pa la sogs pa sa'i dngos gzhir bstan pa dag gis yongs su dag cing / rnam par ma dag pa'i dri ma dang bral ba'i sbyin pa sbyin par byed pa dang / 'di lta ste/ sbyin par bya ba'i dngos po yongs su brtag pa dang / bsam pa yongs su brtag
 pa dang / zhing yongs su brtags pa yongs su brtags shing 'chal ba'i shes rab kyi dri ma dang bral ba'i sbyin pa sbyin par byed pa ste/ de la sbyin par bya ba'i dngos po yongs su brtag pa ni stsogs 'jog pas yongs su longs spyod pa ches khyad par du 'phags pa dang / yongs
 su longs spyod pa pas sbyin pa ches khyad par du 'phags pa gang yin pa'o/ /de ci'i phyir zhe na/ 'di ltar stsogs 'jog 'ba' zhig ni bdag la yang phan par mi 'gyur/ gzhan la phan par yang mi 'gyur/ tshe 'di la phan par yang mi 'gyur/ tshe phyi ma la phan par yang mi
 'gyur ba yin la/ byang chub sems dpa'i yongs su longs spyod pa ni bdag la phan pa dang / tshe 'di la phan par 'gyur ba yin yang / gzhan la phan pa yang ma yin/ tshe phyi ma la yang phan pa yang ma yin pa dang / byang chub sems dpa' dga' ba dang / mchog tu dga'
 ba rgya chen po skyes shing sbyin par byed pa'i sbyin pa ni bdag la phan pa dang / gzhan la phan pa dang / tshe 'di la phan pa dang / tshe phyi ma la phan par 'gyur ba yin pa'i phyir ro/ /de la bsam pa yongs su brtag pa ni rnam pa bzhir rig par bya ste/ rgyu la phyin ci ma log pa'i bsam pa
 dang / 'bras bu la chags pa med pa'i bsam pa dang / sems can rnams la snying rje ba'i bsam pa dang / thams cad mkhyen pa'i ye shes yongs su rdzogs par bya ba'i bsam pas sbyin pa sbyin par byed pa'o/ /de la zhing yongs su brtag pa ni rnam pa lngas rig par bya ste/ gang
 la don du gnyer ba nyid dmigs pa dang / gang la don du gnyer ba yang yin la phongs pa yang yin pa dang / phongs pa yang yin la rton pa med pa gang yin pa dang / rton pa med pa yang yin la nyes par spyod pa las ldog par nus pa nyid kyang dmigs pa de ni zhing yin no/ /
 de dag med na yang gang la legs par spyod pa dang / yon tan khyad par du 'phags pa dmigs pa de ni zhing lnga pa yin par rig par bya'o/ /zhing ma yin pa ni rnam pa bdun gyis rig par bya ste/ slong mo pa gtum pa dang / phyir rgol ba la skyabs su song ba phyir rgol bar gyur
 nas slong bar byed pa dang / dge ba'i rtsa ba yang dag par 'dzin du gzhug pa na dbang du mi 'gyur ba dang / nyon mongs pa can gyi sems sam kun nas nyon mongs pa'i bsam pas slong bar byed pa dang / bdud dam bdud kyis brlams par gyur nas tho 'tshams pa'i phyir slong bar
 byed pa dang / gnas ma yin pa slong bar byed de pha ma'am/ gzhan gang yang rung ba sbyin par bya ba ma yin pa'i dngos po slong bar byed pa dang / don du gnyer ba ma yin pa ste/ de ltar rnam pa de dag gis ni zhing ma yin pa yongs su brtag pa yin par rig par bya'o/ /thabs ma yin
 pa'i nyes pa dang bral zhing thabs kyi yon tan dang ldan pa'i sbyin pa sbyin par byed de/ de la thabs ni 'di yin te/ 'di lta ste/ sbyin pa la goms pa dang / lus dang srog la mi lta ba dang / sems can la snying brtse ba dang / de kho na'i don shes pa dang / bla na med pa'i byang chub la
 mos pa dang / bshad pa dang / nan gyis gnon pa dang / phan btags pa'i lan du phan 'dogs par sbyor ba dang / skye ba dang mthu'o/ /'dul ba ni bsdu na rnam pa gsum du rig par bya ste/ re zhig bcom ldan 'das kyis nyan thos rnams kyi 'dul ba la/ dang por sdom pa'i tshul
 khrims kyi 'dul ba ji ltar bsdus pa de ni 'dul ba bsdus pa yin par blta bar bya'o/ /dge ba'i chos sdud pa'i tshul khrims kyi 'dul ba bsdus pa gang zhe na/ dge ba'i chos sdud pa'i tshul khrims la brtson pa'i byang chub sems dpas mdor bsdu na sems drug la so
 sor brtag par bya ste/ drug gang zhe na/ khyad du gsod pa'i sems dang / le lo dang ldan pa'i sems dang / bsgribs pa'i sems dang / brtsal ba las yongs su skyo ba'i sems dang / gnod pa dang ldan pa'i sems dang / bar chad dang ldan pa'i sems so/ /de la byang chub
 sems dpa'i dge ba'i chos rnams la spong bar sems pa nyid dang / mi mos pa'i sems nyid dang / brnyas pa'i sems nyid gang yin pa de ni khyad du gsod pa'i sems zhes bya'o/ /le lo dang glag dal dang bag med pas kun nas dkris pa'i sems ni le lo dang ldan pa'i sems
 zhes bya'o/ /'dod pa la 'dun pa la sogs pa nyon mongs pa dang nye ba'i nyon mongs pa'i sgrib pa gang yang rung bas kun nas dkris pa'i sems ni bsgribs pa'i sems zhes bya'o/ /brtson 'grus brtsams shing gnas pa'i lus kyi ngal ba dang sems kyis 'khrug pas zil gyis
 gnon pa'i sems ni brtsal bas yongs su ngal ba'i sems zhes bya'o/ /gnod pa gang yang rung bas zil gyis non pa'i sems sbyor bar bzod pa'i mthu med pa de ni gnod pa dang ldan pa'i sems zhes bya'o/ /smra ba la dga' ba la sogs pa bar chad dang ldan pa'i sems ni bar chad dang
 ldan pa'i sems zhes bya'o/ /byang chub sems dpa' sems drug po de dag la 'di ltar so sor brtag par bya ste/ ci bdag gi sems la sems drug po de dag las gang yang rung ba rab tu spyod pa yod dam/ 'on te med snyam du so sor rtog par bya'o/ /de la byang chub sems dpa'
 sems dang po gsum po dag ni skyes so cog gcig tu dang du mi blang bar bya ste/ gal te dang du len par byed cing spong bar mi byed na/ thams cad du kha na ma tho ba dang bcas par 'gyur ro/ /brtsal bas yongs su skyo ba'i sems ni skyes pa na/ gal te 'di lta bu'i sems kyis dge
 ba'i chos rnams la sbyor ba gtong bar byed de/ ji nas kyang lus dang sems ngal zhing 'khrug par byed pa 'di so sor bsal nas/ yang dge ba'i chos rnams la sbyar bar bya'o snyam du sems na ni kha na ma tho ba med par 'gyur ro/ /gal te bdag la dge ba la sbyor ba gang gis bdag tshe
 'di la sdug bsngal bar 'gyur ba 'di lta bus ji zhig bya snyam du sems shing thams cad kyi thams cad du gtan spong bar byed na ni de la kha na ma tho ba dang bcas par 'gyur ro/ /gnod pa dang ldan pa'i sems ni nye bar gnas par gyur pa na/ byang chub sems dpa'i dge ba'i sbyor ba la 'dod dgur
 byar med pa yin pas de dang du blangs nas yang kha na ma tho ba med do/ /bar chad dang ldan pa'i sems ni nye bar gnas par gyur pa na/ gal te 'dod dgur byar med dam don ches chen po zhig yang dag par rjes su mthong nas dang du len par byed na ni kha na ma tho ba med do/ /gal te de la
 'dod dgur byar yod dam/ don med pa'am/ don ches chung ba zhig yang dag par rjes su mthong nas dang du len par byed na ni kha na ma tho ba dang bcas par 'gyur ro/ /sems drug po de dag las sems snga ma gsum po dag gis byung ba dang du blangs so cog ni gcig tu kha na ma tho ba
 dang bcas par 'gyur ro/ /gnod pa dang ldan pa'i sems gcig pu ni dang du blangs kyang gcig tu kha na ma tho ba med do/ /sems lhag ma gnyis kyi byung ba dang du blangs so cog ni rnam grangs kyi kha na ma tho ba dang bcas pa dang / kha na ma tho ba med par 'gyur ro/ /sems can gyi
 don bya ba'i tshul khrims la brtson pa'i byang chub sems dpa' ni rnam par rtog pa'i gnas drug la so sor brtag par bya ste/ bdag dang / gzhan dang / zang zing gis phongs pa dang / zang zing gis 'byor pa dang / chos kyis phongs pa dang / chos kyis 'byor pa ni gnas
 drug pa yin no/ /de la zang zing gis phongs pa zhes bya ba ni/ chos gos dang bsod snyoms la sogs pa ma rnyed pa rnams mi rnyed pa dang / rnyed cing 'jug pa rnams rgyun 'chad par 'gyur ba'o/ /zang zing gis 'byor pa ni de las bzlog pa las rig par bya'o/ /chos kyis phongs
 pa zhes bya ba ni bslab pa nyams pa dang de bzhin gshegs pas gsungs pa don dam pa'i chos kyi tshig sngon ma thos pa mnyan du med pa dang / sngon ma thos pa ji lta ba bzhin du sngon ma bsams pa bsam du med pa dang / thos pa'i bar chad dang / bsam pa'i bar
 chad dang / thos pa dang bsams pa brjod pa dang / bsgoms pa las byung ba'i dge ba ma thob pa mi thob pa dang / thob pa yongs su nyams par 'gyur ba'o/ /chos 'byor pa ni de las bzlog pa las rig par bya'o/ /de la byang chub sems dpas bdag nyid kyis chos kyis phongs
 pas gzhan dag gi zang zing 'byor par bya ba'i phyir sbyor bar mi bya'o/ /zang zing 'byor par bya ba'i phyir ji lta ba bzhin du chos 'byor par bya ba'i phyir yang de bzhin no/ /don gyi skabs 'dir chos kyis phongs pa zhes bya ba ni bslab pa nyams pas bsdus pa dang / bslab pa nyams
 pa dang rjes su mthun pas bsdus pa dang / thob pa'i chos yongs su nyams pas bsdus pa yin par rig par bya'o/ /bdag nyid kyi zang zing gis phongs pas gzhan dag gi zang zing 'byor par bya ba'i phyir ni brtson par bya ste/ zang zing 'byor pa de yang gal te chos kyis phongs pa
 skyed par mi byed na'o/ /gal te chos kyis phongs pa skyed par byed na ni brtson par mi bya'o/ /zang zing 'byor par bya ba'i phyir ji lta ba bzhin du chos 'byor par bya ba'i phyir yang de bzhin no/ /bdag nyid kyi zang zing 'byor pas gzhan dag gi zang zing 'byor par bya ba'i phyir yang brtson
 par bya'o/ /zang zing 'byor par bya ba'i phyir ji lta ba bzhin du/ chos 'byor par bya ba'i phyir yang de bzhin no/ /bdag nyid kyi chos 'byor pas gzhan dag gi zang zing 'byor par bya ba'i phyir yang brtson par bya'o/ /zang zing 'byor par bya ba'i phyir ji lta ba bzhin du chos 'byor par bya
 ba'i phyir yang de bzhin no/ /de ltar sbyor bar mi byed na ni kha na ma tho ba dang bcas par 'gyur la/ sbyor bar byed na ni kha na ma tho ba med par 'gyur ro/ /de ltar na de ni re zhig byang chub sems dpa' sdom pa yang dag par blangs pa'i 'dul ba bsdus pa yin no/ /de la byang chub sems
 dpa' dus rtag tu yid la bya zhing bslab par bya'o/ /byang chub sems dpa'i tshul khrims rnam pa gsum po gang yin pa de las gang yang rung ba zhig ma tshang na/ byang chub sems dpa'i sdom pas bsdams pa yin par brjod par bya'am/ /bsdams pa ma yin par brjod par bya zhe na/
 bsdams pa ma yin par brjod par bya'o/ /tshul khrims rnam pa gsum po de dag las 'di lta ste/ sdom pa'i tshul khrims 'di ni sdud par byed pa dang / 'byor par byed pa yin te/ de bsdams shing bsrungs na de las gzhan pa dag kyang bsdams shing bsrungs par gyur la/ de ma
 bsdams shing ma bsrungs na de las gzhan bdag kyang ma bsdams shing ma bsrungs par 'gyur bas/ de'i phyir byang chub sems dpa' sdom pa'i tshul khrims nyams na sdom pa thams cad nyams pa yin par brjod par bya'o/ /gang gzhan la grags par bya ba'i phyir dang / gzhan
 gyi ngo bya ba'i phyir dang / gzhan gyis yang dag par len du bcug pa na/ de len par byed par zad kyi/ rang gi dad pas bsam pa thag pa nas rjes su brtags shing / sems can rnams la snying rje'i sems nye bar gzhag ste/ dge ba 'dod pas len par mi byed pa de yang bsdams
 pa ma yin par brjod par bya ste/ de ni des dge ba yongs su rdzogs pa dang sbyor bar yang mi 'gyur la/ de'i 'bras bu'i phan yon yang 'thob par mi 'gyur ro/ /de las bzlog pas ni sdom pas bsdams pa dang / dge ba yongs su rdzogs pa dang sbyor bar 'gyur ba dang / de'i 'bras bu phan yon yang 'thob par 'gyur
 bar rig par bya'o/ /sdom pa de ma btang na ni tshe rabs gzhan du yang rjes su 'jug par rig par bya'o/ /gal te btang na ni ma yin no/ /de gtong ba ni mdor bsdu na rgyu bzhis 'gyur te/ yang dag par len pa'i sems kyis mi 'dra bar nges pa'i sems skyed par byed pa dang /
 mi brda phrad pa'i drung du 'bul ba dang ldan pa'i tshig rjod par byed pa dang / pham pa'i gnas lta bu'i chos bzhi po de dag las thams cad dam/ re re'i nyes pa 'byin pa dang / pham pa'i gnas lta bu'i chos bzhi po thams cad dam re re la kun nas dkris pa chen pos nyes pa 'byin par
 byed na byang chub sems dpa' sdom pa btang bar brjod par bya'o/ /gal te phyir blang ba'i sems yongs su dag pa thob par gyur na yang phyir blang bar yang bya'o/ /byang chub sems dpa' rab tu byung bas chos gos gsum ma gtogs pa yo byad lhag pa/ sangs
 rgyas kyis rjes su gnang ba lus kyi longs spyod dang bde ba la reg par gnas pa'i rjes su mthun par gyur pa dag / gal te slong mo pa 'dod pa rnams la so sor brtags te sbyin par byed na kha na ma tho ba med do/ /gal te dge ba'i phyogs la ltos pa'i phyir yin gyi/ 'dod pa'i khongs su
 gtogs pa ma yin pas sbyin par mi byed na yang kha na ma tho ba med pa kho na yin no/ /gal te chos kyi glegs bam bris zin pa slong mo pa byis pa'i shes rab can rnams la sbyin par byed na kha na ma tho ba dang bcas par 'gyur ro/ /de dag la sbyin pa'i phyir gzhan dag la slong bar byed na yang
 kha na ma tho ba dang bcas par 'gyur ro/ /gal te bdag gis 'di chos zab mo rnams 'dzin du gzhug pa dang mos par bya nus so snyam pa de lta bu kho na'i sems kyis sbyin par byed na ni kha na ma tho ba med do/ /gal te dam pa'i chos ltar bcos pa'i glegs bam mam mu stegs can gyi bstan
 bcos kyi glegs bam la dad pa'i sems can rnams la de yi ger 'drir bcug nas sam/ bris zin pa lag na bdog pa sbyin par byed dam/ gzhan las bslangs te sbyin par byed na kha na ma tho ba dang bcas par 'gyur ro/ /byang chub sems dpas glegs bam bris zin pa lag na bdog pa
 de yang phyis te/ sangs rgyas kyi gsung rab yi ger 'drir gzhug pa'am/ bdag nyid kyis kyang snying po med pa kho nar yongs su shes par bya zhing / gzhan dag la yang legs pa kho nar bsgrag par bya'o/ /gal te glegs bam ma bris pa slong ba zhig 'ongs na byang chub sems dpa' de la
 'dis khyod la ji zhig bya zhes yongs su dri bar bya ste/ gal te btsongs la yongs su longs spyod par bya'o zhes zer na/ byang chub sems dpa' gal te glegs bam de chos kyi don du sta gon byas pa zhig yin na ni/ de la sbyin par mi bya bar/ rin bdog na rin sbyin par bya'o/ /gal te rim
 mi bdog na gnyi ga ma byin na yang kha na ma tho ba med do/ /gal te chos kyi don du sta gon byas pa ma yin na ni ji nas kyang bde bar yongs su longs spyod par bya ba'i phyir/ glegs bam de nyid sbyin par bya'o/ /de bzhin du gal te gzhung shin tu ngan pa 'dri bar 'dod pa'i phyir slong ba la ma
 byin na yang kha na ma tho ba med do/ /gzhung shin tu ngan pa 'dri bar 'dod pa la ji lta ba bzhin du gzhung 'bring 'dri bar 'dod pa la yang de bzhin no/ /gzhung khyad par du 'phags pa 'dri bar 'dod pa'i phyir slong ba la ma byin na ni kha na ma tho ba dang bcas par rig par bya'o/ /'di ni byang chub
 sems dpa' phan 'dogs pa'i sems can rnams la phan 'dogs pa'i mtshan ma'i rjes su 'brang zhing zang zing dang bcas pa'i sems dang phyogs yongs su gzung ba'i tshul gyis mdza' bshes kyi bsam pa skyed par byed na kha na ma tho ba dang bcas par 'gyur ro/ /gnod pa byed pa'i
 sems can rnams la gnod pa byed pa'i mtshan ma'i rjes su 'brang zhing rnyog pa'i sems dang / dgra bor yongs su gzung ba'i sems kyis dgra bo'i bsam pa skyed par byed na kha na ma tho ba dang bcas par 'gyur ro/ /gnod pa byed pa yang ma yin phan pa byed pa yang ma yin pa'i sems
 can rnams la tha mal pa'i bsam pa dang / btang snyoms kyi bsam pa skyed par byed na kha na ma tho ba dang bcas par 'gyur ro/ /gal te rab tu 'byung ba'i phyir gsol ba 'debs pa zhig 'ongs na/ dus kyi skyon dang dus tha ma'i skyon gyi rjes su 'brang zhing rab tu 'byin par mi
 byed na ni kha na ma tho ba med do/ /gal te snying brtse ba'i sems nye bar gzhag ste rab tu 'byin par byed na yang kha na ma tho ba med do/ /rab tu 'byin pa ji lta ba bzhin du bsnyen par rdzogs par byed pa dang / gnas sbyin par byed pa dang / 'khor sdud par byed pa yang de bzhin du
 rig par bya ste/ rnam pa de dag gis byang chub sems dpa'i tshul khrims kyi phung po de gsum yongs su rdzogs par rig par bya'o/ /de la sbyin pa la sogs pa rgya cher bstan pa rnams kyi mdor bsdu ba bstan par bya ste/ de la byang chub sems dpa' rnams kyi sbyin pa ni mdor bsdu na yon tan
 lnga dang ldan na sbyin pa'i pha rol tu phyin pa zhes bya ba'i grangs su 'gro ste/ lnga gang zhe na/ 'di lta ste/ chags pa med pa nyid dang / mi lta ba nyid dang / kha na ma tho ba med pa nyid dang / rnam par rtog pa med pa nyid dang / yongs su bsngo ba nyid kyis so/ /sbyin pa
 la ji lta ba bzhin du tshul khrims la sogs pa la yang de bzhin du rig par bya'o/ /de la chags pa med pa nyid ni sbyin pa la sogs pa'i gags su gyur pa'i chos rnam pa thams cad la chags pa med pa gang yin pa'o/ /de la mi lta ba nyid ni zang zing dang de'i 'bras bu la sems 'brel pa med
 pa gang yin pa'o/ /de la kha na ma tho ba med pa nyid ni sbyin pa la sogs pa'i nye ba'i nyon mongs pa rnam pa thams cad rnam par spangs pa nyid gang yin pa'o/ /de la rnam par rtog pa med pa nyid ni sbyin pa la sogs pa la kun brtags pa'i ngo bo nyid du mi lta ba gang yin pa'o / /de la yongs
 su bsngo ba nyid ni sbyin pa la sogs pa thams cad kyi 'bras bu bla na med pa yang dag par rdzogs pa'i byang chub 'thob par smon lam 'debs pa gang yin pa'o/ /de la de ltar byang chub sems dpa' rnams kyi pha rol tu phyin pa yon tan rnam pa lngas yongs su zin pa de dag ni byang chub sems
 dpa'i sbyin pa zhes kyang bya/ byang chub sems dpa' shes rab kyi bar zhes kyang bya'o/ /thams cad kyi sbyin pa zhes kyang bya/ shes rab thams cad kyi bar zhes kyang bya'o/ /dka' ba sbyin pa zhes kyang bya/ dka' ba'i shes rab kyi bar zhes kyang bya ste/ rgyas par sa'i dngos gzhir bstan pa'i sdom
 gyi tshigs su bcad pa thams cad rjes su rtogs par bya'o/ /sbyin pa'i pha rol tu phyin pa'i nye ba'i nyon mongs pa nang dang phyi rol la brten pa rnam pa bcu yod de/ de dag gi gnyen por byang chub sems dpa'i sar sbyin pa'i pha rol tu phyin pa rnam par dag pa rnam pa bcu bstan pa rnams gcig las
 'phros pa'i go rims bzhin du rig par bya'o/ /de la phyi rol la brten pa'i nye ba'i nyon mongs pa ni rnam pa lnga ste/ yongs su nyon mongs pa dang / spongs pa dang / byams pas zhen pa med pa dang / yid la bsam pa yongs su ma rdzogs pa dang / yongs su ma smin pa'o/ /nang la brten
 pa'i nye ba'i nyon mongs pa yang rnam pa lnga ste/ nges par 'byin pa ma yin pa nyid dang / kun nas nyon mongs pa can nyid dang / stobs dang mi ldan pa nyid dang / phyogs su lhung ba dang bcas pa nyid dang / zad pa'i chos can nyid do/ /tshul khrims kyi le'ur tshul khrims rnam par dag pa
 rnam pa bcu bstan pa la/ rnam pa gcig gis ni bsam pa rnam par dag pa bstan to/ /lhag ma rnams kyis ni sbyor ba rnam par dag pa bstan par rig par bya'o/ /de la sbyor ba ni rnam pa lnga ste/ rgyun mi 'chad pa'i sbyor ba dang / yongs su sbyong ba'i sbyor ba dang / yongs su bsngo
 ba'i sbyor ba dang / grogs kyi sbyor ba dang / bsrung ba'i sbyor ba'o / /de yang rnam pa gnyis pa dang / gsum pa gnyis kyis ni sbyor ba dang po bstan to/ /bzhi pas ni gnyis pa'o/ /lnga pas ni gsum pa'o/ /drug pa dang / bdun pa dang / brgyad pa dang / dgu pa rnams kyis
 ni bzhi pa'o/ /bcu pas ni sbyor ba lnga pa bstan par rig par bya'o/ /bzod pa rnam par dag pa'i rnam pa bcu la rnam par dag pa rnam pa gnyis su rig par bya ste/ so sor rtog pa'i stobs kyis rnam par dag pa ni dgus bstan to/ /bsgoms pa'i stobs kyis rnam par dag pa ni bcu
 pas bstan to/ /so sor rtog pa'i stobs kyis rnam par dag pa de yang rnam pa bzhir rig par bya ste/ kha na ma tho ba yongs su spong bas rnam par dag pa dang / de kun du mi spyod pas rnam par dag pa dang / kha na ma tho ba med pa skye bas rnam par dag pa dang / de'i rgyu yongs su mi
 spong bas rnam par dag pa ste/ rnam pa gcig dang / gnyis dang / gsum dang / go rims bzhin no/ /mi bzod pa'i rgyu ni rnam pa gsum du rig par bya ste/ ngo tsha ba med pa dang / khrel med pa dang / snying rje med pa'o/ /brtson 'grus kyi pha rol tu phyin pa rnam par dag pa yang
 rnam pa bcus rnam par dag par rig par bya ste/ rnam par sbyor bas rnam par dag pa dang / yongs su 'dris pas rnam par dag pa dang / rtsom pas rnam par dag pa dang / thabs kyis rnam par dag pa dang / dus 'bras bu yod par gnas pas rnam par dag pa dang / tshegs med par
 gnas pas rnam par dag pa dang / nges par 'byung bas rnam par dag pa dang / grogs kyis yongs su zin pas rnam par dag pa dang / mngon par shes pa myur ba nyid kyis rnam par dag pa dang / mi zad pa nyid kyis rnam par dag pa'o/ /bsam gtan gyi pha
 rol tu phyin pa yang rnam par dag pa rnam pa bcus rnam par dag pa yin te/ dag pa de nyid kyis rnam par dag pa dang / zag pa med pas rnam par dag pa dang / dngos gzhi'i thabs kyis rnam par dag pa dang / dngos gzhi thob pas rnam par dag pa dang / dbang gi thabs kyis
 rnam par dag pa dang / gnas pa la dbang bas rnam par dag pa dang / mngon par shes pa bsgrub pa la dbang bas rnam par dag pa dang / sems can yongs su smin par bya ba la dbang bas rnam par dag pa dang / mu stegs can tshar gcad pa la dbang bas rnam par dag pa dang /
 'bral ba bla na med pas rnam par dag pa'o/ /shes rab kyi pha rol tu phyin pa rnam par dag pa ni rnam pa lnga ste/ mtshan nyid rtogs pas rnam par dag pa dang / rten cing 'brel par 'byung ba rtogs pas rnam par dag pa dang / lung 'bogs pa rtogs pas rnam par dag pa dang /
 skyes bu'i byed pa rtogs pas rnam par dag pa dang / 'thob pa rtogs pas rnam par dag pa'o/ /byang chub sems dpa' ji ltar lus la lus kyi rjes su lta zhing gnas she na/ smras pa/ mtshan ma'i lus la de bzhin nyid kyi lus kyi rjes su lta zhing gnas so/ /lus la ji lta ba de bzhin du/
 tshor ba dang / sems dang / chos rnams la yang ci rigs par rig par bya'o/ /byang chub sems dpa' sdig pa mi dge ba'i chos ma skyes pa rnams mi bskyed pa'i phyir 'dun pa skyed par byed do zhes rgyas par bya ba de dag gang zhe na/ smras pa/ de de ltar de bzhin nyid kyi dmigs pa la nye
 bar gnas pa'i sems la mtshan ma dang / gnas ngan len mi snang bar gyur pa thams cad dang / nang du yang dag par ma skyes pa rnams mi bskyed pa'i phyir 'dun pa skyed par byed do zhes rgyas par bya'o/ /ma skyes pa rnams mi bskyed pa'i phyir ji lta ba bzhin du skyes pa snang bar gyur pa rnams dang /
 nang du yang dag par skyes pa rnams spang bar bya ba'i phyir dang / de'i gnyen po dge ba'i chos ma skyes pa rnams bskyed pa'i phyir dang / skyes pa rnams gnas par bya ba'i phyir 'dun pa skyed par byed do zhes rgyas par bya ba yang de bzhin du rig par bya'o/ /de la dang por dran pa nye bar gzhag
 pa dag la ni dmigs pa la sems nye bar gtod par rig par bya'o/ /de'i 'og tu dmigs pa de nyid la sems gnas par bya ba'i phyir yang dag pa'i spong ba rnams kyis rtsol bar rig par bya'o/ /de'i 'og tu ting nge 'dzin thob pa'i ting nge 'dzin yongs su rdzogs par bya ba'i phyir rdzu
 'phrul gyi rkang pa la sbyor bar rig par bya'o/ /de'i 'og tu ting nge 'dzin yongs su rdzogs pa'i mtshan ma dang gnas ngan len thams cad dang bral bar bya ba'i phyir dbang po rnams dang / stobs rnams kyis lam yang dag par rtsom par rig par bya ste/ de la dbang po rnams kyis
 ni sbyor ba'i lam chung ngu yang dag par rtsom par rig par byed do/ /stobs rnams kyis ni chen po'o/ /de'i 'og tu sbyor ba yang dag par brtsams pa'i byang chub kyi yan lag rnams kyis yang dag pa'i mtha' rtogs par byed par rig par bya'o/ /de'i 'og tu yang dag pa'i mtha'
 rtogs pas 'di lta ste/ sgrib pa thams cad las rnam par thar bar bya ba'i phyir lam gyi yan lag rnams kyis bla na med pa yang dag par rdzogs pa'i byang chub kyi bar du rjes su 'thob par rig par bya'o/ /mtshan ma dang gnas ngan len gyi 'ching ba ni rnam pa bcu bzhir rig par bya ste/
 dbang po'i 'ching ba dang / yul gyi 'ching ba dang / sems can gcig la gcig chags pa'i 'ching ba dang / gnas kyi 'ching ba dang / shes pa mi shes pa'i 'ching ba dang / shes bya mi shes pa'i 'ching ba dang / yang 'byung ba la sred pa'i 'ching ba dang / 'jig pa la
 sred pa'i 'ching ba dang / rgyu mi mthun pa dang / rgyu med pa la mngon par zhen pa'i 'ching ba dang / thob par mngon pa'i nga rgyal gyi 'ching ba dang / kun brtags pa'i ngo bo nyid la mngon par zhen pa'i 'ching ba dang / gang zag gi ngo bo nyid la mngon par zhen pa'i 'ching ba dang / gang
 zag yongs su shes par mngon pa'i nga rgyal gyi 'ching ba dang / chos yongs su shes par mngon pa'i nga rgyal gyi 'ching ba'o/ /de la gnas ni 'di yin te/ snod kyi 'jig rten gang yin pa ste/ de la brten nas dbang po rnams 'byung bar 'gyur ba'i phyir ro/ /
 stong pa nyid la brten nas dran pa nye bar gzhag pa bsgom pa la brtson pa'i byang chub sems dpa' ni mdor bsdu na 'du shes kyi 'ching ba rnam pa drug las sems rnam par grol bar bya ste/ 'du shes kyi 'ching ba rnam pa drug gang zhe na/ lus dang chos rnams kyi bar la nang du 'du shes pa
 gang yin pa de ni 'du shes kyi 'ching ba dang po'o/ /de dag nyid la phyi rol du 'du shes pa gang yin pa de ni gnyis pa'o/ /de dag nyid la nang dang phyi rol du 'du shes pa gang yin pa de ni gsum pa'o/ /phyogs bcu'i sems can gyi khams grangs med dpag tu med pa de dag rnam par thar bar
 bya ba'i phyir smon lam btab nas dran pa nye bar gzhag pa dag sgom par byed pa de la 'du shes pa gang yin pa de ni bzhi pa'o/ /gang gi lus la sogs pa la rjes su lta zhing gnas pa de la 'du shes pa gang yin pa de ni lnga pa'o/ /lus la sogs pa de dag nyid la rnam par lta zhing gnas pa de la
 'du shes pa gang yin pa de ni 'du shes kyi 'ching ba drug pa yin no/ /de la lta ba'i gong nas gong du 'du shes kyi 'ching ba rnam pa bcu gcig yod par rig par bya ste/ gong nas gong du 'du shes kyi 'ching ba rnam pa bcu gcig gang zhe na/ lus la sogs pa la lus la sogs par
 rjes su lta zhing gnas pa'i kun nas nyon mongs pa dang / rnam par byang ba'i bden pa la don gyi mchog tu 'du shes pa gang yin pa de ni dang po'o/ /kun nas nyon mongs pa'i don gyi mchog de nyid la byas par 'du shes pa gang yin pa de ni gnyis pa'o/ /rnam par byang ba pa'i don gyi mchog
 de nyid la ma byas par 'du shes pa gang yin pa de ni gsum pa'o/ /ma byas pa'i don gyi mchog de nyid la rtag par 'du shes pa gang yin pa de ni bzhi pa'o/ /kun nas nyon mongs pa byas pa la rgyun du 'jug par 'du shes pa gang yin pa de ni lnga pa'o/ /rtag pa nyid la 'gyur ba med par
 'du shes pa gang yin pa de ni drug pa'o/ /rgyun du 'jug pa de nyid la sdug bsngal dang 'gyur ba dang bcas pas sdug bsngal gyi rang bzhin can du 'du shes pa gang yin pa de ni bdun pa'o/ /de nyid la skye ba dang / 'jig pa dang / gnas pa dang / gzhan du 'gyur ba nyid kyis rang gi mtshan
 nyid kyis 'gyur ba dang bcas pa nyid kyis de'i rang gi mtshan nyid du 'du shes pa gang yin pa de ni brgyad pa'o/ /'gyur ba med pa dang 'gyur ba dang bcas pa'i don gyi mchog de nyid la kun nas nyon mongs pa dang rnam par byang ba'i chos thams cad 'dus par 'du shes pa gang yin pa de ni dgu
 pa'o/ /kun nas nyon mongs pa dang rnam par byang ba'i chos de dag thams cad las kun nas nyon mongs pa dang rnam par byang ba'i bdag nyid med par 'du shes pa gang yin pa de ni bcu pa'o/ /kun nas nyon mongs pa dang rnam par byang ba'i chos de dag nyid la ngo bo nyid med pa'i rang gi
 mtshan nyid du 'du shes pa gang yin pa de ni bcu gcig pa ste/ de ltar gong nas gong du 'du shes kyi 'ching ba'i rnam pa de dag shes shing mthong bas/ de'i phyir byang chub sems dpa' stong pa nyid la brten nas dran pa nye bar gzhag pa dag sgom par byed cing sems kyang rnam par grol
 bar byed de/ 'du shes kyi 'ching ba de las rnam par grol na/ 'du shes kyi 'ching ba thams cad las kyang rnam par grol bar 'gyur ro/ /theg pa chen po pa la la rang gi nye bar bzung nas 'di skad ces kun rdzob tu ni thams cad yod la/ don dam par ni thams cad med do zhes zer
 ro/ /de la 'di skad ces tshe dang ldan pa don dam pa ni gang yin/ kun rdzob ni gang yin zhes brjod par bya'o/ /de skad ces dris pa na/ gal te de 'di skad ces chos thams cad kyi ngo bo nyid med pa gang yin pa de ni don dam pa yin la/ ngo bo nyid med pa'i chos de dag la ngo bo nyid du dmigs pa
 gang yin pa de ni kun rdzob yin no/ /de ci'i phyir zhe na/ 'di ltar de ni yod pa ma yin pa dag la kun rdzob tu byed pa dang / 'dogs pa dang / mngon par brjod pa dang / tha snyad du byed pa'i phyir ro zhes lan 'debs par gyur na/ de la 'di skad ces brjod par bya'o/ /ci ngo bo nyid du dmigs
 pa de mngon par brjod pa dang kun rdzob kyi rgyu las byung ba yin par 'dod dam/ 'on te mngon par brjod pa dang / kun rdzob tsam zhig yin par 'dod/ gal te mngon par brjod pa dang / kun rdzob kyi rgyu las byung ba yin na ni des na mngon par brjod pa dang / kun rdzob
 kyi rgyu las byung ba yin pas yod pa ma yin pa zhes byar mi rung ngo / /gal te mngon par brjod pa dang / kun rdzob tsam zhig yin na ni des na gzhi med par mngon par brjod pa dang / kun rdzob ces byar mi rung ngo / /de la 'di skad ces tshe dang ldan pa ci'i phyir na gang dmigs pa de med pa yin zhes
 kyang brjod par bya'o/ /de skad dris pa na/ gal te de 'di skad ces phyin ci log gi dngos po yin pa'i phyir ro zhes lan 'debs par gyur na/ de la 'di skad ces brjod par bya ste/ ci phyin ci log de yod par 'dod dam 'on te med par 'dod/ gal te yod na ni des na chos thams cad kyi ngo bo
 nyid med pa nyid ni don dam pa'o zhes byar mi rung ngo / /gal te med na ni des na phyin ci log gi dngos po yin pa'i phyir gang dmigs pa de ngo bo nyid med do zhes byar mi rung ngo / /theg pa chen po'i mdo sde don rab tu dbye ba'i rgyu bstan pa ni rnam pa lngas rig par bya ste/ ston pa la gus pa bskyed pa
 nyid kyi phyir bshad pa ni dang po'o/ /'khor yang dag par bsdu ba nyid kyi phyir bshad pa ni gnyis pa'o/ /chos la rim gro cher bskyed pa nyid kyi phyir bshad pa ni gsum pa'o/ /dngos po nye bar dgod pa nyid kyi phyir bshad pa ni bzhi pa'o/ /de kho na'i don mang du bstan pa nyid kyi phyir
 bshad pa ni lnga pa'o/ /rang gi mtshan nyid yongs su brtags pa dang / spyi'i mtshan nyid yongs su brtags pa las brtsams nas/ skye mched bcu gnyis po dag la/ sangs rgyas kyi chos ma 'dres pa thob par bya ba'i phyir phyin ci ma log pa'i lam rnam pa bcu yod par rig par bya ste/ de
 la rnam pa drug gis ni skye mched bcu gnyis po dag la rang gi mtshan nyid yongs su brtags pa yin la/ rnam pa bzhis ni spyi'i mtshan nyid yongs su brtags pa yin par rig par bya ste/ mig la sogs pa'i ming dang brda rnam par gzhag pa'i mtshan nyid la sgra tsam gyi mtshan nyid du yongs su
 shes pa gang yin pa de ni sangs rgyas kyi chos ma 'dres pa thob par bya ba'i phyir phyin ci ma log pa'i lam dang po'o/ /gzhan yang skye mched bcu gnyis po dag la log par yongs su rtogs pas skye ba sna tshogs yongs su 'dzin pa'i mtshan nyid yongs su shes pa gang yin pa de ni gnyis pa'o/ /
 gzhan yang skye mched bcu gnyis po dag la rgyu la brten te 'jug pa'i mtshan nyid yongs su shes pa gang yin pa de ni gsum pa'o/ /gzhan yang skye mched bcu gnyis po dag la skad cig la 'jig cing 'jug pa'i mtshan nyid du yongs su shes pa gang yin pa de ni bzhi pa'o/ /gzhan
 yang skye mched bcu gnyis po dag la rnam par dag par 'jug pa'i mtshan nyid du yongs su shes pa gang yin pa de ni lnga pa'o/ /de la las rnam pa gnyis la brten nas rnam par dag pa rnam pa gnyis su rig par bya ste/ mngon par grub pa'i rnam par dag pa dang / nye bar zhi ba'i rnam par dag
 pa'o/ /gzhan yang skye mched bcu gnyis po dag la mngon par brjod pa'i gzhi'i gnas kyi mtshan nyid du yongs su shes pa gang yin pa de ni drug pa ste/ rnam pa drug po de dag gis ni rang gi mtshan nyid yongs su shes par rig par bya'o/ /skye mched bcu gnyis po de dag nyid la spyi'i
 mtshan nyid ngo bo nyid du yongs su shes pa gang yin pa de ni bdun pa'o/ /gzhan yang skye mched bcu gnyis po de dag nyid la spyi'i mtshan nyid rnam par mi rtog pa'i spyod yul gyi mtshan nyid du yongs su shes pa gang yin pa de ni brgyad pa'o/ /gzhan yang skye mched bcu gnyis po de dag
 nyid la spyi'i mtshan nyid 'jig rten las 'das pa'i chos kyi spyod yul gyi mtshan nyid du yongs su shes pa gang yin pa de ni dgu pa'o/ /gzhan yang skye mched bcu gnyis po de dag nyid la spyi'i mtshan nyid rnam par dag pa'i rgyu'i mtshan nyid du yongs su shes pa gang yin pa de ni/ sangs rgyas
 kyi chos ma 'dres pa thob par bya ba'i phyir phyin ci ma log pa'i lam bcu pa yin te/ rnam pa bzhi po de dag gis ni spyi'i mtshan nyid yongs su brtags par rig par bya'o/ /gnas pa dang sa rnams kyi gong nas gong ma'i khyad par ni khyad par rnam pa brgyad kyis rig par bya ste/ bsam
 pa'i khyad par dang / sems rnam par dag pa'i khyad par dang / snying rje'i khyad par dang / pha rol tu phyin pa'i khyad par dang / sems can yongs su smin pa'i khyad par dang / sangs rgyas snang bar 'gyur ba dang / mchod pa dang bsnyen bkur byed pa'i khyad par dang /
 skye ba'i khyad par dang / mthu'i khyad par gyis so/ / / /bam po sum cu bdun pa/ don dam pa ni mtshan nyid lnga dang ldan pa yin te brjod du med pa'i mtshan nyid dang / gnyis su med pa'i mtshan nyid dang / rtog ge'i spyod yul las yang dag par 'das pa'i mtshan nyid
 dang / tha dad pa dang / tha dad pa ma yin pa nyid las yang dag par 'das pa'i mtshan nyid dang / thams cad du ro gcig pa'i mtshan nyid do/ /de la brjod du med pa'i mtshan nyid dang / gnyis su med pa'i mtshan nyid ni/ dgongs pa nges par 'grel pa'i mdo las ji skad 'byung
 ba bzhin blta bar bya ste/ byang chub sems dpa' tshul bzhin kun 'dris/ byang chub sems dpa' don zab dgongs pa nges par 'grel la dri ba dris pa/ kye rgyal ba'i sras chos thams cad gnyis su med pa/ chos thams cad gnyis su med pa zhes bya na/ chos thams cad ni
 gang / ji ltar na gnyis su med pa yin/ rigs kyi bu chos thams cad chos thams cad ces bya ba ni gnyis ji tsam pa ste/ 'dus byas dang / 'dus ma byas so/ /de la 'dus byas ni 'dus byas kyang ma yin/ 'dus ma byas kyang ma yin no/ /'dus ma byas kyang 'dus
 ma byas kyang ma yin/ 'dus byas kyang ma yin no/ /smras pa/ kye rgyal ba'i sras ji ltar na 'dus byas ni 'dus byas kyang ma yin/ 'dus ma byas kyang ma yin la / 'dus ma byas kyang 'dus ma byas kyang ma yin/ 'dus ma byas kyang ma yin/ rigs kyi bu 'dus byas zhes bya ba de
 ni ston pas btags pa'i tshig yin te/ ston pas btags pa'i tshig gang yin pa de ni kun tu rtog pa las byung ba/ tha snyad du brjod pa yin la/ kun tu rtog pa las byung ba tha snyad du brjod pa gang yin pa de ni/ kun tu rtog pa sna tshogs kyi tha snyad du brjod pa gtan yongs su
 ma grub pa'i phyir 'dus byas ma yin no/ /rigs kyi bu 'dus ma byas zhes bya ba de yang tha snyad kyi khongs su gtogs pa yin la/ 'dus byas dang / 'dus ma byas su ma gtogs pa gang ci brjod kyang de yang de dang 'dra ba nyid du 'gyur/ /de yang de dang 'dra ba nyid du 'gyur ro/ / brjod
 pa ni dngos po med pa can yang ma yin te/ dngos po de yang gang yin / 'phags pa rnams kyis 'phags pa'i ye shes dang / 'phags pa'i mthong bas brjod du med par mngon par rdzogs par sangs rgyas pa gang yin pa ste/ brjod du med pa'i chos nyid de nyid mngon par rdzogs
 par byang chub par bya ba'i phyir 'dus byas zhes ming du btags so/ /rigs kyi bu 'dus ma byas zhes bya ba de yang ston pas btags pa'i tshig gang yin pa de ni/ kun tu rtog pa las byung ba tha snyad du brjod pa yin la/ kun tu rtog pa las byung ba tha snyad du brjod pa gang yin pa de ni
 kun tu rtog pa sna tshogs kyi tha snyad du brjod pa gtan yongs su ma grub pa'i phyir 'dus ma byas pa yin no/ /rigs kyi bu 'dus byas zhes bya ba de yang tha snyad kyi khongs su gtogs pa yin la/ 'dus byas dang 'dus ma byas su rtogs pa gang ci brjod kyang de yang de dang 'dra ba nyid du
 'gyur/ de yang de dang 'dra ba nyid du 'gyur ro/ /brjod pa ni dngos po med pa can yang ma yin te/ dngos po de yang gang zhe na/ 'phags pa rnams kyis 'phags pa'i ye shes dang 'phags pa'i mthong bas brjod du med par mngon par rdzogs par sangs rgyas pa gang yin pa ste/
 brjod du med pa'i chos nyid de nyid mngon par rdzogs par rtogs par bya ba'i phyir 'dus ma byas zhes ming du btags so/ /kye rgyal ba'i sras ji ltar na 'phags pa rnams kyi dngos po de 'phags pa'i ye shes dang 'phags pa'i mthong bas brjod du med par mngon par rdzogs par sangs rgyas
 shing brjod du med pa'i chos nyid de nyid mngon par rdzogs par rtogs par bya ba'i phyir 'dus byas dang 'dus ma byas zhes ming du btags pa yin/ rigs kyi bu 'di lta ste dper na sgyu ma mkhan nam sgyu ma mkhan gyi slob pa mkhas pa zhig lam po che'i bzhi mdor 'dug ste/ rtswa dag gam/ lo ma dag gam/
 shing dag gam/ gseg ma dag gam/ gyo du ma dag gcig tu bsdus nas sgyu ma'i las sna tshogs 'di lta ste/ glang po che'i tshogs dang / rta ba'i tshogs dang / shing rta'i tshogs dang / dpung bu chung gi tshogs dang / nor bu dang / mu tig dang / bai DUR+Ya dang / dung
 dang / man shel dang / byu ru'i tshogs dang / nor dang / 'bru dang / mdzod dang / bang ba'i tshogs dag rnam par bstan na/ de la sems can gang dag byis pa'i rang bzhin can/ rmongs pa'i rang bzhin can/ shes rab 'chal ba'i rang bzhin can/ rtswa dang / lo ma dang /
 shing dang / gseg ma dang / gyo du ma de dag mi shes pa de dag ni de mthong ngam thos na 'di snyam du sems te/ glang po che'i tshogs snang ba gang yin pa 'di ni yod do/ /rta pa'i tshogs dang / shing rta'i tshogs dang / dpung bu chung gi tshogs dang / nor bu dang / mu tig dang / bai DUR+Ya
 dang / dung dang / man shel dang / byu ru'i tshogs dang / nor dang / 'bru dang / mdzod dang / bang ba'i tshogs snang ba gang yin pa 'di ni yod do snyam du sems shing / de dag ji ltar mthong ba dang / ji ltar thos pa bzhin du de dag la nan gyis mchog tu gzung zhing / mngon par
 zhen nas/ 'di ni bden gyi/ gzhan ni brdzun pa'o zhes rjes su tha snyad 'dogs par yang byed de/ de ni de dag gis phyis nye bar brtag par bya dgos pa yin no/ /de la sems can gang dag byis pa'i rang bzhin can ma yin pa/ rmongs pa'i rang bzhin can ma yin pa/ shes rab
 dang ldan pa'i rang bzhin can/ rtswa dang / lo ma dang / shing dang / gsig ma dang / gyo du ma de dag ni mthong ngam thos nas 'di snyam du sems te/ glang po che'i tshogs snang ba gang yin pa 'di ni med do/ /rta ba'i tshogs dang / shing rta pa'i tshogs dang / dpung bu chung gi tshogs dang /
 nor bu dang / mu tig dang / bai DUr+ya dang / dung dang / man shel dang / byu ru'i tshogs dang / nor dang / 'bru dang / mdzod dang / bang ba'i tshogs snang ba gang yin pa 'di ni med kyi/ gang la glang po che'i tshogs kyi 'du shes dang / glang po che'i tshogs kyi rnam grangs kyi 'du shes 'byung
 ba dang / nor dang / 'bru dang / mdzod dang / bang ba'i tshogs kyi bar gyi 'du shes dang / de dag gi rnam grangs kyi 'du shes 'byung ba'i sgyu ma byas pa 'di ni yod do / /mig slu bar byed pa 'di ni yod do snyam du sems shing / de dag ji ltar mthong ba dang / ji ltar thos pa bzhin du
 de dag la nan gyis mchog tu gzung zhing mngon par zhen nas/ 'di ni bden gyi gzhan ni brdzun no zhes rjes su tha snyad mi 'dogs kyi/ 'di ltar don rnam par rig par bya ba'i phyir rjes su tha snyad 'dogs par byed de/ de ni de dag gis phyis nye bar brtag par bya mi dgos pa yin no/ /
 de bzhin du sems can gang dag byis pa'i rang bzhin can/ so so'i skye bor gyur pa/ shes rab 'phags pa 'jig rten las 'das pa ma thob pa chos thams cad kyi brjod du med pa'i chos nyid mngon par mi shes pa de dag ni 'dus byas dang 'dus ma byas de dag mthong ngam thos nas
 'di snyam du sems te/ 'dus byas dang 'dus ma byas snang ba gang yin pa 'di ni yod do snyam du sems shing de dag ji ltar mthong ba dang / ji ltar thos pa bzhin du de dag la nan gyis mchog tu gzung zhing mngon par zhen nas 'di ni bden gyi/ gzhan ni brdzun pa'o zhes rjes su tha snyad
 'dogs par yang byed do/ /de ni de dag gis phyis nye bar brtag par bya dgos pa yin no/ /de la sems can gang dag byis pa'i rang bzhin can ma yin pa/ bden pa mthong ba/ shes rab 'phags pa 'jig rten las 'das pa thob pa/ chos thams cad kyi brjod du med pa'i chos
 nyid mngon par shes pa de dag ni 'dus byas dang 'dus ma byas de dag mthong ngam thos na 'di snyam du sems te/ 'dus byas dang 'dus ma byas snang ba gang yin pa de ni med kyi/ gang la 'dus byas dang 'dus ma byas kyi 'du shes dang / 'dus byas dang 'dus ma byas kyi rnam grangs
 kyi 'du shes 'byung ba dang / rnam par rtog pa las byung ba 'du byed kyi mtshan ma sgyu ma lta bu 'di ni yod do / /blo rnam par rmongs par byed pa 'di ni yod do snyam du sems shing / de dag ji ltar mthong ba dang / ji ltar thos pa bzhin du/ de la nan gyis mchog tu gzung zhing mngon par zhen
 pa 'di ni bden gyi/ gzhan ni brdzun pa'o zhes rjes su tha snyad mi 'dogs kyi/ 'di ltar don rnam par rig par bya ba'i phyir rjes su tha snyad 'dogs par byed de/ de ni de dag gis phyis nye bar brtag par bya mi dgos pa yin no/ /rigs kyi bu de ltar na 'phags
 pa rnams kyi dngos po de 'phags pa'i ye shes dang 'phags pa'i mthong bas rjes su brjod du med par mngon par rdzogs par sangs rgyas shing / /brjod du med pa'i chos nyid de nyid mngon par rdzogs par rtogs par bya ba'i phyir 'dus byas dang 'dus ma byas zhes ming du btags pa
 yin no/ /de nas byang chub sems dpa' don zab dgongs pa nges par 'grel gyis de'i tshe tshigs su bcad pa 'di dag smras so/ /zab mo byis pa'i spyod yul ma yin pa/ /brjod med gnyis min rgyal bas bstan mdzad kyang / /byis pa gti mug rmongs pa 'di dag ni/ /smra ba'i spros
 la dga' zhing gnyis la gnas/ /ma rtogs pa'am log par rtog pa dag/ /lug dang ba lang dag tu yang skye zhing / /de dag shes pa'i smra ba de bor nas/ /shin tu yun ring 'khor ba 'dir 'khor 'gyur/ /zhes gsungs so/ /de la rtog ge'i spyod yul las yang dag par 'das
 pa'i mtshan nyid ni dgongs pa nges par 'grel pa'i mdo las ji skad gsungs pa bzhin blta bar bya ste/ bcom ldan 'das la byang chub sems dpa' chos 'phags kyis 'di skad ces gsol to/ /bcom ldan 'das sngon gyi dus rnams kyi shin tu snga ba zhig na/ 'di nas 'jig rten gyi
 khams gang gA'i klung bdun cu rtsa bdun gyi bye ma snyed 'das pa na/ de bzhin gshegs pa grags pa rgya chen gyi sangs rgyas kyi zhing 'jig rten gyi khams grags pa can zhes bgyi ba der bdag mchis pa'i tshe/ de na bdag gis mu stegs can rang rang gi ston pa la sogs pa 'bum phrag
 bdun cu rtsa bdun 'di lta ste/ chos rnams kyi don dam pa'i mtshan nyid bsams pa las brtsams nas/ sa phyogs zhig na mchis shing 'dus nas/ de dag chos rnams kyi don dam pa'i mtshan nyid sems par bgyid/ 'jal par bgyid/ /nye bar rtog par bgyid/ yongs su
 tshol bar bgyid kyang ma rtogs nas/ /blo gros tha dad pa/ yid gnyis can/ blo gros ngan pa/ rtsod pa dang / 'gyed par gyur pa dag /gcig la gcig kha stobs kyis gnod pa bgyis/ /zher 'debs pa bgyis/ /gab gab kyis gnon pa bgyis/ /tshar gcad par
 bgyid de / so sor mchis pa dag cig mthong nas/ bcom ldan 'das bdag 'di snyam bgyid de/ kye ma de bzhin gshegs pa rnams 'jig rten du 'byung zhing / /de dag byung bas don dam pa rtog ge thams cad las yang dag par 'das pa'i mtshan nyid 'di lta bu rtog pa dang
 mngon sum du bgyi ba mchis pa ni ngo mtshar rmad du byung ba lags so snyam bgyid lags so/ /de skad ces gsol pa dang / bcom ldan 'das kyis/ byang chub sems dpa' chos 'phags la 'di skad ces bka' stsal to/ /chos 'phags de de bzhin no/ /de de bzhin te/ ngas
 ni don dam pa rtog ge thams cad las yang dag par 'das pa'i mtshan nyid mngon par rdzogs par sangs rgyas te/ mngon par rdzogs par sangs rgyas nas kyang bsnyad cing gsal bar byas/ /rnam par phye/ gdags pa byas/ rab tu bstan to/ /de ci'i phyir zhe na/ don dam pa ni
 'phags pa rnams kyi so so rang gis rig pa yin par ngas bshad la/ so so'i skye bo rnams kyi phan tshun rig par bya ba ni rtog ge'i spyod yul yin pa'i phyir te/ chos 'phags de'i phyir rnam grangs des na khyod kyis 'di ltar rtog ge thams cad las yang dag par 'das pa'i mtshan nyid gang yin
 pa de na don dam pa yin par rig par bya'o/ /chos 'phags gzhan yang don dam pa ni mtshan ma med pa'i spyod yul yin par ngas bshad la/ rtog ge ni mtshan ma'i spyod yul yin te/ chos 'phags de'i phyir rnam grangs des kyang khyod kyis 'di ltar rtog ge thams cad las yang
 dag par 'das pa'i mtshan nyid gang yin pa de ni don dam pa yin par rig par bya'o/ /chos 'phags gzhan yang don dam pa ni brjod du med pa yin par ngas bshad la/ rtog ge ni brjod pa'i spyod yul yin te/ chos 'phags de'i phyir rnam grangs des kyang khyod kyis 'di ltar rtog ge thams
 cad las yang dag par 'das pa'i mtshan nyid gang yin pa de ni don dam pa yin par rig par bya'o/ /chos 'phags gzhan yang don dam pa ni tha snyad thams cad yang dag par chad pa yin par ngas bshad la/ rtog ge ni tha snyad kyi spyod yul yin te/ chos 'phags
 de'i phyir rnam grangs des kyang khyod kyis 'di ltar rtog ge thams cad las yang dag par 'das pa'i mtshan nyid gang yin pa de ni don dam pa yin par rig par bya'o/ /chos 'phags gzhan yang don dam pa ni rtsod pa thams cad yang dag par chad pa yin par ngas bshad la/ rtog ge ni
 rtsod pa'i spyod yul yin te/ chos 'phags de'i phyir rnam grangs des kyang khyod kyis 'di ltar rtog ge thams cad las yang dag par 'das pa'i mtshan nyid gang yin pa de ni don dam pa yin par rig par bya'o/ /chos 'phags 'di lta ste/ dper na skyes bu gang zag ji srid 'tsho'i bar
 du tsha ba dang kha ba'i ro bsten bsten pas ni sbrang rtsi'i ro'am/ sha kha ra'i ro brtag pa'am/ rjes su dpag pa'am/ mos par mi nus so/ /yun ring po nas 'dod pa'i 'dod chags la mos pa dang 'dod pa'i yongs su gdung ba dag gis yongs su gdungs pas ni nang gi rab tu dben
 pa'i bde ba gzugs dang / sgra dang / dri dang / ro dang / reg bya'i mtshan ma thams cad dang bral ba la brtag pa'am/ rjes su dpag pa'am/ mos par mi nus so/ /yun ring po nas kun tu smra ba la mos pa kun tu smra ba la mngon par dga' bas ni nang gi mi smra ba 'phags pa'i
 bden pa la brtag pa'am/ rjes su dpag pa'am/ mos par mi nus so/ /yun ring po nas mthong ba dang / thos pa dang / bye brag phyed pa dang / rnam par shes pa'i tha snyad la mos pa/ tha snyad la mngon par dga' bas ni tha snyad thams cad yang dag par chad pa 'jig
 tshogs la 'gog pa'i mya ngan las 'das pa la brtag pa'am/ rjes su dpag pa'am/ mos par mi nus so/ /chos 'phags 'di lta ste/ dper na yun ring po nas bdag gir yongs su 'dzin pa nyid kyis rtsod pa la brtson pa/ rtsod pa la mngon par dga' bas ni byang gi
 sgra mi snyan pa dag gis bdag gir yongs su 'dzin pa med pa nyid dang / rtsod pa med pa nyid la brtag pa'am/ rjes su dpag pa'am/ mos par mi nus so/ /chos 'phags de bzhin du rtog ge pa thams cad kyis kyang don dam pa rtog ge thams cad las yang dag par 'das pa'i
 mtshan nyid la brtag pa'am/ rjes su dpag pa'am/ /mos par mi nus so/ /de nas bcom ldan 'das kyis de'i tshe tshigs su bcad pa 'di bka' stsal to/ /so so rang rig mtshan med spyod yul te/ /brjod du med cing tha snyad yongs chad pa/ /rtsod dang bral ba don dam chos
 yin te/ /de ni rtog ge kun las 'das mtshan nyid/ /ces gsungs pa'o/ /de la tha dad pa dang / tha dad pa ma yin pa nyid las yang dag par 'das pa'i mtshan nyid ni dgongs pa nges par 'grel pa'i mdo las ji skad 'byung ba bzhin blta bar bya ste/ /bcom ldan 'das
 la byang chub sems dpa' blo gros shin tu rnam dag gis 'di skad ces gsol to/ /bcom ldan 'das bcom ldan 'das kyis gang gi slad du 'di skad ces don dam pa ni phra ba zab pa tha dad pa dang tha dad pa nyid ma yin pa nyid las yang dag par 'das pa'i mtshan nyid rtogs par dka' ba
 yin no zhes bka' stsal te/ ji tsam du bcom ldan 'das kyis legs par gsungs pa de ni ngo mtshar lags so/ /bcom ldan 'das 'di na bdag gi sa phyogs shig na/ byang chub sems dpa' mos pas spyod pa'i sa la bzhugs pa rab tu mang po dag cig 'di lta ste/ 'du
 byed rnams dang / don dam pa tha dad pa dang tha dad pa ma lags pa nyid bsams pa las brtsams te/ phan tshun nas mchis shing mchis nas 'dus te mchis nas/ de na byang chub sems dpa' kha cig 'di skad ces 'du byed kyi mtshan nyid dang don dam pa'i mtshan nyid tha dad pa ma
 lags so zhes mchi/ kha cig ni 'di skad ces 'du byed kyi mtshan nyid dang don dam pa'i mtshan nyid tha dad pa dang tha dad pa ma lags pa ma lags kyi/ 'du byed kyi mtshan nyid dang don dam pa'i mtshan nyid tha dad pa lags so zhes mchi/ the tshom du gyur pa'i blo gros can yid gnyis su
 gyur pa kha cig ni 'di skad du/ /gang dag de skad ces 'du byed kyi mtshan nyid dang don dam pa'i mtshan nyid tha dad pa lags so zhes mchi ba dang / gang dag de skad ces 'du byed kyi mtshan nyid dang don dam pa'i mtshan nyid tha dad pa ma lags so zhes mchi ba'i byang chub
 sems dpa' de dag la gang ni mang par mchi ba lags/ gang ni sho be mchi ba lags/ gang ni tshul bzhin du zhugs pa lags/ gang ni tshul bzhin ma lags par zhugs pa lags zhes mchi bdag cig mthong lags so/ /bcom ldan 'das mthong nas kyang bdag 'di
 snyam bgyid de/ rigs kyi bu 'di dag thams cad ni 'di ltar don dam pa 'du byed rnams dang tha dad pa dang tha dad pa ma lags pa nyid las yang dag par 'das pa'i mtshan nyid phra ba ma 'tshal ba/ byis pa rmongs pa mi gsal ba/ mi mkhas pa/ tshul bzhin ma lags par zhugs
 pa sha stag lags so snyam bgyid lags so/ /de skad ces gsol pa dang / bcom ldan 'das kyis byang chub sems dpa' blo gros shin tu rnam dag la 'di skad ces bka' stsal to/ /blo gros shin tu rnam dag de de bzhin no/ /de de bzhin te/ rigs kyi bu de dag thams cad ni 'di ltar don
 dam pa 'du byed rnams dang tha dad pa dang tha dad pa ma yin pa nyid las yang dag par 'das pa'i mtshan nyid phra ba mi shes pa/ byis pa/ rmongs pa/ mi gsal ba/ mi mkhas pa/ tshul bzhin ma yin par zhugs pa sha stag yin no/ /de ci'i phyir zhe na/ blo gros shin tu rnam dag 'du byed
 rnams la de ltar so sor rtog pa dag ni don dam pa rtog pa'am/ don dam pa mngon sum du byed pa ma yin pa'i phyir ro/ /de ci'i phyir zhe na/ blo gros shin tu rnam dag gal te 'du byed kyi mtshan nyid dang don dam pa'i mtshan nyid tha dad pa ma yin par gyur na ni des na byis pa so so'i skye bo thams cad
 bden pa mthong ba yin par yang 'gyur/ so so'i skye bo kho nar 'gyur bzhin du grub pa dang bde ba bla na med pa'i mya ngan las 'das pa 'thob par yang 'gyur/ /bla na med pa yang dag par rdzogs pa'i byang chub mngon par rdzogs par 'tshang rgya bar yang 'gyur ro/ /gal te 'du byed kyi mtshan nyid
 las don dam pa'i mtshan nyid tha dad pa yin par gyur na ni des na bden pa mthong ba rnams kyang / /'du byed kyi mtshan ma dang ma bral bar 'gyur/ 'du byed kyi mtshan ma dang ma bral ba'i phyir bden pa mthong ba yang mtshan ma'i 'ching ba las rnam par grol bar yang mi 'gyur/ mtshan ma'i 'ching ba las rnam
 par ma grol na gnas ngan len gyi 'ching ba las kyang rnam par ma grol bar 'gyur/ 'ching ba de gnyis las ma grol na bden pa mthong bas grub pa dang bde ba bla na med pa'i mya ngan las 'das pa 'thob par yang mi 'gyur/ bla na med pa yang dag par rdzogs pa'i byang chub mngon par
 rdzogs par 'tshang rgya bar yang mi 'gyur ro/ /blo gros shin tu rnam dag gang gi phyir so so'i skye bo bden pa mthong ba ma yin/ so so'i skye bo kho nar 'gyur bzhin du grub pa dang / bde ba bla na med pa'i mya ngan las 'das pa 'thob par yang mi 'gyur/ bla na med pa yang dag
 par rdzogs pa'i byang chub mngon par rdzogs par 'tshang rgya bar yang mi 'gyur ba de'i phyir/ /'du byed kyi mtshan nyid dang don dam pa'i mtshan nyid tha dad pa ma yin zhes byar mi rung ste/ de la gang dag de skad ces 'du byed kyi mtshan nyid dang don dam pa'i mtshan nyid tha dad pa ma yin zhes
 zer ba de dag ni rnam grangs des na/ khyod kyis 'di ltar tshul bzhin ma yin par zhugs pa yin gyi/ /tshul bzhin du zhugs pa ma yin par rig par bya'o/ /blo gros shin tu rnam dag gang gi phyir bden pa mthong ba rnams 'du byed kyi mtshan ma dang bral ba ma yin gyi/ bral ba
 kho na yin pa dang / bden pa mthong ba mtshan ma'i 'ching ba las rnam par ma grol ba ma yin gyi/ rnam par grol ba yin pa dang / bden pa mthong ba gnas ngan len gyi 'ching ba las rnam par ma grol ba ma yin gyi/ rnam par grol ba yin pa dang / 'ching ba de gnyi ga las
 rnam par grol na grub pa dang bde ba bla na med pa'i mya ngan las 'das pa 'thob par 'gyur ba dang / bla na med pa yang dag par rdzogs pa'i byang chub mngon par rdzogs par 'tshang rgya bar yang 'gyur ba de'i phyir/ 'du byed kyi mtshan nyid dang don dam pa'i mtshan nyid tha dad pa zhes byar
 mi rung ste/ de la gang dag de skad ces 'du byed kyi mtshan nyid dang don dam pa'i mtshan nyid tha dad pa zhes zer ba de dag ni rnam grangs des na/ khyod kyis 'di ltar tshul bzhin ma yin par zhugs pa yin gyi/ tshul bzhin du zhugs pa ma yin par rig par bya'o/ /blo gros shin
 tu rnam dag gzhan yang gal te 'du byed kyi mtshan nyid dang don dam pa'i mtshan nyid tha dad pa ma yin par gyur na ni/ des na ji ltar 'du byed kyi mtshan nyid kyang kun nas nyon mongs pa'i mtshan nyid du gtogs pa de bzhin du don dam pa'i mtshan nyid kyang kun nas nyon mongs pa'i mtshan nyid du gtogs par
 'gyur ro/ /blo gros shin tu rnam dag gal te 'du byed kyi mtshan nyid dang / don dam pa'i mtshan nyid tha dad pa yin par gyur na yang des na 'du byed kyi mtshan nyid thams cad la don dam pa'i mtshan nyid ni spyi'i mtshan nyid du gyur pa ma yin par 'gyur ro/ /blo gros shin tu rnam dag gang
 gi phyir don dam pa'i mtshan nyid kun nas nyon mongs pa'i mtshan nyid du gtogs pa ma yin pa dang / 'du byed kyi mtshan nyid thams cad la don dam pa'i mtshan nyid spyi'i mtshan nyid du gyur pa de'i phyir/ 'du byed kyi mtshan nyid dang don dam pa'i mtshan nyid tha dad pa ma yin zhes byar yang mi rung la/
 don dam pa'i mtshan nyid tha dad pa zhes byar yang mi rung ste/ de la gang dag de skad ces 'du byed kyi mtshan nyid dang / don dam pa'i mtshan nyid tha dad pa ma yin zhes zer ba dang / don dam pa'i mtshan nyid tha dad pa zhes zer ba de dag ni rnam grangs des na/ khyod kyis 'di ltar tshul bzhin ma yin par zhugs pa yin gyi/ /tshul bzhin du
 zhugs pa ni ma yin par rig par bya'o/ /blo gros shin tu rnam dag gzhan yang gal te 'du byed kyi mtshan nyid dang don dam pa'i mtshan nyid tha dad pa ma yin par gyur na ni/ des na ji ltar don dam pa'i mtshan nyid thams cad la bye brag med pa de bzhin du/ /'du byed kyi mtshan nyid thams cad kyang bye
 brag med par 'gyur ba dang / rnal 'byor pa dag 'du byed rnams la ji ltar mthong ba dang / ji ltar thos pa dang / ji ltar bye brag phyed pa dang / ji ltar rnam par shes pa las gong du don dam pa yongs su tshol bar yang mi 'gyur ro/ /gal te 'du byed kyi mtshan nyid dang / don dam
 pa'i mtshan nyid tha dad pa yin par gyur na ni des na 'du byed rnams kyi bdag med pa tsam dang / ngo bo nyid med pa tsam nyid don dam pa'i mtshan nyid yin par yang mi 'gyur/ kun nas nyon mongs pa'i mtshan nyid dang / rnam par byang ba'i mtshan nyid kyang dus gcig tu mtshan nyid tha dad du
 grub par 'gyur ro/ /blo gros shin tu rnam dag gang gi phyir 'du byed kyi mtshan nyid rnams ni bye brag yod pa yin te/ bye brag med pa ma yin pa dang / rnal 'byor pa dag 'du byed rnams la ji ltar mthong ba dang / thos pa dang / bye brag phyed pa dang / rnam par shes pa las gong du don dam pa
 yongs su tshol bar byed pa dang / don dam pa ni 'du byed rnams kyi bdag med pas rab tu phye ba yin pa dang / kun nas nyon mongs pa dang / rnam par byang ba'i mtshan nyid kyang dus gcig tu mtshan nyid tha dad du grub pa med pa de'i phyir/ 'du byed kyi mtshan nyid dang don dam pa'i
 mtshan nyid tha dad pa'am / /tha dad pa ma yin pa zhes byar mi rung ngo / /de la gang dag 'di skad ces 'du byed kyi mtshan nyid dang don dam pa'i mtshan nyid tha dad pa ma yin pa'am/ tha dad pa zhes zer ba de dag ni rnam grangs des na/ khyod kyis 'di ltar tshul bzhin ma yin par
 zhugs pa yin gyi/ tshul bzhin du zhugs pa ma yin par rig par bya'o/ /blo gros shin tu rnam dag 'di lta ste/ dper na dung gi dkar po nyid ni dung dang mtshan nyid tha dad pa ma yin pa'am/ mtshan nyid tha dad du gdags par sla ba ma yin no/ /dung gi dkar po nyid ji lta ba
 bzhin du/ gser gyi ser po nyid kyang de bzhin no/ /pi wang gi sgra'i snyan pa nyid kyang pi wang gi sgra nyid dang mtshan nyid tha dad pa ma yin pa'am/ mtshan nyid tha dad par gdags par sla ba ma yin no/ /a ka ru nag po'i dri zhim po nyid kyang a ka ru nag po dang mtshan nyid tha dad pa
 ma yin pa'am/ mtshan nyid tha dad du gdags par sla ba ma yin no/ /na le sham gyi tsha ba nyid kyang na le sham dang mtshan nyid tha dad pa ma yin pa'am/ mtshan nyid tha dad du gdags par sla ba ma yin no/ /na le sham gyi tsha ba nyid ji lta ba bzhin du a ru ra'i bska ba nyid kyang de bzhin
 no/ /'di lta ste/ dper na shing bal gyi 'da' ba'i 'jam pa nyid kyang shing bal gyi 'da' ba dang mtshan nyid tha dad pa ma yin pa'am/ mtshan nyid tha dad par gdags par sla ba ma yin no/ /'di lta ste/ dper na mar la mar gyi snying khu yang mar dang mtshan nyid tha
 dad pa ma yin pa'am/ mtshan nyid tha dad par gdags par sla ba ma yin no/ /'di lta ste/ dper na 'du byed thams cad la mi rtag pa nyid dang / zag pa dang bcas pa thams cad la sdug bsngal ba nyid dang / chos thams cad la gang zag gi bdag med pa nyid kyang de dag dang
 mtshan nyid tha dad pa ma yin pa'am/ mtshan nyid tha dad du gdags par sla ba ma yin no/ blo gros shin tu rnam dag 'di lta ste/ dper na 'dod chags kyi ma zhi ba'i mtshan nyid dang / kun nas nyon mongs pa'i mtshan nyid kyang 'dod chags dang mtshan nyid tha dad pa ma yin pa'am/
 mtshan nyid tha dad du gdags par sla ba ma yin pa dang / 'dod chags kyi ji lta ba bzhin du zhe sdang dang gti mug gi yang de bzhin du rig par bya'o/ /blo gros shin tu rnam dag de bzhin du 'du byed kyi mtshan nyid dang don dam pa'i mtshan nyid kyang mtshan nyid tha dad pa ma yin pa'am/ mtshan
 nyid tha dad du gdags par mi bzod do/ /blo gros shin tu rnam dag ngas ni de ltar don dam pa/ phra ba/ mchog tu phra ba/ zab pa/ mchog tu zab pa/ rtogs par dka' ba/ mchog tu rtogs par dka' ba tha dad pa dang tha dad pa ma yin pa nyid las yang dag par 'das pa'i mtshan nyid
 mngon par rdzogs par sangs rgyas te/ mngon par rdzogs par sangs rgyas nas kyang bsnyad cing gsal bar byas/ rnam par phye/ gdags pa byas/ rab tu bstan to/ /de nas bcom ldan 'das kyis de'i tshe tshigs su bcad pa 'di dag bka' stsal to/ 'du byed khams dang don
 dam mtshan nyid ni/ /gcig dang tha dad bral ba'i mtshan nyid de/ /gcig dang tha dad nyid du gang rtog pa/ de dag tshul bzhin ma yin zhugs pa yin/ /skye ba po yis lhag mthong dang / zhi gnas goms par byas nas ni/ /gnas ngan len gyi mching ba dang / mtshan ma'i 'ching
 las rnam grol 'gyur/ /zhes gsungs so/ /de la thams cad du ro gcig pa'i mtshan nyid ni dgongs pa nges par 'grel pa'i mdo las ji skad 'byung ba bzhin blta bar bya ste/ bcom ldan 'das kyis tshe dang ldan pa rab 'byor la bka' stsal pa/ /rab 'byor khyod kyis sems can gyi
 khams na/ gang dag mngon pa'i nga rgyal mngon pa'i nga rgyal gyis mngon du zin cing / /shes pa brda sprod par byed pa'i sems can ni ji tsam zhig yod par shes/ khyod kyis sems can gyi khams na/ gang dag mngon pa'i nga rgyal med par shes pa brda sprod par byed pa'i sems can ji tsam zhig
 yod par shes/ rab 'byor gyis gsol pa/ bcom ldan 'das bdag gis sems can gyi khams na gang dag mngon pa'i nga rgyal ma mchis par shes pa brda sprod par bgyid pa'i sems can ni nyung shas cig mchis par 'tshal ba lags kyi/ bcom ldan 'das bdag gis sems
 can gyi khams na/ gang dag mngon pa'i nga rgyal can/ mngon pa'i nga rgyal gyis mngon du zin cing shes pa brda sprod par byed pa'i sems can ni tshad ma mchis/ grangs ma mchis/ /brjod du ma mchis pa snyed cig mchis par 'tshal lags te/ bcom ldan 'das bdag
 dus gcig cig na/ dgon pa nags khrod chen po zhig na mchis pa'i tshe/ de na bdag gi nye 'khor na dge slong rab tu mang po dag cig kyang dgon pa nags khrod chen po na brten cing gnas lags te/ bdag gis snga dro'i dus kyi tshe/ dge slong de dag phan tshun nas mchis shing
 mjal nas chos rnam pa sna tshogs dmigs pa'i mngon par rtogs pa ston pas shes pa brda sprod par bgyid de/ de na kha cig ni phung po dmigs pa dang / phung po'i mtshan ma dmigs pa dang / phung po'i skye ba dmigs pa dang / phung po'i 'jig pa dmigs pa dang / phung po
 'gog pa dmigs pa dang / phung po 'go pa mngon du bgyi ba dmigs pas shes pa brda sprod par bgyid/ kha cig phung po'i dmigs pa ji lta ba de bzhin du/ kha cig ni skye mched dmigs pas/ kha cig ni rten cing 'brel par 'byung ba dmigs pas shes pa brda sprod par
 bgyid/ kha cig ni zas dmigs pa dang / zas kyi mtshan ma dmigs pa dang / zas kyi skye ba dmigs pa dang / zas kyi 'jig pa dmigs pa dang / zas 'gog pa dmigs pa dang / zas 'gog pa mngon du bgyi ba dmigs pas shes pa brda sprod par bgyid/
 kha cig ni bden pa dmigs pa dang / bden pa'i mtshan ma dmigs pa dang / bden pa yongs su shes pa dmigs pa dang / bden pa spang ba dmigs pa dang / bden pa mngon du bgyid pa dmigs pa dang / bden pa bsgom pa dmigs pas shes pa brda sprod par bgyid/ kha cig
 ni khams dmigs pa dang / khams kyi mtshan ma dmigs pa dang / khams sna tshogs pa nyid dmigs pa dang / khams du ma pa dmigs pa dang / khams 'gog pa dmigs pa dang / khams 'gog pa mngon du bgyid pa dmigs pas shes pa brda sprod par bgyid/ kha cig ni dran
 pa nye bar gzhag pa dmigs pa dang / dran pa nye bar gzhag pa'i mtshan ma dmigs pa dang / dran pa nye bar gzhag pa'i mi mthun pa'i phyogs dang gnyen po dmigs pa dang / dran pa nye bar gzhag pa'i bsgom pa dmigs pa dang / dran pa nye bar gzhag pa ma skyes pa skye ba dmigs pa dang /
 dran pa nye bar gzhag pa skyes pa gnas pa dang / ma bskyud pa dang / slar zhing 'byung ba dang / 'phel zhing rgyas pa dmigs pas shes pa brda sprod par bgyid/ kha cig ni dran pa nye bar gzhag pa rnams ji lta ba de bzhin du/ kha cig ni yang dag par spong ba rnams dang / rdzu 'phrul gyi rkang pa
 rnams dang / dbang po rnams dang / stobs rnams dang / byang chub kyi yan lag rnams dang / kha cig ni 'phags pa'i lam yan lag brgyad pa dmigs pa dang / 'phags pa'i lam yan lag brgyad pa'i mtshan ma dmigs pa dang / 'phags pa'i lam yan lag brgyad pa'i mi mthun
 pa'i phyogs kyi gnyen po dmigs pa dang / 'phags pa'i lam yan lag brgyad pa bsgom pa dmigs pa dang / 'phags pa'i lam yan lag brgyad pa ma skyes pa skye ba dmigs pa dang / 'phags pa'i lam yan lag brgyad pa skyes pa gnas pa dang / ma bskyud pa dang / slar zhing
 'byung ba dang / 'phel zhing rgyas pa dmigs pas shes pa brda sprod par rig pa dag mthong lags so/ /mthong nas kyang bdag 'di snyam bgyid de/ tshe dang ldan pa 'di dag ni chos rnam pa sna tshogs dmigs pa'i mngon par rtogs pa ston pas shes pa brda sprod par bgyid cing / 'di ltar
 don dam pa thams cad du ro gcig pa'i mtshan nyid ma 'tshal bas tshe dang ldan pa 'di dag thams cad ni mngon pa'i nga rgyal can/ mngon pa'i nga rgyal gyis mngon du zin cing / shes pa brda sprod par bgyid pa sha stag lags so snyam bgyid lags so/ /bcom ldan 'das bcom ldan 'das
 kyis gang gi slad du 'di skad ces/ don dam pa ni phra ba/ zab pa/ rtogs par dka' ba/ mchog tu rtogs par dka' ba/ thams cad du ro gcig pa'i mtshan nyid yin no zhes bka' stsal pa/ ji tsam du bcom ldan 'das kyis legs par gsungs pa de ni ngo mtshar lags te/ bcom
 ldan 'das don dam pa thams cad du ro gcig pa'i mtshan nyid ni bcom ldan 'das kyi bstan pa 'di nyid la zhugs pa dang / dge slong du gyur pa'i sems can rnams kyis kyang de ltar rtogs par dka' ba lags na/ 'di las slad rol pa'i mu stegs can rnams kyis lta smos kyang
 ci 'tshal/ bcom ldan 'das kyis bka' stsal pa/ rab 'byor de de bzhin no/ /de de bzhin te/ des ni don dam pa thams cad du ro gcig pa'i mtshan nyid phra ba/ mchog tu phra ba/ zab pa/ mchog tu zab pa/ rtogs par dka' ba/ mchog tu rtogs par dka' ba/
 mngon par rdzogs par sangs rgyas te/ mngon par rdzogs par sangs rgyas nas kyang bsnyad cing gsal bar byas/ rnam par phye/ gdags pa byas/ rab tu bstan to/ /de ci'i phyir zhe na/ rab 'byor phung po rnams la rnam par dag pa'i dmigs pa gang yin pa de ni ngas don dam
 pa yin par yongs su bstan cing rab 'byor skye mched rnams dang / rten cing 'brel par 'byung ba dang / zas rnams dang / bden pa rnams dang / khams rnams dang / dran pa nye bar gzhag pa rnams dang / yang dag pa'i spong ba rnams dang / rdzu 'phrul gyi rkang pa rnams dang /
 dbang po rnams dang / stobs rnams dang / byang chub kyi yan lag rnams dang / rab 'byor 'phags pa'i lam yan lag brgyad pa la rnam par dag pa'i dmigs pa gang yin pa de ni/ ngas don dam pa yin par yongs su bstan pa'i phyir ro/ /phung po rnams la
 rnam par dag pa'i dmigs pa de yang thams cad du ro gcig pa ste/ mtshan nyid tha dad pa ma yin no/ /phung po rnams la ji lta ba bzhin du/ skye mched rnams dang / 'phags pa'i lam yan lag brgyad pa'i bar la rnam par dag pa'i dmigs pa de yang thams cad du ro gcig
 pa ste/ mtshan nyid tha dad pa ma yin no/ /rab 'byor rnam grangs des na/ khyod kyis 'di ltar thams cad du ro gcig pa'i mtshan nyid gang yin pa de ni don dam pa yin par rig par bya'o/ /rab 'byor gzhan yang dge slong rnal 'byor spyod pa ni phung po gcig gi de bzhin nyid don dam
 pa chos bdag med pa rab tu rtogs nas/ yang de las gzhan pa'i phung po rnams dang / khams rnams dang / skye mched rnams dang / rten cing 'brel par 'byung ba rnams dang / zas rnams dang / bden pa rnams dang / dran pa nye bar gzhag pa rnams dang / yang dag pa'i
 spong ba rnams dang / rdzu 'phrul gyi rkang pa rnams dang / dbang po rnams dang / stobs rnams dang / byang chub kyi yan lag rnams so so dang / 'phags pa'i lam yan lag brgyad pa so so la de bzhin nyid don dam pa chos bdag med pa yongs su tshol bar mi byed kyi/ de bzhin
 nyid kyi rjes su 'brang ba gnyis su med pa'i shes pa la brten pa de nyid kyis/ don dam pa thams cad du ro gcig pa'i mtshan nyid nges par 'dzin pa dang / mngon par rtogs pa kho nar byed de/ rab 'byor rnams grangs des kyang khyod kyis 'di ltar thams cad du ro gcig pa'i mtshan
 nyid gang yin pa de ni don dam pa yin par rig par bya'o/ /rab 'byor gzhan yang ji ltar phung po dang / skye mched dang / rten cing 'brel par 'byung ba dang / zas dang / bden pa dang / khams dang / dran pa nye bar gzhag pa dang / yang dag pa'i spong ba dang / rdzu 'phrul gyi
 rkang pa dang / dbang po dang / stobs dang / byang chub kyi yan lag 'di dag phan tshun mtshan nyid tha dad pa dang / ji ltar 'phags pa'i lam yan lag brgyad pa phan tshun mtshan nyid tha dad pa yin pa de bzhin du/ gal te chos de dag gi de bzhin nyid don dam pa chos bdag med pa yang
 mtshan nyid tha dad pa yin par gyur na ni des na de bzhin nyid don dam pa chos bdag med pa yang rgyu dang bcas pa yin zhing mtshan nyid rgyu las byung ba yin par 'gyur ro/ /rgyu las byung ba nyid yin na ni 'dus byas yin par 'gyur ro/ /'dus byas nyid yin na ni don dam pa yin par mi
 'gyur ro/ /don dam pa ma yin na ni don dam pa gzhan zhig yongs su btsal dgos par 'gyur ro/ /rab 'byor gang gi phyir de bzhin nyid don dam pa chos bdag med pa rgyu las byung ba ma yin pa dang / 'dus byas ma yin pa dang / don dam pa ma yin pa dang / don dam pa de'i don
 dam pa gzhan yongs su btsal bar bya mi dgos kyi/ de bzhin gshegs pa rnams byung yang rung / ma byung yang rung ste/ rtag pa rtag pa'i dus dang / ther zug ther zug gi dus su chos gnas par bya ba'i phyir/ chos rnams kyi chos nyid dbyings de ni rnam par gnas pa kho na yin pa de'i
 phyir/ rab 'byor rnam grangs des kyang khyod kyis 'di ltar thams cad du ro gcig pa'i mtshan nyid gang yin pa de ni don dam pa yin par rig par bya'o/ /rab 'byor 'di lta ste/ dper na nam mkha' ni gzugs kyi rnam pa sna tshogs du ma mtshan nyid tha dad pa la/ mtshan ma med pa rnam
 par rtog pa med pa 'gyur ba med pa ste/ thams cad du ro gcig pa'i mtshan nyid yin no/ /rab 'byor de bzhin du don dam pa yang mtshan nyid tha dad pa'i chos rnams la thams cad du ro gcig pa'i mtshan nyid yin par blta bar bya'o/ /de nas bcom ldan 'das kyis de'i tshe tshigs su
 bcad pa 'di bka' stsal to/ /don dam de ni tha dad pa ma yin te/ /kun tu ro gcig mtshan nyid sangs rgyas gsungs / /de la gang dag tha dad kun rtog pa/ /de dag nga rgyal gnas pa rmongs pa yin/ /zhes gsungs pa'o/ / / /bam po sum cu brgyad pa/ de la sems
 kyi mtshan nyid ni dgongs pa nges par 'grel pa'i mdo las ji skad 'byung ba bzhin blta bar bya ste/ bcom ldan 'das la byang chub sems dpa' blo gros yangs pas zhu ba zhus pa/ bcom ldan 'das byang chub sems dpa' sems dang / yid dang / rnam par shes
 pa'i gsang ba la mkhas pa/ byang chub sems dpa' sems dang / yid dang / rnam par shes pa'i gsang ba la mkhas pa zhes bgyi na/ bcom ldan 'das ji tsam gyis na byang chub sems dpa' sems dang / yid dang / rnam par shes pa'i gsang ba la mkhas pa lags/ de bzhin
 gshegs pa byang chub sems dpa' sems dang / yid dang / rnam par shes pa'i gsang ba la mkhas par yang dag par 'dogs na yang ji tsam gyis 'dogs lags/ de skad ces gsol pa dang / bcom ldan 'das kyis byang chub sems dpa' blo gros yangs pa la 'di skad ces
 bka' stsal to/ /blo gros yangs pa khyod de ltar skye bo mang po la phan pa dang / skye bo mang po la bde ba dang / 'jig rten la snying brtse ba dang / lha dang mir bcas pa'i skye dgu'i don dang / phan pa dang bde ba'i phyir zhugs te/ de bzhin gshegs pa la khyod don 'di nyid 'dri bar
 sems pa ni legs so/ /legs so/ /blo gros yangs pa de'i phyir nyon cig dang / sems dang / yid dang / rnam par shes pa'i gsang ba la mkhas pa khyod la bshad par bya'o/ /blo gros yangs pa khyod 'gro ba drug gi 'khor ba 'di na sems can gang dang gang dag sems
 can gyi rigs gang dang gang du yang sgo nga las skye ba'i skye gnas sam/ yang na mngal nas skye ba'am/ yang na drod gsher las skye ba'am/ yang na rdzus te skye ba'i skye gnas su lus mngon par 'grub cing 'byung bar 'gyur ba der dang por 'di ltar len pa rnam pa gnyis po gnas dang
 bcas pa'i dbang po gzugs can len pa dang / mtshan ma dang / ming dang / rnam par rtog pa la tha snyad 'dogs pa'i spros pa'i bag chags len pa la brten nas/ sa bon thams cad pa'i sems rnam par smin cing 'jug la/ rgyas shing 'phel ba dang / yangs par 'gyur ro/ /
 de la gzugs can gyi khams na ni len pa gnyi ga yod la/ gzugs can ma yin pa'i khams na ni len pa gnyis su med do/ /blo gros yangs pa rnam par shes pa de ni len pa'i rnam par shes pa zhes kyang bya ste/ 'di ltar des lus 'di bzung zhing blangs pa'i phyir ro/ /kun gzhi
 rnam par shes pa zhes kyang bya ste/ 'di ltar de lus 'di la grub pa dang bde ba gcig pa'i don gyis kun tu sbyor ba dang / rab tu sbyor bar byed pa'i phyir ro/ /sems zhes kyang bya ste/ 'di ltar de ni gzugs dang / sgra dang / dri dang / ro dang / reg bya dang / chos rnams kyis kyang
 kun tu bsags pa dang / nye bar bsags pa yin pa'i phyir ro/ /blo gros yangs pa len pa'i rnam par shes pa de la brten cing gnas nas/ rnam par shes pa'i tshogs drug po 'di lta ste/ mig gi rnam par shes pa dang / rna ba dang / sna dang / lce dang / lus dang / yid
 kyi rnam par shes pa dag 'byung ngo / /de la rnam par shes pa dang bcas pa'i mig dang gzugs rnams la brten nas/ mig gi rnam par shes pa 'byung ste/ mig gi rnam par shes pa de dang lhan cig rjes su 'jug pa/ dus mtshungs pa/ spyod yul mtshungs pa/ rnam par rtog
 pa'i yid kyi rnam par shes pa yang 'byung ngo / /blo gros yangs pa de la rnam par shes pa dang bcas pa'i rna ba dang / sna dang / lce dang / rnam par shes pa dang bcas pa'i lus dang / reg bya rnams la brten nas lus kyi rnam par shes pa 'byung ste/ lus kyi rnam par shes pa de dang
 lhan cig rjes su 'jug pa/ dus mtshungs pa/ spyod yul mtshungs pa/ rnam par rtog pa'i yid kyi rnam par shes pa yang 'byung ngo / /gal te mig gi rnam par shes pa gcig lhan cig 'byung na ni/ mig gi rnam par shes pa dang spyod yul mtshungs pa/ rnam par rtog pa'i yid kyi rnam
 par shes pa yang gcig kho na lan cig 'byung ngo / /gal te rnam par shes pa'i tshogs gnyis sam/ gsum mam bzhi lan cig gam/ lnga char lan cig 'byung na yang / der rnam par shes pa'i tshogs lnga po dag dang spyod yul mtshungs pa/ rnam par rtog pa'i yid kyi rnam par
 shes pa yang gcig kho na lan cig 'byung ngo / /blo gros yangs pa 'di lta ste dper na chu klung chen po 'bab pa la/ gal te rlabs gcig 'byung ba'i rkyen nye bar gnas par gyur na/ rlabs kyang gcig kho na 'byung ngo / /gal te rlabs gnyis sam/ gal te rab tu
 mang po dag 'byung ba'i rkyen nye bar gnas par gyur na/ rlabs kyang gnyis sam rab tu mang po dag 'byung zhing / chu'i klung de rang gi rgyun gyis rgyun 'chad par yang mi 'gyur la/ yongs su zad par yang mi 'gyur ro/ /me long gi dkyil 'khor shin tu yongs su dag pa la yang / gal te
 gzugs brnyan gcig 'byung ba'i rkyen nye bar gnas par gyur na/ gzugs brnyan yang gcig kho na 'byung ngo / /gal te gzugs brnyan gnyis sam/ gal te gzugs brnyan rab tu mang po dag 'byung ba'i rkyen nye bar gnas par gyur na/ gzugs brnyan yang gnyis sam rab tu
 mang po dag 'byung zhing / me long gi dkyil 'khor de gzugs brnyan gyi dngos por yongs su 'gyur ba yang ma yin na/ yongs su sbyor bar yang mi mngon no/ /blo gros yangs pa de bzhin du chu klung lta bu dang / me long lta bu'i len pa'i rnam par shes pa de la brten cing gnas nas/
 gal te mig gi rnam par shes pa gcig lan cig 'byung ba'i rkyen nye bar gnas par gyur na yang mig gi rnam par shes pa gcig kho na lan cig 'byung ngo / /gal te rnam par shes pa'i tshogs lnga char gyi bar dag lan cig 'byung ba'i rkyen nye bar gnas par gyur na yang rnam par shes pa'i tshogs
 lnga char lan cig 'byung ngo / /blo gros yangs pa de ltar byang chub sems dpa' chos kyi lugs shes pa la brten cing / chos kyi lugs shes pa la gnas nas/ sems dang yid dang rnam par shes pa'i gsang ba la mkhas pa yin yang / de bzhin gshegs pa ni byang chub sems dpa'
 sems dang / yid dang / rnam par shes pa'i gsang ba la mkhas par 'dogs na/ de tsam gyis thams cad kyi thams cad du mi 'dogs so/ /blo gros yangs pa gang gi phyir byang chub sems dpa' nang gi so so rang gi len pa mi mthong / /len pa'i rnam par shes pa yang mi mthong la/
 de yang yang dag pa ji lta ba bzhin du yin pa dang / kun gzhi yang mi mthong / kun gzhi'i rnam par shes pa yang mi mthong / bstsags pa yang mi mthong / sems kyang mi mthong / mig kyang mi mthong / gzugs kyang mi mthong / mig gi rnam par shes pa yang mi mthong / rna
 ba yang mi mthong / sgra yang mi mthong / rna ba'i rnam par shes pa yang mi mthong / sna yang mi mthong / dri yang mi mthong / sna'i rnam par shes pa yang mi mthong / lce yang mi mthong / ro yang mi mthong / lce'i rnam par shes pa yang mi mthong / lus kyang mi mthong / reg bya
 yang mi mthong / lus kyi rnam par shes pa yang mi mthong zhing / blo gros yangs pa gang gi phyir byang chub sems dpa' nang gi so so rang gi yid kyang mi mthong / chos rnams kyang mi mthong / yid kyi rnam par shes pa yang mi mthong la/ de yang yang dag pa ji lta ba bzhin du yin
 na/ de ni byang chub sems dpa' don dam pa la mkhas pa zhes bya ste/ de bzhin gshegs pa yang byang chub sems dpa' don dam pa la mkhas pa ni sems dang / yid dang / rnam par shes pa'i gsang ba la mkhas pa yin par 'dogs so/ /blo gros yangs pa de tsam gyis
 na byang chub sems dpa' sems dang / yid dang / rnam par shes pa'i gsang ba la mkhas pa yin la/ de bzhin gshegs pa byang chub sems dpa' sems dang / yid dang / rnam par shes pa'i gsang ba la mkhas par 'dogs na yang de tsam gyis 'dogs so/ /de nas
 bcom ldan 'das kyis de'i tshe tshigs su bcad pa 'di bka' stsal to/ /len pa'i rnam par shes pa zab cing phra/ /sa bon thams cad chu bo'i klung ltar 'bab/ /bdag tu rtog par gyur na mi rung zhes/ /byis pa rnams la ngas ni de ma bstan/ /zhes gsungs so/ /de la chos rnams
 kyi mtshan nyid ni/ dgongs pa nges par 'grel pa'i mdo las ji skad 'byung ba bzhin blta bar bya ste/ bcom ldan 'das la byang chub sems dpa' yon tan 'byung gnas kyis zhu ba zhus pa/ bcom ldan 'das byang chub sems dpa' chos rnams kyi mtshan nyid la mkhas pa/
 byang chub sems dpa' chos rnams kyi mtshan nyid la mkhas pa zhes bgyi na/ bcom ldan 'das ji tsam gyis na byang chub sems dpa' chos rnams kyi mtshan nyid la mkhas pa lags/ de bzhin gshegs pa byang chub sems dpa' chos rnams kyi mtshan nyid la
 mkhas par 'dogs na yang ji tsam gyis 'dogs lags/ de skad ces gsol pa dang / bcom ldan 'das kyis byang chub sems dpa' yon tan 'byung gnas la 'di skad ces bka' stsal to/ /yon tan 'byung gnas khyod de ltar skye bo mang po la phan pa dang / skye bo mang po la bde
 ba dang / 'jig rten la snying brtse ba dang / lha dang mir bcas pa'i skye dgu'i don dang / phan pa dang / bde ba'i phyir zhugs te/ de bzhin gshegs pa la khyod don 'di nyid 'dri bar sems pa ni legs so/ /legs so/ /yon tan 'byung gnas de'i phyir nyon cig dang / chos rnams
 kyi mtshan nyid la mkhas pa khyod la bshad par bya'o/ /yon tan 'byung gnas chos rnams kyi mtshan nyid ni gsum po 'di dag yin te/ gsum gang zhe na/ kun brtags pa'i mtshan nyid dang / gzhan gyi dbang gi mtshan nyid dang / yongs su grub pa'i mtshan nyid do/ /
 yon tan 'byung gnas de la chos rnams kyi kun brtags pa'i mtshan nyid gang zhe na/ ji tsam du rjes su tha snyad gdags pa'i phyir/ ming dang brdas chos rnams kyi ngo bo nyid dam bye brag tu ming dang brdar rnam par gzhag pa gang yin pa'o/ /yon tan 'byung gnas chos rnams kyi
 gzhan gyi dbang gi mtshan nyid gang zhe na/ chos rnams kyi rten cing 'brel par 'byung ba nyid de/ 'di lta ste/ 'di yod pas 'di 'byung la/ 'di skyes pa'i phyir 'di skye ba 'di lta ste/ ma rig pa'i rkyen gyis 'du byed rnams zhes bya ba nas de ltar na sdug bsngal gyi phung po chen po
 'ba' zhig 'di 'byung bar 'gyur ro zhes bya ba'i bar gang yin pa'o/ /yon tan 'byung gnas chos rnams kyi yongs su grub pa'i mtshan nyid gang zhe na/ chos rnams kyi de bzhin nyid gang yin pa ste/ byang chub sems dpa' rnams kyi brtun pa'i rgyu dang / legs par tshul bzhin yid la
 byas pa'i rgyus de rtogs shing / de rtogs pa goms par byas pa yang dag par grub pas kyang bla na med pa yang dag par rdzogs pa'i byang chub kyi bar du yang dag par 'grub pa gang yin pa'o/ /yon tan 'byung gnas 'di lta ste/ dper na skyes bu gang zag rab rib can gyi mig la rab
 rib kyi skyon chags pa de lta bur ni kun brtags pa'i mtshan nyid blta bar bya'o/ /yon tan 'byung gnas 'di lta ste/ dper na de nyid la rab rib kyi mtshan ma skra shad 'dzings pa'am/ sbrang ma'am/ til gyi 'bru'am/ sngon po'i mtshan ma'am/ ser po'i mtshan ma'am/ dmar
 po'i mtshan ma'am/ dkar po'i mtshan ma snang bar gyur pa de lta bur ni gzhan gyi dbang gi mtshan nyid blta bar bya'o/ /yon tan 'byung gnas 'di lta ste/ dper na skyes bu gang zag de nyid kyi mig yongs su dag cing mig la rab rib kyi skyon chags pa dang bral bar gyur pa na/ mig
 de nyid kyi rang bzhin gyi spyod yul ma nor ba'i spyod yul de lta bur ni yongs su grub pa'i mtshan nyid blta bar bya'o/ /yon tan 'byung gnas 'di lta ste dper na shel shin tu gsal ba ni gang gi tshe tshon sngon po dang phrad par gyur pa de'i tshe ni / nor bu rin po che an da rnyil dang / mthon ka chen po lta bur snang
 bar 'gyur zhing / nor bu rin po che an da rnyil dang / mthon ka chen por log par 'dzin pas kyang sems can rnams rnam par rmongs par byed do/ /gang gi tshe tshon dmar po dang phrad par gyur pa de'i tshe ni/ nor bu rin po che pad+ma rA ga lta bur snang bar 'gyur zhing / nor bu rin po che
 pad+ma rA gar log par 'dzin pas kyang sems can rnams rnam par rmongs par byed do/ /gang gi tshe tshon ljang gu dang phrad par gyur pa de'i tshe ni/ nor bu rin po che markaDa lta bur snang bar 'gyur zhing / nor bu rin chen po markaDa du log par 'dzin pas kyang sems can rnams rnam par rmongs
 par byed do/ /gang gi tshe tshon ser po dang phrad par gyur pa de'i tshe ni/ gser lta bur snang bar 'gyur zhing / gser du log par 'dzin pas kyang sems can rnams rnam par rmongs par byed do/ /yon tan 'byung gnas 'di lta ste dper na shel shin tu gsal ba tshon dang phrad pa de lta
 bur ni gzhan gyi dbang gi mtshan nyid la/ kun brtags pa'i mtshan nyid kyi tha snyad kyi bag chags blta bar bya'o/ /'di lta ste dper na shel shin tu gsal ba la nor bu rin po che an da rnyil dang / mthon ka chen po dang / pad+ma rA ga dang / marka ta dang /
 gser du log par 'dzin pa de lta bur ni gzhan gyi dbang gi mtshan nyid la/ kun brtags pa'i mtshan nyid du 'dzin par blta bar bya'o/ /yon tan 'byung gnas 'di lta ste dper na/ shel shin tu gsal ba nyid lta bur ni gzhan gyi dbang gi mtshan nyid blta bar bya'o/ /'di lta ste
 dper na/ shel shin tu gsal ba de nyid nor bu rin po che an da rnyil dang / mthon ka chen po dang / pad+ma rA ga dang / markata dang / gser gyi mtshan nyid der rtag pa rtag pa'i dus dang / ther zug ther zug gi dus yongs su ma grub cing / ngo bo nyid med pa de ltar bur ni gzhan
 gyi dbang gi mtshan nyid de/ kun brtags pa'i mtshan nyid der rtag pa rtag pa'i dus dang / ther zug ther zug gi dus su yongs su ma grub cing / ngo bo nyid med pa nyid kyis yongs su grub pa'i mtshan nyid blta bar bya'o/ /yon tan 'byung gnas de la ming dang 'brel ba'i mtshan ma la brten
 nas ni kun brtags pa'i mtshan nyid rab tu shes so/ /gzhan gyi dbang gi mtshan nyid la kun brtags pa'i mtshan nyid du mngon par zhen pa la brten nas ni gzhan gyi dbang gi mtshan nyid rab tu shes so/ /gzhan gyi dbang gi mtshan nyid la kun brtags pa'i mtshan nyid du mngon par zhen
 pa med pa la brten nas ni yongs su grub pa'i mtshan nyid rab tu shes so/ /yon tan 'byung gnas de la byang chub sems dpa' chos rnams kyi gzhan gyi dbang gi mtshan nyid la kun brtags pa'i mtshan nyid yang dag pa ji lta ba bzhin du rab tu shes na/ mtshan nyid med pa'i chos yang dag
 pa ji lta ba bzhin du rab tu shes so/ /yon tan 'byung gnas de la byang chub sems dpas gzhan gyi dbang gi mtshan nyid yang dag pa ji lta ba bzhin du rab tu shes na/ kun nas nyon mongs pa'i mtshan nyid kyi chos yang dag pa ji lta ba bzhin du rab tu shes so/ /yon tan 'byung gnas de la
 byang chub sems dpas yongs su grub pa'i mtshan nyid yang dag pa ji lta ba bzhin rab tu shes na/ rnam par byang ba'i mtshan nyid kyi chos yang dag pa ji lta ba bzhin rab tu shes so/ /yon tan 'byung gnas de la byang chub sems dpas gzhan gyi dbang gi mtshan nyid la mtshan nyid med pa'i chos
 yang dag pa ji lta ba bzhin du rab tu shes na/ kun nas nyon mongs pa'i mtshan nyid kyi chos rab tu spong ngo / /kun nas nyon mongs pa'i mtshan nyid kyi chos rab tu spangs na/ rnam par byang ba'i mtshan nyid kyi chos 'thob par 'gyur te/ yon tan 'byung gnas gang gi phyir byang chub sems dpa' de ltar na /
 chos rnams kyi kun brtags pa'i mtshan nyid dang / gzhan gyi dbang gi mtshan nyid dang / yongs su grub pa'i mtshan nyid yang dag pa ji lta ba bzhin du rab tu shes shing / mtshan nyid med pa dang / kun nas nyon mongs pa'i mtshan nyid dang / rnam par byang ba'i mtshan nyid yang
 dag pa ji lta ba bzhin du rab tu shes la/ mtshan nyid med pa'i chos yang dag pa ji lta ba bzhin rab tu shes nas/ kun nas nyon mongs pa'i mtshan nyid kyi chos rab tu spong zhing / kun nas nyon mongs pa'i mtshan nyid kyi chos rab tu spangs nas/ rnam par byang ba'i mtshan nyid
 kyi chos 'thob par 'gyur ba de tsam gyis na/ byang chub sems dpa' chos rnams kyi mtshan nyid la mkhas pa yin la/ de bzhin gshegs pa byang chub sems dpa' chos rnams kyi mtshan nyid la mkhas par 'dogs par mdzad pa na yang de tsam gyis 'dogs par mdzad do/ /
 de nas bcom ldan 'das kyis de'i tshe tshigs su bcad pa 'di dag bka' stsal to/ /mtshan nyid med pa'i chos ni rab shes na/ /kun nas nyon mongs pa mtshan nyid chos spong 'gyur/ /kun nas nyon mongs chos ni rab spangs na/ /shin tu rnam dag mtshan nyid chos 'thob 'gyur/ /
 skye bo bag med nyes rtsom le lo can/ /'du byed skyon la rtog par mi byed pa/ /brtan med g.yo ba med pa'i chos rnams la/ /rab tu nyams pas snying brtser byas pa yin/ /zhes gsungs pa'o/ /de la chos rnams kyi ngo bo nyid med pa'i mtshan nyid ni dgongs pa nges par 'grel ba'i
 mdo las ji skad 'byung ba bzhin blta bar bya ste/ bcom ldan 'das la byang chub sems dpa' don dam yang dag 'phags kyis 'di skad ces gsol to/ /bcom ldan 'das 'di na bdag gcig pu dben pa zhig na mchis pa'i tshe/ sems kyi yongs su
 rtog pa 'di lta bu skyes lags te/ bcom ldan 'das kyis rnam grangs du mar phung po rnams kyi rang gi mtshan nyid kyang bka' stsal/ skye ba'i mtshan nyid dang / 'jig pa'i mtshan nyid dang / spang ba dang / yongs su shes pa yang bka' stsal / phung po rnams kyi ji lta ba de
 bzhin du skye mched rnams dang / rten cing 'brel bar 'byung ba dang / zas rnams kyi yang bka' stsal/ bcom ldan 'das kyis rnam grangs du mar bden pa rnams kyi rang gi mtshan nyid kyang bka' stsal/ yongs su shes pa dang / spang ba dang / mngon du bgyi ba dang / bsgom
 pa yang bka' stsal/ bcom ldan 'das kyis rnam grangs du mar khams rnams kyi rang gi mtshan nyid kyang bka' stsal/ khams sna tshogs pa nyid dang / khams du ma ba nyid dang / spang ba dang / yongs su shes pa yang bka' stsal/ bcom ldan 'das kyis rnam grangs
 du mar dran pa nye bar gzhag pa rnams kyi rang gi mtshan nyid kyang bka' stsal/ mi mthun pa'i phyogs dang / gnyen po dang / ma skyes pa rnams skye ba dang / skyes pa rnams gnas pa dang / mi bskyed pa dang / slar zhing 'byung ba dang / 'phel zhing yangs pa nyid kyang bka'
 stsal/ dran pa nye bar gzhag pa rnams kyi ji lta ba bzhin du yang dag pa'i spong ba rnams dang / rdzu 'phrul gyi rkang pa rnams dang / dbang po rnams dang / stobs rnams dang / byang chub kyi yan lag rnams kyi yang bka' stsal/ bcom ldan 'das kyis rnam grangs du mar
 'phags pa'i lam yan lag brgyad pa'i rang gi mtshan nyid kyang bka' stsal/ mi mthun pa'i phyogs dang / gnyen po dang / bsgom pa dang / ma skyes pa rnams skye ba dang / skyes pa rnams gnas pa dang / mi bskyed pa dang / slar zhing 'byung ba dang / 'phel zhing yangs pa nyid
 kyang bka' stsal/ bcom ldan 'das kyis chos thams cad ngo bo nyid ma mchis pa/ chos thams cad ma skyes pa/ ma 'gags pa/ gzod ma nas zhi ba rang bzhin gyis yongs su mya ngan las 'das pa zhes kyang bka' stsal lags na/ bcom ldan 'das kyis ci las dgongs
 nas/ chos thams cad ngo bo nyid ma mchis pa/ chos thams cad ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das pa zhes bka' stsal snyam bgyid lags te/ bcom ldan 'das kyis ci las dgongs nas chos thams cad ngo bo
 nyid ma mchis pa/ chos thams cad ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das pa zhes bka' stsal ba'i don de nyid/ bcom ldan 'das la bdag yongs su zhu lags so/ /de skad ces gsol ba dang / bcom ldan
 'das kyis byang chub sems dpa' don dam yang dag 'phags la 'di skad ces bka' stsal to/ /don dam yang dag 'phags/ khyod kyi sems kyi yongs su rtog pa dge ba tshul bzhin skyes pa legs so/ /legs so/ /don dam yang dag 'phags khyod de ltar skye bo mang po la
 phan pa dang / skye bo mang po la bde ba dang / 'jig rten la snying brtse ba dang / lha dang mir bcas pa'i skye dgu'i don dang / phan pa dang bde ba'i phyir zhugs te/ de bzhin gshegs pa la khyod don 'di nyid 'dri bar sems pa ni yang khyod legs so/ /don dam yang dag
 'phags de'i phyir khyod nyon cig dang / ngas ci las dgongs nas chos thams cad ngo bo nyid med pa/ chos thams cad ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das pa zhes gsungs pa khyod la bshad par bya'o/ /don dam
 yang dag 'phags ngas chos rnams kyi ngo bo nyid med pa nyid rnam pa gsum po 'di lta ste/ mtshan nyid ngo bo nyid med pa nyid dang / skye ba ngo bo nyid med pa nyid dang / don dam pa ngo bo nyid med pa nyid las dgongs nas chos thams cad ngo bo nyid med pa'o zhes bstan to/ /don dam yang dag
 'phags de la chos rnams kyi mtshan nyid ngo bo nyid med pa nyid gang zhe na/ kun brtags pa'i mtshan nyid gang yin pa'o/ /de ci'i phyir zhe na/ 'di ltar de ni ming dang brdar rnam par gzhag pa'i mtshan nyid yin gyi rang gi mtshan nyid kyis rnam par gnas pa ni ma yin
 pas/ de'i phyir de ni mtshan nyid ngo bo nyid med pa nyid ces bya'o/ /don dam yang dag 'phags chos rnams kyi skye ba ngo bo nyid med pa nyid gang zhe na/ chos rnams kyi gzhan gyi dbang gi mtshan nyid gang yin pa'o/ /de ci'i phyir zhe na/ 'di ltar de ni rkyen gzhan gyi stobs kyis
 byung ba yin gyi bdag nyid kyis ni ma yin pas de'i phyir de ni skye ba ngo bo nyid med pa nyid ces bya'o/ /don dam yang dag 'phags chos rnams kyi don dam pa ngo bo nyid med pa nyid gang zhe na/ rten cing 'brel bar 'byung ba'i chos gang dag skye ba ngo bo nyid med pa nyid kyis ngo bo nyid med
 pa de dag ni don dam pa ngo bo nyid med pa nyid kyis ngo bo nyid med pa yang yin no/ /de ci'i phyir zhe na/ don dam pa yang dag 'phags chos rnams la rnam par dag pa'i dmigs pa gang yin pa de ni ngas don dam pa yin par yongs su bstan la/ gzhan gyi dbang gi mtshan nyid de ni
 rnam par dag pa'i dmigs pa ma yin pas/ de'i phyir don dam pa ngo bo nyid med pa nyid ces bya'o/ /don dam yang dag 'phags gzhan yang chos rnams kyi yongs su grub pa'i mtshan nyid gang yin pa de yang don dam pa ngo bo nyid med pa nyid ces bya'o/ /de ci'i phyir zhe na/ don
 dam yang dag 'phags chos rnams kyi chos bdag med pa gang yin pa de ni de dag gi ngo bo nyid med pa nyid ces bya ste/ de ni don dam pa yin la/ don dam pa ni chos thams cad kyi ngo bo nyid med pa nyid kyis rab tu phye ba yin pas/ de'i phyir don dam pa ngo bo nyid ces bya'o/ /
 don dam yang dag 'phags de la 'di lta ste/ dper na nam mkha'i me tog ji lta ba de lta bur ni mtshan nyid ngo bo nyid med pa nyid blta bar bya'o/ /don dam pa yang dag 'phags de la 'di lta ste/ dper na sgyu ma byas pa ji lta ba de lta bur ni skye ba ngo bo nyid med pa nyid kyang blta bar bya'o/ /don
 dam pa ngo bo nyid med pa nyid de las kyang gcig blta bar bya'o/ /don dam yang dag 'phags de la 'di lta ste dper na nam mkha' gzugs kyi ngo bo nyid med pa nyid tsam gyis rab tu phye ba dang / thams cad du song ba ji lta ba de lta bur ni don dam pa ngo bo nyid med pa nyid de las chos
 bdag med par rab tu phye ba dang / thams cad du song ba gcig blta bar bya ste/ don dam yang dag 'phags ngas ngo bo nyid med pa nyid rnam pa gsum po de dag las dgongs nas chos thams cad ngo bo nyid med pa'o zhes bstan to/ /don dam yang dag 'phags de la mtshan nyid ngo bo
 nyid med pa nyid las dgongs nas/ ngas chos thams cad ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das pa'o zhes bstan to/ /de ci'i phyir zhe na/ don dam yang dag 'phags 'di ltar rang gi mtshan nyid kyis med pa gang
 yin pa de ni ma skyes pa yin/ ma skyes pa gang yin pa de ni ma 'gags pa yin/ ma skyes pa dang ma 'gags pa gang yin pa de ni gzod ma nas zhi ba yin/ gzod ma nas zhi ba gang yin pa de ni rang bzhin gyis yongs su mya ngan las 'das pa yin/ rang bzhin gyis yongs su
 mya ngan las 'das pa gang yin pa de la ni yongs su mya ngan las 'da' bar bya ba cung zad kyang med do/ /de'i phyir mtshan nyid ngo bo nyid med pa nyid las dgongs nas/ ngas chos thams cad ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las
 'das pa'o zhes bstan to/ /don dam yang dag 'phags yang don dam pa ngo bo nyid med pa nyid chos bdag med pas rab tu phye ba las dgongs nas/ ngas chos thams cad ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das
 pa'o zhes bstan to/ /de ci'i phyir zhe na/ 'di ltar don dam pa ngo bo nyid med pa nyid chos bdag med pas rab tu phye ba ni rtag pa rtag pa'i dus dang / ther zug ther zug gi dus su rnam par gnas pa kho na yin la/ de ni chos rnams kyi chos nyid 'dus ma byas pa nyon mongs pa
 thams cad dang bral ba yin te/ rtag pa rtag pa'i dus dang / ther zug ther zug gi dus su chos nyid de nyid kyis rnam par gnas pa/ 'dus ma byas pa gang yin pa de ni 'dus ma byas pa'i phyir ma skyes pa dang / ma 'gags pa yin la/ de ni nyon mongs
 pa thams cad dang bral ba'i phyir/ gzod ma nas zhi ba dang / rang bzhin gyis yongs su mya ngan las 'das pa yin te/ de'i phyir don dam pa ngo bo nyid med pa nyid chos bdag med pas rab tu phye ba las dgongs nas/ ngas chos thams cad ma skyes pa/ ma 'gags pa/ gzod
 ma nas zhi ba/ rang bzhin gyis yongs su mya ngan las 'das pa'o zhes bstan to/ /don dam yang dag 'phags nga ni sems can gyi khams na sems can rnams kyi kun brtags pa'i ngo bo nyid ngo bo nyid kyis tha dad par mthong zhing / gzhan gyi dbang gi ngo bo nyid dang / yongs su
 grub pa'i ngo bo nyid kyang ngo bo nyid kyis tha dad par mthong ba de'i phyir ngo bo nyid med pa nyid rnam pa gsum mi 'dogs kyi/ sems can rnams gzhan gyi dbang dang / yongs su grub pa'i ngo bo nyid la/ kun brtags pa'i ngo bo nyid du sgro btags nas/ gzhan gyi dbang dang yongs su
 grub pa'i ngo bo nyid la/ kun brtags pa'i ngo bo nyid kyi mtshan nyid du rjes su tha snyad 'dogs te/ ji lta ji ltar rjes su tha snyad 'dogs pa de lta de ltar rjes su tha snyad btags pas yongs su bsgos pa'i sems tha snyad btags pa dang rjes su 'brel pa'am/ tha snyad btags pa bag
 la nyal gyis gzhan gyi dbang dang yongs su grub pa'i ngo bo nyid la/ kun brtags pa'i ngo bo nyid kyi mtshan nyid du mngon par zhen to/ /ji lta ji ltar mngon par zhen pa de lta de ltar gzhan gyi dbang gi ngo bo nyid la/ kun brtags pa'i ngo bo nyid du mngon par zhen pa'i rgyu de dang rkyen des
 phyi ma la gzhan gyi dbang gi ngo bo nyid kun tu skyed de/ gzhi des na nyon mongs pa'i kun nas nyon mongs pas kyang kun nas nyon mongs par 'gyur/ las kyi kun nas nyon mongs pa dang / skye ba'i kun nas nyon mongs pas kyang kun nas nyon mongs par 'gyur zhing / yun ring por
 yang na sems can dmyal ba rnams sam/ yang na dud 'gro rnams sam/ yang na yi dwags rnams sam/ yang na lha rnams sam/ yang na lha ma yin rnams sam/ yang na mi rnams kyi nang du kun tu rgyug cing 'khor bar 'gyur te/ 'khor ba las mi 'da' ba'i phyir ro/ /
 don dam yang dag 'phags de la sems can gang dag dang po nyid nas/ dge ba'i rtsa ba ma bskyed pa/ sgrib pa yongs su ma dag pa/ rgyud yongs su ma smin pa/ mos pa mi mang ba/ bsod nams dang ye shes kyi tshogs yang dag par ma grub pa de dag la ni skye ba ngo bo nyid
 med pa nyid las brtsams nas chos ston te/ /de dag gis chos de thos nas rten cing 'brel bar 'byung ba'i 'du byed rnams la mi rtag pa nyid du 'du shes shing / mi brtan pa nyid dang / yid brtan du mi rung ba nyid dang / 'gyur ba'i chos can nyid du shes nas/ 'du byed thams
 cad la yid dang bar byed do/ /skyo bar byed do/ /yid dang bar byas/ skyo bar byas nas sdig pa las phyir ldog ste/ de dag sdig pa gang yin pa de mi byed cing dge ba la rten par byed do/ /dge ba la brten pa'i rgyus dge ba'i rtsa ba ma bskyed pa rnams ni skyed do/ /sgrib pa yongs su ma
 byang ba rnams kyang yongs su sbyong ngo / /rgyud yongs su ma smin pa yang yongs su smin par byed do/ /gzhi des mos pa mang zhing bsod nams dang ye shes kyi tshogs yang dag par 'grub par 'gyur ro/ /de dag de ltar dge ba'i rtsa ba skyed pa nas/ bsod nams dang ye shes kyi
 tshogs kyi bar du yang dag par 'grub mod kyi/ 'on kyang skye ba ngo bo nyid med pa de la mtshan nyid ngo bo nyid med pa nyid dang / don dam pa ngo bo nyid med pa nyid rnam pa gnyis yang dag pa ji lta ba bzhin du mi shes pas/ 'du byed thams cad la yang dag par skyo bar mi 'gyur/ yang
 dag par 'dod chags dang bral bar mi 'gyur/ yang dag par rnam par grol bar mi 'gyur zhing / nyon mongs pa'i kun nas nyon mongs pa las kyang yongs su grol bar mi 'gyur/ las kyi kun nas nyon mongs pa las kyang yongs su grol bar mi 'gyur/ skye ba'i kun nas
 nyon mongs pa las kyang yongs su grol bar mi 'gyur bas/ de bzhin gshegs pa yang de dag la 'di lta ste/ mtshan nyid ngo bo nyid med pa nyid dang / don dam pa ngo bo nyid med pa nyid las brtsams nas/ 'di ltar 'du byed thams cad las yang dag par
 skyo bar bya ba dang / 'dod chags dang bral bar bya ba dang / rnam par grol bar bya ba dang / nyon mongs pa'i kun nas nyon mongs pa las yang dag par bzla ba dang / las kyi kun nas nyon mongs pa las yang dag par bzla ba dang / skye ba'i kun nas nyon mongs pa las yang dag
 par bzla ba'i phyir chos ston to/ /de dag gis chos de thos nas gzhan gyi dbang gi ngo bo nyid la kun brtags pa'i ngo bo nyid kyi mtshan nyid du mngon par zhen pa med pas/ skye ba ngo bo nyid med pa nyid de la mtshan nyid ngo bo nyid med pa nyid dang / don dam pa ngo bo nyid med pa nyid du mos par
 byed/ rab tu rnam par 'byed par byed/ ji lta ba bzhin du rtogs par byed cing / 'di lta ste/ tha snyad btags pas yongs su ma bsgos pa'i shes pa tha snyad btags pa dang rjes su 'brel pa med cing / tha snyad btags pa bag la nyal ba med pa'i shes pas gzhan gyi
 dbang gi mtshan nyid de tshe 'di la shes pa'i stobs skyed pa dang / phyi ma la rgyu yang dag par chad pas 'gog par byed de/ gzhi des 'du byed thams cad la yang dag par skyo ba dang / yang dag par 'dod chags thams cad dang bral ba dang / yang dag par rnam par grol bar 'gyur
 zhing / nyon mongs pa'i kun nas nyon mongs pa dang / las kyi kun nas nyon mongs pa dang / skye ba'i kun nas nyon mongs pa las kyang yongs su grol bar 'gyur ro/ /don dam yang dag 'phags de la sems can nyan thos kyi theg pa'i rigs can rnams kyis kyang lam 'di
 nyid dang / bsgrub pa 'di nyid kyis grub pa dang / bde ba bla na med pa'i mya ngan las 'das pa 'thob par 'gyur la/ sems can rang sangs rgyas kyi theg pa'i rigs can rnams dang / de bzhin gshegs pa'i rigs can rnams kyis kyang lam 'di nyid dang / bsgrub pa 'di nyid
 kyis grub pa dang bde ba bla na med pa'i mya ngan las 'das pa thob par 'gyur bas/ 'di ni nyan thos dang / rang sangs rgyas dang / byang chub sems dpa' rnams kyi rnam par dag pa'i lam gcig pa yin la/ rnam par dag pa yang gcig ste/ gnyis pa gang yang med pas/ ngas
 de las dgongs nas theg pa gcig tu bstan te/ sems can gyi khams na sems can rang bzhin gyis dbang po rtul ba rnams dang / dbang po 'bring rnams dang / dbang po rnon po rnams kyi rigs sna tshogs dag kyang med pa ni ma yin no/ /don dam yang dag 'phags nyan
 thos kyi rigs kyi gang zag zhi ba'i bgrod pa gcig pu pa ni sangs rgyas thams cad brtson pa dang ldan par gyur kyang / byang chub kyi snying po la zhugs te bla na med pa yang dag par rdzogs pa'i byang chub thob par byar mi nus so/ /de ci'i phyir zhe na/ 'di ltar de ni snying rje shin tu chung ba
 dang / sdug bsngal gyis shin tu 'jigs pa'i phyir rang bzhin gyis rigs dman pa kho na yin pa'i phyir ro/ /de ji lta ji ltar snying rje shin tu chung ba de bzhin du sems can gyi don bya ba la shin tu mi phyogs par 'gyur ro/ /ji ltar sdug bsngal gyis shin tu 'jigs pa de bzhin du 'du
 byed mngon par 'du bya ba thams cad la shin tu mi phyogs par 'gyur ro/ /sems can gyi don bya ba la shin tu mi phyogs pa dang / 'du byed mngon par 'du bya ba thams cad la shin tu mi phyogs pa ni bla na med pa yang dag par rdzogs pa'i byang chub tu ngas ma bstan te/ de'i phyir zhi ba'i
 bgrod pa gcig pu pa zhes bya'o/ /nyan thos byang chub tu yongs su 'gyur ba de gang yin pa de ni ngas rnam grangs kyis byang chub sems dpa' yin par bstan te/ 'di ltar de ni nyon mongs pa'i sgrib pa las rnam par grol nas/ de bzhin gshegs pa rnams kyis bskul na shes
 bya'i sgrib pa las sems rnam par grol bar byed pa'i phyir ro/ /de ni dang por bdag gi don la sbyor ba'i rnam pas nyon mongs pa'i sgrib pa las rnam par grol te/ de'i phyir de bzhin gshegs pas nyan thos kyi rigs su 'dogs so/ /don dam yang dag 'phags 'di ltar nga'i
 chos 'dul ba legs par gsungs pa shin tu gya nom pa/ bsam pa shin tu rnam par dag pa ston pa/ chos legs par bstan pa la ni sems can rnams kyi mos pa'i rim pa yang snang ste/ don dam yang dag 'phags 'di la de bzhin gshegs pa ni ngo bo nyid med pa nyid
 rnam pa gsum po de dag nyid las dgongs nas drang ba'i don gyi mdo brjod pa'i rnam pa 'di lta ste/ chos thams cad ngo bo nyid med pa/ chos thams cad ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das pa'o zhes chos ston to/ /de
 la sems can gang dag dge ba'i rtsa ba chen po bskyed pa/ sgrib pa yongs su dag pa/ rgyud yongs su smin pa/ mos pa mang ba/ bsod nams dang ye shes kyi tshogs chen po yang dag par grub pa de dag gis ni chos de thos na/ nga'i dgongs te bshad pa yang dag pa ji lta ba
 bzhin du rab tu shes shing / chos de la yang mos par 'gyur la/ don de yang shes rab kyis yang dag pa ji lta ba bzhin du rtogs par 'gyur zhing de rtogs pa goms pas kyang myur ba myur ba kho nar shin tu mthar thug pa de nyid rjes su 'thob par 'gyur te/ nga la yang a la la
 bcom ldan 'das de ni yang dag par rdzogs pa'i sangs rgyas yin te/ des ni chos thams cad legs par mngon par rdzogs par sangs rgyas so zhes dad pa 'thob par 'gyur ro/ /de la sems can gang dag dge ba'i rtsa ba bskyed pa dang / sgrib pa yongs su dag pa dang / rgyud
 yongs su smin pa dang / mos pa chen po ma yin pa/ bsod nams dang ye shes kyi tshogs chen po yang dag par ma grub pa/ drang po drang po'i rang bzhin can/ rtog pa sel mi nus pa/ rang gi lta ba mchog tu 'dzin par mi gnas pa de dag gis ni chos de thos na ngas dgongs te
 bshad pa yang dag pa ji lta ba bzhin du rab tu mi shes mod kyi/ 'on kyang chos de la mos par byed cing dad pa yang 'thob ste/ mdo sde 'di dag ni de bzhin gshegs pas gsungs pa/ zab pa/ zab par snang ba stong pa nyid dang ldan pa/ mthong bar dka' ba/ rtogs par dka'
 ba/ brtag mi nus pa/ rtog ge pa'i spyod pa ma yin pa/ zhib mo brtags pa mkhas pa/ mdzangs pas rig pa yin no zhes mos par byed do/ /mdo sde de dag gi don bstan pa dag la bdag mi shes so snyam nas 'dug ste/ 'di skad ces sangs rgyas kyi byang chub ni zab/ chos
 rnams kyi chos nyid kyang zab ste/ de bzhin gshegs pa nyid kyis mkhyen gyi/ bdag cag gis ni je mi shes so/ /de bzhin gshegs pa rnams kyis chos bstan pa ni sems can rnams la mos pa sna tshogs kyis 'jug pa yin te/ de bzhin gshegs pa rnams ni mkhyen pa dang /
 gzigs pa mtha' yas pa yin/ bdag cag gis shes pa dang mthong ba ni ba lang gi rjes tsam mo snyam nas/ de dag mdo sde de rnams la gus par byas te/ yi ger 'dri ba yang byed/ yi ger bris nas 'chang bar yang byed/ klog par yang byed/ yang dag par 'gyed par yang
 byed/ mchod par yang byed/ lung nod par yang byed/ 'don par yang byed/ kha ton du yang byed mod kyi/ 'di ltar nga'i dgongs te bshad pa zab mo 'di ma rtogs pa'i phyir bsgom pa'i rnam par sbyor bar mi nus so/ /de dag gzhi des na bsod nams kyi tshogs kyis kyang 'phel
 bar 'gyur/ ye shes kyi tshogs kyis kyang 'phel bar 'gyur la/ gang du yang rgyud yongs su ma smin pa dag kyang smin par byed do/ /ji ste sems can de dag las sems can gang dag bsod nams dang ye shes kyi tshogs chen po'i bar du yang dag par grub pa ma yin la/ drang
 po drang po'i rang bzhin can ni ma yin mod kyi/ 'on kyang rtog pa sel nus pa / rang gi lta ba mchog tu 'dzin par gnas pa de dag gis ni chos de thos na/ nga'i dgongs te bshad pa zab mo yang dag pa ji lta ba bzhin du rab tu mi shes te/ chos de la mos kyang chos 'di dag thams cad ni ngo
 bo nyid med pa kho na yin no/ /chos 'di dag thams cad ni ma skyes pa kho na'o/ /ma 'gags pa kho na'o/ /gzod ma nas zhi ba kho na'o/ / rang bzhin gyis yongs su mya ngan las 'das pa kho na'o zhes chos kyi don la sgra ji bzhin kho nar mngon par zhen par byed de/ de dag gzhi des
 na chos thams cad la med par lta ba dang mtshan nyid med par lta ba 'thob par 'gyur te/ med par lta ba dang / mtshan nyid med par lta ba thob nas kyang thams cad la mtshan nyid thams cad kyis skur ba 'debs te/ chos rnams kyi kun brtags pa'i mtshan nyid la
 yang skur pa 'debs/ chos rnams kyi gzhan gyi dbang gi mtshan nyid dang / yongs su grub pa'i mtshan nyid la yang skur ba 'debs so/ /de ci'i phyir zhe na/ don dam yang dag 'phags 'di ltar gzhan gyi dbang gi mtshan nyid dang yongs su grub pa'i mtshan nyid yod na ni kun brtags
 pa'i mtshan nyid kyang rab tu shes par 'gyur na/ de la gang dag gzhan gyi dbang gi mtshan nyid dang / yongs su grub pa'i mtshan nyid la mtshan nyid med par mthong ba de dag gis ni kun brtags pa'i mtshan nyid la yang skur pa btab pa yin pa'i phyir te/ de lta bas na de dag ni mtshan
 nyid rnam pa gsum char la yang skur pa 'debs pa zhes bya'o/ /de dag ni nga'i chos chos la chos su 'du shes pa dang / don ma yin pa la don du 'du shes pa yin te/ nga'i chos la chos su 'du shes pa dang / don ma yin pa la don du 'du shes pa de dag chos la yang chos su 'dzin/
 don ma yin pa la don du 'dzin to/ /de dag chos la mos pas dge ba'i chos rnams kyis 'phel mod kyi/ 'on kyang don dam pa ma yin pa la mngon par zhen pas shes rab las yongs su nyams pa yin te/ shes rab las yongs su nyams na/ dge ba'i chos shin tu rgya che ba
 dang / shin tu dpag tu med pa rnams las kyang yongs su nyams par 'gyur ro/ /gzhan dag de dag las chos la chos su dang / don ma yin pa la don du thos nas/ gang dag lta ba la dga' bar byed pa de dag ni chos la chos su 'du shes pa dang / don ma yin pa la don du 'du shes
 pas/ chos la chos su shes pa dang / don ma yin pa don du mngon par zhen par 'gyur te/ de dag kyang gzhi des na de bzhin du dge ba'i chos las yongs su nyams par rig par bya'o/ /gang dag lta ba'i rjes su dga' bar mi byed pa de dag las chos rnams kyi ngo bo nyid med pa nyid thos
 shing / chos rnams kyi skye ba med pa dang / 'gags pa med pa dang / gzod ma nas zhi ba dang / rang bzhin gyis yongs su mya ngan las 'das pa thos nas skrag cing dngang la/ kun tu dngang bar 'gyur zhing / 'di skad ces 'di ni sangs rgyas bcom ldan 'das kyi bka' ma yin gyi/
 'di ni bdud kyis smras pa yin no zhes kyang zer zhing / de ltar rig nas mdo sde de dag la skur ba 'debs par byed/ spong bar byed/ mi bsngags pa rjod par byed/ ngan du rjod par byed de/ gzhi des na phongs pa chen po thob par 'gyur zhing / las kyi sgrib pa chen pos kyang reg
 par 'gyur ro/ /gzhi des kyang gang dag skye bo phal po che la las kyi sgrib pa chen po 'thob pas slu bar byed pa/ mtshan nyid thams cad med par lta zhing don ma yin pa don du ston par byed pa de dag ni las kyi sgrib pa rgya chen po dang ldan par nga smra'o/ /don dam yang dag 'phags de la sems
 can gang dag dge ba'i rtsa ba ma bskyed / sgrib pa yongs su ma dag /rgyud yongs su ma smin/ mos pa mi mang / bsod nams dang ye shes kyi tshogs yang dag par ma grub cing drang po ma yin la drang po'i rang bzhin can ma yin yang / rtog pa sel nus la/ rang gi lta ba mchog tu
 'dzin par gnas pa de dag gis ni chos de thos na/ nga'i dgongs te bshad pa yang / yang dag pa ji lta ba bzhin rab tu mi shes shing / chos de la mos par yang mi 'gyur la/ de dag chos la chos ma yin par 'du shes shing / don la don ma yin par 'du shes la/ chos
 la yang chos ma yin pa dang / don la yang don ma yin par mngon par zhen nas/ 'di skad ces 'di ni sangs rgyas kyi bka' ma yin gyi/ 'di ni bdud kyis smras pa yin no zhes kyang zer zhing / de ltar rig nas mdo sde de dag la skur ba 'debs par byed/ spong bar byed/
 mi bsngags brjod par byed/ ngan du rjod par byed cing lhad kyang 'jug par byed de/ rnam grangs du mar mdo sde de dag spang ba dang / chud gzan pa dang / rnam par gzhig pa'i phyir zhugs shing / de la mos pa'i gang zag rnams la yang dgrar 'du shes par 'gyur ro/ /de dag ni
 dang po nyid nas kyang las kyi sgrib pa bsgribs pa yin la/ gzhi des kyang las kyi sgrib pa de lta bus sgrib par byed de/ las kyi sgrib pa de'i dang po ni gdags par sla'i bskal pa bye ba khrag khrig 'bum phrag 'di snyed kyi bar gyis 'byung bar 'gyur ro zhes
 gdags par dka'o/ /don dam yang dag 'phags de ltar na nga'i chos 'dul ba legs par gsungs pa/ shin tu gya nom pa/ bsam pa shin tu rnam par dag pa ston pa/ chos legs par bstan pa la/ sems can rnams kyi mos pa'i rim pa de lta bu dag kyang snang ngo / /
 de nas bcom ldan 'das kyis de'i tshe tshigs su bcad pa 'di dag bka' stsal to/ /chos rnams ngo bo nyid med chos rnams ma skyes dang / chos rnams ma 'gags chos rnams gzod nas zhi ba dang / /chos rnams thams cad rang bzhin mya ngan 'das par ni/ /dgongs pa med
 par mkhas pa su zhig smra bar byed/ /mtshan nyid ngo bo nyid med skye ba ngo bo med/ /don dam ngo bo nyid med do zhes ngas bshad do/ /'di la mkhas pa gang zhig dgongs pa shes pa ni/ /rab tu nyams par 'gyur ba'i lam du de mi 'gro/ /kun gyi rnam dag lam ni gcig pu 'di
 yin te/ /rnam par dag pa'ang gcig ste gnyis pa gang yang med/ /de phyir theg pa gcig pa 'di ni 'dogs byed kyang / /sems can rigs ni rnam pa sna tshogs med ma yin/ /sems can khams 'di na ni gang dag bdag gcig pu/ /mya ngan 'da' bar byed pa'i sems can
 dpag tu med/ /gang dag mya ngan 'das kyang sems can mi gtong ba'i/ /bstan pa snying rje ldan pa de dag shin tu dkon/ /gang grol de dag rnams kyi zag pa med pa'i dbyings/ /phra zhing bsam gyis mi khyab mnyam zhing bye brag med/ /thams cad don grub sdug bsngal nyon mongs spangs
 pa ste/ /gnyis su brjod pa ma yin bde zhing brtan pa yin/ /de nas de'i tshe bcom ldan 'das la/ byang chub sems dpa' don dam yang dag 'phags kyis 'di skad ces gsol to/ /bcom ldan 'das ji tsam du sangs rgyas bcom ldan 'das rnams kyis dgongs te gsungs pa/
 phra ba/ mchog tu phra ba/ zab pa/ mchog tu zab pa/ rtogs par dka' ba/ mchog tu rtogs par dka' ba ni ngo mtshar rmad du byung ba lags so/ /bcom ldan 'das bcom ldan 'das kyis bka' stsal pa'i don bdag gis 'di ltar 'tshal te/ rnam par rtog pa'i spyod yul
 kun brtags pa'i mtshan nyid kyi gnas/ 'du byed kyi mtshan ma la/ gzugs kyi phung po zhes ngo bo nyid kyi mtshan nyid dam/ bye brag gi mtshan nyid du ming dang brdar rnam par gzhag pa dang gzugs kyi phung po skye'o zhe'am/ 'gag go zhe'am/ gzugs kyi phung po spang ba dang /
 yongs su shes pa zhes ngo bo nyid kyi mtshan nyid dam/ bye brag gi mtshan nyid kyi gnas 'du byed kyi mtshan ma gang lags pa de ni kun brtags pa'i mtshan nyid lags te/ de la brten nas bcom ldan 'das chos rnams kyi mtshan nyid ngo bo nyid ma mchis pa nyid 'dogs par mdzad lags
 so/ /rnam par rtog pa'i spyod yul kun brtags pa'i mtshan nyid kyi gnas/ 'du byed kyi mtshan ma gang lags pa de ni gzhan gyi dbang gi mtshan nyid lags so/ /de la brten nas bcom ldan 'das chos rnams kyi skye ba ngo bo de ma mchis pa nyid dang / de las cig shos don dam pa ngo bo
 nyid ma mchis pa nyid kyang 'dogs par mdzad lags so/ /bcom ldan 'das kyis bka' stsal pa'i don bdag gis 'di ltar 'tshal te/ rnam par rtog pa'i spyod yul kun brtags pa'i mtshan nyid kyi gnas/ 'du byed kyi mtshan ma de nyid kun brtags pa'i mtshan nyid der yongs su
 ma grub cing ngo bo nyid de kho nas ngo bo nyid ma mchis pa nyid chos la bdag ma mchis pa/ de bzhin nyid rnam par dag pa'i dmigs pa gang lags pa de ni yongs su grub pa'i mtshan nyid lags te/ de la brten nas bcom ldan 'das kyis/ de las cig shos don dam pa ngo bo nyid ma
 mchis pa nyid las gcig 'dogs par mdzad lags so/ /gzugs kyi phung po ji lta ba bzhin du/ phung po lhag ma rnams la yang de bzhin du sbyar bar bgyi lags so/ /phung po rnams la ji lta ba bzhin du skye mched bcu gnyis po dag gi skye mched re re la yang de bzhin du lags
 so/ /srid pa'i yan lag bcu gnyis po dag gi srid pa'i yan lag re re la yang de bzhin lags so/ /zas bzhi po dag gi zas re re la yang de bzhin lags so/ /khams drug po dang / khams bco brgyad po dag gi khams re re la yang de bzhin lags
 so/ /bcom ldan 'das bcom ldan 'das kyis bka' stsal pa'i don bdag gis 'di ltar 'tshal te/ rnam par rtog pa'i spyod yul kun brtags pa'i mtshan nyid kyi gnas/ 'du byed kyi mtshan ma la sdug bsngal gyi bden pa dang / sdug bsngal gyi bden pa yongs su shes pa
 zhes ngo bo nyid kyi mtshan nyid dam/ bye brag gi mtshan nyid du ming dang brdar rnam par gzhag pa gang lags pa de ni kun brtags pa'i mtshan nyid lags te/ de la brten nas bcom ldan 'das chos rnams kyi mtshan nyid ngo bo nyid ma mchis pa nyid 'dogs par mdzad lags so/ /
 rnam par rtog pa'i spyod yul kun brtags pa'i mtshan nyid kyi gnas/ 'du byed kyi mtshan ma gang lags pa de ni gzhan gyi dbang gi mtshan nyid lags te/ de la brten nas bcom ldan 'das chos rnams kyi skye ba ngo bo nyid ma mchis pa nyid dang / de las gcig shos don dam
 pa ngo bo nyid ma mchis pa nyid kyang 'dogs par mdzad lags so/ /bcom ldan 'das bcom ldan 'das kyis bka' stsal pa'i don 'di ltar bdag gis 'tshal te/ rnam par rtog pa'i spyod yul kun brtags pa'i mtshan nyid kyi gnas/ 'du byed kyi mtshan ma de nyid kun
 brtags pa'i mtshan nyid der yongs su ma grub cing / ngo bo nyid de kho nas ngo bo nyid ma mchis pa nyid chos la bdag ma mchis pa de bzhin nyid rnam par dag pa'i dmigs pa gang lags pa de ni yongs su grub pa'i mtshan nyid lags te/ de la brten nas bcom ldan 'das de las cig
 shos chos rnams kyi don dam pa ngo bo nyid ma mchis pa nyid 'dogs par mdzad lags so/ /sdug bsngal 'phags pa'i bden pa la ji lta ba bzhin du bden pa lhag ma rnams la yang de bzhin du sbyar bar bgyi lags so/ /bden pa rnams la ji lta ba de bzhin du dran pa nye bar gzhag pa
 rnams dang / yang dag pa'i spong ba rnams dang / rdzu 'phrul gyi rkang pa rnams dang / dbang po rnams dang / stobs rnams dang / byang chub kyi yan lag rnams dang / lam gyi yan lag rnams kyi yan lag re re la yang de bzhin du sbyar bar bgyi lags so/ /bcom ldan 'das
 bcom ldan 'das kyis bka' stsal pa'i don bdag gis 'di ltar 'tshal lags te/ rnam par rtog pa'i spyod yul kun brtags pa'i mtshan nyid kyi gnas/ 'du byed kyi mtshan ma la yang dag pa'i ting nge 'dzin zhe'am/ ting nge 'dzin gyi mi mthun pa'i phyogs dang gnyen po zhe'am/
 ting nge 'dzin bsgom pa zhe'am/ ma skyes pa skye ba zhe'am/ skyes pa gnas pa dang / mi bskyud pa dang / slar zhing 'byung ba dang / 'phel zhing rgyas pa nyid ces ngo bo nyid kyi mtshan nyid dam/ bye brag gi mtshan nyid du ming dang brdar rnam par gzhag pa gang lags pa de ni kun brtags
 pa'i mtshan nyid lags te/ de la brten nas bcom ldan 'das chos rnams kyi mtshan nyid ngo bo nyid ma mchis pa nyid 'dogs par mdzad lags so/ /rnam par rtog pa'i spyod yul kun brtags pa'i mtshan nyid kyi gnas/ 'du byed kyi mtshan ma gang lags pa de ni gzhan gyi dbang gi mtshan
 nyid lags te/ de la brten nas bcom ldan 'das chos rnams kyi skye ba ngo bo nyid ma mchis pa nyid dang / de las cig shos don dam pa ngo bo nyid ma mchis pa nyid kyang 'dogs par mdzad lags so/ /bcom ldan 'das bcom ldan 'das kyis bka' stsal pa'i don bdag gis
 'di ltar 'tshal te/ rnam par rtog pa'i spyod yul kun brtags pa'i mtshan nyid kyi gnas/ 'du byed kyi mtshan ma de nyid kun brtags pa'i mtshan nyid der yongs su ma grub cing / ngo bo nyid de kho nas ngo bo nyid ma mchis pa nyid chos la bdag ma mchis pa/ de bzhin nyid rnam
 par dag pa'i dmigs pa gang lags pa de ni yongs su grub pa'i mtshan nyid lags te/ de la brten nas bcom ldan 'das de las cig shos chos rnams kyi don dam pa ngo bo nyid ma mchis pa nyid 'dogs par mdzad lags so/ /bcom ldan 'das 'di lta ste dper bgyi na/ bca'
 sga'i phye ma'i sman sbyar ba dang / bcud kyis len sbyar ba thams cad du bstsal bar bgyi ba lags so/ /de bzhin du bcom ldan 'das kyis chos rnams kyi ngo bo nyid ma mchis pa nyid las brtsams te/ skye ba ma mchis pa dang / 'gag pa ma mchis pa
 dang / gzod ma nas zhi ba dang / rang bzhin gyis yongs su mya ngan las 'das pa nyid las brtsams nas/ bcom ldan 'das kyis nges pa'i don bstan pa 'di yang drang ba'i don gyi mdo sde thams cad du bstsal bar bgyi ba lags so/ /bcom ldan 'das 'di lta ste dper bgyi
 na ri mo bri ba'i gzhi ni sngon po'am/ ser po'am/ dkar po'am/ dmar po'am/ ri mor bgyi ba thams cad la ro gcig pa lags shing / ri mo bris pa de yang shin tu gsal bar bgyid pa lags so/ /de bzhin du chos rnams kyi ngo bo nyid ma mchis pa nyid dang / rang bzhin gyis
 yongs su mya ngan las 'das pa nyid kyi bar las brtsams nas/ bcom ldan 'das kyis nges pa'i don bstan pa 'di ni drang ba'i don gyi mdo sde thams cad la ro gcig pa dang / drang ba'i don de dag shin tu gsal bar bgyid pa lags so/ /bcom ldan 'das 'di lta ste dper bgyi na
 chab mar ni snod du bsgral ba dang / sha g.yos pa dang / bag chos kyi rnam pa sna tshogs la/ chab mar bstsal na shin tu 'da' bar 'gyur lags so/ /de bzhin du chos rnams kyi ngo bo nyid ma mchis pa nyid dang / rang bzhin gyis yongs su mya ngan las 'das pa nyid kyi bar las
 brtsams nas/ bcom ldan 'das kyis nges pa'i don bstan pa 'di ni drang ba'i don gyi mdo sde thams cad du bstsal na/ dga' ba dang mchog tu dga' ba chen por 'gyur lags so/ /bcom ldan 'das 'di lta ste dper bgyi na nam mkha' ni thams cad la ro gcig pa dang / bstsal ba
 thams cad la sgrib par mi 'gyur lags so/ /de bzhin du chos rnams kyi ngo bo nyid ma mchis pa nyid dang / rang bzhin gyis yongs su mya ngan las 'das pa nyid kyi bar las brtsams nas/ bcom ldan 'das kyis nges pa'i don bstan pa 'di ni drang ba'i don gyi mdo sde thams cad la ro
 gcig pa dang / nyan thos kyi theg pa dang / rang sangs rgyas kyi theg pa dang / theg pa chen po las bstsal ba thams cad la bsgrib par mi 'gyur ba lags so/ /de skad ces gsol pa dang / bcom ldan 'das kyis byang chub sems dpa' don dam yang dag 'phags la
 legs so zhes bya ba byin te/ don dam yang dag 'phags legs so legs so/ /don dam yang dag 'phags khyod kyis de bzhin gshegs pa'i dgongs te bshad pa shes te/ don de la 'di lta ste bca' sga dang / ri mo bri ba'i gzhi dang / mar gyis gdab pa dang / nam
 mkha'i dpe legs par byas pa de ni/ don dam yang dag 'phags de de bzhin te/ gzhan du ma yin gyi de ni de bzhin du zung shig /de nas bcom ldan 'das la byang chub sems dpa' don dam yang dag 'phags kyis 'di skad ces gsol to/ /bcom ldan 'das kyis dang por
 yul wA rA Na sI drang srong smra ba ri dwags kyi nags su nyan thos kyi theg pa la yang dag par zhugs pa rnams la/ 'phags pa'i bden pa bzhi rnam par bstan pas chos kyi 'khor lo ngo mtshar rmad du byung ba/ sngon lhar gyur pa'am/ mir gyur pa sus kyang chos dang mthun par
 'jig rten du ma bskor ba cig rab tu bskor te/ bcom ldan 'das kyis chos kyi 'khor lo bskor ba de yang bla na mchis pa/ skabs mchis pa/ drang ba'i don rtsod pa'i gzhi'i gnas su gyur pa lags la/ bcom ldan 'das kyis chos rnams kyi ngo bo nyid ma mchis pa nyid las
 brtsams te/ skye ba ma mchis pa dang / 'gag pa ma mchis pa dang / gzod ma nas zhi ba dang / rang bzhin gyis yongs su mya ngan las 'das pa nyid las brtsams nas/ theg pa chen po la yang dag par zhugs pa rnams la/ stong pa nyid smos pa'i rnam pas ches ngo mtshar
 rmad du byung ba'i chos kyi 'khor lo gnyis pa bskor te/ bcom ldan 'das kyis chos kyi 'khor lo bskor ba de yang bla na mchis pa/ skabs mchis pa/ drang ba'i don rtsod pa'i gzhi'i gnas su gyur pa lags kyi/ bcom ldan 'das kyis chos rnams kyi ngo bo nyid ma mchis
 pa nyid las brtsams te/ skye ba ma mchis pa nyid dang / 'gag pa ma mchis pa nyid dang / gzod ma nas zhi ba dang / rang bzhin gyis yongs su mya ngan las 'das pa nyid las brtsams nas/ theg pa thams cad la yang dag par zhugs pa rnams la/
 legs par rnam par phye ba dang ldan pa ngo mtshar rmad du byung ba'i chos kyi 'khor lo gsum pa bskor te/ bcom ldan 'das kyis chos kyi 'khor lo bskor ba 'di ni bla na ma mchis pa/ skabs ma mchis pa/ nges pa'i don lags te/ rtsod pa'i gzhi'i gnas su gyur pa ma lags
 so/ /bcom ldan 'das chos rnams kyi ngo bo nyid ma mchis pa nyid las brtsams/ rang bzhin gyis yongs su mya ngan las 'das pa nyid kyi bar las brtsams nas/ bcom ldan 'das kyis nges pa'i don bstan pa 'di rigs kyi bu'am/ rigs kyi bu mo gang gis thos nas
 mos par bgyid pa dang / yi ger 'drir stsol ba dang / yi ger bris nas kyang 'chang ba dang / klog pa dang / mchod pa dang / yang dag par 'ged pa dang / lung nod pa dang / kha ton bgyid pa dang / sems pa dang / sgom pa'i rnam pas sbyor bar bgyid pa de bsod nams
 ji tsam zhig bskyed par 'gyur lags/ de skad ces gsol ba dang / bcom ldan 'das kyis byang chub sems dpa' don dam yang dag 'phags la 'di skad ces bka' stsal to/ /don dam yang dag 'phags rigs kyi bu'am/ rigs kyi bu mo de ni bsod nams dpag tu
 med/ grangs med pa bskyed de/ de'i dpe bya bar sla ba ma yin mod kyi/ 'on kyang mdor bsdus te khyod la bshad par bya'o/ /don dam yang dag 'phags 'di lta ste dper na/ sen mo'i rtse mo la gnas pa'i sa'i rdul gang dag yin pa de dag ni sa la gnas pa'i sa'i rdul rnams
 dang bsgrun na/ brgya'i char yang nye bar mi 'gro ba nas / /stong gi cha dang / 'bum gyi cha dang / grangs dang / cha dang / bgrang ba dang / dpe dang / rgyur yang nye bar mi 'gro'o/ /ba lang gi rjes kyi chu ni rgya mtsho chen po bzhi'i chu dang bsgrun na/ brgya'i char yang nye bar mi 'gro ba nas/
 rgyu'i bar du yang nye bar mi 'gro'o/ /de bzhin du don dam yang dag 'phags ngas drang ba'i don gyi mdo sde la mos pa nas/ bsgom pa'i rnam pas sbyor bar byed pa'i bar gyi bsod nams gang bshad pa de ni/ nges pa'i don bstan pa la mos pa las yang dag par grub pa nas/
 bsgom pa'i rnam pas sbyor ba las yang dag par grub pa'i bar gyi bsod nams 'di dang bsgrun na/ brgya'i char yang nye bar mi 'gro ba nas/ /rgyu'i bar du yang nye bar mi 'gro'o/ /de skad ces bka' stsal ba dang / bcom ldan 'das la byang chub sems dpa' don dam yang
 dag 'phags kyis 'di skad ces gsol to/ /bcom ldan 'das kyis dgongs pa nges par 'grel pa'i chos kyi rnam grangs 'dir bstan pa 'di'i ming ci lags/ 'di ji ltar gzung bar bgyi/ bcom ldan 'das kyis bka' stsal pa/ don dam yang dag 'phags 'di ni
 don dam pa nges pa'i don bstan pa yin te/ 'di ni don dam pa nges pa'i don bstan pa zhes bya bar zung shig /don dam pa nges pa'i don bstan pa 'di bshad pa na/ srog chags drug 'bum ni bla na med pa yang dag par rdzogs pa'i byang chub tu sems skyes so/ /nyan thos sum
 'bum ni chos rnams la chos kyi mig rdul med cing dri ma dang bral ba rnam par dag go/ /nyan thos 'bum lnga khri ni len pa med par zag pa rnams las sems rnam par grol lo/ /byang chub sems dpa' bdun khri lnga stong gis ni mi skye ba'i chos la bzod pa thob par gyur to zhes
 gsungs so/ / / /bam po sum cu dgu pa/ chos gdags pa rnam par dgod pa las brtsams nas/ rnal 'byor gyis yongs su bsdus pa'i zhi gnas dang lhag mthong gi lam gyi rab tu dbye ba ni dgongs pa nges par 'grel pa'i mdo las ji skad byung ba bzhin
 rig par bya ste/ bcom ldan 'das la byang chub sems dpa' byams pas zhu ba zhus pa/ bcom ldan 'das byang chub sems dpa' ci la gnas/ ci la brten te/ theg pa chen po la zhi gnas dang lhag mthong bsgom par bgyid lags/ /bcom ldan 'das kyis bka' stsal
 pa/ byams pa chos gdags pa rnam par gzhag pa dang / bla na med pa yang dag par rdzogs pa'i byang chub tu smon lam mi gtong ba la gnas shing brten nas so/ /bcom ldan 'das kyis zhi gnas dang / lhag mthong gi dmigs pa'i dngos po bzhi po
 'di lta ste/ rnam par rtog pa dang bcas pa'i gzugs brnyan dang / rnam par mi rtog pa'i gzugs brnyan dang / dngos po'i mtha' dang / dgongs pa yongs su grub pa zhes gang dag bstan pa de la/ bcom ldan 'das du zhig zhi gnas kyi dmigs pa lags/ bka'
 stsal ba/ gcig ste/ 'di lta ste / rnam par mi rtog pa'i gzugs brnyan no/ /du zhig lhag mthong gi dmigs pa lags/ bka' stsal pa/ gcig kho na ste/ rnam par rtog pa dang bcas pa'i gzugs brnyan no/ /du zhig de gnyi ga'i dmigs pa lags/ bka'
 stsal pa/ gnyis te/ 'di lta ste/ dngos po'i mtha' dang / dgos pa yongs su grub pa'o/ /bcom ldan 'das byang chub sems dpa' zhi gnas dang lhag mthong gi dmigs pa'i dngos po bzhi po de dag la brten cing gnas nas/ ji ltar zhi gnas yongs su tshol bar
 bgyi ba dang / lhag mthong la mkhas pa lags/ bka' stsal pa/ byams pa ngas chos gdags pa rnam par gzhag pa 'di lta ste/ mdo'i sde dang / dbyangs kyis bsnyad pa'i sde dang / lung du bstan pa'i sde dang / tshigs su bcad pa'i sde dang / ched du brjod pa'i sde
 dang / gling gzhi'i sde dang / rtogs pa brjod pa'i sde dang / de lta bu byung ba'i sde dang / skyes pa rabs kyi sde dang / shin tu rgyas pa'i sde dang / rmad du byung ba'i chos kyi sde dang / gtan la phab par bstan pa'i sde gang dag byang chub sems dpa' rnams la bshad pa de dag byang
 chub sems dpas legs par thos/ legs par bzung / /kha ton byang bar byas/ yid kyis legs par brtags/ mthong bas shin tu rtogs par byas nas de gcig pu dben par 'dug ste nang du yang dag bzhag nas/ ji ltar legs par bsams pa'i chos de dag nyid
 yid la byed cing / sems gang gis yid la byed pa'i sems de nang du rgyun chags su yid la byed pas yid la byed do/ /de ltar zhugs shing de la lan mang du gnas pa de la lus shin tu sbyangs pa dang / sems shin tu sbyangs pa 'byung ba gang yin pa de ni zhi gnas zhes bya ste/ de ltar
 na byang chub sems dpa' zhi gnas yongs su tshol bar byed pa yin no/ /de la lus shin tu sbyangs pa dang / sems can shin tu sbyangs pa de thob nas/ de nyid la gnas te bsams pa'i rnam pa spangs nas/ ji ltar bsams pa'i chos de dag nyid nang du ting nge 'dzin gyi spyod yul
 gzugs brnyan du so sor rtog par byed/ mos par byed do/ /de ltar ting nge 'dzin gyi spyod yul gzugs brnyan de dag la shes bya'i don de rnam par 'byed pa dang / rab tu rnam par 'byed pa dang / yongs su rtog pa dang / yongs su dpyod pa dang / bzod pa dang / 'dod pa
 dang / bye brag 'byed pa dang / lta ba dang / rtog pa gang yin pa de ni lhag mthong zhes bya ste/ de ltar na byang chub sems dpa' lhag mthong la mkhas pa yin no/ /bcom ldan 'das byang chub sems dpa' de ji srid du sems la dmigs pa'i sems nang du yid la bgyid
 pa na/ ji srid du lus shin tu sbyangs pa dang / sems shin tu sbyangs pa ma thob pa de'i bar du/ yid la bgyid pa de la ci zhes bgyi/ /byams pa zhi gnas ni ma yin te/ zhi gnas kyi rjes su mthun pa'i mos pa dang mtshungs par ldan pa yin par brjod par bya'o/ /bcom
 ldan 'das byang chub sems dpa' de ji srid du/ lus shin tu sbyangs pa dang / sems shin tu sbyangs pa thob kyi bar du/ ji ltar legs par bsams pa'i chos de dag nang du / ting nge 'dzin gyi spyod yul gzugs brnyan nang du yid la byed pa'i yid la bgyid pa de la ci zhig
 bgyi/ byams pa lhag mthong ni ma yin te/ lhag mthong dang rjes su mthun pa'i mos pa dang mtshungs par ldan pa yin par brjod par bya'o/ /bcom ldan 'das zhi gnas kyi lam dang / lhag mthong gi lam tha dad ces bgyi'am/ tha dad pa ma lags zhes bgyi/bka'
 stsal pa/ byams pa tha dad pa yang ma yin/ tha dad pa ma yin pa yang ma yin zhes bya'o/ /ci'i phyir tha dad pa ma yin zhe na/ lhag mthong gi dmigs pa'i sems la dmigs pa'i phyir ro/ /ci'i phyir tha dad pa ma yin pa yang ma yin zhe na/ rnam
 par rtog pa dang bcas pa'i gzugs brnyan la rtog pa'i phyir ro/ /bcom ldan 'das rnam par lta bar bgyid pa'i ting nge 'dzin gyi spyod yul gzugs brnyan gang lags pa de ci lags/ de sems de dang tha dad pa zhes bgyi'am/ tha dad pa ma lags zhes bgyi/ byams
 pa tha dad pa ma yin zhes bya'o/ /ci'i phyir tha dad pa ma yin zhe na/ gzugs brnyan de rnam par rig pa tsam du zad pa'i phyir te/ byams pa rnam par shes pa ni dmigs pa rnam par rig pa tsam gyis rab tu phye ba yin no zhes ngas bshad do/ /bcom ldan 'das ting nge 'dzin gyi
 spyod yul gzugs brnyan de/ gal te sems de las tha dad pa ma lags na/ sems de nyid kyis sems de nyid la ji ltar rtog par bgyid lags/ bka' stsal pa/ byams pa de la gang yang chos gang la yang rtog par mi byed mod kyi/ 'on kyang de ltar skyes pa'i sems
 gang yin pa dang ltar snang ngo / /byams pa 'di lta ste dper na gzugs la brten nas me long gi dkyil 'khor shin tu yongs su dag pa la gzugs nyid mthong yang / /gzugs brnyan mthong ngo snyam du sems te de la/ gzugs de la gzugs brnyan snang ba de don tha dad par
 snang ngo / /de bzhin du de ltar skyes pa'i sems de dang / ting nge 'dzin gyi spyod yul gzugs brnyan zhes bya ba gang yin pa de'ang de las don gzhan yin pa lta bur snang ngo / /bcom ldan 'das sems can rnams kyi gzugs la sogs par snang ba'i sems kyi / /gzugs
 brnyan rang bzhin du gnas pa gang lags pa de yang / sems de dang tha dad pa ma lags pa zhes bgyi'am/ /bka' stsal pa/ byams pa tha dad pa ma yin pa zhes bya ste/ byis pa phyin ci log gi blo can rnams la ni/ gzugs brnyan de dag la rnam par rig pa tsam de nyid yang dag
 pa ji lta ba bzhin mi shes pas phyin ci log tu sems so/ /bcom ldan 'das byang chub sems dpa' ji tsam gyis na gcig tu lhag mthong sgom pa lags/ bka' stsal pa/ gang gi tshe rgyun chags su yid la byed pas/ /sems kyi mtshan ma nyid yid la byed pa'o/ /ci tsam gyis
 na gcig tu zhi gnas sgom pa lags/ bka' stsal pa/ gang gi tshe rgyun chags su yid la byed pas bar chad med pa'i sems nyid yid la byed pa'o/ /ji tsam gyis na zhi gnas dang lhag mthong gnyis 'dres par gyur te/ mnyam par zung du 'jug pa lags/ /bka' stsal pa/
 gang gi tshe sems rtse gcig pa nyid yid la byed pa'o/ bcom ldan 'das sems kyi mtshan ma gang lags/ byams pa lhag mthong gi dmigs pa ting nge 'dzin gyi spyod yul rnam par rtog pa dang bcas pa'i gzugs brnyan gang yin pa'o/ /bar chad ma mchis pa'i sems gang
 lags/ byams pa zhi gnas kyi dmigs pa gzugs brnyan la dmigs pa'i sems gang yin pa'o/ /sems rtse gcig pa nyid gang lags/ ting nge 'dzin gyi spyod yul gzugs brnyan de la 'di ni rnam par rig pa tsam yin no zhes bya bar rtogs te/ de rtogs nas kyang
 de bzhin nyid du yid la byed pa gang yin pa'o/ /bcom ldan 'das lhag mthong la rnam pa du mchis/ byams pa rnam pa gsum ste/ mtshan ma las byung ba dang / yongs su tshol ba las byung ba dang / so sor rtog pa las byung ba'o/ /mtshan ma las byung ba gang zhe na/
 ting nge 'dzin gyi spyod yul rnam par rtog pa dang bcas pa'i gzugs brnyan 'ba' zhig yid la byed pa'i lhag mthong gang yin pa'o/ /yongs su tshol ba las byung ba gang zhe na/ de dang der shes rab kyis shin tu legs par ma rtogs pa'i chos de dag nyid shin tu legs par rtogs
 par bya ba'i phyir/ yid la byed pa'i lhag mthong gang yin pa'o/ /so sor rtog pa las byung ba gang zhe na/ de dang der shes rab kyis shin tu legs par rtogs pa'i chos rnams la rnam par grol bas shin tu legs par bde ba la reg par bya ba'i phyir yid la byed pa'i lhag mthong
 gang yin pa'o/ /zhi gnas la rnam pa du mchis/ bka' stsal pa/ bar chad med pa'i sems de'i rjes su 'brang bas de yang rnam pa gsum du brjod par bya'o/ /byams pa yang zhi gnas ni rnam pa brgyad de/ bsam gtan dang po dang / gnyis pa dang /
 gsum pa dang / bsam gtan bzhi pa dang / nam mkha' mtha' yas skye mched dang / rnam shes mtha' yas skye mched dang / ci yang med pa'i skye mched dang / 'du shes med 'du shes med min skye mched pa'o/ /yang rnam pa bzhi ste/ byams pa tshad med pa dang / snying
 rje dang / dga' ba dang / btang snyoms tshad med pa'o/ /bcom ldan 'das zhi gnas dang lhag mthong ni chos la gnas pa zhes kyang bgyi/ chos la mi gnas pa zhes kyang bgyi na/ chos la gnas pa ni gang lags/ chos la mi gnas pa ni gang lags/ byams pa ji ltar
 gzung ba dang / bsams pa'i chos kyi mtshan ma'i rjes su 'brang bas don la zhi gnas dang lhag mthong gang yin pa de ni chos la gnas pa yin no/ /gzung ba dang bsams pa'i chos la mi ltos par gzhan gyi gdams ngag dang rjes su bstan pa la brten nas don la zhi gnas dang
 lhag mthong gang yin pa 'di lta ste/ rnam par bsngos pa'am/ rnam par rnags pa'am/ /de lta bu dang mthun pa rnams sam/ 'du byed thams cad mi rtag pa zhes bya ba'am/ sdug bsngal ba zhes bya ba'am/ chos thams cad bdag med pa zhes bya ba'am/ / mya ngan las
 'das pa zhi ba zhes bya ba'am/ de lta bu dang mthun pa'i zhi gnas dang lhag mthong de ni chos la mi gnas pa yin par rig par bya'o/ /byams pa de la nga ni chos la gnas pa'i zhi gnas dang lhag mthong la brten nas/ byang chub sems dpa' chos kyi rjes su 'brang ba dbang po rnon por
 'dogs so/ /chos la mi gnas pa la brten nas/ dad pas rjes su 'brang ba dbang po rtul por 'dogs so/ /bcom ldan 'das zhi gnas dang lhag mthong ni ma 'dres pa'i chos la dmigs pa zhes kyang bgyi/ 'dres pa'i chos la dmigs pa zhes kyang bgyi na/ ma 'dres
 pa'i chos la dmigs pa ni gang lags/ 'dres pa'i chos la dmigs pa ni gang lags/ byams pa gal te byang chub sems dpa' ji ltar gzung ba dang / bsams pa'i chos rnams las mdo'i sde la sogs pa'i chos so so la dmigs pa'i zhi gnas dang lhag mthong sgom
 par byed pa de ni ma 'dres pa'i chos la dmigs pa'i zhi gnas dang lhag mthong yin no/ /gal te mdo'i sde la sogs pa'i chos de dag nyid gcig tu bzlum pa dang / gcig tu bsdu ba dang / gcig tu btul ba dang / phung po gcig tu byas te/ chos 'di dag thams cad
 ni de bzhin nyid la gzhol ba/ de bzhin nyid la 'bab pa/ de bzhin nyid la bab pa/ byang chub la gzhol ba/ byang chub la 'bab pa/ byang chub la bab pa/ mya ngan las 'das pa la gzhol ba/ mya ngan las 'das pa la 'bab pa/ mya ngan las 'das pa la bab pa/
 gnas gyur pa la gzhol ba/ gnas gyur pa la 'bab pa/ gnas gyur pa la bab pa dag ste/ chos 'di dag thams cad ni dge ba'i chos dpag tu med pa/ grangs med pa dag mngon par brjod pas mngon par brjod pa yin no snyam du yid la byed pa de ni/ 'dres pa'i
 chos la dmigs pa'i zhi gnas dang lhag mthong yin no/ /bcom ldan 'das zhi gnas dang lhag mthong ni 'dres pa chung ngu'i chos la dmigs pa zhes kyang bgyi/ /'dres pa chen por gyur pa'i chos la dmigs pa zhes kyang bgyi/ 'dres pa tshad ma mchis pa'i chos la dmigs
 pa zhes kyang bgyi na/ 'dres pa chung ngu'i chos la dmigs pa ni gang lags/ 'dres pa chen por 'gyur ba'i chos la dmigs pa ni gang lags/ 'dres pa tshad ma mchis pa'i chos la dmigs pa ni gang lags/ byams pa mdo'i sde nas/ shin tu rgyas pa'i sde dang /
 rmad du byung ba'i chos kyi sde dang / gtan la bab par bstan pa'i sde'i bar dag so sor gcig tu bzlums te/ yid la byed pa'i zhi gnas dang / lhag mthong ni 'dres pa chung ngu'i chos la dmigs pa yin par rig par bya'o/ /mdo'i sde la sogs pa de dag nyid ji snyed gzung
 ba dang / bsams pa so sor gcig tu bzlums te/ yid la byed pa ni 'dres pa rgya chen por gyur pa'i chos la dmigs pa yin par rig par bya'o/ /de bzhin gshegs pa rnams kyi chos bstan pa tshad med pa rnams dang / chos kyi tshig dang yi ge tshad med pa
 rnams dang / gong nas gong du shes rab dang spobs pa tshad med pa rnams gcig tu bzlums te/ yid la byed pa ni 'dres pa tshad med pa'i chos la dmigs pa yin par rig par bya'o/ /bcom ldan 'das byang chub sems dpa' ji tsam gyis na/ 'dres pa'i chos la
 dmigs pa'i zhi gnas dang lhag mthong thob par 'gyur lags/ byams pa de ni rgyu lngas thob par 'gyur bar rig par bya ste/ 'di lta ste yid la byed pa'i tshe skad cig skad cig la gnas ngan len gyi rten thams cad 'jig par byed pa dang / 'du shes sna tshogs rnams
 par spangs te/ chos kyi kun dga' la dga' ba 'thob pa dang / chos kyi snang ba phyogs bcur tshad med cing rnam pa yongs su ma chad pa yang dag par shes pa dang / dgos pa yongs su grub pa dang ldan pa rnam par dag pa'i cha dang mthun pa'i mtshan ma rnam par ma brtags
 pa rnams de la kun tu 'byung ba dang / chos kyi sku thob pa dang / yongs su rdzogs pa dang / yongs su 'grub par bya ba'i phyir rgyu gong ma bas ches gong ma bzang po bas ches bzang po yang dag par yongs su 'dzin par byed pa'o/ /bcom ldan 'das 'dres pa'i chos la
 dmigs pa'i zhi gnas dang lhag mthong de gang la rtogs shing / /gang la 'thob par 'tshal bar bgyi lags/ bka' stsal pa/ byams pa sa dang po rab tu dga' ba la ni rtogs pa yin la/ sa gsum pa 'od byed pa la ni thob par rig par bya ste/ byams pa de lta mod kyi
 byang chub sems dpa' las dang po pas kyang de la rjes su bslab cing yid la bya ba mi gtang bar bya'o/ /bcom ldan 'das ji ltar zhi gnas dang / lhag mthong rtog pa dang bcas shing dpyod pa dang bcas pa'i ting nge 'dzin du 'gyur ba lags/ ji ltar na rtog pa ma mchis
 shing dpyod pa tsam du 'gyur ba lags/ ji ltar na rtog pa ma mchis pa dang / dpyod pa ma mchis par 'gyur ba lags/ byams pa ji ltar gzung zhing brtags pa dang dpyad pa'i chos rnams la de dag gi mtshan ma gsal zhing rags pa myong ba'i rjes su dpyod pa'i zhi gnas dang
 lhag mthong gang yin pa de ni/ rtog pa dang bcas shing dpyod pa dang bcas pa'i ting nge 'dzin yin no/ /de dag nyid kyi mtshan ma gsal zhing rags pa myong pa'i rjes su dpyod pa ma yin mod kyi/ 'on kyang de snang ba 'ol spyi'i dran pa tsam phra mo myong ba'i rjes su dpyod pa'i zhi gnas dang
 lhag mthong gang yin pa de ni/ rtog pa med cing dpyod pa tsam gyi ting nge 'dzin yin no / /de dag gi mtshan ma la thams cad kyi thams cad du lhun gyis grub par chos myong ba yid la byed pas/ rnam par spyod pa'i zhi gnas dang lhag mthong gang yin pa de ni rtog pa med pa dang /
 dpyod pa med pa'i ting nge 'dzin yin no/ /byams pa yang chos yongs su tshol ba las byung ba'i zhi gnas dang lhag mthong gang yin pa de ni/ rtog pa dang bcas shing dpyod pa dang bcas pa'i ting nge 'dzin yin no/ /so sor rtog pa las byung ba'i gang yin pa de ni/ rtog pa med
 cing dpyod pa tsam gyi ting nge 'dzin yin no/ /'dres pa'i chos la dmigs pa gang yin pa de ni rtog pa med pa dang dpyod pa med pa'i ting nge 'dzin yin no/ /bcom ldan 'das zhi gnas kyi rgyu mtshan ni gang lags/ /rab tu 'dzin pa'i rgyu mtshan ni gang lags/ btang snyoms kyi rgyu mtshan ni
 gang lags/ /byams pa sems rgod pa'am rgod du dogs pa na kun tu skyo bar 'gyur ba dang mthun pa'i chos rnams dang / bar chad med pa'i sems de yid la byed pa gang yin pa de ni zhi gnas kyi rgyu mtshan zhes bya'o/ /byams pa sems bying ngam/ bying du dogs pa na mngon par dga' bar 'gyur ba dang
 mthun pa'i chos rnams dang / sems kyi mtshan ma de yid la byed pa gang yin pa de ni rab tu 'dzin pa'i rgyu mtshan zhes bya'o/ /byams pa zhi gnas la gcig tu nges pa'am/ lhag mthong la gcig tu nges pa'am/ zung du 'brel pa'i lam yang rung ste/ de gnyi
 ga'i nye ba'i nyon mongs pas nye bar nyon mongs par byed pa la/ sems rang gi ngang gis 'jug pa na/ yid la byed pa lhun gyis grub pa gang yin pa de ni btang snyoms kyi rgyu mtshan zhes bya'o/ /bcom ldan 'das byang chub sems dpa' zhi
 gnas dang lhag mthong sgom pa chos so so yang dag par rig pa dang / don so so yang dag par rig pa lags na/ ji ltar chos so so yang dag par rig pa lags/ ji ltar don so so yang dag par rig pa lags / byams pa rnam pa lngas chos so so yang dag par rig
 pa yin te/ ming dang / tshig dang / yi ge dang / so so ba dang / bsdus pas so/ /ming gang zhe na/ kun nas nyon mongs pa dang / rnam par byang ba'i chos rnams la/ ngo bo nyid dang bye brag gi ming du bya bar btags pa gang yin pa'o/ /tshig gang zhe na/ kun
 nas nyon mongs pa dang rnam par byang ba'i don rjes su tha snyad gdags pa'i phyir/ gnas dang / rten dang / ming de dag nyid kyi tshogs la brten pa gang yin pa'o/ /yi ge gang zhe na/ de gnyi ga'i gnas kyi yig 'bru gang yin pa'o/ /de dag so so las so so yang dag par
 rig pa gang zhe na/ ma 'dres pa la dmigs pa'i yid la byed pas so sor yang dag par rig pa gang yin pa'o/ /bsdus pa las so so yang dag par rig pa gang zhe na/ 'dres pa la dmigs pa'i yid la byed pas so so yang dag par rig pa gang yin pa'o/ /de dag
 thams cad gcig tu bsdus nas chos so so yang dag par rig pa zhes bya ste/ de ltar na chos so so yang dag par rig pa yin no/ /byang chub sems dpa' rnam pa bcus don so so yang dag par rig pa yin te/ ji snyed yod pa nyid dang / ji lta ba bzhin du yod pa nyid dang /
 'dzin pa'i don dang / gzung ba'i don dang / gnas kyi don dang / longs spyod kyi don dang / phyin ci log gi don dang / phyin ci ma log pa'i don dang / kun nas nyon mongs pa'i don dang / rnam par byang ba'i don gyis so/ /byams pa de la kun nas nyon mongs pa pa dang rnam
 par byang ba'i chos rnams la rnam par rab tu dbye ba thams cad kyi mthar thug pa gang yin pa de ni/ ji snyed yod pa nyid yin te/ 'di lta ste/ phung po rnams kyi grangs ni lngas so/ /nang gi skye mched rnams kyi grangs ni drug gis so/ /phyi rol gyi skye mched rnams kyi yang
 grangs drug kho nas so zhes bya ba la sogs pa'o/ /byams pa de la kun nas nyon mongs pa dang rnam par byang ba'i chos de dag nyid kyi de bzhin nyid gang yin pa de ni ji lta ba bzhin du yod pa nyid yin te/ de yang rnam pa bdun te/ 'byung ba'i de bzhin nyid ni 'du byed rnams kyi
 thog ma dang tha ma med pa nyid gang yin pa'o/ /mtshan nyid kyi de bzhin nyid ni chos thams cad kyi gang zag la bdag med pa dang chos la bdag med pa nyid gang yin pa'o/ /rnam par rig pa'i de bzhin nyid ni 'du byed rnams rnam par rig pa tsam nyid gang yin pa'o/ /
 gnas pa'i de bzhin nyid ni ngas sdug bsngal gyi bden pa bstan pa gang yin pa'o/ /log par bsgrub pa'i de bzhin nyid ni ngas kun 'byung ba'i bden pa bstan pa gang yin pa'o/ /rnam par dag pa'i de bzhin nyid ni ngas 'gog pa'i bden pa bstan pa gang yin pa'o/ /yang
 dag par bsgrub pa'i de bzhin nyid ni ngas lam gyi bden pa bstan pa gang yin pa'o/ /byams pa de la 'byung ba'i de bzhin nyid gang yin pa de dang / gnas pa'i de bzhin nyid gang yin pa de dang / log par bsgrub pa'i de bzhin nyid gang yin pa des ni sems can thams cad mtshungs
 shing mnyam mo/ /byams pa de la mtshan nyid kyi de bzhin nyid gang yin pa de dang / rnam par rig pa'i de bzhin nyid gang yin pa des ni chos thams cad mtshungs shing mnyam mo/ /byams pa de la rnam par dag pa'i de bzhin nyid gang yin pa de ni nyan thos kyi byang chub gang yin
 pa dang / rang sangs rgyas kyi byang chub gang yin pa dang / bla na med pa yang dag par rdzogs pa'i byang chub gang yin pa de'i byang chub thams cad mtshungs shing mnyam mo/ /byams pa de la yang dag par bsgrub pa'i de bzhin nyid gang yin pa des ni thos pa thams cad 'dres pa'i chos
 la dmigs pa'i zhi gnas dang lhag mthong gis bsdus pa'i shes rab mtshungs shing mnyam mo/ /byams pa de la 'dzin pa'i don ni skye mched gzugs can lnga dang / sems dang / yid dang / rnam par shes pa dang / sems las byung ba'i chos
 rnams dang / byams pa de gzung ba'i don ni phyi rol gyi skye mched drug po dag yin no/ /byams pa yang 'dzin pa'i don gang yin pa de ni gzung ba'i don kyang yin no/ /byams pa de la gnas kyi don ni 'jig rten gyi khams gang yin pa ste/ gang la gnas na sems can gyi
 khams snang ba'o/ /'di lta ste/ grong tshig dang / grong tshig brgya dang / de stong dang / de 'bum dang / rgya mtsho la thug pa'i sa dang / de brgya dang / de stong dang / de 'bum dang / 'dzam bu'i gling dang / de brgya dang / de stong dang / de 'bum dang / gling
 bzhi dang / de brgya dang / de stong dang / de 'bum dang / stong gi 'jig rten gyi khams dang / de brgya dang / de stong dang / de 'bum dang / stong gnyis pa bar ma'i 'jig rten gyi khams dang / de brgya dang / de stong dang / de 'bum dang / stong gsum gyi stong chen
 po'i 'jig rten gyi khams dang / de brgya dang / de stong dang / de 'bum dang / de bye ba dang / de bye ba phrag brgya dang / de bye ba phrag stong dang / de bye ba phrag 'bum dang / de grangs med pa dang / de grangs med pa phrag brgya dang / de grangs med pa phrag stong dang / de grangs
 med pa phrag 'bum dang / phyogs bcu dag gi 'jig rten gyi khams dpag tu med pa grangs med pa / stong gsum gyi stong chen po'i 'jig rten gyi khams grangs med pa phrag 'bum gyi rdul phra rab kyi rdul snyed dag go/ /byams pa de la longs spyod kyi don ni yongs su spyad pa'i
 phyir/ ngas sems can rnams kyi yongs su gzung ba dang yo byad bstan pa gang dag yin pa rnams so/ /byams pa de la phyin ci log gi don ni 'dzin pa la sogs pa'i don de dag nyid la/ mi rtag pa la rtag par 'du shes phyin ci log dang / sems phyin ci log dang /
 lta ba phyin ci log dang / sdug bsngal la bde ba dang / mi gtsang ba la gtsang ba dang / bdag med pa la bdag tu 'du shes phyin ci log dang / sems phyin ci log dang / lta ba phyin ci log gang yin pa'o/ /byams pa de la phyin ci ma log pa'i don ni de las bzlog pa ste/
 de'i gnyen po yin par rig par bya'o/ /byams pa de la kun nas nyon mongs pa'i don ni rnam pa gsum ste/ khams gsum pa'i nyon mongs pa'i kun nas nyon mongs pa dang / las kyi kun nas nyon mongs pa dang / skye ba'i kun nas nyon mongs pa'o/ /byams pa
 de la rnam par byang ba'i don ni kun nas nyon mongs pa rnam pa gsum po de dag nyid dang bral bar bya ba'i phyir byang chub kyi phyogs dang mthun pa'i chos gang dag yin pa rnams so/ /byams pa rnam pa bcu po de dag gis don thams cad bsdus par rig par bya'o/ /byams pa
 byang chub sems dpa' rnam pa lngas don so so yang dag par rig pa yin te/ don rnam pa lnga gang zhe na/ yongs su shes par bya ba'i dngos po dang / yongs su shes par bya ba'i don dang / yongs su shes pa dang / yongs su shes pa'i 'bras bu 'thob pa dang / de
 rab tu rig par byed pa'o / /byams pa de la yongs su shes par bya ba'i dngos po ni shes bya thams cad yin par blta bar bya ste/ 'di lta ste/ phung po rnams zhes bya ba'am nang gi skye mched rnams zhes bya ba'am/ phyi rol gyi skye mched rnams zhes bya ba'am/ de lta bu la
 sogs pa dag go/ /byams pa de la yongs su shes par bya ba'i don ni rnam pa ji snyed kyis shes bya de ji lta ba bzhin du shes par bya ba ste/ 'di lta ste/ kun rdzob dang / don dam pa dang / skyon dang / yon tan dang / rkyen dang / dus dang / skye ba dang / gnas pa
 dang / 'jig pa'i mtshan nyid dang / nad la sogs pa dang / sdug bsngal ba dang / kun 'byung ba la sogs pa dang / de bzhin nyid dang / yang dag pa'i mtha' dang / chos kyi dbyings dang / bsdu ba dang / dbye ba dang / mgo gcig tu lan gdab pa dang / rnam par dbye
 ba dang / dris te lan gdab pa dang / gzhag pa dang / gsang ba dang / bsgrags pa dang / de lta bu dang mthun pa ni yongs su shes par bya ba'i don yin par rig par bya'o/ /byams pa de la yongs su shes pa de ni/ de gnyi ga 'dzin par byed pa
 byang chub kyi phyogs dang mthun pa'i chos gang yin pa dag ste/ 'di lta ste/ dran pa nye bar gzhag pa rnams dang / yang dag pa'i spong ba rnams dang / de la sogs pa'o/ /byams pa de la yongs su shes pa'i 'bras bu 'thob pa ni 'di lta ste/ 'dod chags dang /
 zhe sdang dang / gti mug 'dul ba dang / 'dod chags dang / zhe sdang dang / gti mug ma lus par spong ba dang / dge sbyong nyid kyi 'bras bu rnams dang / ngas nyan thos dang / de bzhin gshegs pa'i yon tan 'jig rten pa dang / 'jig rten las 'das
 pa thun mong dang / thun mong ma yin pa gang dag bstan pa de dag mngon du bya ba gang yin pa'o/ /byams pa de la rab tu rig par byed pa ni mngon sum du bya ba'i chos de dag nyid la rnam par grol bar shes pa dang / gzhan dag la yang rgya cher ston pa dang / yang dag
 par ston pa gang yin pa ste/ byams pa don lnga po de dag gis kyang don thams cad bsdus par rig par bya'o/ /byams pa yang byang chub sems dpas rnam pa bzhis don so so yang dag par rig pa yin te/ don rnam pa bzhi gang zhe na/ sems kyi len pa'i don dang /
 myong ba'i don dang / rnam par rig pa'i don dang / kun nas nyon mongs pa dang rnam par byang ba'i don gyis te/ byams pa don rnam pa bzhi po de dag gis kyang don thams cad bsdus par rig par bya'o/ /byams pa yang byang chub sems dpas rnam pa gsum gyis don so so
 yang dag par rig pa yin te/ don rnam pa gsum gang zhe na/ tshig 'bru'i don dang / don gyi don dang / khams kyi don gyis so/ /byams pa de la tshig 'bru'i don ni ming gi tshogs la sogs pa yin par blta bar bya'o/ /byams pa de la don gyi don ni rnam pa
 bcur rig par bya ste/ de kho na'i mtshan nyid dang / yongs su shes pa'i mtshan nyid dang / spang ba'i mtshan nyid dang / mngon du bya ba'i mtshan nyid dang / bsgom pa'i mtshan nyid dang / de kho na'i mtshan nyid la sogs pa de dag nyid kyi rnam pa rab tu dbye ba'i mtshan
 nyid dang / gnas dang gnas par 'brel pa'i mtshan nyid dang / yongs su shes pa la sogs pa'i bar du gcod pa'i chos kyi mtshan nyid dang / rjes su mthun pa'i chos kyi mtshan nyid dang / yongs su mi shes pa la sogs pa dang / yongs su shes pa la
 sogs pa'i nyes dmigs dang / phan yon gyi mtshan nyid do/ /byams pa de la khams kyi don ni khams lnga ste/ 'jig rten gyi khams dang / sems can gyi khams dang / chos kyi khams dang / gdul ba'i khams dang / gdul ba'i thabs kyi khams te/
 byams pa don rnam pa gsum po de dag gis kyang don thams cad bsdus par rig par bya'o/ /bcom ldan 'das thos pa las byung ba'i shes rab kyis ni don so so yang dag par rig pa gang lags pa dang / bsams pa las byung ba'i shes rab kyis don so so yang dag
 par rig pa gang lags pa dang / bcom ldan 'das zhi gnas dang lhag mthong bsgoms pa las byung ba'i shes rab kyis don so so yang dag par rig pa gang lags pa de dag la tha dad du bgyi ba ci mchis lags/ bka' stsal pa/ byams pa byang chub sems dpas
 thos pa las byung ba'i shes rab kyis ni tshig 'bru la gnas pa dang / sgra ji bzhin pa dang / dgongs pa med pa/ mngon du ma gyur pa/ rnam par thar pa'i rjes su mthun pa dang / rnam par thar par byed pa ma yin pa'i don so so yang dag par rig par byed do/ /byams
 pa bsams pa las byung ba'i shes rab kyis ni tshig 'bru la gnas pa kho na yin la/ sgra ji bzhin ma yin pa/ dgongs pa can mngon du ma gyur pa/ rnam par thar pa dang chos rjes su mthun pa/ rnam par thar bar byed pa ma yin pa'i don so so yang dag par rig par byed do/ /
 byams pa byang chub sems dpas bsgoms pa las byung ba'i shes rab kyis ni tshig 'bru la gnas pa dang / tshig 'bru la gnas pa ma yin pa dang / sgra ji bzhin pa dang / dgongs pa can dang / shes bya'i dngos po dang cha mthun pa'i ting nge 'dzin gyi
 spyod yul gyi gzugs brnyan gyis mngon du gyur pa rnam par thar pa dang / chos shin tu rjes su mthun pa dang / rnam par thar par byed pa'i don kyang so so yang dag par rig par byed do/ /byams pa de dag gi tha dad du bya ba ni de yin no zhes bcom ldan 'das kyis bka'
 stsal to/ /bcom ldan 'das byang chub sems dpa' zhi gnas dang lhag mthong bsgom pa chos so so yang dag par rig pa dang / don so so yang dag par rig pa'i shes pa ni gang lags/ mthong ba ni gang lags/ byams pa nga ni shes pa dang mthong ba rnam grangs du
 mas ston par byed mod kyi/ 'on kyang mdor bsdus te bshad par bya'o/ /'dres pa'i chos la dmigs pa'i zhi gnas dang lhag mthong gi shes rab gang yin pa de ni shes pa yin no/ /ma 'dres pa'i chos la dmigs pa'i zhi gnas dang lhag mthong gi shes rab gang yin pa
 de ni mthong ba yin no/ /bcom ldan 'das byang chub sems dpa' zhi gnas dang lhag mthong bsgom pas yid la bgyid pa gang gis mtshan ma gang ji ltar rnam par sel bar bgyid lags/ byams pa de bzhin nyid yid la byed pas chos kyi mtshan ma dang / don gyi mtshan ma rnam
 par sel bar byed de / ming la ming gi ngo bo nyid kyang mi dmigs shing / de'i gnas kyi mtshan ma yang yang dag par rjes su mi mthong bas rnam par sel to / /ming la ji lta ba bzhin du tshig dang / yi ge dang / don thams cad la yang de bzhin du rig par bya'o/ /byams pa
 khams kyi bar la khams kyi ngo bo nyid kyang mi dmigs shing / de'i gnas kyi mtshan ma yang yang dag par rjes su mi mthong bas rnam par sel to/ /bcom ldan 'das ci lags/ de bzhin nyid kyi don so so yang dag par rig pa'i mtshan ma gang lags pa de yang rnam par sel
 bar bgyid lags sam/ byams pa de bzhin nyid kyi don so so yang dag par rig pa la ni mtshan ma med de/ mi dmigs na/ de la ci zhig rnam par sel bar 'gyur te/ byams pa de bzhin nyid kyi don so so yang dag par rig pas ni/ chos dang / don gyi mtshan ma thams
 cad zil gyis non gyi/ de ni gang gis kyang zil gyis mnan par bya ba yin par nga mi smra'o/ /bcom ldan 'das bcom ldan 'das kyis chab rnyog ma can mchis pa'i snod kyi dpe dang / me long yongs su ma dag pa'i dpe dang / mtshe'u 'khrugs pa'i dpes ji ltar rang gi
 bzhin gyi mtshan ma brtag par mi nus la/ de las bzlog pas ni nus pa de bzhin du/ ma bsgoms pa'i sems kyis yang dag pa ji lta ba bzhin shes par mi nus kyi/ bsgoms pas ni nus so zhes gang bka' stsal ba de la sems kyi so sor brtags pa ni gang lags/
 de bzhin nyid ni gang la dgongs te bka' stsal ba lags/ bka' stsal pa/ byams pa sems kyis so sor brtag pa rnam pa gsum gyi phyir te/ thos pa las byung ba'i sems kyis so sor brtag pa dang / bsams pa las byung ba'i sems kyis so sor brtag pa dang /
 bsgoms pa las byung ba'i sems kyis so sor brtag pa'o/ /rnam par rig pa'i de bzhin nyid las dgongs te/ yongs su bstan pa yin no/ /bcom ldan 'das byang chub sems dpa' de ltar chos dang don so so yang dag par rig pa dang / mtshan ma rnam par
 sel ba la zhugs pa'i mtshan ma du zhig ni rnam par bsal dka' ba lags / gang gis ni de dag rnam par sel lags/ byams pa bcu ste/ de dag ni stong pa nyid kyis rnam par sel to/ /bcu gang zhe na/ chos kyi don so so yang dag par rig par byed pa na/ tshig dang
 yi ge'i mtshan ma sna tshogs gang yin pa de ni chos thams cad stong pa nyid kyis rnam par sel to/ /gnas pa'i de bzhin nyid kyi don so sor yang dag par rig par byed pa na/ skye ba dang / 'jig pa dang / gnas pa dang / gzhan du 'gyur ba nyid kyi rgyun gyi rjes su 'jug
 pa'i mtshan ma gang yin pa de ni mtshan nyid stong pa nyid kyis kyang rnam par sel la/ de ni thog ma dang tha ma med pa stong pa nyid kyis kyang rnam par sel to/ /'dzin pa'i don so sor yang dag par rig par byed pa'i 'jig tshogs la lta ba'i mtshan ma dang / nga'o
 snyam pa'i mtshan ma gang yin pa de ni nang stong pa nyid dang / mi dmigs pa stong pa nyid kyis rnam par sel to/ /gzung ba'i don so so yang dag par rig par byed pa'i longs spyod la lta ba'i mtshan ma gang yin pa de ni phyi stong pa nyid kyis rnam par sel to/ /yongs su
 longs spyod pa'i don du skyes pa dang / bud med kyi bsnyen bkur dang / yo byad dang ldan pa so so yang dag par rig par byed pa na/ nang gi bde ba'i mtshan ma dang / phyi rol gyi sdug pa'i mtshan ma gang yin pa de ni/ phyi nang stong pa nyid dang / rang bzhin gyis stong
 pa nyid kyis rnam par sel to/ /gnas kyi don so so yang dag par rig par byed pa na/ tshad med pa'i mtshan ma gang yin pa de ni chen po stong pa nyid kyis rnam par sel to/ /gzugs med pa la brten te/ gang gi zhi ba la rnam par thar pa'i mtshan ma gang yin pa de ni
 'dus byas stong pa nyid kyis rnam par sel to/ /mtshan nyid kyi de bzhin nyid kyi don so so yang dag par rig par byed pa na/ gang zag bdag med pa'i mtshan ma dang / chos la bdag med pa'i mtshan ma dang / rnam par rig pa tsam gyi mtshan ma dang / don dam pa'i mtshan
 ma gang yin pa de ni mtha' las 'das pa stong pa nyid dang / dngos po med pa stong pa nyid dang / dngos po med pa'i ngo bo nyid stong pa nyid dang / don dam pa stong pa nyid kyis rnam par sel to/ /rnam par dag pa'i de bzhin nyid kyi don so so yang dag par rig par byed pa na/
 'dus ma byas kyi mtshan ma dang / 'gyur ba med pa'i mtshan ma gang yin pa de ni 'dus ma byas stong pa nyid dang / dor ba med pa stong pa nyid kyis rnam par sel to/ /mtshan ma de'i gnyen po stong pa nyid de dag yid la byed pa'i stong pa nyid kyi mtshan ma gang yin pa de ni/ stong pa
 nyid stong pa nyid kyis rnam par sel to/ /bcom ldan 'das mtshan ma rnam pa bcu rnam par sel bar bgyid pa na/ mtshan ma gang rnam par sel bar bgyid cing / mtshan ma'i 'ching ba gang las rnam par grol bar 'gyur lags/ byams pa ting nge 'dzin gyi spyod yul gzugs
 brnyan gyi mtshan ma rnam par sel bar byed cing / kun nas nyon mongs pa'i 'ching ba'i mtshan ma las yongs su grol bar 'gyur la/ de yang rnam par sel to/ /byams pa stong pa nyid de dag ni dngos su na mtshan ma de dag gi gnyen por gyur pa yin par rig par bya'o/ /
 re re yang mtshan ma thams cad kyi gnyen por mi 'gyur ba ni ma yin no/ /byams pa 'di lta ste dper na/ ma rig pa ni rga shi'i bar gyi kun nas nyon mongs pa 'grub par mi byed pa ma yin mod kyi/ nye ba dang / shin tu nye ba'i rkyen nyid yin pa'i phyir dngos su na 'du byed 'grub par byed
 pa yin par bstan pa bzhin du 'di la yang tshul de bzhin du blta bar bya'o/ /bcom ldan 'das theg pa chen po la byang chub sems dpa' rnams kyis gang rtogs na stong pa nyid kyi mtshan nyid la mngon pa'i nga rgyal ma mchis pas rab tu nyams par mi 'gyur ba'i stong pa nyid kyi
 mtshan nyid bsdus pa gang lags/ de nas bcom ldan 'das kyis byang chub sems dpa' byams pa la legs so legs so zhes bya ba byin te/ byams pa khyod de ltar byang chub sems dpa' rnams stong pa nyid las rab tu nyams par mi 'gyur bar bya ba'i phyir de bzhin
 gshegs pa la khyod don 'di nyid 'dri ba legs so legs so/ /de ci'i phyir zhe na/ byams pa byang chub sems dpa' stong pa nyid las rab tu nyams pa ni theg pa chen po mtha' dag las kyang rab tu nyams par 'gyur ba'i phyir ro/ /byams pa de'i phyir nyon cig dang / stong pa
 nyid kyi mtshan nyid bsdus pa khyod la bshad par bya'o/ /byams pa gzhan gyi dbang gi mtshan nyid dang / yongs su grub pa'i mtshan nyid rnam pa thams cad du kun nas nyon mongs pa dang / rnam par byang ba pa'i kun brtags pa'i mtshan nyid dang shin tu rnam par bral ba nyid
 dang / de de la mi dmigs pa gang yin pa de ni theg pa chen po la stong pa nyid kyi mtshan nyid bsdus pa zhes bya'o/ /bcom ldan 'das zhi gnas dang lhag mthong dag gis ting nge 'dzin du zhig bsdus lags/ bka' stsal pa/ byams pa ngas nyan
 thos rnams dang / byang chub sems dpa' rnams dang / de bzhin gshegs pa rnams kyi ting nge 'dzin rnam pa du ma bstan pa gang dag yin pa de dag thams cad bsdus par rig par bya'o/ /bcom ldan 'das zhi gnas dang lhag mthong rgyu gang las byung ba lags/
 byams pa tshul khrims rnam par dag pa'i rgyu las byung ba dang / thos pa dang / bsams pa las byung ba'i lta ba rnam par dag pa'i rgyu las byung ba yin no/ /bcom ldan 'das de dag gi 'bras bu gang lags par brjod par bgyi/ byams pa sems rnam par dag pa
 ni 'bras bu yin/ shes rab rnam par dag pa ni 'bras bu yin no/ /byams pa yang nyan thos rnams kyi'am/ byang chub sems dpa' rnams kyi'am/ de bzhin gshegs pa rnams kyi dge ba'i chos 'jig rten pa dang / 'jig rten las 'das pa thams cad kyang
 zhi gnas dang lhag mthong gi 'bras bu yin par rig par bya'o/ /bcom ldan 'das zhi gnas dang lhag mthong gi las ci lags/ byams pa 'ching ba rnam pa gnyis po mtshan ma'i 'ching ba dang / gnas ngan len gyi 'ching ba las rnam par thar bar byed pa yin no/ /
 bcom ldan 'das bcom ldan 'das kyis gags rnam pa lnga gsungs pa gang dag lags pa de dag las/ du ni zhi gnas kyi gags dag lags/ du ni lhag mthong gi gags dag lags/ du ni gnyi ga'i gags dag lags/ byams pa lus dang longs spyod la lta ba
 ni zhi gnas kyi gags yin no/ /'phags pa'i gtam 'dod pa bzhin ma thob pa ni lhag mthong gi gags yin no/ /'dres par gnas pa dang / cung zad tsam gyis chog par 'dzin pa ni de gnyi ga'i gags yin te/ de la yang gcig gis ni sbyor bar mi byed do/ /
 cig shos kyis ni sbyor ba mthar thug par mi 'gyur ro/ /bcom ldan 'das sgrib pa lnga po gang dag lags pa de dag las/ du ni zhi gnas kyi sgrib pa dag lags/ du ni lhag mthong gi sgrib pa dag lags/ du ni gnyi ga'i sgrib pa dag lags/ byams pa rgod pa
 dang / 'gyod pa ni zhi gnas kyi sgrib pa yin no/ /rmugs pa dang / gnyid dang / the tshom ni lhag mthong gi sgrib pa yin no/ /'dod pa la 'dun pa dang / gnod sems ni de gnyi ga'i sgrib pa yin no/ /bcom ldan 'das ji tsam gyis na zhi gnas kyi lam yongs su dag pa
 lags/ byams pa gang gi tshe rmugs pa dang / gnyid legs par rab tu choms par gyur ba'o/ /bcom ldan 'das ji tsam gyis na lhag mthong gi lam yangs su dag pa lags/ byams pa gang gi tshe rgod pa dang 'gyod pa legs par rab tu choms par gyur pa'o/ /
 bcom ldan 'das byang chub sems dpa' zhi gnas dang lhag mthong la zhugs pas rnam pa du dag gis sems rnam par g.yeng ba yongs su 'tshal bar bgyi lags/ bka' stsal ba/ byams pa rnam pa lnga ste/ yid la byed pa'i rnam par g.yeng ba dang / phyi rol du
 sems rnam par g.yeng ba dang / nang du sems rnam par g.yeng ba dang / mtshan ma'i rnam par g.yeng ba dang / gnas ngan len gyi rnam par g.yeng ba'o / /byams pa gal te byang chub sems dpa' theg pa chen po dang ldan pa'i yid la byed pa btang ste/ nyan thos
 dang / rang sangs rgyas dang ldan pa'i yid la byed par rab tu lhung na/ de ni yid la byed pa'i rnam par g.yeng ba yin no/ /gal te phyi rol gyi 'dod pa'i yon tan lnga po dag dang / 'du 'dzi dang / mtshan ma dang / rnam par rtog pa dang / nyon mongs pa dang / nye ba'i
 nyon mongs pa dang / phyi rol gyi dmigs pa rnams la sems rnam par 'phro bar gtong na de'i phyi rol du sems rnam par g.yeng ba yin no/ /gal te rmugs pa dang / gnyid kyis bying ba'am/ snyoms par 'jug pa'i ro myang ba'am/ snyoms par 'jug pa'i nye
 ba'i nyon mongs pa gang yang rung bas nyon mongs par gyur na/ de ni nang du sems rnam par g.yeng ba yin no/ /gal te phyi rol gyi mtshan ma la brten nas nang gi ting nge 'dzin gyi spyod yul gyi mtshan ma yid la byed na/ de ni mtshan ma'i rnam par g.yeng
 ba yin no/ /gal te nang gi yid la byed pa la brten nas byung ba'i tshor ba la gnas ngan len gyi tshogs kyis nga'o snyam du rlom sems su byed na/ de ni gnas ngan len gyi rnam par g.yeng ba yin no/ /bcom ldan 'das zhi gnas dang lhag mthong dag byang chub sems
 dpa'i sa dang po nas bzung ste/ de bzhin gshegs pa'i sa'i bar la gang gi gnyen po lags/ byams pa zhi gnas dang lhag mthong gi sa dang po la ni ngan song ba'i nyon mongs pa dang / las dang / skye ba'i kun nas nyon mongs pa'i gnyen po yin no/ /gnyis pa la
 ni ltung ba phra mo'i 'khrul pa kun tu 'byung ba rnams kyi'o/ /gsum pa la ni 'dod pa'i 'dod chags kyi'o/ /bzhi pa la ni snyoms par 'jug pa la sred pa dang chos la sred pa'i 'o/ /lnga pa la ni 'khor ba dang / mya ngan las 'das pa dag la gcig tu mi phyogs pa nyid dang /
 mngon du phyogs pa nyid kyi'o/ /drug pa la ni mtshan ma mang po kun tu 'byung ba'i'o/ /bdun pa la ni mtshan ma phra mo kun tu 'byung ba'i'o/ /brgyad pa la ni mtshan ma med pa la rtsol ba dang / mtshan ma la dbang du ma gyur pa'i'o/ /dgu pa la ni rnam pa thams cad du chos
 ston pa la dbang du ma gyur pa'i'o/ /bcu pa la ni chos kyi sku yongs su rdzogs pa so so yang dag par rig pa ni mi 'thob pa'i'o/ /byams pa zhi gnas dang lhag mthong de bzhin gshegs pa'i sa la ni nyon mongs pa dang shes bya'i sgrib pa shin tu phra ba/ mchog tu ches shin tu phra
 ba'i gnyen po yin te/ de legs par bcom pas chos kyi sku shin tu rnam par dag pa la gnas pa na/ dgos pa yongs su grub pa'i dmigs pa la/ thams cad du chags pa med pa dang / thogs pa med pa'i shes pa dang mthong ba thob po/ /bcom ldan 'das byang
 chub sems dpa' zhi gnas dang lhag mthong la ji ltar bsgrub na/ bla na med pa yang dag par rdzogs pa'i byang chub mngon par 'tshang rgya bar 'gyur ba lags/ bcom ldan 'das kyis bka' stsal ba/ byams pa 'di la byang chub sems dpa' zhi gnas dang lhag mthong
 thob nas/ de bzhin nyid rnam pa bdun las brtsams te ji ltar thos pa dang bsams pa'i chos rnams la mnyam par gzhag pa'i sems kyis legs par gzung ba dang / legs par bsams pa dang / legs par rnam par gzhag pa'i de bzhin nyid de nyid nang du yid la
 byed de/ de ltar na de de bzhin nyid yid la byed pa na/ mtshan ma phra mo kun tu 'byung ba thams cad la yang re zhig sems lhag par btang snyoms su 'jog na/ rags pa dag la lta smos kyang ci dgos/ byams pa de la mtshan ma phra mo ni 'di dag yin te/ sems kyi
 len pa'i mtshan ma'am/ myong ba'i mtshan ma'am/ rnam par rig pa'i mtshan ma'am/ kun nas nyon mongs pa dang rnam par byang ba'i mtshan ma'am/ nang gi mtshan ma'am/ phyi rol gyi mtshan ma'am/ de gnyi ga'i mtshan ma'am/ sems can thams cad kyi
 don la sbyar bar bya'o snyam pa'i mtshan ma'am/ shes pa'i mtshan ma'am/ de bzhin nyid dang / sdug bsngal dang / kun 'byung ba dang / 'gog pa dang / lam gyi mtshan ma'am/ 'dus byas kyi mtshan ma'am/ 'dus ma byas kyi mtshan ma'am/ rtag pa'i
 mtshan ma'am/ mi rtag pa'i mtshan ma'am/ sdug bsngal dang 'gyur ba dang bcas pa'i rang bzhin gyi mtshan ma'am/ de mi 'gyur ba'i rang bzhin gyi mtshan ma'am/ 'dus byas kyi mtshan nyid mi 'dra ba'i mtshan ma'am/ de'i rang gi mtshan nyid kyi mtshan ma'am/ thams
 cad thams cad ces bya bar rig nas thams cad kyi mtshan ma'am/ gang zag la bdag med pa'i mtshan ma'am/ chos la bdag med pa'i mtshan ma gang dag yin pa ste/ de dag kun tu 'byung ba la sems lhag par btang snyoms su 'jog go/ /de ltar zhugs shing de la lan mang du
 gnas pa dus dus su gags dang / sgrib pa dang / rnam par g.yeng ba dag las sems rnam par spyod par byed pa de la/ nang gi so so'i bdag nyid la so so rang gis rig pa de bzhin nyid rnam pa bdun so sor rtogs pa'i shes pa rnam pa bdun skye bar
 'gyur te/ de ni de'i mthong ba'i lam yin no/ /de thob pas byang chub sems dpa' yang dag pa nyid skyon med pa la zhugs pa yin/ de bzhin gshegs pa'i rigs su skyes pa yin/ sa dang po thob pa dang / sa de'i phan yon yang nyams su myong ba yin no/ /des sngar
 zhi gnas dang lhag mthong thob pas ni rnam par rtog pa dang bcas pa'i gzugs brnyan dang / rnam par mi rtog pa'i gzugs brnyan gyi dmigs pa rnam pa gnyis thob pa yin no/ /de ltar mthong ba'i lam thob pas dngos po'i mtha'i dmigs pa thob pa yin te/
 des sa gong ma gong ma rnams su bsgom pa'i lam la zhugs shing dmigs pa rnam pa gsum po de dag nyid yid la byed pa na/ 'di lta ste/ dper na la la zhig khye'u ches phra mos khye'u ches sbom po 'byin par byed pa de bzhin du/ de yang khye'us khye'u dbyung ba'i tshul du nang gi
 mtshan ma rnam par sel ba nyid kyis kun nas nyon mongs pa'i cha dang mthun pa'i mtshan ma thams cad rnam par sel bar byed de/ mtshan ma rnams rnam par sel ba na gnas ngan len rnams kyang rnam par sel bar byed do/ /mtshan ma dang gnas ngan len thams cad legs
 par bcom pas rim gyis sa gong ma gong ma rnams su gser lta bur sems rnam par sbyong la/ bla na med pa yang dag par rdzogs pa'i byang chub kyi bar du mngon par rdzogs par 'tshang rgya zhing / dgos pa yongs su grub pa'i dmigs pa yang 'thob ste/ byams pa de ltar na
 byang chub sems dpa' zhi gnas dang lhag mthong la de ltar bsgrub na/ bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /byang chub sems dpa' ji ltar sgrub par bgyid na/ byang chub sems dpa' mthu chen po mngon par
 bsgrub pa lags/ byams pa byang chub sems dpa' gnas drug la mkhas pa ni byang chub sems dpa'i mthu chen po mngon par bsgrub pa yin te/ sems kyi skye ba la mkhas pa dang / gnas pa la mkhas pa dang / bslang ba la mkhas pa dang / 'phel ba la mkhas pa
 dang / 'grib pa la mkhas pa dang / thabs la mkhas pa'o/ /ji ltar na sems kyi skye ba la mkhas pa yin zhe na/ sems kyi skye ba rnam pa bcu drug shes na/ sems kyi skye ba la yang dag pa ji lta ba bzhin du mkhas pa yin te/ de la sems kyi skye ba rnam pa bcu drug
 ni/ brtan pa dang / snod kyi rnam par rig pa ni 'di lta ste/ len pa'i rnam par shes pa'i'o/ /dmigs pa rnam pa sna tshogs rnam par rig pa ni 'di lta ste/ rnam par rtog pa'i yid kyi rnam par shes pa gzugs la sogs pa yul cig car 'dzin pa/ phyi rol dang /
 nang gi yul cig car 'dzin pa dang / skad cig dang / thang cig dang / yud tsam cig la/ cig car ting nge 'dzin mang po la snyoms pa 'jug pa/ sangs rgyas kyi zhing mang po mthong ba/ de bzhin gshegs pa mang po mthong ba/ rnam par rtog pa'i yid kyi rnam
 par shes pa kho na'i'o/ /dmigs pa'i mtshan ma chung ngu rnam par rig pa'i ni 'di lta ste/ 'dod pa dang ldan pa'i'o / /dmigs pa'i mtshan ma rgya chen por gyur pa rnam par rig pa'i ni 'di lta ste/ gzugs dang ldan pa'i'o/ /dmigs pa'i mtshan ma tshad med pa rnam
 par rig pa'i ni 'di lta ste/ nam mkha' dang / rnam shes mtha' yas skye mched dang ldan pa'i'o/ /dmigs pa'i mtshan ma phra mo rnam par rig pa'i ni 'di lta ste/ ci yang med pa'i skye mched dang ldan pa'i'o/ /dmigs pa'i mtshan ma mthar thug pa rnam par rig
 pa'i ni 'di lta ste/ 'du shes med 'du shes med min skye mched dang ldan pa'i'o/ /mtshan ma med pa rnam par rig pa'i ni 'di lta ste/ 'jig rten las 'das pa dang / 'gog pa la dmigs pa'i'o/ /sdug bsngal dang ldan pa'i ni 'di lta ste/ sems can dmyal
 pa'i'o/ /tshor ba 'dren ma dang ldan pa'i ni 'di lta ste/ 'dod pa na spyod pa'i'o/ /dga' ba dang ldan pa'i ni 'di lta ste/ bsam gtan dang po dang gnyis pa'i'o/ /bde ba dang ldan pa'i ni 'di lta ste/ bsam gtan gsum pa'i'o/ /sdug bsngal
 yang ma yin/ bde ba yang ma yin pa dang ldan pa'i ni 'di lta ste/ bsam gtan bzhi pa dang / 'du shes med 'du shes med min skye mched pa'i bar gyi'o/ /nyon mongs pa can dang ldan pa'i ni 'di lta ste/ nyon mongs pa dang / nye ba'i nyon mongs pa dang ldan pa'i'o/ /
 dge ba dang ldan pa'i ni 'di lta ste/ dad pa la sogs pa dang ldan pa'i'o/ /lung du ma bstan pa dang ldan pa'i ni 'di lta ste/ gnyi ga dang mi ldan pa'i'o/ /ji ltar na gnas pa la mkhas pa yin zhe na/ gal te rnam par rig pa'i de bzhin nyid yang dag pa ji lta ba bzhin rab
 tu shes pa'o/ /ji ltar na bslang ba la mkhas pa yin zhe na/ gal te 'ching ba rnam pa gnyis po mtshan ma'i 'ching ba dang / gnas ngan len gyi 'ching ba yang dag pa ji lta ba bzhin rab tu shes te/ de rab tu shes nas de las sems 'di bslang bar bya'o zhes bya ba la
 mkhas pa yin no/ /ji ltar na 'phel ba la mkhas pa yin zhe na/ gal te mtshan ma dang gnas ngan len gyi gnyen po'i sems gang yin pa de skye ba dang 'phel ba'i tshe skye'o/ /'phel lo zhes 'phel ba la mkhas pa yin no/ /ji ltar na 'grib pa la mkhas pa yin zhe na/
 gal te de dang mi mthun pa'i phyogs su gyur pa mtshan ma dang / gnas ngan len gyis kun nas nyon mongs pa can du gyur pa'i sems de 'grib cing 'bri bar gyur pa na / 'grib cing 'bri'o zhes 'grib pa la mkhas pa yin no/ /ji ltar na thabs la mkhas pa yin zhe na/
 gal te rnam par thar pa dang / zil gyis gnon pa'i skye mched dang / zad par gyi skye mched dag sgom par byed pa ste/ byams pa de ltar na byang chub sems dpa' rnams la byang chub sems dpa'i mthu chen po mngon par bsgrubs pa dang / mngon par sgrub par 'gyur ba
 dang / mngon par sgrub par byed pa yin no/ /bcom ldan 'das bcom ldan 'das kyis phung po'i lhag ma med pa'i mya ngan las 'das pa'i dbyings su tshor ba thams cad ma lus par 'gag go zhes gang gsungs pa de la/ bcom ldan 'das gang dag 'gag pa'i tshor ba de
 dag gang lags/ byams pa mdor bsdu na tshor ba rnam pa gnyis 'gags te / gnas kyi gnas ngan len rig pa dang / de'i 'bras bu ni yul rig pa'o/ /de la gnas kyi gnas ngan len rig pa ni rnam pa bzhir rig par bya ste/ gzugs kyi gnas ngan len rig pa
 dang / gzugs med pa'i gnas ngan len rig pa dang / 'bras bu grub pa'i gnas ngan len rig pa dang / 'bras bu ma grub pa'i gnas ngan len rig pa'o/ /de la 'bras bu grub pa ni da ltar gyi gang yin pa'o/ /'bras bu ma grub pa ni ma 'ongs pa'i rgyur gyur pa gang yin
 pa'o/ /yul rig pa yang rnam pa bzhir rig par bya ste/ gnas rig pa dang / yo byad rig pa dang / longs spyod rig pa dang / ltos pa rig pa'o/ /de yang phung po'i lhag ma dang bcas pa'i mya ngan las 'das pa'i dbyings na'o/ /'bras bu ma grub pa'i rig pa'i 'dus
 te reg pa las byung ba'i tshor ba myong ba'i ni de'i mi mthun pa'i phyogs thams cad kyi thams cad du 'gag pa ma yin te/ 'dren mar myong ngo / /'bras bu grub pa'i myong ba yin na ni tshor ba rnam pa de gnyi ga thams cad kyi thams cad 'gags te / rig pa'i 'dus te reg pa las byung ba'i
 tshor ba 'ba' zhig myong ngo / /phung po'i lhag ma med pa'i mya ngan las 'das pa'i dbyings su yongs su mya ngan las 'da' ba na de yang 'gag par 'gyur te/ de'i phyir phung po'i lhag ma med pa'i mya ngan las 'das pa'i dbyings su tshor ba thams cad 'gag ces bya'o/ /de skad ces
 bka' stsal nas/ bcom ldan 'das kyis byang chub sems dpa' byams pa la bka' stsal ba/ /byams pa khyod kyis rnal 'byor gyi lam yongs su rdzogs pa dang / shin tu yongs su dag pa las brtsams nas 'di lta ste/ rnal 'byor la shin tu rnam par nges shing mkhas pas de
 bzhin gshegs pa la dri ba dris pa legs so legs so/ /ngas kyang rnal 'byor gyi lam de yongs su rdzogs pa dang / yongs su dag par bstan te/ 'das pa dang / ma 'ongs pa'i yang dag par rdzogs pa'i sangs rgyas gang dag yin pa de dag
 thams cad kyis kyang de ltar bstan cing ston par 'gyur ro/ /rigs kyi bu rnams dang / rigs kyi bu mo dag gis 'di la shin tu brtson par bya ba'i rigs so/ /de nas bcom ldan 'das kyis de'i tshe tshigs su bcad pa 'di dag bka' stsal to/ /chos rnams gdags pa rnam
 gzhag gang yin pa/ /de ni rnal 'byor bag yod don chen yin/ /gang dag chos der brten nas rnal 'byor 'dir/ /yang dag brtson pa de dag byang chub 'thob/ /gang dag glags lta de skad rgol ba las/ /thar par lta bas chos kun chub byed pa/ /byams pa de dag rnal
 'byor 'di las ni/ /thag ring gnam sa ring ba de bzhin no/ /blo ldan sems can don ces de dag las / /lan byed rig nas sems can don brtson min/ /lan der rtogs na kun gyi dam pa dang / /zang zing med pa'i dga' ba 'thob mi 'gyur/ /gang dag 'dod phyir chos kyi
 lung 'bogs pa/ /de dag 'dod pa spangs pa phyir len te/ /rmongs pa de dag chos kyi rin po che/ /rin thang med pa rnyed kyang spong zhing rgyu/ /de phyir brtsod dang 'du 'dzi spros ldan pa/ /rnam par spong la brtson 'grus mchog byos te/ /lhar bcas 'jig rten bsgral bar bya ba'i
 phyir/ /rnal 'byor 'di la rab tu brtson par gyis/ /de nas bcom ldan 'das la byang chub sems dpa' byams pas 'di skad ces gsol to/ /bcom ldan 'das dgongs pa nges par 'grel pa'i chos kyi rnam grangs 'dir bstan pa 'di'i ming ci lags/ 'di ji ltar gzung
 bar bgyi/ bcom ldan 'das kyis de la bka' stsal pa/ byams pa 'di ni rnal 'byor nges pa'i don bstan pa yin te/ 'di ni rnal 'byor nges pa'i don bstan pa zhes bya bar zung shig /rnal 'byor nges pa'i don bstan pa 'di bshad pa na srog chags drug 'bum ni bla na med pa
 yang dag par rdzogs pa'i byang chub tu sems skyes so/ /nyan thos sum 'bum ni chos rnams la chos kyi mig rdul med cing dri ma dang bral ba rnam par dag go/ /nyan thos 'bum lnga khri ni len pa med par zag pa rnams las sems rnam par grol lo/ /byang chub sems dpa'
 bdun khri lnga stong gis ni rnal 'byor chen po yid la byed pa thob par gyur to zhes gsungs pa'o/ / / /bam po bzhi bcu pa/ theg pa rnam par gzhag pa las brtsams nas/ theg pa'i rnam par dbye ba ji lta ba bzhin bstan pa ni dgongs pa nges par 'grel pa'i mdo
 las ji skad 'byung ba bzhin blta bar bya ste/ bcom ldan 'das la byang chub sems dpa' spyan ras gzigs dbang phyug gis zhu ba zhus pa/ bcom ldan 'das byang chub sems dpa' rnams kyi sa bcu gang lags pa de dag ni 'di lta ste/ byang chub sems dpa'i sa rab tu dga'
 ba zhes bgyi ba dang / dri ma med pa dang / 'od byed pa dang / 'od 'phro ba can dang / shin tu sbyang dka' ba dang / mngon du gyur pa dang / ring du song ba dang / mi g.yo ba dang / legs pa'i blo gros dang / chos kyi sprin lags/ sangs rgyas kyi sa ni bcu gcig pa lags
 na/ sa de dag rnam par dag pa du dag dang / yan lag du dag gis bsdus pa lags/ bcom ldan 'das kyis bka' stsal pa/ spyan ras gzigs dbang phyug sa de dag ni rnam par dag pa bzhi dang / yan lag bcu gcig gis bsdus par rig par bya'o/ /spyan ras
 gzigs dbang phyug de la sa dang po ni bsam pa rnam par dag pas bsdus so/ /sa gnyis pa ni lhag pa'i tshul khrims rnam par dag pas so/ /sa gsum pa ni lhag pa'i sems rnam par dag pas so/ /sa bzhi pa nas bzung ste sangs rgyas kyi sa'i bar ni lhag pa'i shes rab rnam par
 dag pa gong nas gong du gya nom pa bas kyang ches gya nom pas bsdus par rig par bya ste/ sa de dag ni rnam par dag pa bzhi po de dag gis bsdus pa yin no/ /yan lag bcu gcig gang zhe na/ spyan ras gzigs dbang phyug mos pas spyod pa'i sa la byang chub sems dpa' chos
 spyad pa rnam pa bcu po dag la mos pa shin tu bsgoms pa'i phyir bzod pas sa de las yang dag par 'das nas/ byang chub sems dpa'i yang dag pa nyid skyon med pa la 'jug go/ /de yan lag des yongs su rdzogs pa yin yang / ltung ba phra mo'i 'khrul pa
 kun tu 'byung ba dag la shes bzhin du spyod par mi nus pas/ de yan lag des yongs su ma rdzogs pa yin te/ de yan lag de yongs su rdzogs par bya ba'i phyir 'bad pas de yang 'thob po/ /de yan lag de yongs su rdzogs pa yin yang / 'jig rten pa'i ting nge 'dzin yongs su
 rdzogs pa la snyoms par 'jug pa dang / thos pa'i gzungs yongs su rdzogs pa thob par mi nus pas/ de yan lag des yongs su ma rdzogs pa yin te/ de yan lag de yongs su rdzogs par bya ba'i phyir/ 'bad pas de yang 'thob po/ /de yan lag des yongs su rdzogs
 pa yin yang / byang chub kyi phyogs dang mthun pa'i chos ji ltar thob pa de dag gis de lan mang du gnas par bya ba dang / snyoms par 'jug pa la sred pa dang / chos la sred pa las sems lhag par btang snyoms su 'jog mi nus pas/ de yan lag des yongs su ma rdzogs pa yin
 te/ de yan lag des yongs su rdzogs par bya ba'i phyir 'bad pas de yang 'thob po/ /de yan lag des yongs su rdzogs pa yin yang / bden pa rnams rnam par dpyad pa dang / 'khor ba dang mya ngan las 'das pa dag la gcig tu mi phyogs pa nyid dang / mngon du phyogs pa'i
 yid la byed pa lhag par btang snyoms su gzhag pa dang / thabs kyis yongs su zin pa'i byang chub kyi phyogs dang mthun pa'i chos rnams bsgom par mi nus pas/ de yan lag des yongs su ma rdzogs pa yin te/ de yan lag des yongs su rdzogs par bya ba'i phyir 'bad
 pas de yang 'thob po/ /de yan lag des yongs su rdzogs pa yin yang / 'du byed kyi 'jug pa ji lta ba bzhin mngon sum du byas nas de la spyo ba mang ba dang / mtshan ma med pa yid la byed pas lan mang du gnas par mi nus pas/ de yan lag des yongs su ma rdzogs pa yin te/
 de yan lag des yongs su rdzogs par bya ba'i phyir 'bad pas de yang 'thob po/ /de yan lag des yongs su rdzogs pa yin yang / bar chad med pa dang / rgyun mi 'chad par mtshan ma med pa'i yid la byed pas mang du gnas par mi nus pas/ de yan lag des yongs su ma
 rdzogs pa yin te/ de yan lag des yongs su rdzogs par bya ba'i phyir 'bad pas de yang 'thob po/ de yan lag des yongs su rdzogs pa yin yang mtshan ma med par gnas pa de la rtsol ba lhag par btang snyoms su gzhag pa dang / mtshan ma la dbang thob par mi nus
 pas/ de yan lag des yongs su ma rdzogs pa yin te/ de yan lag des yongs su rdzogs par bya ba'i phyir 'bad pas de yang 'thob po/ /de yan lag des yongs su rdzogs pa yin yang / rnam grangs dang / mtshan nyid nges pa'i tshig dang / rab tu dbye ba rnam pa thams
 cad du chos ston pa la dbang thob par mi nus pas/ de yan lag des yongs su ma rdzogs pa yin te/ de yan lag des yongs su rdzogs par bya ba'i phyir 'bad pas de yang 'thob po/ /de yan lag des yongs su rdzogs pa yin yang / chos kyi sku yongs su rdzogs pa so
 sor yang dag par rig pa 'thob par mi nus pas/ de yan lag des yongs su ma rdzogs pa yin te/ de yan lag des yongs su rdzogs par bya ba'i phyir 'bad pas de yang 'thob po/ /de yan lag des yongs su rdzogs pa yin yang / shes bya thams cad la chags pa med
 pa dang / thogs pa med pa'i shes pa dang / mthong ba 'thob par mi nus pas/ de yan lag des yongs su ma rdzogs pa yin te/ de yan lag des yongs su rdzogs par bya ba'i phyir 'bad pas de yang 'thob ste/ de yan lag des yongs su rdzogs pa yin no/ /de
 yan lag des yongs su rdzogs pa'i phyir yan lag thams cad yongs su rdzogs pa yin te/ /spyan ras gzigs dbang phyug sa de dag na / yan lag bcu gcig po de dag gis bsdus par rig par bya'o/ /bcom ldan 'das ci'i slad du/ sa dang po la rab tu dga' ba
 zhes bgyi/ ci'i slad du sangs rgyas kyi sa'i bar la sangs rgyas kyi sa zhes bgyi lags/ sa dang po ni don che ba 'dris pa ma yin pa 'jig rten las 'das pa'i sems thob pas dga' ba dang / mchog tu dga' ba rgya che ba'i phyir rab tu dga' ba zhes bya'o/ /
 sa gnyis pa ni ltung ba phra mo dang 'chal ba'i tshul khrims kyi dri ma thams cad dang bral ba nyid kyi phyir dri ma med pa zhes bya'o/ /sa gsum pa ni ting nge 'dzin de dang thos pa'i gzungs de shes pa'i snang ba tshad med pa'i gnas nyid yin pa'i phyir 'od byed pa zhes bya'o/ /sa bzhi
 pa ni nyon mongs pa'i shing bsreg pa'i phyir/ byang chub kyi phyogs dang mthun pa'i chos bsgoms pa de ye shes kyi me'i 'od 'phro bar gyur pa'i phyir 'od 'phro ba can zhes bya'o/ /sa lnga pa ni byang chub kyi phyogs dang mthun pa'i chos de dag nyid thabs kyis bsgom pa de la dbang
 bya bar dka' ba nyid kyi phyir shin tu sbyang dka' zhes bya'o/ /sa drug pa ni 'du byed kyi 'jug pa mngon sum du gyur pa nyid dang / mtshan ma med pa la lan mang du yid la byed pa mngon du gyur pa'i phyir mngon du gyur pa zhes bya'o/ /sa bdun pa ni mtshan ma med pa yid la byed pa la bar
 chad med cing rgyun mi 'chad pa ring du rjes su zhugs pa dang / rnam par dag pa'i sa dang rjes su 'brel pa nyid kyi phyir ring du song ba zhes bya'o/ /sa brgyad pa ni mtshan ma med pa la lhun gyis grub pa nyid dang / mtshan ma'i nyon mongs pa kun du 'byung bas mi bskyod pa nyid kyi phyir mi g.yo ba
 zhes bya'o/ /sa dgu pa ni rnam pa thams cad du chos ston pa'i dbang la kha na ma tho ba med pa'i blo gros shin tu yangs pa thob pa nyid kyi phyir legs pa'i blo gros zhes bya'o/ /sa bcu pa ni gnas ngan len gyi lus nam mkha' lta bu la chos kyi sku sprin chen po lta bus khyab cing khebs pa'i phyir
 chos kyi sprin zhes bya'o/ /sa bcu gcig pa ni nyon mongs pa dang shes bya'i sgrib pa shin tu phra mo spangs pas/ chags pa med cing thogs pa med par shes bya'i rnam pa thams cad mngon par rdzogs par byang chub pa nyid kyi phyir sangs rgyas kyi sa zhes bya'o/ /bcom ldan 'das
 sa de dag la kun tu rmongs pa ni du mchis/ gnas ngan len gyi mi mthun pa'i phyogs ni du mchis lags/ bcom ldan 'das kyis bka' stsal pa/ spyan ras gzigs dbang phyug kun tu rmongs pa nyi shu rtsa gnyis dang / gnas ngan len mi mthun pa'i phyogs bcu gcig ste/
 sa dang po la ni gang zag dang chos la mngon par zhen pa kun tu rmongs pa dang / ngan song ba'i nyon mongs pa kun tu rmongs pa dang / de'i gnas ngan len mi mthun pa'i phyogs so/ /sa gnyis pa la ni ltung ba phra mo'i 'khrul pa kun tu rmongs pa dang / las kyi rnam pa/ rnam pa sna
 tshogs la kun tu rmongs pa dang / de'i gnas ngan len mi mthun pa'i phyogs so/ /gsum pa la ni 'dod pa'i 'dod chags kyis kun tu rmongs pa dang / thos pa'i gzungs yongs su rdzogs pa la kun tu rmongs pa dang / de'i gnas ngan len mi mthun pa'i phyogs so/ /bzhi pa la
 ni snyoms par 'jug pa la sred pa kun tu rmongs pa dang / chos la sred pa kun tu rmongs pa dang / de'i gnas ngan len mi mthun pa'i phyogs so/ /lnga pa la ni 'khor ba la gcig tu mi phyogs pa nyid dang / mngon du phyogs pa de nyid yid la byed pa kun tu rmongs pa dang / mya ngan
 las 'das pa la gcig tu mi phyogs pa nyid dang / mngon du phyogs pa nyid yid la byed pa kun tu rmongs pa dang / de'i gnas ngan len mi mthun pa'i phyogs so/ /drug pa la ni 'du byed kyi 'jug pa mngon sum du byas pa nyid la kun tu rmongs pa dang / mtshan ma mang po kun tu
 'byung ba kun tu rmongs pa dang / de'i gnas ngan len mi mthun pa'i phyogs so/ /bdun pa la ni mtshan ma phra mo kun tu 'byung ba kun tu rmongs pa dang / mtshan ma med pa gcig tu yid la byed pa'i thabs kun tu rmongs pa dang / de'i gnas ngan len mi mthun pa'i phyogs so/ /
 brgyad pa la ni mtshan ma med pa la rtsod pa kun tu rmongs pa dang / mtshan ma rnams la mi dbang ba kun tu rmongs pa dang / de'i gnas ngan len mi mthun pa'i phyogs so/ /dgu pa la ni chos bstan pa dpag tu med pa dang / chos kyi tshig dang / yi ge dpag tu med pa dang /
 gong nas gong du shes rab dang / spobs pa la gzungs kyi dbang ba kun tu rmongs pa dang / spobs pa'i dbang la kun tu rmongs pa dang / de'i gnas ngan len mi mthun pa'i phyogs so/ sa bcu pa la ni mngon par shes pa chen po la kun tu rmongs
 pa dang / gsang ba dang phra ba'i rjes su 'jug pa la kun tu rmongs pa dang / de'i gnas ngan len mi mthun pa'i phyogs so/ /sangs rgyas kyi sa la ni shes bya thams cad la chags pa shin tu phra mo kun tu rmongs pa dang / thogs pa kun tu rmongs pa dang / de'i gnas ngan
 len mi mthun pa'i phyogs so/ /spyan ras gzigs dbang phyug sa de dag ni kun tu rmongs pa nyi shu rtsa gnyis dang / gnas ngan len bcu gcig po de dag gi rnam par gzhag ste/ bla na med pa yang dag par rdzogs pa'i byang chub ni mi ldan pa yin no/ /bcom ldan
 'das gang la da ltar byang chub sems dpa' rnams de ltar kun tu rmongs pa'i dra ba chen po rab tu dral cing de'i gnas ngan len thibs po chen po las yang dag par 'das te/ bla na med pa yang dag par rdzogs pa'i byang chub mngon par rdzogs par 'tshang rgya ba'i bla na med pa yang dag
 par rdzogs pa'i byang chub ci tsam du phan yon che zhing / 'bras bu che ba ni ngo mtshar lags so/ /bcom ldan 'das sa de dag rnam par dag pa du dag gis rnam par gzhag lags/ spyan ras gzigs dbang phyug brgyad kyis te/ lhag pa'i bsam pa rnam par dag pa dang /
 sems rnam par dag pa dang / snying rje rnam par dag pa dang / pha rol tu phyin pa rnam par dag pa dang / sangs rgyas mthong zhing bsnyen bkur byed pa rnam par dag pa dang / sems can yongs su smin par byed pa rnam par dag pa dang / skye ba rnam par dag pa dang / mthu rnam
 par dag pas so/ /spyan ras gzigs dbang phyug sa dang po la lhag pa'i bsam pa rnam par dag pa nas/ mthu rnam par dag pa'i bar gang yin pa dang / sa gong ma gong ma rnams dang / sangs rgyas kyi sa'i bar la lhag pa'i bsam pa rnam par dag pa nas/ mthu rnam
 par dag pa'i bar gang yin pa de ni ches rnam par dag pa dang / ches shin tu rnam par dag pa yin par rig par bya'o/ /de la sangs rgyas kyi sa la skye ba rnam par dag pa ma rtogs pa dang / sa dang po'i yon tan gang dag yin pa de dag gis de'i gong ma'i sa rnams de'i yon tan dang
 yang mnyam la/ rang gi sa'i yon tan gyis kyang khyad par du 'phags par yang rig par bya'o/ /byang chub sems dpa'i sa bcu po thams cad ni yon tan bla na yod pa dag yin la/ sangs rgyas kyi sa ni yon tan bla na med pa yin par rig par bya'o/ /bcom ldan
 'das ci'i slad du srid par skye ba thams cad kyi nang na/ byang chub sems dpa'i skye ba rab mchog ces bgyi lags/ spyan ras gzigs dbang phyug rnam pa bzhi'i phyir te/ dge ba'i rtsa ba shin tu rnam par dag pa yang dag par 'grub pa nyid kyi phyir dang / so sor brtags
 te len pa nyid kyi phyir dang / 'gro ba thams cad yongs su bskyab pa'i phyir snying rje dang ldan pa nyid kyi phyir dang / bdag nyid kun nas nyon mongs pa can ma yin pa nyid dang / gzhan gyi kun nas nyon mongs pa rnam par zlog par byed pa nyid kyi phyir ro/ /bcom ldan 'das ci'i
 slad du/ byang chub sems dpa' rnams smon lam rgya chen pos mchi ba dang smon lam gya nom pa dang ldan pa dang / smon lam gyi stobs can lags/ spyan ras gzigs dbang phyug rnam pa bzhi'i phyir te/ 'di ltar byang chub sems dpa' rnams ni mya ngan las 'das
 pa'i bde ba la gnas par mkhas pa dang / de myur du 'thob par nus pa dang / myur du 'thob pa de dang / bde bar gnas pa de yang spangs te/ sems can gyi don rgyu med pa/ dgos pa med pa/ sdug bsngal mang po sna tshogs yun ring po 'byung ba la yid kyis smon par byed pa ste/
 de'i phyir smon lam rgya chen pos 'gro ba dang / smon lam gya nom pa dang ldan pa dang / smon lam gyi stobs can rnams zhes bya'o/ /bcom ldan 'das byang chub sems dpa' rnams kyi bslab pa'i gzhi du mchis lags/ spyan ras gzigs dbang phyug drug ste/ sbyin pa dang /
 tshul khrims dang / bzod pa dang / brtson 'grus dang / bsam gtan dang / shes rab bo/ /bcom ldan 'das bslab pa'i gzhi drug po de dag las/ du ni lhag pa'i tshul khrims kyi bslab pa lags/ du ni lhag pa'i sems kyi bslab pa lags/
 du ni lhag pa'i shes rab kyi bslab pa lags/ spyan ras gzigs dbang phyug dang po gsum ni lhag pa'i tshul khrims kyi bslab pa yin par rig par bya'o/ /bsam gtan ni lhag pa'i sems kyi bslab pa yin no/ /shes rab ni lhag pa'i shes rab kyi bslab pa yin no/ /brtson
 'grus ni kun tu 'gro ba yin par nga smra'o/ /bcom ldan 'das bslab pa'i gzhi drug po de dag las/ du ni bsod nams kyi tshogs lags/ du ni ye shes kyi tshogs lags/ spyan ras gzigs dbang phyug lhag pa'i tshul khrims kyi bslab pa gang yin pa de ni bsod nams
 kyi tshogs yin no/ /lhag pa'i shes rab kyi bslab pa gang yin pa de ni ye shes kyi tshogs yin no/ /brtson 'grus dang bsam gtan ni kun tu 'gro ba yin par nga smra'o/ /bcom ldan 'das bslab pa'i gzhi drug po de dag la/ byang chub sems dpa' ji ltar bslab par bgyi
 lags/ spyan ras gzigs dbang phyug rnam pa lnga ste/ pha rol tu phyin pa dang ldan pa'i dam pa'i chos bstan pa byang chub sems dpa'i sde snod la thog ma kho nar shin tu mos pa dang / de'i 'og tu chos spyod pa bcu po dag gis thos pa dang bsams pa dang / bsgoms pa
 las byung ba'i shes pas bsgrub pa dang / byang chub kyi sems rjes su bsrung ba dang / dge ba'i bshes gnyen la bsten pa dang / rgyun mi 'chad par dge ba'i phyogs la sbyor bas bslab par bya'o/ /bcom ldan 'das ci'i slad du bslab pa'i gzhi de dag rnam grangs drug tu
 gdags par rig par bgyi lags/ spyan ras gzigs dbang phyug rnam pa gnyis kyi phyir te/ sems can la phan gdags pa dang / nyon mongs pa'i gnyen po nyid kyi phyir ro/ /de la gsum ni sems can la phan gdags pa yin la/ gsum ni nyon mongs pa'i gnyen
 po yin par rig par bya'o / /de la byang chub sems dpa' sbyin pas ni sems can rnams la yo byad nye bar bsgrub pas phan 'dogs pas phan 'dogs so/ /tshul khrims kyis ni phongs pa dang / gnod pa dang rnam par tho 'tshams pa nye bar ni sgrub pa'i phan 'dogs pas phan 'dogs
 so/ /bzod pas ni phongs pa dang / gnod pa dang rnam par tho 'tshams par ji mi snyam pas phan 'dogs te/ de gsum gyis ni sems can la phan 'dogs so/ /brtson 'grus kyis ni nyon mongs pa rnam par ma bcil ba dang / nyon mongs pa yang dag par ma bcom
 pas dge ba'i phyogs la sbyor bar byed de/ de ni nyon mongs pas dge ba'i phyogs la sbyor ba las bskyod par mi nus so/ /bsam gtan gyis ni nyon mongs pa rnams rnam par gnon to/ /shes rab kyis ni bag la nyal yang dag par 'joms par byed de/ de gsum ni nyon
 mongs pa'i gnyen po yin no/ /bcom ldan 'das ci'i slad du pha rol tu phyin pa gzhan dag grangs bzhir gdags par rig par bgyi lags/ spyan ras gzigs dbang phyug pha rol tu phyin pa drug pa de dag nyid kyi grogs su gyur pa nyid yin pa'i phyir te/ de la pha rol tu phyin
 pa gsum gyis sems can rnams la phan btags nas/ byang chub sems dpas bsdu ba'i dngos pos zin pa'i thabs la mkhas pas dge ba la 'jog par byed do/ /de'i phyir ngas thabs la mkhas pa'i pha rol tu phyin pa ni gsum po 'di dag gi grogs su gyur pa yin par
 yongs su bstan to/ /spyan ras gzigs dbang phyug gal te byang chub sems dpa' tshe 'di la nyon mongs pa mang bas rtag tu bsgom mi nus pa dang / khams dang mos pa dman pa'i phyir lhag pa'i bsam pa stobs chung bas sems nang du 'jog mi nus pa dang / byang chub sems
 dpa'i sde snod thos pa'i dmigs pa la bsam gtan yongs su ma bsgoms pas 'jig rten las 'das pa'i shes rab mngon par sgrub mi nus pa yin na/ de bsod nams kyi tshogs chung ngu yang yang dag par blangs te gnas shing phyi ma la nyon mongs pa chung ba nyid du yid kyis smon
 par byed pa de ni de'i smon lam gyi pha rol tu phyin pa yin te/ des nyon mongs pa chung ba dang / brtson 'grus rtsom nus par 'gyur bas/ de'i phyir smon lam gyi pha rol tu phyin pa ni brtson 'grus kyi pha rol tu phyin pa'i grogs su gyur pa yin no/ /des skyes
 bu dam pa la yang yang dag par bsten pa dang / dam pa'i chos mnyan pa la brten nas/ tshul bzhin yid la byed pa thob cing lhag pa'i bsam pa stobs chung ba nyid rnam par bzlog nas/ khams gya nom pa las bsam pa'i stobs 'thob par 'gyur ba de ni de'i stobs
 kyi pha rol tu phyin pa yin te/ des sems nang du 'jog nus pas de'i phyir stobs kyi pha rol tu phyin pa ni bsam gtan gyi pha rol tu phyin pa'i grogs su gyur pa yin no/ /de byang chub sems dpa'i sde snod thos pa'i dmigs pa yongs su bsgoms pa la bsam gtan byed de/
 de ni de'i ye shes kyi pha rol tu phyin pa yin te/ des 'jig rten las 'das pa'i shes rab mngon par bsgrub nus par 'gyur bas/ de'i phyir ngas ye shes kyi pha rol tu phyin pa ni/ shes rab kyi pha rol tu phyin pa'i grogs su gyur pa yin par yongs su bstan to/ /bcom
 ldan 'das ci'i slad du pha rol tu phyin pa drug po de dag gi go rims de ltar bstan par rig par bgyi lags/ spyan ras gzigs dbang phyug de dag gong nas gong du 'grub pa'i rten nyid yin pa'i phyir te/ byang chub sems dpa' lus dang longs spyod la mi lta na tshul khrims
 yang dag par len par byed do/ /tshul khrims rjes su bsrungs na bzod pa dang ldan par 'gyur ro/ /bzod pa dang ldan na brtson 'grus brtsam bar 'gyur ro/ /brtson 'grus brtsams na bsam gtan bsgrub par 'gyur ro/ /bsam gtan grub na 'jig rten las 'das
 pa'i shes rab 'thob bo/ /bcom ldan 'das pha rol tu phyin pa de dag rnam pa dur rab tu dbye lags/ spyan ras gzigs dbang phyug rnam pa gsum du ste/ sbyin pa rnam pa gsum ni chos sbyin pa dang / zang zing sbyin pa dang / mi 'jigs pa sbyin pa'o/ /tshul khrims
 rnam pa gsum ni mi dge ba las ldog pa'i tshul khrims dang / dge ba la 'jug pa'i tshul khrims dang / sems can gyi don la 'jug pa'i tshul khrims so/ /bzod pa rnam pa gsum ni/ gnod pa byed pa la mi mjed pa'i bzod pa dang / sdug bsngal la ji mi
 snyam pa'i bzod pa dang / chos la nges par rtog pa'i bzod pa'o/ /brtson 'grus rnam pa gsum ni go cha'i brtson 'grus dang / dge ba la sbyor ba'i brtson 'grus dang / sems can gyi don la sbyor ba'i brtson 'grus so/ /bsam gtan rnam pa gsum ni rnam par mi
 rtog cing zhi la rab tu zhi bas nyon mongs pa dang / sdug bsngal gyi gnyen po bde bar gnas pa'i bsam gtan dang / yon tan mngon par sgrub pa'i bsam gtan dang / sems can gyi don mngon par sgrub pa'i bsam gtan no/ /shes rab rnam pa gsum ni kun rdzob
 kyi bden pa la dmigs pa dang / don dam pa'i bden pa la dmigs pa dang / sems can gyi don la dmigs pa'o/ /bcom ldan 'das ci'i slad du pha rol tu phyin pa de dag pha rol tu phyin pa rnams zhes bgyi lags/ spyan ras gzigs dbang phyug lnga'i phyir te/ chags
 pa med pa nyid dang / mi lta ba nyid dang / kha na ma tho ba med pa nyid dang / rnam par mi rtog pa nyid dang / yongs su bsngo ba nyid kyi phyir ro/ /de la chags pa med pa nyid ni pha rol tu phyin pa dang mi mthun pa'i dngos po la lhag par chags pa med pa gang yin pa'o/ /de la
 mi lta ba nyid ni pha rol tu phyin pa'i 'bras bu rnam par smin pa dang / lan du phan thogs pa dang / 'brel pa'i sems med pa gang yin pa'o/ /de la kha na ma tho ba med pa nyid ni pha rol tu phyin pa de dag kun nas nyon mongs pa can gyi chos dang ma 'dres shing / thabs ma yin pa
 rnam par spangs pa gang yin pa'o/ /de la rnam par mi rtog pa nyid ni pha rol tu phyin pa de dag gi rang gi mtshan nyid la sgra ji bzhin du mngon par zhen pa med pa gang yin pa'o/ /de la yongs su bsngo ba nyid ni pha rol tu phyin pa de dag nyid byas shing bstsags pa byang chub chen po'i 'bras bur
 smon pa gang yin pa'o/ /bcom ldan 'das pha rol tu phyin pa dang mi mthun pa'i dngos po gang lags/ spyan ras gzigs dbang phyug de dag ni dngos po drug tu rig par bya ste/ 'dod pa'i dga' ba dang / longs spyod dang / dbang phyug dang /
 bdag nyid kyi bsod nams la yon tan gyi phan yon du lta ba dang / lus dang ngag dang yid ci 'dod dgur kun tu spyod pa dang / brnyas pa mi bzod pa dang / mi brtson pa'i bsod nyams dang / 'du 'dzi dang / 'jig rten gyi sna tshogs dang / rnam par g.yeng ba la 'jug
 pa dang / mthong ba dang / thos pa dang / bye brag phye ba dang / rnam par shes pa'i tha snyad kyi spros pa dag la yon tan gyi phan yon du blta ba'o/ /bcom ldan 'das pha rol tu phyin pa de dag gi rnam par smin pa'i 'bras bu gang lags/ spyan ras gzigs dbang phyug de yang
 rnam pa drug tu rig par bya ste/ longs spyod chen po nyid dang / bde 'gror 'gro ba dang / kho na med cing dbyen med la bde ba dang / yid bde ba mang ba dang / sems can gyi bdag po dang / lus la gnod pa med pa dang / dbang che bar grags pa'o/ /bcom ldan
 'das pha rol tu phyin pa de dag la kun nas nyon mongs pa can gyi chos dang 'dres pa gang lags/ spyan ras gzigs dbang phyug de ni sbyor ba bzhis rig par bya ste/ snying rje med pa'i sbyor ba dang / tshul bzhin ma yin pa'i sbyor ba dang / rtag tu mi byed pa'i sbyor ba dang / gus
 par mi byed pa'i sbyor bas so/ /de la tshul bzhin ma yin pa'i sbyor ba ni 'di yin te/ de las gzhan pa'i pha rol tu phyin pa dag la de las gzhan pa'i pha rol tu phyin pa'i thabs dang bral zhing bsgom pa nyams pa gang yin pa'o/ /bcom ldan 'das thabs ma lags pa gang
 lags/ spyan ras gzigs dbang phyug byang chub sems dpa' pha rol tu phyin pa de dag gis sems can rnams la phan 'dogs pa na/ gal te zang zing gis phan 'dogs pa nye bar bsgrub pa tsam gyis chog par 'dzin cing / mi dge ba'i gnas nas bslangs te dge ba'i
 gnas su 'jog par mi byed na/ de ni thabs ma yin pa yin no/ /de ci'i phyir zhe na/ spyan ras gzigs dbang phyug de tsam gyis na sems can la phan btags pa ma yin pa'i phyir te/ 'di lta ste dper na/ mi gtsang ba ni che yang rung chung yang rung ste rnam grangs gang gis
 kyang dri zhim por bya bar mi nus so/ /de bzhin du 'du byed kyi sdug bsngal nyid kyis rang bzhin gyis sdug bsngal bar gyur pa'i sems can rnams kyang zang zing gis phan btags pa nye bar bsgrub pa tsam gyis rnam grangs gang gis kyang bde bar bya mi nus kyi/ dge ba la 'jog pa gang yin
 pa de ni de dag la phan 'dogs pa'i mchog kho na yin no/ /bcom ldan 'das pha rol tu phyin pa de dag gi rnam par dag pa du mchis lags/ spyan ras gzigs dbang phyug nga ni rnam pa lnga po de dag ma gtogs par pha rol tu phyin pa rnams kyi rnam par dag pa gzhan yod par mi
 smra mod kyi 'on kyang de dag nyid la brten nas/ pha rol tu phyin pa rnams kyi rnam par dag pa bsdus pa dang so sor phye ba khyod la bshad par bya'o/ /de la pha rol tu phyin pa thams cad kyi rnam par dag pa bsdus pa ni rnam pa bdun gyis rig par bya ste/ bdun gang zhe na/ 'di lta ste/
 byang chub sems dpa' chos de dag gis gzhan las shes kyi khe yongs su mi tshol ba dang / chos de dag la lta bas mngon par zhen par mi byed pa dang / chos 'di dag kyang byang chub tu nges par 'byin pa yin nam ma yin snyam du yid gnyis dang the tshom skyed par mi byed pa dang / bdag
 la mi bstod gzhan la mi smod cing brnyas par mi byed pa dang / dregs par mi byed cing bag med par mi byed pa dang / cung zad tsam dang / ngan ngon tsam gyis chog par mi 'dzin pa dang / chos de dag gis ser sna med cing gzhan dag la phrag dog mi byed pa yin no/ /pha rol tu
 phyin pa'i rnam par dag pa so so tha dad pa de yang rnam pa bdun kho nar rig par bya ste/ tha dad pa rnam pa bdun gang zhe na/ 'di lta ste/ sbyin pa rnam par dag pa bdun po sbyin par bya ba'i dngos po rnam par dag pas sbyin pa rnam par dag pa sbyin par byed pa dang / tshul khrims rnam par
 dag pa dang / lta ba rnam par dag pa dang / sems rnam par dag pa dang / ngag rnam par dag pa dang / shes pa rnam par dag pa dang / dri ma rnam par dag pas sbyin pa rnam par dag pa sbyin par byed do zhes ngas bstan pa gang yin pa de dag byang chub
 sems dpas yang dag par blangs te gnas pa de ni sbyin pa rnam par dag pa rnam pa bdun yin no/ /'di lta ste/ byang chub sems dpa' sdom pa bcas pa la bslab pa'i gzhi rnam pa thams cad la mkhas pa dang / ltung ba las bslang ba la mkhas pa dang / de la nges pa'i
 tshul khrims can dang / brtan pa'i tshul khrims can dang / rtag tu byed pa dang / rtag tu 'jug pa dang / bslab pa'i gzhi rnams yang dag par blangs te/ slob par byed pa de ni tshul khrims rnam par dag pa rnam pa bdun yin no/ /'di lta ste/ thams cad las gnod
 pa thams cad nye bar gnas pa na bdag nyid kyi las kyi rnam par smin pa la rton pas mi 'khrug pa dang / lan bya ba'i phyir slar spyo ba dang / gshe ba dang / rdeg pa dang / bsdigs pa dang / mtshang 'dru ba'i gnod pa dag gis sbyor bar mi byed pa dang / khon gyi bsam pa mi
 'dzin pa dang / shad kyis 'chags pa na yongs su nyon mongs par mi byed pa dang / shad kyis 'chags pa la mi sdod pa dang / 'jigs pa dang / zang zing gi sems kyis bzod par byed pa ma yin pa dang / phan gdags par bya ba la yal bar mi 'dor ba de ni bzod
 pa rnam par dag pa rnam pa bdun yin no/ /'di lta ste/ brtson 'grus kyi rnam pa mnyam pa nyid rab tu shes pa dang / brtson 'grus brtsams pa des bdag la mi stod cing gzhan la mi smod pa dang / mthu dang ldan pa dang / brtson 'grus dang ldan pa dang / spro ba dang ldan
 pa dang / rtul ba brtan pa dang / dge ba'i chos rnams la brtson pa ma btang ba de ni brtson 'grus rnam par dag pa rnam pa bdun yin no/ /'di lta ste/ mtshan ma legs par rtogs pa'i ting nge 'dzin la bsam gtan pa dang / yongs su rdzogs pa'i ting nge 'dzin la bsam
 gtan pa dang / gnyi ga'i cha'i ting nge 'dzin la bsam gtan pa dang / shugs kyis 'byung ba'i ting nge 'dzin la bsam gtan pa dang / mi gnas pa'i ting nge 'dzin la bsam gtan pa dang / shin tu sbyang ba byas pa'i ting nge 'dzin la bsam gtan pa dang / yongs su rdzogs pa'i
 byang chub sems dpa'i sde snod kyi dmigs pa yongs su bsgom pa dpag tu med pa'i ting nge 'dzin la bsam gtan pa de ni bsam gtan rnam par dag pa rnam pa bdun pa yin no/ /'di lta ste/ de'i shes rab de sgro 'dogs pa'i mtha' dang / skur pa 'debs pa'i mtha' rnam par spangs
 te/ dbu ma'i lam gyis nges par 'byung ba dang / shes rab des stong pa nyid dang / smon pa med pa nyid dang / mtshan ma med pa rnam par thar pa'i sgo gsum po dag la rnam par thar pa'i sgo'i don kyang yang dag pa ji lta ba bzhin rab tu shes pa dang / kun brtags pa dang / gzhan gyi
 dbang dang / yongs su grub pa'i ngo bo nyid gsum po dag la ngo bo nyid kyi don kyang yang dag pa ji lta ba bzhin du rab tu shes pa dang / mtshan nyid dang skye ba dang don dam pa ngo bo nyid med pa gsum po dag la ngo bo nyid med pa'i don kyang yang dag pa ji lta ba bzhin du rab tu shes pa dang / rig
 pa'i gnas lnga po dag la kun rdzob kyi bden pa'i don kyang yang dag pa ji lta ba bzhin du rab tu shes pa dang / de bzhin nyid rnam pa bdun la/ don dam pa'i bden pa'i don kyang yang dag pa ji lta ba bzhin du rab tu shes pa dang / rnam par mi rtog cing spros pa med la/ tshul gcig
 tu de la mang du gnas pa dang 'dres pa tshad med pa'i chos la dmigs pa med pa'i lhag mthong gis chos kyi rjes su mthun pa'i chos bsgrub pa yang dag par sgrub par byed pa de ni shes rab rnam par dag pa rnam pa bdun yin par rig par bya'o/ /bcom ldan 'das rnam pa lnga po de dag gi so so'i
 las gang lags/ spyan ras gzigs dbang phyug de dag gi las kyang rnam pa lngar rig par bya ste/ chags pa med pa nyid kyis ni byang chub sems dpa' tshe 'di la pha rol tu phyin pa rnams la rtag tu byed pa dang gus par byed pa'i sbyor bas bag yod par byed do/ mi lta ba nyid kyis ni phyi
 ma la de dag la bag yod pa'i rgyu yongs su 'dzin par byed do/ /kha na ma tho ba med pa nyid kyis ni pha rol tu phyin pa shin tu yongs su rdzogs pa dang / yongs su dag pa dang / yongs su sbyang ba dag sgom par byed do/ /rnam par mi rtog pa nyid kyis ni thabs
 la mkhas pa des myur du pha rol tu phyin pa yongs su rdzogs par byed do/ /yongs su bsngo ba nyid kyis ni bla na med pa yang dag par rdzogs pa'i byang chub kyi bar du tshe rabs thams cad du rnam par smin pa'i 'bras bu 'dod pa dang bcas pa'i pha rol tu phyin pa mi zad pa nyid thob par byed do/ /
 bcom ldan 'das pha rol tu phyin pa de dag gi rgya che ba nyid gang lags/ spyan ras gzigs dbang phyug chags pa med pa nyid dang / mi lta ba nyid dang / yongs su bsngo ba nyid gang yin pa'o / /kun nas nyon mongs pa ma mchis pa nyid gang lags/ kha na ma tho ba
 med pa nyid dang / rnam par mi rtog pa nyid gang yin pa'o/ /gsal ba nyid gang lags/ so sor rtog cing bya ba nyid gang yin pa'o/ /mi g.yo ba nyid gang lags/ sar chud pa rnams kyi yongs su mi mnyam pa'i chos nyid gang yin pa'o/ /shin tu rnam par dag pa nyid
 gang lags/ spyan ras gzigs dbang phyug sa bcu par gtogs pa nyid dang / sangs rgyas kyi sar gtogs pa nyid gang yin pa'o/ /bcom ldan 'das ci'i slad du byang chub sems dpa' rnams rtag tu pha rol tu phyin pa'i rnam par smin pa'i 'bras bu 'dod pa bsam 'tshal ba
 dang / pha rol tu phyin pa'i sa ma 'tshal ba dang ldan pa lags/ spyan ras gzigs dbang phyug gcig la gcig brten nas 'grub pa bsgom pa nyid kyi phyir ro/ /bcom ldan 'das ci'i slad du byang chub sems dpa' rnams pha rol tu phyin pa rnams la ji lta ba de ltar pha rol tu phyin
 pa'i rnam par smin pa'i 'bras bu 'dod pa la dad pas gnas pa ma lags/ spyan ras gzigs dbang phyug rgyu lnga'i phyir te/ pha rol tu phyin pa rnams ni ches lhag par bde ba dang / yid bde ba'i rgyu yin pa'i phyir dang / bdag dang gzhan la phan 'dogs pa'i rgyu yin pa'i phyir dang /
 phyi ma la de'i rnam par smin pa'i 'bras bu 'dod pa'i rgyu yin pa'i phyir dang / kun nas nyon mongs pa med pa'i gzhi yin pa'i phyir dang / mi 'gyur ba'i chos nyid yin pa'i phyir ro/ /bcom ldan 'das pha rol tu phyin pa de dag gi so so'i mthu gang lags/ spyan ras gzigs
 dbang phyug de dag gi so so'i mthu ni rnam pa bzhir rig par bya ste/ pha rol tu phyin pa bsgom pa na/ mi mthun pa'i phyogs ser sna dang / 'chal pa'i tshul khrims dang / sems 'khrul pa dang / le lo dang / rnam par g.yeng ba dang / lta ba'i rnam pa rab tu spong ba dang / bla na med
 pa yang dag par rdzogs pa'i byang chub kyi tshogs su 'gyur ba dang / tshe 'di la bdag dang sems can thams cad la phan 'dogs par 'gyur ba dang / tshe phyi ma la rnam par smin pa'i 'bras bu 'dod pa rgya chen po zad mi shes pa 'thob par 'gyur ba'o/ /bcom ldan 'das pha rol
 tu phyin pa de dag rgyu gang las byung ba dang / 'bras bu gang dang ldan pa dang / don gang dang ldan pa lags/ bcom ldan 'das kyis bka' stsal pa/ spyan ras gzigs dbang phyug pha rol tu phyin pa rnams ni snying rje'i rgyu las byung ba dang / rnam par smin pa'i 'bras bu 'dod pa
 dang / sems can la phan 'dogs pa'i 'bras bu dang ldan pa dang / byang chub chen po yongs su rdzogs par byed pa'i don chen po dang ldan pa yin no/ /bcom ldan 'das gal te byang chub sems dpa' rnams longs spyod pas ma 'tshal ba dang ldan pa dang / snying rje can lags na/
 ci'i slad du 'jig rten na dbul po gda' lags/ spyan ras gzigs dbang phyug de ni sems can rnams kyi rang gi las kyi nyes pa kho na yin no/ /de lta ma yin te/ gal te sems can rnams kyi rang gis nyes par byas pa de'i gags su gyur pa ma yin du zin na/ de dag la
 rtag tu bya ba nyid la zhugs pa dang / longs spyod mi zad pa nyid yod bzhin du 'jig rten na sdug bsngal ba lta snang bar ga la 'gyur/ spyan ras gzigs dbang phyug /'di lta ste dper na/ yi dags lus skom pas gdungs pa rnams kyis rgya mtsho'i chu skams par mthong ba de ni/
 rgya mtsho dag gi nyes pa ma yin gyi yi dags de dag nyid kyi rang gi las kyi 'bras bu'i nyes pa yin no/ /de bzhin du 'bras bu med par gyur pa gang yin pa de ni/ byang chub sems dpa' sbyin pa dag gis rgya mtsho lta bur gyur pa rnams kyi nyes pa ma yin gyi/ sems
 can rang gis nyes pa byas pa yi dags lta bu rnams kyi rang gi las kyi nyes pa yin no/ /bcom ldan 'das byang chub sems dpa' chos rnams kyi ngo bo nyid ma mchis pa nyid/ pha rol tu phyin pa gang gis 'dzin pa lags/ spyan ras gzigs dbang phyug shes rab kyi pha rol tu phyin
 pas 'dzin to/ /bcom ldan 'das gal te shes rab kyi pha rol tu phyin pas ngo bo nyid ma mchis pa nyid 'dzin na/ ngo bo nyid dang bcas pa nyid kyang ci'i slad du mi 'dzin pa lags/ spyan ras gzigs dbang phyug /nga ni ngo bo nyid med pa nyid kyis ngo bo nyid 'dzin par mi smra
 mod kyi 'on kyang yi ges bstan pa med par ngo bo nyid med pa yi ge med pa/ so so rang gis rig pa de bstan par mi nus pas de'i phyir ngo bo nyid med pa nyid 'dzin to zhes de skad brjod do/ /bcom ldan 'das pha rol tu phyin pa zhes kyang bgyi/ nye ba'i pha rol tu phyin pa zhes kyang bgyi/
 pha rol tu phyin pa chen po zhes kyang bgyi lags na/ bcom ldan 'das pha rol tu phyin pa ni gang lags/ nye ba'i pha rol tu phyin pa ni gang lags/ pha rol tu phyin pa chen po ni gang lags/ spyan ras gzigs dbang phyug 'di la byang chub sems dpa' dus dpag tu med pa nas/
 yongs su bsgoms pa'i sbyin pa la sogs pa dge ba'i chos rnams dang ldan pa yang yin la/ de la nyon mongs pa yang kun tu 'byung zhing de zil gyis gnon par ni mi nus kyi/ des zil gyis non par 'gyur pa 'di lta ste/ mos pas spyod pa'i sa la mos pa chung ngu dang / 'bring
 la zhugs pa de ni pha rol tu phyin pa zhes bya'o/ /yang dus dpag tu med pa nas ches yongs su bsgoms pa'i dge ba'i chos de dag nyid dang ldan zhing de la nyon mongs pa yang kun tu 'byung la/ de zil gyis gnon cing des zil gyis gnon par mi 'gyur ba 'di lta ste/ sa dang po nas gzung
 ba de ni nye ba'i pha rol tu phyin pa zhes bya'o/ /yang dus dpag tu med pa nas ches shin tu yongs su bsgoms pa'i dge ba'i chos de dag nyid dang ldan zhing / de la thams cad kyi thams cad du nyon mongs pa kun tu mi 'byung ba'i chos can du gyur pa 'di lta ste/ sa brgyad pa nas gzung ba
 de ni pha rol tu phyin pa chen po zhes bya'o/ /bcom ldan 'das sa de dag la nyon mongs pa'i bag la nyal rnam pa du mchis lags/ spyan ras gzigs phyug /rnam pa gsum ste/ spyan ras gzigs dbang phyug grogs yang dag par bcom pa ni 'di lta ste/ sa lnga po dag la nyon
 mongs pa lhan cig skyes pa kun tu 'byung ba'i grogs nyon mongs pa lhan cig skyes pa ma yin pa kun tu 'byung ba de'i tshe la de med pas de'i phyir grogs yang dag par bcom pa zhes bya'o/ /bag la nyal stobs chung ba ni 'di lta ste/ sa drug pa dang / bdun pa la cha phra mo kun
 tu 'byung ba nyid dang / bsgom pas mnan pas kun tu 'byung ba nyid kyi phyir ro/ /bag la nyal phra mo ni 'di lta ste/ sa brgyad pa dang / de'i gong ma rnams la nyon mongs pa thams cad kyi thams cad du kun tu mi 'byung ba dang / shes bya'i sgrib pa tsam la gnas pa nyid kyi phyir
 ro/ /bcom ldan 'das bag la nyal de dag gnas ngan len spangs pa rnam pa dus rab tu phye ba lags/ spyan ras gzigs dbang phyug rnam pa gnyis kyi phyir te/ gnas ngan len lpags shun la yod pa lta bu spangs pas ni dang po dang gnyis pa rab tu phye ba yin no/ /spril
 yod pa lta bu spangs pas ni gsum pa'o/ /gnas ngan len snying po la yod pa lta bu spangs pa gang yin pa de ni thams cad kyi thams cad du bag la nyal med pa'i gnas skabs yin te/ sangs rgyas kyi sa yin par ngas yongs su bstan to/ /bcom ldan 'das gnas ngan len
 de dag bskal pa grangs ma mchis pa du dag gis spong bar 'gyur lags/ spyan ras gzigs dbang phyug grangs med pa gsum gyis sam/ dus tshigs dang / zla ba dang / zla ba phyed dang / zhag dang / nyi ma dang / thun dang / thun phyed dang / skad cig dang / thang cig
 dang / yud tsam dang / bskal pa dpag tu med pa dag gis spong ngo / /bcom ldan 'das de dag la byang chub sems dpa' rnams kyi nyon mongs pa skye ba'i mtshan nyid ni gang lags/ skyon ni gang lags/ yon tan ni gang lags par rig par bgyi/
 spyan ras gzigs dbang phyug byang chub sems dpa' rnams kyi nyon mongs pa skye ba ni kun nas nyon mongs pa can ma yin pa'i mtshan nyid yin no/ /de ci'i phyir zhe na/ byang chub sems dpa' sa dang po la so sor nges pa kho nas/ chos kyi dbyings thams cad rab tu rtogs pa'i
 phyir te/ des na byang chub sems dpa'i nyon mongs pa ni shes bzhin kho nar skye ba yin gyi/ mi shes par ma yin pas/ de'i phyir kun nas nyon mongs pa can ma yin pa'i mtshan nyid yin no/ /rang gi rgyud la sdug bsngal bskyed par mi nus pa nyid kyi phyir skyon med pa
 yin no/ /sems can gyi khams kyi sdug bsngal rnam par bzlog pa'i rgyu nyid yin pa'i phyir yon tan dpag tu med pa yin no/ /bcom ldan 'das gang la da ltar byang chub sems dpa' rnams kyi nyon mongs pa skye ba dag gis kyang / ji tsam du sems can dang / nyan thos
 dang / rang sangs rgyas thams cad kyi dge ba'i rtsa ba rnams de tsam du zil gyis gnon par bgyid na/ de las gzhan pa'i yon tan rnams lta smos kyang ci 'tshal ba'i byang chub de tsam du don che ba ni ngo mtshar lags so/ /bcom ldan 'das bcom ldan 'das kyi sa nyan thos kyi
 theg pa gang yin pa dang / theg pa chen po gang yin pa de ni theg pa gcig go zhes bka' stsal pa de la dgongs pa gang lags/ spyan ras gzigs dbang phyug ngas nyan thos kyi theg par chos sna tshogs kyi ngo bo nyid 'di lta ste/ phung po lnga dang / nang gi skye mched drug dang
 phyi rol gyi skye mched drug dang / de dag la sogs pa gang dag bstan pa de dag nyid ngas theg pa chen por chos kyi dbyings tshul gcig par bstan pas bshad de/ de'i phyir nga ni theg pa tha dad par mi smra'o/ /de la gang dag don la sgra ji bzhin kho nar rnam par rtog pa kha cig ni sgro
 'dogs par byed/ kha cig ni skur ba 'debs par byed cing / theg pa tha dad pa nyid du rnam par rtog par yang byed de/ de gnyis mi mthun par sems shing / phan tshun rtsod par zad de/ de la dgongs pa ni de yin no/ /de la bcom ldan 'das kyis de'i tshe tshigs su bcad
 pa 'di dag bka' stsal to/ /theg pa che dang theg pa dman pa la/ /rang bzhin sna tshogs chos rnams gang bstan pa/ /de dag nyid ni tshul gcig yang bstan te/ /de phyir theg pa tha dad nga mi smra/ /don la sgra bzhin rnam par rtog byed pa/ /sgro btags byas shing
 bkur pa btab byas nas/ /de dag 'gal ba snyam du sems pa ni/ /rnam par rmongs nas blo gros sna tshogs 'gyur/ /sa rnams bsdus dang ming dang mi mthun phyogs/ /khyad par skye dang smon lam bslab pa rnams/ /de ni sangs rgyas rnams kyis theg chen bshad/ /'di la
 gang brtson de dag sangs rgyas 'gyur/ /de nas bcom ldan 'das la byang chub sems dpa' spyan ras gzigs dbang phyug gis 'di skad ces gsol to/ /bcom ldan 'das dgongs pa nges par 'grel pa'i chos kyi rnam grangs 'dir bstan pa 'di'i ming ci lags/ 'di ji
 ltar gzung bar bgyi/ bcom ldan 'das kyis de la bka' stsal pa/ spyan ras gzigs dbang phyug 'di ni sa dang pha rol tu phyin pa'i nges pa'i don bstan pa yin te/ 'di sa dang pha rol tu phyin pa'i nges pa'i don bstan pa zhes bya bar zung shig /sa dang pha rol tu phyin pa'i
 nges pa'i don bstan pa 'di bshad pa na/ byang chub sems dpa' bdun khri lnga stong gis/ byang chub sems dpa' ting nge 'dzin theg pa chen po snang ba thob par gyur to zhes gsungs so/ /theg pa rnam par gzhag pa kho na las brtsams nas/ de bzhin gshegs
 pa'i bya ba bsgrub pa'i rab tu dbye ba ni/ dgongs pa nges par 'grel pa'i mdo las/ ji skad 'byung ba bzhin blta bar bya ste/ bcom ldan 'das la byang chub sems dpa' 'jam dpal gyis zhu ba zhus pa/ bcom ldan 'das de bzhin gshegs pa rnams kyi chos kyi
 sku zhes bgyi na/ bcom ldan 'das de bzhin gshegs pa rnams kyi chos kyi sku'i mtshan nyid ji lta bu lags/ bcom ldan 'das kyis bka' stsal pa/ 'jam dpal de bzhin gshegs pa rnams kyi chos sku'i mtshan nyid ni sa dang pha rol tu phyin pa
 bsgoms pa'i nges par 'byung bas gnas gyur pa yang dag par grub pa yin no/ /de yang rgyu gnyis kyis bsam gyis mi khyab pa'i mtshan nyid du rig par bya ste/ de ni spros pa med cing mngon par 'du bya ba med pa nyid kyi phyir dang / sems can rnams ni spros pa dang mngon par
 'du bya ba la mngon par zhen pa nyid kyi phyir ro/ /bcom ldan 'das ci lags nyan thos dang / rang sangs rgyas rnams kyi gnas gyur pa gang lags pa de yang chos kyi sku lags par brjod par bgyi'am/ 'jam dpal brjod par mi bya'o/ /bcom ldan 'das 'o na ci'i
 lus lags par brjod par bgyi/ 'jam dpal rnam par grol pa'i lus yin te 'jam dpal rnam par grol ba'i lus kyis ni de bzhin gshegs pa rnams dang / nyan thos dang / rang sangs rgyas rnams kyang mtshungs shing mnyam mo/ /chos kyi skus ni khyad par du 'phags
 te/ chos kyi skus khyad par du 'phags na/ yon tan gyi khyad par dpag tu med pas kyang khyad par du 'phags pa yin te/ de la ni dpe bya bar yang sla ba ma yin no/ /bcom ldan 'das de bzhin gshegs pa rnams kyi skye ba 'byung ba'i mtshan nyid ni ji lta bur rig par bgyi lags/
 'jam dpal sprul pa'i sku'i mtshan nyid de 'jig rten gyi khams 'byung ba dang 'dra'o/ /sprul pa'i sku'i mtshan nyid 'byung ba la de bzhin gshegs pa'i yon tan bkod pa'i rgyan gyi rnam pa thams cad kyis byin gyis brlabs pa'i mtshan nyid du blta bar bya'o/ /chos kyi sku la ni
 skye ba 'byung ba med do/ /bcom ldan 'das sprul pa'i sku ston pa'i thabs la mkhas pa gang lags par blta bar bgyi lags/ 'jam dpal sprul pa'i sku ston pa'i thabs la mkhas pa ni stong gsum gyi stong chen po'i sangs rgyas kyi zhing thams cad du bdag por grags pa'am/ sbyin
 gnas su grags pa'i khyim du mngal du 'jug pa dang / btsas pa dang / skye ba dang / 'dod pa la longs spyod pa dang / mngon par 'byung ba dang / dka' ba spyod pa cig car kun tu ston pa dang / de gtong ba dang / mngon par rdzogs par byang chub pa'i rim pa kun tu ston pa yin par
 blta bar bya'o/ /bcom ldan 'das de bzhin gshegs pa de bzhin gshegs pa'i byin gyi rlabs kyi skus gsung gang dag brjod pas gdul ba'i khams yongs su ma smin pa ni yongs su smin par mdzad la/ yongs su smin pa ni dmigs pa de nyid kyis rnam par grol bar
 mdzad pa'i gsung brjod pa du zhig brjod par mdzad lags/ 'jam dpal de bzhin gshegs pa'i gsung brjod pa ni gsum po 'di dag yin te/ mdo sde brjod pa dang / 'dul ba brjod pa dang / ma mo brjod pa'o/ /bcom ldan 'das mdo sde ni gang lags/
 'dul ba ni gang lags/ ma mo ni gang lags/ 'jam dpal 'di lta ste/ dngos po bzhi'am/ dgu'am/ nyi shu rtsa dgu'i dbang du byas nas/ chos rnams kyi dngos po'i bsdu ba tsam ngas gong du bstan pa de ni mdo sde yin no/ /dngos po bzhi gang zhe na/ 'di lta ste/
 thos pa'i dngos po dang / skyabs su 'gro ba'i dngos po dang / bslab pa'i dngos po dang / byang chub kyi dngos po'o/ /dngos po dgu gang zhe na/ sems can du gdags pa'i dngos po dang / de'i longs spyod kyi dngos po dang / de 'byung ba'i dngos po dang / de 'byung ba la
 gnas pa'i dngos po dang / de'i kun nas nyon mongs pa dang / rnam par byang ba'i dngos po dang / de'i sna tshogs kyi dngos po dang / ston pa'i dngos po dang / bstan par bya ba'i dngos po dang / 'khor gyi dngos po'o/ /dngos po nyi shu rtsa dgu gang zhe na/
 kun nas nyon mongs pa'i phyogs nas brtsams te/ 'du byed bsdu ba'i dngos po dang / de'i go rims rjes su 'jug pa'i dngos po dang / de dag nyid la gang zag gi ming du byas nas/ phyi mar 'byung ba'i rgyu'i dngos po dang / chos kyi ming du byas nas phyi mar
 'byung ba'i rgyu'i dngos po dang / rnam par byang ba'i phyogs las brtsams te/ dmigs pa la nye bar gtod pa'i dngos po dang / de nyid la rtsol ba'i dngos po dang / sems gnas pa'i dngos po dang / tshe 'di la bde bar gnas pa'i dngos po dang /
 sdug bsngal thams cad las yang dag par 'das pa'i dmigs pa'i thabs kyi dngos po dang / de yongs su shes pa'i dngos po ni phyin ci log yongs su shes pa'i gnas dang / sems can du 'du shes pa las brtsams te/ phyi rol gyi sems can rnams la log par sgrub
 pa yongs su shes pa'i gnas dang / nang la mngon pa'i nga rgyal med pa yongs su shes pa'i gnas kyis sa de yang rnam pa gsum dang / sgom pa'i gnas kyi dngos po dang / mngon du bya ba'i dngos po dang / bsgoms pa'i dngos po dang / de snying por bya ba'i dngos po dang /
 de'i rnam pa'i dngos po dang / de'i dmigs pa'i dngos po dang / spangs pa dang / ma spangs pa spyod pa la mkhas pa'i dngos po dang / de las rnam par mi g.yeng ba'i dngos po dang / rnam par mi g.yeng ba'i gnas kyi dngos po dang / bsgom pa la yongs su skyo ba'i sbyor
 ba bsal ba'i dngos po dang / bsgom pa'i phan yon gyi dngos po dang / de brten pa'i dngos po dang / 'phags pa'i dbang phyug bsdu ba'i dngos po dang / 'phags pa'i phyogs dang g.yog 'khor bsdu ba'i dngos po dang / de kho na rab tu rtogs pa'i dngos po dang / mya ngan
 las 'das pa yang dag par thob pa'i dngos po dang / legs par gsungs pa'i chos 'dul ba la/ 'jig rten pa'i yang dag pa'i lta ba 'di las phyi rol pa thams cad kyi yang dag pa'i lta ba dag las spyi bor gyur pa nyid kyi dngos po dang / de mi bsgom pas yongs su nyams
 pa'i dngos po ste/ 'jam dpal 'di ltar legs par gsungs pa'i chos 'dul ba la ni mi bsgom pas yongs su nyams par 'gyur zhing / lta ba'i nyes pas ni ma yin no/ /'jam dpal ngas gang du nyan thos rnams dang byang chub sems dpa' rnams kyi so sor thar pa'am so
 sor thar pa dang ldan pa yongs su bstan pa gang yin pa de ni 'dul ba'i dngos po yin no/ /bcom ldan 'das byang chub sems dpa' rnams kyi so sor thar pa rnam pa dus bsdus par rig par bgyi lags/ 'jam dpal rnam pa bdun gyis te/ yang dag par blangs pa'i cho
 ga bstan pa dang / pham pa'i gnas lta bu'i dngos po bstan pa dang / ltung ba'i gnas lta bu'i dngos po bstan pa dang / ltung ba'i ngo bo nyid bstan pa dang / ltung ba ma yin pa'i ngo bo nyid bstan pa dang / ltung ba las 'byung ba bstan pa dang / sdom pa gtong ba bstan
 pas so/ /'jam dpal ngas gong du mtshan nyid rnam pa bcu gcig bshad pa dang / rnam par phye ba dang / bstan pa gang yin pa de ni ma mo'o zhes bya'o/ /de la mtshan nyid rnam pa bcu gcig gang zhe na/ kun rdzob kyi mtshan nyid dang / don dam pa'i mtshan nyid dang /
 byang chub kyi phyogs dang mthun pa'i chos rnams kyi dmigs pa'i mtshan nyid dang / rnam pa'i mtshan nyid dang / ngo bo nyid kyi mtshan nyid dang / de'i 'bras bu'i mtshan nyid dang / de myong ba rnam par bsnyad pa'i mtshan nyid dang / de'i bar du gcod pa'i chos kyi mtshan nyid
 dang / de dang rjes su mthun pa'i chos kyi mtshan nyid dang / de'i nyes dmigs kyi mtshan nyid dang / de'i phan yon gyi mtshan nyid do/ /'jam dpal de la kun rdzob kyi mtshan nyid ni rnam pa gsum ste/ gang zag bstan pa dang / kun brtags pa'i ngo bo nyid
 bstan pa dang / chos rnams kyi byed pa dang / g.yo ba dang las byed pa bstan pas blta bar bya'o/ /de la don dam pa'i mtshan nyid ni de bzhin nyid rnam pa bdun bstan pa yin par blta bar bya'o/ /dmigs pa'i mtshan nyid ni shes bya'i dngos po rnam pa thams cad bstan
 pas blta bar bya'o/ /rnam pa'i mtshan nyid ni brtags pa rnam pa brgyad bstan pas blta bar bya ste/ brtags pa rnam pa brgyad gang zhe na/ bden pa dang / gnas pa dang / skyon dang / yon tan dang / tshul dang / 'jug pa dang / rigs pa dang / bsdu ba dang /
 rgyas pas so/ /de la bden pa ni de bzhin nyid gang yin pa'o/ /gnas pa ni gang zag rnam par gzhag pa'am/ kun brtags pa'i ngo bo nyid rnam par gzhag pa'am/ mgo gcig dang / rnam par dbye ba dang / dris te lan gdab pa rnam par
 gzhag pa'am/ gzhag pa rnam par gzhag pa'am/ gsang ba dang / rnam par dbye ba bstan pa rnam par gzhag pa gang yin pa'o/ /skyon rnams ni ngas kun nas nyon mongs pa'i chos rnams kyi nyes dmigs rnam grangs du mar bstan pa gang yin pa dag go/ /yon
 tan rnams ni ngas rnam par byang ba'i chos rnams kyi phan yon rnam grangs du mar bstan pa gang yin pa dag go/ /tshul ni rnam pa drug tu rig par bya ste/ de kho na'i don gyi tshul dang / 'thob pa'i tshul dang / bshad pa'i tshul dang / mtha' gnyis rnam par spangs pa'i tshul
 dang / bsam gyis mi khyab pa'i tshul dang / dgongs pa'i tshul lo/ /'jug pa ni dus gsum dang / 'dus byas kyi mtshan nyid gsum dang / rkyen bzhi po dag go/ /rigs pa ni rnam pa bzhir rig par bya ste/ ltos pa'i rigs pa dang / bya ba byed pa'i rigs pa
 dang / 'thad pas bsgrub pa'i rigs pa dang / chos nyid kyi rigs pa'o/ /de la ltos pa'i rigs pa ni 'du byed rnams 'byung ba dang / rjes su tha snyad gdags pa'i rgyu gang dag yin pa dang / rkyen gang dag yin pa ste/ de ni ltos pa'i rigs pa yin no/ /chos rnams
 'thob pa'am/ 'grub pa'am/ skyes pa rnams las byed pas 'gyur ba'i rgyu gang dag yin pa dang / rkyen gang dag yin pa de ni bya ba byed pa'i rigs pa yin no/ /so so'i shes pa dang / bshad pa dang / smras pa'i don bsdus pa dang / legs par khong du chud par bya ba'i
 rgyu gang dag yin pa dang / rkyen gang dag yin pa de ni 'thad pas bsgrub pa'i rigs pa yin no/ /de yang mdor bsdu na rnam pa gnyis te/ yongs su dag pa dang / yongs su ma dag pa'o/ /de la yongs su dag pa'i mtshan nyid ni lnga'o/ /yongs su ma dag pa'i mtshan
 nyid ni bdun no/ /de la yongs su dag pa'i mtshan nyid lnga po dag gang zhe na/ de la mngon sum du dmigs pa'i mtshan nyid dang / de la gnas pa mngon sum du dmigs pa'i mtshan nyid dang / rang gi las kyi dpe nye bar sbyar ba'i mtshan nyid dang / yongs su grags pa'i
 mtshan nyid dang / lung shin tu rnam par dag pa gtan la dbab par bstan pa'i mtshan nyid do/ /de 'du byed thams cad mi rtag pa nyid dang / 'du byed thams cad sdug bsngal ba nyid dang / chos thams cad bdag med pa nyid 'jig rten na mngon sum du dmigs pa dang /
 de lta bu dang mthun pa gang yin pa de ni mngon sum du dmigs pa'i mtshan nyid yin no/ /'du byed thams cad skad cig ma nyid dang / 'jig rten pha rol du yod pa nyid dang / las dge ba dang / mi dge ba chud mi za ba de la gnas pa'i mi rtag pa rags pa nyid mngon sum du dmigs pa
 gang yin pa dang / sems can sna tshogs las sna tshogs la gnas pa mngon sum du dmigs pa gang yin pa dang / sems can bde ba dang sdug bsngal ba las dge ba dang mi dge ba la gnas pa mngon sum du dmigs pa gang yin pa dang / gang gis mngon sum du ma gyur pa la rjes
 su dpag par bya ba dang / de lta bu dang mthun pa gang yin pa de ni de la gnas pa mngon sum du dmigs pa'i mtshan nyid yin no/ /nang dang phyi rol gyi 'du byed rnams la/ 'jig rten thams cad la grags pa'i 'chi 'pho dang / skye ba dmigs pa nye bar sbyar ba dang / skye ba la
 sogs pa'i sdug bsngal dmigs pa nye bar sbyar ba dang / rang dbang med pa dmigs pa nye bar sbyar ba dang / phyi rol dag la yang 'jig rten thams cad la grags pa'i 'byor pa dang rgud pa dmigs pa nye bar sbyar ba dang / de lta bu dang mthun pa gang yin pa de ni rang gi rigs
 kyi dpe nye bar sbyar ba'i mtshan nyid yin par rig par bya'o/ de ltar de la mngon sum du dmigs pa'i mtshan nyid dang / de la gnas pa mngon sum du dmigs pa'i mtshan nyid dang / rang gi rigs kyi dpe nye bar sbyar ba'i mtshan nyid gang yin pa de ni de grub par bya ba la gcig tu nges
 pa'i phyir yongs su grags pa'i mtshan nyid yin par rig par bya'o/ /'jam dpal gtan la dbab par bstan pa thams cad mkhyen pas gsungs pa 'di lta ste/ mya ngan las 'das pa ni zhi ba'o zhes bya ba dang / de lta bu dang mthun pa gang yin pa de ni lung
 shin tu rnam par dag pa gtan la dbab par bstan pa'i mtshan nyid yin par rig par bya'o/ /de lta bas na mtshan nyid rnam pa lnga po de dag gi rigs pas brtags pa yongs su dag pa yin te/ yongs su dag pa'i phyir bstan par bya'o/ /bcom ldan 'das thams cad
 mkhyen pa'i mtshan nyid rnam pa dus rtogs par bgyi lags/ 'jam dpal lngas te / gang su yang rung ba zhig byung na 'jig rten du thams cad mkhyen pa nyid du sgra rnam par grags pa dang / skyes bu chen po'i mtshan sum cu rtsa gnyis dang ldan pa dang / stobs bcus sems
 can thams cad kyi the tshom thams cad gcod pa dang / mi 'jigs pa bzhis chos ston pas/ de'i tshig la phas kyi rgol ba thams cad kyis brgal du med cing brtsad du med pa gang yin pa dang / su'i chos 'dul ba la 'phags pa'i lam yan lag brgyad pa snang zhing dge sbyong
 rnam bzhi snang ba yin te/ de ltar na 'byung ba dang / mtshan dang / the tshom gcod pa dang / brgal du med cing brtsad du med pa dang / dge sbyong dmigs pas thams cad mkhyen pa'i mtshan nyid lngar rig par bya'o/ /de ltar na 'thad pas bsgrub pa'i rigs pa de ni mngon
 sum gyi tshad ma dang / rjes su dpag pa'i tshad ma dang / yid ches pa'i lung gi tshad mas mtshan nyid lnga po dag gis yongs su dag pa yin no/ /yongs su ma dag pa'i mtshan nyid rnam pa bdun gang zhe na/ de las gzhan pa dang mthun par dmigs pa'i mtshan nyid dang / de las
 gzhan dang mi mthun par dmigs pa'i mtshan nyid dang / thams cad mthun par dmigs pa'i mtshan nyid dang / thams cad mi mthun par dmigs pa'i mtshan nyid dang / gzhan gyi rigs kyi dpe nye bar sbyar ba'i mtshan nyid dang / yongs su ma grags pa'i mtshan nyid dang /
 lung shin tu rnam par ma dag pa bstan pa'i mtshan nyid do/ /de la chos thams cad yid kyi rnam par shes pas rnam par shes par bya ba gang yin pa de ni thams cad mthun par dmigs pa'i mtshan nyid yin no/ /rtags dang / ngo bo nyid dang / las dang / chos dang / rgyu dang /
 'bras bu'i mtshan nyid mi mthun pa rnams kyi mtshan nyid mi mthun pa gang yang rung bas/ phan tshun mtshan nyid mi mthun par nges pa nyid gang yin pa de ni thams cad mi mthun par dmigs pa'i mtshan nyid yin no/ /'jam dpal de la dpe gzhan nyid dang mthun par dmigs pa'i
 mtshan nyid dpe dang bcas pa la/ thams cad mi mthun par dmigs pa'i mtshan nyid yod pa'i phyir gang gis de grub par bya ba la gcig tu ma nges pa'i phyir de ni yongs su ma grags pa'i mtshan nyid ces bya'o/ /de las gzhan dang mi mthun par dmigs pa'i mtshan nyid dpe
 dang bcas pa nyid la yang thams cad mthun par dmigs pa'i mtshan nyid yod pas gang gis de grub par bya ba la gcig tu ma nges pa'i phyir de yang yongs su ma grags pa'i mtshan nyid ces bya'o/ /yongs su ma grags pa'i phyir rigs pas brtags pa yongs su ma dag pa yin te/
 yongs su ma dag pa'i phyir brten par mi bya'o/ /de la lung shin tu rnam par ma dag pa bstan pa'i mtshan nyid ni rang bzhin nyid kyis yongs su ma dag pa yin par rig par bya'o/ /de la de bzhin gshegs pa rnams byung yang rung / /ma byung yang rung ste/ chos gnas par bya ba'i
 phyir chos nyid dbyings gnas pa nyid gang yin pa de ni chos nyid kyi rigs pa yin no/ /de la bsdus pa dang / rgyas pa ni mdor bsdus te/ tshig gcig gis bstan pa'i chos tshig phyi ma phyi ma dag gis rab tu phye ste/ mthar thug par byed pa gang yin pa'o/ /ngas rnam pa dang
 bcas pa'i dmigs pa 'dzin pa byang chub kyi phyogs dang mthun pa'i chos dran pa nye bar gzhag pa la sogs pa gang dag bstan pa ni de dag gi ngo bo nyid kyi mtshan nyid yin no/ /'jig rten pa dang 'jig rten las 'das par bcas pa'i nyon mongs pa spong bas de'i 'bras bu 'jig rten pa dang
 'jig rten las 'das pa'i yon tan mngon par bsgrub pa gang dag yin pa de ni de'i 'bras bu thob pa'i mtshan nyid yin no/ /de nyid rnam par grol ba'i shes pas so so yang dag par rig pa gang yin pa gzhan dag la yang rgya cher sgrogs pa dang / 'chad pa
 dang yang dag par ston pa de ni de myong ba rnam par bsnyad pa'i mtshan nyid yin no/ /byang chub kyi phyogs dang mthun pa'i chos de dag nyid bsgom pa la bar chad byed pa'i gnas lta bu nyon mongs pa can gyi chos gang dag yin pa de ni de'i bar du gcod pa'i chos kyi mtshan nyid yin no/ /de dag nyid la
 gces spras byed pa'i chos gang dag yin pa de ni de dang rjes su mthun pa'i chos kyi mtshan nyid yin no/ /bar du gcod pa rnams kyi skyon gang yin pa de ni nyes dmigs kyi mtshan nyid yin no/ /'jam dpal rjes su mthun pa rnams kyi yon tan gang yin pa de ni phan yon gyi mtshan nyid
 yin par rig par bya'o/ /de nas bcom ldan 'das la byang chub sems dpa' 'jam dpal gyis yang 'di skad ces gsol to/ /bcom ldan 'das gzungs kyi don gang gis byang chub sems dpa' rnams de bzhin gshegs pas gsungs pa'i chos zab mo rnams kyi ldom por
 dgongs pa'i rjes su 'jug par 'gyur ba byang chub sems dpa' rnams kyi mdo sde dang / 'dul ba dang ma mo dag gis gzungs kyi don ma lus pa 'di las slad rol pa rnams dang thun mong ma lags pa bshad du gsol/ /'jam dpal de'i phyir nyon cig dang / 'di ltar byang
 chub sems dpa' rnams nga'i ldem po dag la 'jug par bya ba'i phyir gzungs kyi don la lus pa khyod la bshad par bya'o/ /'jam dpal kun nas nyon mongs pa'i chos gang dag yin pa dang / rnam par byang ba'i chos gang dag yin pa de dag thams cad ni g.yo ba med pa gang zag
 med pa yin te de'i phyir ngas chos rnams rnam pa thams cad du byed pa med par bstan to/ /kun nas nyon mongs pa'i chos rnams kyang sngon kun nas nyon mongs pa can du gyur la/ phyis rnam par byang bar 'gyur ba ma yin rnam par byang ba'i chos rnams kyang phyis rnam par byang la/ sngon kun
 nas nyon mongs pa can du gyur pa ma yin pa yin na/ de la byis pa so so'i skye bo rnams gnas ngan len gyi lus la chos dang gang zag gi ngo bo nyid du mngon par zhen pa'i bag la nyal gyi lta ba la brten nas bdag gam/ bdag gir 'dzin cing / des na mthong ngo / /thos so/ /snom
 mo/ /myong ngo / /reg go/ /rnam par shes so/ /za'o/ /byed do/ /kun nas nyon mongs so/ /rnam par byang ngo zhes log par mngon par 'du byed pa 'byung ngo / /gang la las de ltar yang dag pa ji lta ba bzhin du rab tu shes pa de ni gnas ngan len gyi lus rab tu spong
 zhing nyon mongs pa thams cad kyi gnas ma yin pa shin tu rnam par dag pa/ spros pa med pa/ 'dus ma byas pa mngon par 'du bya ba med pa'i lus 'thob par 'gyur te/ 'jam dpal de ni gzungs kyi don ma lus pa yin par rig par bya'o/ /de nas bcom ldan 'das
 kyis de'i tshe tshigs su bcad pa 'di dag bka' stsal to/ /kun nas nyon mongs chos dang rnam par byang ba'i chos/ /thams cad byed pa med cing gang zag med pa yin/ /de phyir de dag byed pa med par ngas bshad do/ /de dag snga phyir rnam par dag dang nyon mongs min/ /
 gnas ngan len gyi lus la bag la nyal ba yi/ /lta la brten nas bdag dang bdag gir 'dzin byed de / /des na mthong ngo za'o byed ces bya ba dang / nyon mongs rnam par byang bar 'gyur ro snyam pa'ang 'byung / /gang gis de ltar yang dag ji bzhin rab shes pa/ /de ni
 gnas ngan len lus rab tu spong byed cing / /nyon mongs gnas min shin tu rnam par dag pa'i lus/ /spros pa med cing 'dus ma byas pa thob par 'gyur/ /bcom ldan 'das de bzhin gshegs pa'i sems 'byung ba'i mtshan nyid ji lta bur rig par bgyi lags/ 'jam
 dpal de bzhin gshegs pa rnams kyi sems dang / yid dang rnam par shes pas rab tu phye ba ma yin mod kyi/ 'on kyang de bzhin gshegs pa'i sems ni mngon par 'du bya ba med pa 'byung ste/ sprul pa lta bur rig par bya'o/ /bcom ldan 'das gal te de bzhin gshegs
 pa rnams kyi chos kyi sku mngon par 'du bgyi ba thams cad dang bral ba lags na/ 'o na mngon par 'du bgyi ba ma mchis par sems 'byung bar 'gyur lags/ 'jam dpal sngon thabs dang shes rab bsgom pa mngon par 'dus byas pa'i phyir te/ 'jam
 dpal 'di lta ste dper na gnyid log pa sems med pa la phyir sad par mngon par 'du bya ba med kyang / sngon mngon par 'du byas pa'i dbang gis phyir sad par 'gyur ba dang / 'gog pa la snyoms par zhugs pa la ldang bar mngon par 'du bya ba med kyang / sngon mngon par 'du
 byas pa'i dbang kho nas ldang bar 'gyur te/ gnyid log pa dang / 'gog pa la snyoms par zhugs pa dag gis sems 'byung ba ji lta ba de bzhin du/ de bzhin gshegs pa'i sems 'byung ba yang sngon thabs dang shes rab bsgom pa mngon par 'du byas pa las rig par
 bya'o/ /bcom ldan 'das ci de bzhin gshegs pas sprul pa sems mchis sam ma mchis zhes bgyi/ /'jam dpal sems yod pa'ang ma yin sems med pa yang ma yin te/ sems rang dbang med pa nyid dang / sems gzhan gyi dbang nyid yin pa'i phyir ro/ /
 bcom ldan 'das de bzhin gshegs pa'i spyod yul gang lags pa dang / de bzhin gshegs pa'i yul gang lags pa de gnyis la tha dad du bgyi ba ci mchis lags/ 'jam dpal de bzhin gshegs pa'i spyod yul ni de bzhin gshegs pa thams cad kyi thun mong ba/
 yon tan bsam gyis mi khyab pa dang / tshad med pa'i rgyan bkod pa'i sangs rgyas kyi zhing yongs su dag pa gang yin pa'o/ /de bzhin gshegs pa'i yul ni khams lnga po sems can gyi khams dang / 'jig rten gyi khams dang / chos kyi khams dang / 'dul ba'i
 khams dang / 'dul ba'i thabs kyi khams rnam pa thams cad de/ de gnyis la tha dad du bya ba ni de yod do/ /bcom ldan 'das de bzhin gshegs pa'i mngon par rdzogs par byang chub pa gang lags pa dang / chos kyi 'khor lo bskor ba gang lags pa dang / yongs
 su mya ngan las 'das pa chen po gang lags pa de dag gi mtshan nyid ji lta bur rig par bgyi lags/ 'jam dpal gnyis su med pa'i mtshan nyid yin te/ mngon par rdzogs par byang chub pa yang ma yin/ mngon par rdzogs par byang ma chub pa yang ma yin/ chos kyi 'khor
 lo bskor ba yang ma yin/ chos kyi 'khor lo ma bskor ba yang ma yin/ yongs su mya ngan las 'das pa chen po yang ma yin/ yongs su mya ngan las 'das pa chen po med pa yang ma yin te/ chos kyi sku shin tu rnam par dag pa nyid kyi phyir dang / sprul pa'i sku kun tu ston
 pa nyid kyi phyir dang / bcom ldan 'das sprul pa'i sku la blta ba dang / nyan pa dang / bsnyen bkur bgyid pa dag gis sems can rnams bsod nams skyed pa de ci'i slad du de bzhin gshegs pa las byung bar rig par bgyi lags/ 'jam dpal de bzhin gshegs pa
 la lhag par dmigs pa'i bya ba nyid yin pa'i phyir dang / sprul pa'i sku yang de bzhin gshegs pa'i byin gyi rlabs nyid yin pa'i phyir ro/ /bcom ldan 'das mngon par 'du bgyi ba ma mchis par 'dra lags na/ ci'i slad du de bzhin gshegs pa'i chos kyi sku kho na las
 sems can rnams la ye shes kyi snang ba chen po 'di 'byung zhing / sprul pa'i gzugs brnyan dpag tu ma mchis pa dag kyang 'byung la/ nyan thos dang / rang sangs rgyas rnams kyi rnam par grol ba'i lus las ni mi 'byung lags/ 'jam dpal 'di lta ste dper na mngon par 'du
 byed pa med par 'dra ba yang 'di lta ste/ sems can mthu chen po'i byin gyi rlabs nyid dang / sems can gyi las kyi dbang nyid kyi phyir zla ba dang nyi ma'i dkyil 'khor gyi chu shel dang me shel kho na las sems can rnams la snang ba chen po 'byung la de las gzhan gyi chu shel dang me shel dag las
 ni mi 'byung ba dang / nor bu rin po che rigs dang ldan pa las legs par byi dor byas pa las rgya'i gzugs brnyan 'byung la/ de las gzhan pa byi dor ma byas pa dag las ni mi 'byung ba de bzhin du/ de bzhin gshegs pa'i chos kyi sku yang chos kyi dbyings dpag tu med pa la dmigs
 pa'i thabs dang shes rab bsgoms pas shin tu sbyang ba byas pa las yang dag par grub pa yin pa'i phyir/ de las sems can rnams la ye shes kyi snang ba chen po dang / sprul pa'i gzugs brnyan dpag tu med pa dag 'byung gi rnam par grol ba'i lus 'ba' zhig
 dag las ni mi 'byung ngo / /bcom ldan 'das de bzhin gshegs pa dang / byang chub sems dpa'i byin gyi rlabs kyi mthus/ 'dod pa'i khams kyi mi'i lus phun sum tshogs pa rgyal rigs dang / bram ze'i rigs shing sA la chen po lta bu rnams dang / 'dod pa na spyod pa'i lha'i lus
 phun sum tshogs pa thams cad dang / gzugs na spyod pa'i lha'i lus phun sum tshogs pa thams cad dang / gzugs ma mchis pa na spyod pa'i lha'i lus phun sum tshogs pa thams cad gda' zhes bgyi ba de la/ bcom ldan 'das dgongs pa gang lags/ 'jam dpal
 'di la de bzhin gshegs pa rnams ni de bzhin gshegs pas byin gyis brlabs nas/ lam gang dang / bsgrub pa gang gis thams cad du lus phun sum tshogs pa thams cad thob par 'gyur ba'i lam de yang / bsgrub pa de ji lta ba bzhin du ston te/ gang dag lam de dang /
 bsgrub pa de sgrub par byed pa de dag ni thams cad du lus phun sum tshogs pa thams cad 'thob par 'gyur la/ gang dag lam de dang bsgrub pa de phyir spong zhing mi snyan par brjod la/ nga la yang kun nas mnar sems kyi sems dang / khong khro ba'i sems dang ldan zhing 'chi ba'i
 dus byed pa de dag ni thams cad du lus ngan pa thams cad 'thob par 'gyur te/ 'jam dpal rnam grangs des na khyod kyis 'di ltar lus phun sum tshogs pa 'ba' zhig /de bzhin gshegs pa'i byin gyi rlabs kyi mthu las 'byung ba ma yin gyi/ lus ngan par skye ba yang de
 bzhin gshegs pa'i byin gyi rlabs kyi mthu las 'byung bar rig par bya'o/ /bcom ldan 'das 'jig rten gyi khams yongs su ma dag pa dag na gang ni mod pa lags/ gang ni dkon pa lags/ yongs su dag pa dag na gang ni mod pa lags/ gang ni dkon pa lags/ 'jam dpal 'jig
 rten gyi khams yongs su ma dag pa dag na dngos po brgyad ni mod la/ gnyis ni dkon te/ 'di lta ste/ mu stegs can rnams dang / sems can sdug bsngal ba rnams dang / rigs dang / rus dang / cho rigs 'byor pa dang / rgud pa tha dad pa rnams dang / nyes
 par spyad pa spyod pa rnams dang / tshul khrims ral pa rnams dang / ngan song rnams dang / theg pa dman pa rnams dang / byang chub sems dpa' bsam pa dang / sbyor ba dman pa rnams ni mod pa yin la/ byang chub sems dpa' bsam pa dang sbyor ba mchog dang ldan pa
 rnams kyi spyod pa dang / de bzhin gshegs pa rnams 'byung ba ni dkon pa yin no/ /'jam dpal 'jig rten gyi khams yongs su dag pa dag na ni de las bzlog pas/ dngos po brgyad ni dkon la/ gnyis ni mod par rig par bya'o/ /de nas bcom ldan 'das la byang
 chub sems dpa' 'jam dpal gyis 'di skad ces gsol to/ /bcom ldan 'das dgongs pa nges par 'grel pa'i chos kyi rnam grangs 'dir bstan pa 'di'i ming ci lags/ 'di ji ltar gzung bar bgyi/ bcom ldan 'das kyis de la bka' stsal pa/ 'jam dpal 'di
 ni de bzhin gshegs pa'i bya ba bsgrub pa nges pa'i don bstan pa yin te/ 'di ni de bzhin gshegs pa'i bya ba bsgrub pa nges pa'i don bstan pa zhes bya bar zung shig /de bzhin gshegs pa'i bya ba bsgrub pa nges pa'i don bstan pa 'di bshad pa na/ byang chub sems dpa' bdun khri
 lnga stong gis chos kyi sku yongs su rdzogs pa so sor yang dag par rig pa thob par 'gyur to zhes gsungs so/ /yon tan gyi le'u rnam par gtan la dbab pa rdzogs so/ / / /bam po bzhi bcu gcig pa/ sems can gyi khams dpag tu med pa la sogs pa dpag tu med
 pa lnga zhes gang gsungs pa de la ci 'jig rten gyi khams thams cad mtshungs shing mnyam pa yin nam/ 'on te bye brag yod par brjod par bya zhe na smras pa/ bye brag yod par brjod par bya'o/ /de dag kyang yongs su dag pa dang / yongs su ma dag pa ste/ de la 'jig rten gyi khams
 yongs su dag pa dag na ni sems can dmyal ba rnams kyang med/ dud 'gro rnams kyang med/ yi dags rnams kyang med/ 'dod pa'i khams kyang med/ gzugs kyi khams kyang med/ gzugs med pa'i khams kyang med/ sdug bsngal gyi tshor ba
 yang med la/ de dag na byang chub sems dpa'i dge 'dun 'ba' zhig gnas pas na/ de'i phyir 'jig rten gyi khams de dag yongs su dag pa zhes bya ste/ de dag tu byang chub sems dpa' sa gsum par chud pa rnams smon lam gyi dbang gis skye'i/ de dag na so so'i skye bo'am/
 so so'i skye bo ma yin pa'i nyan thos rnams kyi skye ba med do/ /gal te de dag na so so'i skye bo'i byang chub sems dpa' rnams dang / so so'i skye bo ma yin pa'i nyan thos rnams kyi skye ba med na/ byang chub sems dpa' rnams smras pa na/ byang chub sems dpa' gang su dag de dag tu
 yid kyis smon par byed pa de dag thams cad ni de dag tu skye bar 'gyur ro zhes ci'i phyir smra zhe na/ smras pa/ gdul bya le lo dang ldan pa'i rang bzhin can dge ba'i rtsa ba ma bsags pa rnams la bsams nas smra ba yin te/ 'di ltar de dag nyid spro bar gyur na/ le lo spangs te dge
 ba'i chos rnams la brtson 'grus rtsom par byed cing / des rim gyis de dag tu skye ba'i chos nyid thob pa'i skal ba can du 'gyur ba'i phyir te/ de ltar na 'di la bsam pa na de yin par rig par bya'o/ /byang chub sems dpa'i gnas pa bzhi la brten nas bya ba bzhi sgrub par byed de/ rab
 tu dga' ba la gnas pa dang / lhag pa'i tshul khrims la gnas pa dang / lhag pa'i sems la gnas pa dang / lhag pa'i shes rab la gnas pa'o/ /rab tu dga' ba la gnas pa gang zhe na/ byang chub sems dpa' gang la gnas na lhag pa'i bsam pa dag pa'i sar
 chud pas/ byang chub kyi snying po la 'dug gi bar du dkon mchog gsum po dag la gzhan gyi dring mi 'jig pa'i bsam pa dang ldan pa yin no/ /lhag pa'i tshul khrims la gnas pa gang zhe na/ byang chub sems dpa' rab tu dga' ba la gnas pa de nyid la brten nas gang la gnas na
 gong du rang bzhin gyi tshul khrims can dang / 'chal ba'i tshul khrims dang / ser sna'i dri ma dang bral zhing tshul khrims dang / gtong ba phun sum tshogs pa de dag bla na med pa yang dag par rdzogs pa'i byang chub tu yongs su sngo bar byed pa'o / /lhag pa'i sems la gnas pa gang zhe
 na/ byang chub sems dpa' lhag pa'i tshul khrims la gnas pa de nyid la brten nas gang la gnas na gong du rang bzhin gyi bsam gtan la brten nas/ 'dod pa rnams las 'dod chags dang bral bar 'gyur ba dang / bsam gtan dang snyoms par 'jug pa rnams 'thob pa dang
 byams pa dang snying rje'i gnas pa dang ldan pas sems can rnams la ci nus ci lcogs kyis de bzhin nyid du sgrub par byed pa yin no/ /lhag pa'i shes rab la gnas pa gang zhe na/ byang chub sems dpa' lhag pa'i sems la gnas pa de nyid la brten nas/ gang la gnas na gong du byang
 chub kyi phyogs dang mthun pa'i chos la mkhas pa dang / bden pa la mkhas pa dang / rten cing 'brel bar 'byung ba la mkhas pa dang / nyan thos dang rang sangs rgyas rnams dang thun mong ma yin pa'i chos rnam par gzhag pa'i shes pa la mkhas pa dang / de dag nyid dang thun mong pa'i rtogs
 pa'i shes pas nges par 'byung ba la mkhas pa ste de la thun mong ma yin pa'i chos rnam par gzhag pa'i shes pa ni 'di yin te/ 'di lta ste/ byang chub sems dpa'i sde snod kyi dgongs pa'i tshig shes pa dang / rnam par ma bzhag pa'i bden pa shes pa dang / rnam par bzhag pa'i bden
 pa shes pa'o/ /de la thun mong ba'i shes pa ni 'di yin te/ 'di lta ste/ rten cing 'brel bar 'byung ba las brtsams nas/ rtogs pa'i shes pa'o/ /gnas pa bzhi po de dag la brten nas bya ba bzhi sgrub par byed de gnas pa dang po la brten nas ni byang chub kyi snying po la 'dug gi
 bar du byang chub kyi sems gtong bar mi byed do/ /gnas pa gnyis pa la brten nas ni byang chub kyi snying po la 'dug gi bar du phyi ma la lus 'phel ba dang / longs spyod 'phel ba dang / dge ba'i phyogs 'phel bas rnam par 'phel bar byed do/ /gnas pa gsum pa la brten nas ni
 bsam gtan rnams rnam par bsgyur nas smon lam gyis sems can gyi don bya ba'i phyir 'dod pa'i khams su skye zhing / 'dod pa na spyod pa'i nyon mongs pa rnams kyis kyang kun nas nyon mongs pa med par byed de/ gnas pa bzhi pa la brten nas ni chos rnam par
 gzhag pa thams cad rtogs pa la mkhas pas sems can gyi ched du 'khor ba khas len par byed pa dang / de khas blangs pa'i rgyus tshogs chen po yang dag par bsags pa dang / gnas pa de nyid yongs su dag pa'i rgyus gnas pa gzhan la mi ltos pa dang / gzhan gyi gdams
 ngag dang rjes su bstan pa la mi brten par myur ba kho nar de bzhin gshegs pa'i ye shes 'thob par byed do/ /byang chub sems dpa' rnams sdug bsngal gang dang ldan par brjod par bya zhe na/ smras pa/ sems can la gnod pa'i sdug bsngal rnams dang ngo / /byang chub sems
 dpa' rnams bde ba gang dang ldan par brjod par bya zhe na/ smras pa/ sems can la phan pa'i bde ba rnams dang ngo / /byang chub sems dpa' rnams yid la byed pa gang dang ldan par brjod par bya zhe na/ smras pa/ shes bya'i mthar 'jug pa dang / sems can gyi don bya
 ba'i yid la byed pa rnams dang ngo / /byang chub sems dpa' rnams gnas pa gang dang ldan par brjod par bya zhe na/ smras pa/ rnam par mi rtog pa'i gnas pa rnams dang ngo / byang chub sems dpa' rnams kyi sgrib pa chen po ni bzhi po 'di dag yin te/ de dag rnam par ma sbyangs na
 byang chub sems dpa' rnams sar 'jug pa dang / sa gnon pa'i skal ba med pa yin no/ /bzhi gang zhe na/ 'di lta ste/ byang chub sems dpa'i 'dul ba la nyon mongs pa can gyi ltung ba dang / theg pa chen po dang ldan pa'i chos spong zhing skur pa 'debs pa dang / dge ba'i rtsa ba
 ma bsags pa dang zang zing dang bcas pa'i sems dang ldan pa'o/ /sgrib pa chen po bzhi po de dag gi gnyen por sgrib pa rnam par sbyong bar byed pa'i chos rnam pa bzhir rig par bya ste bzhi gang zhe na/ 'di lta ste/ phyogs bcu'i de bzhin gshegs pa thams cad kyi spyan sngar nyes pa
 bshags par bya ba dang / phyogs bcu'i sems can thams cad kyi don du chos bshad par bya ba'i phyir de bzhin gshegs pa thams cad la gsol ba gdab par bya ba dang / phyogs bcu'i sems can thams cad kyi bsod nams thams cad la rjes su yi rang bar bya ba dang / dge ba'i rtsa ba
 byas pa dang ma byas pa thams cad bla na med pa yang dag par rdzogs pa'i byang chub tu yongs su bsngo ba'o/ /byang chub sems dpa' sar chud pa rnams kyis kyang yongs su shes par dka' zhing / spang bar dka' ba'i nye ba'i nyon mongs pa phra mo ni bzhi po 'di dag yin te/ byang chub
 sems dpa' de dag yongs su shes par byas shing / yongs su shes par byas nas spang bar bya'o/ /bzhi gang zhe na 'di lta ste/ chos la zad pa dang / nyan thos dang rang sangs rgyas dang ldan pa'i yid la byed pa dang / snyoms par 'jug pa'i ro myang ba dang / bdud kyi las so/ /
 de la bdud kyi las ni mtshan ma las sems rnam par 'phro ba gang ci yang rung ba yin par rig par bya'o/ /byang chub sems dpa' sa dang por chud pa ji lta bur gyur pa yin par brjod par bya zhe na/ smras pa/ so so'i skye bo'i sa thams cad las rnam par 'das pa dang / byang chub sems
 dpa'i yang dag pa nyid kyi skyon med pa la zhugs pa dang / der zhugs pa'i phyir so so'i skye bo ma yin pa dang / 'jigs pa thams cad las yang dag par 'das pa dang / bla na med pa'i chos ma 'dres pa thob pa'i phyir rtag tu rab tu dga' bar gnas pa yin par brjod par bya'o/ /byang
 chub sems dpa' sa gnyis par chud pa ji lta bur gyur pa yin par brjod par bya zhe na/ smras pa/ 'dul ba la chos nyid kyis thob pa kho nas nyan thos kyi bslab pa bag yongs su byas te/ rang bzhin gyis lus dang ngag dang yid kyi kun tu spyod pa yongs su dag pa'i phyir tshul khrims
 'chal pa'i dri ma dang bral ba yin par brjod par bya'o/ /byang chub sems dpa' sa gsum par chud pa ji lta bur gyur pa yin par brjod par bya zhe na/ smras pa/ nang gi zhi gnas kyi lam stobs dang ldan pa thob pas shes bya snang ba thob pa yin par brjod par bya'o/ /byang chub sems
 dpa' sa bzhi par chud pa ji lta bur gyur pa yin par brjod par bya zhe na/ smras pa/ nang gi lhag mthong gi lam stobs dang ldan pa thob pas nyon mongs pa srog par byed pa'i ye shes kyi 'od 'phro ba la rab tu gnas pa'i phyir byang chub kyi phyogs dang mthun pa'i chos
 ji ltar rtogs pa nyid rnam par 'jog pa la mkhas pa yin par brjod par bya'o/ /byang chub sems dpa' sa lnga par chud pa ji lta bur gyur pa yin par brjod par bya zhe na/ smras pa/ 'jig rten pa'i shes pa thams cad las yang dag par 'das pa'i phyir dang / nyan thos dang rang
 sangs rgyas kyi shes pa thams cad las yang dag par 'das pa'i phyir bden pa bsam gyis mi khyab pa la rjes su zhugs pas shin tu sbyang bar dka' ba'i lam la yang dag par zhugs pa yin par brjod par bya'o/ /byang chub sems dpa' sa drug par chud pa ji lta bur gyur pa yin par brjod par bya
 zhe na/ smras pa/ rten cing 'brel bar 'byung ba zab mo'i tshul la zhugs pa'i phyir 'du byed thams cad la mi mthun pa'i 'du shes la gnas pa dang / mtshan ma med pa'i dbyings nyid yin la bya ba mngon du bya ba de la mang du gnas pa yin par brjod par bya'o/ /byang chub sems
 dpa' sa bdun par chud pa ji lta bur gyur pa yin par brjod par bya zhe na/ smras pa/ mngon par 'du byed pa dang bcas pas rtag tu mtshan ma med pa'i dbyings yid la byed pas shin tu ring du rjes su zhugs pa dang / sbyor ba'i lam gyi mthar thug pa yin par brjod par bya'o/ /byang
 chub sems dpa' sa brgyad par chud pa ji lta bur gyur pa yin par brjod par bya zhe na/ smras pa/ mngon par 'du byed pa med cing rtsol ba med pas mtshan ma med pa'i dbyings yid la byed pa ji ltar 'dod pa bzhin thob pas mi g.yo ba dang / mtshan ma thams cad la dbang thob pa dang /
 dag pa'i sa la gnas pa yin par brjod par bya'o/ /byang chub sems dpa' sa dgu par chud pa ji lta bur gyur pa yin par brjod par bya zhe na/ smras pa/ ming gi tshogs dang / tshig gi tshogs dang / yi ge'i tshogs rnams la dbang thob pa'i phyir/ blo gros kha na ma tho ba med pa/
 tshad med pa rgya chen pos sems can thams cad kyi sems kun tu mgu bar bya ba'i phyir/ so so yang dag par rig pa chen po thob pa dang / chos smra ba chen po yin par brjod par bya'o/ /byang chub sems dpa' sa bcu par chud pa ji lta bur gyur pa yin par brjod par bya zhe na/ smras pa/
 sangs rgyas thams cad kyi dbang bskur ba chen po thob pa'i phyir/ sprin chen po lta bu'i chos kyi sku thob pa dang / mngon par shes pa chen po thob pa dang / de bzhin gshegs pa yin par yang brjod par bya'o/ /byang chub sems dpa' de bzhin gshegs pa'i sar chud pa ji lta bur gyur
 pa yin par brjod par bya zhe na/ smras pa/ chos kyi sku thob pa de nyid shin tu rnam par dag pa nyid kyi phyir dang / yongs su grub pa nyid kyi phyir rnam pa thams cad du nyon mongs pa dang / shes bya'i sgrib pa rnam par dag pa'i ye shes dang / mthong ba rnam par dag pa yin par brjod
 par bya'o/ /sa de dag gis yang dag par rtsom pa ji lta bu yin zhe na/ smras pa/ byang chub sems dpa' gang gi tshe 'di lta ste/ sa bcu las brtsams nas mos pas spyod pa'i sa la chos spyod pa bcu la zhugs pa yin no/ /sa de dag gi 'thob pa ji lta bu yin zhe na/ smras pa/ byang
 chub sems dpa' gang gi tshe byang chub sems dpa'i yang dag pa nyid kyi skyon med pa la 'jug cing / bsam pa rnam par dag pa yang 'thob pa de'i tshe na sa thams cad cig car 'thob pa yin no/ /sa de dag gi rgyu mthun pa gang yin zhe na/ smras pa/ thob pa'i 'og tu sa thams cad la
 mthu'i lam sbyor ba las byung ba gang yin pa'o/ /sa de dag gi yongs su 'grub pa ji lta bu yin zhe na/ smras pa/ byang chub sems dpa' sa de dag gang gi tshe sa rer la yang bskal pa 'bum phrag du ma dag gis sa de dag tu mthu gang brjod pa'i mthu de ci 'dod pa bzhin 'thob pa yin no/ /
 skyon med pa la zhugs pa lnga zhes gang gsungs pa de la nyan thos kyi skyon med par zhugs pa gang yin pa dang / byang chub sems dpa'i skyon med par zhugs pa gang yin pa de la/ chos kyi dbyings rtogs par 'dra na/ de dag la tha dad du bya ba ci yod par blta bar bya zhe na/ smras pa/ chos
 kyi dbyings kyi mtshan nyid ni mdor bsdu na rnam pa gnyis te/ bye brag gi mtshan nyid dang / rang gi mtshan nyid do/ /de la bye brag gi mtshan nyid ni/ de la rtag pa'i mtshan nyid dang / zhi ba'i mtshan nyid gang yin pa'o/ /de la rtag pa'i mtshan nyid ni
 de la gzod ma nas skye ba med pa'i chos nyid dang / mi zad pa'i chos nyid gang yin pa'o/ /de la zhi ba'i mtshan nyid ni nyon mongs pa dang / sdug bsngal dang bral ba'i chos nyid gang yin pa'o/ /de la rang gi mtshan nyid ni rgyu mtshan dang / ming dang / rnam par rtog pa dang / de
 bzhin nyid dang / yang dag pa'i shes pas bsdus pa'i chos thams cad la kun brtags pa'i ngo bo nyid kyis ngo bo nyid yongs su ma grub pa chos la bdag med pa gang yin pa'o/ /de la nyan thos ni bye brag gi mtshan nyid kyis chos kyi dbyings rtogs nas yang dag pa nyid kyi skyon med pa la
 'jug par byed kyi/ rang gi mtshan nyid kyis ni ma yin no/ /de rtogs pa'i phyir mi 'chi ba'i 'du shes dang / bde ba'i 'du shes kyis chos kyi dbyings la zhi ba'i 'du shes dang / 'du byed thams cad la mi mthun pa'i 'du shes gcig tu nges pa 'thob kyi/ rgyu mtshan la sogs pas
 bsdus pa'i chos de dag gi ngo bo nyid yongs su ma grub pa/ chos la bdag med pa gang yin pa de ni yang dag pa ji lta ba bzhin du rab tu mi shes te/ chos kyi dbyings la zhugs pa de ni chos kyi dbyings kyi bye brag la dmigs pa'i yid la byed pas sems kyi spyod pa mtshan ma med pa kho na yin gyi/
 rang gi mtshan nyid la dmigs pas ni ma yin no/ /gzhan las chos kyi dbyings kyi rang gi mtshan nyid bstan pa thos na yang de las nyan thos la la byang chub tu yongs su 'gyur ba gang yin pa de ni tshegs chen pos 'jug cing / des sbyor bar yang byed do/ /de las zhi pa'i bgrod pa gcig pa
 gang yin pa de ni tshegs chen pos 'jug cing des sbyor bar ni mi byed do/ /byang chub sems dpa' ni mtshan nyid de gnyi gas chos kyi dbyings rtogs nas yang dag pa nyid skyon med pa la 'jug cing skyon med pa la zhugs nas kyang chos kyi dbyings kyi rang gi mtshan nyid la dmigs pa'i yid la byed
 pas de la mang du gnas pa yin no/ /de ci'i phyir zhe na/ 'di ltar chos kyi dbyings kyi bye brag gi mtshan nyid la dmigs pa'i yid la byed pa mang du byed na myur du yongs su mya ngan las 'da' bar 'gyur ba'i phyir te/ de lta bas na de la lan mang du gnas pa ni bla na med pa yang dag par rdzogs
 pa'i byang chub kyi thabs ma yin te/ chos kyi dbyings rtogs par 'dra yang de dag gi tha dad du bya ba ni de yin par rig par bya'o/ /dus gsum gyi dkyil 'khor yongs su dag pa zhes gang gsungs pa de la dus gsum gyi dkyil 'khor yongs su dag pa gang zhe na/ smras pa/ kun
 brtags pa'i ngo bo nyid kyis 'das pa dang / ma 'ongs pa dang / da ltar byung ba'i chos rnams mtshungs shing mnyam par shes rab kyis yang dag pa ji lta ba bzhin du mthong ba'i 'das pa dang / ma 'ongs pa dang / da ltar byung ba'i chos rnams la mi lta ba dang / mngon par dga' ba med
 pa dang / lhag par chags pa med pa gang yin pa de ni dus gsum gyi dkyil 'khor yongs su dag pa zhes bya'o/ /sangs rgyas kyi chos ma 'dres pa brgya bzhi bcu zhes gang gsungs na/ bcom ldan 'das kyis mdo sde las sangs rgyas kyi chos ma 'dres pa bco brgyad yongs su
 bstan pa gang dag yin pa de dag gi rnam par gzhag pa ni ji lta bu yin/ du dag gis ni bsdus she na/ smras pa/ 'di lta ste/ dge slong dgra bcom pa/ zag pa zad pa/ grong du bsod snyoms kyi phyir rgyu ba na lan 'ga' glang po che gtum po dang lhan cig 'gro ba dang / glang po che
 gtum po dang ji lta ba bzhin du rta rmu rgod dang / gnag rdung kus dang / khyi za ba dang lhan cig 'gro ba dang / tsher thags stug po'i steng du rdzi ba dang / rkang pa gnyis kyis sbrul shin tu sgra 'byin pa rdzi ba dang / de gang du bud med kyis mi rigs pas skyed pas mgron du gnyer ba de lta bu'i
 khyim du 'jug pa dang / dgon par lam bor te lam ngan par 'gro ba dang / chom rkun pa rnams dang / mi rgod pa rnams dang lhan cig 'gro ba dang / seng ge rnams dang / stag rnams dang / gzig rnams dang lhan cig 'gro ba dang / de ltar dgra bcom pa'i 'khrul pa de lta bu dang
 mthun pa gang yin pa de/ de bzhin gshegs pa la thams cad kyi thams cad du med pa dang / gzhan yang dgra bcom pa lan 'ga' yang dgon pa nags khrod chen por 'khyams shing / lam stor nas khyim stong par zhugs te dgra 'byin par byed/ ku co 'don
 par byed/ ca co chen po 'byin par byed pa dang / bag chags kyi nyes pa la brten te/ kun nas nyon mongs pa can ma yin pa'i rta gad chen pos dgod cing so ston pa dang / phyas long ston par byed pa dang / dgra bcom pa'i ca co de lta bu dang mthun pa gang yin pa de de bzhin gshegs
 pa la thams cad kyi thams cad du med pa dang / gzhan yang dgra bcom pa la lan 'ga' brjed ngas pas bdag nyid kyi bya ba ma yin pa byed pa gang yin pa de de bzhin gshegs pa la med pa dang / gzhan yang dgra bcom pa gcig tu phung po la mi mthun par 'du shes la/ 'gog pa mya ngan
 las 'das pa la zhi bar 'du shes pa gang yin pa'i phung po dang mya ngan las 'das pa la tha dad par 'du shes pa des/ de bzhin gshegs pa btang snyoms dam pa la zhugs pa'i phyir med pa dang / gzhan yang dgra bcom pa ni snyoms par zhugs na mnyam par gzhag pa yin la/ langs
 na mnyam par ma bzhag pa yin gyi/ de bzhin gshegs pa la ni gnas skabs thams cad du sems mnyam par ma bzhag pa med pa dang / gzhan yang dgra bcom pa ni so sor ma brtags par sems can gyi don bya ba btang snyoms su 'jog gi/ de bzhin gshegs pa la ni de lta bu dang
 mthun pa'i so sor ma brtags pa'i btang snyoms med pa dang / gzhan yang dgra bcom pa la ni shes bya'i sgrib pa rnam par sbyangs pa las brtsams nas/ ma thob pa'i yongs su nyams pas 'dun pa las kyang yongs su nyams par 'gyur/ brtson 'grus dang / dran pa dang / ting
 nge 'dzin dang / shes rab dang / rnam par grol ba dang / rnam par grol ba'i ye shes dang mthong ba las kyang yongs su nyams par 'gyur ba yod kyi/ de bzhin gshegs pa la ni yongs su nyams pa rnam pa bdun po de dag med pa dang / gzhan yang dgra bcom pa ni lan 'ga' ni lus
 kyi las dge ba la yang 'jug / lan 'ga' ni lung du ma bstan pa la yang 'jug ste/ lus kyi las ji lta ba de bzhin du/ ngag gi las dang / yid kyi las la yang de bzhin pa yin gyi/ de bzhin gshegs pa'i phrin las de gsum ni ye shes sngon du 'gro ba'i phyir dang / ye shes kyi rjes su
 'brang ba'i phyir sku dang / gsung dang / thugs kyi phrin las lung du ma bstan pa med de/ de la ye shes kyis kun nas bslang ba nyid yin pa'i phyir ye shes sngon du 'gro ba yin no/ /ye shes dang lhan cig rgyu ba nyid yin pa'i phyir ye shes kyi rjes su 'brang ba yin no/ /gzhan yang dgra
 bcom pas ni dus gsum gyi shes bya'i dngos po la brtsal ba tsam gyis mi rtogs pas/ de'i phyir de'i ye shes dang mthong ba chags pa med pa yang ma yin la/ thams cad kyang mi rtogs pas de'i phyir de'i ye shes dang mthong ba thogs pa med pa yang ma yin gyi de bzhin gshegs pas ni
 dus gsum gyi shes bya'i dngos po la brtsal ba tsam gyis thams cad rtogs pas/ de'i phyir de dag ni sangs rgyas kyi chos ma 'dres pa bco brgyad ces bya'o/ de la dang po bzhi ni bsnyel ba mi mnga' ba'i chos nyid dang / bag chags legs par bcom pas bsdus so/ /gcig ni
 thugs rje chen pos bsdus so/ /lhag ma rnams ni rnam pa thams cad dang mchog mkhyen pas bsdus par rig par bya'o/ /bcom ldan 'das kyis mdo sde las dpe byad bzang po gang dag yongs su bstan pa de dag ni gdul bya dang ba bskyed pa las ltos te yongs su bstan pa yin gyi/
 mtshan nyid rnam par gzhag pa ni ma yin no/ /mtshan nyid rnam par gzhag pa ni rab tu gnas pa'i le'ur ji skad yongs su bstan pa yin te/ dpe byad bzang po de dag las dpe byad bzang po de dag phyung bar rig par bya'o/ /gzhan yang byang chub sems dpa'i log par sgrub pa yang
 rig par bya/ yang dag pa'i sgrub pa yang rig par bya/ yang dag pa'i bsgrubs pa'i phan yon yang rig par bya/ yang dag par sgrub pa la rnam par gnas pa'i byang chub sems dpa'i chos spyod pa dang / snyoms par spyod pa dang dge ba spyod pa dang chos la gnas pa'i rnam pa yang rig
 par bya/ byang chub sems dpa' la dad pa skyed pa'i dpe dag kyang rig par bya/ yang dag pa'i sgrub pa la rnam par gnas pa'i byang chub sems dpa'i bslab pa yang rig par bya/ nyan thos kyi bslab pa dang / byang chub sems dpa'i bslab pa'i khyad par yang rig
 par bya/ byang chub sems dpa'i bslab pa la legs par bslab pa'i byang chub sems dpa'i 'jig rten pa dang 'jig rten las 'das pa'i shes pa dag gis gzhan gyi don bya ba yang rig par bya/ byang chub sems dpa'i gdams ngag 'di la nyan thos kyi bslab pa yang rig par bya/ legs
 par ma bslabs pa'i dge sbyong yang rig par bya/ legs par bslabs pa'i dge sbyong yang rig par bya/ brdar btags pa'i sdom pa la gnas pa yang rig par bya/ don dam pa'i sdom pa la gnas pa yang rig par bya/ de bzhin gshegs pa'i 'dul ba yang rig par bya/ de
 bzhin gshegs pa'i 'dul ba'i thabs kyang rig par bya/ dgongs te gsungs pa yang rig par bya'o / /byang chub sems dpa'i sde snod kyi gdams ngag la mos pa'i phan yon yang rig par bya ste/ de ni byang chub sems dpa'i sde snod kyi gdams ngag mdor bstan pa yin no/ /de la
 log par sgrub pa gang zhe na/ de ni mdor bsdu na gong nas gong du mngon par sgrub pa las rnam pa brgyad du rig par bya ste/ ye shes kyi tshogs yongs su nyams par 'gyur ba'i log par sgrub pa dang / ye shes kyi tshogs yongs su nyams pa'i dran pa brjed par 'gyur ba'i log par sgrub
 pa dang / dran pa brjod pa'i dkar po'i chos yongs su gtugs par 'gyur ba'i log par sgrub pa dang / dkar po'i chos yongs su gtugs pa'i byang chub sems dpa'i cha ma yin pa mi mthun par yid kyis kun tu spyod par 'gyur ba'i log par sgrub pa dang / mi mthun par yid kyis
 kun tu spyod pa'i gdul dka' bar 'gyur ba'i log par sgrub pa dang / gdul dka' ba'i lam ngan par 'gro bar 'gyur ba'i log par sgrub pa dang / lam ngan par song ba'i dam pa ma yin pa dang 'grogs par 'gyur ba'i log par sgrub pa dang / dam pa ma yin pa dang 'grogs pa'i
 don ji lta ba bzhin ma yin pa'i byang chub sems dpa' nyid du 'gyur ba'i log par sgrub pa ste/ byang chub ni shes rab kyi rang bzhin yin la/ shes rab kyis ni de las gzhan pa'i pha rol tu phyin pa rnams sgrub ste/ de'i phyir byang chub sems dpa' shes rab la log par sgrub par byed na/
 byang chub dang byang chub 'dren par byed pa'i chos rnams la log par zhugs pa yin no/ /byang chub sems dpa'i ye shes kyi tshogs yongs su nyams par 'gyur ba'i chos ni bzhi ste/ bzhi gang zhe na/ mi nyan pa dang / nyan du mi 'jug pa dang / nyan pa'i sgrib pa dang / log
 par mngon par zhen pa nyan du 'jug pa'o/ /ye shes kyi tshogs yongs su nyams par 'gyur ba'i chos bzhi po de dag la brten nas/ tshe 'di dang tshe phyi ma la ye shes dang / mi mthun pa'i chos gzhan bzhi skye ste/ bzhi gang zhe na/ bye brag tu mi rtog pa dang / rkyen med pa dang /
 gti mug tu 'gyur ba'i bsod nams ma yin pa skye ba dang / phyin ci log go/ /de la mi nyan pa la brten nas ni tshe 'di la bye brag tu mi rtog pa skye'o/ /nyan du mi 'jug pa la brten nas ni tshe phyi ma la rkyen med pa skye'o/ /nyan pa'i sgrib pa la brten nas ni tshe phyi ma la gti mug tu 'gyur
 ba'i bsod nams ma yin pa skye'o/ /log par mngon par zhen pa nyan du 'jug pa la brten nas ni tshe phyi ma la phyin ci log skye'o/ /de la mi nyan pa ni chos la zhe 'gras pa dang / gang zag la zhe 'gras pa dang / de gnyi ga la zhe 'gras pas kyang mi nyan to/ /nyan du mi
 'jug pa ni gzhan pas shes pa ha cang lhag par rlom pa dang / gzhan gyi brnyas kyis 'jigs pas kyang nyan du mi 'jug go/ /nyan pa'i sgrib pa ni chos dang gang zag la mi bsngags pa brjod pa dang / 'gyod pa dang / rnam par g.yeng ba nye bar sgrub pa dang / mi smra ba
 dang / gsol ba mi 'debs pa dang / skabs mi 'byed pa dang / nyan pa la mi bsngags pa brjod pa las kyang 'gyur ro/ /log par mngon par zhen pa nyan du mi 'jug pa ni rang gis nyes par rtogs pa dang / bsgoms pa dang / bshad pa la legs par rtogs pa dang /
 bsgoms pa dang / bshad pa dang mngon par zhen pa dang / gzhan dag gis legs par rtogs pa dang / bsgoms pa dang / bshad pa la nye bar rtogs pa dang / bsgoms pa dang / bshad par mngon par zhen pa las kyang 'gyur ro/ /de la mi nyan pa
 gang yin pa dang / nyan du mi 'jug pa gang yin pa dang / nyan pa'i sgrib pa gang yin pa'i chos de gsum ni shas cher thos pa las byung ba'i ye shes kyi tshogs yongs su nyams par 'gyur ba yin no/ /log par mngon par zhen pa nyan du 'jug pa gang yin pa'i chos de ni shas
 cher bsams pa las byung ba dang / bsgoms pa las byung ba'i ye shes kyi tshogs yongs su nyams par 'gyur pa yin no/ /byang chub sems dpa'i dran pa brjed par 'gyur ba'i chos kyang bzhi ste/ bzhi gang zhe na/ gang zag bzhi la gnas bzhis rnam par rmongs par
 byed pa ste/ gleng ba po rnams dang / lung 'bogs pa rnams dang / phan par 'dod pa rnams dang / yon tan dang ldan pa rnams la bdag nyid kyi 'gal bar rnam par rmongs par byed pa dang / tshangs pa mtshungs par spyod pa bslab pa la legs par gnas pa rnams la bslab
 pa la bzhis rnam par rmongs par byed pa dang / theg pa chen po la mos par 'dod pa dang / sgrub par 'dod pa rnams la/ ma brjod pa dang / brjod pa dang / rnam par byang ba'i skyon yongs su ston pas de la mos pa dang / sgrub pa rnam par rmongs par byed pa dang / chos
 smra ba'i gang zag rnams la gsang ba'i gnas rnam par dbye ba'i phyir rnam par rmongs par byed pa'o/ /byang chub sems dpa'i dkar po'i chos yongs su gtugs par 'gyur ba'i chos kyang bzhi ste/ gzhan la ston pa'i dbang du byas nas/ dkar po'i chos rnams kyi
 gnas ma yin pa la sbyor ba dang / dkar po'i chos rnams kyi gnas ma yin pa la sbyor ba la log par sgrub pa'i nyes pa rnam pa gsum ste/ zang zing gi nyes pa dang / lta ba'i nyes pa dang / ston pa'i nyes pa'o/ /de la zang zing gi nyes pa ni rgyu gnyis kyis rig par
 bya ste/ log pa'i longs spyod dang / 'du 'dzi mang bas so/ /lta ba'i nyes pa yang rgyu gnyis kyis rig par bya ste/ dam pa'i chos dang gang zag spong ba dang / dam pa ma yin pa'i chos dam pa'i chos su ston pa la mngon par zhen pas so/ /ston pa'i nyes pa yang rgyu
 gnyis kyis rig par bya ste/ drang ba'i don gyi mdo sde chung ngu 'ba' zhig ston pa dang / nges pa'i don gyi mdo sde rna lam du ma grags shing ma bzung ba rnams spong bas so/ /byang chub sems dpa' byang chub sems dpa'i cha ma yin pa mi mthun par yid kyis kun tu spyod pa yang bzhi
 po 'di dag yin te/ ston pa la yid mi ches par gyur cing / bslab pa la gus pa dang mi mthun pa dang / tshangs pa mtshungs par spyod pa grogs rnams dang / gleng ba po rnams dang / rjes su ston pa rnams la bdag nyid ji ltar gyur pa brjod pa dang / mi mthun pa dang /
 shes pa bsod nams chen po rnams la dge ba'i brtson 'grus rtsom pa dang mi mthun pa dang zab cing rgya che ba la mos pa rnams dang / bdag nyid kyi sgrib pa rnam par dag pa dang mi mthun pa'o/ /de la ston pa la yid mi ches pa ni rnam pa gsum gyis rig par bya ste/ yod pa nyid
 dang / bdag nyid che ba dang / ye shes brnyes pa dag la yid mi ches pa'o/ /bdag nyid ji ltar gyur pa mi brjod pa yang rnam pa gsum gyis rig par bya ste/ bdag nyid la che ba'i bdag nyid yod do snyam du log par khengs shing / des sems yongs su gtugs pas
 sems can grogs po rnams la de yongs su ston pa dang / sems can gleng ba po rnams la ltung ba 'chab pa dang / sems can rjes su ston pa rnams la smad pa'i dbang du byas nas rnyog pa can gyis de la tho 'tshams pas mngon par 'du byed pas so/ /dge ba la brtson
 'grus mi rtsom pa ni rnam pa gnyis kyis rig par bya ste/ sems can shes pa bsod nams chen po rnams kyi rnyed pa dang / bkur sti la dga' bar mi byed pa dang de la mngon par dga' bas so/ /byang chub sems dpa'i gdul dka' bar 'gyur ba'i chos kyang bzhi ste / 'di lta
 ste bsgom pa'i sgrib pa bzhi po dag ste/ thos pa lhur len pa dang / gdams ngag la log par 'dzin pa dang / tshul khrims dag la gnas par mi byed pas 'gyod pa dang / rang gi lta ba mchog tu 'dzin cing gnas pa'o/ /de la thos pa la sems nye bar
 ma zhi bas thos pa lhur len pa yin no/ /rjes su bstan pa la log par rnam par rtog pas gdams ngag la log par 'dzin pa yin no/ /tshul khrims dag la skyon yod la dad pas byin pa yongs su longs spyod pas 'gyod pa yin no/ /sems can dbang po dul bas khyad par
 du 'phags pa rnams dang / spong bas khyad par du 'phags pa khyad par can rnams la 'gron par byed pas rang gi lta ba mchog tu 'dzin cing gnas pa yin no/ /byang chub sems dpa'i sems can rnams la lam ngan par 'gro ba yang bzhi po 'di dag yin te/ sems can dad
 pas zhugs pa ma yin pa rnams la ston pa dang / sems can theg pa dman pa theg pa chen po 'dod pa rnams la mi 'tsham pa ston pa dang / sems can theg pa chen po theg pa dman pa 'dod pa rnams la mi mthun pa ston pa dang / sems can tshul khrims la gnas pa dang
 tshul khrims la mi gnas pa rnams la phyogs kyi 'dod chags kyis mi 'dra bar ston pa'o/ /de la tshul khrims la gnas pa ni rnam pa gsum gyis rig par bya ste/ lam gyi mtha' la nyes pa med pa dang / tshul khrims la skyon med pa dang / bslab pa la gus pas so/ /tshul
 khrims la mi gnas pa ni rnam pa gnyis kyis rig par bya ste/ tshul khrims la skyon byung ba dang / bslab pa la mi gus pas so/ /byang chub sems dpa' dam pa ma yin pa dang 'grogs pa la brten na rnam pa bzhi yongs su nyams par 'gyur te/ theg pa yongs su nyams
 pa dang / sems can gyi don gyi sbyor ba yongs su nyams pa dang / bstan pa yongs su nyams pa dang / dge ba'i chos rnams la rtag tu sgom pa yongs su nyams pa'o/ /byang chub sems dpa' bzhi po chos 'dzin pa dang / dgon pa pa dang / bsod nams bya ba la brtson
 pa dang / 'khor dang spyod pa de dag la byang chub sems dpa' dang ba'i bya ba 'dod pa ni chos 'dzin pa yin yang don ji lta ba bzhin ma yin pa yin gyi/ don ji lta ba bzhin ma yin no/ /byang chub sems dpa' sgra 'dod pa ni dgon pa pa yin yang don ji lta ba bzhin ma yin
 pa yin gyi/ don ji lta ba bzhin ma yin no/ /byang chub sems dpa' zang zing gi 'bras bu dang 'brel pa'i sems dang ldan pa ni bsod nams bya ba la brtson pa de yin yang don ji lta ba bzhin ma yin pa yin gyi/ don ji lta ba bzhin ma yin no/ /byang chub sems dpa'
 bsnyen bkur dang yongs su spyad pa dang / grags pa dang 'brel pa'i sems dang ldan pa ni 'khor dang longs spyod kyang ji lta ba bzhin ma yin pa yin gyi don ji lta ba bzhin ma yin no/ /yang dag pa'i sgrub pa gang zhe na/ yang dag pa'i sgrub pa ni de las bzlog pa ste/ skyon khyad
 par can yongs su spangs pa dang / gnyen po bstan pas gong nas gong du bsgrubs pas rnam pa brgyad kyis rig par bya'o/ /gang gi phyir mi nyan pa ye shes yongs su nyams par 'gyur ba yin par smras na/ ci'i phyir chos dang gang zag la mi gus pa yang yongs su bstan
 ce na/ des kyang de byed la mi byed na yang ma mos pas yongs su nyams par 'gyur ba'i phyir ro/ /gang gi phyir nyan du mi 'jug pa ye shes yongs su nyams par 'gyur ba yin par smras na ci'i phyir dang ba'i bya ba 'dod pa nyid kyang yongs su bstan ce na/ des kyang de byed la mi
 byed na yang log pa'i chos yongs su bsngo bas yongs su nyams par 'gyur ba'i phyir ro/ /gang gi phyir nyan pa'i sgrib pa ye shes yongs su nyams par 'gyur ba yin par smras na/ ci'i phyir 'dun pa med pa'i mi nyan pa dang / mi 'dzin pa yang yongs su bstan ce na/ des
 kyang de byed la/ mi byed na yang le los yongs su nyams par 'gyur ba'i phyir ro/ /gang gi phyir log par mngon par zhen pa nyan du 'jug pa ye shes yongs su nyams par 'gyur ba yin par smras na/ ci'i phyir sgom pa la yon tan du mi lta ba dang / thos pa dang / smra ba lhur
 len pa nyid kyang yongs su bstan ce na/ des kyang de byed la/ mi byed na yang ye shes yongs su mi 'grub pas yongs su nyams par 'gyur ba'i phyir ro/ /gang gi phyir gleng ba po rnams la bdag nyid kyi 'gal bas rnam par rmongs par byed pa dran pa brjed par 'gyur
 ba yin par smras na/ ci'i phyir dngos po lci ba'i ltung bas 'jigs pa dang / dngos po yang ba khyad du gsad pa'i phyir brdzun smra ba yang yongs su bstan ce na/ des kyang de byed la/ des las kyi sgrib pas rab tu brjed par 'gyur ba dang / mi byed na yang ltung ba'i sgrib pas rab
 tu brjed par 'gyur ba'i phyir ro/ /gang gi phyir bslab pa'i gzhis rnam par rmongs par byed pa/ dran pa brjed par 'gyur ba yin par smras na/ ci'i phyir ngo bo nyid kyi rjes su mi 'jug pa dang log par lta ba dang / gya gyu nyid kyang yongs su bstan ce na/ des kyang de byed la des
 las kyi sgrib pas rab tu brjed par 'gyur ba dang / mi byed na yang ltung ba'i sgrib pas rab tu brjed par 'gyur ba'i phyir ro/ /gang gi phyir theg pa chen po la mos pa dang / sgrub pas rnam par rmongs par byed pa dran pa brjed par 'gyur ba yin par smras na/ ci'i phyir byang
 chub sems dpa' rnams la gus pa mi skyed pa dang / yang dag pa'i yon tan 'chab pa yang yongs su bstan ce na/ des kyang de byed la/ des las kyi sgrib pas rab tu brjed par 'gyur ba dang / mi byed na yang ltung ba'i sgrib pas rab tu brjed par 'gyur ba'i phyir ro/ /
 gang gi phyir gsang ba'i gnas rnam par dbye ba'i phyir rmongs par byed pa/ dran pa brjed par 'gyur ba yin par smras na/ ci'i phyir theg pa chen po las 'dun pa bzlog par 'dod pa nyid kyang yongs su bstan ce na/ des kyang de byed la/ des las kyi sgrib pas rab tu brjed par
 'gyur ba dang / mi byed na yang ltung ba'i sgrib pas rab tu brjed par 'gyur ba'i phyir ro/ /gang gi phyir gnas ma yin pa la sbyor ba dkar po'i chos yongs su gtugs par 'gyur ba yin par smras na/ ci'i phyir bdag la phan par 'dod pa nyung ba dang / ma zhugs pa dang / theg
 pa dman pa nyan pa dang / sems can dman pa nyid kyang yongs su bstan ce na/ des kyang de byed la/ des dkar po'i chos ma thob pa rnams ni mi 'thob la/ bzung ba dang nyan pa lhod pas thob pa rnams las kyang yongs su nyams par 'gyur ba'i phyir ro/ /gang gi phyir zang zing
 gi nyes pa dkar po'i chos yongs su gtugs par 'gyur ba yin par smras na/ ci'i phyir legs par thob pa'i rnyed pas chog mi shes pa dang / tshul 'chos pa la sogs pa'i chos rnams dang / yongs su gdung ba yang yongs su bstan ce na/ des kyang de byed la/ des ma
 thos pa mi nyan pa dang / don dang bya ba la 'phyar g.yeng mang bas ting nge 'dzin mi rtogs pa'i phyir ro/ /gang gi phyir lta ba'i nyes pa dkar po'i chos yongs su gtugs par 'gyur ba yin par smras na/ ci'i phyir gzhan gyi skyon la lta ba dang / nyan thos dang theg pa chen po'i
 bslab pa la phyin ci log pa yang yongs su bstan ce na/ des kyang de byed la/ des yang dag pa'i sgrub pa las nyams par 'gyur ba dang / gzhan la slu bas nyams par yang 'gyur ba'i phyir ro/ /gang gi phyir ston pa'i nyes pa dkar po'i chos yongs su gtugs par 'gyur
 ba len par smras na/ ci'i phyir de bzhin gshegs pa'i ye shes kyi dgongs pa shes so zhes khyad du gsod par byed pa nyid kyang yongs su bstan ce na/ des kyang de byed la/ des dam pa'i chos la skur ba 'debs pas nyams par 'gyur ba dang / de bzhin gshegs pa'i
 ye shes kyi dgongs pa la log par yongs su 'dzin pas nyams par 'gyur ba'i phyir ro/ /gang gi phyir bslab pa la shas cher mi gus pa mi mthun par yid kyis kun tu spyod par 'gyur ba yin par smras na/ ci'i phyir ltung ba rnam par mi 'byed pa dang / mi 'chags pa dang /
 'gyod pa mi sel ba nyid kyang yongs su bstan ce na/ des kyang de kun tu spyod la/ dmigs pa la rnam par g.yeng bas kyang gya gyu la zhugs par 'gyur ba'i phyir ro/ /gang gi phyir bdag nyid ji ltar gyur pa bzhin mi brjod pa mi mthun par yid kyis kun tu spyod par 'gyur ba yin par
 smras na/ ci'i phyir bdag nyid dang longs spyod la lta ba dang / bden pa'i tshig sbed pa nyid kyang yongs su bstan ce na/ des kyang de kun tu spyod la/ bstan pa las rnam par g.yeng bas kyang gya gyu la zhugs par 'gyur ba'i phyir ro/ /gang gi phyir brtson 'grus
 'dor bar byed pa mi mthun par yid kyis kun tu spyod par 'gyur ba yin par kun tu smras na/ ci'i phyir mi bzod pa yang yongs su bstan ce na/ des kyang de kun tu spyod la/ sdug bsngal mi bzod pa dang / dge ba las rnam par g.yeng bas kyang gya gyu la zhugs par 'gyur ba'i phyir
 ro/ /gang gi phyir sgrib pa rnam par ma dag pa'i rgyus mi mthun par yid kyis kun tu spyod par 'gyur ba yin par smras na/ ci'i phyir theg pa chen po la lhag pa'i bsam pas mos pa med pa yang yongs su bstan ce na/ des kyang de kun tu spyod la/ theg pa chen po la rnam par g.yeng
 bas kyang gya gyu la zhugs par 'gyur ba'i phyir ro/ /gang gi phyir bsgom pa'i sgrib pa thos pa lhur len pa gdul dka' bar 'gyur ba yin par smras na/ ci'i phyir klan ka dang / de skad rgol ba las thar pa'i phan yon du lta bas nyan pa yang yongs su bstan ce na/ des kyang de byed la
 dge ba'i bshes gnyen chos 'dzin pa la yang slu bar byed pa'i phyir ro/ /gang gi phyir bsgom pa'i sgrib pa gdams ngag la log par 'dzin pa gdul dka' bar 'gyur ba yin par smras na/ ci'i phyir tshig mi bzod pa nyid dang / ltung ba 'dzin pa nyid dang / gdams ngag la mi
 gus pa nyid kyang yongs su bstan ce na/ des kyang de byed la/ dge ba'i bshes gnyen dgon pa pa la yang slu bar byed pa'i phyir ro/ /gang gi phyir bsgom pa'i sgrib pa tshul khrims dag la gnas par mi byed pa 'gyod pa gdul dka' bar 'gyur ba yin par smras na/ ci'i phyir bslab
 pa dag la shas cher mi gus la/ dad pas byin pa yongs su longs spyod pa yang yongs su bstan ce na/ des kyang de byed la/ dge ba'i bshes gnyen bsod nams bya ba la brtson pa la yang slu bar byed pa'i phyir ro/ /gang gi phyir bsgom pa'i sgrib pa rang gi lta ba mchog tu 'dzin cing
 gnas pa/ gdul dka' bar 'gyur ba yin par smras na/ ci'i phyir byang chub sems dpa' pha rol tu phyin pa rnam par dag pa rnams la mi gus pa dang / mi lta ba dang / bsnyen bkur mi byed pa dang / mi nyan pa dang / rjes su mi mthun pa'i chos bsgrub par 'dod pa nyid kyang yongs
 su bstan ce na/ des kyang de byed la/ dge ba'i bshes gnyen 'khor dang spyod pa la yang slu bar byed pa'i phyir ro/ /gang gi phyir mi ston pa dang / mi 'tshal ba ston pa dang / mi mthun pa ston pa dang / mi 'dra bar ston pa lam log par 'gro bar 'gyur ba yin par smras na/ ci'i
 phyir yang dang yang du ston pas yongs su skyo zhing / sems mi mnyam pa nyid dang / ston pa'i thabs mi shes pa nyid dang / theg pa dman pa la mos pa nyid dang / zang zing dang bcas pa'i sems kyis 'khor la rjes su ston par sbyor ba nyid kyang yongs su bstan ce na/ de dag gis
 kyang de dag byed la/ dge ba'i rtsa ba yongs su ma rdzogs pa dang / dge ba'i rtsa ba rgya chen po yongs su mi 'dzin pa dang / dge ba'i rtsa ba rgya chen po yongs su gtong ba dang / bsod nams ma yin pa skye bas kyang gdul ba la slu bar byed pa'i phyir ro/ /gang gi phyir dam pa ma yin pa dang /
 'grogs pa rnam pa bzhi spong / dngos po rnam pa bzhi yongs su nyams par 'gyur ba yin par smras na/ ci'i phyir ser sna dang / thos pa nyung ba dang / bstan pa la legs par ma zhugs pa dang / sangs rgyas kyi bka' mi nyan pa yang yongs su bstan ce na/ de dag gis kyang de dag
 byed la/ dge ba'i rtsa ba ma byas pa'i phyir 'khor ba'i sdug bsngal gyis 'jigs pa dang / gzhan gyi don byed mi nus pa dang / dge ba'i rtsa ba chung ba dang / chos rnams la yid gnyis dang / the tshom za bas kyang yongs su nyams par 'gyur ba'i phyir ro/ /gang gi phyir byang chub
 sems dpa' bzhi la dang ba'i bya ba 'dod pa dang / sgra 'dod pa dang / zang zing gi 'bras bu 'dod pa dang / bsnyen bkur dang yongs su spyad pa dang grags pa 'dod pa don ji lta ba bzhin ma yin pa'i byang chub sems dpar 'gyur ba yin par smras na/ ci'i phyir bdag la chags pa dang
 bcas pa la kha na ma tho ba phra rab tsam dag la 'jigs par mi lta ba dang / bdag med pa la mos pa med pa dang bcas pa la gzhan gyi don la mi lta ba dang / 'khor ba dang mya ngan las 'das pa dag la gcig tu yon tan du lta ba dang / tshe 'di la 'du 'dzi 'dod pa dang / phyi
 ma la dbang phyug 'dod pa chos dang zang zing 'dod pa yang yongs su bstan ce na/ de dag gis kyang de dag byed la/ chos 'dzin pa nyid nas 'khor dang spyod pa'i bar gyis kyang bdag nyid la slu bar byed pa'i phyir ro/ / / /bam po bzhi bcu gnyis pa/ yang dag pa'i sgrub pa'i
 phan yon gang zhe na/ de yang gong nas gong du rnam pa bzhir rig par bya ste/ byang chub sems dpa' de ltar yang dag par zhugs pa la bsod nams dang / ye shes kyi tshogs bsags pa dang / de la brten nas sgrib pa rnam par dag pa dang / de la brten nas sgo thams cad nas
 dkar po'i chos yang dag par 'grub pa dang / de la brten nas sems can thams cad kyi don rnam pa thams cad la sbyor ba dang / bsod nams dpag tu med pa skye ba'o/ /bsod nams dang ye shes kyi tshogs sogs par 'gyur ba'i chos ni bzhi ste/ yang dag pa'i bsgrub pa nyid
 du de bzhin gshegs pa la mchod pa dang rim gro byed pa dang / thos pa rnam par dag pa dang / bsam pa rnam par dag pa dang / bsgom pa rnam par dag pa'o/ /sgrib pa rnam par dag par 'gyur ba'i chos ni bzhi ste/ theg pa las rnam par mi g.yo ba dang / rang gis gzhan
 dag la mi sgrub pa'i rgyu yongs su spong ba nyid dang / log par sgrub pa'i rgyu yongs su spong ba nyid dang / yang dag pa'i sgrub pa yongs su mi rdzogs pa'i rgyu yongs su spong ba nyid do/ /sgo thams cad nas dkar po'i chos yang dag par 'grub par 'gyur ba'i chos bzhi ste/ bsgom
 pa ni bsgom pa'i rgyu las byung ba'i dang sems can yongs su smin par byed pa ni de'i rgyu las byung ba'i dang / sdug bsngal bzod pa nyid ni de'i rgyu las byung ba'i dang / nyan pa dang / sems pas mi ngoms pa nyid ni de'i rgyu las byung ba'i'o/ /sems can gyi don gyi rnam pa thams cad byed par
 'gyur ba'i chos bzhi ste sems can rnams gnas bzhi las rnam par slong bar byed pa ste/ som nyi dang yid gnyis dang / the tshom las rnam par slong bar byed pa dang / ngan song ngan 'gro log par ltung ba las rnam par slong bar byed pa dang / theg pa dman pa la mos pa las rnam par
 slong bar byed pa dang / bstan pa la kun nas mnar sems dang / khong khro ba'i sems las rnam par slong bar byed pa pa'o/ /byang chub sems dpa' yang dag pa'i sgrub pa la zhugs pa ji ltar gyur na/ phan yon de dag thob ce na/ chos spyod pa dang / snyoms par spyod pa dang / dge ba spyod
 pa dang / chos la gnas par gyur na'o/ /ji ltar na chos spyod pa yin/ de la rnam pa ni du yod ce na/ byang chub sems dpa'i chos las ma 'das par spyod de/ de'i phyir chos spyod pa yin no/ /de yang rnam pa lngar rig par bya ste/ sems can gnod pa byed pa dang / sdig pa byed
 pa rnams la dge ba la gzhug pa dang phan gdags par 'dod pa nyid kyi phyir snying brtse ba nyid dang / rigs la gnas pa rkyen med pa rnams la byang chub kyi sems ston pa nyid dang / pha rol tu phyin pa khyad par du 'phags pa rnams la bdag nyid shes pa nyid dang / bla ma lta bu rnams
 la gus pa dang rab tu 'dud pas sbyor bar byed pa nyid dang / mi mthun par gyur pa mu stegs can rnams la bstan pa las rnam par mi g.yo ba nyid do/ /ji ltar na snyoms par spyod pa yin/ de la rnam pa ni du yod ce na/ sems can thams cad kyi don la snyoms par kun tu spyod de
 de'i phyir snyoms par spyod pa yin no/ /de ni rnam pa brgyad du rig par bya ste/ sems can thams cad la mnyam par byams par byed pa nyid dang / sems can thams cad la nyon mongs pa can ma yin pa nyid dang / dus tha dad pa med pa nyid dang / sems kyi rgyud tha dad pa med pa'i byams
 pas mnyam par so sor kun dga' bar byed pa nyid dang / 'du 'dzi'i gtam spangs te dga' ba'i bzhin du byas nas khur blangs pa nyams su lon par byed pa nyid dang / mnyam par khur ma blangs pa len par byed pa nyid dang / mnyam par sdug bsngal thams cad bzod par byed pa nyid
 dang / mnyam par gdul ba dpag tu med pa'i thabs yongs su tshol ba nyid dang / mnyam par phan tshun tshig yang dag par bzod pa'i tshig dang ldan pa nyid dang / mnyam par dge ba'i rtsa ba thams cad byang chub tu yongs su bsngo ba nyid do/ /ji ltar na byang chub
 sems dpa' dge ba spyod pa yin/ de la rnam pa ni du yod ce na/ nang gi sangs rgyas kyi chos yongs su smin pa dang / phyi rol gyi sems can yongs su smin par bya ba la brten nas/ dge ba kun tu spyod par byed de/ de'i phyir dge ba spyod pa yin no/ /de ni rnam pa bdun du rig par
 bya ste/ mi gnas pa'i sbyin pa nyid dang / mi gnas pa'i tshul khrims nyid dang / snying brtse ba'i bzod pa nyid dang / nyi tshe ba ma yin pa'i brtson 'grus nyid dang / sems can gyi don bya ba'i gnas kyi bsam gtan nyid dang / lta ba dang bral ba'i shes rab nyid dang / yongs
 su smin par bya ba'i thabs la mkhas pa nyid do/ /ji ltar na byang chub sems dpa' chos la gnas pa yin/ de la rnam pa ni du yod ce na/ kun chub pa lhur mi len pa dang / kha ton lhur mi len pa dang / 'chad pa lhur mi len pa dang / rnam par rtog pa lhur mi len par nang gi sems
 kyi zhi gnas sgom pa la sbyor ba rtsom zhing / yang dag par sgrub par byed do / /de'i phyir chos la gnas pa yin no/ /de ni rnam pa bcu gnyis su rig par bya ste/ gdams ngag ston pa la tshul khrims la gnas pa dang tshul khrims la gnas pa ma yin par rnam par mi rtog pa nyid dang /
 de la brten nas gus par byas te gdams ngag len par byed pa nyid dang / de la brten nas lus dben pa nyid dang / de la brten nas sems dben pa nyid dang / de la brten nas nyan thos kyi theg pa dang ldan pa'i yid la byed pa las yang dag par 'das te/ theg pa chen po dang ldan pa'i
 yid la byed pa yid la byed pa nyid dang / de la brten nas rab tu dben pa na sems can brtson pa btang ba rnams dang / mi 'grogs par de las gzhan pa rnams dang 'grogs pa nyid dang / de la brten nas rnam par dag pa 'jig rten pa'i shes pa bsod nams kyi tshogs chen po dang
 mthu bsgom pa'i 'bras bu so sor myong ba nyid dang / 'jig rten pa'i shes pas chog par mi 'dzin par 'jig rten las 'das pa'i shes pa yongs su tshol zhing rnam par sbyor ba nyid dang / shes pa rnam par dag pa'i nyes pa bzhi spangs te tshogs yongs su sdud pa nyid de/ gnod
 pa mi bzod pa'i nyes pa dang / ma nges par ston cing 'doms pa'i nyes pa dang / ji skad smras pa de bzhin mi byed pa'i nyes pa dang / zang zing dang bcas pa'i sems kyi nyes pas te/ rnam pa bzhi po de dag dang / snga ma rnam pa brgyad po dag ni rnam pa bcu gnyis yin no/ /byang
 chub sems dpa' la dad pa skyed pa'i dpe dag gang zhe na/ byang chub sems dpa' sems dang po bskyed pa nas bzung ste/ thog ma dang / bar dang / tha ma dag tu sems can thams cad kyi dge ba'i rtsa ba mngon par bsgrub pa'i gnas su gyur pa nyid yin pas gnod pa byed pa dang /
 lan byed pa thams cad kyi sems yongs su ma gtugs pa'i phyir sa lta bu yin no/ /de lta mod kyi ji ltar tha mal par gnas pa'i sa la brten nas sems can rnams rang gi skyes bu'i byed pas de la nye bar 'tshe bar byed pa ltar byang chub sems dpa' ni de lta ma yin te/ dge ba'i rtsa ba bskyed
 pa'i phyir rab tu dang ba dang / mchog tu dga' bas mngon par rlan par byed pas chu lta bu yang yin no/ /de lta mod kyi ji ltar chu'i lo tog yongs su smyin par byed pa dang mi mthun pa ltar de ni de lta ma yin te/ dge ba'i rtsa ba yongs su smin par bya ba'i phyir kun tu skyo bar 'gyur
 ba'i chos rnams la/ kun tu skyo zhing kun tu gdung bar byed pa'i phyir me lta bu yang yin no/ /de lta mod kyi ji ltar me sangs rgyas kyi zhing rnam par bsgrubs pa dang mi mthun pa ltar de ni de lta ma yin te/ dge ba'i rtsa ba yongs su smin pa rnams kyi rnam par grol ba la reg par bya ba
 nyid mngon par sgrub pa rnam par sgrub pa'i phyir yang dag pa'i gdams ngag nye bar sgrub pas rlung lta bu yang yin no/ /de lta mod kyi ji ltar rlung mngon par bsgrubs nas nye bar sbyor bar 'gyur ba ltar de ni de lta ma yin te/ rang gi dkar po'i chos mngon par 'phel ba'i phyir zla ba lta bu
 yang yin no/ /de lta mod kyi ji ltar zla ba yar gyi ngo kho na la snang bar byed kyi/ mar gyi ngo la ma yin pa ltar de ni de lta ma yin te/ byang chub sems dpa' ni spyi'i mtshan nyid kyis nag po dang dkar po'i phyogs kyi chos thams cad la shes pa snang ba'i phyir nyi ma lta
 bu yang yin no/ /de lta mod kyi ji ltar nyi ma gza' sgra gcan gyis 'jigs pas yongs su rgyu ba ltar de ni de lta ma yin te/ byang chub sems dpa' ni 'gro ba rnams su nyon mongs pa'i gza' thams cad kyis mi 'jigs par 'jug pa'i phyir seng ge lta bu yang yin no/ /de lta mod kyi
 ji ltar seng ge khal chen pos sgyid lug par 'gyur ba ltar de ni de lta ma yin te/ sdug bsngal gyi khur thams cad khyer ba'i phyir glang po che dul ba lta bu yang yin no/ /de lta mod kyi ji ltar glang po che rnyed pa dang / ma rnyed pa dang / tshig 'jam pa dang / mi 'jam pa dang / bde ba dang /
 sdug bsngal gyi spyod pa dag gis rjes su chags pa dang / khong khro ba dag gis gos par 'gyur ba ltar de ni de lta ma yin te/ byang chub sems dpa' ni 'jig rten gyi chos thams cad la rjes su chags pa dang / khong khro ba dag gis mi gos pa'i phyir pad+ma lta bu yang yin no/ /de
 lta mod kyi ji ltar pad+ma sdong bu las bcad na mi skye ba'i chos can yin pa ltar de ni de lta ma yin te/ byang chub sems dpa' ni nyon mongs pa bcom yang dge ba'i rtsa ba'i stobs skyed pas yang 'khor bar skye ba'i phyir rtsa ba ma nyams pa'i shing ljon pa lta bu yang yin no/ /de lta mod kyi
 ji ltar shing ljon pa tha mar rtsa ba rab tu 'jig par 'gyur ba ltar de ni de lta ma yin te/ byang chub sems dpa' ni mya ngan las 'das pa dang / byang chub chen por dge ba'i rtsa ba yongs su bsngo ba'i phyir chu'i rgyun rgya mtshor bab pa lta bu yang yin no/ /de lta mod kyi ji ltar chu'i rgyun rgya
 mtshor bab na rgya mtsho nyid du 'gyur ba ltar de ni de lta ma yin te/ byang chub sems dpa' ni mya ngan las 'das pa dang byang chub chen po la brten pa'i dge ba'i rtsa ba dag gis rnam par rtse ba'i phyir ri rab la gnas pa'i lha lta bu yang yin no/ /de lta mod kyi ji ltar ri rab la gnas pa'i lha
 rnams rang gi bya ba la bag med par dga' ba mang ba ltar de ni de lta ma yin te/ thabs dang shes rab kyis yongs su zin pa dang sangs rgyas kyi mdzad pa sgrub par byed pa'i phyir blon pos yongs su zin pa'i rgyal po lta bu yang yin no/ /de lta mod kyi ji ltar blon pos yongs su zin
 pa'i rgyal po bdag nyid kyi don kho na'i phyir skye dgu skyong bar byed pa ltar de ni de lta ma yin te/ bdag nyid kyi don la mi lta bar skye dgu skyong bar byed pa'i phyir sprin chen po lta bu yang yin no/ /de lta mod kyi sprin chen po lo tog bsgrub pa la gtan du ba ma yin pa ltar de ni de lta ma yin te/ byang
 chub sems dpa' ni gtan du byang chub kyi phyogs dang mthun pa'i chos skyed pa'i phyir 'khor los sgyur ba 'byung ba lta bu yang yin no/ /de lta mod kyi ji ltar 'khor los sgyur ba skyes bu chen po dag dang zla med pa ltar de ni de lta ma yin te/ byang chub sems dpa' ni rnam par grol ba thun
 mong du gyur pa'i dge ba'i rtsa ba bskyed pa'i phyir nor bu rin po che lta bu yang yin no/ /de lta mod kyi ji ltar nor bu rin po che kAR+Sha pa Na dang shin tu mi mnyam pa ltar de ni de lta ma yin te/ byang chub sems dpa' ni zag pa med pa'i dbyings su zhugs pas bya ba mnyam zhing bde ba'i longs spyod
 mnyam pa'i phyir 'dres pa'i tshal du zhugs pa lta bu yang yin no/ /de lta mod kyi ji ltar 'dres pa'i tshal du zhugs pa'i lha rnams nyon mongs pa rnam par spel nas phyi ma la log par ltung bar 'gyur ba ltar de ni de lta ma yin te/ byang chub sems dpa' ni nyon mongs pa bcom
 pas log par mi ltung ba'i phyir nyon mongs pa'i dug bcom pa lta bu yang yin no/ /de lta mod kyi ji ltar dgu bcom pa gnod pa mi byed pa 'ba' zhig tu zad kyi/ gang la yang yon tan du ma 'gyur ba ltar de ni de lta ma yin te/ byang chub sems dpa' ni rang gi nyon mongs pas
 sems can thams cad la phan 'dogs pa'i phyir nyon mongs pa grong khyer chen po'i ljan ljin lta bu yang yin no/ /de ltar byang chub sems dpa'i yon tan gyi dpe 'jig rten na grags pa'i dngos po de lta bu dang / de dag pas khyad par du 'phags pa'i yon tan dang ldan pas yon
 tan dpe med pa yin no / /de ltar na byang chub sems dpa' ni yon tan dpe med pa dang ldan pa yin par rig par bya'o/ /yang dag pa'i sgrub pa la rnam par gnas pa'i byang chub sems dpa'i bslab pa gang zhe na/ byang chub sems dpa'i chos la gnas pa nyan thos kyi theg
 pa dang ldan pa'i mdo sde kun rdzob kyi bden pa'i tshul bshad pa/ drang ba'i don bstan par bya ba ma yin pa las shin tu 'das nas/ de la lhag par bya ba byas shing dge ba'i rtsa ba byas pa/ theg pa chen po dang ldan pa'i mdo sde zab mo stong pa nyid dang ldan pa/ kun rdzob dang don dam
 pa'i bden pa'i tshul bshad pa/ nges pa'i don bstan par bya ba la brtson par byed pa na tshul bzhin la brtson pa zhes bya'o/ /tshul bzhin la brtson pa dang dbu ma'i lam du zhugs pa yin te/ 'di ltar chos de ni dbu ma'i lam rnam pa bcu gsum smos par byed pa yin pa'i phyir te/
 gang zag stong pa nyid smos par byed pa dang / gang zag la bdag med pa dang / chos stong pa nyid dang / chos la bdag med pa dang / sgro 'dogs pa'i mtha' dang / skur pa 'debs pa'i mtha' dang / chos mngon par rtogs pa dang / de nyid byang chub chen por yongs su bsngo ba
 nyid dang / da ltar zhugs pa'i sems nyon mongs pa dang sdug bsngal dag gis yongs su ma gtugs pa nyid dang / bdag med pa gnyis la mos pa'i khyad par dang / bdag med pa snga ma shos phyi ma'i rgyu nyid yin pa dang / mthar thug pa'i stong pa nyid dang / de nyid kye mthu
 smos par byed do/ /ji ltar gang zag stong pa nyid smos par byed ce na/ rnam pa gcig gis mi dmigs pa yongs su bstan pa las te/ de la mi dmigs pa ni 'di yin te/ dngos po gsum po sems can gyi dngos po dang / de'i sna tshogs kyi dngos po dang / de'i longs spyod kyi
 dngos po la byis pa rnams kyis kun tu brtags pa'i bdag nang dang phyi rol dang gnyi ga med par yang mi dmigs pa'o/ /ji ltar gang zag la bdag med pa smos par byed ce na/ rnam pa gcig kho nas dmigs pa yongs su bstan pa las te/ de la dmigs pa ni 'di yin te/ dngos
 po gsum po rten cing 'brel par 'byung ba de nyid la rtag pa nyid mi dmigs pas byis pas kun brtags pa'i bdag dang mtshan nyid mi 'dra ba dmigs pa'o/ /ji ltar chos stong pa nyid smos par byed ce na/ rnam pa gcig kho nas mi dmigs pa yongs su bstan pa las te/ de
 la mi dmigs pa ni 'di yin te/ dngos po gsum po mi rtag pas bsdus pa de nyid la byis pas kun brtags pa tha snyad las byung ba'i ngo bo nyid nang dang phyi rol dang gnyi ga ma gtogs par mi dmigs pa'o/ /ji ltar chos bdag med pa smos par byed ce na/ rnam pa gcig kho
 nas dmigs pa yongs su bstan pa las te/ de la dmigs pa ni 'di yin te/ dngos po de nyid la 'phags pa'i ye shes kyi spyod yul de dag nyid kyi so so rang gi rig pa dang mthun pa/ gzhan dag la yang brjod du med pa gang yin pa dmigs pa ste/ de la yang rnam
 pa drug gis byis pas kun brtags pa tha snyad las byung ba'i ngo bo nyid dang mtshan nyid mi 'dra ba dmigs te/ rnam pa drug gang zhe na/ bdag gis brtag par mi nus pa dang / gzhan dag la bstan du med pa dang / dbang po gzugs can gyi spyod yul las yang dag par
 'das pa dang / mtshan ma thams cad las yang dag par 'das pa dang / rnam par shes pa'i spyod yul las yang dag par 'das pa dang / nyon mongs pa'i spyod yul las yang dag par 'das pa'o/ /ji ltar sgro 'dogs pa'i mtha' smos par byed ce na/ rnam pa gnyis
 kyis te / bye brag tu sgro 'dogs pa yongs su bstan pa dang / ngo bo nyid du sgro 'dogs pa yongs su bstan pa las so/ /de la bye brag tu sgro 'dogs pa gang zhe na/ gong nas gong du rnam pa brgyad de/ dngos po de nyid la rtag par 'dzin pas sgro 'dogs pa dang / mi rtag
 par 'dzin pas sgro 'dogs pa dang / rtag par 'dzin pas sgro 'dogs pa la brten nas bdag tu 'dzin pas sgro 'dogs pa dang / mi rtag par 'dzin pas sgro 'dogs pa la brten nas bdag med par 'dzin pas sgro 'dogs pa dang / bdag med par 'dzin pas sgro 'dogs pa
 la brten nas yang dag pa'i sems su 'dzin pas sgro 'dogs pa dang / bdag tu 'dzin pas sgro 'dogs pa la brten nas yang dag pa ma yin pa'i sems su 'dzin pas sgro 'dogs pa dang / de yang sems med pa dang tshol ba pa'o/ /tshol ba pa yang des
 kun brtags pa'i gnas dang / des kun brtags pa dang / mtshungs par ldan pa ste/ mi mthun pa'i phyogs kun nas nyon mongs pa can gyi chos rnams la nyes pa lnga dang mtshungs par ldan te/ phyin ci log gi nyes pa dang / spros pa'i nyes pa dang / nyes par spyod pa'i
 kun nas slong ba'i nyes pa dang / gnas ngan len gyi nyes pa dang / mi rtag pa nyid kyi nyes pa dang ngo / /de'i gnyen po rnam par byang ba dag la yang dag pa'i sems su 'dzin pas sgro 'dogs pa la brten nas/ dge ba la sogs par 'dzin pas sgro 'dogs pa nas rnam par byang ba'i
 bar du 'dzin pas sgro 'dogs pa dang / yang dag pa ma yin pa'i sems su 'dzin pas sgro 'dogs pa la brten nas/ mi dge ba la sogs par 'dzin pas sgro 'dogs pa nas/ kun nas nyon mongs pa'i bar du 'dzin pas sgro 'dogs pa ste/ de dag ni bye brag tu sgro 'dogs pa
 brgyad yin te/ de la byang chub sems dpa' ni sgro 'dogs pa de dag la mngon par zhen par yang mi byed la/ gzhan dag la yang dag par 'dzin du yang mi 'jug bsngags pa rjod par yang mi byed do/ /de la ngo bo nyid du sgro 'dogs pa ni bye brag tu sgro 'dogs pa'i gnas gang yin
 pa ste/ dngos po de nyid la byis pas kun brtags pa tha snyad las byung ba'i ngo bo nyid du sgro 'dogs pa yod do zhes sgro 'dogs pa'o/ /ji ltar skur pa 'debs pa'i mtha' smos par byed ce na/ rnam pa gcig gis yod pa'i dngos po la skur pa 'debs pa yongs su bstan pa
 las te de la yod pa'i dngos po la skur pa 'debs pa ni 'di yin te/ 'di lta ste/ log par chos bdag med pa la mos pa rnam pa thams cad du chos kyi mtshan nyid du thams cad med pa nyid du mngon par zhen pa yin no/ /ji ltar chos mngon par rtogs pa smos par byed ce na/ rnam pa
 gsum gyis te/ dngos po de nyid dang / bzhi pa skye ba'i dngos po mi mthun pa'i phyogs dang gnyen po dang / 'dus byas dang / 'dus ma byas su rnam par gnas pa la ngo bo nyid mi dmigs pa yongs su bstan pa dang bye brag mi dmigs pa yongs su bstan pa dang / de goms par
 byas pas shes pa yang dag pa ji lta ba bzhin rab tu rtogs pa yongs su bstan pas so/ /de la ngo bo nyid mi dmigs pa ni 'di yin te/ byis pas kun brtags pa'i ngo bo nyid kyis mi dmigs pa gang yin pa'o/ /de la bye brag mi dmigs pa ni 'di yin te/ ngo bo nyid de nyid la skye ba
 dang 'gag pa yang dag par 'grub pa gnyis su med pas mi dmigs pa gang yin pa'o/ /de la shes pa yang dag pa ji lta ba bzhin rab tu rtogs pa ni 'di yin te/ de'i ngo bo nyid dang de'i mtshan ma yid la mi byed cing yang dag par mi snang ba'i sbyor bas so so rang rig pa dang mthun pa'i
 shes pa rab tu rtogs pa gang yin pa'o/ /ji ltar chos mngon par rtogs pa byang chub chen por yongs su bsngo ba smos par byed ce na/ rnam pa gcig gis so sor brtags te/ gnyen po thob pas mi mthun pa'i phyogs mi spong ba las te/ de la gnyen po dang mi mthun pa ni 'di yin
 te/ stong pa nyid ni nyon mongs pa'i gnyen po'o/ /smon pa med pa ni srid par smon pa'i'o / /mtshan ma med pa ni mtshan ma rnams kyi ste/ de dag thams cad kyang mngon par 'du byed pa med pa zhes bya'o/ /de yang yang srid pa 'byung bar byed pa'i las gnyen po dang / skye ba'i rgyun
 dang / skad cig skye ba'i rgyun gyi gnyen po yin no/ /'gog pa mya ngan las 'das pa ni 'du byed thams cad kyi ngo bo nyid med pa nyid ces bya ste / de'i mi mthun pa'i phyogs ni 'khor ba'i rgyun yin no/ /byang chub sems dpa'i gnyen po des so sor brtags te mi mthun pa'i
 phyogs mi spongs pa gang yin pa de ni sems can la snying brtse ba las brten te byang chub chen po 'dod pa yin no/ /ji ltar de ltar zhugs pa'i sems nyon mongs pa dang sdug bsngal dag gis yongs su ma gtugs pa nyid smos par byed ce na/ rnam pa gcig gis mi mthun pa'i phyogs
 ma spangs pa'i chos rnams yang dag pa ji lta ba bzhin rab tu rtogs pa las te/ de la yang dag pa ji lta ba bzhin du rab tu rtogs pa ni 'di yin te/ chos la bdag med pa'i sbyor bas chos de dag nyid la rang bzhin gyis kun nas nyon mongs pa med pa dang / sdug
 bsngal med par yang dag par rjes su mthong ba'o/ /ji ltar bye brag smos par byed ce na/ rnam pa bzhi ste/ lta ba'i bye brag yongs su bstan pa dang / de nyid khyad ches dman pa'i bye brag yongs su bstan pa dang / spong ba la rnam par 'khrul pa'i bye brag yongs su bstan pa
 dang / sems rnam pa 'khrul pa'i bye brag yongs su bstan pa las so/ /de lta ba'i bye brag ni 'di yin te/ gang zag la bdag med pa la gnas pa ni mya ngan las 'das pa la phyi mar bdag nyid chad par mngon pa'i nga rgyal can du 'gyur ba dang / gzung ba yongs su
 brtags pa'i phyir dang / 'dzin pa gtan du tha snyad las byung ba'i ngo bo nyid dang bral ba stong pa nyid kyis bsdus pa yongs su ma brtags pa'i phyir shes bya shin tu ma rtogs pas chos kyi bdag nyid la mngon par zhen pa des nyon mongs pa spong ba la sogs pa spong ba yongs su tshol bar
 byed kyi/ byang chub sems dpa' ni de lta ma yin no/ /de la de nyid khyad ches dman pa'i bye brag ni 'di yin te/ gang zag la bdag med pa la gnas pa ni rgyu gnyis po sdug bsngal bar gnas pa dang / rim gyis 'dzin pa gnyis kyis nyams pas sdug bsngal las rnam par ma
 thar pa'i phyir so so'i skye bo bdag tu lta ba dang ldan pa bas kyang ches dman pa bas dman pa yin gyi/ byang chub sems dpa' ni de lta ma yin pa'o/ /de la spong ba la rnam par 'khrul pa'i bye brag ni 'di yin te/ gang zag la bdag med pa la gnas pa ni chos bdag med pa la med pa
 nyid du mngon par zhen pas skrag cing / tha snyad las byung ba'i ngo bo nyid yod pa la chad pa yongs su mi tshol gyi/ byang chub sems dpa' ni de lta ma yin pa'o/ /de la sems rnam par 'khrul pa'i bye brag ni 'di yin te/ gang zag la bdag med pa la gnas pa de ltar spong ba la rnam par
 'khrul pa ni rang gi kun tu rtog pa las byung ba'i yul rnams la 'du shes phyin ci log la sogs pas phyin ci log tu 'gyur gyi/ byang chub sems dpa' ni de lta ma yin pa'o/ /ji ltar rgyu nyid smos par byed ce na/ rnam pa gnyis kyis te/ 'dzin pa la so sor rtog pa yongs su bstan pa
 dang / de yang dag pa ji lta ba bzhin rab tu rtogs pa yongs su bstan pa las te/ de la 'dzin pa la so sor rtog pa ni 'di yin te/ bdag med pa'i shes pa de nyid la tha snyad las byung ba'i ngo bo nyid dang bral ba nyid dang des kun brtags pa dang bral ba nyid dang / mtshan nyid med pa
 nyid dang / skad cig ma nyid kyis btang bar bya ba yin par so sor rtog pa gang yin pa'o/ /de la de yang dag pa ji lta ba bzhin rab tu rtogs pa ni 'di yin te/ gzung ba dang 'dzin pa la yongs su rtog par byed pa'i tshul bzhin yid la byed pa dag yid la byas pa'i rgyus so so
 rang rig pa dang mthun pa'i shes pa nges pa skyes pa gang yin pa'o/ /ji ltar mthar thug pa'i stong pa nyid smos par byed ce na/ rnam pa gcig gis chos bdag med pa'i shes pa de yang dag pa ji lta ba bzhin mthong ba las te/ de la yang dag pa ji lta ba bzhin mthong ba ni 'di
 yin te/ las dang nyon mongs pa mtshan nyid 'dra bar mthong ba'i phyir brjod du med pa'i chos nyid gang yin pa dang / tha snyad las byung ba'i ngo bo nyid dang bral ba'i phyir dang / de ltar mngon par zhen par byar med pa'i phyir dang / skad cig pa nyid yin pa'i phyir ro/ /ji ltar stong
 pa nyid de nyid kyi mthu smos par byed ce na/ rnam pa gcig gis las dang nyon mongs pa spong ba'i gnyen po yongs su bstan pa las te/ de la spong ba ni 'di yin te/ shes pa'i snang ba de skad cig de nyid la skyes pas thog ma med pa'i dus nas byung ba'i las dang nyon mongs pa
 thams cad spong bar byed pa'o/ /nyan thos ni du/ nyan thos kyi bslab pa dang byang chub sems dpa'i bslab pa la bye brag ni ci yod ce na/ nyan thos ni rnam pa bzhi'o/ /nyan thos kyi bslab pa dang byang chub sems dpa'i bslab pa'i bye brag ni rnam pa bcu gsum gyis rig par
 bya'o/ /sprul pa'i nyan thos dang / mngon pa'i nga rgyal can gyi nyan thos pa dang / byang chub tu yongs su gyur pa'i nyan thos dang / zhi ba'i bgrod pa gcig pa'i nyan thos so/ /de la sprul pa'i nyan thos ni byang chub sems dpas sems can rnams gdul ba'i phyir
 sprul pa gang yin pa'o/ /de la mngon pa'i nga rgyal can gyi nyan thos ni gang zag la bdag med pa'i shes pa tsam dang / chos la bdag med pa la log par mngon par zhen pa'i shes pas yang dag par rtog pa gang yin pa'o/ /de la byang chub tu yongs su 'gyur ba'i nyan thos
 ni dang po nyid nas snying rje shin tu chung ba'i rigs can du gyur pa las/ de bzhin gshegs pa dang nye bar gnas pas sangs rgyas kyi chos rgya chen po dag la yon tan du shes pa yongs su bsgoms pa'i rgyud can du gyur pas/ de mthar thug par gyur cing zag pa med pa'i
 dbyings la gnas kyang sangs rgyas rnams kyis yang dag par skul bar mdzad 'jug par mdzad cing thabs nye bar ston par yang mdzad de/ de rgyu des na byang chub chen po mngon par sgrub par byed pa gang yin pa'o/ /de de ltar byang chub chen po mngon par sgrub par byed mod kyi/ zhi ba
 la mngon par dga' ba nyid kyi phyir de sbyor ba de la rtogs pa shin tu dul bar 'gyur te/ sangs rgyas kyi rigs can dang po sems bskyed pa yang de lta bur ni mi 'gyur ro/ /de la zhi ba'i bgrod pa gcig pa'i nyan thos ni dang po nyid nas snying rje shin tu chung ba'i rigs can yin
 pa'i phyir dang / gcig tu sems can gyi don la mi phyogs pa'i phyir dang / sdug bsngal gyis 'jigs pa'i phyir mya ngan las 'das pa la gnas pa'i bsam pa can kho nar 'gyur zhing / byang chub chen po mngon par bsgrub pa'i skal pa med pa gang yin pa'o/ /'di lta
 ste dper na rgyal po'i bu gnas mtshungs par skyes shing / rgyal po'i bde ba'i longs spyod kyis mtshungs mnyam par gyur pa gnyis shig yod pa las/ de la gcig ni rgyal po'i bya ba dang / bstan bcos dang / bzo'i gnas la mkhas pa yin la/ cig shos ni de lta ma
 yin na/ de gnyis ni yan lag des bye brag tu gyur par zad kyi/ rgyal po'i bde ba'i longs spyod kyis bye brag tu gyur pa ni ma yin pa de bzhin du zag pa med pa'i dbyings na byang chub sems dpa' dang zhi ba'i bgrod pa gcig pa'i nyan thos kyi brag bya kyang rig par bya ste/ de gnyis
 kyi bye brag ni bsam pa dang / dkar po'i chos yang dag par 'grub pa dang / shes pa yang dag par sgrub pa dang / rjes su 'gro ba dang / rigs dang / gdung yang dag par 'dzin pa dang / sbyor ba dang / mthu dang / sgrub pa dang / sbyin gnas kyi 'os nyid dang / khyad par
 can las khyad par du 'phags pa dang / rgyu dang 'bras bu dang / 'byung ba'i rten las kyang rig par bya'o/ /nyan thos ni 'du byed dang nyon mongs pa dang / sems can gyi don la mi phyogs pa'i phyir gcig tu zhi bar gnas pa'i bsams pa can yin gyi/ byang chub sems dpa' ni zhi
 ba thob kyang de las bzlog pa yin no/ /nyan thos ni bdag nyid kyi bde ba yang dag par 'phel bar byed pa dkar po'i chos chung ngu dag dang ldan pa yin gyi/ byang chub sems dpa' ni sems can thams cad kyi bde ba yang dag par 'phel bar byed pa dkar po'i chos tshad med pa dang ldan
 pa yin no/ /nyan thos ni 'dus ma byas kyi shes pas bdag nyid nyon mongs pa rnams kyis gsog dang gsob tu byed par zad kyi/ byang chub sems dpa' ni phyogs bzhi'i sems can thams cad do/ /nyan thos ni rnam par grol ba'i chos mchog la dmigs pa'i yid la byed pa
 las yang dag par grub kyang sangs rgyas kyi sras su mi 'gyur gyi/ byang chub sems dpa' ni 'du byed dang / sems can dang / chos ngan pa la dmigs pa'i yid la byed pa las yang dag par grub kyang sangs rgyas kyi sras su gyur pa yin no/ /nyan thos ni brtson 'grus
 brtsams shing bden pa la mkhas pa dang / /sems legs par mnyam par gzhag kyang sangs rgyas kyi rigs kyi mtshan nyid dang mi ldan pa'i phyir bang chub sems dpa' ltar sangs rgyas rnams kyis yongs su mi gzung gi /byang chub sems dpa' ni de las bzlog pa yin no/ /
 nyan thos ni mthar thug par gyur pa yin pa'i phyir dbang po yongs su smin pa yin yang phyis sangs rgyas kyi mdzad pa byed mi nus pa yin gyi/ byang chub sems dpa' ni skad cig de la dang po sems bskyed pas kyang nus so/ /nyan thos ni mthar thug par gyur kyang ji
 ltar byang chub sems dpa' las dang po pa'i sbyor ba la zhugs pa de ltar lha dang mi rnams kyis mchod par bya ba dang bstod par bya ba'i 'os ma yin gyi/ byang chub sems dpa' ni yin no/ /byang chub sems dpa' ni mthar thug par gyur pa ma yin yang mthu dang shes pa dag gis nyan thos
 dang rang sangs rgyas thams cad zil gyis gnon pa yin no/ /nyan thos ni nyon mongs pa'i nad zhi bar byed pa ye shes kyi sman yongs su grub pa yin yang sems can rnams kyi nyon mongs pa'i nad zhi bar byed pa ma yin gyi/ byang chub sems dpa' ni gzhan gyi don la zhugs pa'i phyir de
 las bzlog pa yin no/ /nyan thos ni mthar thug par gyur pa yin yang ji ltar byang chub sems dpa'i nyon mongs pa zad pa sems can rnams la ye shes kyi snang ba byed pa'i phyir lha dang bcas pa'i 'jig rten gyi sbyin gnas kyi 'os nyid du gyur pa de lta bu ma yin gyi/ byang chub sems
 dpa' ni yin no/ /de bzhin gshegs pa rnams ni dus rtag tu nyan thos pas ches khyad par du 'phags pa yin la/ de dag pas kyang byang chub sems dpa' rnams ches shin tu khyad par du 'phags pa yin te/ de dag las de dag yang dag par 'grub pa'i phyir ro/ /de dag
 ni rgyu gnyis na ches shin tu khyad par du 'phags pa'i yin par rig par bya ste/ 'di ltar de dag gis sems can yongs su smin par byas pa dang / sangs rgyas kyi chos yongs su smin par byas pa'i phyir te/ de las byang chub kyi 'bras bu brnyes pa dang / ji ltar na yongs su smin
 par byas pa'i sems can rnams rnam par grol bar mdzad de/ 'di lta ste dper na sgrub pa po dang g.yos mkhan la ngo mtshar gyi blo 'byung ba ltar/ za ba po la de lta ma yin pa de bzhin du 'di la yang rig par bya'o/ /nyan thos ni gcig tu rnam par dag pa'i chos kyi rgyu yang dag
 par blangs te gnas shing dge ba'i bshes gnyen du mas yongs su gzung yang / byang chub chen po'i 'bras bu mngon par 'grub par mi 'gyur gyi/ byang chub sems dpa' ni de las bzlog pas kyang 'grub par byed do/ /byang chub sems dpa' la brten nas ni nyan thos rnams 'byung
 bar 'gyur gyi/ nyan thos la brten nas ni byang chub sems dpa' rnams mi 'byung ngo / /'jig rten pa dang 'jig rten las 'das pa'i shes pa dag gis gzhan gyi don bya ba gang zhe na/ 'di la byang chub sems dpa' phyogs thams cad du khams 'pho ba yang rung / yul gzhan
 du 'pho yang rung / skye ba gzhan du 'pho yang rung / gzhan gyis gsol ba btab kyang rung ste/ nyon mongs pa'i 'byung po'i gdon gyis brlams pa'i sems can rnams la/bslab pa gsum gyi lam rnam par dag pa nye bar ston pas gso bar byed pa na sman pa bla na med pa yin no/ /
 'jig rten pa'i shes pa gang zhe na/ kun nas nyon mongs pa rags pa sel ba'i gnyen po dang / 'bring rnam par gnon pa'i gnyen po gang yin pa'o/ /kun nas nyon mongs pa rags pa gang zhe na/ khyim pa rnams kyi 'dod chags dang / zhe sdang dang / gti mug spyad pa nyid dang
 rab tu byung ba rnams kyi lta ba la brten pa nyid dang / / de'i gnas tshul bzhin ma yin pa yin la byed pa la brten pa nyid dang / yang srid par smon pa la brten pa nyid dang / phyin ci log bzhi po bsdus pa dang / re re dag gis thar pa ma yin pa la thar par mngon par zhen pa la
 brten pa nyid gang yin pa'o/ /kun nas nyon mongs pa 'bring gang zhe na/ rang rang gi gnyen po la brten pas kun nas nyon mongs pa rags pa bstsal ba'i yul la 'dod chags dang / zhe sdang dang / gti mug gis kun nas dkris pa'i gnas nyid gang yin pa'o/
 dmigs pa la yang dag par gtang pas mnyam par ma bzhag pa'i sems mnyam par gzhag pa'i phyir byang chub kyi phyogs dang mthun pa'i chos rnams kyis brtson par byed pa na/ de rnam par gnon par byed cing / bsgom pa des bdag nyid rab tu 'dzin par yang mi byed
 par dmigs pa la sems nye bar gtad de gnas par bya ba'i phyir 'bad par byed do/ /de'i 'og tu gnas pa rab tu 'dzin par byed de/ de rab tu bzung bas lus la ril por 'dzin pa gang gis kun nas dkris pa 'bring 'byung bar 'gyur ba de rnam par gnon
 par 'gyur ro/ /de'i 'og tu 'jig rten las 'das pa'i chos kyi mi mthun pa'i phyogs spangs te/ gnyen po la gnas par 'gyur zhing de nyid brtan par byed do/ /de'i 'og tu rten cing 'brel bar 'byung ba la kun tu rmongs pa dang / gang zag la bdag med pa la kun tu rmongs pa dang /
 chos la bdag med pa la kun tu rmongs pa rnam par gnon par byed do/ /de'i 'og tu lam ngan pa dang lam la nges par 'gyur te/ de ltar rnam pa de dag gis kun nas nyon mongs pa rags pa dang 'bring sel ba dang rnam par gnon pa'i gnyen por gyur pa'i shes pa gang yin pa de ni
 'jig rten pa'i shes pa zhes bya'o/ /'jig rten las 'das pa'i shes pa gang zhe na/ de ltar 'dod chags dang / zhe sdang dang / gti mug gis kun nas dkris pa'i kun nas nyon mongs pa rnam par mnan pa'i kun nas nyon mongs pa'i bag la nyal phra mo'i gnyen por gyur
 pa'i shes pa gang yin pa'o/ /de yang gang zhe na/ rnam par gnon pa'i gnyen po de la gnas gsum la mkhas pa/ rten cing 'brel par 'byung ba la mkhas pa dang / gang zag la bdag med par mos pa dang / chos la bdag med par mos pa'i kun nas nyon mongs pa ma lus pa
 las yang dag par 'da' bar bya ba'i phyir mi shes pa rnam pa bzhi'o / /spyi'i mtshan nyid mi shes pa dang / rang gi mtshan nyid mi shes pa dang / kun nas nyon mongs pa'i mtshan nyid mi shes pa dang / rnam par byang ba'i mtshan nyid mi shes pa'i gnyen pos lung nod pa la mi ltos par so so'i bdag nyid kyi sems
 la so sor rtog cing 'bad pa gang yin pa'o/ /de la sems kyi spyi'i mtshan nyid ni rnam pa gsum gyis rig par bya ste/ rten cing 'brel par 'byung ba lkog na g.yo ba med pa nyid dang / de ltar gyi skad cig pa g.yo ba med pa nyid dang / 'dod chags la sogs pa rkyen las byung ba'i sems
 kyis ma byas pa nyid kyis so/ /sems kyi rang gi mtshan nyid kyang rnam pa gsum gyis rig par bya ste/ snga ma bzhin du tha snyad las byung ba'i ngo bo nyid kyis mi dmigs pa dang / snga ma bzhin du rnam pa drug gis de bzhin nyid mi dmigs pa dang / 'phags pa thams cad kyi bye brag
 med pa'i shes pa mi dmigs pas so/ /sems kyi kun nas nyon mongs pa'i mtshan nyid kyang rnam pa gsum gyis rig par bya ste/ 'grub pa dang / 'jug pa dang / rgyu bas te/ 'gro ba rnams su lus sna tshogs 'grub pa las ni kun nas nyon mongs pa 'grub pa yin no/ /
 de ltar 'grub pa rang gi skad cig gi rgyun gyis 'jug pa dang / dmigs pa thams cad la gzung dka' bar 'jug pa dang / sred pa'i bag chags pas dbang bsgyur bas 'jug pa las ni kun nas nyon mongs pa 'jug pa yin no/ /gang du rgyu ba dang ji ltar rgyu ba las ni kun nas
 nyon mongs pa rgyu ba yin te/ res 'ga' ni mi dge ba la/ res 'ga' ni dge ba la/ res 'ga' ni yul la/ res 'ga' ni las mngon par 'du bya ba la'o/ /res 'ga' ni nyon mongs pa rnams la ste / nyon mongs pa rnams la rgyu ba na yang 'dod chags dang zhe sdang la sogs
 pa nges par mi gnas pa de nyid 'dod chags dang bcas par gyur nas/ 'dod chags dang bral bar 'gyur ba dang / 'dod chags dang bral bar gyur nas/ 'dod chags dang bcas par 'gyur ba dang / de lta bu la sogs pa ma yin pa la rgyu ba dang / bde ba la sogs pa'i gnas
 lta bu'i chos rnams la dbang phyug thob cing rgyu ba dang / bdag nyid kyi bde ba spangs te sdug bsngal kun tu skyed par byed pa dang / de yang mngon par zhen pa las ma yin gyi/ phyin ci log las yin pa dang de dag gis bdag nyid la sdug bsngal nye bar bsgrub pa dag gis rnam par mi ngoms par byed
 pa dang / dge ba rnams la nges par sbyar ba na de spang ba'i phyir skabs yongs su tshol bar byed pa dang / mi dge ba yang dag par blang ba'i phyir skyon yongs su tshol bar byed pa dang / 'byor ba dang / rgud pa dag la rjes su chags pa dang khong khro ba dag gis bcom par 'gyur ba
 dang / bag med pa'i dbang du song zhing dge ba'i rtsa ba byas pa dang ma byas pa thams cad zad par byed pa dang / gzugs la sogs pa yul la mngon par dga' ba'i phyir/ gtan du phan pa 'chi ba med pa'i dbyings la so sor brtags shing so sor nyes par rnam par
 'jog par byed pa ste/ de ltar don de kun tu ston par byed pa nyon mongs pa can gyis bsdus pa'i dpe'i dngos po dag kyang rig par bya'o/ /sems kyi rnam par byang ba'i mtshan nyid kyang rnam par gsum gyis rig par bya ste/ mi rtogs pa dang rtogs pa'i mtshan nyid dang / 'dus ma
 byas kyi mtshan nyid dang / rigs kyi mtshan nyid kyis te/ de las gzhan du tshul bzhin ma yin par brtson pas ni sems rnam par dag pa sgrub par byed kyang mi rtogs kyi/ de ltar tshul bzhin du brtson par byed pas ni rtogs par 'gyur te/ de yang tha snyad las byung
 ba'i ngo bo nyid du ni mi mthong la/ de bzhin nyid kyi mtshan nyid du mthong ba na mthong ngo / /'dus ma byas kyi mtshan nyid de ni rnam pa dgus pa blta bar bya ste/ dus rnams su rgyu ba med pa dang / ji ltar 'gog pa'i snyoms par 'jug pa la tha snyad las byung ba'i ngo bo nyid
 kyis dmigs su med la de bzhin nyid kyi mtshan nyid kyis dmigs su yod pa lta bu ma yin pa'i phyir/ gnyis su med pa'i mtshan nyid dang / skye ba med pa'i mtshan nyid dang / skye ba'i rgyu'i ngo bo nyid las yang dag par 'das pa'i mtshan nyid dang / phyi mar skye ba las yang
 dag par 'das pa dang / 'chi 'pho ba las yang dag par 'das pa dang / skad cig gcig nas gcig tu 'bral ba las yang dag par 'das pa dang / 'gro ba 'gyur ba las yang dag par 'das pa dang / las kyis kun nas nyon mongs pa'i 'du byed las yang dag par 'das pa nyid kyis so/ /de
 la rigs kyi mtshan nyid ni mi slob pa'i khams kyi mtshan nyid yin par blta bar bya ste/ tshe 'di la dngos po lnga las yang dag par 'das pa yang yin te/ bya ba las yang dag par 'das pa dang / bya ba med pa las yang dag par 'das pa dang / bya ba'i sbyor ba las yang dag par 'das pa dang / bya ba'i sbyor ba med pa las
 yang dag par 'das pa dang / bya ba med pa'i sbyor ba las yang dag par 'das pa'o/ /tshe phyi ma la dngos po drug las yang dag par 'das pa yang yin te/ tshe phyi ma la yang srid pa 'byung ba'i 'du byed kun nas slong bar byed pa las yang dag par 'das pa dang / de 'du byed pa las yang dag
 par 'das pa dang / de'i 'bras bu 'grub pa las yang dag par 'das pa dang / de la brten pa'i 'byor ba dang rgud pa las yang dag par 'das pa dang / de'i gnas lung du ma bstan pa yongs su g.yo ba thams cad la slob pa dang smos pa dang rjes su sbyor ba las yang dag par
 'das pa dang / de'i gnas lus sna tshogs las yang dag par 'das pa'o/ /rigs kyi mtshan nyid de yang gnas skabs bzhir rnam pa dgur rig par bya ste/ rnam par ma dag pa'i gnas skabs dang / rnam par dag pa'i gnas skabs dang / so sor rtogs pa'i
 gnas skabs dang / yongs su gtugs pa'i gnas skabs so/ /rnam par ma dag pa'i gnas skabs ni mtshan ma thams cad la yang dag par rjes su song ba'i phyir nam mkha' lta bu yin no/ /rnam par dag pa'i gnas skabs ni ro gcig pa dang / lus dang sems
 dben pa yin no/ /so sor rtogs pa'i gnas skabs ni mthar thug par 'gro ba'i rjes su mthun pa dang / nyon mongs pa'i rang bzhin thams cad dang bral zhing dri ma med pa dang / 'jig tshogs la lta ba las yang dag par 'das pa dang / de'i rtsa ba las byung ba mi mthun par
 lta ba'i rnam pa las yang dag par 'das pa yin no/ /yongs su gtugs pa'i gnas skabs ni yongs su grub pa'i bde ba dang / 'gyur ba rnam pa gsum las yang dag par 'das pa yin te/ de la 'gyur ba rnam pa gsum ni 'di dag yin te/ rga shi la sogs pa'i
 'gyur ba dang / phyin ci log gi gnas kyi 'gyur ba dang / rnam par dag pa las yongs su nyams pa'i 'gyur ba'o/ / / /bam po bzhi bcu gsum pa ste tha ma'o / /byang chub sems dpa' gdams ngag la nyan thos kyi bslab pa gang zhe na/ 'di lta ste brnab
 sems dang / yid kyi mi bde ba 'dul bas lhag pa'i tshul khrims kyi bslab pa la sbyor ba dang / kun tu skyo ba yid la byed pas lhag pa'i sems kyi bslab pa la sbyor ba dang / gang zag la bdag med pa dang / chos la bdag med pas lhag pa'i shes rab kyi
 bslab pa la sbyor ba'o/ /de la ltung ba kun nas slong bar byed pa brnab sems dang yid mi bde ba ni ji ltar sel bar mi byed pa dang / ji ltar ma bstsal ba dang / ji ltar sel bar byed pa dang / ji ltar bstsal ba'i rnam pa de bzhis rig par bya ste/ rang gi sems kyi tshul
 bzhin ma yin pa yid la byed pas kun nas bslongs pa'i brnab sems dang / 'jig tshogs la lta ba dang / gnod sems la gal te yul las sam/ gzhan las byung bar sems na/ de ni sel bar mi byed pa yin no/ /gal te yul gyis sam/ gzhan la gnod
 pa byed pa'i sbyor bas 'phrogs par 'gyur na de ni ma bsal ba yin no/ /gcig la bsal na gcig kyang ma bsal bar blta bar bya la/ gcig bsal na gcig kyang bsal bar blta bar bya ste/ ma bsal bas ni sdom pa la gnas pa yang lhag pa'i tshul khrims las
 nyams par 'gyur na/ sdom pa la gnas pa ma yin pa lta smos kyang ci dgos/ lhag pa'i sems kyi bslab pa'i gags ni dmigs pa las rnam par g.yeng ba'i 'khrul pa yin no/ /gang zag la bdag med pa las brtsams nas lhag pa'i shes rab la brtson pa'i gags ni
 'jig tshogs la lta ba yin no/ /chos la bdag med pa las brtsams nas lhag pa'i shes rab la brtson pa'i gags ni ngo bo nyid dang bye brag tu rtogs pa dang rnam par rtog pa'i 'ching ba yin no/ /bslab pa gsum po de dag rnam par bsgom pa la bslab pa dang mi mthun pa'i chos
 brgyad dang bslab pa dang rjes su mthun pa'i chos brgyad yod de/ don med pa la yongs su zhen pa dang / yongs su zhen pa las 'ching ba dang / 'ching ba las bar chad dang / bar chad las dri ma dang / dri ma las thog thog dang / thog thog las rma dang / rma las longs su gdung ba
 dang / yongs su gdung ba las nyon mongs pa'i nad gso dka' ba 'byung ba'o / /bslab pa dang rjes su mthun pa'i chos brgyad ni de dag las bzlog pa kho na las rig par bya'o/ /legs par ma bslabs pa'i dge sbyong gang zhe na/ de dag ni rnam pa gsum du rig par bya ste/ dge sbyong gi
 tshul la mi lta zhing cha lugs dang rtags mthun pa/ cho ga dang / 'tsho ba dang / longs spyod dang / brtson pa dang / tshul khrims dang / lta ba dang / bsam pa mi mthun pa dang / yo byad la yongs su gzhol ba dang / lhag pa'i tshul khrims dang rtags mthun pa / lhag pa'i
 sems dang rtags mthun pa / lhag pa'i shes rab dang rtags mthun pa la/ de dag bsgrub pa'i bsam pa dang mi mthun pa dang / sgra la yongs su gzhol ba/ zhi gnas kyi yan lag dang mthun/ lhag mthong gi yan lag dang mthun/ de gnyi ga bsgom pa'i yan lag dang mthun/
 de gnyi ga'i tshogs kyi yan lag dang mthun/ de la de dag gi bsam pa dang mi mthun pa'o/ /legs par bslabs pa'i dge sbyong gang zhe na/ de ni rnam pa bzhir rig par bya ste/ sbyor ba dang / bsam pa dang / rtogs pa dang / mthar thug par 'gro bas so/ /tshe 'di la kun tu
 skyo ba'i sbyor ba dang / tshe rabs snga ma la rgyud yongs su smin pa'i sbyor bas ni sbyor ba phun sum tshogs pa yin par rig par bya'o/ /chos bdag med pa la mos pa'i bsam pa dang ldan pa'i phyir gang thob par bya ba dang / gang gis thob par bya ba de gnyis la tha snyad las byung ba'i ngo bo
 nyid du mngon par zhen pa med pa dang / dgongs pa can gyi don yongs su tshol ba dang / sgra tsam gyi rjes su mi 'brang bas ni bsam pa phun sum tshogs pa yin par rig par bya'o/ /gzhan gyi dring la mi 'jog pa'i shes pas chos kyi de bzhin nyid la rang bzhin gyis kun nas nyon mongs
 pa med par rtogs pa dang / de la dkon mchog gi brda dang / mya ngan las 'das pa dang / 'khor ba dang / 'ching ba dang / thar pa'i brda'i ngo bo nyid mi dmigs pas ni rtogs pa phun sum tshogs pa yin par rig par bya'o/ /kun nas nyon mongs pa thams cad kyi gnyen po shin
 tu bsgoms pa dang / de bzhin nyid rgyun mi 'chad pa dang / mi 'jigs pas ni mthar thug par 'gro ba phun sum tshogs pa yin par rig par bya'o/ /de la legs par ma bslabs pa'i dge sbyong ni rnam pa gsum gyis na ming don ji lta ba bzhin du ma yin
 par rig par bya ste/ bsam pa rgud la sbyor ba phun sum tshogs pa dang / bsam pa phun sum tshogs la sbyor ba rgud pa dang / bsam pa yang rgyud la sbyor ba yang rgyud pas so/ /de la bsam pa rgud la sbyor ba phun sum tshogs pa ni rnam pa gsum ste/ nyan pa de tsam gyis
 chog par 'dzin pa dang / smra ba de tsam gyis chog par 'dzin pa dang / 'jig rten pa'i ting nge 'dzin rtogs par byed pa de ro myang ba tsam gyis chog par 'dzin pa'o/ /legs par bslabs pa'i dge sbyong ni rnam pa gcig kho nas ming don ji lta ba bzhin yin par rig par bya ste/ bsam
 pa yang phun sum tshogs la sbyor ba yang phun sum tshogs pas so/ /brdar btags pa'i sdom pa la gnas pa gang zhe na/ de dag ni rnam pa bzhir rig par bya ste/ tshul khrims yan lag drug dang ldan pa'i tshul khrims nyams pa gnyis po 'jig tshogs la lta bas kun nas
 dkris pas ltung ba 'byung ba dang / de las bslab pa la mi mkhas pas nyams pa dang / nyes pa de gnyis spangs su zin kyang 'jig rten pa'i rnam par dag pa ma thob pa'i phyir 'jig tshogs la lta ba rnam par bstsal ba dang / 'jig rten pa'i rnam par dag pa'i sdom pa
 thob cing 'jig tshogs la lta ba rnam par bstsal du zin kyang yo byad ma bsnyungs shing chos bgad med pas skrag pas tshul khrims nyams pa dang / skyon gzhan thams cad spangs su zin kyang chos bdag med pa la log par mos pas tshul khrims nyams pa'o/ /don dam
 pa'i sdom pa la gnas pa gang zhe na/ 'jig rten las 'das pa nyon mongs pa thams cad dang bral ba/ khams gsum pa'i gnyen po'i tshul khrims dang ldan pa gang yin pa'i sdom pa la gnas pa bzhi la/ spros pa'i chos gang dag dmigs pa de dag rab tu zhi ba'i
 mtshan nyid gang yin pa de ni zag pa med pa'i tshul khrims yin par rig par bya ste/ spros pa'i chos rnams gang zhe na/ sdom pa la gnas pa dang po la ni bdag tu 'dzin pa dang / bdag gir 'dzin pa dang / ltung ba'i bya ba dang / de'i bya ba med pa dang / bsams bzhin
 du byed pa'i sbyor ba dang / de'i sbyor ba med pa dang / shes bzhin du spyod pa dang / de'i spyod pa med pa dang / brjed ngas pas spyod pa dang / de'i spyod pa med pa yang dmigs pa'o/ /gnyis pa la ni 'jig tshogs la lta ba'i phyogs dang mthun pa'i gnas ngan len dang ldan pa'i
 ming dang / gzugs dang / phyi mar skye ba'i rgyu dang / 'bral la de'i rgyu med pa nyid dang / kun nas dkris pa rab tu zhi ba dang / bag la nyal ba las de rab tu ma zhi ba dang / gang zag la bdag med par 'dzin pa dang / gang zag tu 'dzin pa spong ba dang / gang zag la bdag med
 par gzung ba de la 'dzin pa dang / gzung ba med pa dang / des gzugs la sogs pa la sems can du 'dzin pa dang / der 'dogs pa legs par 'dzin pa dang / der 'dogs pa dang / ngag gis 'dogs pa legs par 'dzin pa dang / der 'dogs pa'i sems
 dang / der 'dogs pa legs par 'dzin pa yang dmigs pa'o/ /gsum pa la ni gong du skye ba las 'jig rten pa dang / 'og ma yongs su gtong ba las 'jig rten med pa dang / snyoms par 'jug pa la gnas pa dang / 'dod pa la mi gnas pa dang / bdag nyid kyi
 tshul khrims rab tu 'dzin pa dang / gzhan gyi tshul khrims khyad du gsod pa yang dmigs pa'o/ /bzhi pa la ni bdag ni tshul khrims rnam par dag pa yin no snyam du rlom pa dang / ngo bo nyid dang bye brag tu kun tu rtog pa dag gis tshul khrims la kun tu rtog pa yang dmigs pa
 ste/ de ltar spros pa'i chos de dag ni zag pa med pa'i tshul khrims la rab tu zhi bar gyur pa yin no/ /don gyi 'brel pa 'di nyid kyis bslab pa gsum rnam par dag pa las brtsams nas tshigs su bcad pas mngon par sgrub pa yang rig par bya'o/ /bsod nams kyi tshogs ni nyon
 mongs pa chung bar 'gyur ba yin no/ /skyes bu dam pas yongs su gzung ba ni chung mi za bar 'gyur ba yin no/ /ye shes kyi tshogs ni zab mo'i gnas la mos par 'gyur ba yin par rig par bya'o/ /de bzhin gshegs pas gsungs pa la ni rgyu gnyis
 kyis 'jig par 'gyur ba yin te/ chos kyi lugs shes pa nye bar brtags pa dang / de kho na'i shes pa gtan la dbab pas so/ /de bzhin gshegs pa'i gdul ba'i thabs gang zhe na/ de ni rnam pa gnyis su blta bar bya ste/ lus mthun pa dang / mos pa mthun pas
 mthun par rjes su ston pa dang / kun shes pa'i sems nye bar 'jog pa dang / nges par 'byin pa'i gdams ngag gis yang dag par rnam par dag pa'i thabs ston pa'o/ /gdams ngag kyang rnam par bzhir rig par bya ste/ rnam par byang ba dang kun nas nyon mongs pa la skrag
 pa dang 'jug pa'i gnas ston pa dang / kun nas nyon mongs pa'i rgyu yongs su spang ba ston pa dang / rnam par byang ba la skrag pa'i rgyu yongs su spang ba ston pa dang / tshe 'di la mchog tu bde bar gnas pa'i thabs ston pa'o/ /de la kun nas nyon mongs pa'i rgyu ni rnam pa gnyis te/
 tha snyad las byung ba'i ngo bo nyid kyis kun nas nyon mongs pa'i ngo bo nyid du mngon par zhen cing kun tu rtog pa dang / de la yon tan dang skyon du mngon par zhen cing kun tu rtog pa'o/ / rnam par dag pa'i lam la skrag pa'i rgyu yang rnam pa gnyis kyis rig par bya ste/ rim gyis rnam par
 dag pa'i lam la kun nas nyon mongs pa can kun tu rtog pa dang / kun nas nyon mongs pa dang bral bar kun tu rtog pas so/ /mya ngan las 'das pa rnam par dag pa la skrag pa'i rgyu yang rnam pa gnyis kyis rig par bya ste/ tha snyad las byung ba'i ngo bo nyid la mngon par
 zhen pas/ mya ngan las 'das pa zhes bya ba'i tshig bla dgas kyi ming la sems las byung ba'i ming du 'dogs pa dang / sems las byung ba'i ming la zhi ba zhes bya ba'i tshig bla dgas kyi ming du kun tu rtog pas so/ /bde bar gnas pa'i mchog gi thabs ston pa ni de gnyi
 ga'i rgyu yongs su spangs pa las rig par bya'o/ /ldem po ngag tu gsungs pa gang zhe na/ ldem po ngag thams cad la 'jug pa'i rgyu ni gnyis su med pa'i mtshan nyid shes pa'o/ /gnyis su med pa'i mtshan nyid gang zhe na/ brjod pa'i gzhi'i gnas su gyur pa'i dngos po gang yang
 yin pa ste/ de yang ngo bo nyid de yod pa ma yin pa'i phyir dang / brjod pa la goms pa'i ming gi spyod yul gyi ngo bo nyid kyis med pa ma yin pa'i phyir gnyis su med pa yin no/ /gnyis su med pa de la gnyis su mngon par zhen pa las ni kun nas nyon mongs par 'gyur la/ gnyis
 su mngon par zhen pa med pa las ni rnam par byang bar 'gyur ro/ /brjod pa thams cad kyi gzhi'i gnas su ma gyur pa'i dngos po gang yin pa de yang tha snyad la goms pa'i ming gi spyod yul gyi ngo bo nyid kyis yod pa ma yin pa'i phyir dang / de la yongs su ma goms pa'i shes pa'i
 spyod yul gyi ngo bo nyid kyis yod pa'i phyir gnyis su med pa yin no/ /gnyis su med pa de la gnyis su mngon par zhen pa las ni kun nas nyon mongs par 'gyur la gnyis su mngon par zhen pa med pa las ni rnam par byang bar 'gyur te/ de ltar na gnyis su med pa'i mtshan nyid de
 ni de bzhin gshegs pa rnams kyi ldem po ngag thams cad la 'jug par 'gyur ba yin par rig par bya'o/ /de la ston pa'i phun sum tshogs pa rnam pa lnga dang / de'i gdams ngag gi 'bras bu phun sum tshogs pa rnam pa lnga dang 'bras bu'i phan yon phun sum tshogs pa rnam pa lnga la
 brten nas ldem po ngag tu gsungs pa rnams rig par bya'o/ /ston pa'i phun sum tshogs pa rnam pa lnga gang zhe na/ gang gi phyir ston pa dang / gang gis ston pa dang / gang ston pa dang / ji ltar ston pa dang / gang la ston pa de dag phun sum tshogs pa yin pa'o/ /'bras bu
 phun sum tshogs pa gang zhe na/ phung po'i lhag ma med pa'i mya ngan las 'das pa'i dbyings dang / phung po'i lhag ma dang bcas pa'i mya ngan las 'das dbyings dang / 'phags pa'i lam yongs su rdzogs pa dang / nang gi dgra las ran par rgyal ba dang / phyi rol gyi dag
 las rnam par rgyal ba'o/ /de la 'bras bu'i phan yon phun sum tshogs pa ni ston pa la bsnyen bkur byed pa dang / dad pas sbyin pa yongs su sbyong ba dang / 'khor ba'i sdug bsngal las yang dag par rgal ba dang / sbyin gnas kyi dngos po las yongs su
 mi nyams pa dang / de bzhin gshegs pa la brten nas de bzhin gshegs pa'i sras chos kyis sprul pa yin no/ /byang chub sems dpa'i gdams ngag la mos pa'i phan yon gang zhe na/ de ni rnam pa lngas rig par bya ste/ zhing byin gyis rlob pa'i dus na dbang phyug gi bdag po
 chen po yang dag par grub pa'i rgyu zil gyis gnon pa dang / yul yongs su grub pa dang / de'i gnas bstan pa'i snod du byed pa dang / ston pa'i snod du byed pa dang / lus spong ba'i dus na lta ba dang / las rnam par dag par 'gyur bas so/ /de la dbang phyug gi bdag po chen po yang dag par grub pa'i rgyu zil
 gyis gnon pa ni rnam pa lngas rig par bya ste/ 'bras bu dpag tu yod pa dang dpag tu med pa 'phen pa dang / rgyu zad pa dang mi zad pa'i chos nyid dang / bde ba rgya chung ngu dang rgya chen po 'grub pa dang / de ye shes kyi tshogs kyi ngo bo nyid yin pa dang / des de 'dren par byed pas so/ /
 de la lus kyi spyod pas ni skyon rnam pa drug spangs pas rig par bya ste/ skyon rnam pa drug gang zhe na/ mya ngan gyi rgyu'i skyon dang / 'dris pa yongs su mi shes pa'i skyon dang / rnam pa gnyis kyis spyod lam gyi skyon dang / rnam pa gsum gyis 'jig pa'i rgyu'i skyon dang / rnam pa
 gnyis kyis 'chi ltas kyi skyon dang / lus las su mi rung ba'i skyon no/ /de la ngag gi spyod pa ni so sor kun dga' bar byed pa'i dus na skyon rnam pa lnga spangs pas rig par bya ste/ skyon rnam pa lnga gang zhe na/ 'jigs pas 'khums pa'i skyon dang / ngag rtsub po'i skyon dang /
 sangs rgyas kyi bka' spangs nas 'brel pa med pa'i gtam brjod pa'i skyon dang / de bzhin gshegs pa la stod par mi byed pa'i skyon dang / chos mthun pa la gros mi 'debs pa'i skyon no/ /dag gi spyod pa ni kun shes pa brda sprod pa'i dus na skyon rnam pa lnga spangs pas rig
 par bya ste/ skyon rnam pa lnga gang zhe na/ rtogs par bya ba la brjed ngas pa'i skyon dang / tshig snga phyi 'gal ba'i skyon dang / rigs pa dang 'gal ba'i skyon dang / bstan pa la dad pa'i lha la khro ba'i skyon dang / de bzhin gshegs pa la khro ba'i skyon ni/ /yid kyi spyod pa ni
 skyon rnam pa lnga spangs pa las rig par bya ste/ 'di lta ste tshe 'di'i don las brtsams nas rnam pa bzhi dang / tshe phyi ma'i don las brtsams nas tha ma gcig ste/ skyon rnam pa lnga gang zhe na/ da ltar byung ba dang 'das pa'i gnod pa byed pa mi bzod pas mi bzod pa'i skyon dang /
 'chab pa dang 'gyod pa'i gdung bas sdig pa 'chab pa'i skyon dang / 'dod pa'i longs spyod don du gnyer ba dang khon gyi sha glon par 'dod pas 'dod pa'i skyon dang / lta ba ngan pa yongs su 'dzin pa dang spong ba la sems rnam par 'khrul pas brjed ngas pa'i skyon dang / bdag
 nyid khyad du gsod cing sangs rgyas dang byang chub sems dpa' bzhugs bzhugs pa'i sangs rgyas kyi zhing rgya chen por smon pa rnam par spong ba dang / bsam pa chung ngus sangs rgyas kyi chos mngon par sgrub pas chos thams cad las khyad par du 'phags pa 'jig rten pa ma yin
 pa'i phun sum tshogs pa'i khyad par khyad du gsod cing der smon pas smon lam gyi skyon no/ /byang chub sems dpa'i sde snod kyi gdams ngag la mos pa'i phan yon tshad med grangs med de de bas kyang de rnam par dbye zhing bstan pa dang / rnam par dbye ba la mos pa'i phan yon
 ches tshad med grangs med pa dag yod par rig par bya'o/ /byang chub sems dpa'i sa'i rnam par gtan la dbab pa rdzogs te/ rnam par gtan la dbab pa'i gzhung lhag ma ni mi snang ngo / / phung po dang bcas pa dang phung po med pa'i sa'i rnam par gtan la dbab pa'i sdom ni/ bral
 dang tshe yi 'du byed dang / /gyur dang gnas dang khyad par dang / /yod dang rtag dang bde ba dang / /bye brag gzhan dbang bya ba yin/ /phung po'i lhag ma dang bcas pa'i mya ngan las 'das pa'i dbyings la gnas te/ nyon mongs pa thams cad dang bral bar brjod par bya'am/ ma bral
 bar brjod par bya zhe na/ smras pa/ bral bar brjod par bya'o/ /sdug bsngal thams cad dang bral bar brjod par bya'am/ ma bral bar brjod par bya zhe na/ smras pa/ bral ba dang / ma bral bar yang brjod par bya ste/ma 'ongs pa'i skye ba'i sdug
 bsngal 'byung bar 'gyur ba gang yin pa de dang bral bar brjod par bya'o/ /da ltar gyi skye ba'i gang yin pa de las kyang sems las byung ba dang ni bral bar brjod par bya'o/ /bkres pa'i sdug bsngal dang / skom pa'i sdug bsngal dang / khams ma snyoms pa las gyur pa dang / dus
 tshigs 'gyur pa las gyur pa dang / gnod pa las gyur pa'i sdug bsngal dang ni ma bral bar brjod par bya'o/ /de yang kun tu 'byung ba las yin gyi nyon mongs pa dang 'brel pa las ni ma yin no/ /gal te dgra bcom pa thams cad sems la dbang thob pa yin na ci'i phyir
 tshe'i 'du byed btang ste/ yongs su mya ngan las mi 'da' bar sdug bsngal gyis gnon bzhin du gnas she na/ smras pa/ nus pa'i khyad par gyi phyir te/ 'di ltar dgra bcom pa la las ni tshe'i 'du byed gtong bar nus la/ la las ni mi nus pa dang / la las ni tshe'i 'du
 byed bsring bar nus la/ la las ni mi nus pa'i phyir ro/ /gal te dgra bcom pa'i skye mched drug po ji ltar skyes shing byung ba de kho na bzhin du ma 'gags shing / gzhan du ma gyur pa yin na/ gang gi phyir skye mched drug la 'gyur ba med na/ de'i de las gzhan pa'i gnas
 gyur pa de gang yin/ gal te de las gzhan pa'i gnas gyur pa med na ni snga phyir gnas mnyam pa yin na/ ci'i phyir de la nyon mongs pa ldog cing lam 'jug par 'gyur zhe na/ smras pa/ dgra bcom pa'i gnas gyur pa ni yod de/ de yang skye mched drug las
 gzhan dang gzhan ma yin pa nyid du brjod par mi bya'o/ /de ci'i phyir zhe na/ 'di ltar gnas gyur pa de ni de bzhin nyid rnam par dag pas rab tu phye ba dang / de bzhin nyid kyi rigs can dang / de bzhin nyid kyi sa bon can dang / de bzhin nyid las yang dag par grub pa yin la/
 de bzhin nyid kyang skye mched drug las gzhan dang gzhan ma yin pa nyid du brjod par mi bya ba'i phyir te/ ji ltar brjod par mi bya ba de lta bu ni sngar bstan zin to/ /de'i phyir gnas gyur pa skye mched drug las gzhan nam gzhan ma yin zhes 'dri ba de ni tshul bzhin ma yin pa yin
 no/ /gal te gnas gyur pa med du zin na/ des na 'di lta bu'i skyon kho nar thal bar 'gyur te/ gang gi phyir dgra bcom pa la kun nas nyon mongs pa kun tu 'byung bar 'gyur ba dang / lam kun tu mi 'byung bar thal bar 'gyur bas/ de'i phyir gnas gyur pa ni yod pa kho
 nar rig par bya'o/ /bcom ldan 'das kyis kyang gnas gyur pa de nyid las dgongs nas/ kun brtags ngo bo nyid la ni/ /mngon zhen bag chags kun nyon mongs/ /mngon zhen bag chags yod min pa/ /de ni rnam par byang ba yin/ /'di la de gnyis zag bcas
 pa'i/ /khams yin gnas gyur de nyid ni/ /zag pa med pa'i dbyings yin te/ /de nyid dag pa bla med yin/ /zhes gsungs so/ /'di lta ste dper na ba lang gsod pa'am/ ba lang gsod pa'i slob ma mkhas pa zhig gis ba lang gsad pa'i mtshon rnon pos ba lang bsad
 nas/ nang grol thams cad bcad cing gtubs te brdungs shing dmyal nas/ sha thams cad dang / rus pa thams cad dang / chu rgyus kyi gzungs thams cad kyang gtubs nas phyir ba lang gi ko bas g.yogs par gyur na/ ba lang de ko ba dang ldan pa yang ma yin/ mi
 ldan pa yang ma yin par rig par bya ba de bzhin du/ dgra bcom pa gnas gyur pa shes rab kyi mtshon gyis kun tu sbyor ba dang / 'ching ba dang / bag la nyal dang / nye ba'i nyon mongs pa dang / kun nas dkris pa thams cad yang dag par bcad pa yang ko ba'i gnas lta bu
 skye mched drug dang ldan pa yang ma yin/ /mi ldan pa yang ma yin par brjod par bya'o/ /rnal 'byor pa gnas gyur pa'i mtshan mar 'dzin pa yang sngon gyi 'dzin pa las khyad par du 'phags pa yin par rig par bya ste/ de'i yang de bzhin nyid bzhin du so so rang rig pa dang
 mthun pa yin pas/ gzhan dag la bdag gis mtshan ma 'di dang 'di lta bu la yang dag par rjes su mthong ngo zhes yang dag par brjod par mi nus pa yin no/ /dgra bcom pa phung po'i lhag ma dang bcas pa'i mya ngan las 'das pa'i dbyings la gnas pa
 sems gang la gnas nas phung po'i lhag ma med pa'i mya ngan las 'das pa'i dbyings su yongs su mya ngan las 'da' zhe na/ smras pa/ mtshan ma thams cad yid la mi byed pas mtshan ma med pa'i dbyings 'ba' zhig yid la byed cing / rim gyis 'gog pa la snyoms par 'jug
 la/ 'jug pa'i rnam par shes pa 'gog par byed cing / de'i 'og tu kun gzhi'i rnam par shes pa'i gnas spong bar byed de/ kun gzhi rnam par shes pa dang / 'jug pa'i rnam par shes pa rgyu med pa mi skye bas/ de ni 'dus ma byas pa'i dbyings rnam par dag pa dri ma
 med pa lus so/ /dbyings der yongs su mya ngan las 'das pa ni lha nyid kyi grangs su yang mi 'gro la/ dri za nyid du yang ma yin/ klu nyid du yang ma yin/ mi'am ci nyid du yang ma yin/ lha ma yin nyid du yang ma yin/ gnod sbyin nyid du yang ma yin zhing / mi nyid
 kyi grangs su yang mi 'gro ste/ mdor bsdus na de ni phyogs bcu'i sems can du gdags pa'i khams thams cad dang / 'gro ba thams cad dang / skye gnas thams cad dang / skye ba thams cad dang / lus thob pa thams cad dang / rigs btsun pa thams cad dang /
 sa thams cad po gang dag yin pa de dag gi grangs su yang mi 'gro ste/ 'di ltar dbyings 'di ni spros pa med pa ste/ grub pa rnams kyi so sor rang rig pa dang mthun pa yin pa'i phyir ro/ /dgra bcom pa phung po'i lhag ma dang bcas pa'i mya ngan las las 'das pa'i dbyings dang /
 phung po'i lhag ma med pa'i mya ngan las 'das pa'i dbyings su yongs su mya ngan las 'das pa la khyad par ci yod ce na/ smras pa/ phung po'i lhag ma dang bcas pa la gnas pa ni grangs su khas len pa yin la/ phung po'i lhag ma med pa la gnas pa ni grangs su khas mi len
 pa yin pa dang / phung po'i lhag ma dang bcas pa la gnas pa ni sdug bsngal dang bcas pa yin la/ phung po'i lhag ma med pa la gnas pa ni sdug bsngal med pa yin pa dang / phung po'i lhag ma dang bcas pa la gnas pa'i gnas gyur pa ni skye mched drug dang 'brel pa
 yin la/ phung po'i lhag ma med pa la gnas pa'i gnas gyur pa ni skye mched drug dang 'brel ba med pa ma yin no/ /gal te phung po'i lhag ma med pa'i mya ngan las 'das pa'i dbyings su yongs su mya ngan las 'das pa'i gnas gyur pa ni skye mched drug dang 'brel pa med
 pa yin la / ji ltar de skye mched drug gi gnas med par gnas par 'gyur zhe na/ smras pa/ dgra bcom pa'i gnas gyur pa ni skye mched drug gi rgyu las byung ba ma yin te / de bzhin nyid la dmigs pa'i lam bsgoms pa'i rgyu las byung ba yin te/ de'i phyir
 skye mched drug yod kyang rung / med kyang rung ste/ gnas gyur pa la ni gzhan du 'gyur ba nyid kyang re zhig med pa yin na/ nyams par 'gyur ba lta yod par ga la 'gyur/ dbyings de ni yongs su shes par bya ba dang / spang bar bya ba ma yin te/ de'i phyir dgag par
 bya ba yang ma yin no/ phung po'i lhag ma med pa'i mya ngan las 'das pa'i dbyings su yongs su mya ngan las 'das pa'i gnas gyur pa yod par brjod par bya'am/ med par brjod par bya zhe na/ smras pa/ yod par brjod par bya'o/ /mtshan nyid ji lta bur brjod par
 bya zhe na/ smras pa/ spros pa med pa'i mtshan nyid dang / chos kyi dbyings shin tu rnam par dag pa'i mtshan nyid yin no/ /ci'i phyir yod par brjod par bya zhe na/ smras pa/ phung po'i lhag ma dang bcas pa dang / phung po'i lhag ma med pa'i mya ngan las 'das pa'i
 dbyings na gnas gyur pa de'i chos nyid mi 'khrugs pa nyid kyi phyir te/ chos nyid mi 'khrugs pa de nyid la brten nas de sngon yod la phyis med par yang mi rigs pa'i phyir ro/ /chos de ni byung ba dang / skye ba dang / 'grub pa ma yin mod kyi/ chu ltar dang ba nyid du gyur pa dang / gser
 ltar bzang ba nyid du gyur ba dang / nam mkha' ltar sprin dang khug rna dang bral ba nyid du gyur pa yin te/ de'i phyir yod par brjod par bya'o/ /rtag par brjod par bya'am/ mi rtag par brjod par bya zhe na/ smras pa/ rtag par brjod par bya'o/ /de ci'i phyir
 zhe na/ smras pa/ de bzhin nyid rnam par dag pas rab tu phye ba'i phyir dang / ma byung ba'i phyir dang / ma skyes pa'i phyir dang / ldog pa med pa'i phyir ro/ /ci'i bde bar brjod par bya'am/ bde ba ma yin par brjod par bya zhe na/ smras pa/ don dam pa'i 'debs bde bar brjod par
 bya'i/ tshor ba'i bde bas ni ma yin no/ /de ci'i phyir zhe na/ nyon mongs pa thams cad dang / de las byung ba'i sdug bsngal thams cad las yang dag par 'das pa nyid kyi phyir ro/ /phung po'i lhag ma med pa'i mya ngan las 'das pa'i dbyings su yongs su mya ngan las 'das pa rnams
 la bye brag gam/ bsam pa'am/ tha dad du bya ba 'ga' lta yod dam zhe na/ smras pa/ med de 'di lar dbyings de la ni dman pa dang / 'bring dang / khyad par du 'phags pa rnam par gzhag pa yang med la/ mthon dman yang med la / bzang ngan yang med pa'i phyir ro/ /
 nyan thos dang / de bzhin gshegs pa la ci'i phyir bye brag med de/ 'di ltar nyan thos ni sgrib pa dang bcas bzhin du phung po'i lhag ma med pa'i mya ngan las 'das pa'i dbyings su yongs su mya ngan las 'das la/ de bzhin gshegs pa ni thams cad kyi thams cad du sgrib pa mi mnga'
 ba yin no zhe na/ smras pa/ phung po'i lhag ma dang bcas pa'i mya ngan las 'das pa'i dbyings la gnas pa la ni sgrib pa dang bcas pa dang sgrib pa med pa rnam par gzhag pa yod kyi/ phung po'i lhag ma med pa'i mya ngan las 'das pa'i dbyings la gnas pa la ni sgrib pa rnam par
 gzhag pa med do/ /de ci'i phyir zhe na/ mtshan ma dang gnas ngan len thams cad thams cad kyi thams cad du rgyun chad cing 'gags pa'i phyir te/ 'di ltar dgra bcom pa phung po'i lhag ma dang bcas pa'i mya ngan las 'das pa'i dbyings la gnas pa'i mtshan ma thams cad kyi thams cad du
 ma 'gags pa dang / rnam par smin pa dang / gnas ngan len gyi sgrib pa ma 'gags pa de ni de'i nyon mongs pa'i bag chags zhes bya ste/ mtshan ma dang gnas ngan len la ltos nas sgrib pa rnam par gzhag pa de la ni phung po'i lhag ma med pa la med pas de'i phyir de la ni sgrib pa med pa kho
 nar rig par bya'o/ /gal te de la sgrib pa med pa de/ ji ltar de bzhin gshegs pa la sgrib pa mi mnga' ba de kho na bzhin du dgra bcom pa la yang sgrib pa med pa yin na/ ci'i phyir dgra bcom pa yang de bzhin gshegs pa'i mdzad mi byed ce na/ smras pa/ sngon smon lam
 bsgoms pa med pa'i phyir dang / de lta bu'i rigs can yin pas de'i phyir dgra bcom pa ni ldang ba'i bsam pa med pa kho nar yongs su mya ngan las 'das pas na de'i phyir mi byed do/ /phung po'i lhag ma med pa'i mya ngan las 'das pa'i dbyings su yongs su mya ngan las 'das pa'i zag
 pa med pa'i dbyings gang yin pa de ni / gzugs las gzhan du brjod par bya'am/ gzhan ma yin par brjod par bya zhe na/ smras pa/ gzhan yang ma yin/ gzhan ma yin pa yang ma yin par brjod par bya'o/ /gzugs dang ji lta ba bzhin du tshor ba la sogs pa dang / 'du
 byed thams cad dang / khams thams cad dang / 'gro ba thams cad dang yang de bzhin du rig par bya'o/ /phung po'i lhag ma med pa'i mya ngan las 'das pa'i dbyings su yongs su mya ngan 'das pa/ ci gzugs la sogs pa la dbang thob par brjod par bya'am/ dbang thob
 pa ma yin par brjod par bya zhe na/ smras pa/ dbang thob par brjod par bya'o/ /dbang thob na ci mngon du byed par brjod par bya'am/ mngon du mi byed par brjod par bya zhe na/ smras pa/ la la ni mngon du byed la/ la la ni mngon du mi byed de/ de bzhin gshegs par gyur nas/ phung po'i lhag ma med
 pa'i mya ngan las 'das pa'i dbyings su mya ngan las 'das pa gang yin pa de ni mngon du mdzad do/ /de las gzhan pa ni mngon du mi byed do/ /gang gi tshe spros pa med pa'i dbyings de gang gi grangs su yang bgrang ba ma yin na/ ji ltar de mngon du byed ce na/ smras pa/ sngon
 yang dag pa'i smon lam dang / lam de lta bu bsgoms pa'i dbang gis te/ 'di lta ste dper na 'gog pa la snyoms par zhugs pa la snyoms par 'jug pa las ldang bar bya'o/ /ldang ngo snyam du de ltar sems pa med kyang sngon mngon par 'du byas pa'i dbang
 gis langs nas yang sems dang bcas pa'i spyod pa la spyod par byed pa de bzhin du 'di yang tshul de bzhin du blta bar bya'o/ /nyan thos byang chub tu yongs su 'gyur ba/ci phung po'i lhag ma med pa'i mya ngan las 'das pa'i dbyings la gnas shing / bla na med pa yang dag
 par rdzogs pa'i byang chub mngon par sgrub par byed dam/ 'on te phung po'i lhag ma dang bcas pa'i mya ngan las 'das pa'i dbyings la gnas shing byed ce na/ smras pa/ phung po'i lhag ma dang bcas pa'i mya ngan las 'das pa'i dbyings la gnas shing byed de/ 'di ltar phung
 po'i lhag ma med pa'i mya ngan las 'das pa'i dbyings la gnas pa ni rtsom pa thams cad dang bral zhing / 'bad pa thams cad rgyun bcas pa yin pa'i phyir ro/ /gal te phung po'i lhag ma dang bcas pa'i mya ngan las 'das pa'i dbyings la gnas shing / bla na med pa yang dag
 par rdzogs pa'i byang chub mngon par sgrub par byed ce na/ ji ltar skye ba gcig gis bla na med pa yang dag par rdzogs pa'i byang chub mngon par bsgrub tu rung ste/ dgra bcom pa la ni re zhig skye ba gcig kyang med na/ skye ba'i rgyun lta smos kyang ci dgos she na/ smras pa/
 tshe'i 'du byed bsrings nas mngon par sgrub par byed do/ /bcom ldan 'das kyis kyang nyan thos byang chub tu yongs su 'gyur ba las shas cher dgongs nas/ rigs kyi bu nor gyi rang bzhin can ni rdzu 'phrul gyi rkang pa bzhi bsgoms nas bskal pa'am/ bskal pa las lhag par
 gnas par 'gyur ro zhes gsungs te/ bskal pa las lhag par zhes bya ba ni 'di bskal pa pas pha rol yin par dgongs so/ /de ni de ltar tshe'i 'du byed bsrings su zin kyang bla na med pa yang dag par rdzogs pa'i byang chub tu shin tu dul ba yin te/ mya ngan las 'das pa la mngon
 par dga' ba'i phyir te/ byang chub sems dpa' las dang po pa yang de lta ma yin no/ /de ni de ltar tshe'i 'du byed bsrings nas dbang po'i lus byin gyis rlob par byed cing / sprul pa'i lus kyis chos mthun pa pa dag la/ phung po lhag ma med pa'i mya ngan las 'das pa'i dbyings su
 yongs su mya ngan las 'da' ba ston par byed de/ des na de dag 'di snyam du de ni phung po'i lhag ma med pa'i mya ngan las 'das pa'i dbyings su yongs su mya ngan las 'das so snyam du sems so/ /de dbang po'i lus byin gyis brlabs pa des 'dzam bu'i gling 'dir gar 'dod pa ci nas
 kyang lha rnams kyis kyang mi mthong na/ sems can phal pa gzhan dag gis lta smos kyang ci dgos pa de ltar rab tu dben par gnas par byed do/ /de mya ngan las 'das pa la mngon par dga' ba de lan mang du gnas pas/ 'jig rten gyi khams rab 'byams de dang de dag tu de bzhin
 gshegs pa dang byang chub sems dpa' rnams la bsnyen bkur bya ba dang / byang chub kyi phyogs kyi lam bsgoms pa la bag med pa na/ yang dang yang du sangs rgyas dang byang chub sems dpa' rnams kyis yang dag par skul bar mdzad de/ yang dag par skul bar mdzad pa na
 yang / yang dang yang du bag yod pa la rnal 'byor du byed do/ /gal te dgra bcom pa byang chub tu yongs su 'grub par gyur pa bla na med pa yang dag par rdzogs pa'i byang chub mngon par rdzogs par 'tshang rgya bar 'gyur na/ ci'i phyir dgra bcom pa thams cad kyang byang chub tu yongs
 su 'gyur ram mi 'gyur zhe na/ smras pa/ rigs kyi bye brag kho na'i phyir te/ 'di ltar dgra bcom pa rnams nyid la yang dgra bcom pa la la ni gnyi ga'i cha las rnam par grol zhing phung po'i lhag ma med pa'i mya ngan las 'das pa'i dbyings su yongs su mya ngan las 'da'
 bar byed la/ la la ni shes rab kyis rnam par grol ba kho nas byed pa'i bye brag snang bas/ de'i phyir rigs kyi bye brag nyid kyis na dgra bcom pa thams cad byang chub tu yongs su 'grub par mi 'gyur bar rig par bya'o/ /nyan thos byang chub tu yongs su 'gyur ba de yang res 'ga'
 ni slob par gyur pa kho nar gyur pa'i tshe na nyan thos kyi smon lam las rnam par ldog par byed do/ /res 'ga' ni mi slob par gyur nas dbang po'i rim pa dang rkyen gyi rim pa nyid la ltos nas ldog par byed do/ /ji ltar nyan thos byang chub tu yongs su 'gyur ba
 r kyen rnyed na bla na med pa'i theg pas kyang yongs su mya ngan las 'da' bar 'gyur ba de ltar byang chub sems dpa' yang gal te sangs rgyas dang byang chub sems dpa' rnams kyis btang snyoms su bzhag cing de de ltar de dag gis btang snyoms su bzhag pa'i rgyus theg pa dman pas
 yongs su mya ngan las 'da' ba'i rkyen snying thag pa la sogs pa dag rnyed pa na theg pa dman pas kyang yongs su mya ngan las 'da' bar 'gyur ram zhe na/ gang gi phyir de bag med par gyur cing sangs rgyas dang byang chub sems dpa' rnams kyis btang snyoms su 'jog par 'gyur ba de
 ni gnas ma yin skabs ma yin te de ni gnas med do/ /byang chub tu yongs su 'gyur ba de yang gang gi tshe bla na med pa yang dag par rdzogs pa'i byang chub thob par 'gyur ba de'i tshe na de bzhin gshegs pa kho nar gyur nas phung po'i lhag ma med pa'i mya ngan las 'das pa'i
 dbyings su yongs su mya ngan las 'da'o/ /byang chub tu yongs su 'gyur ba de ci dang po nyid nas nyan thos kyi rigs can yin par brjod par bya'am/ 'on te byang chub sems dpa'i rigs can yin par brjod par bya zhe na/ smras pa/ ma nges pa'i rigs
 can yin par brjod par bya ste/ ma nges pa'i sems can gyi tshogs rnam par gzhag pa dang 'dra'o/ /de yongs su mya ngan las 'da' ba'i chos can nyid kyi rigs su ni nges pa yin par rig par bya'o/ /gnas der zhugs pa de la ji ltar 'chi ba'i
 'jigs pa med pa bzhin du na ba dang / rga ba'i 'jigs pa yang med do/ /de dag dang gzhan de bzhin gshegs par gyur cing phung po'i lhag ma med pa'i mya ngan las 'das pa'i dbyings su yongs su mya ngan las 'das pa dag ni phyogs bcur yang dang
 yang du sems can gyi don bsam gyis mi khyab pa dag gtan du mdzad par rig par bya ste/ 'di lta ste dpa' bar 'gro ba'i ting nge 'dzin las sgyu ma mkhan gyi dpe dang / ded dpon gyi dpe dang / grub pa'i dpe mdzad pa bzhin du 'dir yang tshul de
 bzhin du blta bar bya'o/ /'di ni de bzhin gshegs pa'i mchog tu gsang ba yin te/ 'di dang de bzhin gshegs pa'i gsang ba sna tshogs gzhan dag la mos pas spyod pa'i sar chud pa'i byang chub sems dpa' bzod pa chung ngu la zhugs pa rnams
 ni mos pa chung ngus 'jug go/ /bzod pa 'bring la zhugs pa rnams ni mos pa 'bring gis 'jug go/ /bzod pa chen po la zhugs pa rnams ni mos pa chen pos 'jug kyang mos pa rnam par dag pa dang / shin tu rnam par dag pas ni ma yin no/ /
 sar chud pa rnams las kyang byang chub sems dpa' lhag pa'i bsam pa rnam par dag pa rnams ni thams cad du mos pa snga ma las ches khyad par du 'phags pa/ ches gya nom pa/ so so rang gi rnam pas grub pa'i mos pa rnam par dag pas 'jug
 go/ /sa gnyis par chud pa rnams ni de bas kyang ches khyad par du 'phags pas 'jug ste/ de bzhin du sa dgu pa'i bar la zhugs pa dag kyang thams cad du gong nas gong du khyad par du 'phags pa'i mos pa rnam par dag pas 'jug go/ /byang
 chub sems dpa' sa bcu par chud pa rnams ni de bzhin gshegs pa'i gsang ba de dag la mos pa shin tu rnam par dag pas 'jug ste/ de ltar na de bzhin gshegs pa'i gsang ba de dag ni bsam gyis mi khyab pa dang / brtag par bya ba ma yin pa dang / rtog
 ge'i spyod yul ma yin par rig par bya'o/ /chos rnam par gtan la dbab pa'i bsdus pa'i don gang zhe na/ smras pa/ rnam pa rab tu dbye bas chos rnams rnam par gzhag nas/ de dag nyid kyi rang dang spyi'i mtshan nyid dang / de dag nyid kyi
 brgal ba'i lan dang / de dag nyid kyi gcig nas brtag pa dang / tshig gong ma dang sbyar ba dang / tshig 'og ma dang sbyar ba dang / mu bzhir bcad pa la sogs pas rab tu rnam par dbye ba gang yin pa dang / de dag nyid kyi bsdu ba dang / mtshungs par ldan
 pa dang / 'thob pa rnam par gzhag pa gang yin pa de ni de'i bsdus pa'i don yin par rig par bya'o/ /sa dang sa dag gi rnam par gtan la dbab pa'i rab tu dbye ba ni dpag tu med de/ phyogs tsam zhig yang dag par bstan pa ni 'di yin pas phyogs 'di dang / bslab pa 'di
 dang / tshul 'di dang / gtan la dbab par bstan pa 'dis gzhan dag kyang brtag par bya'o/ /phung po dang bcas pa dang phung po med pa'i sa'i rnam par gtan la dbab pa rdzogs te/ rnam par gtan la dbab pa'i gzhung de las gzhan ni mi snang ngo / /rnal 'byor spyod pa'i sa rnam
 par gtan la dbab pa bsdus pa rdzogs so/ / //rgya gar gyi mkhan po pradz+nyA war+m+ma dang / su ren+d+ra bo d+hi dang / zhu chen gyi lo tsA ba ban+de ye shes sde la sogs pas bsgyur cing zhus te gtan la phab pa'o/ /[ ]@#/ /rnal 'byor spyod pa'i sa las gzhi bsdu ba bzhugs/