བོད་ཡིག

e-texts based on the ACIP/ALL Input

snga nas mdzad pa rnam par gzhag pa'i rim pa bzhi pa rdzogs so/ /[ ]@#//rgya gar skad du/ shrI gu h+yas mA dza maN+Dal u pA yi ka biMsha ta bi d+hi nA ma/ bod skad du/ dpal gsang ba 'dus pa'i dkyil 'khor gyi cho ga nyi shu pa zhes bya ba/ dpal rdo rje sems dpa' la phyag 'tshal lo/ /gnyis med ye shes sgu mnga' ba/ /dang po'i mgon la phyag 'tshal nas/ /rdo rje slob mar phan 'byung ba/ /dkyil 'khor yan lag bdag gis bshad/ /bya rgyud cho ga ma gtogs par/ /spyod dang gnyi ga'i rnal 'byor gyis/ /grub pa'i dkyil 'khor sangs rgyas ni/ /kun lugs las 'ongs yang dag bsngags/ /dang por sa ni sbyang ba dang / /de nas sa yongs 'dzin pa dang / /phyi nas bgegs ni nyer zhi dang / /thod le kor gyis thig gdab dang / /de nas sa lha sogs lhag par/ /gnas dang de nas gsol gdab dang / /phyi nas slob ma lhag gnas dang / /nam mkha' thig ni gdab pa dang / /tshon sna lnga yi cho ga dang / /tshon rtsi rnams ni dgye ba dang / /lha rnams spyan drang nyid dang ni/ /de nas slob ma gzhug pa dang / /khrus kyi dkyil 'khor cho ga dang / /de nas sangs rgyas dbang bskur dang / /de nas phyag mtshan dbang bskur dang / /bla ma lha dang yon gnyis dang / /rjes su gnang ba sbyin pa dang / /de nas gshegs gsol cho ga dang / /dkyil 'khor las ched phur pa dang / /skud pa bsdu ba nyid kyang ste/ /rab bshad cho ga nyi shu yis/ /ji lta ji ltar rgyas shes pa'i/ /rdo rje slob dpon mkhas pa yis/ /rdul tshon dkyil 'khor bri bar bya/ /kha cig grub pa brgyad 'dod pas/ /dkyil 'khor 'di la 'jug par 'gyur/ /de bzhin bden mthong de bzhin du/ /dpa' bo sngags pa brtag pa ste/ /de dag sbyor ba bla ma yis/ /rig nas bla ma mkhas pa yis/ /slob ma'i don du bsgrub bya'i phyir/ /'khor lo rnam brgyad bri bar bya/ /rin chen sa bon de bzhin dang / /me tog tshon dang de bzhin du/ /bye ma g.yo dang phye ma ste/ /de bzhin yid kyi dkyil 'khor bden/ /sa bon dgod dang phyag mtshan dang / /yang na lha yi sku nyid ni/ / 'bur du btod dang lugs ma ni/ /stobs bzhin dkyil 'khor la dgod bya/ /phreng ba chu dang rdzogs sangs rgyas/ /rdo rje dril bu me long dang / /ming dang slob dpon rjes gnang zhes/ /bya ba 'di ni dbang bskur rim/ /de bzhin gshegs pas rdo rje yi/ /theg par slob dpon rnam gnyis gsungs/ /gcig ni gsang sngags gtsor byed 'gyur/ /gcig ni bsam gtan la gzhol ba/ /gsang sngags smrar gnas rnal 'byor pa/ /lha la dmigs pa lhur len pas/ /de las mtshan ma rnyed gyur te/ /rdul tshon dkyil 'khor bri bar bya/ /gsang sngags tshul gnas rnal 'byor pa/ /gnyis med ye shes spyor ldan pas/ /sgyu ma lta bu'i lus kyis ni/ /'khor lo sgyu ma lta bu bri/ /grong khyer grong dang grong rdal dang / /kun dga' tshong 'dus gtsug lag ni/ /khang du pus nub tsam brkos nas/ /rim gyis sa ni sbyang bar bya/ /shing dang gyo mo gseg ma dang / /de bzhin rus pa sol ba dang / /skra la sogs pa bsal byas nas/ /de nas sa ni sbyang bya ste/ /kun nas steng ni yang dag par/ /bsnyams te ba lang lci bas byug/ /dri yi chu yis bsangs nas ni/ /phyi nas drag po'i sbyin sreg bya/ /sngags pa rdo rje sems zlos shing / /rdo rje'i lta bas blta bar bya/ /dkyil 'khor gyi ni sa yi cha/ /skyon dang ldan yang spyod par 'gyur/ /gsang dbang rtog pa la gnas shing / /byang chub sems ni rnam spangs pa'i/ /sngags pa gang zhig sa sbyang bar/ /byed pa de yis 'grub mi 'gyur/ /sa sbyang ba'i cho ga'o/ / //de nas bla re sogs brgyan cing / /mchod pa lnga dang bcas pa yi/ /'khor lo'i khyim du phyin nas su/ /sa ni yongs su gzung bar bya/ /dkar la ma nyams gos 'chang zhing / /gtsug tor dag pa yis brgyan la/ /rgyan rnams thams cad kyis spud cing / /dri bzangs byug pa'i chal 'thor bas/ /nyi ma gsum du thun gsum du/ /cho ga ji bzhin gtor ma dbul/ /de nas bgegs rnams zhi bar ni/ /bya phyir phyogs skyong bcu la'o/ /brtul zhugs brtan pas zhi ba yi/ /sbyin sreg tshul bzhin sngar byas nas/ /phyi nas dbang bskur rab grub phyir/ / slob mas kyang ni byed du gzhug /sa yongs su gzung ba'i cho ga'o// //zhe sdang rdo rje'i ting 'dzin la/ /gnas shing khro bos yongs bskor ba'i/ /rnal 'byor pa yis thabs byung tshe/ /bgegs ni nges par bsal bar bya/ /rkang mthil rdo rje bsam byas nas/ /rdo rje gsor ba lhur len zhing / /rdo rje'i rnam sgeg gar byed bzhin/ /hUM yig drag po che bar bcas/ /yi ge Ta yis mig g.yon zla bar byas/ /yi ge ma yis mig g.yas nyi ma bkod/ /rdo rje 'dzin gyi bsnyems la 'chang ba yis/ /dkyil 'khor sa yi cha la 'gro byed cing / /mnga' bdag brtse ba'i bdag nyid kyis/ /brgya byin la sogs gdug pa yi/ /tshogs bcas sa dang bar snang dang / /phyogs nas bsal bya 'di skad brjod/ /a pa sa ran+tu b+ha ban+to yi ge tsi ta de ba a su ra yak+Sha rAk+Sha pre tapi shA tsa a pa smA ra b+hU ta DA ki n+ya oM ltar ka mA hal+li kam hal+li ka ma ha l+li ka a nu ra sa pa ri kha ta ga ru Da kiM pu ru Sha man+t+ra sid+hi/ bdag gis sa phyogs 'dir slob ma che ge mo'i rdzogs pa'i byang chub rdzogs par bya ba'i phyir dang / sems can thams cad bla na med pa'i ye shes thob par bya ba'i phyir dpal rdo rje sems dpa'i dkyil 'khor bri bar bya'o/ /rdo rje 'dzin pa chen po'i bka' stsal pa 'di thos nas myur du dengs shig / gang zhig mi dengs pa de'i mgo bo ye shes kyi rdo rje chen po 'bar ba dag hUM gi rdo rje 'bar zhing rab tu 'bar ba 'dis tshal pa brgyar 'gas par bya'o/ /de skad lan gsum brjod nas de nas ni/ /sngags pa khro bar gyur cing shar phyogs na/ /gnas pas hUM yig phyag rgya dang bcas par/ /g.yas brkyang sngon 'gro'i sbyor ba tshul bzhin bya/ /g.yas brkyang dang / g.yon brkyang dang / sa ga dang / zlum po dang / mnyam pa'i stang stabs dang / rus sbal gyi stang stabs dang / rdo rje phul byung dang / rdo rje sgeg pa dang / rkang gcig gis 'phur stangs dang / bung ba'i 'phur stangs dang / seng ge'i stang stabs dang / seng ge'i gal pa dang / rdo rje lcags sgrog dang / rdo rje skor 'dzin dang / rdo rje 'phen pa dang / rdo rje'i gar stabs dang / rdo rje 'jigs byed dang / rdo rje ro langs dang / rdo rje tho ba dang / gdong bzhi byin gyis brlab pa dang / rdo rje 'khyil pa dang / bud med ltar sgyu 'phrul byed pa dang / rdo rje lcags sgrog dang / stobs po che phul byung dang / rdo rje mche ba dang / rdo rje bzhad pa dang / rdo rje sgrogs pa dang / ral gri'i tshul dang / rdo rje'i tshul dang / 'khor lo'i tshul dang / gtun shing gi tshul dang / ba dan kyi tshul dang / zhags pa'i tshul dang / pad+ma'i tshul dang / gtum po'i tshul dang / mi 'jigs pa'i tshul dang / lcags kyu'i tshul dang / thong gshol gyi tshul dang / 'phang ma dung gi tshul dang / mda' 'gengs pa'i tshul dang / mda' 'dren pa'i tshul dang / mda' 'phen pa'i tshul dang / thag mdung 'phen pa'i tshul dang / mchog sbyin pa'i tshul dang / mdung thung gi tshul dang / chu'i tshul dang / phyag 'tshal ba'i tshul dang / rdo rje'i 'dug tshul dang / bsam gtan pa'i tshul dang / rdo rje'i skyil krung dang / pad+ma'i 'dug tshul dang / sems dpa'i skyil/ / krung dang / dpa' bo'i 'dug tshul dang / bzang po'i 'dug tshul dang / tsog tsog por 'dug tshul dang / rol pa'i 'dug tshul dang / mngon du phyogs pa'i tshul dang / rgyab kyis phyogs pa'i tshul zhes bya ba'o/ /sngags pa rang bzhin shes pa yis/ /stang stabs de ltar dbang po sogs/ /tshogs bzang bsdigs nas phyogs skyong rnams/ /ji bzhin phur bus yang dag gdab/ /seng ldeng phur ba sor brgyad pa'i/ /tshad dang ldan pa blangs nas ni/ /tshon sna lnga pa'i skud pa yis/ /de ni go rims bzhin du dkri/ /dri dang me tog sogs rnams kyis/ /mchod nas snod ni sar par gzhag /lag par reg cing phur bu la/ /yi ge gsum gyis mngon par bsngags/ /de ltar 'dus byas phur ba ni/ /kun rdzob rang bzhin mthon po las/ /blo dang ldan pas rim pa 'dis/ /slar yang bsam gtan rang bzhin bya/ / oM sum+b+ha ni sum+b+ha hUM/ gr-i h+Na gr-i h+Na hUM/ gr-i h+NA pa ya gr-i h+NA pa ya hUM/ A na ya ho b+ha ga wAn bid+yA rA dza hUM phaT/ khro bo'i gzugs can 'di yis ni/ /de ltar log 'dren kun bkug ste/ /blo dang ldan pas sbyor ba yis/ /cho ga bzhin du phur bus gdab/ /rdo rje bdud rtsi rgyal po che/ /ut+pal sngon po'i 'dab ltar sngo/ /'bar ba'i phreng bas 'khrigs 'od can/ /rdo rje phur bu rnam par bsgom/ /lte ba'i phyogs nas smad kyi cha/ /rtse mo'i rnam par rab tu bsgom/ /stong ni khro bo'i rnam pa dang / /zhal gsum rnam pa phyag drug tu'o/ /gnod mdzes gzugs 'dzin rdo rje can/ / gcig gis rdo rje tho ba ste/ /g.yon pas phur pa 'dzin byed cing / /gsang sngags 'di yis phur bus gdab/ /oM g+ha g+ha g+hA ta ya g+hA ta ya/ sarba duSh+TAn phaT phaT/ kI la kI la ya sarba pA paM phaT phaT/ hUM hUM hUM badzra kI la ya/ badzra d+ha ro Adz+nyA pa ya ti/ sarba big+h+nan/ kA ya wA ka tsit+ta badzra kI la ya hUM hUM hUM phaT phaT/ de ltar rtogs pa'i rnal 'byor gyis/ /bgegs rnams bsal nas sngags rig pas/ /bde mchog dpal gsungs cho ga yis/ /slar yang bgegs rnams sbyang bar bya/ /rgyal ba rnams kyis rnam par sbyong mdzad pa/ /sems can phyir yin las sbyang bya phyir min/ /'di na bgegs yod ma yin bdud rnams sam/ /rtog pas 'phel med byin rlabs 'grub med nyid/ /bdag bdud nyid dam brtan pa nyid mi 'gro/ /brtan pa nyid phyir rjes su bstan mi bya/ /rang bdes bsgrub kyi sdug bsngal gyis min gang / /byang chub mchog rab myur phyir brtan par bya/ /bgegs nye bar zhi ba'i cho ga'o// //de nas legs par mnyam gzhag pa'i/ /slob dpon bla ma thabs cig pa/ /blo dang ldan pas rim pa 'dis/ /thod le kor gyis thig gdab bya/ /slob dpon chu lha'i phyogs gnas dang / /slob ma mngon du phyogs gyur pa/ /dbang po'i phyogs na gnas pa yis/ /tshangs pa'i thig ni gdab par bya/ /sngags rig gshin rje'i phyogs gnas pa/ /slob ma lus ngan phyogs gnas dang / /lhan cig tshangs pa'i thig gnyis pa/ /yang dag par ni gdab par bya/ /slob dpon me lhar gnas pa dang / /slob ma mngon du phyogs gyur pa/ /dbang ldan du ni gnas nyid kyis/ /rtsa ba'i thig ni gdab par bya/ /de nyid du gnas rdo rje can/ /thig shes pa la mkhas pa dang / /bden bral la gnas bu yis ni/ /lho phyogs kyi ni thig gdab bya/ /de nyid du gnas slob ma dang / /rlung lhar gnas pa'i slob ma yis/ /bden bral rlung lha la gnas pa'i/ /thig ni gsum pa gdab par bya/ /de nyid du gnas [(]rnam [,]rnal [)]'byor pa/ /las shes pa dang zhi phyogs su/ /gnas pa'i bu yis phyi nas ni/ /rtsa thig bzhi pa gdab par bya/ /me lhar gnas pa'i slob dpon ni/ /rang gi lha yi sbyor ldan dang / /rlung lhar gnas pa'i sngags pa yis/ /mtshams kyi thig kyang gdab par bya/ /bla ma dbang ldan phyogs su ni/ /gnas nas slob ma bden bral du/ /gnas pa yis ni mtshams kyi thig /gnyis pa yang dag gdab par bya/ /sgyu ma'i lus ni dran bzhin du/ /de nas sgo ni rnam par dbye/ /sgo ni 'khor lo'i brgyad cha ste/ /lha yi snam bu de bzhin no/ /sgo khyud sgo yi tshad du ste/ /de bzhin 'gram dang ngos kyang ngo / /de yi phyed du kha khyer ro/ /kha khyer phyed du tshon gyi sa/ /rtsa ba'i thig gi phyed kyis ni/ nang gi dkyil 'khor tshad yin te/ /'od zer lnga yis rnam brgyan cing / /rdo rje phreng bas 'bar bar bya/ /nang gi dkyil 'khor phyi rol du/ /thig bzhi yang dag bri bar bya/ /nang du ka ba brgyad po ni/ /'khor los mtshan cing legs mdzes bri/ /rdo rje ka ba'i bar dang bar/ /de nyid du ni re'u mig dgu/ /dra ba kha khyer tshad du 'gyur/ /rin chen pha gu de phyed du/ /'bab li dang ni mda' yab dang / /phyi rol ka ba'i sa de bzhin/ /bum pa ka ba'i steng gnas pa/ /rta babs sgo yi sum 'gyur te/ /mda' yab dang ni bya 'dab dang / /ldan zhing dril bu nges par 'khrol/ /ba dan dag dang rnga yab dang / /me tog chun 'phyang sogs mdzes pa'o/ /dkyil 'khor gyi ni zur bzhi po/ /zla phyed nor bu rdo rje 'dzin/ /sgo khyud kyi ni mtshams rnams su/ /rdo rje rin chen rnams kyis spras/ /rta babs rdo rje'i rtse mo can/ /de yi phyi rol khor yug ste/ /rdo rje'i phreng ba 'od zer rgyas/ /thig btab pa las grub 'gyur ba'o/ /gzhan rnams 'khor lo'i rjes mthun par/ /ji ltar mdzes par rab tu brtag /sngags pas slob ma'i nus pa dang / /rjes su bstun nas dkyil 'khor de/ /khru gang pa nas brtsams byas nas/ /khru stong bar du bri bar bya/ /thod le kor gyis thig gdab pa'i cho ga'o// //bgegs rnams phur pas btab byas te/ /de nas ra ba dra ba sogs/ /bsams nas rdo rje'i rang bzhin sa/ /thig btab lhag par gnas par bya/ /skyob pa sangs rgyas thams cad kyis/ / skyod pa'i tshul gyi khyad par dang / /sa dang pha rol phyin rnams la/ /lha mo khyod ni dpang du 'gyur/ /skyob pa shAkya seng ge yis/ /ji ltar bdud kyi dpung bcom ltar/ /de bzhin bdag gis bdud kyi dpung / /pham par byas te dkyil 'khor bri/ /dri zhim sogs kyis sa byugs te/ / me tog sna tshogs kyis bkram nas/ /tsan+dan sogs kyis lha gnas su/ /mkhas pas maN+Dal rab tu bya/ /gser gyi'am yang na dngul gyi'am/ /zangs sam sa yi rang bzhin nyid/ /ji ltar rnyed pa bzung nas ni/ /brtul zhugs can gyis bum pa gzhag /byi ru dngul dang gser dang ni/ /pad+ma rA ga mu tig ste/ /rin chen shis pa lnga po rnams/ /bum pa'i chu yi nang du gzhug/ /nas dang gro dang mo sran gre'u/ /til dang de bzhin mon sran sde'u/ /'bru ni shis pa lnga po rnams/ /bum pa'i nang du gzhug par bya/ /chen po tsher ma'i dgra dang ni/ /lhar bcas gzhan gyis mi thub dang / /daN+Do ta ut+pal rtsa ba ste/ /sman lnga po ni gzhug par bya/ /a mra u dum+WA ra dang / /mya ngan 'tshang dang a shwa ka /de bzhin klu shing skyes yal ga /bum pa'i kha mdzes lnga gzugs so/ /gos ni dkar po chen po yis/ /bum pa'i mgrin pa bcing bar bya/ /gos kyi steng du srad bu dag / dkar po cho ga mkhas pas dgod/ /mkhas pas gur kum la sogs pa/ /mngon 'dus byas pas dkyil 'khor pa/ /kun gyis bon nam mtshan ma/ /bum pa'i ngos la nges par bri/ /rin po che la sogs ldan zhing / /rang gi sngags kyis mngon bsngags pa/ /chu bcas 'di rnams blo ldan gyis/ /lha yi grangs kyis gzhag par bya/ /dkyil 'khor gyi ni grwa bzhi dang / /'khor yug gi ni nang dag tu/ /blo dang ldan pas bum pa gzhag /gcig ni sgo la gzhag par bya/ /sa'i lha mo dang bum pa lhag par gnas pa'i cho ga'o// //phyi nas gos dmar 'dzin cing rgyan/ /thams cad kyis ni brgyan gyur cing / /dril bu dang bcas bla ma yis/ /bsnyems bcas rdo rje gsor byas te/ /bar snang la gnas sangs rgyas dang / /dkyil 'khor pa rnams go rims bzhin/ /bltas nas mig rgyas 'gyur ba yis/ /tshig 'di dag ni gsal bar brjod/ /deng du bdag tshe 'bras bur bcas/ /bdag gi gson pa 'bras bur bcas/ /bdag ni dam tshig lha rnams dang / /mnyam par gyur pa the tshom med/ /byang chub sems dpa' sems gcig pa/ /bdag ni phyir mi ldog par 'gyur/ /bdag deng de bzhin gshegs pa yi/ /ris su skye bar gdon mi za/ /sangs rgyas thams cad spyan drangs pas/ /deng du bdag gi nyi ma mchog /deng bdag mchod sbyin bla na med/ /deng du bdag gi 'dus pa mchog /de nas sangs rgyas de dag la/ /btud de mchod yon phul nas ni/ /blo dang ldan pas phyi nang gi/ / mchod pas mchod de 'di skad brjod/ /ma lus phyogs na bzhugs pa yi/ /sangs rgyas rnams ni bdag la dgongs/ /rdo rje can bdag che ge mo/ /zhes ni bgyi ba'i dkyil 'khor 'dri/ /sangs rgyas kun deng gshegs su gsol/ /dngos grub 'di ni stsal du gsol/ /dkyil 'khor chen po'i las la ni/ /ci nus bzhin du rab tu bgyi/ /de nas bsnyems bcas langs nas ni/ /rdzogs rims rnal 'byor dang ldan pa'i/ /brtul zhugs can gyis 'gro byed cing / /dril bu dkrol bzhin 'di skad brjod/ /bdag ni rang nyid rdo rje can/ /rdo rje sems dpa' bdag rang nyid/ /bdag ni sangs rgyas rgyal po che/ /bdag ni rnal 'byor dbang phyug rgyal/ /bdag ni phyag na rdo rje brtan/ /bdag ni bdag po rdo rje che/ /deng bdag rdo rje sems dpar grub/ /de nas sangs rgyas sangs rgyas lnga'i/ /rigs 'byung rnams la gsol ba gdab/ /de dag bar snang gnas bsams nas/ /'di skad brjod cing bskul bar bya/ /thugs rje yi ni bdag can bdag /slob ma rnams la rjes brtse dang / /khyed cag la yang mchod slad du/ /sang ni dkyil 'khor bri bar 'tshal/ /bcom ldan gus pas bdag la ni/ /de'i phyir bka' drin mdzad par 'os/ /rdo rje can bdag che ge mo/ /zhes bgyi'i dkyil 'khor mdzes pa ni/ /che ge ci nus yo byad kyis/ /sang ni yang dag 'dri bar 'gyur/ /de phyir slob mar bcas bdag la/ /rjes su brtse bas nyer bzung nas/ /'khor bcas kun gyis dkyil 'khor la/ /byin gyis brlab par mdzad par 'os/ /'gro ba 'don pa'i bsam ldan pas/ /'khor los sgyur ba'i sgeg pa yis/ /bsgrubs nas gdul bar bya ba rnams/ /shar sgor lhag par gnas par bya/ /de nas 'khor lo can mchod nas/ /bla ma byang chub gsol ba la/ / slob mas me tog thal mo ni/ /snying gar sbyar byas gsol ba gdab/ /slob dpon khyod ni dgongs su gsol/ /dga' chen khyod bdag ston pa ste/ /byang chub chen po'i tshul brtan pa/ /mgon po chen po bdag 'tshal lo/ /dam tshig de nyid bdag la gsol/ /byang chub sems kyang bdag la gsol/ /sangs rgyas chos dang dge 'dun te/ /skyabs gsum bdag la stsal du gsol/ /thar pa chen po'i grong mchog tu/ /mgon pos bdag ni 'jug tu gsol/ /sangs rgyas dang byang chub sems dpa' thams cad bdag la dgongs su gsol/ bdag che ge mo zhes bgyi ba dus 'di nas bzung ste/ ji srid byang chub kyi snying po la mchis kyi bar du/ byang chub sems ni bla na med/ /dam pa bdag gis bskyed par bgyi/ /deng nas bzung ste sdom pa ni/ /sangs rgyas rnal 'byor 'byung ba gzung / /rdo rje rigs mchog chen po la/ /rdo rje dril bu phyag rgya yang / /yang dag nyid du gzung bar bgyi/ /slob dpon dag kyang gzung bar bgyi/ /rin chen rigs mchog chen po yi/ /dam tshig yid du 'ong ba la/ /nyi ma re re lan drug tu/ /sbyin pa rnam bzhi rab tu sbyin/ /pad+ma'i rigs chen dag pa ni/ /byang chub chen po 'byung ba la/ /phyi dang gsang ba theg gsum pa/ /dam pa'i chos ni gzung bar bgyi/ /las kyi rigs mchog chen po la/ /sdom pa thams cad ldan par ni/ /yang dag nyid du gzung bar bgyi/ /mchod pa'i las kyang ci nus bgyi/ /byang chub sems ni bla med pa/ /dam pa bskyed par bgyis nas ni/ /sems can kun gyi don gyi phyir/ /sdom pa ma lus gzung bar bgyi/ /ma rgal ba rnams bsgral bar bgyi/ /ma grol ba rnams bdag gis dgrol/ /dbugs ma phyin rnams dbugs dbyung zhing / /mya ngan 'das la dgod par bgyi/ /slob ma dang ni bla ma yis/ /dang por lan gsum brjod nas ni/ /de nas gsang sngags rig pa yin/ /so shing la sogs sbyin par bya/ /srid du sor ni bcu gnyis pa/ /'o ma'i shing las byung zhing sar/ /ma gas rtse mor me tog bcas/ /gsang sngags 'di yis 'cha' ru gzhug /oM badzra hA sa haH/ shar dang byang gi phyogs gnas nas/ /bcas te de ni 'dor du gzhug /de nas bla mas phyogs kyi ni/ /rnam dbyes zhi sogs bstan par bya/ /de nas kun sha rtsar bcas shing / /skyon spangs pa rnams blangs nas ni/ /stan dang sngas phyir slob ma la/ /sngags 'di yis ni steng du gzhug / oM badzra tI k+Sh+Na baM/ bu mos skud pa sum bsgril ba/ /mdud gsum mngon par legs bsngags pa'i/ /gsang sngags 'di yis rang nyid kyis/ /dpung pa g.yas la bcing bar bya/ /oM bud+d+ha mai tri rak+Sha rak+Sha sarban swA hA/ de nas bla mas de'i snying ga / lkog ma spyi bo rim bzhin du/ /rdo rje de bzhin pad 'khor lo/ /yi ge gsum gyis sprul pa bsam/ /slar yang dri chu yig gsum gyis/ /bzlas shing legs par 'dus byas pa/ /de nyid rig pas gsang sngags 'dis/ /sdig pa sbyang phyir 'thung du gzhug / oM shud+d+ha d+ha rmA sarba pA paM na a s+ya bi sho d+ha ya sarbA bi kalbAn a pa na ya hUM/ de nas slob ma de nyid ni/ /de nyid rtogs la de nyid don/ /dran bya'i phyir dang rnam g.yengs pa/ /zhi bar bya phyir dam chos bstan/ /sangs rgyas rnams kyis chos bstan pa/ /bden pa gnyis la yang dag brten/ / 'jig rten kun rdzob bden pa dang / /dam pa'i don gyi bden pa'o/ /zab mo nyid ni rnam mi rtog /rgya che sangs rgyas rnams kyi sku/ /zab dang rgya che zhes grags pa/ /bden pa gnyis zhes bya bar bshad/ /kun rdzob dang ni dam pa'i don/ /rnam dbye so sor shes nas ni/ /phyi nas slar yang bsreg bya ste/ /go 'phang zad pa med par bsgom/ /de yis kun du kun las kun/ /rnam kun kun tshe rang nyid ni/ /sangs rgyas thams cad rang bzhin du/ /grub par rang nyid kyis mthong 'gyur/ /byang chub sus kyang byin ma yin/ /su yis kyang ni bzung ma yin/ /rang chos yongs su shes pa las/ /de la sangs rgyas sangs rgyas brjod/ /sems can bag la nyal byed pa/ /yang dag mgon pos de nyid ni/ /'bad pas sbas nas phung po ni/ /rin chen za ma tog tu bzhag /de phyir bla ma'i zhabs kyi ni/ /drin gyis 'bad pas rtogs byas te/ /de nyid kyis yid gsal gyur pas/ /de nas spyod pa rab tu bya/ /'di na gtsang sbra nges sdom med/ /dka' thub med cing dka' spyad med/ /dka' spyad med cing nges med la/ /bde ba bsten pas 'grub par 'gyur/ /dkyil 'khor dam pa mthong nas ni/ /bskal pa bye ba mtha' yas su/ /sngon chad sdig pa gang byas pa/ /de dag thams cad zad par 'gyur/ /de skad yang dag bstan byas nas/ /ku sha bting bar nyal du gzhug /mtshan mo mthong ba gang de kun/ /bdag la smros shig ces bstan bya/ /nang par dge mi dge thos nas/ /dge ba slar yang spel bar bya/ /mi dge dge ni rmi lam bdag /med pa'i gtam gyis rnam par sbyang / /slob ma lhag par gnas pa'i cho ga'o// //lus dang ngag sems goms pa yi/ /shes rab can gyis thig skud ni/ /sar pa legs par bsgril gyur pa/ /tshad legs mdzes pas thig gdab bya/ /zhes bya ba ni bstan pa'i tshig go/ /mdo 'di'i bshad pa rgyas par brjod par bya ste/ thig skud dkyil 'khor gnyis 'gyur te/ /sbom min de bzhin phra ba min/ /ji lta ji ltar sangs rgyas lnga'i/ /bdag can mdog lngas kha bsgyur ba/ /sa bon de des bzlas gyur pa/ /snod ni gtsang mar gzhag par bya/ /sngags pa mi bskyod spyor ldan pas/ /rtag pa'i rnal 'byor pa la sbyin/ /sa bon lnga yis bzlas pa de/ /slob mas blangs nas 'gro bar bya/ /hUM oM swA AHhA sa bon lnga yis bkug nas ni/ /thig shes bla mas thig rnams ni/ /zer lnga'i bdag nyid can bsgoms nas/ /sngags dang ldan pas bsgril bar bya/ /oM dI dr-iSh+Ti aM ku sha dzaH/ oM a n+yo n+yA nu ga taH sarba d+harmAHpa raspa ra a nu pra biSh+TaH sarba d+harmA oM AHhUM/ bsgril ba zin nas thig skud ni/ /gtsang ma'i snod du bzhag pa la/ /dri dang me tog sogs mchod nas/ /yi ge gsum gyis mngon par bsngags/ /de nas langs te rnal 'byor pa/ /'khor los sgyur sgeg ldan slob mar/ /bcas pas 'khor lo mchod pa'i mthar/ /slar yang mkha' la thig gdab bya/ /slob dpon rang rnal 'byor can dzaH/ /yig las nyi zla'i mig can gyur/ /dzaHyig las gsum brjod nas ni/ /lte gnas thig skud drangs byas te/ /khu tshur g.yon pas gzung byas nas/ /sngags 'dis slar bzhin changs skud sogs/ /de ni rim bzhin mkha' la gdab/ / oM badzra sa ma ya sU traM mA ti kra ma hUM/ hUM oM swA AHhA/ drangs nas sngags pa cho ga shes pas ni/ /slob bcas rdo rje'i 'gros kyis 'gros dal ba/ /byas pas mkhar gnas thig ni ji lta ba/ /de bzhin sa la gnas pa gdab par bya/ /zur bzhi pa la sgo bzhi pa/ /rta babs bzhis ni brgyan gyur pa/ /thig bzhi dang ni yang dag ldan/ /ka ba brgyad kyis nyer mdzes shing / /dra ba dra ba phyed pas spras/ /rdo rje nor bu zla phyed can/ /sgo khyud kyi ni mtshams rnams su/ /rdo rje rin chen rnams kyis spras/ /ka bum rdo rje chen po can/ / mda' yab la gnas bya dang ldan/ /dril bu ba dan gyis mdzes la/ /rnga yab sogs kyis rnam brgyan pa'o/ /nam mkha' la thig gdab pa'i cho ga'o// //de nas tshon rtsi kha dog lnga/ /legs par 'dus byas blangs nas ni/ /dzaHyig las ni rdo rje yi/ /lta bas de rjes sbar bar bya/ /rtag pa la sogs so sor ni/ /rim bzhin dkar la sogs mdog can/ /phyag rgya bzhi dang ldan pa rnams/ /bltas nas rang yig gis bsngags te/ /cho ga shes pas gsang sngags ni/ /'di yis slar yang mngon bsngags nas/ /dri dang me tog sogs mchod do/ /snod ni sar par gzhag par bya/ /oM badzra tsi tra sa ma ya hUM/ tshon sna lnga'i cho ga'o// //de nas nang par dus su ni/ /rang gi lha yi sbyor ldan dang / /rdo rje can gyis dbang ldan phyogs/ /brtsams nas khu tshur g.yon pa yis/ /ri mo sgo yi nyi shu'i cha/ /dkar dang de bzhin ser dang dmar/ /ljang dang de bzhin sngon po ni/ /snyoms par yang dag dgye bar bya/ /shar phyogs re'u mig dkar po ste/ /lho ni ser po ru 'gyur ro/ /nub ni dmar por rig par bya/ /byang ni ljang gur 'gyur ba ste/ /dbus kyi re'u mig gang yin te/ /an+da rnyil mtshungs 'od can 'gyur/ /rnam dag blo yis byang chub tu/ /sems bskyed nas ni thams cad bya/ /sgo dang mda' yab la sogs pa'i/ /thod le kor gyi thig bshad pa/ /kun ni tshon 'gyed rim pa yis/ /sna tshogs tshon gyis dgye bar bya/ /phras pa yis ni mu ge byed/ /de bzhin chad pas tshe zad pa'o/ /yon pos yul nas 'byung ba ste/ /shin tu sbom pas de bzhin no/ /de nyid bsam min sbyor ldan la/ /tshon rtsi 'gyed pa'i sbyor gang dag /de nyid bzang bsam spyor ldan la/ /nam yang bgegs byed nus ma yin/ /dkyil 'khor yang dag ji bzhin du/ /rab tu brtag par su yis nus/ /rang lhag lha yi rnal 'byor gyis/ /dkyil 'khor brtags pas 'grub par 'gyur/ /tshon 'gyed pa'i cho ga'o// //rang lhag lha yi sbyor ba yis/ /rdul tshon bya ba rdzogs nas ni/ /de nas cho ga mthong ba yis/ /las kyi phyag rgya dgod par bya/ /de yi dbus su rdo rje ni/ /an+da rnyil mtshungs 'od can bri/ /shar du 'khor lo chen po ni/ /rdo rje 'bar bas brgyan pa'o/ /lho ru rin chen chen po ni/ /me stag 'thibs pa 'khrugs pa'o/ /nub tu pad+ma chen po ni/ /pad+ma rA ga mtshungs 'od can/ /byang du ral gri chen po ni/ /'od zer 'bar mtshungs gsal ba'o/ /shar gyi grwa ru mig sprin gyis/ /dbus dang mtshungs pa'i 'od can bri/ /lho yi grwa ru rdo rje ni/ /mA ma kI'i rigs byung ba'o/ /nub kyi grwa ru pad+ma ni/ /kha bye sdong bur bcas pa bri/ /byang gi grwa ru ut+pa la/ / sprin sngon lta bur mdzes pa bri/ /phyi rol gyi ni mtshams bzhi ru/ /blo dang ldan pas rim gyis ni/ /me long de bzhin pi wang dang / /dri yi dung phor ro snod dgod/ /shar gyi snam bur klu shing gi /me tog dang ni 'khor lo dgod/ /brtul zhugs can gyis lhor rin chen/ /de bzhin rin chen ser po dgod/ /phyi nas nub tu pad+ma dang / /de bzhin pad+ma dmar po dgod/ /byang du mkhas pas ral gri dang / /ral gri sngo bsangs dgod par bya/ /shar gyi sgo ru tho ba ni/ /'bar ba 'od bzang bri bar bya/ /lho ru dbyug pa rdo rje ni/ /'bar ba 'od bzang bri bar bya/ /nub tu pad+ma ral gri ni/ /'bar ba'i 'od kyi 'byung gnas bri/ /byang du rdo rje 'khyil pa ni/ /rdo rje can gyi rdo rje bri/ /me yi mtshams su ral gri bri/ /bden bral du ni zhags pa bri/ /rlung du ral gri bri bar bya/ /dbang ldan du ni ral gri bri/ /steng du gtsug tor mtshan ma ni/ /bris nas 'og tu zhags pa bri/ /thugs kyi dkyil 'khor dam pa ni/ /yongs su gsal bar shes par bya/ /lus dang ngag dang sems dag gi/ /mchod pas 'bad de mchod par bya/ /bu mo mdangs 'od legs chags pa/ /lo ni bcu drug lon rnyed nas/ /dri dang me tog dkris byas te/ /de dbus su ni 'dod pa bya/ /shes rab can gyis mA ma kI/ /yon tan ska rags can de byin/ /brlabs nas sangs rgyas gnas zhi mkha'i/ /dbyings ni rgyan pa dbyung bar bya/ /mi bskyod la sogs de bzhin gshegs/ /byang chub sems las bsgrubs pa ni/ /thugs rje'i bdag gis sdang rmongs sogs/ /spyod pa'i sems can gzigs nas ni/ /sangs rgyas rdzu 'phrul ska rags can/ /mdzad de chos 'khor rab bskor nas/ /ting nge 'dzin des de dag gi /zhe sdang la sogs yongs sbyangs te/ /mchog tu dga' ba'i sku mnga' rnams/ /rang rang bzhin du gshegs nas ni/ /slar yang byon par bzhed pa rnams/ /ji ltar bzhed pa bzhin du bzhugs/ /de nas rang bzhin shes rnal 'byor/ /pa yis slob ma dbang bskur phyir/ /gus pas rgyal ba de dag kun/ /slar byon ched du bskul bar bya/ /lha yi thugs kar ye shes kyi/ /rdo rje phra mo bsgoms byas nas/ /slar yang de yi thugs kar ni/ /ting 'dzin zhes bya rnam par bsgom/ /bdag nyid sems dpa' gsum las byung / /'od zer lcags kyu'i rnam pa yis/ /sems dpa' gsum po bkug nas ni/ /rim pa bzhin du lha rnams la'o/ /de ltar thugs ni bskul byas nas/ /de bzhin gshegs rnams drang byas te/ /thams cad mkha' la gnas byas nas/ /tshigs bcad 'dis ni gsol pa gdab/ /khams kyi snying po gcig pu ma rungs bdud/ /rab tu bcom zhing 'gro ba ma lus pa'i/ /rang bzhin mngon sum mdzad pa rang bzhin ni/ /'gro ba mtha' yas rang bzhin kun gshegs shig /de nas se gol rdo rje yis/ /phyag rgya chen po'i rang bzhin rnams/ /gsang sngags 'di yis bkug nas ni/ /oM badzra sa ma ya dzaHdzaHdzaHdzaHdam tshig lcags kyus bskul gyur pa'i/ /sangs rgyas thams cad byon nas ni/ /sems can dbang rnams bskur slad du/ /dkyil 'khor 'di la bzhugs par gyur/ /de nas rnal 'byor dbang dga' bas/ /dngos su sangs rgyas rnams mthong nas/ /rgyas btab mchod yon gyis mchod de/ /dril bur bcas pas bstod par bya/ /mi bskyod rdo rje ye shes che/ /rdo rje dbyings te mkha' chen po/ /rdo rje gsum mchog dkyil 'khor gsum/ /gsang ba sgrogs khyod la phyag 'tshal/ /rnam par snang mdzad dag pa che/ /rdo rje zhi ba dgyes chen po/ /rdo rje rang bzhin gyis 'od gsal/ / chos ston khyod la phyag 'tshal lo/ /rin chen rgyal po rab tu zab/ /nam mkha' rdo rje mkha' dri med/ /rang bzhin gyis dag gos pa med/ /gsang ba gsum la phyag 'tshal lo/ /rdo rje mi 'chi rgyal po che/ /mi rtog nam mkha' rdo rje 'dzin/ /'dod chags pha rol phyin pa brnyes/ /gsang ba gsum khyod la phyag 'tshal/ /don yod rdo rje rdzogs sangs rgyas/ /re ba thams cad yongs skong mdzad/ /rang bzhin dag pa las byung ba/ /rdo rje sems dpa' khyod phyag 'tshal/ /gang zhig bstod pa'i rgyal po 'dis/ /de bzhin gshegs rnams la bstod pa/ /de la sangs rgyas rdo rje sems/ /rang nyid grogs por nye bar gnas/ /de nas rnal 'byor pa yis ni/ /'dod yon lnga yis mnyes par bya/ /nang gi sbyin sreg byas nas ni/ /'di skad brjod cing gtor ma gtang / /oM da sha di ka bya ba s+thi te b+h+yaHtsa de ba nAg yak+Sha gan+d+harba a su ra ga ru Da kin+na ra ma ho rA geg b+hU ta pra tre pi shA tsa un+mA n+da a pasmA ra ostA rA ka a ti b+h+yo ba liM ta pa yA mi gr-i hI to su kha sau ma na t+ya la bi no b+ha ban s+thA naM tsa ni rU pa tra baM kurban+tu sarba bud+d+ha a d+hi Sh+ThA ne na/ oM AHhUM i daM a mr-i ta piN+DaM b+hu k+t+wa ma ma sa pa ri bA ra s+ya shI n+taM kurban+tu swa sti swA hA/ spyan drang ba'i cho ga'o/ / //de nas mig phye gsal ba yi/ /rnal 'byor dbang gis langs nas ni/ /bskor ba byas nas 'khor lo yi/ /sgo ni dbye ba brtsam par bya/ /nub phyogs kyi ni sgor gnas te/ /g.yon brkyang stabs kyis rol bzhin du/ /zlos shing rdo rje hUM mdzad kyi/ /phyag rgyas shar sgo dbye bar bya/ /oM badzra ud+g+ha TA ya sa ma ya pra be sha ya hUM/ de bzhin byang gi phyogs gnas shing / /khro bo'i lta bas de bzhin du/ /zlos shing lho sgo phye nas ni/ /sngar gyi phyag rgya dgrol bar bya/ /shar gyi phyogs gnas rnal 'byor pa/ /de bzhin nub tu mngon phyogs pas/ /chu lha'i sgo ni phye byas nas/ /khro bo'i phyag rgya dgrol bar bya/ /de bzhin lho phyogs su gnas shing / /byang phyogs la ni sngar bzhin pas/ /nor byin gyis byin brlabs pa'i sgo/ /phye nas de bzhin gzung ba dang / /de nas slob ma gzung bya'i phyir/ /rang nyid thal mo sbyar ba yis/ /bden ba'i byin rlabs sngon 'gro bas/ /'khor lo che la gsol ba gdab/ /rang bzhin 'od gsal las byung ba'i/ /rdo rje sems dpa' bde ba che/ /gzugs brnyan dang yang 'dra ba nyid/ /dkyil 'khor yang ni de dang 'dra/ /de ltar bden pas slob ma ni/ /sems kyi dkyil 'khor la zhugs shing / /sdig dang bral rnams 'khor lo las/ /rdzu 'phrul ma lus mthong bar 'gyur/ /'di de rdo rje snying po ste/ /rdo rje ye shes sgrub byed pa/ /de bzhin gshegs kun pho brang du/ /bdag gis slob ma gzhug par bgyi/ /zhugs la de bzhin gshegs rnams kyis/ /chos kyi dbyings kyi byin rlabs dang / /dam tshig kyang ni spros pa las/ /phun sum tshogs kun stsal du gsol/ /shar gyi sgo ru bkug nas ni/ /bum pa'i chu yis yang dag par/ /byas te gdong g.yogs blangs nas ni/ /gsang sngags 'di yis de bcing bya/ /oM tsak+Shu b+han+d+ha ba ra ma na ya hUM// //oM pra be+e sha b+ha ga wAn ma hA su kha mok+Sha su raM sarba sid+d+hi su khaM pra dam+pa ra ma su kha ut+ta ma sid+d+h+ya dzaHhUM hUM hoHpra sid+d+h+ya swA hA/ de nas slob ma la dri bya/ /kye rab tu dga' la dga' khyod su/ /de nas slob mas kyang brjod bya/ /bde ba chen po bdag skal bzang / /rkang pa mnyam pas 'dug gyur cing / /thal mo sbyor ba'i slob ma la/ /tshigs su bcad pa 'di brjod cing / /slar yang sems bskyed sbyin par bya/ /dkon mchog gsum la bdag skyabs mchi/ /sdig pa thams cad so sor bshags/ /'gro ba'i dge la rjes yi rang / /sangs rgyas byang chub yid la gzung / /de nas slob ma de nyid la/ /phyag bzhi byed du gzhug par bya/ /dang po mi bskyod dbang byas nas/ /rdo rje thal mo mdzes sbyar te/ /gsang sngags 'di ni brjod bzhin du/ /lhag ba brkyang nas phyag bya'o/ oM sar+b+ba ta thA ga ta pU dza u pa s+tha nA ya At+ma mAM nit+yA ta yA mi sarba ta thA ga badzra satwa a d+hi tiSh+Tha maM/ rin chen 'byung ldan dbang bya ste/ /thal mo snying gar slar phab nas/ /sngags pas gsang sngags 'di yis bu/ /rab tu phyag ni 'tshal du gzhug /oM sar+b+ba ta thA ga ta pU dza a b+hi She ka ya At+ma nAM ni r+yA ta yA mi sarba ta thA ga ta badzra rat+na a b+hi Shiny+tsa maM/ de nas 'od dpag med pa yi/ /dbang du byas nas bla ma yis/ /slob ma dpral bar thal sbyar ba/ /gsum pa'i sngags zlos 'dud du gzhug /oM sarba ta thA ga ta pU dza pra brta nA ya At+ma nAM ni r+yA ta yA mi sarba ta thA ga ta badzra d+harmA pra brta yA maM/ de nas don yod ces bya ba'i/ /dbang byas thal mo snying ga ru/ /phab nas blo ldan gyis sngags 'dis/ /phyag 'tshal bzhi pa byed du gzhug /oM sarba ta thA ga ta pU dza karma Ne At+ma nAM ni r+yA ta yA mi sarba ta thA ga ta badzra karma ku ru me/ deng khyod de bzhin gshegs pa thams cad kyi rigs su zhugs kyis/ de'i phyir ngas khyod la rdo rje'i ye shes bskyed par bya yis ye shes gang gis de bzhin gshegs pa thams cad kyi dngos grub kyang thob par 'gyur na/ dngos grub gzhan lta smos kyang ci dgos/ khyod kyis dkyil 'khor ma mthong ba'i mdun du brjod par mi bya'o/ /khyod dam tshig nyams par gyur ta re zhes pa dang / sa ma ya s+t+waM zhes brjod nas/ sems ma rdo rje 'dzin byed cing / /me tog phreng rtser 'dzin de la/ /mna' ni dang por bsgag par bya/ /de nas phyag rgya de nyid ni/ /slob ma'i spyi bor bzhag byas te/ /slar yang rdo rje mna' yis ni/ /'di skad brjod cing bstan par bya/ /'di ni khyod kyi dam tshig gi rdo rje ste/ gal te khyod kyis 'ga' zhig la smras na spyi bo 'gas par byed do/ /slar yang bla mas slob ma yi/ /snying gar phyag rgya bkod nas ni/ /lan gsum bar du slar rdo rje/ /mna' dang sngags 'dis bskul bar bya/ /rdo rje sems dpa' nyid rang deng / /khyod kyi snying la yang dag bzhugs/ /gal te tshul 'di smras gyur na/ /dral nas skad cig de la gshegs/ /de tshe rdo rje chu dung chen/ /gnas shing yig gsum 'dus byas pa/ /de blangs mna' yis 'thung du gzhug /'di ni khyod kyi dmyal ba'i chu/ /dam tshig nyams na sreg par byed/ /dam tshig bsrungs na dngos grub ster/ /bdud rtsi lnga yi chu 'thungs shig /oM badzra u da ka ThaH/ slob ma rdo rje chu 'thungs pa/ /'bad pas lag pa nas bzung ste/ /tshig gsal smra zhing 'di skad du/ /mna' sngon 'gro bas bsgrag par bya/ /deng nas gzung nas nga khyod kyi rdo rje sems dpa' yin gyi/ gang ngas 'di gyis shig ces smras pa de thams cad bya dgos so/ /khyod kyis nga la brnyas par ma byed cig / khyod ya nga ba ma spangs par 'chi ba'i dus byas nas dmyal bar thong bar gyur ta re/ /de nas slob ma mnyam gzhag pas/ /dngos grub thams cad rab bsgrub cing / /rang la dbab phyir slob dpon gyis/ /gsungs pa'i tshig ni rjes su bzla/ /de bzhin gshegs pa thams cad kyis kyang byin gyis rlobs shig / rdo rje sems dpa' dbab par mdzad du gsol/ /spyi bo nas ni rkang pa'i bar/ /lus can khong stong du bsams nas/ /de yi 'og tu rlung dang ni/ /bcas pa me yi dkyil 'khor bsgom/ /de yi steng du yi ge d+hi/ /kha dog dmar po rnam par bsgom/ /de byung 'od zer tshogs kyis ni/ /brtul zhugs can gyis lus po sbyang / /de ltar 'od gsal bar byas nas/ /ldang bar bya phyir mkhas pa yis/ /snod kyi snying mgrin mgo bo la/ /hUM AHhAHzhes bya ba dgod/ /de bzhin gshegs pa dbab don du/ /'bebs byed phyag rgya bcas nas ni/ /snod kyi snying gar gzhag byas te/ /gsang sngags 'di ni brjod par bya/ /'di khyod dam tshig rdo rje ste/ /rdo rje sems dpa' zhes bya ba/ /'bab mdzad deng du khyod la ni/ /rdo rje'i ye shes bla med 'byung / /oM badzra A we sha yaHaHaHaH/ de lta 'ang gal te mi 'bab na/ /gsang sngags brtan po 'di brjod cing / /de nas yi ge a zer gyis/ /ye shes chen po bskul bar bya/ /A we sha ya staM b+ha ya ra ra ra ra tsA la ya hUM ha a dz+haiM/ snying 'dar dga' ba che ba dang / /brgyal ba dang ni gar byed dang / /'gyel dang gyen du 'phar ba ni/ /babs pa'i mtshan nyid du shes bya/ /snod ni rgyas par mthong nas su/ /a yig lce la dgod par bya/ /yi ge brgya pas brtan byas te/ /sngags kyis me tog phreng ba dor/ /tiSh+Tha badzra dr-i D+ho me b+ha wa hr-i da ya me a d+hi tiSh+Tha sarba sid+d+hiM me pra ya ts+tsha hUM ha ha ha ha hoH oM a khaM wI ra hUM pra tI ts+tsha ku su ma any+dza li nA tha hoH/ rigs kyi dbye ba mkhas pa yis/ /me tog babs pa shes gyur nas/ /sngags dang bcas par byas nas mgor/ /phreng ba dgod pa sbyin par bya/ /oM pra ti gr-i h+Na satwaM i maM satwa ma hA ba la/ oM gyis mnan pa'i mig la ni/ /slob ma sdig dang bral ba la/ /brtul zhugs bzang pos sngags 'di yis/ /gdong g.yogs rab tu dgrol bar bya/ /rdo rje sems dpa' rang nyid deng / /khyod kyi mig ni 'byed par brtson/ /rdo rje'i mig ni bla med pa/ /thams cad spyan gyis 'byed par mdzad/ /de ring dad pa'i shugs kyis ni/ / dkyil 'khor 'di la blta bar gyis/ /khyod ni sangs rgyas rigs su skyes/ /gsang sngags chen pos byin gyis brlabs/ /he badzra pA sh+ya/ de nas blo dang ldan pa yis/ /dkyil 'khor rim bzhin bstan par bya/ /lha ni sum cu gnyis rnams kyi/ /rang gi ngo bo'ang bstan par bya/ / 'phags pa'i bden bzhi ngos bzhir 'gyur/ /tshangs pa'i gnas ni grwa yin no/ /bsdu ba'i dngos po zhes bya sgo/ /bzhi yi ming can re re ste/ /dad pa'i dbang po la sogs sems/ /rnam pa lnga po yang dag 'byung / /rdzu 'phrul rkang pa sgo khyud ni/ /bzhi ste de yang rnam pa bzhi/ /de yi dbus kyi 'khor lo gang / /dkyil 'khor brgyad kyis gzhal ba ni/ /rnam par thar pa brgyad yin te/ /dngos grub thams cad sgrub byed pa'o/ /'phags lam yan lag brgyad pa ni/ /ka ba brgyad ces bya bar bshad/ /sangs rgyas kun gyi khang chen du/ / thams cad tshe na ka bar 'gyur/ /chos dang de nyid don gyi brda/ /'khor lo'i nang gi dkyil 'khor ro/ /thugs kyi dkyil 'khor 'di de ni/ /thar pa chen po'i grong khyer mchog /de nas 'khor lo'i bdag po nas/ /brtsams te gnod mdzes mthar thug lha/ / ji bzhin de nyid du gnas rnams/ /rdo rje can gyis slob la bshad/ /phung po lnga yi rang bzhin du/ /sangs rgyas lnga rnams rab bstan bya/ /spyan ma la sogs lha mo bzhi/ /sa la sogs pa'i rang bzhin no/ /de bzhin 'dod yon lnga'i ngo bor/ /gzugs rdo rje la sogs pa'o/ / mig la sogs pa'i rang bzhin du/ /sa yi snying po la sogs so/ /lag sogs ngo bor khro dbang po/ /gshin rje'i dgra sogs bstan par bya/ /de nas lus 'khor la gnas pa/ /sangs rgyas mi bskyod sogs rim bzhin/ /phyi rol 'khor lo bstan nas ni/ /slob ma dbang bskur yang dag brtsam/ /slob ma gzhug pa'i cho ga'o// //chu yi dbang bskur grub bya'i phyir/ /shar gyi phyogs dang dbang ldan du/ /sngags pas dkyil 'khor khru do pa/ /gru bzhi pa la sgo bzhi pa/ /rim gnyis pa bri de nas de'i/ /dbus su sna tshogs pad+ma ni/ / tshon dkar ba dang de bzhin du/ /dmar dang nag po dag gis bya/ /ra ba gsum ni byas nas su/ /phyag rgya bzhi dag dgod par bya/ /lte bar rdo rje sprin nag dang / /mtshungs pa'i 'od can bri bar bya/ /shar du 'khor lo gshin rjer ni/ /rin chen nub tu pad+ma ni/ /ge sar bzang po nor sbyin du/ /ral gri bris nas bum pa dgod/ /khrus kyi dkyil 'khor cho ga'o/ /lha yi snyems pa 'dzin pa yi/ /slob ma phreng ba'i dbang bskur ba/ /byas te dkyil 'khor drung bkug nas/ /pad+ma'i dbus su gzhag byas te/ /slob dpon tshogs dang bcas pa yis/ /bkra shis tshigs su bcad pa ni/ /'dod cing bum pa rnams blangs la/ /rdo rje slob mas dbang bskur bya/ /til gyi gang bu ltar gang ba'i/ /rgyal ba bum pa 'dzin rnams kyis/ /de ring khyod la dbang bskur gyi/ /de ltar shes nas yid bder gyis/ /dbang bskur ba ni rdo rje che/ /khams gsum pa yis phyag byas pa/ /sangs rgyas kun gyi gsang gsum gyi/ /gnas las byung ba sbyin par bya/ /oM ma hA su kha badzra satwa a b+hi Shiny+tsA mi sarba ta thA ga ta a d+hi pa ti twe no pa dr-i D+ho me b+ha wa/ rdo rje'i rigs mchog bdag po kun gyi bdag nyid can/ /'gro ba ma lus skyed par mdzad cing bde ba che/ /'gro ba mtha' dag snying la zhugs pa'i bkra shis gang / /bkra shis de ni deng du dbang bskur mchog tshe khyod la shog /mgon po mi bskyod pa zhes bya bar mtshan 'dzin pa/ /skye tshogs zhe sdang zil gyis mnan pa spyod mdzad cing / / rdo rje rigs mtha' dag dang ldan pa'i bkra shis gang / /bkra shis de ni deng du dbang bskur mchog tshe khyod la shog /rnam par snang mdzad rtag tu srid pa'i sdug bsngal sel/ /skye tshogs gti mug gis zil mnan pa spyod mdzad cing / /gti mug rigs mtha' dag dang ldan pa'i bkra shis gang / /bkra shis de ni deng du dbang bskur mchog tshe khyod la shog /dbul ba'i sdug bsngal las ni yongs su thar lhur len/ /skye tshogs nga rgyal gyis zil mnan pa sbyang mdzad cing / /rin chen rigs mtha' dag dang ldan pa'i bkra shis gang / /bkra shis de ni deng du dbang bskur mchog tshe khyod la shog / 'jig rten dbang phyug srid pa'i gzeb ni 'joms mdzad pa/ /skye tshogs 'dod chags kyis zil mnan pa sbyong mdzad cing / /pad+ma'i rigs mtha' dag dang ldan pa'i bkra shis gang / /bkra shis de ni deng du dbang bskur mchog tshe khyod la shog / brdzun smra dga' ba rnams la brtse ba'i bdag nyid can/ /de spyor thabs gsung ba yis de dag mi slu ba/ /las kyi rigs mtha' dag dang ldan pa'i bkra shis gang / /bkra shis de ni deng du dbang bskur mchog tshe khyod la shog /rdo rje khyod deng sangs rgyas ni/ /rnams kyis dbang bskur bas dbang bskur/ /oM AHbadzra a b+hi Shiny+tsa hUM/ su ra ta s+t+waM/ chu'i dbang bskur ba'o/ /chu yi dbang bskur thob gyur cing / /khrus kyi dkyil 'khor nas byung ste/ /dkyil 'khor chen po'i ngos nas ni/ /rgyan ni rab tu blang bar bya/ / gos dmar 'dzin par gyur nas ni/ /rgyal po'i rgyan gyis brgyan gyur cing / /gdugs ni dkar po bzung gyur pa/ /glu 'dis dga' ba skye bar 'gyur/ /bde ba chen po chags chen po/ /rdo rje chen po nor po che/ /shes rab chen po bka' bo che/ /rdo rje sems bdag deng 'grub shog / sangs rgyas kun gyi 'khor lo che/ /dngos grub kun gyi bde ba stsol/ /dbang bskur thams cad don thams cad/ /rdo rje dbang bskur bla na med/ /dang po'i sangs rgyas don dam sku mngal rgyal gyur cig /'dod khar nor dang chos gsol mdzad pa rgyal gyur cig / ye shes lnga yis rab dga'i bde chen rgyal gyur cig /mgon po phyag na rdo rje bde chen rgyal gyur cig /phyi nas bla mas dkyil 'khor ni/ /'di la bskor ba lan gsum bya/ /de nas shar du de yis bskor/ /'bol stan 'jam la bzhugs pa yi/ / slob la sangs rgyas kun dbang bskur/ /bya phyir bla mas mchod pa byas/ /spyi bo'i gtsug dang dpral ba dang / /de bzhin mgo bo'i ngos gnyis dang / /rgyab tu phyag rgya bzhag nas ni/ /gsang sngags 'di dag brjod par bya/ /oM badzra d+hA twI shwa ri a b+hi Shiny+tsa hUM/ oM satwa badzre a b+hi Shiny+tsa b+h+rUM/ oM rat+na badzri a b+hi Shiny+tsa h+r+'aMH/ oM d+har+m+ma badzri a b+hi Shiny+tsa hrIH/ oM karma badzri a b+hi Shiny+tsa trAM/ dbang bskur rim pa sa sangs rgyas lnga'i/ /cod pan can la dar dpyangs dang / /byas nas mnyam par gyur pa yi/ /thal mo yis ni mnyes par bya/ /badzra tu Sh+ya ho/ /cod pan gyi dbang bskur ba'o/ /de nas rdo rje'i dbang bskur ba/ /sbyin phyir tshigs bcad 'di brjod cing / /rdo rje byin nas dril bu dang / /lhan cig rdo rje brtul zhugs sbyin/ /'di de sangs rgyas thams cad nyid/ /dngos grub mchog phyir rdo rje long / /sangs rgyas kun gyis khyod la stsol/ /rdo rje'i brtul zhugs 'grub par 'gyur/ /oM badzra a d+hi pa ti twaM a b+hi Shiny+tsA mi tiSh+tha badzra sa ma ya s+t+waM/ 'di de sangs rgyas thams cad nyid/ /rdo rje sems dpa'i phyag na gnas/ /khyod kyis kyang ni rtag tu bcang / /phyag na rdo rje'i brtul zhugs brtan/ /slob ma rdo rje snyems 'dzin cing / /lha yi snyems pa 'dzin pa yis/ /rdo rje sems dpa'i ting 'dzin gyis/ /'di ltar rdo rje gsor bar bya/ /thog mtha' med pa'i sems dpal ni/ /rdo rje sems dpa' dga' ba che/ /kun du bzang po kun bdag nyid/ /rdo rje snyems ma'i bdag po bdag /rdo rje 'dzin pas de skad du/ /brjod nas rdo rje snying gar gzhag /slar yang brtan par byed pa'i rgyu/ /gsang sngags 'di skad brjod par bya/ /oM sarba ta thA ga ta sid+d+hi badzra sa ma ya ti Sh+tha e Sha twaM d+ha ra yA mi badzra sa twa ti hi hi hi hUM/ rdo rje'i dbang ngo / /de nas bla mas bka' stsal pa/ /mdun du dril bu blangs nas su/ /tshigs su bcad pa 'di 'don cing / /rang gi lag gis 'di ltar dkrol/ /zla 'dra'i ye shes sku mnga' rgyal rnams cod pan 'dzin cing pad+ma zla ba'i gdan la bzhugs/ gdug pa rnams ni gdul bar bya phyir bsdigs shing khams gsum 'dul mdzad de nyid rdo rje can/ sangs rgyas rnams sad bya phyir sgra brnyan de bzhin nyid dang chos nyid sgrogs pa'i dril bu can/ /gang la lus pa med pa stong zhing bcom ldan dngos po kun gyi rang bzhin de ni rgyal/ /me long gi ni gzugs brnyan dang / /rmi lam sgyu ma chu bur dang / /mig 'phrul 'dra bar sus mthong ba/ /de ni mnga' bdag tu bshad do/ /de nas slar yang dku'i phyogs su/ /khyer nas gnas pa rdo rje ni/ /'dzin pa'i rol pa 'chad bzhin du/ /gsang sngags 'di ni brjod par bya/ /oM badzra sa twa sa ma ya/ ma nu pA la ya/ badzra sa twa twe no pa tiSh+Tha dr-i D+ho me b+ha wa/ su to Sh+yo me b+ha wa/ a nu rak+to me b+ha wa/ su to Sh+yo me b+ha wa sarba sid+d+hi m+me pra yats+tsha sarba karma su tsa me tsit+taM shre yaHku ru hUM/ ha ha ha ha ho/ /b+ha ga wAn sarba ta thA ga ta badzra mA me muny+tsa badzri b+ha wa ma hA sa ma ya sa twa AH/ oM badzra g+haN+Ta aHaH/ bcom ldan khyod ni gzung gyur gyis/ /bdag la byin gyis brlab tu gsol/ / rdo rje dril bu'i dbang ngo / /gser ram yang na dngul yang rung / /snod du bzhag pa'i mig sman ni/ /de yi rang bzhin can thur mas/ /de nyid shes pas sngags 'dis byug /oM badzra nai tra a pa ha ra pa Ta laM hriH/ ji ltar mig mkhan rgyal po yis/ /'jig rten gyi ni rab rib ltar/ / bu gcig khyod kyis mi shes pa'i/ /ling tog rgyal ba rnams kyis bsal/ /de nas me long yi ge as/ /mngon par bsngags pa blangs nas su/ /tshigs su bcad pa 'di brjod cing / /rdo rje slob ma la bstan bya/ /chos rnams gzugs brnyan lta bu ste/ /gsal zhing dag la rnyog pa med/ /gzung du med cing brjod du med/ /rgyu dang las las yang dag byung / /rang bzhin med cing gnas med pa'i/ /chos rnams de ltar shes nas ni/ /sems can don ni mtshungs med kyis/ /rgyal ba rnams kyi thugs las skyes/ / me long gi dbang ngo / /mchog sbyin bla mas slob ma la/ /de nas mchog sbyin gyis lung bstan/ /rang nyid de bzhin gshegs gyur nas/ /slob ma rdo rje 'dzin bdag tu'o/ /de bzhin gshegs pa thams cad dang / /thabs cig tshigs bcad 'di brjod cing / /g.yon pas chos gos 'dzin tshul te/ /g.yas pa mchog sbyin phyag rgyar ldan/ /srid pa'i ngan 'gro las bton nas/ /srid pa shin tu dag bya'i phyir/ /rdo rje sems dpa' de bzhin gshegs/ /bdag 'dis khyod lung bstan par bya/ /theg pa bde chen 'di las ni/ /khyed la slar yang 'chi ba med/ / de ring bdud rnams pham byas nas/ /grong khyer dam par rab tu zhugs/ /deng du khyod kyis sangs rgyas nyid/ /thob 'gyur 'di la the tshom med/ /gsang sngags rig pas sngags 'di yis/ /slob ma rdo rje'i ming gi dbang / /slar yang de bzhin gshegs rnams kyis/ /gsung gcig gis ni sbyin par bya/ /oM badzra satwa twAM a b+hi Shiny+tsA mi badzra nA ma a b+hi She ka taH/ shrI a nu rak+to badzra ta thA ga ta sa ma ya sid+d+hi sa ma ya s+t+waM b+hur b+hu ba swaHaH/ ming gi dbang ngo / /tshigs su bcad pa 'di brjod cing / /'khor lo de bzhin rin chen dang / /pad+ma dang ni rdo rje yi/ /phyag mtshan dbang bskur sbyin par bya/ /sems can kun la phan don pa/ /'jig rten kun du thams cad nas/ /gdul bya ji bzhin chos kyi ni/ /'khor lo sna tshogs bskor bar gyis/ /oM badzra rat+na sarba d+harmA ba shud+d+ha dz+nyA na a b+hi She ka pra pa ta oM oM oM/ sems can kun la phan don du/ /'jig rten kun du thams cad nas/ /gdul bya ji bzhin 'dod chags ni/ /spyod pa sna tshogs bstan par gyis/ /oM badzra d+harmAHsarba d+har+m+mA bi shud+d+ha dz+nyA na rA ga pad+ma da la swa b+hA b+hA wa hriHAH/ sems can kun la phan don du/ /'jig rten kun du thams cad nas/ /gdul bya ji bzhin rdo rje yi/ /mchod pa sna tshogs 'jug par gyis/ /oM badzra karma sarba d+har+m+mA bi shud+d+ha dz+nyA na sarba pU dza swa b+hA wa aH/ phyag mtshan dbang bskur byin nas ni/ /bla ma dam tshig spyod shes pas/ /phyi nas sangs rgyas kun gyis ni/ /gsungs pa'i dam tshig bsgrag par bya/ /khyod kyis srog chags gsad par bya/ / brdzun gyi tshig kyang smra bar bya/ /ma byin par yang khyod kyis blang / /gzhan gyi chung ma bsten par bya/ /rdo rje dril bu phyag rgya ni/ /nam yang dor bar mi bya'o/ /slob dpon brnyas par mi bya ste/ /'di ni sangs rgyas kun dang mnyam/ /bla ma sangs rgyas kun mnyam pas/ /slob dpon la ni gang brnyas pa/ /des ni sangs rgyas kun brnyas pas/ /rtag tu sdug bsngal 'thob par 'gyur/ /de phyir sangs rgyas 'bras 'dod cing / /gus dang ldan pa'i sems can gyis/ /bsam yas 'bras bu stsol ba po/ /'di la 'bad pa kun gyis mchod/ /byang chub go 'phang sla'am ci/ /srid pa sel bar su yis nus/ /gang la skye shing 'chi ba med/ /gang zhig las gnyis la nus ldan/ /rdo rje slob dpon med par ni/ /nyon mongs thams cad spong ba dang / /mya ngan 'das zhi go 'phang dang / /phyir mi ldog pa thob mi 'gyur/ /rang gi dam tshig rtag tu bsgrub/ /rtag tu de bzhin gshegs rnams mchod/ /rtag tu bla ma la dbul bya/ /'di ni sangs rgyas kun dang mnyam/ /thabs dang shes rab ldan sems kyis/ /mi bya ba ni ci yang med/ /rtag tu rnam rtog med gyur nas/ /khyed kyis 'dod pa lnga rnams spyod/ /sangs rgyas kun gyis mthun gsungs shing / /bka' lung dam pa brtag pa yi/ /dam tshig dang ni sdom pa 'di/ /khyod kyis rtag tu bsrung bar bya/ /de ni phyag mtshan gyi dbang bskur ba'i cho ga'o// //de ltar phyag mtshan dbang bskur bas/ /nor ji bzhin du yon mchog dang / /'bring po dang ni dman pa ste/ /rnam gsum lha la dbul bar bya/ /na bza' rin chen bcas mchog dang / /'bring po nam bza' yi ni zung / /lha yi grangs kyis dbul bar bya/ /tha ma kun la zung gcig go/ /dad dang ldan pa'i cho ga ni/ /sngon 'gro gsang sngags 'dis phul nas/ /de dag yid kyis kyang bya ste/ /glu la sogs pas mngon mchod bya/ /oM a nut+ta ra sarba pU dza me g+ha sa mu dra s+pha ra Na hi oM ga ga na khaM hUM phaT swA hA/ de nas gsang ba'i mchod pa dang / /glu dang rol sogs gar dag dang / /bza' dang btung ba sna tshogs kyis/ /tshogs kyi dkyil 'khor mchod par bya/ /lha la yon 'bul ba'i cho ga'o// //de nas byang chub gsol ba yi/ /bla ma la ni yon dbul bya/ /yul dang yid 'ong chung ma dang / /rin po che dang gser 'bar dang / /nor bu mu tig byu ru dang / /lus po yang ni dbul bas so/ /de nyid mi zad par 'dod pas/ /gang gang ci yang ches yid du/ /'ong dang ches khyad 'phags pa nyid/ /de de bla ma la dbul bya/ /slob dpon la ni dam pa ste/ /'bad pa'i sgo nas mchod par 'os/ /'jig rten rjes gzung rgyu nyid kyis/ /de nyid de lta'i gzugs can no/ /gang gis bla ma rdo rje 'dzin/ /tha dad nyid du mthong gyur pa/ /de yis de nyid dngos grub ni/ /tshogs pa'i mtshan nyid can mi 'thob/ /mchod pa thams cad yongs spangs nas/ /bla ma mchod pas yang dag 'byung / /de mnyes pas ni kun mkhyen pa'i/ /ye shes mchog de thob par 'gyur/ /gang zhig bskal pa bye ba ni/ /brgya phrag tu yang rnyed dka' ba/ /de nyid sangs rgyas brtson ldan la/ /skye ba 'di la stsol bar mdzad/ /bla ma la yon dbul ba'i cho ga'o// //de ltar yon ni blangs nas su/ /bla ma yi dam mnyes gyur pas/ /slob ma la ni rjes gnang ba/ / mchod pa kun gyis mngon mchod sbyin/ /sangs rgyas kun gyi spyan snga ru/ /bsdad nas sdig pa kun spangs pa/ /khyod la ngas deng phreng ba sogs/ /dbang bskur ba yis dbang bskur to/ /da khyod sngags dang rgyud 'dzin cing / /dkyil 'khor gyi ni slob dpon du/ /sangs rgyas byang chub sems rnams dang / /lha rnams kyis kyang yang dag bzhed/ /khyod kyis de nyid bdud rnams pham/ /khyod kyis sangs rgyas thams cad bcom/ /seng ge'i spyod pa spyod bzhin du/ /khyod kyis sems can kun don gyis/ /yang dag pa ni rnams la yang / /chos rnams kun la ser sna dang / /sems can kun la mi phan gang / /de ni bu khyod kyis mi bya/ /ji lta ji ltar lam 'di la/ /som nyi za bar mi bya'o/ /sngags kyi spyod tshul dam pa ni/ /mtshungs med khyod kyis bstan par gyis/ /dkyil 'khor bri bar byas nas ni/ /slob ma yongs su bsdu bar gyis/ / dogs pa med pa'i sems kyis ni/ /slob ma la dbang bskur bar gyis/ /'jig rten 'jig rten 'das dngos grub/ /brtul zhugs brtan par khyod kyis sgrubs/ /de nyid rtogs pa'i sems ldan pas/ /de dag thams cad 'grub par 'gyur/ /chos dbyings byin gyis brlabs pa dang / / dam tshig rnams yongs bskyang ba las/ /rtag tu bla ma gus khyod la/ /las rnams thams cad 'grub par 'gyur/ /de ltar byas pas shes pa ni/ /sangs rgyas la phan 'dogs zhes sgrogs/ /de phyir sangs rgyas kun mkhyen pas/ /khyod ni mngon par srung bar 'gyur/ /de nas slob ma lus btud cing / /snying ga'i rten la thal sbyar bas/ /bla ma la ni phyag byas te/ /de kun de bzhin no zhes brjod/ /slob ma la rjes su gnang ba sbyin pa'i cho ga'o// //lha rnams dkyil 'khor skyes pa dang / /bud med dngos pos sprul pa yi/ /ngo bo ru ni rnam par gnas/ /slar yang rang gi lus kyis ni/ /'khor lo rab tu gzhug par bya/ /gzugs sogs phung po'i ngo bo ru/ /rtag pa la sogs rab tu gzhug /sa la sogs pa'i rang bzhin du/ /spyan ma la sogs gzhug par bya/ /mig sogs sbyor ba ches rig pas/ / sa snying sogs dang thabs cig tu/ /gzugs rdo rje la sogs pa yang / /rang gi skye mched la dgod bya/ /lag sogs gshin rje mthar byed sogs bkod nas/ /de nyid ji bzhin cho ga bzhin bstan te/ /'gro ba thams cad 'khor lo'i bdag nyid du/ /mngon sum bltas nas nyer bsdu'i cho ga bya/ /nye bar bsdu ba'i cho ga'o// //mtshan mo nyer bsdu byas pa yis/ /slar yang nang par dus su ni/ /rdul tshon thams cad phyags byas te/ /mchod byas chu klung la dor bya/ /de nas g.yon brkyang zhabs gnas pas/ /gsang sngags brjod cing phyogs brgyad na/ /gnas pa'i phur bu skam pa yi/ /phyag rgya yis ni dbyung bar bya/ /oM badzra kI la ya ud kI la ya sarba big+hAM badzra d+ha ra A dz+nyA pa ya hUM hUM phaT phaT hoH/ phyung ste phyi nas de'i skud pa/ /snod kyi nang du bsang bar bya/ /de nas chu dang tsan+dan gyis/ /gsang sngags 'di yis gzhag par bya/ /oM AHhUM satwa ku ru swa sti swA hA/ /de nas sngags pas khro rgyal rnams/ /phyi dang nang gi mchod pa yis/ /mchod bya glu dang gar sogs kyis/ /gtor ma gtang bya gshegs su gsol/ /de nas dkyil 'khor sa de ni/ /ba lang lci bas byugs nas ni/ / sems can dang ni slob ma la/ /phan phyir zhi ba'i sbyin sreg bya/ /phur bu dbyung ba'i cho ga'o// //de bzhin gshegs pa kun zhi ba/ /de bzhin gshegs pa kun gyi gnas/ /chos kun bdag med pa yi mchog /dkyil 'khor dam pa bshad du gsol/ /kun du bzang po sku yi mchog/ / mtshan nyid thams cad yongs su rdzogs/ /mtshan nyid min pa thams cad spangs/ /dkyil 'khor dam pa bshad du gsol/ /kun du bzang po gsung gi mchog /zhi ba'i chos ni mchog las byung / /ye shes spyod pa rnam sbyong ba/ /dkyil 'khor dam pa bshad du gsol/ /sems can kun gyi sems chen po/ /dag cing rang bzhin dri ma med/ /kun bzang thugs mchog kha lo bsgyur/ /dkyil 'khor dam pa bshad du gsol/ /khyod zhabs pad+ma ma gtogs par/ /gtso bo gzhan la skyabs ma mchis/ /'khor ba las ni bsgral ba'i phyir/ /bdag gis dkyil 'khor bri bar bya/ /gang tshe bstod pa'i rgyal po 'dis/ /rdo rje sems bdag bla ma la/ /rdo rje slob mas gsol ba ni/ /'debs tshe dkyil 'khor bri bar bya/ /gsol ba 'debs pa'i cho ga'o// //bla ma'i drin gyis rgyud rnams mthong gyur te/ /de shes rnams dang yang dag rnam dpyad nas/ /cho ga rnam pa nyi shur rnam phye ste/ /gsal zhing mdor bsdus tshig rgyun 'dis bshad nas/ /deng du bsod nams phung po dpag tu med pa gang bsags pa/ /des ni skye tshogs rdo rje 'dzin pa mchog nyid du gyur cing / /de nyid kyis na bdag gi grags dang lhan cig klu yi ni/ /byang chub kyis byas rin chen rdo rje mchog 'di ring gnas shog / dpal gsang ba 'dus ba'i dkyil 'khor gyi cho ga nyi shu pa zhes bya ba slob dpon klu'i byang chub kyis mdzad pa rdzogs so// //bya sa'i gtsug lag khang du shud kyi ston pa dar ma rdo rjes zhus nas rgya gar gyi mkhan po paN+Di ta chen po ti la ka ka la sha zhes bya ba pha rol tu phyin pa gsang sngags kyi theg pa la sogs pa mtha' dag chub pa'i zhal snga nas dang / bod kyi sgra bsgyur gyi lo tsA ba chen po ban+de pa tshab nyi ma grags kyis bsgyur ba'o//[ ]@##/ /rgya gar skad du/ karma an+ta bi b+ha ng+ga nA ma/ bod skad du/