བོད་ཡིག

e-texts produced with BDRC’s OCR application

nam mkha'i dkyil na rin po che'i bkod pa chen po dang ldan pa'i pad+ma dag la skyil mo krung bcas te 'khod par 'gyur ro// de bzhin gshegs pa de yang nam mkha'i dkyil nyid na/ seng ge'i khri la bzhugs te/ lha dang mi de dag la chos ston to// de chos ston pa na/ phyogs bcu nas byang chub sems dpa' tshad med grangs med pa brgya stong dag chos mnyan pa'i phyir 'ong bar 'gyur ro// 'jig rten gyi khams de na sems can su yang chos la zhe 'gras pa med do// de na bdud sdig can dag dang / gzhan mu stegs can dag gi sgrar gdags pa yang med do// de bzhin gshegs pa de'i sku tshe'i tshad ni bskal pa bcur 'gyur ro/ / de'i byang chub sems dpa' ni bgrang ba las 'das par 'gyur ro// rgyal po chen po de ltar na sangs rgyas kyi zhing de'i bkod pa ni bsam gyis mi khyab bo/ / chos bstan pa yang bsam gyis mi khyab bo// zham 'bring ba 'khor byang chub sems dpa' yang bsam gyis mi khyab bo// klu'i rgyal po rgya mtsho lung bstan pa'i le'u ste brgyad pa'o// / de nas bcom ldan 'das la/ rgyal po ma skyes dgras 'di skad ces gsol to// bcom ldan 'das chos thams cad ni rgyu'i rjes su 'brang ba dang / rnam par bsgrubs na 'byung ba'i mtshan nyid lags te/ de dag ni ji lta ji ltar 'dod pa de lta de ltar rnam par 'grub pa lags so// bcom ldan 'das byang chub kyi spyod pa ni mtha' yas pa lags so// de la byang chub sems dpas ni ji srid du rnam pa thams cad kyi mchog dang ldan pa'i sangs rgyas kyi zhing yongs su ma bzung ba de srid du/ byang chub sems dpa'i spyod pa spyad par bgyi'o// bcom ldan 'das byang chub sems dpa' thams cad kyis ni/ klu'i rgyal po rgya mtsho ji lta ba de bzhin du/ sangs rgyas kyi zhing yongs su sbyang bar bgyi'o// bcom ldan 'das kyis bka' stsal pa/ rgyal po chen po khyod ji skad zer ba bzhin te/ chos thams cad ni yid la byed pa las 'byung ste/ chos thams cad byed pa med pa'i phyir/ de dag ni ji ltar 'dod pa bzhin du rnam par 'grub bo// de nas rgyal po ma skyes dgras/ klu'i rgyal po rgya mtsho la 'di skad ces smras so/ / klu'i bdag po gang khyod de bzhin gshegs pas/ 'di ltar sangs rgyas kyi zhing gi yon tan gyi rgyan bkod pa bsam gyis mi khyab par bla na med pa yang dag par rdzogs pa'i byang chub tu lung bstan pa ni/ khyod kyis rnyed pa legs par rnyed do// de skad ces smras pa dang / klu'i rgyal po rgya mtshos/ rgyal po ma skyes dgra la 'di skad ces smras so// rgyal po chen po chos gang yang lung bstan du med do/ / de ci'i phyir zhe na/ chos thams cad ni gzod ma nas rnam par dag pa'i phyir ro// rgyal pos smras pa/ klu'i bdag po sngon dge ba'i rtsa ba bskyed pa rnams kyang lung bstan tu med dam/ klu'i rgyal po rgya mtshos smras pa/ rgyal po chen po sems can du gdags pa ni/ phung po dang / khams dang / skye mched rnams su zad la/ phung po dang / khams dang / skye mched rnams ni lung bstan tu med do/ / rgyal po chen po ming dang gzugs la sems can du gdags par zad la/ ming dang gzugs ni lung bstan tu med do// rgyu dang lta ba dang / 'du shes dang / yid la byed ba la sems can du gdags par zad na/ rgyu dang lta ba dang / 'du shes dang / yid la byed pa de de la yang lung bstan tu med do// dge ba'i rtsa ba gang dag gis byang chub sems dpa' thams cad mkhyen pa nyid du yang dag par 'grub pa'i dge ba'i rtsa ba de dag kyang lung bstan tu med do/ / rgyal po chen po chos thams cad ni stong pa nyid kyi mtshan nyid yin la/ stong pa nyid ni lung bstan du med do/ / rgyal po chen po chos thams cad ni/ mtshan ma med pa dang / smon pa med pa dang / mngon par 'du byed pa med pa'i mtshan nyid yin la/ mtshan ma med pa dang / smon pa med pa dang / mngon par 'du byed pa med pa'i mtshan nyid ni lung bstan du med do// rgyal po chen po gzhan yang sangs rgyas rnams kyi snying rje chen po 'di ni bsam gyis mi khyab ste/ ming med pa dang mtshan ma med pa'i chos thams cad ming dang mtshan mas ston par mdzad la/ sangs rgyas bcom ldan 'das rnams ni/ ming dang mtshan ma'i rjes su 'brang ba'i rnam par shes pa can yang ma yin no/ / rgyal po chen po lung bstan pa 'di ni 'jig rten brda sprad par zad de/ 'di la gang lung bstan par bya ba'i ming chos gang yang / nang ngam phyi rol na mi dmigs so// rgyal pos smras pa/ klu'i bdag po bzod pa thob pa'i byang chub sems dpa' sems dpa' chen po lung bstan pa med dam/ smras pa/ rgyal po chen po bzod pa de yang skad cig pa/ zad pa'i mtshan nyid/ mi zad pa'i mtha' can/ yang dag pa'i mthar nges pa/ mnyam pa'i mtha' can/ gnyis su med pa'i mthar nges pa ste/ gnyis su med pa'i mtha' ni yang dag pa'i mtha'o// yang dag pa'i mtha' ni gtan du mi 'byung ba'i mtha'o/ / mtha' can gang yin pa de ni/ 'dod chags dang zhe sdang dang / gti mug rnams so// de'i mtha' can ni rnam par grol ba'i mtha'o// gang mtha' de'i sgor zhugs ba ni gang du yang mngon par zhen pa med do/ / gang mngon par zhen pa med pa de ni tha snyad kyis brda la chags pa med do// ma chags na grol bar 'gyur ro// grol na phyin chad mi rgyu rab tu mi rgyu'o// mi rgyu rab tu mi rgyu na/ gang du yang nyams par mi 'gyur ro// blo ma nyams na thams cad las nges par 'byung bar mthong ste/ ji ltar rnam par mi mthong ba de ltar yang mthong ngo // gang gi tshe rnam par mi mthong ba de'i tshe// gnyis su mi 'byed do// gnyis su med pa la gnas na/ mnyam pa nyid la 'jug go// mnyam pa nyid la zhugs na/ mtho bar yang mi 'gyur/ dma' bar mi 'gyur ro// mtho ba yang med/ dma' ba yang med na/ mnyam pa nyid kyi chos kyis rab tu phye ba'i bzod pa thob par 'gyur te/ de la bzod pa gang yin pa dang / lung bstan pa gang yin pa dang / gang lung bstan par bya ba dang / sus lung