བོད་ཡིག

e-texts produced with BDRC’s OCR application

rgya gar skad du// rwa rga' tradra Ta shwa' na n+ya t+ya// rgya skad// bod skad du bsgyur ba// A ka sha sUr+ya tsan dra ra tsa mu su ma ya tan tra// bod skad du// nam mkha' nyi zla'i rgyal po mu med mtha' yas kyi rgyud// bka' sems phyogs thams cad kyi thod rgal// theg pa dgu'i gong sgal// s+thi ti'i gnya' gcog yin/ bka' rgyud sde mtha' dag gi la phud rtse rgyal// rgyud thams cad kyi rgyal po// nam mkha' nyi zla'i rgyal po mu med mtha' yas// de kho na nyid ming med mtha' yas la phyag 'tshal lo// 'di skad bdag gis rtogs la bshad pa'i dus gcig na// chos nyid mu mtha' grol zhing gting mtha' yangs pa'i klong nas// ming med mtha' stongs ka dag 'od gsal ba'i lha khang na// ston pa'i rgyal po mu med mtha' yas 'di// 'khor gyi rgyal po kun byed pa la bshad// dus kyi rgyal po thog mtha' med pa'i dus// sdud pa po ni rdo rje sems dpa' 'o// de yi rjes 'jug phun sum tshogs lnga ni// snying po chos dbyings gnas ma skye med chos sku yis// mtshon med ston pas rang byung 'khor la bshad// dus gsum gcig ste snga phyi med pa'i dus// de yi gdung sob phun sum tshogs lnga ni// kun gzhi'i klong nas 'byung lnga'i ston pa yis// 'od lnga 'khor la zer lnga'i bstan pa bshad// rtsal zer 'od lnga'i klong du dngas pa'i dus// thog ma snying po'i phun sum tshogs pa'o// yan lag rtsal zer phun sum tshogs lnga ni// rang bzhin 'od lnga'i gnas na rang byung ston pa yis// rtsal lnga'i 'khor la zer mdangs bstan pa bshad// rtsal zer dang dngas snying po'i klong grol dus// gzhi rtsal dbyer med phun sum tshogs pa ni// ngang dngas snying po chos nyid rang gnas su// 'gag med 'od gsal ston pas 'khor la rang grol bstan// rtsal zer dang dngas rang grol 'khor la bshad// rang byung dang dngas snying po'i klong gyur dus// snying po rtsal zer dbyer med phun sum tshogs pa'o// zhes gsungs so// phun sum tshogs pa gsal bar bkod pa'o// nam mkha' nyi zla'i rgyal po mu med mtha' yas rgyud las// phun sum tshogs pa bstan pa'i le'u ste dang po'o// // de nas kun byed rang grol gyis// ston pa'i rgyal po ming med mtha' stongs la// pus btsugs thal sbyar gus pas 'di skad zhus// kun gyi dngos gzhi ji ltar grub// de las 'khor 'das ji ltar 'khrul// sangs rgyas sems can skyon yon gang gis byas// de nyid dbyer med ji ltar grol// 'gro drug g.yang sa gang gis bcad// snang srid chos rnams ji ltar grol// ming med mtha' bral gang gis rtogs// snying po chos sku rtogs thabs la// rtsol bsgrubs bya rtsal mi 'tshal lam// ming med mtha' yas don rtogs na// theg pa'i bye brag yod dam med// gsang sngags brda yis ji bshad// ming med mtha' yas rtogs pa la// dkyil 'khor lha bskyed mchod bstod dgos ma dgos// dngos po'i gnas lungs rtogs pa na// sdig bshags tshogs sog smon lam mi dgos sam// mu mtha' yas pa'i don rtogs na// dbang bskur dngos grub gtor ma tsha chu mi dgos sam// lha sgom spyod 'bras ma bsgrubs par// ming med mtha' yas rtogs lags sam// yang ti thod rgal theg pa ru// brgyad khri bzhi stong ji ltar rdzogs// a ti man chad theg pa las// yang ti yo ga gang gis spags// mu med mtha' yas don rtogs na// gol sa 'khrul pa yod dam med// gol bsgrib la zla ji ltar rdzogs/ gol bsgrib la zla ji ltar lags// ci yang ma byas grol ba thob lags sam// de ltar zhus tshig bco brgyad po// ston pas 'khor la bka' stsol cig/ shin tu zab par gsung du gsol// ces zhus so// nam mkha' nyi zla'i rgyal po'i rgyud las// 'khor gyis gleng bslangs dris pa'i le'u ste gnyis pa'o// // de nas kun byed rang grol gyis// ming med spyi phud ston pa la// kun gyi dngos gzhi ji ltar lags// zhes zhus pa dang // ston pas 'khor la bka' stsal pa// dngos gzhi 'di yi mtshon med kyang // mun khung sgron ma'i dpes mtshon nas// don gyi gser dang sprad de bshad// 'khor 'das kun gyi dngos gzhi ni// ngo bo ci yang grub pa med// mtshan nyid cir yang snang ba'o// dngos gzhi ka dag chen po yin// dngos gzhi gting mtha' med pa yin// dngos gzhi mtshon med brjod med yin/ dngos gzhi ming med mtha' stongs yin// dngos gzhi skye ba med pa yin// dngos gzhi ka dag chen po yin// dngos gzhi dngos med mtha' bral yin// dngos gzhi ma bcos rnal ma yin// dngos gzhi so ma zang ka yin// dngos gzhi ma byas rang 'khrungs yin// dngos gzhi mu mtha' grol ba yin// dngos gzhi kha gting med pa yin// dngos gzhi rgyu rkyen med pa yin// dngos gzhi 'pho 'gyur bya rtsal med pa yin// dngos gzhi rgyu rkyen gnyen pos mi shigs yin// dus gsum 'pho 'gyur med pa yin// skye 'gag skye 'jig med pa yin// yin min dbye bsal dgags bsgrub med pa yin// gzung 'dzin slong len med pa yin// bdag gzhan yul sems med pa yin// ma rig yul sems gnyis su med pa yin// sangs rgyas sems can gnyis su med pa yin// 'khor ba myang 'das gnyis su med pa yin// dug gsum sku gsum gnyis su med pa yin// dug lnga sku lnga gnyis su med pa yin// de dag thams cad rang bzhin kyang // dngos gzhi ming med gting mtha' yas// sems dang chos med zad par bskyal// rig med theg pa med pas lta ba'i phugs su bskyol// ces gsungs so// nam mkha'i nyi zla'i rgyal po mu med mtha' yas kyi rgyud las// kun gyi dngos gzhi bstan pa'i le'u ste gsum pa'o// // de nas kun byed rang grol gyis// ming med ka dag ston pa la// dngos gzhi ci yang med pa las// rtsal zer khams gsum 'khor ba ji ltar 'khrul// ces ston pa la zhus pa dang // ston pas 'khor la bka' stsal pa// e ma dngos gzhi ming med mtha' stongs skye ba med pa las// de ltar ma go ba yi 'gro drug sems can gyis// rig med yid 'grus sems su 'khrul ba las// dngos gzhi ci yang med pa la// rtsal zer mtshan nyid cir yang snang // thog mar yun rings rig pa mgo rlung langs// phya sangs ban bun khyer te rig pa kun tu 'gyu// yin nam min gyi rnam shes skyes// ming med ming btags sems kyi 'dod pa skyes// kun 'tshol gtan 'bebs nges 'jog 'khor lo gsum// ji zhig ltar la rang ngo rang ma shes shing // ming med ma rtogs gting mtha' ma grol bas// ka dag ma rig skye med ma rtogs pa// de phyir ma rig mun pa las// mun pa'i 'khor sgo rkyen du shar// rims 'khrul rig gzugs bag chags gzugs// sems kyi gsal cha lnga ru shar// gsal dang mi g.yo rgyu mchad// mi 'gyur g.yo zhing 'gul bas te// thog ma sems la gsal cha lnga yod pas// gzhi lnga'i rtsal las rlung lnga ru shar// 'byung lnga'i rtsal las 'od lngar shar// 'od lnga'i rtsal las zer lngar 'khrul// zer lnga'i rtsal las shes pa'i snang tshul lnga// shes pa yang dag don shes dngas ma lngar grol bas// ming med gting mtha' med par thog mar ye sangs rgyas// gong ltar 'khrul nas 'khrul rtsad chod// kun bzang bya rtsal med par ye sangs rgyas so// 'gro drug khams gsum 'khor ba'o sems can rnams// dper na nam rlang cha las la chu zhu ba bzhin// de bzhin sems can 'khrul pa yang // byed mkhan med par rang bzhin shugs kyis 'khrul// thog ma 'od lnga rtsal lnga zer dang ldan yod pas// stong pa gsal ba 'gag med shugs 'byung lnga// ngo shes sku lnga ye shes lnga// rang bzhin ngo bo thugs rje las// ma shes dug lnga nyon mongs lnga// de lnga yod pas dug lngar 'khrul// de las 'byung ba lnga ru 'khrul// de las gzugs snang lnga ru 'khrul// de las 'byung ba lnga yis bsdus// de las don snying lnga ru 'khrul// de las nang rol slad ltar 'khrul// de las dbang po lnga ru 'khrul// de la dbugs dang rlung lngas brten par byas// de ltar 'khrul te mngal sgo 'drims// dngos pos sha khrag gzugs su 'khrul// pha zhe sdang rgyu las sha dang rus su chags// ma 'dod chags rkyen gyis khrag dang chu ser bsdus// gti mug dug gsum rgyu yi gong bur 'dril// shes rig sems kyi ngo bo thig le'i gong bur chud// thig le bag tsam cig las srid pa'i lte ba chags// zhag bdun lon nas khad kyis je che 'gro// bdun gnyis nyi shu gcig nas yan lag thogs// bdun tsha gnyis na sdom tsam gcig/ de ltar rims kyis zla dgu ngo bcu nas// rum gnas sdug bsngal myong ste skye ba'i sdug bsngal 'byung // brag par btsir snyam g.yang du lhung snyam byed// tsher ma'i dong du bcug snyam srid pa'i sems can skyes// skye 'gag med cing rgya ma chad pa las// sems can gcig la 'phel ba ltar du 'khrul// de rjes nga la nas phyir thon dngos pos rkyen du 'khrul// dbang po lnga dang sgo lnga yul lngar 'khrul// 'dzin pa lnga yis nyon mongs lnga ru 'khrul// yul sems bdag gzhan dgag bsgrub spong len las// snang btags bzung zhen chags sdang 'khrul ba yis// dgra gnyen phyogs ris yin min dbye bsal byung // de yis khams gsum 'khor bar 'khyams pa'i gzhi ma byas// skye ba na ba rgas shi'i sdug bsngal dang // snang ba phyogs dang ris kyi sdug bsngal dang // lus ni na tsha'i sdug bsngal dang // sems ni zhe 'dod sdug bsngal lo// dgra dang phrad dogs gnyen dang bral gyis dogs// sems can rnams kyi sdug bsngal bsal las 'das// e ma khams gsum 'gro drug sems can rnams// rnam rtog 'khor ba'i rdzab nas thon dus med// kye ma yang dag don las grol ba'i sems can rnams// ma rig dug lnga'i dbang gis ni// rnam rtog 'gong po ngar 'dzin gyis// rgyun long mun pa'i klong na 'khyams// rang 'bar sgron ma rang gis gsad// rang gi rang gnya' rang gis bcings// gzung 'dzin gnyis kyi sgrog tu bcug/ rnam rtog bdag tu 'dzin pa yis// nan gyis nam mkha'i mdud pa byas// rang mgor rang gi rkang pa bzhag/ rang las me 'bar rang chen skyes// mdud pas bcings nas mtsho ru zhugs// dra bar 'thums nas rdza klong lhung // e ma khams gsum 'khor ba'i sems can rnams// dngos gzhi cang med ming bral ma rtogs pas// rtsal snang cing yang snang ba'i 'khrul snang la// don dam bden par bzung bas 'gro drug 'khrul// rlung la zhon nas stong khams rjes kyis 'gengs// ma bcol las byed rang sems thang mar yan// khyim du mi sdod rgyu 'grul don mangs pas// 'jigs pa dgra yis khyer ba ma tshor ro// e ma skyes tshad 'chi ba'i tshul mthong na// rtag tu re ba skyid pa bsgyur// 'dus pa 'bral ba'i dpe mthong na// grogs snying sdug 'tshol ba skyid pa bsgyur// bsags tshad lus pa'i dpe mthong na// nor rdzas sogs pa sbrid pa bsgyur// ser sna can la snying re tshim// rdzas po che la khyer dbang med// e ma rtag tu re ste gcig mi sdod// e ma de bas cis kyang ma phan bla ma'i gdams ngag zhus// snyan rgud zhus la ri khrod dgon pa 'grims// bya ba zong la gcig pur nyams su long // yul nor gnyen 'dun 'brel ba kun chod la// e ma chos dang sems su bsres dang skal ldan kun// thams cad bor nas gcig pur 'gro tsam na// skyabs che skyel ma 'gro ba'i gnas rtog gam// kye ma skal ldan rnam 'byor kun// bla ma'i gdam ngag bcud 'thung la// cis kyang byar med gcig pur ri khrod 'grims// ci la'ang mi lta mu mtha' grol bar ltos// ci yang ma bsgom ming med gting mtha' yas par zhog/ gang la'ang ma spyod so ma rnam ma zang ka bshis ma bcos pa'i klong du dal bar sdod// de ltar go na 'bras bu gzhan na med de rang sangs rgyas// zhes gsung so// nam mkha' nyi zla'i rgyal po mu med mtha' yas kyi rgyud las// 'khor ba'i sems can ji ltar 'khrul par bstan pa'i le'u ste bzhi pa'o// // de nas kun byed rang grol gyis// ming med spyi phud ston pa la// sangs rgyas sems can skyon yon gang gis byas// zhes zhus pa dang // ston pas 'khor la bka' stsal pa// de gnyis skyon yon ngas bshad kyis// 'khor rnams ma yengs gus pas nyon// kun bzang sangs rgyas yon tan ni// yon tan grangs dang tshad las 'das// re zhig yon tan bgrang ba ni// snod la rang gi de nyid ngo shes pas// ming med mtha' stongs ka dag klong du gyur// rang grol rang sangs thog mar ye sangs rgyas// bya brtsal rtsol ba ma byas par// rgyu rkyen med par kun bzang sangs rgyas so// sangs rgyas de yi yon tan yang // ji snyed mkhyen pa'i yon tan dang // ji ltar mkhyen pa'i yon tan dang // mchog mkhyen pa yi yon tan dang // rnam pa thams cad mkhyen pa'i yon tan no// bdag gis gzhan mkhyen mkhyen bya mkhyen byed med// yon tan phyogs cha med pas mkhyen pa'i mchog tu gsungs so// sems can skyon gyi rtsa ba gcig pu la// rnam rtog bdag tu 'dzin pa rang las byung // nga bdag mgo rlung langs pas skyon gyi rtsa ba byas// mun pa'i rmang du 'thums pas skyon gyi rtsa ba byas// gnas don ma rtogs skyon gyi rtsa ba byas// ming med ma shes skyon gyi rtsa ba byas// ka dag ma rtogs skyon gyi rtsa ba yin// mu mtha' yas pa ma rtogs skyon gyi rtsa ba yin// rtsal zer rol par snang ba la// rang grol sangs rgyas ma shes skyon gyi rtsa ba yin// ma rig gti mug skyon gyi rtsa ba yin// rig pa 'gyur ba sems rtog skyon gyi rtsa ba yin// ngo bo rang bzhin thugs rje las// ma rtogs 'khor lo rnam gsum skyon gyi rtsa ba yin// mun pa'i 'khor sgo skyon gyi rtsa ba yin// gnyis med gnyis su bzung ba skyon// yul sems gnyis su bzung ba skyon/ bdag gzhan gnyis su bzung ba skyon// dgag bsgrub spong len gnyis su bzung ba skyon// bzang ngan dbye bsal gnyis su bzung ba skyon/ yin min rtsis gdab gnyis su bzung ba skyon// med las yod 'dzin skyon chen yin// mi rtag rtag 'dzin skyon chen yin// mi bden bden 'dzin sems can skyon// sdug bsngal bder 'dzin sems can skyon// 'khrul pa yang dag 'dzin pa skyon// cha yod bzhin du sdig spyod sems can rnams// btags snang bzung zhen skyon gyi rtsa ba yin// sems can skyon gyi bye brag brjod mi lang // zhes gsungs so// nam mkha' nyi zla rgyal po mu med mtha' yas kyi rgyud las// skyon yon bstan pa'i le'u ste lnga pa'o// // de nas kun byed rang grol gyis// ming med spyi phud ston pa la// 'khor 'das dbyer med ji ltar grol// ces zhus pa dang // ston pas 'khor la bka' stsal pa// yang ti ming med mtha' bral du// gzhi rlung dbyer med gnyis su med// 'byung lnga 'od lnga dbyer med grol/ zer lnga rtsal lnga dbyer med grol// shes med mtha' yas ming med grol// ma rig ye shes gnyis med grol// rig skyes rig pa dang dngas klong du grol// ngo bo rang bzhin thugs rje yang // sku gsum skye med klong du grol// stong pa gsal ba 'gag med kyang // mu mtha' bral ba gsum du grol// yid 'khor rnam gsum 'khrul pa yang // dkyil 'khor gsum gyi klong du grol// 'gyu ba rlung rkyen mun pa'i 'khor sgo yang // 'gyur med rig med gsal dag klong du grol// sems kyi gsal cha rnam lnga yang // ye shes lnga yi klong du grol// gzugs lnga sku lnga'i klong du grol// dug gsum sku gsung thugs su grol// dug lnga ma spangs sku lngar grol// sems can ma spangs sangs rgyas nyid du grol// 'khor ba ma spangs myang 'das nyid du grol// snang srid 'khor 'das dbyer med nyid du grol// rnam rtog chos nyid chen por grol// snang ba sor bzhag chen por grol// srid pa rang bzhin med par grol// 'khrul snang rang sangs chen por grol// snang btags bzung zhen med par grol// rig sems dang dngas chen por grol// sems nyid ming med gting mtha' zad par grol// yul sems gzung 'dzin med par grol// bzang ngan spong len med par grol// yin med dbye bsal med par grol// dgag bsgrub blang dor med par grol// dgra gnyen phyogs ris med par grol// nga dang bdag gzhan 'dzin pa med par grol// blos btags chos rnams blo 'das chen por grol// ming tshig brjod pa'i chos rnams ming med chen por grol// mtshon pa'i chos rnams mtshon du med par grol// dngos gzhi'i chos rnams dngos med klong du grol// snang ba'i chos rnams stong pa'i klong du grol// rig pa'i chos rnams rig med klong du grol// sems dran chos rnams sems kyi dran pa med par grol// mtshon btags brno bsam bsam med klong du grol// 'od rtsal zer rnams snying po'i klong du grol// yan lag chos nyid klong du grol// ma 'gag rol pa skye med klong du grol// cir snang cir srid snying po'i klong du grol// cang med cir snang cang med klong du grol// stong pa'i klong byung stong nyid klong du grol// med las sna tshogs dngos med rang du grol// dngos kun dngos gzhi med par grol// sgo lnga gsal mdangs chen por grol// yid lnga zang thal chen por grol// yul lnga dbye bsal med par grol// tshogs brgyad rtsis gdab med par grol// snang srid chos rnams mu mtha' yas par grol// dper na 'byung ba nam mkha'i klong du 'byung lnga grol// nam mkha' rgyal po'i klong dkyil du// thog ser char sprin gza' skar sna tshogs pa// gzhan du ma bkol nam mkha'i klong du grol// dper na phyi yi rgya mtsho chen po ru// 'ag+ha 'ag+ha na ra pad+ma si ti chu bran ji snyed rnams// gzhan du ma bkol rgya mtsho'i klong du grol// yod med rtag chad snang srid 'khor chos ming med klong du grol// gno tshad bsam tshad snying po'i klong du grol// ces gsungs so// nam mkha' nyi zla'i rgyal po mu med mtha' yas kyi rgyud las// de gnyis dbyer med klong du grol lugs bstan pa'i le'u ste drug pa'o// // de nas kun byed rang grol gyis// ming med spyi phud ston pa la// 'gro drug g.yang sa ji ltar gcad// ces zhus pa dang // ston pas 'khor la bka' stsal pa// 'gro drug g.yang sa gcad thabs la// bcad pas chod pa ma yin te// ma bcad rab grol bzhag pas chod// rtsol ba byas pas mi chod de// byar med so ma zang kar gnas pas chod// gting mtha' med la mu mtha' yas pas chod// 'on kyang de ltar ma go ba'i gang zag la// zhe sdang dbang gis dmyal khams rgyud pa la// zhe sdang ma spangs mi gnas rang grol bas// dmyal bar skye ba'i g.yang sa bcad// dmyal ba ming med longs skur grol// ser sna'i dbang gis yi dwags gnas skyes pa// ser sna ma spangs mi gnas rang grol bas// yi dgas skye ba'i g.yang sa bcad// yi dgas ming med mnyam nyid ye shes yin// 'od gsal ma rtogs gti mug mun pa las// gti mug dbang gis byol song gnas skyes pa// gti mug ma spangs byol song g.yang sa bcad// gti mug rang sangs chos kyi sku// phrag dog dbang gis mi yi gnas skyes pa// phrag dog ma spangs mi gnas rang grol bas// phrag dog ming med nan tan ye shes// nga rgyal dbang gis lha ma yin skyes pa// rtog pa'i dbang gi nga rgyal lha min gnas skyes pa// nga rgyal ma spangs gnas lha min g.yang sa bcad// nga rgyal ming med sku gsum zhing khams yin// ming med ma rtogs yan lag rig skyes pas// 'dod chags dbang gis lha yi gnas su skyes// dngos la 'dod chags ma grub pas// 'dod chags ma spangs mi gnas lhar skye'i g.yang sa bcad// 'dod chags ming med sbrul sku chen po thob// de ltar ming med mtha' stong pa yis// 'gro drug skye ba'i g.yang sa bcad// ces gsungs so// nam mkha' nyi zla'i rgyal po mu mtha' yas kyi rgyud las// 'gro drug g.yang sa bcad pa'i le'u ste bdun pa'o// // de nas kun byed rang grol gyis// ming med spyi phud ston pa la// snang srid chos rnams ji ltar grol// ces zhus pa dang // ston pas 'khor la bka' stsal pa// chos rnams ming med mtha' bral yang // 'khor gyi go ba bskyed phyir bstan par bya// de la snang srid chos rnams grol lugs kyang // gong du 'khor 'das dbyer med skabs su bstan mod kyang // 'on kyang 'khor la mdo tsam bstan// snang ba'i chos rnams rang sar bzhag pas grol// snang srid ji ltar snang yang ci la'ang sems ma chags// spong len dgag bsgrub mi byed rtsis gdab med par grol// snang ba ci sto rang sar grol// srid pa ci ste dngos kyi med// rig pa ci sto/ ming med grol// sems pa ci sto rang bzhin med// 'gyu ba ci ste 'dzin pa med// dran rtog ci sto byung sar grol// sems blo ci ste dngos med grol// rnam rtog ci ste rtog med grol// 'khor ba ci sto myang 'das grol// ma rig ci sto ka dag klong du grol// blos btags chos rnams mtshan brjod med par grol// theg med 'jug sgo lta sgom med par grol// gang ltar snang yang mi 'dzin ma chags grol// ci ltar 'dug kyang mi spyod grol// rig yid sems blo dang dngas rang grol sangs// skyid pa'i tshe na zhen med chags med grol// sdug pa'i tshe na mi 'dzin mi bskyod grol// 'gro zhing 'gro zhing rang sar grol// 'dug cing 'dug cing rang sar grol// nyal zhing nyal zhing rang sar grol// za zhing za zhing rang sar grol// spyod lam rnam bzhir ma chags ma zhen grol// dngos po rnam pa sna tshogs la// gang la'ang 'dod pa med pas ci la'ang sems ma chags// ming med mtha' zad don rtogs chos rnams med// de ltar go na snang yang zhen med dgag bsgrub med par grol// rig kyang 'dzin med rang sar grol// sems kyang mi lto dang dang rang sar grol// rgod cing rgod cing rang sar grol// dga' zhing dga' zhing rang sar grol// mi dga' mi dga' rang sar grol// de dag thams cad gnyis med chen por grol// brtags chags chos rnams ming med chen por grol// ces gsungs so// nam mkha' nyi zla'i rgyal po mu med mtha' yas kyi rgyud las// snang srid chos rnams grol bar bstan pa'i le'u ste brgyad pa'o// // de nas kun byed rang grol gyis// ming med rang grol ston pa la// ming med mtha' bral gang gis rtogs// zhes zhus pa dang // ston pas 'khor la bka' stsal pa// ming med mtha' bral rtogs rgyu med na yang // 'khor rnams go ba bskyed phyir rtogs thabs bshad// ming med mtha' bral rtogs thabs ni// bya rtsol bsgrub pa byas pas mi rtogs te// bya ba thams cad btang la ni// ma bcos dal bar sdud pas rtogs// lta sgom spyod 'bras ched du mi bsgrub ste// mu mtha' yas pas lta rgyu med// gting mtha' grol bse bsgom rgyu med// bya ba thongs pas spyad rgyu med// blo las 'das pas thob rgyu med// ming med rtogs pas tha snyad med// dngos med rtogs pas dngos po med// ka dag rtogs pas bsrung du med// byar med rtogs pas 'phrin las med// bgrod med rtogs pas sa lam med// de dag rtogs pas sbrang du med// rang nyid yin pas gzhan ma re// ye nas bsgrubs pas da mi bsgrubs// ma btsal rnyed pas gzhan mi 'tshol// kye ho skal ldan rigs kyi bu// ming med mtha' bral rtogs 'dod na// bya ba'i chos rnams btang ba ni// mu mtha' yas par zhugs pa'i mchog/ snang srid 'khor 'das dngos po'i chos rnams la// rig med sems med gang la'ang yid mi 'gyu// chos rnam kun gyi bya ba btang ba ni// rtsol bsgrub zag bcad mu mtha' grol ba'i klong // 'jug sgo lta sgom spyod 'bras rtsol bzhag la// gtad med bsam med byar med blo las 'das// de ltar rtogs pa'i skal ldan la// mtshon med dngos med chos med bshad du rdul tsam med// mu med mtha' yas theg pa'i grub mtha' med// gting yangs mtha' stong blo zad chos kyang med// gting zad mtha' grol yid smon sangs rgyas med// kha gting ye nas med pas blo yi yul las 'das// gdams pa tshig bzhis 'di ltar rang sangs rgyas// 'di don sus rtogs ming med mtha' bral rtogs// de ltar sus rtogs sangs rgyas kun dang mnyam// kye// e ma skal ldan rigs kyi bu// ming med mtha' bral rtogs 'dod na// yul rnams dgag bsgrub ma byed rang sar zhog/ rig pa rtsis gdab ma byed dbye bsal med par zhog/ sems la rtsis gdab ma byed 'dod rlom med par zhog/ snang ba thams cad rang snang zhog/ rig sems 'byung 'jug med par zhog/ gnas lugs blo 'das ming med chen por zhog/ btags snang chos rnams ming med mtha' bral zhog/ ces gsungs so// nam mkha' nyi zla'i rgyal po mu med mtha' yas kyi rgyud las// ming med mtha' bral rtogs thabs kyi le'u dgu pa'o// // de nas kun byed rang grol gyis// ming med spyi phud ston pa la// snying po chos skur rtogs thabs la// rtsol bsgrub bya rtsal mi 'tshal lam// zhes zhus pa dang // ston pas 'khor la bka' stsal pa// snying po chos sku rtogs thabs la// rtsol bsgrub bya rtsal mi 'tshal te// rtsol bral dal bar bsdad pas cho ga/ bya ba thong // dal bar sdod// lhug par zhog/ 'dod pa sbyangs// zhe 'dod che// yid kyi rgyu 'grul ma mang // sems kyi bya ba ma che// lus rtsol bsgrub la ma g.yeng // rig pa zang rgyal du ma btang // kha mu cor du ma smra// spyod pa bab bcol du ma byed// lta ba zhe 'dod phyogs ris kyi mtha' la ma bsgyur// sgom pa 'gyu ba rnam rtog bying rmugs kyi dgral ma bskur// spyod pa zhen chags rtsol ba'i dgra la ma bskur// 'bras bu re dogs kyi kha la ma bskur// kye ho skal ldan rigs kyi bu// snying po chos sku rtogs 'dod na// nam mkha'i dbyings su ltos// rgya mtsho'i klong du nyol// ri bo rmang nas dgyel// lag tu ral gri thogs// gang phrad rtsad nas chod// nyi zla sgron mer thogs// mchog rab rtse la sdod// kun gsal 'od khang ltos// rgyal mtshan rtse mor phyor// skyon sol 'phrang chod la// yul gyi dbus su sdod// btsan mkhar bsrungs la zam 'phrang sdoms// gros kyi thag chod don gyi rtsa ba zung // rin chen snang gsal 'od kyi khang par sdod// rgyu 'grul ma mang khyil du sdod// 'jigs par dgra la ma skur cig/ bdud rtsi bcud 'thung chos nyid dbyings su nyol// gsang ba brda yi gnad go na// gting mtha' yas la mu mtha' grol// chos nyid mtha' stongs don yang rtogs// mtha' bral lta ba'i phugs su bskyol// bsam bral chos nyid klong du grol// bya bral rnal ma sor bzhag rtogs// lhun grub re dog rtsad nas chod// thob med 'di ltar rang sangs rgyas// ye shes gting rdzogs mtha' rnams grol// thig le mtha' bral chos sku rtogs// zhes gsungs so// nam mkha' nyi zla'i rgyal po mu med mtha' yas kyi rgyud las// rtsol bsgrub bya btsal mi dgos par bstan pa'i le'u ste bcu pa'o// // de nas kun byed rang grol gyis// ming med spyi phud ston pa la// ming med mtha' yas don rtogs na// theg pa'i bye brag yod dam med// ces zhus pa dang // ston pas 'khor la bka' stsal pa// mong med mtha' yas don rtogs na// theg pa blos btags rtsol bsgrub yin// zhe 'dod blos btags chos kyis sangs mi rgya// de phyir theg pa'i bye brag med// 'on kyang ming med ma rtogs rtog ge'i blo can la// blo dman brod pa bskyed phyir bye brag dbye// sems can dbang po'i khyad par las// blo khyad theg pa dgu ru dbye// gdul bya dbang po rab 'bring gsum// phye bas gsum gsum dgu yin no// de 'dul theg pa dgu ru bshad// tha ma gsum la mtshan nyid gsum// 'bring po gsum la kri yog gsum// rab kyi rab 'bring gsum la bskyed rdzogs gsum// yang rab spyi ti thod rgal yang ti yo gas bstan// sems can blo 'di ma zad par// theg pa zad par ma gsungs te// 'khrul pa rtogs 'di zad pa na// theg pa med cing 'jug pa med// grub pa med cing lta sgom med// rtsol bsgrub med cing tha snyad med// chos rnams med cing bshad du med// mtshon du med cing tha snyad med// blos btags chos rnams yod ma yin// theg pa med cing bye brag med// ces gsungs so// nam mkha' nyi zla rgyal po'i rgyud las// theg pa'i bye brag med par bstan pa'i le'u ste bcu gcig pa'o// // de nas kun byed rang grol gyis// ston pa'i rgyal po ming med spyi phud la// gsang sngags brda yis ji ltar bshad// ces zhus pa dang // ston pas gsang ba'i brda bstan gyis// 'khor rnams ma yengs gus pas zung // rga wa tha ha n+yam// de nas a tha b+ho ya hri snying po dra yang snying ya// rang rin chen 'od khang na pra ba ra sarba d+harma thams cad d+ha chos dbyings tu// dzA ye shes na gar si dngos grub sa ma ya klong du thim pas skye med a// yul kun gzhi yangs pa can gyi pho brang bya ba na// rgyal rig pa po mngar rang byung ye shes bdag nyon mongs brgyad khri bzhi stong khri rje ba gtsug bstan bya ba la// blon po kha drag dug lnga stong khams thang mar rgyu ba yin pa'i mi lngas bsor ro// rin po che rnam chos nyid dag grub pa'i mkha' klong rnam dag gzhal yas khang na// snying po rgyal po kun rig spyi phud bya ba la// yan lag rtsal zer rang byung dang dngas 'khor kun rig gsal ba'i khye'u chung lngas bskor ro// snying po rang byung gi ye shes dang // 'gong po nga bdag mtshon pa'i brda'o// rin po che nyi zla kha sbyor gyi lha ka dag chos nyid khang ni// rin po che shel chos sgra dri med kyi sku 'od lham me bzhugs so// chos sku ka dag ye shes mtshon pa'i brda'o// mun pa gti mug bag chags kyi sgrib g.yogs g.yung rung gi lha khang na// ma rig pa rgan mo mun nag gi mtho yor bya ba yod do// ma rig pa mtshon pa'i brda'o// la'o che'i la btsas kyi kha na 'gron po mi gcig 'dug pas// phar 'gro tshur 'ong ngo ma shes te// sangs rgyas dang sems can gyi spyis mtshon pa'i brda'o// shul rings zang chad kyi 'gron po la sngon na kha stong gnyis 'dug pas// gar 'gro'i brtol ni ma rnyed do// rig pa 'char sgo dang ma rig pa'i 'khrul sgo mtshon pa'i brda'o// kye ma skal ldan grol bar 'dod pa rnams// nam mkha'i dbyings na ci 'dug ltos// rgya mtsho'i nang gi nor bu chongs// g.yas su mtshon cha'i 'khor lo bskor// g.yon du nyi zla'i sgron ma thogs// bdud rtsi bcud 'dus khrogs chod kyis// nor gyi snying po snying la chongs// zas kyi snying po khong du chud// yul gyi snying po chos nyid dbyings su sdod// bya ba ma mang snying po'i klong du nyol// rgyu 'grul ma mang gdeng chos sa la sdod// 'jigs sar ma 'gro btsan mkhar rtse la sdod// rlung la ma zhon 'phrang chod zam 'phrang sdom// kye ma// a le skal ldan rigs kyi bu// dran nam skyes sam// e ma yun rings nad pa blo bur rkyen byung nas// skyes tshad gcig kyang mi sdod shul ring 'gro tsa na// rgyags phye skyel ma 'gro sa'i gnas bdog gam// kye ma de bas da lta dbang yod tshe// zad med rgyags phyir sems nyid nor bu chongs// skyel ma bla ma yi dam dam chos tshol// bsun mar rang snang grogs po tshol/ dgra lnga byung dogs gnyen lnga tshol// 'jigs sar rno ba'i mtshon thogs la// khyi phag bya sbrul khra spre sod// nam mkha'i dbyings su spo la zhog/ dgra lnga byung na dbang yod skyel mas thul// lam ni 'od lnga'i gsang lam zhugs// gnas khang mu mthal grol bar song // sdod na gting mtha' yas par sdod// nyal na kha gting med pa'i klong du nyol// ces gsungs so// nam mkha' nyi zla'i rgyal po mu med mtha' yas kyi rgyud las// gsang sngags brdas bstan pa'i le'u ste bcu gnyis pa'o// // de nas kun byed rang grol gyis// ming med spyi phud ston pa la// ming med mtha' yas rtogs pa la// dkyil 'khor lha bskyed mchod bstod dgos mi dgos/ zhes zhus pa dang // ston pas 'khor la bka' stsal pa// ming med mtha' yas rtogs pa na// dkyil 'khor lha mchod bstod mi dgos/ dkyil ni gting mtha' yas pa'i dkyil// 'khor ni mu mtha' grol ba'i 'khor// dkyil 'khor ming med mtha' stongs yin// lha ni snying po rang byung ye shes chos kyi sku// ka nas dag pas bskyed mi dgos// dngos med yin pas mchod mi dgos// rang gsal 'od du 'bar bas bsod mi dgos// rang gi lhar ni rang mchod pas// dngos grub skye med ka dag rtogs// ston pas rgyal po ming med mtha' bral rtogs// lha yi rgyal po ka dag mu mtha' grol// dkyil 'khor rgyal po phyogs bral mtha' rnams grol// dbang gi rgyal po ka dag skye med thob// dngos grub rgyal po ming med mtha' stongs 'grub// smon lam rgyal po snying po chos sku thob// sdig bshags rgyal por bag chags ka nas dag/ tshogs sog rgyal por chags med mtha' rnams stongs// 'gyod tshangs rgyal por rang sems skye med rtogs// zhes gsungs so// nam mkha' nyi zla'i rgyal po mu med mtha' yas kyi rgyud las// dkyil 'khor lha bskyed mchod bstod mi dgos par bstan pa'i le'u ste bcu gsum pa'o// // de nas kun byed rang grol gyis// ming med spyi phud ston pa la// dngos po'i gnas lugs rtogs pa na// sdig gnas bshags smon lam dgos mi dgos// zhes zhus pa dang // ston pas 'khor la bka' stsal pa// dngos po'i gnas lugs rtogs pa na// sdig bshags tshogs sog smon lam mi dgos so// rang skyon ka nas dag pas sdig sgrib bshags su med// mi dge sdig ma spyad pas bshags rgyu med// tshogs gnyis yongs su rdzogs pas bsag tu med// gzhan la mi smon rang la rnyed pas smon lam med// smon pa'i sangs rgyas rang las rnyed// des na smon lam zhes su bshad// ces gsungs so// nam mkha' nyi zla'i rgyal po mu med mtha' yas kyi rgyud las// sdig bshags tshogs sog smon lam mi dgos par bstan pa'i le'u ste bcu bzhi pa'o// // de nas kun byed rang grol gyis// ming med spyi phud ston pa la// mu mtha' yas pa'i don rtogs na// dbang bskur dngos grub gtor mtsha chu dgos mi dgos// zhes ston pa la zhus pa dang // ston pas 'khor la bka' stsal pa// mu mtha' yas pa'i don rtogs na// dbang bskur dngos grub gtor ma tsha chu med// dbang bskur gtor ma tsha chu byed pa theg pa 'og ma yin// nga yi yang ti mu mtha' yas pa'i don rtogs na// rang dbang rang gis thob pas dbang bskur zhus med// ming po ming med mtha' bral dbang thob pas// dbang bskur bya ba'i yul dang bral// skye med ka dag chos sku'i dbang thob pas// rdzas dang bum pas bskur bya skur byed med// ming med mtha' stongs mu med mtha' yas pas// dbang bskur rgyal po'i mchog tu de bshad do// zhes gsungs so// ming med mtha' stongs mu mtha' grol bas gtor ma gtang sa med// snying po chos sku ka dag lha tshogs la// rtsal zer rol pa'i ma mo mkha' 'gros bskor// rang byung dang dngas chos skyong bsrung ma la// sha khrag zan 'grul gtor ma ma gtong ste// snang srid ma 'dres ngang grol gtor ma gtong // de la gtor ma snod dang rdzas dang byin brlabs 'bul ba ni// snod ni snod kyi 'jigs rten khams rnams thams cad yin// rdzas ni skye 'gro nor rdzas dngos po chos rnams yin// de la gtor ma'i byin brlabs ni// ming med mtha' bral mu mtha' yas pa na// rig skyes 'gag med snang srid chos rnams kun// rig med rtsal zer dngos po btags snang chos// mu mtha' yas shing gting mtha' grol// snying po rtsal zer gnyis med byin gyis brlabs// ming med phyogs bral mtha' rnams grol bar bsngo// skye med mu mtha' grol bar bzhes su gsol// brjod med blo 'das chen por byin gyis rlobs// byin gyis rlob mkhan med de rang sems ka nas dag/ ces gsungs so// ming med mtha' stongs don rtogs na// tsha tshwa chu gtor gtang mi dgos// mchod ni gnyis su med par mchod// rang ni rang byung ye shes rten// tsha tshwa rang gis sems la thob// tsha ni skye med snying po ste// tsha ni ka dag 'od gsal lo// btab mi gnyis su med par btab// ming med mtha' bral tsha tsha yin// blo 'das tsha tshwa khyad par 'phags// zhes gsungs so// sems kyi chu gtor 'di lta ste// chu ni snang ba'i chos kyi dpe// snang ba rang bzhin med pa'i dpe// gtor ni rtogs pa'i byin brlabs te// snang srid 'khor 'das mu mtha' grol bar gtor// chu ni sems kyi mtshan nyid de// mi snang rang bzhin yod pa'o// chu la chu bur thim zhing nyon mongs rang grol dngas// snang srid btags chags chos rnams ma lus kun// gtor ni dgag bsgrub spong len med par gtor// chu ni ngos bzung med pa ste// gtor ni rang sangs rang grol chen por gtor// ces gsungs so// skye med ka dag gtor ma tsha chu yin// sems nyid tsha tshwa chu gtor khyad par 'phags// zhes gsungs so// nam mkha' nyi zla'i rgyal po mu med mtha' yas kyi rgyud las// gtor ma tsha tshwa chu gtor mi dgos par bstan pa'i le'u ste bco lnga pa'o// // de nas kun byed rang grol gyis// ming med spyi phud ston pa la// lha sgom spyod pa mi dgos par// ming med mtha' yas rtogs lags sam// zhes zhus pa dang // ston pas 'khor la bka' stsal pa// lta sgom spyod 'bras rtsol bsgrub yin// rtsol bsgrub chos kyis sangs mi rgya// de bas ming med rtogs 'dod na// che yang // shes sam// dag gam// med dam// stongs sam// yangs sam// grol lam// 'das lags sam// bskyol lam// ma bltas mu mtha' grol bas lta ba yin// ma bsgoms gting mtha' yas pas sgom pa yin// ma spyad mtha' rnams mchod pas spyod pa yin// ma bsgrubs rang las rnyed pas 'bras bu yin// de phyir lta sgom med pa'i lha sgom mchog/ gtad med gzhung med phyogs med tshig las 'das// blos btags zhes 'dod blta bya lta byed med// bsam med dmigs med rtog med 'gyu med las// yid gzung bying rmugs bsgom pa med// byar med bcol med chags med zhen med las// ched byas tho co bya rtsol spyod pa med// re med rang gnas sku gsum lhun grub pas// re dogs rtsol bsgrub zhe 'dod sangs rgyas med// lha sgom med pa'i lta sgom chen po yin// zhe 'dod dmigs bcug rtsol bas mi rtogs so// zhes gsungs so// nyi zla nam mkha'i rgyal po mu med mtha' yas kyi rgyud las// lha sgom spyod 'bras med par ming med mtha' yas rtogs par bstan pa'i le'u ste bcu drug pa'o// // de nas kun byed rang grol gyis// ming med spyi phud ston pa la// mu med mtha' yas don rtogs na// gol sa 'khrul pa yod dam med// ces ston pa la zhus pa dang // ston pas 'khor la bka' stsal pa// mu mtha' yas pa'i don rtogs na// gol sgrib 'khrul pa gang yang med// ces gsungs so// de nas 'khor gyis ston pa la// rtogs na gol sgrib 'khrul med kyang // de ltar ma rtogs sems can la// gol sgrib 'khrul pa yod dam med// ces ston pa la zhus pa dang // ston pas 'khor la bka' stsal pa// ming med rtogs na gol sgrib med mod kyang // de ltar ma rtogs sems can la// gol sgrib 'khrul pa gsum du bshad// skye med ming med ma rtogs gol sa yin// ye dag ka dag ma rtogs sgrib pa yin// 'gro drug 'khyams pas 'khrul pa yin// bsdus na de las med mod kyang // dbye na bsam las 'das par gsungs// gzhan du rgyas par gsungs pa'i phyir// 'di ru bye brag ma bshad do// zhes gsungs so// nam mkha'i rgyal po mu med mtha' yas kyi rgyud las// rtogs nas gol sgrib med kyang // ma rtogs pa la gol sgrib 'khrul gsum bstan pa'i le'u ste bcu bdun pa'o// // de nas kun byed rang grol gyis// ming med spyi phud ston pa la// ming med la zla ji ltar 'phags// zhes zhus pa dang // ston pas 'khor la bka' stsal pa// rtogs na gol sgrib med mod kyang // de ma rtogs kyi gang zag la// gol sgrib gnyis stong lnga brgya yang // tshig 'og gcig tu brdar sha chod// skye med ma rtogs gol ba yin// snying po ming med rtogs pas gol du med// ye dag ma rtogs sgrib pa yang // skye med ka dag rtogs pas sgrib tu med// 'gro drug skyes 'khrul pa yang // mi skye skye ba mi len 'khrul du med// mdor bsdus gsum du shes par bya// lta ba gol sgrib 'khrul dang gsum// dam tshig gol sgrib 'khrul dang gsum// 'phrin las gol sgrib 'khrul dang gsum// sa yi gol sgrib 'khrul dang gsum// phra ba'i gol sgrib 'khrul dang gsum// ye shes gol sgrib 'khrul dang gsum// rgyud kyi gol sgrib 'khrul dang gsum// lung gi gol sgrib 'khrul dang gsum// man ngag gol sgrib 'khrul dang gsum// lam gyi gol sgrib 'khrul dang gsum// theg pa re la bcu tshan bcu// de las phye bas nyis stong lnga brgya yod// ces gsungs so// gol sgrib ces pa'i nges tshig kyang // gong ma gong ma'i theg pa yis// 'og ma'i theg par zhugs na gol// des na yas gol zhes su bshad// 'og ma 'og ma'i theg pa yis// gong ma'i theg pa sgrib pa yin// des na mas sgrib ces su bshad// dper na sha mo'i grod rje mas bzhin// dbye na bsam las 'das pa ste// bsdu na grod par 'ub kyis 'dus// de bzhin gol sgrib nyis stong kyang // tshig gcig 'og tu gdar sha chod// ming med blo 'das chen por rtog/ lta ba'i gol sgrib 'khrul pa yang // mu mtha' grol bar la 'da' 'o// dam tshig gol sgrib 'khrul pa yang // nyams skyon ka dag la 'da' bo// 'phrin las gol sgrib 'khrul pa yang // rtsol bsgrub med par la 'da' bo// lam gyi gol sgrib 'khrul pa yang // bsgrod du med par la 'da' bopo// sa yi gol sgrib 'khrul pa yang // sbrang du med par la 'da' bo// phra ba'i gol sgrib 'khrul pa yang / rang bzhin med par la 'da' bo// ye shes gol sgrib 'khrul pa yang // gsal 'grib med par la 'da' bo// rgyud kyi gol sgrib 'khrul pa yang // sems chos rgyud 'dres ngang du la 'da' bo// lung gi gol sgrib 'khrul pa yang // ma nor yang dag nges par la 'da' bo// man ngag gol sgrib 'khrul pa yang // gting mtha' yas la mu mtha' grol bar la 'da' bo/ gol sgrib nyis stong lnga brgya bo// skye med ka dag ming med mtha' stongs chen por la 'da' bo// zhes gsungs so// nam mkha' nyi zla'i rgyal po mu med mtha' yas kyi rgyud las// gol sgrib 'khrul pa la 'da' ba'i le'u ste bco brgyad pa'o// // de nas kun byed rang grol gyis// ming med spyi phud ston pa la// ci yang ma byas par grol ba thob lags sam// zhes ston pa la zhus pa dang // ston pas 'khor la bka' stsal pa// bya byed rtsol bas 'khor bar 'khyam// ci yang ma byas grol ba thob// ci yang ma spyad rang sar grol// ci la'ang ma chags yid mi 'jug/ gang la'ang ma zhen 'dzin chags grol// snang srid yul la dgag bsgrub med// ji ltar rig kyang 'dod pa rtsis gdab med// kye skal ldan grol bar 'dod pa rnams/ ci yang ma byed dal bar sdod// rtsol bsgrub ma byed lhug par zhog/ bya ba ma mang klong du nyol// lta ba sgom pa spyod pa med// phyal rtser thong la bde bar zhog/ gtad med dmigs med byar med sgrub tu med// gang dang ci la'ang mi sems gang la yid mi 'jug/ snang srid 'khor 'das yod med rtag chad kun// ma brtags rang snang rang sor bzhag pas grol// chos spyod mi byed dal ba'i ngang la sdod// dge bcu mi spyod mu mtha' grol bar 'jog/ byas tshad bsgrubs tshad 'khor bar 'khyam// ci yang ma byas ma bltas ma bsgoms grol ba thob// ces gsungs so// nam mkha' nyi zla'i rgyal po mu med mtha' yas kyi rgyud las// ci la ma spyad par grol ba thob par bstan pa'i le'u ste bcu dgu pa'o// // de nas kun byed rang grol gyis/ ming med mtha' stongs ston pa la// yang ti nyi zla'i snying po ru// brgyad khri bzhi stong ji ltar rdzogs// zhes zhus pa dang // ston pas 'khor la bka' stsal pa// rdzogs chen gnya' gcog yang ti yo ga ru// theg pa brgyad khri bzhi stong de la rdzogs// chos kyi sgo mo brgyad khri bzhi stong de la rdzogs// chos kyi sgo mo brgyad khri bzhi stong rdzogs// thod rgal yang ti yo ga ru// bdag med nyan thos theg pa rdzogs// rten 'brel rang rgyal theg pa rdzogs// bden gnyis byang sems theg pa rdzogs// dag gsum kri ya'i theg pa rdzogs// rtse gnyis u pa'i theg pa rdzogs/ skye 'gag yo ga'i thegs pa rdzogs// snang stong ma hA'i theg pa rdzogs// dbyings dang ye shes gnyis med a nu rdzogs// thams cad chos sku a ti'i lta ba rdzogs// skye med ka dag spyi ti'i lta ba rdzogs// mu med mtha' bral yang ti yo ga ru// brgyad khri bzhi stong ma 'dres yongs su rdzogs// dper na 'byung ba nam mkhar 'byung ba bzhi yang rdzogs// rgya mtsho chen por chu bran sna tshogs rdzogs// mchog rab ri la ri bran ma lus rdzogs// za 'og snam bur dar sna sna tshogs rdzogs// de bzhin snang srid 'khor 'das rtag chad rdzogs// 'khor ba myang 'das sku dang ye shes rdzogs/ sku gsum dug lnga ye shes rnam lnga rdzogs// btags chags chos rnams ma lus rims kyis rdzogs// zhes gsungs so// nam mkha' nyi zla rgyal po mu med mtha' yas kyi rgyud las// rdzogs lugs bstan pa'i le'u ste nyi shu pa'o// // de nas kun byed rang grol gyis// ming med spyi phud ston pa la// a ti man chod theg pa las// yang ti yo ga gang gis 'phags// zhes zhus pa dang // ston pas 'khor la bka' stsal pa// yang ti nyi zla'i snying po yis// dngos po rnam pa sna tshogs snang ba'i yul rnams la// dgag bsgrub spong len rdul ma grub// nyan thos bdag med 'dod las 'phags// stong pa mi bsgrub rten 'brel mi rtsi bas// rten 'brel rang rgyal lta las 'phags// gzung zhen bden gnyis mi sbyong sgyu mar mi 'dod pas// dbu ma sems tsam dag las khyad par 'phags// rigs gsum skye 'gag can du mi 'dod pas// kri yog rnam gsum dag las khyad par 'phags// snang ba mi bsgyur snang stong gnyis med pas// ma hA ltar 'dod dag la 'phags// rgyu 'bras dbye med dbyings dang ye shes mi 'dod pas// a nu dag las khyad par 'phags// kha 'byams ye sangs rgyas la mi ltos par// rdzogs chen a ti rig pa 'gyur ba la// rang byung ye shes yin zer snang ba chos skur 'dod// rig pa 'gyur zhing snang ba mi rtag pas// ye shes 'gyur ldog snang ba skye 'jig can// de las s+thi ti yo ga 'phags// khyad par gang gis 'phags she na// skye med ka dag byar med blo 'das so// ka dag ma dag gnyis med pas// yang ti mu med mtha' bral gyis// s+thi ti dag las khyad par 'phags// khyad par gang gis dpags she na// gting mtha' yas la mu mtha' grol bas 'phags// a ti man chod lta ba ni// lta ba blos btags bsgom pa yid smon byed// spyod pa tho co dam tshig mched grogs bslu// 'phrin las rtsol bsgrub 'bras bus re dogs so// theg pa dgu las yang ti khyad par 'phags// de las khyad par gang gis 'phags she na// don la lta sgom spyod med kyang // re zhig khyad par 'don phyir 'phags// gtad med mu mtha' grol ba 'di// thig le mtha' bral lta ba'i rgyal po yin// blo btags zhe 'dod phyogs ris lha las 'phags// yang ti man chod lta ba phyags mas bstab// lta ba zhe 'dod mkhan la snying re tshim// ming med mtha' yas gting mtha' zad pa 'di// thig le ka dag bsgom pa'i rgyal po yin// yid bzung bsam bsgom bying rmugs mkhan las 'phags// bsgom bya sgom byed phyophyags mas bstab/ byar med so ma rang ka lkug pa 'di// thig le zang thal spyod pa'i rgyal po yin// bya rtsal rtsol bsgrub can las khyad par 'phags// chags zhen the tsom bya rtsal phyag mas btab// re med yin klong gyur 'di ka ltar sangs rgyas// thig le gting rdzogs 'bras bu'i rgyal po yin// re dogs rtsol bsgrub mkhan las khyad par 'phags// re dogs sangs rgyas gzhan nas thob 'dod phyags mas btab// lha sgom spyod pa'i rgyal po bzhis// a ti man chad theg pa dgu las khyad par 'phags// zhes gsungs so// nam mkha' nyi zla'i rgyal po mu med mtha' yas kyi rgyud las// s+thi ti yang ti khyad par 'phags pa'i le'u ste nyi shu rtsa gcig pa'o// // de nas kun byed rang grol gyis// ming med spyi phud ston pa la// nam mkha' nyi zla'i rgyal po mu med mtha' yas rgyud// bdag cag 'dus pa'i 'khor rnams la// rgyud kyi mtshan bshad zab par gsung du gsol// ces zhus pa dang // nga yis rgyud kyi don rnams bshad// 'khor rnams ma yengs gus pas nyon// de la rgyud 'di gsum du bshad// nam mkha' rgyal po'i rgyud dang gcig/ nyi zla rgyal po'i rgyud dang gnyis// bud med mtha' yas rgyud dang gsum mo// de nas 'khor gyis yang zhus pa// nam mkha' rgyal po'i rgyud kyis ji ltar bshad// ces gsungs pa dang // ston pas 'khor la bka' stsal pa// nam mkha' rgyal po'i rgyud kyis ni// dngos po'i gnas lugs mtshon dper gsungs// mu mtha' grol ba'i don rnams bstan// de yang ji ltar bstan zhe na// dper na nam mkha'i rgyal po ni// yod ma myong la med ma myong // snang ma myong la stong ma myong // 'dod ma myong la rtsol ma myong // gang ma myong la bri ma myong // zad ma myong la 'phel ma myong // bde ma myong la sdug ma myong // skye ma myong la 'gag ma myong // snang ma myong la zhen ma myong // dper na nam mkha' de nyid ni// skye ba med pa gnyis su med pa// rang grol ba// rgyu med pa// rkyen med pa// gnyen po med pa// byed pa pos ma byas pa// skye 'jig gang gi ngo bor yang mi gnas pa// dus dang rnam pa thams cad du 'pho 'gyur med pa// bzang ngan med pa// yin min med pa// dbye bsal med pa// gnyis su med pa// mtha' dbus med pa// phyogs dang ris med par mtha' grol ba// nga bdag dang gzhan snang // gnyis 'dzin las grol ba// dper na nam mkha'i klong nas char ser na bun bu yugs dang // nyi zla gza' skar thog glog sogs// sprin dang khu rlangs nam mkha'i cho 'phrul rnams// dang po byung yang nam mkha'i klong nas byung // drangs kyang nam mkha'i klong du drangs// sprin dang char ser kha ba na bun la sogs rnams// rang byung rang zhi nam mkha'i ngang du dngas// nam mkha' de la than pa sad ser mi sdug mtshan ma byung // so so skye bo nam mkha' dag la smod kyang nam mkha' la ni de yi skyon ma gos// char chu dus phebs lo legs bzang bstod kyang // de la skye bos bstod cing bzang bstod yon tan mang brjod kyang // dga' ba'i sems med mi dga' blo las grol// nam mkha' de la bstod pas bzang bar 'gyur ba med// de ci'i phyir zhe na// nam mkha' dngos med mtha' bral ba// stod ra smad ra gnyis las grol// yul sems gzung 'dzin bdag gzhan chos las grol// dpe de bzhin sems nyid kyi rang bzhin kyang // dang po rgyu med// bar du rkyen med// tha ma gnyen pos mi shig pa// skye ba med pa// 'gag pa med pa// gnyis su med pa// rang grol ba// dngos po med pa// mtshon du med pa// brjod pa las 'das pa// ming med pa// blo las 'das pa// yul med pa// sems med pa// bdag med pa// gzhan med pa// gnyis su snang phyogs ris las grol ba// mtha' dbus las grol ba// kha dog lnga med pa// dgra gnyen phyogs ris// chags sdang spong len// dbye bsal dgag bsgrub// rtsis gdab bcas bcos// blo byed pa po las yongs su 'das so// mu med mtha' stong ming med mu mtha' grol// nam mkha' rgyal po rgyud chen yin// zhes gsungs so// nam mkha' nyi zla'i rgyal po mu med mtha' yas kyi rgyud las// nam mkha' rgyal po rgyud kyi dpe don bstan pa'i le'u ste nyi shu rtsa gnyis pa'o// // de nas kun byed rang grol gyis// ming med spyi phud ston pa la// nyi zla rgyal po'i rgyud kyis ji ltar bstan// ces zhus pa dang // ston pas 'khor la bka' stsal pa// nyi zla rgyal po'i dpe yis ni// ka dag 'od gsal ston pa'i dpe ru bstan// dper na nyi zla'i snying po la// sgrib g.yogs ma grub ka nas dag/ gzhan skyon dri ma med pa'o// sprin dang na bun cis bsgribs kyang // dper na nyi zla'i snying po la// sprin dang rmugs pa sgribs g.yogs ka nas dag/ gti mug mun pa'i skyon gyis ma gos so// de bzhin ye dag sems nyid kyang // ka dag ming med mu mtha' grol ba'i rgyu// ma rig gti mug ka nas dag/ bag chags sgribs g.yogs ka nas dag/ yid 'khor 'khrul gsum ka nas dag/ dug lnga dug gsum ka nas dag/ 'byung lnga rlung lnga 'od lnga zer lnga ka nas dag/ 'khrul sgo 'khrul 'bras ka nas dag/ gzugs lnga ma grub ka nas dag/ 'khrul snang 'khor ba ma grub ka nas dag/ rnam rtog gzung 'dzin ma grub ka nas dag yul sems dgag bsgrub ma grub ka nas dag/ dngos po'i chos rnams ka nas dag/ dgra gnyen phyogs ris ka nas dag/ spong len yin min dbye bsal ka nas dag/ mtha' dbus phyogs ris ka nas dag/ snang srid 'khor 'das ka nas dag/ 'grus tshad dran tshad mno tshad ka nas dag/ btags snang chos rnams ka nas dag/ skye snang gsal nyi ma'i rgyud kyis ni// gti mug ma rig sgribs g.yogs ka nas dag/ 'od gsal nyi ma'i snying po'i rgyud// snang gsang nyi ma'i rgyud kyis ni// bag chags sgribs g.yog ka nas dag/ 'od gsal zla ba'i rgyud kyis ni// gti mug mun pa'i dmag rum gtan nas sangs// nyi ma shes rab rgyud la zla ba thabs kyi rgyud// thabs dang shes rab yongs rdzogs nyi zla rgyal po'i rgyud// nyi ma skye med ka dag ston pa'i rgyud// zla ba ye shes gsal ba ston pa'i rgyud// theg dgu a ti kun las rgyal// des na nyi zla rgyal po'i rgyud// ces gsungs so// nyi zla nam mkha'i rgyal po mu med mtha' yas kyi rgyud las// nyi zla'i rgyud kyi rgyal po bstan pa'i le'u ste nyi shu rtsa gsum pa'o// // de nas kun byed rang grol gyis// ming med spyi phud ston pa la// ming med mtha' yas rgyud kyi rgyal po ji ltar lags// zhes zhus pa dang // ston pas 'khor la bka' stsal pa// mu med mtha' yas zab par bshad kyis 'khor rnams nyon// de yang bsdus don gsum du bshad// snang srid btag snang dngos po'i chos mu med pas mtha' yas yin// rig pa// 'gyu ba// 'dzin pa// sems// blo// dran pa ste// de rnams rang byung dang dang mu med mtha' yas pa yin// kun gzhi// bag chags// sgrib g.yogs// dngos med// ming med brjod med// blo 'das// ming med mtha' yas yin// 'ub kyis bsdus pas// snang ba// rig pa// sems su 'dus// snang ba rang grol mu med mtha' yas yin// rig pa dang dngas shugs grol mu med mtha' yas yin// sems nyid skye med dngos de ming med mtha' yas yin// cang med dngos med mtshon du rdul tsam med pas mu med mtha' yas yin// de ltar 'ub bsdus gsum du shes par gyis// bye brag bshad pa mi lang ngo // de ltar ming med mtha' yas rgyud kyi rgyal po yin// zhes gsungs so// nam mkha' nyi zla'i rgyal po mu med mtha' yas kyi rgyud las// rgyud kyi rgyal po'i don bshad pa'i le'u ste nyi shu rtsa bzhi pa'o// // de nas kun byed rang grol gyis// ming med spyi phud ston pa la// bdag cag 'dus pa'i 'khor rnams la// rgyud kyi rgyal po'i mtshan don ji ltar bzung // zhes zhus pa dang // ston pas 'khor la bka' stsal pa// nam mkha'i cho 'phrul nam mkhar sangs pa yis// nam mkha' rgyal po bya bar zung // ka dag 'od gsal sgribs g.yogs sangs pa'i phyir// nyi zla rgyal po bya ba'i rgyud du zung // chos rnams ming med mu mtha' grol ba'i phyir// ming med mtha' yas rgyud du zung // dus gsum rgyun du gnas pa'i phyir// snying po rgyun chad med pa'i rgyud du zung // theg pa kun gyi rtsa ba ston pa'i phyir// theg pa'i rgyud chen bya bar zung // theg pa kun gyi la 'da'i phyir/ la chen 'das pa'i rgyud du zung // a ti'i gong rgal spyi ti'i gnya' gcog pas// bcu rtse zod rgal chen po'i rgyud du zung // zhes gsungs so// nam mkha' nyi zla rgyal po mu med mtha' yas kyi rgyud las// rgyud kyi mtshan bzung ba'i le'u ste nyi shu rtsa lnga pa'o// // de nas kun byed rang grol gyis// ming med spyi phud ston pa la// rgyud 'di skal ldan ji lta bu la gtad// ces zhus pa dang // ston pas 'khor la bka' stsal pa// gtad dang gdams pa'i gnas bstan gyis// 'khor rnams ma yengs gus pas nyon// rgyud 'di gtad pa'i skal ldan ni// sngon gyis las 'phro skal ba can// sbyangs pa'i 'phro sad theg chen snod// bla ma gtsug khur dam tshig srog bzhin bsrung // gdam ngag gter 'chang 'dod yon khar mi gtong // mi 'gyur shes rab che la nor rdzas 'phangs med 'bul// dad can sdig la 'dzem la rgyud 'di dag la gtad// dam nyams snod med nga rgyal dregs pa can// che dregs dge smod sdig spyod g.yo sgyu can// rin chen med par g.yo sgyu thabs kyis 'brel// thob nas slob dpon rgyab phyogs man ngag zong du 'tshong // de lta bu yi slob ma la// yul 'khar ster yang mi sbyin no// de la byin na dmyal bar 'gro// zhes gsungs so// nam mkha' nyi zla rgyal po mu med mtha' yas kyi rgyud las// snod bzang la rgyud gtad pa dang // snod ngan la mi sbyin pa'i gnas bstan pa'i le'u ste nyi shu rtsa drug pa'o// // de nas kun byed rang grol gyis// bstan pa 'byung ba'i dus ni ji tsam na lags// zhes zhus pa dang // ston pas 'khor la bka' stsal pa// yang snying nyi zla'i snying po 'byung dus su// sku dang gsung gi bstan pa nub// thugs rjes bstan pa dar ba'i tshe// lnga brgya dus kyi tha ma la// dus ngan zer zhing spyod pa zod rgyal byed// ri khrod gnas pa'i pad+mo grong gser byed// zas nor bag tsam phyed du chos 'tshong rdzun gyis 'gengs// gcer bu'i spyod pa grong gseb tho chos 'gengs// gos su khyi thul zas su mi gtsang za// lag char mi thod dbyug pa rtse gsum thogs// rnal 'byor nyams can lad mo zas 'dod rnal 'byor byed// de dus yang ti yo ga 'byung // mi thub gsum 'byung rtsod pa me ltar 'bar// btsun chen sde 'khrug sngags pa nang gyes byed// ban sde rnal 'byor chos su rdzogs chen dang // theg chen nyams spyod la bud med chos la dga'// de dus yang ti yo ga 'byung // gser dang gter kun brdol ba'i tshe// de dus yang ti yo ga 'byung // zhes gsungs so// nam mkha' nyi zla'i rgyal po mu med mtha' yas kyi rgyud las// bstan pa 'byung ba'i dus bstan pa'i le'u ste nyi shu bdun pa'o// // nam mkha' nyi zla'i rgyal po mu med mtha' yas kyi rgyud rdzogs so// // rgya gar u rgyan gyi slob dpon yab med yum med sbrul sku 'gro ba'i mgon po// pad+ma'i sdong po las sku 'khrungs pa pad+ma sam b+ha bas bshad cing // bod kyi lo tsa ba ka ba dpal rtsegs kyis u rgyan skad du bsgyur cing gtad la phab pa'o// bka' rgya// gter rgya// gtad rgyaH@#// rgya gar skad du// rat+na a mr-i ta thu la na a a ni pi su si pa ti kha tshe da tan tra// bod skad du// rin po che bdud rtsi bcud thigs