| བོད་ཡིག | e-texts produced with BDRC’s OCR application |
rgya gar skad du/ bod skad du// ma ni bi ma la tan+t+ra nA ma// nor bu dri ma med pa'i rgyud// dpal ye shes gsang ba la phyag 'tshal lo// 'di skad bdag gis thos pa'i dus gcig na// 'og min gyi gnas chos kyi dbyings kyis pho brang na// gnas phun sum tshogs pa ye shes kyi gzhal med khang // rgya yongs su ma chad pa// phyi nang med par ye shes kyis gang ba'i gnas na// ston pa phun sum tshogs pa// 'jam dpal gsang ba// 'khor phun tshogs pa rigs lnga'i bde bar gshegs pa// mdzad spyod phun sum tshogs pa byang chub sems dpa' bcu drug/ chos phun sum tshogs pa gsang ba'i rgyu lnga'o// de rnams kyi snying po bsdus pa byang chub kyi sems nor bu dri ma med pa'i rgyud ces bya ba// sangs rgyas kyi dgongs pa dang gnyis su med par bzhugs so// de nas ston pa 'jam dpal gsang bas// rig lnga'i bde bar gshegs pa rnams la bshad kyang ting nge 'dzin gyis bshad// mnyan kyang ting nge 'dzin gyis mnyan// de nas rdo rje dbyings kyi dkyil 'khor du// bde gshegs rnams kyis rigs kyis 'dul ba'i 'khor rnams dang ting nge 'dzin gyi sgo nas mnyan bshad do// de nas rdo rjes sems dpas rdo rje dbyings kyi dkyil 'khor du// rnam par snang mdzad kyi 'khor sa bcu'i byang chub sems dpa' rnams la byang chub mchog tu sems bskyed nas// rig pa'i ye shes kyis yar bltas pas// chos kyi dbyings kyi pho brang du rigs lnga bde bar gshegs pa'i zhal mthong // de nas rigs lnga'i bde bar gshegs pa rnams dang snyoms par zhugs nas// 'chi med rdo rje'i lung nod do// mnyam pa'i rgyal po kun rig chos kyi rje// 'og min rdo rje dbyings kyi dkyil 'khor du// rdo rje sems dpas rang sems rtogs bya'i phyir// bla med ngo mtshar che ba'i sangs rgyas 'di// rmad dang rtsa ba gcad pas sangs rgyas sems las byung // sems kyi dam pa bdag la bstan du gsol// zhes zhus so// rang byung dbyings nas rig pa rang shar bas// 'gro ba rnams la sems dang sems su snang // rig pa'i rtsal chen dz+nyA na pany+tsa ka ra a// gang zhig sems kyi dam pa rtogs 'dod pa// sems dang ye shes chu dang rnyog ma bzhin// ma skul bzhag na dwangs snyigs 'byed pa bzhin// bde ba 'dod na bsam gtan ting 'dzin gces// sems dang ye shes chu dang 'o ma bzhin// brtan par mi bzhag pas phyed dang ma'i chu bzhin du// sems ye shes yod kyang bag chags nyid kyis bslad// 'gro ba rnams la ye shes sems kyis bslad// rten pa'i byang chub 'dod na chu dang rnyog pa gzhin// rtogs pa'i ye shes 'dod na chu dang 'o ma bzhin// sems dang ye shes dbye ba'i man ngag bstan// zhes ye shes dri ma med pa'i rgyud las// dus gsum gyi sangs rgyas dgongs pa rgyud pa'i le'u ste dang po'o// // de nas bcom ldan 'das dpal rdo rje sems dpas// 'og min lcang lo can gyi pho brang du seng ge lta bu'i sgras bshad// zhus pa po rdo rje 'dzin pas gsang chen rol pa'i dur khrod me ri 'bar bzhes bya ba// nyin zhing du ba 'thul pa// mtshan mo me 'bar ba ma mo dang // gshin rje dang // gnod sbyin mang po 'du ba'i gnas de nam mnyan no// kye rdo rje 'dzin pa nyon cig/ ngas phyogs bcu'i dus gsum gyi bde bar gshegs pa thams cad kyi thugs kyi klong brtol ba// nor bu dri ma med pa'i man ngag gi rgyud 'di bstan par bya'o// de yang dang por lung las 'das pa'i chos// gzhi'i 'dug tshul ngo bstan pa dang // gnyis pa'i lung dang man ngag gis yid ches par byed pa'i chos// sku gsum gyi 'dug tshul ngo bstan pa dang // gsum pas sangs rgyas kyi rgyud lngas blo'i the tshom dang shes pa'i zag gcad pa'i don du// rgyud kyi man ngag gi sbyor mtshams kyi don bstan pa'o// chos kyi sku ngo sprad pa la bzhi ste// gzhi shes pa chos kyi sku// 'bras bu longs spyod rdzogs pa'i sku// rdzogs sku ngo sprad pa la bzhi// sbrul sku ngo sprad pa la gsum// de yi man ngag la yi ge drug/ ngo ma shes// yid ma ches/ zag mchod/ de shes/ yid ches/ zag chod// yig gi drug la sgra 'gyur gnyis// de bzhin gshegs pa'i phyag rgya can// de las 'das na rnam par grol// rgyun klong du 'das/ lung klong du 'dus/ man ngag klong du 'das so// rig pa mi 'gegs/ snang ba mi sgrub sems can mi 'gegs// sangs rgyas mi sgrub/ dug lnga mi 'gegs/ ye shes mi sgrub/ 'dod yon mi spong / chos mi sgrub/ yod pa mi 'gegs/ yod pa la mngon par ma zhe na/ byas pa mi 'gegs/ byas pa la skyon du mi lta/ med pa mi slu/ med pa la zhe 'dod mi bskyed/ ngo sprad pa dang rtogs pa thob pa dus mnyam mo// rtogs pa thob pa dang chos bom pa dus mnyam mo// dbugs chad pa dang sangs rgyas pa dus mnyam mo// sangs rgyas pa dang thugs rje 'byong pa dus mnyam mo// zhes nor bu dri ma med pa'i rgyud las// sangs rgyas kyi gdams par bzhag pa'i le'u ste gnyis pa'o// // de nas sdud pa po rdo rje chos kyi dbus 'gyur 'od ma'i tshal// sangs rgyas 'byung ba'i byang chub shing drung du bsdu ba rnam pa bzhi zhus pa// kye rdo rje 'dzin pa chen po// bsdu ba'i dngos po bzhi bshad du gsol// zhes zhus pas// rigs kyi/ nyon cig/ yang dag pa'i sangs rgyas la/ sangs rgyas dang sems can gnyis med pas// sangs rgyas 'ba' zhig tu bsdu'o// byang chub sems dpa' rnams la rdzu 'phrul gyi rkang pa bzhi la sogs te// stobs dang mi 'jigs pa dpag tu med pa yod kyang // chos thams cad kyi de bzhin nyid ma mkhyen pas// sems can gyi sder bsdu'o// sems can rnams kyi rkyen khyad par can dang phrad na rtogs pa skad cig ma la skye ba'i thabs yod pas// sangs rgyas kyi sder bsdu'o// de bzhin gshegs pa'i bka' dri ma med pa'i rgyu 'di ni// ston pa rdo rje 'chang gis bstan// zhu ba po rdo rje 'dzin pas zhus te// bsdus pa po rdo rje chos bsdus pa// kye kye rdo rje 'chang thabs mchog tu gyur pa legs so legs so// zhes bsdus pa'o// kye sdud pa po rdo rje chos legs par nyon cig/ 'khor ba'i chos ni rgya chad pa yin no// chos kyi sku bde ba chen po ni rgya chad pa yin gyi// ci ste 'khor ba rgya chad pa mtha' la zug med// chos sku rgya chad rtogs na 'gyur ba med// sangs rgyas ye shes rang snang rtogs 'dzin mtha' las 'das// 'khor 'das gnyis med sems can don mi gzigs// sems can yul las snang nas sangs rgyas zag bcas yin// byang chub sems dpa' rnams ni sa nas sa ru bgrod pas rtsol sbyong don mi spong // sa nas sa ru bgrod kyang ye shes rang snang yin// bgrod tshe sgra dang sa g.yos 'byung // 'gro ba rnams kyi yang dag sangs rgyas gzigs// sangs rgyas mtshan ma'i yul las rang 'das kyang // rang gi shes rab blo la snang bas bla ma'i ngag/ de 'gro ba rnams kyis yang dag sangs rgyas gzigs// zhes bya'o// sdud pa po rdo rje chos gang zhig rtogs pa mngon du gyur pa'i dus su// rang mngon du gyur pa mtshan ma'i blo la snang na// snang ba'i dus de nyid du zag pa dang bcas pa'o// mngon du gyur pa'i dus na snang ba 'dzin med na/ rang byung dbyings rig pa'i ye shes brdal ba cig gsungs so// thugs kyi rgyud dam pa rin po che spungs pa'i rgyud kyi snying po'i bcud phyung ba// byang chub kyi sems nor bu dri med pa'i rgyud rdo rje sems dpa' 'jam dpal gsang ba'i thugs klong nas phyung ba las le'u ste gsum pa'o// / rdo rje 'chang chen pos thabs mchog tu gyur pa legs so legs so// zhes bsdus pa'o// rdzogs so// /