བོད་ཡིག

e-texts produced with BDRC’s OCR application

bstan pa 'dis bcom ldan 'das la mngon par bstod do// thig le gsang skor gyi mdzod kyi rtsa rgyud rdzogs so// // @#// rgya gar skad du/ bud+d+ha sarba sa mi ti mang la A ta/ dz+nyA na a lo ke ma hA tan tra nA ma/ bod skad du/ sangs rgyas thams cad kyi dgongs pa ma bcos ji bzhin ma'i don ye shes kyi mar me chen po'i rgyud ces bya ba/ dpal rdo rje sems dpa' la phyag 'tshal lo// 'di skad bdag gis bdag nyid chen po la thos pa'i dus gcig na/ 'og min gyi gnas rgyan ma bkod par snang ba/ yang dag par rdzogs pa'i sangs rgyas rdo rje 'chang chen po lhan cig skyes pa ye shes/ rang snang rtogs pa'i 'khor/ 'du 'bral med pa'i grogs/ rtag par bzhugs pa'i tshe/ gdul bya rang snang gi 'khor dang thabs cig tu bzhugs so// de'i tshe rdo rje sems dpas 'di skad ces gsol to// kye kye/ mi 'gyur lhun grub kun bzang rdo rje 'chang // sangs rgyas kun gyi sa na dgongs pa ji ltar bzhugs// 'khrul gsum sbubs nas ma 'khrul sangs rgyas ji ltar gnas// ma btsal dang la bsdad pas rtogs ldan ji ltar grol// de rang gi mtshan nyid mngon du ji ltar 'gyur// 'dus pa'i tshogs dang ma 'ongs snod ldan rjes 'jug la// bstan pa'i sgron mar gyur pa ye shes mar me'i rgyud// brjod med don dang brda yi sgo nas gsung du gsol// ces zhus so// de nas rdo rje 'chang chen pos bka' stsal pa/ sangs rgyas sa dang 'gro ba'i rgyud las gnas lugs dang // rtogs ldan ma btsal mngon du ji ltar 'gyur// dris pa'i don dang dmigs rnams nges pa'i 'khor la bshad// ces gsungs so// sangs rgyas thams cad kyi dgongs pa ma bcos ji bzhin ma'i don ye shes kyi mar me chen po'i rgyud las/ gleng gzhi dang gleng slang ba'i le'u ste dang po'o// // de nas rdo rje sems dpas gsol pa/ kye kye bcom ldan rdo rje 'chang // dgongs pa'i gnas lugs gsung du gsol// ces zhus so// de nas ston pas bka' stsal pa/ rigs kyi bu kun nges par zungs shig/ yang dag par rdzogs pa'i sangs rgyas kyi dgongs pa dpag pa'i yul las 'das na yang / ngas mdo tsam gcig bstan to// spyir sangs rgyas kyi dgongs pa ni thugs rje skur bzhugs so// mkhyen pa ye shes su gsal lo// rgyud tha dad med pas thig le nyag gcig tu bzhugs so// de logs na med pas so so rang rig pa'i ye shes su bzhugs so// thugs rje sku ru mi bzhugs na/ ston pa 'jig rten du mi 'byon te/ sangs rgyas kyi mdzad pa lhun grub kyis 'gags pas/ nyan thos rang rgyal dang khyad par med do// 'khor 'das 'brel chad do// mkhyen pa ye shes su mi gsal na/ mu stegs chad pa'i lta ba dang khyad par med do// de yang lhun grub kyi ye shes med na/ chad pa spyir gol lo// mngon gyur gyi ye shes med na/ las rgyu 'bras chad par lta ba mu thug pa la sogs par gol lo// rgyud tha dad med pa thig le nyag gcig tu mi bzhugs na/ grangs can dang bye brag pa gnyis su gol lo// logs na med pas thams cad so so rang rig tu mi bzhugs na/ mu stegs rig byed par gol lo// kye ma rigs kyi bu kun sangs rgyas kyi bstan pa la ma tshud pa'i log lta can/ yang dag pa'i lta ba la bar du gcod pa'i lta ba'i mya ngan pa grub mtha'i stegs bcas pa de lta bu sngon yang byung ngo // da lta yang yod do// phyis kyang 'byung bar 'gyur bas// de'i 'dod pa las rab tu grol bar bya'o// sangs rgyas kyi bstan pa la zhugs pa dang / bstan pa'i byin rlabs la spyod pa dang / nyan thos dang rang rgyal pa la sogs lta ba dman pa/ gzhan don mi nus pa/ rang don gtso bor 'dzin pa dus gsum du 'byung bas/ de las rab tu grol bar bya'o// e ma'o rigs kyi bu kun/ thugs rje sku ru bzhugs pas/ mdzad pa 'phrin las kyi gol sa/ nyan thos dang rang rgyal gyi skyon ma spangs par ka nas dag go/ yon tan ma bsgrubs par sku gsum 'du 'bral med par ye nas lhun grub kyis grub bo// mkhyen pa ye shes su gsal bas/ mu stegs chad pa'i skyon gnyis ma spangs par ka nas dag go/ yon tan ma bsgrubs par ye shes gnyis su lhun gyis grub bo// rgyud tha dad med pas thig le nyag gcig tu gnas pas/ grangs gcig gi rdul dang / mun pa dang / chen po so sor gyur pa la sogs pa nyi shu rtsa lngas rdzas grub tu rtag par 'dzin pa dang / 'bras bu'i chos nyi shu rtsa lngar 'dod pa dang gnyis grangs kyi sgo nas mthun pa dang / bye brag pa rdzas dang / yon tan las dang / spyi bye brag 'du ba drug tu 'dod pa dang / sku lnga ngo bo nyid du 'dod pa dang drug yul lnga bdag tu med par 'dod pa dang drug rigs lnga spyi gzugs su 'dod pa dang drug ye shes lnga mi gnas pa'i ye shes dang drug tu 'dod pa de/ grangs kyi sgo dang rang byung ye shes mi 'gyur zhing / 'bras bu phyir mi ldog pa'i sgo nas phyogs gcig gis/ 'dra bzhi'i gol sa rnam par dag go/ so so rang rig pa'i ye shes su bzhugs pas/ thig le nyag gcig tu 'dod pa'i gol sa rnam par dag go/ thig le 'od du gsal ba yang rang bzhin spros dang bral bas/ rig byed sde lnga'i gol sa rang bzhin gyis rnam par dag go/ kye ho/ rang gis rang bzhin ma bcos de bzhin nyid// sprin bral mkha' la nyi ma'i snying po gsal// 'khrul rtog glo bur sprin gyis bsgribs par gyur pa bzhin// rang gi rang bzhin ma shes gol sar lhung // kun gyis spyod yul ma yin mthong bar mi 'gyur bas// so so kun la sgrib par rim par gnas pa yin// de phyir blo la gol sgrib snang bar gyur na yang // ka dag lhun grub don la gdod nas rnam par dag/ e ma ho// de'i phyir sangs rgyas kyi dgongs pa ni// skyon ma spangs par ka nas dag pas ye nas sangs// yon tan ma bsgrubs par lhun gyis grub pas ye nas rgyas pa zhes bya'o// zhes gsungs so// sangs rgyas thams cad kyi dgongs pa ma bcos ji bzhin ma'i don ye shes kyi mar me chen po'i rgyud las/ sangs rgyas kyi dgongs pa mdor bstan pa'i le'u ste gnyis pa'o// // de nas yang rdo rje sems dpas zhus pa/ kye kye ston pa rdo rje 'chang // thugs rje sku ru ji ltar bzhugs// zhes zhus so// de nas rdo rje 'chang chen pos bka' stsal pa/ rigs kyi bu sku'i rnam grangs bsdus pas gsum du bzhugs so// gang zhe na/ rig pa ma 'gags pa gzhi chos kyi sku lhun grub ye shes kyi kha mig can no// shes rab la gsal ba 'bras bu longs spyod rdzogs pa'i sku shes rab kyi kha mig can du bzhugs so// gdul bya la snang la thugs rje sprul pa'i sku 'od kyi kha mig can no// des yang sbrul zer gyi kha mig can du 'phros pa'i gzhi ma 'gags pa'o// kye ma chos kyi sku la ye shes kyi kha mig med na/ longs sku la shes rab kyi kha mig mi 'ong ngo // longs sku la shes rab kyi kha mig med na/ sbrul sku 'od kyi kha mig mi 'ong ngo // sbrul sku la 'od kyi kha mig med na/ yang sbrul 'od zer gyi kha mig mi 'byung ngo // e maho de'i phyir ye shes kyi kha mig can du bzhugs lugs 'chad de/ lhun grub ye shes kyi kha mig can yin pas/ mngon 'gyur mtshan ma can med de/ sku thams cad kyi ngo bo nyid yin pas 'byung bzhir gnas te/ ye shes kyi kha mig la yon tan du grub pa'o// rigs kyi bu mngon gyur ye shes kyi kha mig med pas/ lus lnga'i mtshan mar ma grub pas stong ngo // de yang ji ltar stong zhe na/ gdos bcas sha khrag gi lus med pas/ pha'i rgyu dang ma'i rkyen gyis ma bskyed de/ chags sdang dang reg bya'i thogs pa las 'das so// 'gyu byed yid kyis gzugs las grol bas gzung 'dzin du mi 'gyu/ chags sdang du mi skye ste sgo lnga las yul lngar skye bas ngo bo nyid kyi rtog pa dang / yid sgo lnga'i rjes su 'brangs shing gzung 'dzin du 'gyu bas mngon par spyod pa'i rtog pa dang / nyon mongs pa'i yid lnga phyi'i bag chags 'dzin byed yin pas rjes su dran pa'i rtog pa skye'o// de gsum las grol ba'o// dmigs pa rnam par dag pa'i ting nge 'dzin gyi lus med pas/ cho ga'i yan lag gis lhar bskyed nas sgom pa bskyed pa rim pa'i bzang rtog dang / dngos po bkag nas blos stong pa nyid du sgom pa rdzogs pa rim pa'i bzang rtog ste/ rigs kyi bu nga gdod ma nyid nas sems las 'das pa'i sangs rgyas/ rnam par mi rtog pa'i ye shes su bzhugs pas/ rtog pa'i ming yang med do// rig pa dngos med kyi ye shes la gzung 'dzin dang sngos pa'i chos yod ma myong ngo// mtshan ma 'od kyi lus med pas kha dog dang dbyibs su grub pa med de/ gdul bya la snang ba'i sku'i mtshan ma las grol lo// gcod byed shes rab kyi lus med pas yul dang yul can shes bya shes byed gnyis med de/ rang la rang gsal bas rang byung gi ye shes so// rigs kyi bu snying po ma 'gags pas gsal te/ snying po la skye med 'gag med pas dus gsum mnyam pa nyid du gsal/ gdangs la phyi nang med pas yul sems gnyis med du gsal/ sku la mdun rgyab med pas ye shes zang thal du gsal/ mkhyen pa la phyogs ris med pas chos thams cad dag pa la nyag gcig tu gsal lo// rigs kyi bu sgrib pa med pas zang thal te// snying po la skye 'gag med pa'i yon tan gyis dus kyis ma bsgribs te zang thal/ bag chags kyi rkyen gyis ma bsgribs pas zang thal te/ gdangs la phyi nang med pa'i yon tan no// lus lnga yis ma bsgribs pas zang thal te/ sku la mdun rgyab med pa'i yon tan no// mun snang gi rkyen gyis ma bsgribs pas zang thal te/ ye shes kyi spyan la gsal sgrib med pa'i yon tan no// de ltar lhun gyis grub pas thams cad du 'char gzhi ma 'gags te/ sku gsung thugs bde ba chen po rin po che gsang ba'i sbubs su lhun gyis grub pa'i yon tan no// e mahe rigs kyi bu nyon cig/ sku rin po che gsang ba'i sbubs su ji ltar bzhugs na/ mtshan nyid bzhi dang ldan pa'i chos sku de// sku ru yod pas rin po che// yon tan sangs rgyas sku dang sems can lus su snang // gzugs brnyan med pas rang bzhin gsal ba yin// 'byung ba'i gnas dang rten du gyur pa'i don gyi sbubs// gsung du yod pas rin po che// yon tan sangs rgyas gsung dang sems can sgra skad 'byung // sgra dang tshig las rab tu 'dus pas rang bzhin gsal ba yin// sgra dang tha snyad ji snyed brjod pa gnas dang 'byung ba'i rten du gyur pa'i don gyi sbubs// thugs su yod pas rin po che// yon tan sangs rgyas thugs kyi mkhyen pa'i ye shes dang // sems can blo yi rnam rtog 'byung ba'o// 'byung ba'i gzhi dang bzhugs pa'i rten du gyur pa'i don gyi sbubs// de yang sku yi bzhugs tshul ni// stong la gsal ba chu'i lha'i gzugs brnyan bzhin// de yi gsung gi gnas lugs ni// yan lag rlung bzhi me stag zer bzhin rig pa'i klong na gnas/ de yi thugs kyi gsal lugs ni// srog rlung rang gi ngo bos te// phyogs lhung med pa'i shes rab me stag dang // snying po'i snying po lnga bzhugs so// de yi bzhugs pa'i pho brang ni// chos kyi dbyings te stong khyab nam mkha' bzhin// stong pa ye shes snying po can// nam mkha' dang ni nyi ma'i tshul// stong gsal rin chen gdangs dang chas// de ni chos sku'i bzhugs gnas yin// zhes gsungs so// sangs rgyas thams cad kyi dgongs pa ma bcos ji bzhin ma'i don ye shes kyi mar me chen po'i rgyud las/ chos sku rgyas par bshad pa'i le'u ste gsum pa'o// // de nas bcom ldan 'das rdo rje 'chang gis longs sku'i mtshan nyid bka' stsal pa/ shes rab longs spyod rdzogs pa'i sku// mtshan ma med pa'i phyag rgya can// chos kyi sku yi shes rab yin// chos nyid me long lta bu la// shes rab zer mdangs sku lngar shar// gdul bya rang snang 'khor la snang // shes bya de nyid rtog med gsal// kha mig ma grub kha mig can du gsal// de phyir de la de skad btags// gzhi nyid 'bras bur smin byed shes rab ste// shes rab sku ru smin pa yis// ngo bo nyid kyi chos sku de// ye shes chos kyi sku ru smin// de yis ye shes rgyun ma chad// sku dang ye shes lhun grub gsal// shes rab sku la mtshan ma'i gzugs med pas// gsang sngags phyi nang gnyis pa'o// tha dad 'dzin gyi rtog las grol// ye shes chos sku'i yon tan la// ngo bo chos kyi sku ru gsal// lhun grub rang snang gzhan snang med// rang gsal sku la gnyis snang med// rkyen med rang byung ye shes gsal// sku dang ye shes 'dus ma byas// ye shes rlung lnga shes rab ltar// rtsal ma 'gags par rang byung bas// shes rab zer gdangs sku dang ye shes shar// shes rab sku la dbang sgyur bas// de yis sbrul sku lnga yi bdag por gsal// nges 'byung med na mi 'byung ba'o// rdo rje gsang ba'i gtan tshigs so// zhes gsungs so// sangs rgyas thams cad kyi dgongs pa ma bcos ji bzhin ma'i don ye shes kyi mar me chen po'i rgyud las/ longs sku rgyas par bshad pa'i le'u ste bzhi pa'o// // de nas ston pas/ sbrul sku bka' stsal pa/ gdul bya la sprul pa'i sku// sku dang ye shes smin khugs ni// dngas gsal mi g.yo chos nyid la// 'ja' tshon gzugs brnyan chu zla ji bzhin du// gdul bya gnyis la 'dul byed gnyis// zhi khro gnyis kyi snang ba shar// stobs lngas rang byung rang shar la// tshad lngas rang byung rang gsal lo// de ni 'od kyi kha mig can// zer gyi sku la nges pa med// mthun byas sku ni sna tshogs ston// mdor bsdus thub pa chen po drug mthun pa'i sems can las snang ba// ye shes drug po'i sgo nas 'byung // mthun snang sna tshogs ma nges yun thung ba// sprul pa'i sku yi gtan tshigs yin// yul dang lus ngag bsam mthun pas// snang ba ma log brda sprad de// so so'i skad du chos ston cing // gdul bya'i sems la dbang sgyur zhing // mos pa bskyod cing mdzes par snang // sbrul sku rnam gnyis zhing khams la// bzhi dang drug shar phyogs rig med// gdul bya so sor sna tshogs snang // thugs rje phyogs dang ris med pas// mthun snang sbrul sku sna tshogs shar// gdul thabs phyogs dang ris med pas// theg pa'i bye brag sna tshogs snang // ta la'i mgo bcad mes tshig ltar// mi 'gyur 'bras bu sna tshogs pa'o// zhing khams ma nges tha dad pas// gdul bya rnam gnyis tha dad snang // 'dul byed gcig tu ma nges pas// thugs rje sbrul sku tha dad snang // gdul thabs gcig tu ma nges pas/ lam gyi bye brag tha dad snang // thun mong ma yin rigs bzhi rang snang la// 'dul byed rang snang rnam snang shar ba'i tshe// gzigs pas mkhyen pas skad cig don rnams rdzogs// brgyud med ldog cing 'du 'bral med na yang // don rnams mi mdzad mnyam nyid gcig tu bzhugs// thun mong rigs drug yul du snang ba yang // rtog med tshul du snang mkhyen yul du snang // 'od zer brgya la sprul pa stong // skad cig gcig la mdzad pa rdzogs// de bzhin sprul pa'i rgyu mtshan gzhan// thun mong khyad par so sor sbyar// bsdu na rnam pa gnyis su te// thun mong ma yin sprul pa'i sku// gzhon nu bum pa'i sku lnga yin// yang sbrul zer gyi kha mig can// thub drug dgra bcom gser du sogs// so sor mthun par snang ba'o// zhes gsungs so// sangs rgyas thams cad kyi dgongs pa ma bcos// ji bzhin ma'i don ye shes kyi mar me chen po'i rgyud las/ sbrul sku rgyas par bshad pa'i le'u ste lnga pa'o// // de nas rdo rje sems dpas zhus pa/ kye kye ston pa rdo rje 'chang // mkhyen pa'i ye shes gsal lugs gsung du gsol// ces zhus so// de nas rdo/ rje 'chang chen pos bka' stsal pa/ e maho 'dus pa'i tshogs chen po// ye shes rnam pa gnyis su gsal// lhun grub dang ni mngon gyur to// lhun grub ye shes rnam pa gnyis// gzhi gnas mtshan nyid 'dzin pa'o// gzhi 'dzin rig pa dngos med ye shes te// stong pa rig pa'i snying po can// mtshan nyid 'dzin pa'i ye shes lnga stong gsal// de ni chos dbyings ye shes yin// gsal ba me long ye shes yin// de ni rang gsal rgya mi chad// gsal stong mi phyed dus gsum skye 'gag med// mnyam nyid ye shes zhes su bya// mtshan nyid so sor ma 'dres pa// bder shes kun rtog ye shes yin// thogs pa gnyis med bya ba grub// mngon gyur ye shes gnyis yin te// rnam pa thams cad mkhyen pa dang // thams cad mkhyen pa'i ye shes so// dang po mtshan nyid gsum ldan te// me long ye shes mngon gyur pas// 'khor 'das ma 'gags gzugs brnyan bzhin// kun rtog ye shes mngon gyur pas// 'khor 'das ma 'dres so sor gsal// mtsho la gza' skar shar ba bzhin// bya ba grub pa mngon gyur pas// thogs med don rnams lhun gyis grub// dang po bzhi dang bag chags sbubs// gnyis ni lhun grub rang chas gnas// 'di ni rgyal ba gzugs sku'i mkhyen pa ste// 'od kyi sbubs nas rtog med 'char// mtshan nyid rnam gsum gtsor smos pa'o// lhun grub dngos nas kun kyang rdzogs// thams cad mkhyen pa'i ye shes te// mtshan nyid rnam pa gnyis dang ldan// chos dbyings ye shes mngon gyur pas// ye shes dbyings su thim pa yis// 'khor 'das gzigs snang rnam par dag/ sangs rgyas yul med rang bzhin rnam dag dang // mnyam nyid ye shes mngon gyur pas// sangs rgyas sems can gnyis med de// ye shes mig gcig dri ma med// rang gsal 'dzin med nyag gcig ma// sangs rgyas chos sku'i mkhyen pa ste// rin po che yi sbubs su 'char// mtshan nyid gnyis ldan gtso cher brjod// ces gsungs so// sangs rgyas thams cad kyi dgongs pa ma bcos ji bzhin ma'i don ye shes kyi mar me chen po'i rgyud las// ye shes rgyas par bshad pa'i le'u ste drug pa'o// // de nas rdo rje sems dpas yang zhus pa/ kye kye ston pa rdo rje 'chang // tha dad med pa'i nyag gcig/ gsung du gsol// zhes zhus so// ston pas bka' stsal pa/ kye ma rdo rje sems dpa' nyon cig thugs rje'i snang lugs sku gsum dang // mkhyen pa'i snang lugs ye shes gnyis// rdzogs tshul rigs kyi tha dad kyang // chen po'i rgyud la tha dad med// gnas lugs thig le nyag gcig ma// gzhi dang rten nam snang cha yis// sku zhes gdul bya rnams la brjod// mkhyen cha gsal cha 'dab yin pas// ye shes zhes su gdul bya rnams la brjod// sku yi mkhyen pa ye shes nyid// de yin 'char gzhi sku yin no// spyi yi rig pa mtshan nyid gcig/ ngo bo so sor rang rig go/ rang mtshan ngo bo gcig pa la// rang bzhin tha da snang ba'o// de phyir nyag gcig ces bya'o// zhes gsungs so// sangs rgyas thams cad kyi dgongs pa ma bcos ji bzhin ma'i don ye shes kyi mar me chen po'i rgyud las/ sku dang ye shes tha dad med pa'i thig le nyag gcig tu bstan pa'i le'u ste bdun pa'o// // de nas rdo rje sems dpas 'di skad ces gsol to// kye kye ston pa rdo rje 'chang // so so rang rig bzhugs tshul gsung du gsol// zhes zhus so// ston pas bka' stsal pa/ e maho 'dus pa'i tshogs rnams nyon// thog ma gzhi yi dus nyid na// chos nyid stong pa'i mkha' klong na// rig par gnas la mi rtag par// stong rig sde dang bcas pa ni// ngo bo rang bzhin thugs rje gsum// so so rang rig mi g.yo ba// stong pa rig pa'i snying po can// rang snang ma shes 'khrul tsam na// rang gi ngo bo rtog med kyang // rtsal gyi rig pa rtog par shar// so so'i log rtog bsam mi khyab// bde sdug 'bras bu so sor smin// sangs rgyas lam la gnas tsam na// rtogs tshad mi mthun so sor shar// 'bras bu mngon du gyur tsam na// gdul bya 'dul byed thabs dang bcas// bsam gyis mi khyab so sor snang // zhes gsungs so// sangs rgyas thams cad kyi dgongs pa ma bcos ji bzhin mi 'don ye shes kyi mar me chen po'i rgyud las/ so so rang rig tu bzhugs tshul bstan pa'i le'u ste brgyad pa'o// // sangs rgyas kyi spyi sa bstan pa'i skabs ste dang po'o// // de nas rdo rje sems dpas 'di skad ces gsol to// kye kye bcom ldan rdo rje 'chang // 'khrul pa gsum po ji ltar 'khrul// ma 'khrul sangs rgyas ji ltar grub// ces zhus so// rdo rje 'chang gis bka' stsal pa// rdo rje sems dpa' nges zung zhig/ ma rig 'khrul pa glo bur ba/ gzhi la med la rtsal la snang // gzhi 'dzin rig pa rgya ma chad// ngo bo rang bzhin thugs rjer gnas// de ni 'khor 'das kun gyi gzhi// rma bya'i sgo nga nor bu bzhin// rgyu ni rang bzhin 'od lnga la// rnam pa yul du snang ba yin// rkyen ni chos nyid nam mkha' bzhin// stong pas go phye gong snang shar// 'khrul pa thams cad sems 'khrul te// lhan skyes ma rig kun gzhir 'khrul// kun brtags ma rig yid du 'khrul// de las sgo nga legs par grub// rmi lam sgyu ma'i tshul du 'khrul// mi mthun bde sdug sna tshogs myong // lhun grub gnas lugs sangs rgyas ni// sku dang ye shes gnyis med nyag gcig gam// so so rang rig ye shes te// tsit+ta rin chen gzhal yas khang // chos kyi 'khor lo'i gdan la bzhugs// stong pa sgron ma'i snying po can// rig pa 'od kyi khang pa can// 'od mtha' med pa'i yul can te// nam mkha' gud can nya mig can// 'dug tshul gnas pa gnas kyi thob// de ni bzhugs pa'i pho brang yin// snang tshul 'jam pa sgron ma gsum// tshang du mi sdod sgor sdod pa'i// bya khra 'dra ste ngo bo gsum// ye shes gsum brtsegs snang ba yin// thog ma'i sangs rgyas 'od mi 'gyur// rin chen sbubs na gnas pa ste// thig le ye shes sgron ma ste// chu yi sgron ma'i dbyings na bzhugs// rgya mtsho gangs kyi sgron ma la// rin chen sbubs kyi gdangs shar ba// gnas lugs 'gyur ba med pa'i gdangs// mthing kha bai DUR+Ya yi mdog/ yon tan 'gag pa med pa'i gdangs// rin chen gser gyi nyi ma shar// de yi sbubs na gnas pa ste// sku gsum ye shes lnga ldan pa'i// thig le nyag gcig chos kyi sku// tha dad med pa'i nyag gcig ma// spyan cher bzhir ldan rang rig ste// rus sbal gab pa'i tshul du bzhugs// de yi thugs rje'i rtsa la shar ba// 'gyur med rig pa'i sgron ma de// gnas lugs 'gyur ba med pa la// snang ba 'gag pa med pa ni// nyi ma dang ni zer bzhin du// 'gyur med rig pa'i sgron ma shar// de la shar lugs rnam pa gsum// rig pa sems kyi sgron ma dang // brgyud pa gsum pa shes rab sgron ma dang // nam mkha' gser gyi sgron ma'o// dang po mi 'gyu ba yi 'gyu ba ste// sgron ma'i gnas ni chos kyi 'khor lor 'gyus// sbubs med 'gyu ba ye shes rlung gi rta// de nas rig pa sems kyi rta la zhon// rnam shes rlung la zhon pa yi// 'gyus pa rig pa'i rtsal du 'gyus// zhon ni sems kyi rta la zhon// song ni gzung 'dzin rtog par song // spyod ni sgo lnga yul la spyod// skye ni chags sdang dug lngar skyes// bsog ni bag chags snod du bsog/ sbyor ni bag chags gnas su phung po nying mtshams sbyor// myong ni sdug bsngal sna tshogs myong // gnyis pa dgongs pa brda dang snyan brgyad nas// gsang sngags don gyi tshad ma byung // dpe la brten nas don ngo shes// rtags la brten nas yid ches 'gyur// don gyi snying po thag chod pas// gzhi la grub pa'i shes rab gsum// sa bon tshul du gnas pa de// rkyen las byung ba'i shes rab kyis// 'bras bu'i tshul du smin pa yis// ma rig pa yi mun pa sangs// shes bya'i sgrib pa rang dag pas// ma btsal 'bras bu rang rig mthong // gsum pa bya bral lhug par brtag/ sgo gsum rten pas sgo bzhi 'char// thig le mthong rtogs sgo yang phye// de yis rtogs pa rgyud la smin// zhes gsungs so// sangs rgyas thams cad kyi dgongs pa ma bslad ji bzhin ma'i don ye shes kyi mar me chen po'i rgyud las/ 'khrul pa gsum gyi sbubs na ma 'khrul pa'i sangs rgyas gnas lugs dang / 'khrul pa'i sangs rgyas gnas lugs dang / 'khrul pa'i 'khrul tshul bshad pa'i le'u ste dgu pa'o// // sangs rgyas rang la gnas pa'i skas ba te gnyis pa'o// // de nas yang rdo rje sems dpas 'di skad ces zhus so// kye kye bcom ldan rdo rje 'chang // btsal med ngang la ji ltar bsdad// 'bras bu rang gi mtshan nyid sngon du ji ltar 'char// zhes gsol to// rdo rje 'chang gis bka' stsal pa// rdo rje sems dpa' ngos zungs shig/ nyi ma mar me rang gi 'od la 'dug pa bzhin// rig par gdangs gsum ngang la gzhag/ thug phrad rnam pa lnga yis snang ba rgya yis gdab// ma bcos ji bzhin gzhag na a ti'i dgongs pa yin// e maho rigs kyi bu dad pas bla ma'i gdams pa zhu'o// gdams pas shes rab kyi mig phyed de// shes rab kyi spyan gyis bltas pas// sangs rgyas sku dang ye shes su mthong // tha dad med pas thig le nyag gcig tu mthong // de logs na med pas so so rang rig tu mthong // de gnas pa ye shes rin po che'i sbubs na gnas// de yin pa thig le ye shes kyi sgron ma yin// shar ba rgya mtsho'i dngas la shar// gsal ba phyi nang med par gsal// e maho// de rtogs lta ba de gnas sgom pa yin// blo chung de la mi gnas pas// rkyen gsum phyi nang gsang ba dang // yan lag gsum dang 'char sgo gsum// rlung dang yig 'bru gdangs dang skus// mi gnas gnas pa bya ba'i thabs// bying rgod gsal zhing thun tshad gzung // drod dang rtags rnams shugs kyis 'byung // gzhi gzhag gzhi bzhengs dgongs pa la// rim pa bzhin du ma bslabs kyang // ting 'dzin rgyal po drug rdzogs te// sku gsum gsal tshad gsum ldan pas// seng ge rtsal rdzogs dgongs pa yin// rtsol bral mkha' la rang gsal ba// khyung chen gshog rdzogs dgongs pa yin// dngos med zang thal dang gnas pa// nam mkha' rnam dag ting 'dzin yin// mar me gcig la gnyis gyes ltar// gnas lugs gcig la snang lugs gnyis// ye shes sgron ma gnyis snang ba// nyi zla kha sbyor dgongs pa yin// chos nyid ngang las ma g.yos bzhin// nam mkha' gud du gcad pa bzhin// dngas pa'i chu la rin chen sbubs shar ba// rgya mtsho dngas pa'i ting nge 'dzin// de yi snying por rang rig lhun grub pa// yid bzhin nor bu'i dgongs pa'o// rtsol ba mi bya ye bral lhug par gzhag/ de la gnyen pos bcos shing dgag du med// byang chub lam gyi sgron ma'o// de ltar rtogs shing de la spyod pa de// nam zhig ye shes sbubs su 'pho dus su// gcig 'gags pas su 'khrul pa rang log tu 'gyur// ldog tshul bzhi yis 'khrul pa phra rags sangs// rtags rnams rim 'byung gdams pa dran par bya// chos tshul lnga yis sku dang ye shes rgyas// lhun grub mngon gyur 'das pa'i chos lngar bzhugs// mngon shes drug rdzogs rnam kun mkhyen pa 'char// ye shes drug las sprul pa'i 'od zer 'phro// bum nang mar me bum chags bral ba bzhin// bag chags sbubs kyi bum nang na// rang rig mar me gnas pa de// dbugs dang bral bas ngon gyur te// gcig skyes pas su 'jug pa rang sa snang // ye sangs rgyas pas yang sangs rgyas// gcig gnas pas su dus tshod rgyal sa zin// stong pa rig pa'i snying po can// lhun grub ye shes kha mig can// sku las 'das pa'i ye shes yin// rig pa shes rab snying po can// longs sku shes rab kha mig can// yid las 'das pa'i shes rab yin// shes rab thugs rje'i snying po can// sbrul sku 'od kyi kha mig/ can// chos las 'das pa'i sangs rgyas yin// thugs rje ye shes snying po can// sbrul sku lnga yi mkhyen pa yin// 'byung ba las 'das pa'i rang gdangs te// chos nyid klong na mthing kha gsal// mthing kha'i klong na bzhi po 'khyil// de yi snying po rang gnas pas// rin po che yi sbubs yin no// rang snang ye shes ma 'gags pa// stong pa ye shes snying po can// tshig las 'das pa'i rang snang yin// yang dag mya ngan 'das pa'i 'od// rdo rje'i gdan la yang sangs rgyas// zhes gsungs so// sangs rgyas thams cad kyi dgongs pa ma bcos ji bzhin ma'i dgongs pa mi 'gyur ba'i don ye shes kyi mar me chen po'i rgyud las/ grol lugs 'bras bu dang bcas pa bstan pa'i le'u ste bcu pa'o// // rtogs shing nyams su blangs pas sangs ji ltar rgyas pa'i skabs gsum pa'o// // de nas sangs rgyas rdo rje 'chang gis rgyud yongs su gtad pa 'di gsungs so// e maho 'dus pa'i tshogs// ma byung 'byung bar mi 'gyur ba'i// rmad du byung ba'i rgyud chen 'dis// grub mtha'i mun pa rab sel ba// rdo rje gsang ba'i gtan tshigs kyis// shes bya'i me long ye shes mar me chen po'i rgyud ces zungs shig bag chags kyi sbubs na rang rig pa'i ye shes la sku dang ye shes ma btsal bar lhun gyis grub par ston pas/ yid bzhin nor bu rin po che'i rgyud ces zungs shig/ btsal rtsol sgrub las 'das pa'i lam 'bras bu dang bcas pa ston pas/ ye shes rang grol chen po'i rgyud ces zungs shig sgron ma rnam pa gsum las brgyad du phye nas ston pas/ sgron ma rnam par bkod pa'i rgyud ces zungs shig/ rgyud thams cad kyi dgongs pa gcig tu bsdus na sangs rgyas kyis na gnas lugs ston pas/ nyag gcig dgongs pa 'dus pa sangs rgyas pa'i rgyud chen po zhes zungs shig theg pa brgyad kyi blo'i rtog pas ma bslad pas gnas lugs bzhugs tshul ston pas/ sangs rgyas kyi dgongs pa ma bcos ji bzhin pa'i don/ lta ba nam mkha' khyab pa'i ye shes/ rus sbal gab pa'i rgyud ces zungs shig ces gdams so// de nas rdo rje sems dpas ma bzhengs pa'i gdan las bzhengs nas/ phyag lan gsum btsal/ bskor ba lan gsum mdzad nas/ de de bzhin du gzung zhing bcang bar bgyi'o// rig pa 'dzin pa rnams de de bzhin du byos shig ces gsungs so// sangs rgyas thams cad kyi dgongs pa ma bcos ji bzhin ma'i don ye shes kyi mar me chen po'i rgyud las/ rgyud yongs su gtad pa'i le'u ste bcu gcig pa'o// // sangs rgyas kyi dgongs pa ma bcos ji bzhin ma'i don ye shes kyi mar me chen po'i rgyud ces bya ba rin po che gter gyi snying po rdzogs so// //