བོད་ཡིག

e-texts produced with BDRC’s OCR application

rgya gar skad du/ u pa tsit+ta dzA ya sa ma ti tan+t+ra nA ma/ bod skad du/ man ngag snying gi dgongs pa rgyal ba'i bka' zhes pa'i rgyud/ sangs rgyas 'od mi 'gyur ba la phyag 'tshal lo// 'di skad bdag gis bstan pa'i dus gcig na// rgyal ba 'od kyi phung po chen po/ ye shes kyi gzhal med khang na/ rigs lnga'i sangs rgyas dang / thugs kyi dkyil 'khor 'od gsal ba'i dgongs pa la bzhugs so// 'di skad bdag gis thos pa'i dus gcig na/ rgyal ba rdo rje sems dpa' longs spyod rdzogs pa'i sku'i zhing khams na/ thugs rje rang gi dkyil 'khor/ sku dang ye shes 'du 'bral med pa'i dgongs pa la bzhugs so// de'i tshe gsang ba'i bdag pos 'di skad ces zhus so// kye kye bcom ldan 'das sku dang ye shes 'du 'bral med pa'i dgongs pa gsung du gsol/ zhes zhus so// bcom ldan 'das kyis bka' stsal pa/ kye gsang ba'i bdag po khyod ma yengs par nyon cig/ ngas sku dang ye shes 'du 'bral med pa'i don bstan to// kye gsang ba'i bdag po sangs rgyas chos kyi sku dang ye shes kyi sku dang / ye shes 'od kyi sku ru bzhugs pas mtshan ma'i gzugs sam mtshan ma'i lus med do// kye gsang ba'i bdag po sangs rgyas kyi sku la mtshan ma'i gzugs med pa de yin no// khyod ma yengs par nyon cig/ rang gi shes rig gi ngo bo stong sang nge ba 'di/ dngos po dang mtshan ma ci'i ngo bor yang ma grub par stong sang nge 'dug pa 'di ka chos nyid kun tu bzang mo yin no// rang gi rig pa 'di stong pa bdo tsa na stong pa byang chad du ma song bar/ rang gi shes pa sang nge sal le ba 'di rig pa kun tu bzang po yin no// rang gi rig pa'i ngo bo stong pa dang / rang gi shes pa wal le ba dbyer med mi phyed par 'dug pa 'di/ sangs rgyas chos kyi sku yin no// rig pa ma 'gags par gsal ba 'di sangs rgyas su ngo shes nas rang rang gis longs spyod pa de/ longs spyod rdzogs pa'i sku yin no// rang gi shes pa sang nge sal le ba 'di/ sangs rgyas yin rang gi shes pa rang rang sangs rgyas yin no// gzhan la bstan pas gzhan sangs rgyas pa de thugs rje sprul pa'i sku yin no// kye gsang ba'i bdag po rang gi rig pa gsal le rig ge ba 'di gsal ba'i ngos nas me long lta bu'i ye shes yin no// rig pa mtsham med pa stong pa'i ngos nas chos kyi dbyings kyi ye shes yin no// rang gi rig pa gsal stong dbyer mi phyed pa'i ngos nas/ mnyam pa nyid kyi ye shes yin no// rang gi rig pa der shes kyi shes rab mi 'gag pa'i ngos nas/ so sor rtogs pa'i ye shes yin no// rang gi rig pa thogs pa med pa'i ngos nas/ bya ba grub pa'i ye shes yin no/ rang gi rig pa sal le ba 'di sangs rgyas kyi sku yin no// rang gi rig pa ma 'gags par wal le ba 'di chos kyi ye shes yin no// sangs rgyas sku dang ye shes 'du 'bral med par bzhugs pa yin no// kye gsang ba'i bdag po rang gi shes rig gi ngo bo sal le ba 'di sangs rgyas su ngo shes nas/ rang gi rig pa rang la rang blta ba de sangs rgyas kyi dgongs pa la 'jog pa yin no// zhes gsungs so// man ngag snying gi dgongs pa rgyal ba'i bka' zhes bya ba'i rgyud las/ sku dang ye shes 'du 'bral med pa'i gleng gzhi'i le'u ste dang po'o// // de nas yang gsang ba'i bdag pos 'di skad ces zhus so// kye kye bcom ldan 'das sangs rgyas sku dang ye shes rang la ji ltar du bzhugs zhes zhus pas/ bcom ldan 'das kyis bka' stsal pa/ kye gsang ba'i bdag po khyod nyon cig/ sems can thams cad la rang rang gi snying dkyil na/ chos kyi dbyings kyi ye shes sku mdog mthing gar bzhugs so// me long lta bu'i ye shes dkar por bzhugs so// mnyam pa nyid kyi ye shes ser por bzhugs so// so sor rtogs pa'i ye shes dmar por bzhugs so// bya ba grub pa'i ye shes ljang gur bzhugs so// rang rang gi snying gi dkyil na/ sangs rgyas thams cad kyi mes po/ sangs rgyas 'od kyi phung po chen por bzhugs so// kye gsang ba'i bdag po rang gi mig rdo rje sems dpa'i me long la btsug nas bstan na/ sangs rgyas 'od mi 'gyur ba'i sku cha phra la dngas pa/ gsal la 'tsher ba/ rang bzhin sdug la nyam nga ba/ mdzes pa'i 'od zer 'phro ba mngon sum du mer mer 'char ro// kye rdo rje 'dzin pa chen po/ rang rang gi tsit+ta'i dkyil na rig pa kun tu bzang po'i gdangs las mtshan nyid 'dzin pa'i kun tu bzang po sku mdog dkar por bzhugs so// chos nyid kun tu bzang mo'i gdangs las/ mtshan nyid 'dzin pa'i kun tu bzang mo sku mdog mthing gar bzhugs so// kun bzang yab yum gnyis kyi sku ru rang gi snying gi dkyil na bzhugs so// dbus rnam par snang mdzad sku mdog mthing ga seng ge'i gdan la bzhugs pa/ phyag na 'khor lo rtsibs brgyad pa bsnams pa/ yum nam mkha' dbyings phyug ma dang / kun tu zhal yab yum zhal sbyar nas/ rang rang gi snying gi dkyil na bzhugs so// rdo rje sems dpa' sku mdog dkar po phyag na rdo rje rtse lnga bsdams pa/ glang po che'i gdan la bzhugs pa/ yum sangs rgyas spyan dang zhal sbyor nas yod do// byang chub sems dpa' sa'i snying po dang / byams pa me tri gnyis/ sems ma lA se ma dang / ma le ma gnyis kyis bskor nas/ rang gi tsit+ta'i shar na bzhugs so// rin chen 'byung ldan sku mdog ser po// phyag na nor bu rin po che bsnams pa/ rta mchog gi gdan la bzhugs pa/ yum mA ma kI dang zhal sbyor nas bzhugs so// byang chub sems dpa' nam mkha'i snying po dang / kun tu bzang po gnyis/ sems ma girti ma dang / ni rti ma gnyis kyis bskor nas rang rang gi tsit+ta'i lho na bzhugs so// snang ba mtha' yas sku mdog dmar po phyag na pad+ma 'dab brgyad bsnams pa/ rma bya'i gdan la bzhugs pa/ yum gos dkar mo dang zhal sbyor nas yod do// byang chub sems dpa' spyan ras gzigs dang / 'jam dpal gnyis/ sems ma d+hA pe ma dang / puSh+pe ma gnyis kyis bskor nas/ rang gi tsit+ta'i nub na bzhugs so// don yod grub pa sku mdog ljang gu/ phyag na rdo rje rgya gram bsnams pa/ nam mkha' lding gi gdan la bzhugs pa/ yum dam tshig sgrol ma dang zhal sbyor nas 'ong ngo // byang chub sems dpa' phyag na rdo rje dang / sgrib pa rnam par sel ba gnyis/ sems ma A lo ke dang / gan+d+he ma gnyis kyis bskor nas/ rang gi tsit+ta'i byang na bzhugs so// rang gi tsit+ta'i shar na khro bo rnam par rgyal ba dang / sgo ma lcags kyu ma zhal sbyar nas yod do// rang gi tsit+ta'i lho na khro bo gshin rje gshed po dang / sgo ma zhags pa ma zhal sbyor nas yod do// rang gi tsit+ta'i nub na khro bo rta mgrin dang / sgo ma lcags sgrog ma zhal sbyor nas yod do// rang gi tsit+ta'i byang na khro bo bdud rtsi 'khyil pa dang / sgo ma dril bu ma gnyis zhal sbyor nas yod do// rang gi tsit+ta'i dkyil na zhi ba'i sku thams cad nyung 'bru tsam la spyan phul thag dang bcas pa tsam du bzhugs so// rang gi spyi gtsug bde ba chen po'i 'khor lo'i rtsa na/ rang byung sangs rgyas dbang po brgya byin bzhugs so// rang gi lhag pa'i rtsa ba min gyi ra lta bu'i nang na/ rang byung gi thags bzang ris bzhugs so// rang gi snying gi srog pa rtsa'i shel gyi sbubs na/ rang byung gi shAkya thub pa bzhugs so// rang gi lte ba sprul pa'i 'khor lo'i dkyil na/ rang byung gi sangs rgyas rab tu brtan pa bzhugs so// rang gi gsang ba bde bskyed na/ rang byung gi kha 'bar ma bzhugs so// rang gi rkang pa'i rtsa ba zhag 'khyil pa'i nang na/ rang byung gi a ba glang mgo can bzhugs so// rang gi tsit+ta'i dkyil na zhi ba'i lha tshogs bzhugs tshul bstan pa'i le'u ste gnyis pa'o// // kye gsang ba'i bdag po khro bo'i sangs rgyas thams cad rang rang gi klad pa dung gi gzhal yas khang na/ sdong po las me tog rgyas pa ltar du bzhugs so// bcom ldan 'das dpal badz+ra he ru ka zhes bya ba/ sku mdog mthing nag dbu gsum pa/ zhal g.yas dkar ba/ g.yon dmar ba/ dbus mthing nag la/ zhabs bzhi gyad kyi dor stabs su bzhugs pa/ phyag drug pa g.yas kyi dang po na rdo rje 'bar ba dang / bar ma na ral gri bsnams pa/ tha ma na b+han+d+ha dang dgra sta bsnams pa/ g.yon gyi dang po na dril bu dang / bar ma na b+han+da dmar gyis bkang ba/ tha ma na thong gshol bsnams pa/ yum badz+ra kro d+hi ma yab kyi sku la 'khril ba/ mgul nas 'khyud pa/ zhal du stob pa/ rang gi klad pa dung khang gi dkyil na bzhugs so// bcom ldan 'das dpal bud+d+ha he ru ka sku mdog smug nag/ dbu gsum pa/ g.yas dkar ba/ g.yon dmar ba/ dbus smug nag zhabs bzhi gyad kyi dor stabs su bzhugs pa/ phyag drug pa/ g.yas kyi dang po na 'khor lo/ bar pa na dgra sta/ tha ma na ral gri bsnams pa/ g.yon gyi dang po na dril bu dang / bar ba pa na b+han+d+ha dmar gyis bkang ba/ tha ma na thong gshol bsnams pa/ yum bud+d+ha kro d+hi shwa rI ma yab la 'khril ba/ mgul nas 'khyud pa/ zhal du stob pa/ rang gi klad pa dung khang gi shar na bzhugs so// bcom ldan 'das dpal rat+na he ru ka sku mdog ser nag dbu gsum pa/ zhal g.yas dkar ba/ g.yon dmar ba/ dbus ser nag/ zhabs bzhi gyad kyi dor stabs su bzhugs pa/ phyag drug pa/ g.yas kyi dang po na rin po che 'bar ba bsnams pa/ bar pa na kha TaM ga/ tha ma na be con bsnams pa/ g.yon pa dang po na dril bu/ bar pa na b+han+da dmar gyis bkang ba/ tha ma tri shUl dang thong gshol bsnams pa/ yum rat+na kro d+hi ma yab kyi sku la 'khril ba mgul nas 'khyud pa/ zhal du stob pa/ khu tshur gdengs pa/ rang gi klad pa dung khang gi lho na bzhugs so// bcom ldan 'das dpal pad+ma he ru ka sku mdog dmar nag dbu gsum pa/ zhal g.yas dkar ba/ g.yon dmar ba/ dbus dmar nag la/ zhabs bzhi gyad kyi dor stabs su bzhugs so// phyag drug pa/ g.yas kyi dang po na pad+ma/ bar pa na kha T+wAM ga/ tha ma na dbyug to bsnams pa/ g.yon dang po na dril bu/ bar ma na b+han+d+ha dmar gyis bkang ba/ tha ma na rje chung bsnams pa/ yum pad+ma kro d+hI ma yab la 'khril ba/ mgul nas 'khyud pa/ zhal du stob pa/ g.yas pa rak+ta sgreng ba/ rang gi klad pa dung khang gi nub na bzhugs so// bcom ldan 'das dpal karma he ru ka sku mdog ljang nag dbu gsum la/ zhal g.yas dkar ba/ g.yon dmar ba/ dbus ljang nag/ zhabs bzhi gyad kyi dor stabs su bzhugs pa/ phyag drug pa/ g.yas kyi dang po na ral gri/ bar pa na kha T+wAM ga/ tha ma na dbyug to// g.yon gyi dang po na dril bu/ bar pa na b+han+d+ha dmar gyis bkang ba/ tha ma na thong gshol bsnams pa/ yum karma kro d+hI shwa rI ma yab la 'khril ba/ mgul nas 'khyud pa/ zhal du stob pa/ khu tshur 'chang ba/ rang rang gi klad pa dung khang gi gzhal yas khang gi byang na bzhugs so// kye gsang ba'i bdag po/ shar na ko'u ri ma dkar mo/ phyag g.yas na zhing dbyug thogs pa/ g.yon pa na b+han+da dmar gyis bkang ba bsnams pa/ lho na tso'u rI ser mo// phyag na mda' gzhu 'gengs pa/ nub na pra mo dmar mo/ phyag g.yas na chu srin gyi rgyal mtshan 'phyar ba/ g.yon pa b+han+da dmar gyis bkang ba bsnams pa/ byang na be ta li nag mo/ g.yas pa rdo rje bsnams pa/ g.yon pa b+han+d+ha dmar gyis bkang ba bsnams pa/ shar lho mtshams na puk+ka dmar ser g.yas pa rgyu ma gzengs nas/ g.yon pas zhal du 'dzud pa/ lho nub mtshams na g+hasma ldang ser/ g.yon pa b+han+d+ha khrag gis bkang ba bsnams pa/ g.yas pa sdigs mdzub 'bar bas 'khrugs shing rngam pa'i tshul gyis zhal du stob pa dang / nub byang mtshams na tsan+da li ser skya/ g.yas na tsit+ta bsnams pa/ g.yon pas lus za ba dang / byang shar mtshams na sme sha can ser mthing nag mgo lus phral nas za ba dang khrag ldag pa yang yod do// gnas kyi ko'u ri ma brgyad po des khrag 'thung yum lnga la bskor nas/ rang gi klad pa dug khang gi nang nas da lta mngon sum du bzhugs so// khro bo'i sku nyung 'bru tsam la spyan phul thag tsam du rang gi klad pa'i nang na bzhugs so// de'i phyi rim klad pa dung khang gi shar na sing ha ma smug nag lag pa gnyis brang khar bsnol nas/ kha'i nang du ro thogs nas ral pa gsig pa yod do// klad pa dung khang gi lho na/ b+ha g+h+ri mu kha dmar mo stag gi mgo can/ lag gnyis thur du bsnol nas/ mig 'bru tshugs su blta ba dang / mche ba gnyer pa yang yod do// nub na sri la mu kha spug nag wa'i mgo can/ lag pa g.yas pa spu gri thogs pa/ g.yon pa rgyu ma za zhing khrag ldag pa yang yod do// byang na shra na mu kha sku mdog mthing nag sbrang mo'i mgo can/ lag pa gnyis ro kha phye nas mig 'bru tshugs su blta ba dang / dung khang gi shar lho mtshams na/ kri ta mu kha bya rgod mgo can/ sku mdog dmar ser/ zhing chen phrag la bkal nas/ keng rus lag na thogs pa yod do// dung khang gi lho nub mtshams na/ kaM ka mu kha dmar nag kaM ka'i mgo can/ zhing chen 'phrag la khur ba yod do// dung khang gi nub byang mtshams na kha kha mu kha sku mdog nag mo bya rog mgo can/ phyag g.yon pa b+han+d+ha thogs pa/ g.yas pa ral gri thogs pa glo snying za ba dang / khrag ldag pa yod do// byang shar mtshams na hu lu mu kha 'ug pa'i mgo can/ sku mdog mthing nag g.yas pa rdo rje thogs pa/ yul gyi seng ha ma brgyad po des/ khrag 'thung yab lnga la bskor nas/ rang rang gi klad pa dung khang gi nang na da lta bzhugs so// rta'i mgo can sku mdog dkar mo// phyag g.yas na lcags kyu 'dzin pa/ g.yon pa b+han+da dmar gyis bkang ba bsnams pa/ rang rang gi dung khang gi shar na bzhugs so// phag pa'i mgo can sku mdog ser mo/ phyag g.yas pa rgyu ma'i zhags pa 'dzin pa/ g.yon pa bya rgod kyi mche ba bsnams pa/ phag gdong zhags pa ma dung khang gi lho na bzhugs so// seng ge'i mgo can sku mdog dmar mo/ phyag gnyis lcags sgrog bsnams pas dbang du sdud pa/ seng gdong lcags sgrog ma dung khang gi nub na bzhugs so// sbrul gyi mgo can sku mdog ljang gu/ phyag na dril bu bsnams pa/ sbrul mgo rdo rje dril bu ma zhes bya ba dang / rang gi dung khang gi byang na bzhugs so// kye gsang ba'i bdag po rang rang gi klad phor dung khang gi nang na/ he ru ka drag po'i lha rang byung gi lha sum cu tham pa'i phyi rol na klad rgya dang gnyis kyi mtshams na/ dbang phyug ma rnams gnas pa ni/ srin mo smug nag phyag na rdo rje thod khrag bsnams pa yod do// tshangs pa ser mo lag na pad+ma thogs pa dang / lha chen dkar ldang rdo rje thogs pa dang / gtogs 'dod sngon mo 'khor lo 'dzin pa dang / dga' ba ma ser mo spu gri thogs pa dang / gzhon nu dmar mo mdung thung 'phen pa dang / rdo rje nag mo lcags kyu bsnams pa dang / ma bdun shar na bzhugs so// brgya byin dkar mo rgyu zhags thogs pa dang / zhi ba dmar mo bum pa thogs pa dang / bdud rtsi dmar mo pad+ma bsnams pa dang / zla ba dkar mo rdo rje 'dzin pa dang / be con ljang nag dbyug to 'phyar ba dang / srin mo dmar mo thod khrag 'thung ba dang / rdo rje ser mo ra mgo ma zhags pa bsnams pa dang / ma mdun lho na bzhugs so// za ba ljang nag be con thogs pa dang / dga' ba dmar mo khog chen 'dzin pa dang / stobs chen dkar mo dbyug to thogs pa dang / srin mo rdo rje spu gri 'dzin pa dang / 'dod pa dmar mo mda' gzhu 'gengs pa dang / nor srung ldang mo bum pa 'dzin pa dang / rdo rje dmar mo lcags sgrog bsnams pa dang / ma mdun nub na bzhugs so// rlung lha sngo skya ba dan 'phyar ba dang / mi mo dmar ser bsal shing 'dzin pa dang / phag mo nag mo mche zhags sdom pa dang / rdo rje dmar mo zhing chung 'dzin pa dang / sna chen ljang nag thod khrag 'thung ba dang / chu lha sngon mo sbrul zhags bsnams pa dang / rdo rje ljang nag dril bu bsnams pa dang / ma bdun byang na bzhugs so// dbang phyug ma nyi shu rtsa brgyad/ he ru ka drag po'i lha rang byung gi sku'i rtsal las rang 'char ro// kye gsang ba'i bdag po/ zhi ba'i sangs rgyas thams cad rang gi snying gi dkyil na/ sku nyung 'bru tsam la mkhyen pa ma 'gags par/ spyan phul thag chad pa tsam du bzhugs so// khro bo'i sangs rgyas thams cad sku nyung 'bru tsam la/ phrin las kyi rtsal ma 'gags par/ spyan phul thag chad pa tsam du bzhugs so// zhes gsungs so// man ngag snying gi dgongs pa rgyal ba'i bka' las rang rang gi lus la sangs rgyas kyi bzhugs tshul bstan pa'i le'u ste gsum pa'o// // de nas yang gsang ba'i bdag pos 'di skad ces zhus so// kye kye bcom ldan 'das ma rig pa'i sems can gyi sku dang ye shes rang la shar ba de ngo ji lta ba du ma shes pa lags zhes zhus pas/ bcom ldan 'das kyis bka' stsal pa/ kye gsang ba'i bdag po/ mal gyi tha mar ni nyal/ gos kyi tha mar ni bgos/ zas kyi tha mar ni za/ skom gyi tha mar ni 'thung / gtam gyi tha ma ni smra ba'i dus der/ rang la 'chi ba'i sdug bsngal drag po 'ong ngo // rang gi dbugs ngar ngar phar 'gro tshur 'gro byed pa'i dus der/ nye ba dang 'brel ba na re khyod ni na da nged tsug ci byed zer ba'i dus su/ nye ba dang 'brel pas gdung ba'i smre sngags bton to// de tsam na da res ngas mi thar pa 'dug pa tsug byed na snyam pa'i sdug bsngal mi bzod pa yong ngo // ngas sdug cir byas nas bsags pa las sa snyam nas/ nor rdzas dor ba'i sdug bsngal mi bzod pa yong ngo // snga ma'i lus mi 'dra bar song nas/ rang gi lag mgo dang kha lce yang mi 'gyur bar song ba'i dus su/ lus kyi nyams so bri ba'i sdug bsngal yong ngo // nga shi nas cir skye na snyam pa'i phung po nying mtshams sbyar ba'i sdug bsngal drag po mi bzod pa yod ngo // kye gsang ba'i bdag po/ sems can thams cad skyes pa dang nyin mtshan med par tshe rku bas mi sdod par 'gro'o// de res shi nas 'dir mi yong bar mi sdod par 'gro'o// sang nang par mi shi ba'i dpe med pas mgyogs par 'gro'o// cha med kyi yul du 'gro bas lam rgyus med par 'gro'o// da da tsug byed na snyams nas snying mi dga'o// gshin rje'i skungs sar 'gro bas 'jigs pa che'o// skyel ma mi rnyed pas mgon skyabs med do// rang dge sdig gnyis las mi shong bas 'phrang dog go/ lam de la thams cad mi 'gro mi srid pas bzur sa med do// kye gsang ba'i bdag po/ rang gi sems glo ba nas 'thon nas/ dbugs sna sgor chad pa'i tshe/ chos nyid dag pa'i snang ba phra la dngas pa/ gsal la 'tsher ba/ rang bzhin bkrag pa/ mdzes pa'i 'od zer phyogs bcur 'phro ba/ nyam nga ba sos kha'i zang la/ smig rgyu rgyu ba bzhin du me re re/ rang snang 'od dang sku ru 'char ro// de la ma 'jigs shig/ 'od kyi nang thams cad nas chos nyid kyi rang sgra 'brug stong ldir ba tsam/ sgra grag la ldir che ba/ di ri ri ba yong ngo // de la ma dngangs shig/ 'od las zer mtshon cha'i char pa 'babs pa 'dra ba/ mtshon cha sna tshogs su zing zing ba yong ngo // de la ma skrag cig/ kye gsang ba'i bdag po/ da lta ngo ma sprad na/ sgom sgrub ji ltar byas kyang / gdams pa dang mi 'phrad pas/ 'od kyis 'jigs so// sgras dngangs so// zer gyis skrag go/ gdams pa'i gnad ma shes na// sgra 'od zer dang gsum ma shes na 'khor bar 'khyam mo// kye gsang ba'i bdag po/ bcom ldan 'das dpal chen po shrI bud+d+ha he ru ka/ sku mdog spug nag dbu gsum pa/ phyag drug pa/ zhabs bzhi pa/ zhal g.yas dkar ba/ zhal g.yon dmar ba/ dbus mthing nag la sku 'od kyi phung por 'bar ba/ spyan dgu sdang mig tu gzigs pa/ smin ma glog bzhin du 'gyu ba/ mche ba zang yag 'bar ba/ a a dang ha ha'i rta skad can/ sprug pa'i sgra chen po sgrogs pa/ dbu skra dmar ser gyen du 'khyil zhing 'phro ba/ nyi zla dang thod skam gyis brgyan pa/ glang chen gyi ko rlon dang / zhing chen gyi g.yang gzhi dang / stag gi sham thabs gsol ba/ thal chen gyis tshom bu dang / rak+ta'i thig le dang / ba su ta'i rgyu zhags dang / sbrul nag dang thod pa skam rlon gyis brgyan pa/ phyag g.yas kyi dang po na rdo rje 'dzin pa/ bar pa na ral gri/ tha ma na dgra staste/ g.yon gyi dang po na dril bu/ bar pa na b+han+da dmar gyis bkang ba/ tha ma thong gshol bsnams pa/ rkan sgra dang thug chom dang / 'ur sgra 'brug stong ldir ba/ rdo rje 'bar ba'i spu gseb nas ye shes kyi me 'bar ba/ khyung gis 'degs pa'i gdan la/ brkyang bskum du bzhugs pa yab yum zhal sbyor nas rang gi klad pa dung khang gi gzhal yas khang nas 'thon nas rang la 'char ro// de la ma 'jigs shig/ ma dngangs shig/ ma skrag cig/ rang gi sangs rgyas rang las shar bar shes par gyis shig/ bcom ldan 'das dpal badz+ra he ru ka sku mdog mthing nag zhal gsum pa/ phyag drug pa/ g.yas dkar ba/ g.yon dmar ba/ dbus sngo nag/ yum badz+ra kro d+hi shwa rI ma dang zhal sbyar nas/ rang gi klad pa dung khang shar nas 'thon nas rang la 'char ro// de ngo shes par gyis la ma 'jigs/ khrag 'thung rin po che yab yum sku mdog ser nag/ zhal gsum phyag drug pa/ g.yas dkar/ g.yon dmar/ dbus ser nag/ yab yum rang gi dung khang gi lho nas 'thon nas rang la 'char ro// de la ma 'jigs par rang gi sangs rgyas rang la shar bas shes par gyis shig/ khrag 'thung pad+ma yab yum rang gi dung khang gi nub nas 'char ro// de la ma 'jigs shig/ khrag 'thung las kyi yab yum sku mdog ldang nag dbu gsum pa/ phyag drug pa// zhal g.yas dkar ba/ g.yon smug pa/ rang gi klad pa dung khang gi byang nas 'thon nas 'char ro// de la ma 'jigs par brod pa skyed cig/ rang gi klad pa dung khang shar nas ko'u ri dkar mo/ g.yas zhing dbyug thogs pa g.yon pa b+han+da dmar gyis bkang ba bsnams pa/ dung khang gi lho na tso'u rI ma ser mo mda' gzhu 'gengs pa 'char ro// dung khang gi nub na pra mo dmar mo/ g.yas pa chu srin gyi rgyal mtshan 'dzin pa/ g.yon pa b+han+da dmar gyis bkang ba 'char ro// dung khang gi byang na be ta li nag mo/ g.yas pa sdigs mdzubs kyi rtse la rdo rje rtse lnga pa 'phyar zhing gdengs la/ g.yon pa b+han+da dmar gyis bkang ba 'dzin pa 'char ro// dung khang gi shar lho mtshams nas puk+ka dmar ser/ phyag g.yas g.yon gnyis kyis rgyu zhags 'dren pa 'char ro// dung khang gi lho nub nas g+hasma rI sku mdog ljang nag dung dmar phyag gnyis kyis bzung nas 'thung ba 'char ro// dung khang gi nub byang mtshams nas tsaN+Da lI ser skya phyag g.yas pa tsit+ta bsnams pa/ g.yon pa zhing chung bzung ba 'char ro// dung khang gi byang shar mtshams na/ sma sha nI mthing nag zhing mgo lus phral nas stob pa dang / gnas kyi ko'u rI ma brgyad po de/ rang gi klad pa dung khang gi nang nas rang la 'char ro// de la ma 'jigs shig de'i phyi rim klad pa dung khang gi shar nas/ sed+ha ser mo seng ge'i mgo can phyag g.yas g.yon thugs kar bsnol ba 'char ro// lho nas byA g+hi mu kha dmar mo stag gi mgo can/ rdo rje khu tshur dpung khar bsnol ba/ nub nas sri la mu kha wa'i mgo can/ zhing khog pa dral nas rak+ta ldag pa/ byang na shra na mu kha mthing nag sbrang mo'i mgo can/ phyag g.yon gyis zhing bzung nas/ g.yas kyis sgrol ba/ shar lho mtshams nas kri ta mu kha dkar ser bya rgod kyi mgo can/ zhing 'phrag la bkal nas g.yon pa b+han+da rak+tas bkang nas 'thung ba/ lho nub mtshams nas ka ka mu kha dmar nag ka ka'i mgo can/ zhing phrag la khur ba/ nub byang mtshams nas kha kha mu kha nag mo bya rog mgo can/ rgyu zhags 'dren pa/ byang shar mtshams nas hu lu mu kha dkar khra 'ug pa'i mgo can/ phyag g.yas lcags kyu/ g.yon pa b+han+da dmar gyis bkang ba thogs nas/ khrag tshil ldag cing za ba dang / rang gi klad pa dung khang gi nang na yod pa'i phra men brgyad rang la 'char ro// de la ma 'jigs shig/ dung khang gi shar nas rta gdong dkar mo g.yas lcags kyu/ g.yon b+han+da dmar gyis bkang ba/ lho nas phag gdong zhags pa ma ser mo g.yas zhags pa/ g.yon bya rgod kyi mche ba/ nub nas lcags sgrog ma dmar mo/ phyag gnyis rdo rje lcags sgrog bzung ba/ byang nas dril bu ma nag po/ g.yas dril bu g.yon b+han+da dmar gyis bkang ba/ sgo ma bzhi rang gi klad pa dung khang gi nang nas 'thon nas rang la 'char ro// de ngo shes par gyis shig/ de'i phyi rim dbang mo nyi shu rtsa brgyad he ru ka drag po'i lha rang byung gi sum cu'i phyi rol na/ klad rgya dang gnyis kyis mtshams nas rang la 'char te/ srin mo smug nag g.yag gi mgo/ rdo rje thod khrag bsnams pa dang / tshangs pa ser mo pad+ma thogs pa dang / lha chen dkar ljang rdo rje thogs pa dang / gtogs 'dod sngon mo 'khor lo 'dzin pa dang / dga' ba ser mo spu gri 'dzin pa dang / gzhon nu dmar mo mdung zung 'phen pa/ rdo rje nag mo lcags kyu can/ shar gyi ma bdun 'char ro// brgya byin dkar mo rgyu zhags thogs pa dang / zhi ba dmar mo bum pa 'dzin pa dang / bdud rtsi dmar mo pad+ma/ zla ba dkar mo rdo rje/ be con ldang nag dbyug to/ srin mo dmar mo thod khrag 'thung ba/ rdo rje ser mo zhags pa thogs pa/ lho mi ma bdun 'char ro// za ba ljang nag be con thogs pa/ dga' ba dmar mo khog chen 'dzin pa/ stobs chen dkar mo dbyug to 'phyar ba/ srin mo rdo rje spu gri 'dzin pa/ 'dod pa dmar mo mda' gzhu 'gengs pa/ nor srung ldang mo bum pa 'dzin pa/ rdo rje dmar mo lcags kyu thogs pa/ nub kyi ma bdun 'char ro// rlung lha sngon mo ba dan 'phyar ba/ mi mo dmar ser gsal shing thogs pa/ phag mo nag mo mche zhags sdom pa/ rdo rje dmar mo zhing chung 'dzin pa/ sna chen ljang nag thod khrag 'thung ba/ rdo rje ljang nag dril bu 'dzin pa/ ma bdun byang nas 'thon nas he ru ka drag po'i sku'i rtsal la/ rang gi klad pa dung khang gi nang nas khrag 'thung lnga bcu rtsa brgyad 'thon nas/ rang la 'char ba'i dus su/ rang gi rig pa'i rang gdangs rang la shar bar ngo shes pas/ khrag 'thung gi sku la gnyis su med par thim nas sangs rgyas so// da lta ngo ma sprad na khrag 'thung gi lha thams cad gshin rje ru mthong nas khrag 'thung gi lhas 'jigs so// dngangs so// skrag go/ brgyal lo/ rang snang bdud du song nas 'khor bar 'khyam mo// khro bo'i sku bar dor 'char lugs bstan pa'i le'u ste bzhi pa'o// / kye gsang ba'i bdag po/ rang snang gi sku dang / ye shes kyi zhing khams ngo shes par gyis shig/ kye rdo rje 'dzin pa chen po/ rang nam 'chi ba'i tshe 'khor ba'i ru log snang ba thams cad 'od dang sku ru 'char ro// nam mkha' mtha' dag 'od kha dog mthing kar 'char ro// mthing ga'i dbus su rnam par snang mdzad kun tu zhal sku mdog mthing ga/ seng ge'i gdan la bzhugs pa/ phyag na 'khor lo rtsibs brgyad bsnams pa/ yum nam mkha'i dbyings phyug ma dang kun tu zhal sbyar nas skur 'char ro// 'byung ba sa thams cad kha dog dkar por 'char ro// 'od dkar po rdo rje sems dpa' sku mdog dkar po/ phyag na rdo rje rtse lnga pa bsnams pa/ glang po che'i gdan la bzhugs pa/ yum sangs rgyas spyan dang zhal sbyar nas bzhugs pa/ sems dpa' sa'i snying po dang / byams pa me tri gnyis/ sems ma lA s+ye ma dang mA le ma gnyis kyis bskor nas/ sangs rgyas kyi sku drug 'char ro// 'byung ba chu thams cad 'od kha dog ser por 'char ro// 'od ser po rin chen 'byung ldan ser po/ phyag na nor bu rin po che bsnams pa/ rta'i gdan la bzhugs pa/ yum mA ma kI dang zhal sbyar nas bzhugs pa/ sems dpa' nam mkha'i snying po dang / kun tu bzang po gnyis/ sems ma girti ma dang / nirti ma gnyis kyis bskor nas/ sangs rgyas kyi sku drug 'char ro// 'byung ba me thams cad kha dog dmar por 'char ro// 'od dmar po sku snang ba mtha' yas sku mdog dmar po/ phyag na pad+ma 'dab brgyad bsnams pa/ rma bya'i gdan la bzhugs so// yum gos dkar mo dang zhal sbyar nas yod do// sems dpa' spyan ras gzigs dang / 'jam dpal gnyis/ sems ma d+ha pe ma dang / puSh+pe ma gnyis kyis bskor nas sku drug tu 'char ro// 'byung ba rlung thams cad 'od ljang gur 'char ro// 'od ljang gur don yod grub pa sku mdog ljang gu// phyag na rdo rje rgya gram bsnams pa/ shang shang gi gdan la bzhugs pa/ yum dam tshig sgrol ma dang / sems dpa' phyag na rdo rje dang / sgrib pa rnam par sel ba gnyis/ sems ma A lo ke dang / gan d+he ma gnyis kyis bskor nas/ sangs rgyas kyi sa sku drug 'char ro// tshad med pa bzhi sgo ba bzhir yang 'char ro// rnam rgyal shar/ gshin rje gshed lho/ lcags sgrog ma nub/ dril bu ma byang nas 'char ro// phar phyin drug las/ thub pa drug tu 'char ro// spyi gtsug nas brgya byin/ lhag pa nas thags bzang ris/ srog pa rtsa nas shAkya thub/ lte ba nas seng ge rab brtan/ gsang ba nas kha 'bar ma/ rkang mthil nas glang mgo can 'char ro// thabs shes rab 'du 'bral med pa las/ kun bzang yab yum du 'char ro// longs sku bzhi bcu rtsa gnyis// rang gi lus las 'char ro// kye gsang ba'i bdag po/ de rang gi sku dang ye shes su ngo shes par gyis shig/ bar dor zhi ba'i sku 'char lugs bstan pa'i le'u ste lnga pa'o// // zhi ba'i sku dang khro bo'i sku che ba nam mkha'i mtha' dang mnyam pa/ 'bring po ri rab tsam nas/ tha ma nyung 'bru tsam gyis khengs nas 'char ro// zhag lnga par snang srid gsum thams cad 'od dang sku ru 'char ro// snang ba thams cad 'od dang skur shar ba de/ rang gi rig pa'i gdangs su ngo shes pas/ rang 'od la gnyis su med par thim nas rgya'o// rigs kyi bu da ltar ngo ma sprad na/ zhi ba'i sku mgon po nag por 'char ro// khro bo'i lha gshin rje chos kyi rgyal por shar nas/ rang snang bdud du song nas 'khor bar 'khyam mo// kye gsang ba'i bdag po/ rang snang ngo ma shes na bskal par chos byas kyang sangs mi rgya'o// rang snang ngo ma shes na shi ma thag tu chos nyid kyi bar dor/ gshin rje chos kyi rgyal po'i skur 'char ro// gshin rje chos kyi rgyal po sku che ba nam mkha' dang mnyam pa/ 'bring po ri rab tsam pa/ tha ma nyung 'bru tsam pas/ ya sos ma mchu mnan pa/ mig shel mig tu bzlog pa/ skra spyi bor bcings pa/ gsus pa che la rke rtsa phra ba/ lag na khram shing thogs pas kha nas rgyob sod kyi sgra sgrogs pa/ klad pa ldag pa/ khrag 'thung ba/ chu ser 'jib pa/ rus pa mur ba/ mgo lus 'bral ba/ snying 'don pa dang / de lta bus 'jig rten gyi khams khengs yong ngo // de'i tshe lhan cig skyes pa'i 'dres sdig pa byas tshad bsags nas rde'u nag po bgrang du song ngo // lhan cig skyes pa'i lhas dge ba byas tshad bsags nas rde'u dkar po bgrang ngo // de'i dus su rang shin tu bred pa/ dngangs pa/ skrag pa 'dar ba byas nas/ ngas sdig pa'i rnam smin lar ma byas zer nas brdzun zer du 'ong ngo // der gshin rje chos kyi rgyal po na re/ ngas las kyi me long la dri yis zer nas/ las kyi me long bstan pas/ dge sdigs thams cad me long nang nas bkra lam me gsal bar byung bas/ gshin rje'i rke la thags pa btags nas drud do// rke 'breg snying 'don/ rgyu ma gzeng / klad pa ldag/ sha za/ khrag 'thung / rus pa mur kyang / zhag 'gar 'chir mi 'dod do// lus dum bur gtubs kyang yang sos so// yang gtubs pas shin tu sdug bsngal che ba zhag lnga yang ngo // de nas srid pa'i bar do la dbang po tshang ba/ shes pa da lta bas bdun 'gyur gyis gsal ba/ phar thams cad gsal ba/ tshur rang gi rigs min pas mi mthong ba/ rig pa rten med pa/ bya sgo rlung gis khyer ba lta bu/ dbugs kyi rta la zhon nas rig pa phyo lang lang yong/ thams cad du lus 'tshol du 'gro ba yong ngo // nye drung dang bza' chos gdung bas ngus pas/ shi nas 'dug pa ji ltar bya na snyam pa'i sdug bsngal drag po nya bye tshan la 'dre ba 'dra ba'i sdug bsngal mi bzod pa yong ngo // rig pa rten dang bral bas/ ri dang khang khyim dang sa rdo ri brag thams cad la thogs pa med par 'gro'o// gdung ba kun la nga 'di na yod ma du zer ro// der ma thozos pas yang shi nas 'dug pa snyams nas sdug bsngal shin tu che'o// ngas lus shig thob na ci ma rung snyam nas// thams cad du lus tshol du 'gro'o// sngar gyi lus de yod pa snyam du 'ong ngo // ri brag sa rdo thams cad kyi nang du 'tshong ngo // srid pa'i bar do shin tu sdug bsngal bar zhag nyi shu rtsa gcig yong // srid pa'i bar dor bstan pa'i le'u ste drug pa'o// // de nas 'khrul pa'i bar do la/ lus 'byung ba lnga la g.yar ba/ nam mkha'i snang ba 'char ro// nam mkha'i snang ba lus g.yang sar bsgyur ba lta bu'i sdug bsngal zhag lnga'o// de nas sa'i snang ba 'char te/ lus sa 'og tu chud pa snyam/ ri'i 'og tu non pa lta bu'i shin tu sdug bsngal ba la zhag lnga sdod do// de nas chu'i snang ba 'char ro// chu chen po'i nang du zhag lnga 'khyags pa la sdod do// de nas me'i snang ba 'char ro// me chen po'i nang du mes zhag lnga sreg go/ de nas rlung gis thams cad du grang zhing g.yeng ba la zhag lnga yong ngo // lar 'khrul pa'i bar do la zhag nyi shu rtsa lnga yong ngo // de nas rdzogs ldan mun pa nag po'i rgyal khams nyin mtshan gyi snang ba med par/ mun nag 'thib pa'i nang na shin tu sdug go/ nyi ma nub pas sa sros pa lta bu'i nang du sdug bsngal te zhag bdun 'ong ngo // lar zhag nyi shu rtsa lnga 'byung ngo // rdzogs ldan mun pa nag po'i rgyal khams su zhag bdun bsdad nas/ 'khor ba ngan song gsum du 'khor te/ 'jug ldog zo ba'i khyud mo lta bur 'khor bar 'khyam mo// bar do'i snang ba bstan pa'i le'u ste bdun pa'o// // kye gsang ba'i bdag po/ 'gro ba rigs drug lam rgyud lngar lus len te/ der lha dang lha ma yin dang / mi dang gsum/ ngan song ni gsum ste/ dmyal ba dang / yi dwags dang / dud 'gro dang gsum mo/ dmyal ba la gsum ste/ tsha ba'i dmyal ba brgyad/ grang ba'i dmyal ba brgyad/ nyi tshe nyi 'khor ba'i dmyal ba gnyis ste gsum mo// tsha ba'i dmyal ba brgyad la/ yang sos dang / thig nag dang / bsdus 'joms dang / ngu 'bod dang / ngu 'bod chen po dang / tsha ba dang / rab tu tsha ba dang / mnar med pa'o// sdug bsngal la bzod pa'i glags med pa la yun ring po'o// yang sos la/ ri lug gi gdong pa can nam/ seng ge'i gdong pa lta bu gnyis kyi bar du 'joms pa'o// thig nag la lto rgyab nas thig btab nas sog les 'dra'o// bsdus 'joms la/ lcags kyi zangs kyi nang du bcug nas/ nam mkha' nas lcags kyi tho chen gyis brdung ba'o// ngu 'bod ni/ lcags kyi khang sgrom 'bar bar bcug nas/ phyogs thams cad nas las kyi rlung gis me sbar ro// ngu 'bod chen po ni lus la mes ma reg pa tsam du sreg pa'o// tsha ba ni lus la me 'bar ba'o// rab tu tsha ba ni/ glo snying la me 'bar ba'o// mnar med pa la/ lus rengs pa me 'bar zhing phyogs thams cad nas sreg pa'o// rgyun ring ba ni/ lcags kyi ri la lo brgya brgya la/ bya'i gshog pa reg pa res brad pa la/ lcags kyi ri zad pa dang / yang sos kyi tshe zad pa'o// grang ba'i dmyal ba ni/ chu bur can dang / chu bur rdol ba can dang / a chu zer ba dang / kyi hud zer ba dang / so zam tham pa dang / pad+ma ltar gas pa dang / pad+ma ltar cher gas pa dang / ut+pal ltar gas pa'o// chu bur can la lcags kyi khang par bcug nas khang pa de tshags ma bzhin du yod pa la phyogs thams cad nas las kyi rlung gis bus pas/ rang gi lus la chu bur mthe bong tsam gyis gang ba'o// chu bur rdol ba la/ chu bur de nam rdol na khrag dang rnag 'dzag pa'o// a chu zer ba la/ 'khyags pas nyen nas skabs su a chu zer ba tsam las mi thon pa'o// kyi hud zer ba la smre sngags tsug bya bya ba tsam las mi thon pa'o// so tham pa la/ so ma mgal la zug nas skad tsam yang mi thon pa'o// pad+ma ltar gas pa la chu bur rgya gram du gas pa'o// pad+ma ltar cher gas pa la/ chu bur gas pa de phyir zlog gis song ba'o// ut+pal ltar gyes pa la/ ut+pal de rtsa ba phra mo la me tog che ba dang 'dra bar/ thams cad phar la gogs nas chu rgyus kyis zungs phra mos 'brel ba'o// rgyun ring ba ni til sbyangs cher po gang la/ lo brgya brgya la til rdog ma re phyung la til zad pa'i tshe na/ chu bur can gyi tshe zad pa'o// gzhan ma rnams gong ma gong ma bas 'og ma nyis 'gyur gyis tshe ring ba'o// nyi 'khor gyi dmyal ba ni shar phyogs kyi sgo nas me mar mur gyi 'obs// lho na thal tshan gyi chu bo rab med/ nub na ro myags kyi 'dam/ byang na ral gri lo ma'i nags tshal lo// me mar mu'i 'obs la/ lcags kyi khang pa de sgo tsha ba snyam sems nas phyir byung bas sgo thams cad me yis bskor nas/ nang gi sdug bsngal bas 'di ru shi na snyam nas/ me'i 'obs su mchongs pas/ lus thams cad rus par krol gyis 'gro'o// thal tshan gyi chu bo rab med ni/ thal tshan gyis sked pa man chad zul gyis 'gro ba la rgal ba'o// ro myags kyi 'dam ni/ 'dam chen po pus mo man chad byings kyis 'gro ba la brgal bas/ srin bu lcags kyi mchu can gyis rkang myal gyis gtong ba'o// nags tshal ral gri'i lo ma ni/ tshad pas gdungs pa/ nag ling nge 'dug pa can du phyin pas/ lo ma thams cad ral grir song nas/ lus la 'bab pa'o// rgyun ring ba ni bar gyi bskal ba re re thub bo// yi dwags la bzhi/ phyi'i sgrib pa can dang / nang gi sgrib pa can dang / sgo khung can gyi sgrib pa can dang / spyi mthun gyi sgrib pa can no// phyi'i sgrib pa can la/ bza' btung thams cad rnag khrag tu mthong ba'o// rang gi nor la ser sna byas pas lan pa yin no// nang gi sgrib pa can ni/ kha khab kyi mig tsam la/ ske gzhu rgyud tsam la/ lto ba ri rab tsam yod pas/ lto mi rnyed pa'o// rnyed kyang mi shong ngo // bag tsam shong yang phan mi thogs pa'o// gzhan gyi nor la ser sna byas pa las byung ba yin no// sgo khud kyi sgrib pa can ni/ kha khab kyi mig tsam la zas khar 'gro mi 'dod/ len re song ba de yang lcags kyi thu lum du song nas/ mar la ma thon gyi bar du khong du sreg pa'o// dkon mchog gi dkor dang glud la 'bab pa las byung ngo // spyi mthun gyi sgrib pa ni/ zas mtshon cha thogs pas bsrungs nas zas mi ster ba'o// ser sna dang phongs pa byas pa tsam las byung ba'o// rgyun ring ba ni mi'i lo lnga stong thub pa'o// dud 'gro'i sdug bsngal la gsum ste/ nying sha nyid gis za ba'i sdug bsngal dang / gsad gcod kyi sdug bsngal dang / 'khol spyod kyi sdug bsngal lo// nying sha nying gis za ba ni/ che ches chung chung bsad nas za ba'o// bsad gcod kyi sdug bsngal ni// ma pas lhag pa byas pa 'og tu bcug nas gsod pa'o// 'khol spyod kyi sdug bsngal ni/ bskal pa ko mthil tsam gyi steng du/ re ba bstad nas khal bzhi bzhi tsam 'gel ba la sogs pa'o// rgyun ring ba ni bar gyi bskal pa tsam thub bo// ngan song gsum ni/ dud 'gro stong 'gyur gyis mang ngo // yi dwags de bas stong 'gyur gyis mang ngo // de bas dmyal ba stong 'gyur gyis mang ngo // kye gsang ba'i bdag po/ dper na chu thams cad thur la 'gro bas mi log par/ rgya mtsho la mang la/ ri rtse la nyung ba bzhin du/ sems kyang chu dang 'dra'o// nyon mongs ngan song na mang bar grub po zhes gsungs so// man ngag snying gi dgongs pa rgyal ba'i bka'i rgyud las/ rang snang ngo ma shes pas/ 'khor ba ngan song du 'khyam pa'i le'u ste brgyad pa'o// // de nas yang gsang ba'i bdag pos zhus pa/ kye bcom ldan 'das ma rig mun pas bsgribs nas su/ rang snang bdud du 'gyur ba yis// ngan song gnas su 'khrul lugs ji ltar lags/ 'khrul pa zlog na ci ltar bzlog/ ces zhus so// bcom ldan 'das kyis bka' stsal pa/ kye gsang ba'i bdag po/ legs par nyon cig/ ngas bshad do// 'khor bar 'khyams pa'i sems can gyi/ 'khrul pa'i lam gyis dus nyid na// rtsal snang sgo lnga 'od du mthong // mthong bas bag chags rab tu skyes// de nas 'dod chags zhes su 'khrul/ rig pa bzhi la lhan gyis song // rang snang mtshan nyid ma shes pas// de la zhe sdang rab tu skyes// des na zhe sdang zhes su 'khrul// gnyis su med par ma shes pas// des na gti mug/ ces su 'khrul// de la nga dang nga'o snyam pa'i yul du bzung / de nas nga rgyal zhes su 'khrul// nga rgyal cha las khong khro byung // 'gyu ba'i sgo la 'dod chags byung // mngal du 'grims pas mo ru 'khrul// gti mug sgo las gnyis kar bzung // mngal du 'grims pas ma ning 'khrul// pho mo ma ning de nas byung / chags pa skyes pas yi dwags dang // zhe sdang las ni dmyal ba dang // gti mug las ni byol song dang / khong khro phrag dog lha min lha// dug lnga skyes pas 'gro drug 'khrul// kye gsang ba'i bdag po/ dug lnga sgo lnga las byung ngo // sgo lnga snang ba ma 'gags pas/ 'od la chags pas gzugs kyi phung por 'khrul// nyams su myong bas tshor ba'i phung por 'khrul// dkar dmar lnga ru phye bas 'du shes 'khrul// mngal du chud pas 'du byed phung por 'khrul// sgo lnga chags pas rnam shes phung por 'khrul// de nas mngal nas 'grims pa'i tshe// rig pa rig gsal ma 'gags pas// snang ba sal gyis byung bas/ 'byung ba sngar ming thogs pas/ zhe sdang sgo las chags pa rnam shes phung por 'khrul lo// kha dog sna tshogs 'bar ba'i 'od// thams cad 'dus pa'i rtags chen yin// 'dod chags sgo las sgra gcig byung // da ltar rna ba'i rnam shes 'khrul// gti mug sgo la dri gcig byung // da lta sna yi rnam shes 'khrul// thams cad sgo las ro/ gcig byung // da lta lce yi rnam shes 'khrul// lhun grub sgo las reg tu byung // da lta lus kyi rnam shes 'khrul// de yang ji ltar 'khrul zhe na/ thag pa las sbrul du 'khrul pa// mtho yor las mir 'khrul ba/ smig rgyu las chu ru 'khrul pa lta bur 'khrul lo// thag pa la sbrul gyi snang ba med kyang / rab rib can gyis sbrul du mthong ba'am/ la'i mtho yor la mir ma grub ste/ sems rtog can gyis sgra ru bzung ba'am/ smig rgyu la chur 'khrul ba ni/ ri dwags kyi rgyal po ru ru bya ba de la/ mche ba rnam pa gsum dang ldan te/ gnyid che ba/ brjed pa che ba/ skom dad che ba'o// skom dad che bas rgya mtsho la chu 'thungs so// gnyid che bas rgya mtsho'i 'gram du rgyab gtad nyal lo// skom dad che bas gnyid sad pa kha skam/ brjed pa ches pas rgya mtsho drung na yod pa brjed/ mdun gyi smig rgyu bsnyegs pas skom grir shi'o// kye gsang ba'i bdag po/ khyod ma yengs par nyon cig/ de 'khrul pa bzlog na/ zag bcas kyi phung po 'di/ mgar ba'i lag gis byas pa'i me long gis gtan la 'bebs pa ltar/ zag pa med pa'i ye shes/ bcom ldan 'das dpal snang ba mtha' yas kyi/ thugs las rang byung ba'i rin po che/ shel gyi mchod rten khri 'phang lnga rang byung ste/ dpal rdo rje sems dpa' thugs kyi spros pa chod do// de nas 'dzam bu gling yongs su mthong ste/ de nas ri ma la ya'i rtse la babs so// dgra bcom pa lnga brgya'i thugs kyi spros pa chod do// de nas ri bya rgod ri'i rtse la babs so// paN+Di ta lnga brgya'i thugs kyi spros pa chod do// de nas 'dzam bu'i gling yongs su 'thor te/ las can gyi gang zag/ rdo rje 'chang gi rig pa 'dzin pa rnams la/ thugs rje rang byung du 'gro ba'i don byon pa/ rin po che man shel dri ma dang bral ba 'di bstan pa'i tshe/ don dam chos sku ma yin te/ dpe 'di ci 'dra/ ba bzhin shes par gyis shig/ shel 'di la phyi nang med pa bzhin// chos sku la phyi nang med par shes par gyis shig/ 'di la mdun rgyab med pa bzhin du/ chos kyi sku la mdun rgyab med par gyis shig/ 'di la nga 'og med pa bzhin/ chos kyi sku la steng 'og med par shes par gyis shig/ 'di la mtshan nyid lnga ldan du gsal ba bzhin du/ chos kyi sku la mtshan nyid lnga ldan du shes par gyis shig/ kye gsang ba'i bdag po/ phyi rabs kyi gang zag rnams la/ bar do bzhi'i gsang lam phye la ston cig/ 'di bstan pa'i tshe/ zag pa med pa'i ye shes bzhugs pa/ me long gsum gyis gtan la 'bebs te/ nang gsal du 'char ro// kye gsang ba'i bdag po/ rang bzhin gyi bar do dang / ting nge 'dzin gyi bar do dang / rmi lam gyi bar do dang / chos nyid kyi bar do bzhi la ngo spyod do// kye gsang ba'i bdag po/ rang bzhin gyi bar do la/ zab mo'i don bstan nas/ dwa phrug ma 'phrad lta bu'i gdams ngag bstan te/ dper na gang zag bza' mi gnyis 'dus nas/ skyes pa de ni shi/ bud med de la lus la bu gcig skyes so// de skyes pa dang ma dang bral te/ phyi mes kyis gsos pas/ ma dang bral nas shin tu nyon mongs so// dus lan cig yul der ltad mo zhig yod pas/ mi thams cad ltad mo la chas so// mi thams cad rgyan 'dogs rta zhon byed pa khong yang chas so// ltad mo'i sar slebs pas mi thams cad ltad mo lta bza' ba ster ba za byed pas/ mi thams cad la pha ma 'dug pas/ kho la pha ma med de/ nga'i pha ma med do// nga'i pha ma zhig gang du song na snya ma ste/ pha ma'i sdug bsngal shar ro// der 'gro sa yang med/ bza' ba ster ba yang med pas/ lam 'phrang gcig la bsdad do// de'i ma de yang bu tshol ba la/ de ring mi thams cad tshogs pas nga'i bu de dang yang 'phrad dam snyam ste/ lam de la stod smad gnyis gshibs te 'dug go/ de ru mi rgyus yod pa gcig byung ste/ des smras pa dus de ring khyed ma smad kyang 'dzom 'dug byas te// sngon gyi ma smad bral ba'i lo rgyus bshad pas yid ches te/ ma dang bu ru 'phrad do// kye gsang ba'i bdag po dpe de bzhin du/ ltad mo yod pa dang 'dra ba'i skye rgas na 'chi'i sdug bsngal la/ na zla shed rogs shi ba dang / khyim mtshes ltag 'og shi ba dang / mthong ba'i dus der/ chos min pa cis kyang mi phan pas/ pha ma dang 'dra ba'i mis rgyus can dang 'dra ba'i bla mas rang la chos sku ji ltar du yod pa de/ ngo sprad rnam pa bzhis gtan la phab ste bstan pas// dpe la ngo sprod pas ngo shes/ rtags la ngo sprad pas yid ches/ don la ngo sprad pas thag chod/ tshig la ngo sprad pas 'khor 'das kyi shan phyed do/ dpe la shel rtags la rang chas/ don sgron ma/ tshig rdo rje sems dpa'i zhal chems so// kye gsang ba'i bdag po/ de ngo shes/ rang snang sku dang ye shes su shes thag chod do// man ngag snying gi dgongs pa rgyal ba'i bka' las/ rang bzhin gyi bar do la zab mo'i don bstan nas/ da phrug ma dang phrad pa'i le'u ste dgu pa'o// // kye gsang ba'i bdag po/ ting nge 'dzin nyams len gyi bar do la/ ye shes ngo yis 'dzin pa/ sgeg ma me long lta bu'i gdams ngag ni dpe na chung sgeg mo lang tsho la bab pa/ me long la blta zhing phyi bdar byed do// las can gyi gang zag de yang / gdams ngag la yang dang yang du dran pa bstan pa'o// de yang dang yang du gsor byed pa/ de nyid dran pa chen po 'chang shas so// ting nge 'dzin gyi bar do bstan pa'i le'u ste bcu pa'o// // rmi lam gyi bar do la bag chags kyi mtshams sbyor ba ni/ kye gsang ba'i bdag po/ dper na chu bo'i gzhung lta bu ste/ chu bo gang gA'i chu bskal pa nas rgyun chad med pa bzhin du/ snang ba 'di rang yang rmi lam lta bu yin te/ de rang bred dngangs drag po gcig byung na/ rmi lam na yang dngangs skrag go/ skye shis 'jigs pa'i mi gcig/ gdams ngag la dran pa brtan pa la nyin dang mtshan med do// rmi lam gyi bar do bstan pa'i le'u ste bcu gcig pa'o// // kye gsang ba'i bdag po/ chos nyid kyi bar do la rang yin pa la/ yin par ngo shes pa/ sngar 'dris pa'i mi dang phyis gang 'phrad pa lta bu ni/ da lta bla mas/ rang la chos sku ngo sprad nas rang ngo shes pa'i gang zag de/ bem rig bral ba dang / khyung sgong rgya/ seng ge mngal rgya/ rnal 'byor pa lus rgya/ rgya gsum las grol ba'i dus so// rang snang sku dang ye shes su ngo shes te/ rang snang rnam dag tu ngo shes/ yid ches thag chod do// sngar 'dris pa'i mi dang phyis 'phrad pa lta bu'o// gcig 'gag/ gcig 'char/ gcig la gnas so// rgyal ba 'od kyi phung po'i chen po'i dkyil 'khor chen po// 'dab ma bzhi pa lte ba dang lnga'i tshul/ me mar stong bteg pa lta bu/ nyi ma 'bum pas lhag pa'i pad+ma'i dbus lte ba la/ rig pa ngo bo stong pa'i ngos nas chos kyi dbyings kyi ye shes/ ye shes de'i rang gdangs 'od kha dog mthing gar gsal lo// de'i 'bras bu gzugs brnyan du shar ba'i sku/ bcom ldan 'das dpal rnam par snang mdzad/ chos nyid mi 'gyur ba'i rtags su/ sku mdog mthing ga/ don gyi dgongs pa chos nyid skye ba med pa'i klong du 'dus pa'i rtags su/ byang chub mchog gi phyag rgya can/ thugs rig pa'i ye shes ma rig pa gcod pa'i brda' ru/ phyag mtshan 'khor lo bsnams pa/ yon tan rin po che du mas spras pa'i brda' ru/ rin po che mdzes pa'i rgyan gyis spras pa/ gdan ni sku la rtsal gsum rdzogs pa'i rtags su seng ge'i gdan no// sku la nyon mongs pa'i skyon gyis ma gos pa'i rtags su pad+ma'i gdan no// de'i steng du thabs shes rab 'du 'bral med pa'i brda' ru/ nyi ma dang zla ba'i gdan la bzhugs so// 'khor ni tshad med pa bzhi dang ldan pa'i brda' ru/ rigs bzhi'i sangs rgyas kyis bskor te/ sku mdog dgongs pa brda' yis mtshon pa/ tshom bu'i dkyil 'khor du gsal lo// shar gyi pad+ma'i 'dab ma la/ rig pa rang bzhin gsal ba'i me long lta bu ye shes/ ye shes de'i rang gdangs/ 'od kha dog dkar por gsal lo// de'i 'bras bu gzugs brnyan du shar ba'i sku/ bcom ldan 'das dpal rdo rje sems dpa'/ chos kyi sku dri ma med pa'i brda' ru/ sku mdog dkar po/ sa yongs su rdzogs shing non pa'i brda' ru/ sa gnon gyi phyag rgya/ thugs rig pa'i ye shes las 'gyur ba med cing / sku lnga ye shes lnga dang ldan pa'i brda' ru/ phyag mtshan rdo rje rtse lnga pa bsnams pa'o// thabs shes rab 'du 'bral med pa'i brda' ru/ yum sangs rgyas spyan dang gnyis su med pa'o// sku rdo rje skyil krung du bzhugs shing / mtshan dang dpe byad kyis brgyan pa'o// gdan ni chos nyid mi 'gyur ba'i rtags su glang po che'i gdan no// de'i steng du nyon mongs pa'i skyon gyis ma gos pa'i brda' ru/ pad+ma'i gdan dang nyi zla'i gdan la bzhugs so// de yang rdo rje sems dpa' yab kyi thabs 'gag pa med pa'i ye shes kyi cha 'dzin pa'i sems dpa' gnyis su shar/ de yang sa'i snying po g.yas nas bzhugs/ byams pa ai tri g.yon na bzhugs so// yum sangs rgyas spyan gyi shes rab 'gyur ba med pa'i chos nyid kyi mtshan nyid 'dzin pa/ sems ma gnyis su shar de/ lA s+ya sgeg mo bdun na bzhugs so// puSh+pe ma rgyab na bzhugs so// tshom bu'i dkyil 'khor du rang gsal lo// lho'i pad+ma'i 'dab ma la/ rang rig pa gsal stong gnyis su med pa/ mnyam pa nyid kyi ye shes/ ye shes de'i rang gdangs/ 'od kha dog ser po ru gsal lo// de'i 'bras bu gzugs brnyan gyi sku ru gsal pa/ bcom ldan 'das dpal rin chen 'byung ldan du gsal te/ de yang yon tan rin po che du mas rgyas pa'i rtags su/ sku mdog ser po// 'gro ba sems can la thugs rje 'byung ba'i rtags su/ mchog sbyin gyi phyag rgya can rig pa rang byung gi ye shes la/ yon tan phyogs med du 'byung ba'i brda' ru/ phyag mtshan nor bu rin po che bsnams pa'o// thabs shes rab 'du 'bral med pa mtshon pa'i brda' ru/ yum chu mA ma kI/ dang gnyis su med par bzhugs pa'o// gdan ni 'khor ba'i chos nyid klong du grol ba'am/ bskyod pa'i brda' ru/ rta mchog bsnol ba'i gdan no// skyon gyis ma gos pa'i rtags/ pad+ma nyi zla'i gdan no// de yang yab kyi thabs 'gag pa med pa'i ye shes kyi cha 'dzin pa/ sems dpa' gnyis su shar te/ kun tu bzang po'i g.yas na/ nam mkha'i snying po g.yon na bzhugs so// yum gyi shes rab 'gyur ba med pa'i cha 'dzin pa/ sems ma gnyis su shar te/ mA le me tog gi phreng ba can mdun na/ d+ha pe ma rgyab na'o// tshom bu'i dkyil du rang gsal lo// nub kyi pad+ma la rigs pa'i shes rab 'gag pa med pa'i so sor rtogs pa'i ye shes/ ye shes de'i rang gdangs/ 'od kha dog dmar por gsal lo// de'i 'bras bu gzugs brnyan du shar ba'i sku/ bcom ldan 'das dpal snang ba mtha' yas su gsal te/ thugs rje 'gro ba'i don la chags pa'i brda' ru/ sku mdog byi ru'i mdog ltar dmar por gsal lo// don gyi dgongs pa chos nyid ngang la gnas pa'i brda' ru/ mnyam bzhag gi phyag rgya can/ thugs rig pa'i ye shes la rtog pa nyon mongs pa'i skyon gyis ma gos pa'i brda' ru/ phyag mtshan pad+ma bsnams pa'o// thabs shes rab 'du 'bral med pa'i brda' ru/ yum me gos dkar mo dang gnyis su med pa'o// gdan ni 'gro ba'i don mdzad pa la mdzes pa'i brda' ru/ rma bya bsnol ba'i gdan no// de'i steng du 'khor ba'i nyon mongs pa'i skyon gyis ma gos pa'i brda' ru pad+ma'i gdan no// thabs shes gnyis su med pa'i brda' ru/ nyi zla'i gdan no// de yang sku skyil krung / mtshan dang dpe byad kyis brgyan pa/ yab kyi thabs 'gag pa med pa'i brdar/ sems dpa' gnyis su shar te/ 'jam dpal g.yas na'o// spyan ras gzigs g.yon na'o// yum gyi shes rab 'gyur ba med pa'i cha 'dzin pa gnyis su shar te/ A lo ke snang gsal 'bum pa'i lha mo mdun na/ gIrti sgra'i mchod pa 'bul ba rgyab na'o// tshom bu'i dkyil 'khor du rang gsal lo// byang gi pad+ma'i 'dab ma la/ shes bya'i thogs pa med pa'i bya ba grub pa'i ye shes/ ye shes de'i rang gdangs/ 'od kha dog ljang gu ru gsal lo// de'i 'bras bu gzugs brnyan gyi skur shar ba/ bcom ldan 'das dpal don yod grub pa/ sku mdog ljang gur gsal lo// thugs rjes sems can gyi don la skyobs pa'i brda' ru/ rin po che'i rgyan du mas brgyan pa'o// mtshan sum cu rtsa gnyis dang / dpe byad bzang po brgyad cus brgyan pa/ gdan ni skyon gyis ma gos pa pad+ma'i gdan dang / thabs shes rab 'du 'bral med pa nyi zla'i gdan no// 'gro ba'i don thogs pa med pa mdzad pa'i brda' ru/ shang shang bsnol ba'i gdan no// de yang yab don yod grub pa 'gag pa med pa'i brda'/ sems dpa' gnyis su shar te/ phyag na rdo rje g.yas na/ sgrib pa rnam sel g.yon na'o// yum gyi shes rab 'gag pa med pa'i cha 'dzin pa/ sems ma gnyis su shar te/ de yang gi rti ma skra'i mchod pa 'bul ba mdun na/ gan d+he ma dri'i mchod pa 'bul ba rgyab na'o// tshom bu'i dkyil 'khor du rang gsal lo// kye gsang ba'i bdag po/ tshad med pa bzhi'i rang bzhin las/ sgo ba bzhir yang snang ste/ rnam rgyal shar na/ gshin rje gshed po lho na/ rta mgrin nub na/ bdud rtsi 'khyil pa byang na'o// de'i yul bzhi la sgo ma bzhir yang snang ste/ lcags kyu ma shar na/ zhags pa ma lho na/ lcags sgrog ma nub na/ dril bu ma byang na'o// de mthar phyin pa'i brda' ru/ pha rol tu phyin pa drug dang yang ldan te/ thub pa drug tu gsal lo// de'i thabs shes rab ma 'gags pas/ yab kun tu bzang po/ shes rab ma 'gags pas/ yum kun bzang mor gsal lo// chos skur stong cha la zhi ba'i lha tshogs su gsal lo// chos sku'i gsal cha la/ khro bo'i lha tshogs khrag 'thung lnga bcu rtsa brgyad du 'char ro// kye gsang ba'i bdag po/ dper na bum pa'i nang gi sku ltar ma 'dres pa yongs su rdzogs par 'char ro// mdzod spu las phyag rdor/ ljags las 'jam dpal/ mgrin pa spyan ras gzigs/ sangs rgyas thams cad rang las 'char te/ 'di ltar sangs rgyas bcom ldan 'das// ye shes sku ste rang byung ba// ye shes mig can dri ma med// ye shes snang ba lam me ba// skad cig gcig gis rdzogs sangs rgyas// skad cig gcig gis bye brag phyed// gnyis med ro gcig chu la chu bzhag bzhin// lan tshwa'i ro bzhin thams cad gcig gis dang // sgra thams cad rang sgra snang ba thams cad rang snang / dper na mi sngar 'dris pa shin tu gcugs pa gnyis yod la/ de gnyis yun ring 'bral kyang / 'phrang gcig la 'dzom na/ ngo shes bcug go/ kye gsang ba'i bdag po/ da ltar gyi dus su thag chod pa gal che'o// snying tshil pad+ma dkar po'i gdan la/ snang la rang bzhin med pa til gyi gong bu tsam/ rta rnga bcu gshegs tshad drangs ma/ 'od lnga'i tshul du bzhugs/ rdo rje sems dpa'i me long la mig bcug nas bltas pas/ cha phra la gdangs pa/ gsal la 'tsher ba/ rang bzhin bkrag pa/ nyam nga ba/ sos ka'i thang ka la/ smig rgyu rgyu ba bzhin du me re re yong ngo // de ltar nyams su myong zhing ngo shes shing 'dres par gyis shig/ kye gsang ba'i bdag po// gsum ni sku gsum gyi brda'o// dpe 'dra 'bag la/ me long gsum thugs nyams su blang ngo // chos nyid kyi bar do bstan pa'i le'u ste bcu gnyis pa'o// / kye gsang ba'i bdag po/ dbang po tha ma'i gang zag gcig/ skye shi 'jigs pa las sgrol ba la/ bar do gnyis lhag par bstan te/ nam 'chi ba'i tshe/ lus kyi cha lugs rta'i/ mdzes pa'i mdangs shor ro// sa chu la thim pas/ lus mi theg stobs shor// chu me la thim pas/ kha sna skam/ me rlung la thim pas/ lus kyi drod shor/ rlung nam mkha' la thim pas/ shes pa rdib rtsa chad/ thib thib pa'i dus der/ bla ma gdams ngag can gcig gis/ gdams ngag btab nas byas na// bem rig bral ba dang / sngar gyi gdams ngag gi gnad kyis// dper na mi gcig gis// rdzas kyi rnam pa gcig bang mdzod cig tu bzhag pas// sa ni srod mun pa la lon dgos na// sgron me bteg nas phyin na// mi rdzas dang 'phrad de// me med na mi 'phrad do// dpe de bzhin du/ shes pa rdib pa'i dus der/ gsal btab na rang snang du zag chod do// de ni skye shi'i bar do la/ mi gsal bas gsal bar byed pa/ mun khung du sgron me btegs pa lta bu'i le'u ste bcu gsum pa'o// // @#// rgya gar skad du/ ti la ka gu h+ya a ti na tan tra nA ma/ bod skad du/ thig le gsang