བོད་ཡིག

e-texts based on the Esukhia Input

lo tsA ba chen po bod kyi lha btsan po bla ma dge slong zhi ba'i 'od kyi zhal snga nas bsgyur cing zhus te gtan la phab pa/ / @#/ /rgya gar skad du/ tsa turde bI pa ri pr-its+tsha/ bod skad du/ lha mo bzhis yongs su zhus pa/ dpal rdo rje sems dpa' la phyag 'tshal lo/ /lha mo bzhi dang mnyam ldan zhing / /sangs rgyas gzugs kyis nyer brgyan pa/ /shin tu dga' ba'i sbyor chen la/ /rdo rje sems dpa' cher bzhugs te/ /'od zer 'chang zhing 'khrigs pa yi/ /gsang chen chos kyi 'byung gnas la/ /byang chub sems ni 'phros nas su/ /chos kyi dbyings nas zhu mdzad do/ /zhu ba'i dngos po de mthong nas/ /lha mo spyan mas yongs zhus pa/ /bcom ldan rdo rje sems dpa' la/ /tshig 'di dag ni gsol pa ste/ /chos kyi dbyings rnams 'phro ba ni/ / gang las skye bar 'gyur ba lags/ /dang po ji ltar 'ong ba yin/ /de bzhin phyir 'gro ji ltar lags/ /yan lag med pa gang de ni/ /yan lag dang bcas 'gyur nas su/ /lus dngos 'gyur ba ji ltar lags/ /mig dang rna ba sna dang ni/ /de bzhin lce dang lus dang yid/ /dbang po phung po'i dngos rnams dang / /khams rnams su ni 'jug pa yang / /ma rig bag chags sred pa yis/ /bcings pa'i nyon mongs 'dod chags sogs/ /rnam par shes pa sna tshogs pa/ /ji ltar dngos su 'dus pa lags/ /dngos po med pa bsgoms pa'i gzugs/ /gzugs sogs spyod yul mtshan nyid rnams/ /rang bzhin med cing dmigs med la/ /dmigs pa dang bcas ji ltar lags/ /de dag ngo mtshar chen po ni/ /bdag gi the tshom lhas bka' stsol/ /de ltar zhus ma thag tu ni/ /bcom ldan rdo rje sems dpas gsungs/ /shes rab zab pa zad med ni/ /nyon cig spyan ma bshad par bya/ /dpyad du med cing shes bya min/ /de bzhin dpyad mkhan gyis shes dka'/ /sangs rgyas kun gyi gsang chen ni/ /nam mkha' nam mkha'i spyod yul lo/ /mi shes mun pas bsgribs pas na/ /nyan thos rnams kyis shes pa min/ /spyod yul bag chags shes mkhan ni/ /rang sangs rgyas su sprul pa ste/ /de dag kun gyis kyang mi shes/ /shes med so so'i skye gnas dang / / ma 'ongs pa dang 'das pa dang / /da ltar byung ba'i dus gsum la/ /byol song bag chags las byung ba'i/ /dud 'gro skye ba rnams/ /de kun gyis kyang mi shes te/ /sangs rgyas spyod yul gsang chen no/ /snying po shin tu snying po'i mchog /gang de kun bdag la gnas pa'i/ /sangs rgyas kun gyi gsang chen ni/ /lha mo khyod la bshad par bya/ /byang chub sems dag 'od gsal ba/ /zla ba shel dang mnyam pa'i 'od/ /de nyid ye shes lnga yi dngos/ /yungs kar che ba'i tshad tsam mo/ /de yi dbus su bzhugs pa'i lha/ /mi gsal gsal ba'i gzugs can te/ /phyed tshad tsam gyi phra mo'i mchog /yid kyi dngos po'i thig le'i gzugs/ /rtag tu snying gi dbus gnas pa/ /'od zer chen po 'bar ba can/ /ji snyed dgu ba'i bar du ni/ /dpral bar la gnas rkang mthil bar/ /thig le de kho nar bsdus te/ /lte ba'i dbus su rnam par gnas/ /cha shas lnga pa tsam yin te/ /bcu gnyis kyi ni tha ma la/ /cha shas drug gis mtshan pa nyid/ /nga ro thig les brgyan byed pa/ /rdo rje khong nas phyung nas su/ /sa bon skye gnas dbus bzhag ste/ /chos kyi dbyings ni zhu bar byed/ /de ni rim par skyed byed na/ /sgo dgu la ni kun du 'gro/ /khyab cing khyab gnas 'gro kun la/ /mi g.yo la sogs g.yo dang bcas/ /tshangs sogs lha dang lha min gyi/ /gzhi ni de las gyur ba'o/ /gang las gtso bor skyed byed pa/ /sa dang nam mkha' de zhes gsungs/ /ji srid lus la gnas pa'i bar/ /de yis las dang las min byed/ /dge dang mi dge bsam pa yang / /bya ba'i las kun byed pa yin/ /sbyor ba rtag tu de gsungs te/ /mchod pa bsgom par gsungs pa yin/ /gang tshe las kyi lus zhig na/ /de tshe de yi rang mthu yis/ /de 'dra'i lus su de 'gyur te/ /gang gis g.yo dang mi g.yo khyab/ /nam mkha' mnyam pa nyid 'dra ba/ /de ni gnas par shes par bya/ /bcu yi gnyis mtha' tshig gi don/ /gang gis rtag tu bsgom byas na/ /des ni dngos grub rgyas pa yis/ /rdo rje 'dzin par bdag nyid 'gyur/ /so dang mchu dang rkan dang lce/ /mgul gnas gang la yod pa ni/ /gang la de ni yig 'bru nyid/ /de ni zad dang gnas phyir ro/ /brjod pa med cing the tshom pa/ /sgra yig rnam par spangs pa ni/ /rang gi phyi nang de bzhin nyid/ /byang chub sems ni 'dir gsungs so/ /lha mo bzhis yongs su zhus pa las lha mo spyan mas yongs su zhus pa'i le'u ste dang po'o// //de nas lha mo mA ma kIs/ /rdo rje can la 'di zhus te/ /byang chub sems kyi rim pa yi/ /kha snying lte ba gsang ba la/ /'gro dang phyir 'ong bstan pa ni/ /rdo rje chen pos bka' stsal 'tshal/ /cha shas rnam pa du zhig gsungs/ /gnas kyi rnam pa bsgyur ba du/ /kha dog rnam pa du zhig gsungs/ / de bzhin gdan yang ji ltar 'tshal/ /rdo rje can gyis bka' stsal ba/ /cha shas bzhi dang mnyam ldan zhing / /pad+ma bzhi la yang dag gnas/ /snying ga'i pad+ma la gnas gnag /kha yi pad+ma la gnas dkar/ /nga ro lte ba'i pad+mar gnas/ /gsang ba'i pad+ma nga ro mtha'/ /stabs kyi mtha' ru 'gro byed pas/ /thig le'i sbyor bar rab tu gnas/ /snom byed pa dang thos byed pa/ /de tshe mthong byed za byed pa/ /reg par byed kyang de kho nas/ /bde dang sdug bsngal tshor byed pa'o/ /gang las bzhad byed bza' byed pa/ / de bzhin cho nge dang ngu ba/ /'byed pa gcod pa de kho nas/ /cho ga rnam pa mang po shes/ /rgyal bo don yang byed par 'gyur/ /dbang phyug don yang byed par 'gyur/ /bram ze rgyal po rje'u rigs dang / /dmangs rigs smad pa'i rigs rnams dang / /bud med du ma sprul par byed/ /dud 'gro skye ba dang / /gzugs can rnams dang gzugs med dang / /de bzhin 'dod pa'i srid rnams las/ /'byung ba thams cad skyed byed ma/ /de nyid kho na rdzu 'phrul gnas/ /mo gzugs dang ni pho yi gzugs/ /bde ba chen po go 'phang gnas/ / de ltar de bzhin nyid shes pa/ /dam pa'i yig 'bru shes pa gang / /des ni gsang chen shes pa ste/ /gang des bdag nyid kun gnas pa/ /kha dog med cing kha dog dmar/ /kha dog dkar dang ser ba yi/ /thig le'i gzugs su bsgyur ba 'di/ /'gro dang phyir 'ong rnam par bstan/ /gang de rig pa rdzu 'phrul che/ /mtha' yas bcas pa sna tshogs gzugs/ /skye dang bsdus dang 'jig pa la/ /thig le'i gzugs su rab gnas so/ /gang gi brgyad khri rtsa bzhi'i chos/ /stong phrag brgya ru shes na yang / /de yis de nyid mi shes te/ /de dag kun kyang 'bras med do/ /bcu gnyis lnga yi lnga pa yang / /brgyad kyi mtha' ru 'byung ba 'dus/ /sgra yig dang po yi ge a/ /lnga pa yis ni yang dag brgyan/ /snying rje chen po las byung ba/ /kha mar bltas pa'i drug pas btags/ /gdod ma mtha' ma med pa'i lha/ /de ni spyi bor bstan pa yin/ /de dag gsang chen dam pa yin/ /lha mo bdag gis rab bstan to/ /lha mo bzhis yongs su zhus pa las lha mo mA ma kIs zhus pa ste le'u gnyis pa'o// //de nas lha mo gos dkar mos/ /yan lag kun gyis btud nas su/ /thal mo snying gar sbyar byas te/ /rdo rje sems dpa' la gsol pa/ /chos kyi dbyings kyi bsdu ba dang / /sku gsung thugs kyi rdo rje yi/ /rang bzhin nyid ni ji ltar lags/ /lha yi dbang phyug khyod la zhu/ /gang gis 'od kyi gong bur bsdu/ /rdo rje sems dpa' ji ltar lags/ /gsungs shig de nyid yig 'bru'i tshig /'dus pa gsungs pa ji ltar lags/ /chu khams dang ni me yi khams/ /ji ltar ro ni mnyam por 'gyur/ /ma las skye ba gsum tsam dang / /de bzhin pha las skye ba gsum/ /de dag drug sogs gong bu las/ / ji ltar mi rnams skye ba lags/ /sangs rgyas gzugs ni bdag mi 'tshal/ /thub pa chen pos bka' stsal mdzod/ /rdo rje can gyis bka' stsal pa/ /gsang ba shin tu gsang gyur pa/ /nyon cig lha mo bshad par bya/ /skye gnas dbus su rtsa gnyis ni/ /g.yon dang de bzhin g.yas pa ste/ /g.yon du byang chub sems zhes bya/ /g.yas su de bzhin rak+ta'o/ /de gnyis phrad nas gcig 'gyur ba/ /chos kyi dbyings ni 'dus pa yin/ /mun pa sku ste rdul gsung gzugs/ /thugs kyi rang bzhin snying stobs te/ /rngul ni rak+ta byang chub sems/ /mun pa de bzhin skyed pa yin/ /rdo rje pad+ma mnyam sbyar nas/ /rang bzhin mnyam pa'i ror 'gyur ro/ /dri chen chu dang shel me tog /de bzhin lnga ba byang chub sems/ /bdud rtsi lnga dngos gong bur bsdus/ /de las rdo rje 'dir gsungs so/ /cha shas gnyis pa dang ldan pa/ /de bzhin dgu pa yang yin no/ /de skad gsungs pa de la ni/ /sum cu dang ni bcu dang ni/ /de bzhin lnga pa'i sa bon te/ /cha shas gnyis pa lnga yis ni/ /drug gis btags pa des byung ba/ /de ni thig ler gsungs pa'o/ /chos kyi dbyings kyi yig 'bru bru~M/ /skye gnas pad+ma la gnas pa/ /de nyid sa bon swA hAM mtha'/ /'dus pa la ni shes par bya/ /chu khams pha las skye zhes bya/ /me yi khams ni ma las skyes/ /sha dang khrag dang pags ba yang / /ma las skyes pa zhes bshad do/ /tshil dang rkang dang khu ba ni/ /pha las skyes zhes bshad pa yin/ /gong bur yang dag 'dus pa ni/ /de dag tsam du bshad pa yin/ /gzugs dang tshor ba 'du shes dang / /de bzhin 'du byed rnam shes rnams/ /sangs rgyas dngos po lnga yi gzugs/ /phung po zhes byar bshad pa'o/ /lha mo bzhis yongs su zhus pa las lha mo na bza' dkar mos zhus pa ste le'u gsum ba'o// //de nas bzhad pa'i zhal 'gyur te/ /lha mo sgrol ma bcom ldan mas/ /rdo rje sems dpa' la zhus pa/ /chos kyi dbyings kyi sgrub pa ni/ /gsungs shig rdo rje can chen po/ /rdzas rnams sgrub par bka' stsal 'tshal/ /de bzhin rig pa'i sngags rnams kyang / /dkyil 'khor rnams ni brtag pa dang / /sbyin sreg so sor bya ba dang / /de bzhin mchod pa'i chog yang / /khyad par du yang bka' stsal 'tshal/ /de ltar lha mos zhus ma thag /rdo rje sems dpas bka' stsal pa/ /chos kyi dbyings kyi sgrub thabs ni/ /nyon cig lha mo bshad par bya/ /gzugs dang sgra dang dri dang ni/ /de bzhin ro dang reg la sogs/ /khams brgyad po de dag kyang / /chos kyi dbyings zhes bya ba'o/ /de dag nyid las byung ba ni/ /byang chub sems zhes shes par bya/ /byang chub sems las gong bu skye/ /gong bu las kyang yid skyed do/ /yid las nam mkha'i khams kyang ni/ /khams rnams dang ni skye mched rnams/ /dbang po phung po 'byung ba rnams/ /de ltar dbyings su bsdus pa ste/ /bsdu ba de ni bstan byas pa/ /chos kyi dbyings kyi sgrub pa yin/ /de bas nan tan thams cad kyis/ /sgrub pa yang dag spyad par bya/ /ji ltar ka la pa zhes dngos kyis/ /bsgrub par bya ba rab tu brtag / chos dbyings sgrub pa bshad nas su/ /rdzas brgyad yan lag sgrub pa bshad/ /ril bu mig sman dngos grub dang / /sa 'og ral gri'i dngos grub dang / /nam mkhar 'phur dang mig sman dang / /'chi ba med dang nad 'joms dang / / mi dang glang po che dang rta/ /glang dang khyi dang bong bu dang / /rnga mo ma he spyang gi rnams/ /cha ni mnyam por bya ba'o/ /mthe bong tshigs tshad tsam du ni/ /shin tu mnyam par bzhag nas sbyar/ /dri chen chu dang rak+ta dang / /byang chub sems nas tshad tsam ni/ /sngags bzlas nas ni sbyar byas te/ /byin gyis brlabs kyang bya ba'o/ /phyag 'tshal dang ni yi ge AH/ /dbus su de bzhin hU~M byas te/ /'bar ba'i hU~M yig 'bar byed pa/ /dgu po de ni rab tu bsgrub/ /lan ni nyi shu rtsa gcig tu/ /sngags bzlas nas ni bye mar btags/ / yungs kar lnga yi tshad tsam du/ /lnga dang lnga ni 'byor par bya/ /tshes brgyad dang ni bcu bzhi la/ /ril bu rnams ni byas nas su/ /pad+ma'i snod la bzhag byas te/ /stong phrag brgyar ni bzla bar bya/ /mtshams bzhi la ni bsgom byas nas/ /nyin dang mtshan du bza' bar bya/ /de nas bskal pa'i mtha' bar yang / /dngos grub rgyas par 'gro ba ste/ /gzi brjid mdangs dang stobs brtson 'grus/ /lnga pa la ni smon lam yang / /mngon par shes pa lnga thob pa/ /ril bu chen po zos phyir ro/ /rdzas kyi sgrub pa rnams rdzogs nas/ /rig pa'i sngags rnams bdag la stsol/ /yi ge e dang ba~M yig dang / /la~M yig dbus su yang dag gnas/ /dang po'i mdog ni dmar po ste/ /gnyis pa yi ni mdog dkar ba/ /gsum pa kha dog ser ba rnams/ /b+ha ga'i dbus su bsgom par bya/ /'khor lo ltar ni bskor ba ni/ /nyin phyed dang ni mtshan byed la/ /rig pa de ni rab 'byor na/ /de ni skad cig kho nar 'grub/ /lha mo lha min bu mo dang / /mi yi bu mo rnam pa bzhi/ /sa yi dkyil 'khor kun du ni/ /sngags kyis bkug nas spyad par bya/ /bsgom pa de bzhin rig pa'i sngags/ /bdag gis bshad pa zin byas te/ /dkyil 'khor rnams ni bshad par bya/ /dga' ma sems kyis rtse gcig nyon/ /dkyil 'khor lus zhes gsungs pa ste/ /dkyil 'khor b+ha gar bstan pa yin/ /dkyil 'khor byang chub sems dang ni/ /dkyil 'khor gsum du btags pa yin/ /btags pa rnams kyang 'dus pa ste/ /gang du gtso bo skyed bar byed/ /phung po rnams ni sangs rgyas gsungs/ /'byung ba rig mar btags pa'o/ /chags pa lcags kyu kho na ste/ /zhags pa pad+mar chud byed pa/ /kha phrad pa ni sgrog yin par/ /sgra bsgrags pa ni dril bur bshad/ /spos ni dri chen zhes gsungs te/ /me tog rak+ta zhes 'dod do/ /mar me sha rnams kho na yin/ / dri ni byang chub sems zhes 'dod/ /sgeg mo ling+gar bstan pa ste/ /phreng ba b+ha ga kho na yin/ /dbyangs ma dbugs su bstan pa dang / /gar mkhan ma ni rnal 'byor te/ /bcom ldan 'das kyis bzang por gsungs/ /de rtogs ba ni skal bzang yin/ / rtogs pa de rnams byams pa sogs/ /de ltar nang gi bdag nyid gsungs/ /dkyil 'khor gzhan ni sngon bshad zin/ /sbyin sreg las ni bshad par bya/ /nyon cig sbyin sreg rnam pa bzhi/ /sbyin sreg phyi dang nang gsungs te/ /phyi ni sngon du bstan pa yin/ /nyon cig khyod kyis nang gi ni/ /pad+ma bzhi rnams 'byor pa ni/ /lus kyi dbus su nye bar gnas/ /me dang de bzhin rlung dang ni/ /dbang chen dang ni chu de bzhin/ /rlung gis me ni 'bar byas te/ /chu yis yongs su smin par byed/ /dbang chen dkyil 'khor las byung ba/ /gang du me ni bskyod pa'o/ /ra yig mngon spyod yi ge ste/ /ya yig dbang gi las kho na/ /la yig rgyas par 'gyur ba ste/ /ba yig zhi ba zhes gsungs so/ /gang zhig zas dang btung ba ni/ /de dag thams cad chu la ste/ /pad+ma ra k+ShaHyig kha mar lta/ /snying gi pad+mar btsud par bya/ /lte ba'i pad+mar 'gro phyi rol/ /kha sbyor tshul gyi sbyor ba yis/ /gsang ba'i pad+mar 'gro ma thag /thal bar mtha' ru rnam par bstan/ /de ltar sbyin sreg bdag bshad pa/ / nyin dang nyin du bya ba ste/ /rtag par rgyun du zas zos na/ /tshe 'di kho nar 'grub par 'gyur/ /rgas pa med cing nad kyang med/ /'chi ba med cing 'bras rnams med/ /de ni glo bur 'chi ba med/ /'tshe ba thams cad zad 'gyur zhing / /rmi lam ngan yang zhi bar 'gyur/ /bzang po bskal par gson ba ste/ /sems can thams cad dga' bar smra/ /mthong ba tsam gyis skul byed do/ /sbyin sreg las rnams bshad byas nas/ /lha mo mchod pa bstan par bya/ /dri dang phreng sogs gos rnams dang / / spos me zas dang lha bshos kyis/ /dbang po gnyis ni rab 'byor nas/ /bdag la mchod pa rnams ni bya/ /bdag ni thams cad sangs rgyas nyid/ /sangs rgyas kun gyi gnas yin te/ /de bas nan tan thams cad kyis/ /rnal 'byor pas ni rtag tu mchod/ /gang zhig 'ga' yang bya ba'i las/ /rnal 'byor pa yis mchod par bsgom/ /zas dang btung ba de bzhin gos/ /de bzhin dri dang phreng kho nas/ /rig ma bzhi yis rnam brgyan pa'i/ /bdag ni lha nyid bsam par bya/ /de ltar bshad nas rdo rje de/ /cang mi gsung bar dngos por bzhugs/ /de nas lha mo bzhi rnams kyis/ /phyag gis thal mo sbyar gyur te/ /rab tu zhal ni rnam bzhad nas/ /rab tu dang ba'i sems kyis ni/ /rnam par mi rtog pa thob ste/ /cang mi gsung bar bzhugs gyur to/ /lha mo bzhis yongs su zhus pa las lha mo sgrol mas zhus pa'i le'u ste bzhi pa'o// //thams cad kyi gsang ba'i mchog dam pa gsang chen zhes bya ba'i rgyud/ lha mo bzhis yongs su zhus pa dpal o D+yan gyi yul nas byung ba rnal 'byor ma chen mo'i de kho na nyid rdzogs / / //rgya gar gyi mkhan po smr-i ti dz+nyA na kIrti nyid kyis bsgyur cing zhus te bshad nas gtan la phab pa// //