| e-texts navigator |
| Wylie |
317b1 སྐབས་ཏེ་ལྔ་པའོ།། །། དེ་ནས་ཡང་མཐུ་སྟོབས་ཀྱི་བདག་པོས་འདི་སྐད་ཅེས་གསུངས་སོ།། གཤིན་རྗེ་ཡབ་ཡུམ་བར་དུ་གཞུག། ཚོན་གྱི་སྐུད་པས་བཅིངས་ནས་ནི།། མཚན་ངན་ཐོད་པ་ཁ་སྦྱར་དུ།། བཅུག
317b2 ལ་བུད་མེད་ཡུགས་ས་མོའི།། སྒྲ་ཡི་ཟག་པས་བཅིང་བར་བྱ།། མཐིང་ནག་གྲུ་གསུམ་སྟེང་དུ་བཞག། ཅེས་གསུངས་སོ།། ཟླ་གསང་ནག་པོའི་རྒྱུད་ཕྱི་མ་ལས། ལིང་ག་བྱད་དུ་གཞུག་པ་དང་། གཞག་ཐབས་ཀྱི་སྐབས
317b3 ཏེ་དྲུག་པའོ།། །། དེ་ནས་ཡང་མཐུ་སྟོབས་ཀྱི་བདག་པོས་འདི་སྐད་ཅེས་གསུངས་སོ།། གཏོར་མ་གསུམ་དང་ཨརྒ་དང་།། བཅས་ཏེ་དཀྱིལ་འཁོར་འགྲམ་དུ་གཞག། རྒྱན་དང་མཆོད་པ་ཀུན་ཀྱང
317b4 དགྲམ།། གསུར་ཆེན་དུད་པ་གཏང་བར་བྱ། ཞེས་གསུངས་སོ།། ཟླ་གསང་ནག་པོའི་རྒྱུད་ཕྱི་མ་ལས། མཆོད་པའི་ཡོ་བྱད་དགྲམ་པའི་སྐབས་ཏེ་བདུན་པའོ།། །། དེ་ནས་ཡང་མཐུ་སྟོབས་ཀྱི་བདག་པོས་འདི་སྐད
317b5 ཅེས་གསུངས་སོ།། དེ་ལྟར་དཀྱིལ་འཁོར་བཤམས་ནས་ནི།། སྔགས་པ་ཆས་གོས་ནག་པོ་གྱོན།། ཁྲོ་བོའི་སྔགས་ཀྱིས་མཚམས་བཅད་དེ།། ལྷོ་ཡི་ཕྱོགས་སུ་ཁ་བལྟས་ཏེ།། ཏིང་འཛིན་རྣམ་གསུམ་རིམ་བཞིན
317b6 བསྒོམ།། ཁྲག་འཐུང་དཀྱིལ་འཁོར་རིམ་ཀྱིས་བསྐྱེད།། སྤྱན་དྲངས་མཆོད་པ་ལ་སོགས་བྱ།། གཏོར་མ་བཏང་ལ་དཀྱིལ་འཁོར་བསྡུ། ཞེས་གསུངས་སོ།། ཟླ་གསང་ནག་པོའི་རྒྱུད་ཕྱི་མ་ལས། ཁྲག་འཐུང་གི་འཕྲིན
iiif viewer powered by OpenSeadragon
