| e-texts navigator |
| Wylie |
113a1 བསྐལ་པ་རྣམས་ནི་འདི་ལྟ་སྟེ།། ཕྱི་ནང་གསང་བ་གསུམ་དུ་བཤད།། སྣང་བ་ཐིག་ལེ་ལྔ་ཡིན་ཏེ།། དབྱིངས་ཀྱི་ཐིག་ལེ་རྣམ་ལྔའོ།། སྲིད་པ་ནང་གི་ཐིག་ལེ་ལྔ།། བསྐལ་པ་ཆག་སྡང་བཅུ་རུ
113a2 བསྐལ།། ཅེས་གསུངས་སོ།། ཐིག་ལེ་འདུས་པའི་རྒྱུད་ཕྱི་མའི་ཕྱི་མ་ལས། ཐིག་ལེ་ཁ་སྦྱོར་གྱི་གདམས་ངག་གི་ལེའུ་སྟེ་དགུ་པའོ།། །། གསང་བའི་ཐིག་ལེ་བསྟན་པ་ནི།། སྣང་བ་ཟང་ཐལ་ཐིག་ཅེས
113a3 བྱ།། ཐུགས་རྗེ་མི་འགག་ལེ་ཞེས་བྱ།། གཉིས་སུ་མེད་པས་ཉག་ཅེས་བྱ།། ལྷུན་གྱིས་གྲུབ་པས་ཐིག་ཅེས་བྱ།། སྣང་བ་འོད་གསལ་ལེ་ཞེས་བྱ།། རིག་པ་ཟང་ཐལ་ཐིག་ཅེས་བྱ།། འགྱུ་བ་མི་འགག་ལེ་ཞེས་བྱ།། དབྱེར
113a4 མི་ཕྱེད་པས་ཉག་ཅེས་བྱ།། ལྷུན་གྱིས་གྲུབ་པས་གཅིག་ཅེས་བྱ།། ཞེས་གསུངས་སོ།། ཐིག་ལེ་འདུས་པའི་རྒྱུད་ཕྱི་མའི་ཕྱི་མ་ལས། ཐིག་ལེ་ཉག་གཅིག་ངོ་སྤྲད་པའི་ལེའུ་སྟེ་བཅུ་པའོ།། །། དེ་ནས་ཡང་དག
113a5 བཤད་བྱ་བ།། རིག་པའི་ལེ་དང་སེམས་ཀྱི་ལེ།། སེམས་ཀྱི་ལེ་ནི་ཆགས་སྡང་ངོ་།། བླངས་པས་འཁོར་བར་འཁྱམས་པ་ཡ་ཆ།། རིག་པའི་ལེ་ནི་ཤེས་རབ་ཆེན་པོ་སྟེ།། སྐུ་གསུམ་རོལ་བར་ཤེས་པ་ཡ་ཆ།། བླངས་པས
113a6 ཟང་ཐལ་ཆེན་པོར་གནས།། ཞེས་གསུངས་སོ།། ཐིག་ལེ་འདུས་པའི་རྒྱུད་ཕྱི་མའི་ཕྱི་མ་ལས། རིག་པ་དང་སེམས་ཀྱི་སྣང་བ་བསྟན་པའི་ལེའུ་སྟེ་བཅུ་གཅིག་པའོ།། །། དེ་ནས་ཡང་དག་བཤད་བྱ་བ།། ཉོན་ཅིག།
iiif viewer powered by OpenSeadragon
