| e-texts navigator |
| Wylie |
150b1 བརླབས།། སངས་རྒྱས་ཀུན་གྱི་ཐུགས་ཆེ་བ།། སངས་རྒྱས་ཀུན་གྱི་ཐུགས་ལ་གནས།། སངས་རྒྱས་ཀུན་གྱི་སྐུ་ཆེ་བ།། སངས་རྒྱས་ཀུན་གྱི་གསུང་ཡང་ཡིན།། གསང་བའི་དབང་བསྐུར་བྱས་པ་ཡིས།། དོན་གྱི་ཐིག་ལེ
150b2 དཀར་དམར་རྟོགས།། རྡོ་རྗེ་ཉི་མ་སྣང་བ་ཆེ།། རྡོ་རྗེ་ཟླ་བ་དྲི་མེད་འོད།། ཆགས་བྲལ་ལ་སོགས་ཆགས་པ་མེད།། ཁ་དོག་སྣ་ཚོགས་འབར་བའི་འོད།། དབང་བསྐུར་བ་ཡི་འབྲས་བུ་ཡིས།། བདག་ཀྱང་སངས་རྒྱས
150b3 རྫུས་སྐྱེས་ཐོག། རྡོ་རྗེ་སྐྱིལ་ཀྲུང་རྫོགས་སངས་རྒྱས།། སངས་རྒྱས་འགྲོ་བའི་ཆོས་འཛིན་པ།། དཔལ་ལྡན་སངས་རྒྱས་པདྨ་སྐྱེས།། ཀུན་མཁྱེན་ཡེ་ཤེས་མཛོད་འཛིན་པ།། དེ་ལྟར་མཐར་ཐུག་འབྲས་བུ་ནི།། ཐོབ
150b4 ནས་ཐེག་ཆེན་གཞན་དོན་མཛད།། འཁོར་བའི་སྡུག་བསྔལ་སེལ་འགྱུར་བ།། དཔེར་ན་སྨན་པ་ལྟར་འགྱུར་བ།། སྨན་པ་ཆེ་མཆོག་གཙོ་བོས་ཏེ།། ཟུག་རྔུ་འབྱིན་པ་བླ་ན་མེད།། སྨན་རྣམས་མ་ལུས་ལྗོན་པའི
150b5 ཤིང་།། ནད་དོ་ཅོག་གི་དགྲ་ཆེ་བ།། དེ་ལྟར་རྩ་བའི་རྒྱུད་ཆེན་ནི།། ཁང་ཁྱིམ་གཅིག་གི་ནང་དུ་བཤད།། དེ་ནས་འགྲོ་དོན་མཛད་པའི་སྐུ།། འཇམ་དཔལ་དགོངས་པ་འདུས་པ་ནི།། གཟུགས་སྐུ་མ་ལུས་འདིར་འདུས
150b6 པས།། ཞི་ཁྲོ་རྣམ་པ་གཉིས་སུ་གསུངས།། རིན་ཆེན་སྨུག་པོའི་གཞལ་ཡས་ན།། ཞི་བའི་སངས་རྒྱས་བཞུགས་པ་དང་།། ཀླད་པ་དུང་ཁང་གཞལ་ཡས་ན།། ཁྲོ་བོའི་སངས་རྒྱས་གནས་པ་དང་།། ཡེ་ཤེས་དབང་བསྐུར
iiif viewer powered by OpenSeadragon
