| e-texts navigator |
| Wylie |
71a1 པ་ནི།། འདུག་ཡང་ཆོས་ཉིད་གདངས་ལས་མ་གཡོས་ལ།། འགྲོ་ཡང་ཡེ་ཤེས་རང་གདངས་རང་སྣང་མ་འགགས་ཏེ།། ཉི་མ་མེར་མ་རང་སྣང་གདངས་དང་ཆས་ནས་འགྲོ་བ་བཞིན།། ཉལ་ཡང་རིག
71a2 པའི་ངང་ལས་མ་གཡོས་ཀློང་།། ནང་ནུབ་རིག་པ་ཟང་ཐལ་རྩལ་གྱི་ངང་ལ་འདུག། གཟུང་འཛིན་ཕྲ་རགས་དངོས་མེད་རང་ངོ་གྲོལ།། མཚན་མ་རང་སར་གྲོལ་བ་ཡེ་ཤེས་རྣལ་འབྱོར་ཆེ།། སྤྱོད་ལམ་རྣམ་བཞི་ཅི་སྤྱད
71a3 ཀྱང་།། ཡེ་ཤེས་གདངས་ལས་མི་འདའ་ཞིང་།། ཆོས་ཉིད་ངང་ལས་མ་གཡོས་པས།། བྱ་གར་འཕུར་མཁའ་ལས་མི་འདའ་ལྟར།། རྟོགས་ལྡན་རྣལ་འབྱོར་དང་ལས་གཡོས་པ་མེད།། ཅེས་སེང་གེ་སྒྲའི་དགོངས་པ
71a4 ལས། རྣལ་འབྱོར་ཉམས་མྱོང་དུས་བསྟན་པའི་ལེའུ་སྟེ་དོན་ལྔ་པའོ།། །། ཀྱེ། བཅོམ་ལྡན་ཐུགས་རྗེ་ཐབས་ཀྱི་བདག། རྣལ་འབྱོར་ལམ་གྱི་རྣམ་གཞག་ཏུ།། སྐུ་གསུམ་དང་པོ་ཡེ་ཤེས་རྩལ་དུ་གང་ལས
71a5 བྱུང་།། གནས་དང་གྲོལ་བའི་རིམ་པ་ཇི་ལྟར་ལགས།། བཀའ་སྩལ་པ། ཐོག་མ་རང་རིག་ཆོས་སྐུ་ངོ་བོ་ལས།། ཡེ་ཤེས་རྩལ་ལྔ་ཐོག་མ་གང་ལས་ཤར།། འདི་ཉིད་རིགས་ཀྱི་བུ་ཡིས་ངེས་པར་ཟུང་།། ཤེས་རབ་རྩལ
71a6 ནི་མ་བཙལ་རང་ཤར་ཏེ།། དང་པོ་བྱུང་ཡང་སྐུ་གསུམ་རྩལ་ལས་བྱུང་།། བར་དུ་གནས་ཡང་ཤེས་རབ་རྩལ་ལ་གནས།། ཐ་མ་གྲོལ་ཡང་འདུས་ཐིམ་སྐུ་གསུམ་ངང་དུ་གྲོལ།། མ་བཙལ་རང་ཤར་ལྔ་ཉིད་བཤད་པ
iiif viewer powered by OpenSeadragon
