| e-texts navigator |
| Wylie |
119b1 ལ།། ནང་དང་བཅུད་ཀྱི་དངོས་པོ་མིང་མེད་དེ།། ཡན་ལག་རིག་སྐྱེས་སྔར་རྟོག་མ་མྱོང་བས།། རིག་སྐྱེས་དབང་གིས་འཁོར་ལོ་གསུམ་གཡོས་ཏེ།། སོ་སོ་རང་རང་རིགས་མཐུན་མོས་མཐུན་པའོ།། ནང་དང་བཅུད་ཀྱི
119b2 མིང་བཏགས་ཞེན་བརྟས་པ།། མིང་གིས་བསྒྲིབས་ནས་ནང་དང་བཅུད་སྣང་སྟེ།། སྣང་བས་རང་ཡང་བཅུད་དང་ནང་སྣང་བའོ།། རིག་མེད་རིག་མ་སྐྱེས་པའི་དབྱེར་མེད་ལ།། ཕྱི་དང་སྣོད་བཅུད་གཉིས་མེད་མིང་མེད
119b3 དེ།། རྩལ་གྱི་ཡན་ལག་རིག་པར་སྐྱེས་པ་སྟེ།། འཁོར་ལོ་གསུམ་དུ་ཡིད་གཡོས་རྟོག་སྐྱེས་པས།། སོ་སོ་རིགས་མཐུན་མོས་པ་མཐུན་པའི་མིང་།། ཕྱི་ནང་སྣོད་བཅུད་དབྱེར་མེད་མིང་བཏགས་པ།། ཞེན་པའི་བག
119b4 ཆགས་བརྟས་ནས་མིང་སྣང་བས།། མིང་གིས་བསྒྲིབས་ནས་དབྱེར་མེད་སྣང་བ་སྟེ།། སྣང་བས་རང་ཡང་དབྱེར་མེད་སྣང་བའོ།། རིན་པོ་ཆེ་རྒྱས་པ་ཆེན་པོའི་མདོ་ལས།། ཕྱི་ནང་སྣོད་བཅུད་དངོས་པོར་སྣང་བ
119b5 དང་།། ཕྱི་ནང་སྣོད་བཅུད་དངོས་པོར་དབྱེར་མེད་སྣང་བའི་མིང་བཏགས་པ་སྣང་བའི་ལེའུ་སྟེ་བརྒྱད་པའོ།། །། སྡུད་པའི་གསང་བདག་རྡོ་རྗེ་སེམས་དཔའ་ཡིས།། སྟོན་པའི་སྟོན་པ་ཀུན་ཏུ་བཟང་པོ་ལ།། འབྱུང
119b6 བ་རྣམ་ལྔ་དངོས་པོ་མཚན་མ་ཡི།། འཁྲུལ་པའི་གཞི་དང་འཁྲུལ་པ་འདྲ་བའི་གཞི། འདྲ་གཞི་དེ་ལ་དངོས་པོ་མཚན་མ་ཡི།། གང་གིས་མིང་བཏགས་འབྱུང་བ་ཇི་ལྟ་བུ།། སྟོན་པའི་སྟོན་པ་ཀུན་ཏུ་བཟང་པོ་ཡིས།། སྡུད
iiif viewer powered by OpenSeadragon
