| e-texts navigator |
| Wylie |
52a1 ནི་དམྱལ་བར་ལྟུང་།། ངས་བསྟན་པ་ཡི་གདམས་ངག་འདི།། ལུང་འདི་འཚོ་བས་སེམས་ལ་བཅང་།། བསྟན་པ་འདི་འགལ་མེད་ལ་འཆི།། ལུང་རྩ་བའི་རྒྱུད་རྗེའུའི་དོན་དུ་བསྟན་པ་ཡིན།། རྫོགས
52a2 སོ།། །། ཨུ་ཨུ་ཨུ་རཀྵི་ཀ་ཨི་ཏུ་ཨུ་ཊུ།། །། རྒྱ་གར་སྐད་དུ། བཛྲ་ས་ཏྭ། ཁ་སེ་མ་ཧཱ་རཱ་ཛ་པུཥྚི་ཏནྟ། བོད་སྐད་དུ།། རྡོ་རྗེ་སེམས་དཔའ་ནམ་མཁའི་ཆེ་རྒྱལ་པོ་རྒྱས་པའི་རྒྱུད། བཅོམ་ལྡན་འདས་དཔལ་ཀུན་ཏུ
52a3 བཟང་པོ་བདེ་བ་ཆེན་པོ་ལ་ཕྱག་འཚལ་ལོ།། འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཀུན་ཏུ་བཟང་པོས་བསམ་གྱིས་མི་ཁྱབ
52a4 པའི་ཏིང་ངེ་འཛིན་ལ་སྙོམས་པར་ཞུགས་སོ།། འོག་མིན་གནས་མཆོག་ཁྱད་པར་ཅན།། ཆོས་ཀྱི་དབྱིངས་ཀྱི་ཕོ་བྲང་གི། ཡེ་ཤེས་སྒྲིབ་མེད་གཞལ་ཡས་ན།། ཉིད་ཀྱི་རང་བཞིན་ཆོས་སྐུ་དང་།། ཉིད་ཀྱི་ངོ་བོ་ལོངས་སྐུ
52a5 དང་།། ཉིད་ཀྱི་ཐུགས་རྗེ་སྦྲུལ་སྐུ་དང་།། རྡོ་རྗེ་སེམས་དཔའ་ལ་སོགས་པ།། འབྱེད་པ་མེད་པའི་འཁོར་རྣམས་དང་།། ཐིག་ལེ་ཆེན་པོ་གཅིག་ཏུ་བཞུགས།། དེ་ནས་རྡོ་རྗེ་སེམས་དཔས་ཞུས་པ། སྟོན་པའི་སྟོན་པ་ཀུན
52a6 ཏུ་བཟང་པོ་ལགས།། སྟོན་པ་ཉིད་ཀྱང་ཐིག་ལེ་སྤྲོས་པ་མེད།། བསྟན་པ་ཀུན་ཀྱང་ཐིག་ལེ་སྤྲོས་པ་མེད།། དུས་དང་གནས་ཀྱང་ཐིག་ལེ་སྤྲོས་པ་མེད།། ཐམས་ཅད་ཀུན་ཀྱང་ཐིག་ལེ་སྤྲོས་མེད་ན།། སྟོན་པའི་སྟོན་པས
iiif viewer powered by OpenSeadragon
