| e-texts navigator |
| Wylie |
166a1 རྣལ་འབྱོར་པས།། སྤོང་འགེགས་མེད་པའི་ཚུལ་གྱིས་གནས།། ཀློང་ཆེན་གསང་བའི་ཐིག་ལེ་ནི།། ཐམས་ཅད་ཡིན་པས་དགག་སྒྲུབ་མེད།། རང་བྱུང་ཡིན་པས་རྒྱུ་རྐྱེན་བྲལ།། ལྷུན་གྱིས་གྲུབ་པས
166a2 བཙལ་དུ་མེད།། གདོད་ནས་དག་པས་སྦྱང་དུ་མེད།། གཉིས་མེད་ཡེ་ཤེས་གསལ་བ་ལ།། ཕྱོགས་འཛིན་འཁྲུལ་འཁོར་ལོག་པའི་ལམ།། སྐལ་ལྡན་རྒྱལ་སྲས་དམ་པ་ཉིད།། མ་བསྐྱོད་དུས་གཅིག་རྫོགས་བྱའི
166a3 ཕྱིར།། གསང་བའི་རིག་པ་ཀློང་དགུའི་རྒྱུད།། དུས་མཐའི་སྐད་ཅིག་ཙམ་ལ་གསུངས།། ཞེས་གསུངས་སོ།། རིན་ཆེན་ཀློང་དགུའི་རྒྱུད་ལས།། གླེང་གཞི་གསང་བའི་ལེའུ་སྟེ་དང་པོའོ།། །། དེ་ནས་སེམས་དཔའ
166a4 རྡོ་རྗེས།། བཅོམ་ལྡན་འདས་རྡོ་རྗེ་སེམས་དཔའ་ལ་འདི་སྐད་ཅེས་ཞུས་སོ།། དུས་གསུམ་སངས་རྒྱས་ཐམས་ཅད་ཀྱི།། རང་བཞིན་གསང་བ་ཀློང་གི་བདག། རིན་ཆེན་འབར་བ་ལྷུན་གྲུབ་ལྟར།། འཕེལ་འགྲིབ་མེད
166a5 འི་རང་བཞིན་ཁྱོད།། རིན་ཆེན་སེམས་ཀྱི་རང་བཞིན་གང་།། རྒྱ་མཚོ་ཀློང་གི་ཡོན་ཏན་ལྟར།། ཕྱོགས་རིས་མི་མངའ་གཅིག་གི་ངང་།། སྐལ་ལྡན་གསལ་བའི་དོན་དུ་གསུངས།། ཞེས་ཞུས་སོ།། དེ་ནས་དེ་བཞིན
166a6 གཤེགས་པས་བཀའ་སྩལ་པ། རིན་ཆེན་རྒྱ་མཚོ་གསང་བའི་རྒྱུད།། གསང་བ་སེམས་ཀྱི་རང་བཞིན་ཏེ།། ཀུན་གྱི་སྙིང་པོ་གསང་བའི་དོན།། རིན་ཆེན་ཀློང་དགུ་ཐུགས་ལ་རྫོགས།། གསང་བའི་ལམ་དགུ་ཉི་མར
iiif viewer powered by OpenSeadragon
