| e-texts navigator |
| Wylie |
28a1 རུམ་སྦས་པའི་གཏེར།། ཐབས་ཆེན་གང་གིས་གསལ་བར་བགྱི།། ལེགས་པར་བདག་ལ་བཤད་དུ་གསོལ།། ཞེས་གསོལ་ཏོ།། དེ་ནས་ཡང་དེ་བཞིན་གཤེགས་པ་ཐམས་ཅད་ཀྱི་གསང་བའི་བདག་པོ
28a2 ལག་ན་རྡོ་རྗེས་འདི་སྐད་ཅེས་གསུངས་སོ།། སངས་རྒྱས་ཀུན་གྱི་གསང་བའི་གཏེར།། རིག་པའི་འཁོར་ལོ་ཡུ་བ་ཅན།། རྟོགས་པ་ཡེ་ཤེས་འཁོར་ལོའི་མཛོད།། དོན་གྱི་སྙིང་པོ་གསུང་གི་བཅུད།། ཀུན་བརྗོད་ཡེ་ཤེས
28a3 འཁོར་ལོ་ཅན།། རང་བཞིན་བརྟགས་དང་ལྟོས་པ་ཡི།། མ་རིག་མུན་པས་བསྒྲིབས་པ་རྣམས།། གསང་བའི་རྒྱུད་འདི་ལ་བརྟེན་ནས།། ད་ལྟ་ཉིད་དུ་དངས་པར་བྱེད།། བསྐལ་པ་སྟོང་ཕྲག་གྲངས་མེད་པར།། ཐབས་ཀྱི
28a4 རྩོལ་བའི་རྣམ་གྲངས་ཀྱིས།། ཇི་ལྟར་བཙལ་ཡང་མི་རྙེད་དེ།། རང་བྱུང་སྙིང་པོ་རྟོགས་པར་དཀའ།། ཨེ་མཧོ་རབ་ཏུ་རྟོགས་པར་དཀའ།། ཨེ་མཧོ་རང་བཞིན་རྙོག་པ་མེད།། ཨེ་མཧོ་མ་བཅོས་བདེ་ཆེན་པོ།། ཨེ
28a5 མཧོ་ཐིག་ལེ་རང་བྱུང་སེམས།། རྡོ་རྗེ་སྙིང་པོ་རྨད་བྱུང་བ།། ནམ་མཁའི་མཐའ་དང་མཉམ་པའི་རྒྱུད།། མན་ངག་མངོན་དུ་ཕྱུང་བ་ནི།། གང་དུ་རྩ་བ་སྙིང་པོའི་ཕྱིར།། དང་པོ་དག་ནི་བསྟན་པ་ཡིན།། དེ་ཉིད་རྒྱས་པར
28a6 སྟོན་པའི་ཕྱིར།། བཅུ་པ་གསལ་བར་བཀོད་པ་ཡིན།། དེ་དག་ཚོགས་པའི་དགོས་པ་ཡང་།། བྱིན་རླབས་ཏིང་འཛིན་རིག་པ་ཡིས།། རིག་པ་རང་འཆར་བསྟན་མཛད་པས།། གཉིས་པ་ཉིད་ནི་བཤད་པ་ཡིན།། བརྒྱུད
iiif viewer powered by OpenSeadragon
