| e-texts navigator |
| Wylie |
26a1 ལྟར།། མ་སྒོམས་ངོ་བོ་ཉིད་དུ་གནས།། ལྷ་སྤྱོད་ཏིང་འཛིན་རོ་གཅིག་པས།། ནམ་མཁའ་ལྟ་བུར་དཔག་མེད་ཅིང་།། སྟོང་ཆེན་རྣམ་པ་ཀུན་ལྡན་པ།། བྱིན་རླབས་ནུས་མཐུའི་གཞིར་གྱུར་པ།། དུས
26a2 གསུམ་སངས་རྒྱས་ཀུན་གྱི་དངོས།། ཆོས་སྐུ་འབྲས་བུ་ཀུན་གྱི་གནས།། རང་བྱུང་སྙིང་པོ་མ་ཡིན་པའི།། དངོས་པོ་གང་ཡང་མེད་པས་ན།། དེ་ཉིད་མངོན་དུ་བསྟན་པ་དང་།། རྒྱུ་འབྲས་གཉིས་འཛིན་ལ་ཞེན
26a3 པའི།། དངོས་འཛིན་དེ་ཉིད་དགྲོལ་བ་དང་།། སྐལ་ལྡན་རིགས་ཅན་གང་ཟག་རྣམས།། མ་བཅོས་ས་ལ་གཞག་པའི་ཕྱིར།། ཀློང་དགུའི་རྩ་བ་གཅིག་ཏུ་བསྟན།། དེ་ཉིད་ནམ་མཁའི་རང་བཞིན་ལྟར།། དངོས་དང
26a4 དངོས་མེད་རྣམ་པར་སྤངས།། ཐིག་ལེ་ཆེན་པོ་ཀུན་རྫོགས་པས།། འདུས་འཕྲོ་ཐིག་ལེ་ཀློང་དུ་གསོལ།། ཞེས་གསུངས་སོ།། ནམ་མཁའི་མཐའ་དང་མཉམ་པའི་རྒྱུད་ཆེན་པོ་ལས།། ཀློང་དགུའི་རྩ་བ་གཅིག་ཏུ་བཤད
26a5 པའི་ལེའུ་སྟེ་ལྔ་བཅུ་པའོ།། །། དེ་ནས་སེམས་དཔའ་རྡོ་རྗེ་དམ་པ་ལ།། འདུས་པ་ཆེན་པོའི་འཁོར་རང་སྣང་སྤྲུལ་པའི་ཚོགས་ཀྱིས་འདི་སྐད་ཅེས་གསོལ་ཏོ།། དུས་གསུམ་རྒྱལ་བའི་རང་བཞིན་ཁྱོད།། སངས
26a6 རྒྱས་ཀུན་གྱི་བསྟན་པའི་གཏེར།། རིན་ཆེན་ཀློང་དགུ་སེམས་ཀྱི་བདག། མགོན་པོ་ཁྱོད་ལ་གསོལ་བ་ནི།། མ་བཅོས་རྡོ་རྗེ་སྙིང་པོའི་རྒྱུད།། བརྗོད་པ་ཚིག་གི་ལྡེ་མིག་གིས།། མ་བཅོས་སྙིང་པོར་ཇི་ལྟར
iiif viewer powered by OpenSeadragon
