| e-texts navigator |
| Wylie |
23a1 ཉིད།། མ་བཅོས་རྟོགས་པས་ཕ་རོལ་ཕྱིན།། ཐ་མའི་དུས་ན་འབྱུང་བར་འགྱུར།། ཞེས་གསུངས་སོ།། ནམ་མཁའི་མཐའ་དང་མཉམ་པའི་རྒྱུད་ཆེན་པོ་ལས།། ལུང་བཤད་པའི་ལེའུ་སྟེ་ཞེ་བརྒྱད
23a2 པའོ།། །། དེ་ནས་ཡང་སེམས་དཔའ་རྡོ་རྗེ་དམ་པ་དེ་ལ། འདུས་པ་ཆེན་པོའི་ཚོགས་ཀྱིས་འདི་སྐད་ཅེས་གསོལ་ཏོ།། དུས་གསུམ་རྒྱལ་བ་ཐམས་ཅད་ཀྱི།། བསྟན་པ་ཀུན་གྱི་རང་བཞིན་ཁྱོད།། མ་ལུས་ཀུན་གྱི
23a3 འབྱུང་གནས་གཏེར།། མགོན་པོ་ཁྱོད་ལ་གསོལ་བ་ནི།། རང་བྱུང་ཐུགས་སུ་གཅིག་ཅེ་ན།། ཀློང་དགུར་དབྱེ་བ་ཇི་ལྟར་ལགས།། ཀློང་ཞེས་ཅི་ཕྱིར་བྱ་བ་ལགས།། གང་གི་སྐབས་སུ་ཇི་ལྟར་འཆར།། དེ་དག་དགོས་པ
23a4 ཇི་ལྟ་བུ།། མགོན་པོ་ཁྱོད་ཀྱིས་བདག་ལ་གསུངས།། ཞེས་གསུངས་ཏོ།། དེ་ནས་སེམས་དཔའ་རྡོ་རྗེས།། འདུས་པའི་ཚོགས་ལ་འདི་སྐད་ཅེས་བཀའ་སྩལ་ཏོ།། ཇི་སྙེད་ཆོས་རྣམས་ཐམས་ཅད་ཀུན།། ཅི་སྟེ་ཐ་དད
23a5 ཡོངས་ཀྱིས་མེད།། རང་བྱུང་རྫོགས་པའི་ཐེག་པ་ལ།། མ་འདུས་པ་ཡི་ཆོས་མི་གནས།། རང་བཞིན་སྣང་བའི་ཆོས་རྣམས་དང་།། ཕྱི་ནང་དྲན་རིག་ཐམས་ཅད་དང་།། བསྟན་པའི་བྱེ་བྲག་མ་ལུས་པ།། ཇི་སྙེད་ཁྱད་པར
23a6 བསྟན་པ་ཀུན།། རྒྱ་མཚོ་དང་ནི་རླབས་བཞིན་ཏེ།། རིག་པ་རང་སྣང་མ་ཡིན་པ།། གཞན་པ་ཉིད་ནི་ཡོད་མ་ཡིན།། རང་བྱུང་ཐེག་པའི་སྙིང་པོ་འདི།། བསྟན་པ་ཀུན་གྱི་བདག་ཉིད་པས།། རང་བྱུང་བསྟན་པ་ཀུན་གྱི
iiif viewer powered by OpenSeadragon
