| e-texts navigator |
| Wylie |
15b1 རྒྱས་ཀུན་ཀྱང་རྒྱ་ཡིས་བཏབ།། ཀུན་ཏུ་བཟང་པོའི་ངང་ཉིད་ཀྱིས།། རོལ་པ་རྣམ་པར་རོལ་བྱའི་ཕྱིར།། ཡེ་ནས་ཀུན་བཟང་ཀུན་གྱིས།། ཆེ་ཆུང་རྒྱ་ཁྱོན་མི་དཔག་པས།། བརྟན་གཡོ་རྣམ་པ་གཉིས་ཀྱི་གཞི།། མི
15b2 ཆགས་མི་རྟོག་མི་གནས་པས།། ཏིང་འཛིན་རོ་ལ་ཆགས་མི་གནས།། དངོས་པོར་འཛིན་པ་ཡེ་སྦྱངས་པས།། དངོས་མེད་མིང་ཡང་མེད་པའི་ཕྱིར།། མཆོག་ཏུ་གསང་བའི་ཆོས་ཉིད་ནི།། རྣ་དབང་གཞན་ལ་ཐོས་མི
15b3 འགྱུར།། དེ་བཞིན་ལྕེ་ཡི་དབང་པོས་ཀྱང་།། དེ་ལ་བརྗོད་དུ་རྡུལ་ཙམ་མེད།། ཐ་སྙད་ཡུལ་ལས་འདས་པ་ཡི།། བསྔོ་བའི་ཆ་ཤས་ཕྲལ་བ་ནི།། འདི་ཞེས་བསྟན་དུ་མེད་པའོ།། བདེ་བ་ཆེན་པོའི་རྒྱུད་ལས། གསང་བའི
15b4 མན་ངག་རྫོགས་པའི་ས་ལ་འདས་ཤིང་ས་སྦྱང་དུ་མེད་པར་བསྟན་པའི་ལེའུ་སྟེ་བཅུ་གཉིས་པའོ།། །། ལག་ན་རྡོ་རྗེ་འཆང་རྒྱལ་གྱིས།། དཔའ་བོ་ཆེན་པོ་ཐམས་ཅད་ལ།། བསྙེན་བསྒྲུབ་རྣམ་བཞི་གསོལ་བཏབ
15b5 པས།། བཅོམ་ལྡན་འདས་ཀུན་ཏུ་བཟང་པོས། བསྙེན་པའི་ཏིང་ངེ་འཛིན་ལ་སྙོམས་པར་ཞུགས་ནས། ཆེད་དུ་བརྗོད་པ་འདི་ཆེད་དུ་བརྗོད་དོ།། སྐུ་ཡི་དཀྱིལ་འཁོར་བྱེ་མ་སྙེད།། གསུང་ཐུགས་གྲངས་ཀྱང་ཇི་སྙེད
15b6 པ།། མངོན་ཤེས་ལྔར་ལྡན་སངས་རྒྱས་ཀྱི།། དཀྱིལ་འཁོར་ཉེ་བར་བསྒྲུབ་པ་ན།། རྡོ་རྗེའི་སྐུ་དང་གསུང་ཐུགས་ཀྱི།། འཇིག་རྟེན་ཁམས་ནི་རབ་བཀོད་དོ།། ཐམས་ཅད་རྡོ་རྗེ་སེམས་དཔའི་སྐུ།། བསམ་གྱིས་མི་ཁྱབ
iiif viewer powered by OpenSeadragon
