| e-texts navigator |
| Wylie |
150b1 རྒྱས་གཉིས།། གཅིག་པ་ལགས་སམ་ཐ་དད་ལགས།། གསང་བའི་བདག་པོས་བསྟན་དུ་གསོལ།། གསང་བའི་བདག་པོས་གསུངས་པ། བསམ་དབང་འཁྲུལ་པའི་ཕྱོགས་ནས་མི་གཅིག་ཐ་དད་ཀྱང་།། གཉིས་མེད
150b2 དངོས་དབང་ཕྱོགས་སུ་ཐམས་ཅད་དབྱེར་མེད་གཅིག། ཅེས་གསུངས་སོ།། ཡང་གསོལ་པ། ཀྱེ་ནམ་མཁའི་དགོངས་པ་ཉིད་ཇི་ལྟར་ལགས། བྱང་ཆུབ་སེམས་ཀྱི་བཞུགས་ཚུལ་ནི། གསང་བའི་བདག་པོས་བསྟན་དུ
150b3 གསོལ།། གསང་བའི་བདག་པོས་གསུངས་པ། དབང་པོའི་ངོ་ལ་གང་གསལ་པ།། རང་གསལ་དེ་ལ་མ་རྟོགས་པ།། དེ་བཞིན་ནམ་མཁའི་དགོངས་པར་བཤད།། ཡུལ་དང་དབང་པོ་མི་འབྱེད་ཅིང་།། ཆོས་ཉིད་ངོ་ཡིས
150b4 མི་འཛིན་ན།། དེ་བཞིན་ནམ་མཁའི་དགོངས་པར་བཤད།། རིག་པ་ནང་ནས་མི་གཡོ་ཞིང་།། དེ་བཞིན་ནང་དུ་མི་རྩོལ་ན།། དེ་ནི་ནམ་མཁའི་དགོངས་པར་བཤད།། བྱང་ཆུབ་སེམས་ཀྱི་ཆོས་ཉིད་དེ།། བྱང་ཆུབ
150b5 སེམས་སུ་ཞུགས་ཙམ་ན།། ཐམས་ཅད་འབྱུང་བའི་བདག་ཉིད་བུ།། ཆོས་རྣམས་ཀུན་གྱི་སྙིང་པོར་བཞུགས།། ཆོས་ཀྱི་སྐུ་རུ་བཞུགས་ཙམ་ན།། གཟུང་འཛིན་གཉིས་དང་བྲལ་བར་བཞུགས།། ལོངས་སྤྱོད་རྫོགས་སྐུར
150b6 བཞུགས་ཙམ་ན།། འདོད་པའི་ཕུན་སུམ་ཚོགས་པར་བཞུགས།། སྤྲུལ་པའི་སྐུ་རུ་བཞུགས་ཙམ་ན།། གང་ལ་གང་དགོས་དེ་སྤྲུལ་ཞེས།། དགོངས་པ་ཕུན་སུམ་ཚོགས་པར་བཞུགས།། རང་བྱུང་ཡེ་ཤེས་བཞུགས་ཙམ
iiif viewer powered by OpenSeadragon
