| e-texts navigator |
| Wylie |
336b1 མེད།། མིག་ནད་ཅན་གྱི་རྒྱང་མིག་ལྟར།། སེམས་ལ་སྣང་རྒྱུ་མ་རྙེད་པས།། འདི་ལ་དམིགས་གཏད་བཅའ་རུ་མེད། ཁྱི་གསར་སྟོང་ལས་བཀྲོལ་བ་བཞིན།། གང་ཡང་གཟུང་དུ་མ་རྙེད་པས།། དྲན་པའི་ཐག་པས
336b2 གདགས་སུ་མེད།། ཅེས་གསུངས་སོ།། གདམས་ངག་སྣ་ཚོགས་འཁོར་ལོའི་རྒྱུད་ལས། མཐར་ཟུག་དོན་གྱི་ལེའུ་སྟེ་གསུམ་པའོ།། །། དེ་ནས་སྤྲུལ་པའི་སྐྱེས་བུ་དགའ་རབ་རྡོ་རྗེས་འཇམ་དཔལ་བཤེས
336b3 གཉེན་ལ་རྒྱུད་གཏད་པ་འདི་གསུངས་སོ།། ཀྱེ་ཀྱེ་འཇམ་དཔལ་བཤེས་གཉེན་རྒྱུད་འདི་ཟུང་། ཁྱོད་ཉིད་འཕགས་པའི་སྤྲུལ་པ་སྟེ། ཁྱོད་ཉིད་ང་ཡི་རང་བཞིན་ཡིན།། གསང་བའི་གདམས་ངག་རྒྱུད་ཆེན་འདི།། མི་ནུབ
336b4 ཡོངས་ཀྱི་བཙས་སུ་ཞོག། རིན་ཆེན་གཏེར་བཞིན་དགོས་པ་འགྲུབ།། བྱ་བཙལ་མེད་པའི་རྒྱུད་ཆེན་འདི།། ཀུན་གྱི་ཐུན་མོང་མ་ཡིན་ཏེ།། སྣོད་ལྡན་བསྐལ་པར་སྦྱངས་སྤངས་པ།། ལས་འཕྲོ་ཅན་ལ་མྱུར་དུ
336b5 བྱིན།། ཅེས་གསུངས་སོ།། འཇམ་དཔལ་བཤེས་གཉེན་ལ་སོགས་པའི་འཁོར་ཐམས་ཅད་དགའ་མགུ་ཡི་རངས་ཏེ། དགའ་རབ་རྡོ་རྗེ་ལ་མངོན་པར་བསྟོད་དོ།། རིན་པོ་ཆེ་གདམས་ངག་སྣ་ཚོགས་འཁོར་ལོའི་རྒྱུད
336b6 ལས། གཏད་གཉེར་གྱི་ལེའུ་སྟེ་བཞི་པའོ།། །། རིན་པོ་ཆེ་གདམས་ངག་སྣ་ཚོགས་འཁོར་ལོའི་རྒྱུད་རྫོགས་སོ།། །།
iiif viewer powered by OpenSeadragon
336a -
