| e-texts navigator |
| Wylie |
300b1 བདག་གཞན་རྟག་ཆད་མེད།། འཆིང་གྲོལ་མེད་པས་དགག་སྒྲུབ་ཡེ་ནས་བྲལ།། གཏད་མེད་ཕྱོགས་བྲལ་ཆེན་པོ་འདི་ཡིན་ཏེ།། སྐྱེ་མེད་འགག་མེད་བྱ་བྲལ་ལྷུན་རྫོགས་དང་།། ཐོག་བབས་ཤུགས་བྱུང་གཅར་ཕོག་ཡིན་པ་སྟེ།། ཀློང་རྡོལ་རང
300b2 ཤར་འགྲོ་དྲུག་གཏན་པ་བཅོམ།། སྣང་བ་སེམས་སུ་ཡེ་ནས་ངོ་སྤྲད་པས།། སྣང་བ་སྣང་བའི་སྟེང་དུ་གྲོལ་བ་ཉིད།། སེམས་ཉིད་སྟོང་པ་དངོས་མེད་ངོ་སྤྲད་པས།། ཤེས་པ་འགྱུ་བ་འགྱུ་དང་ཤར་ཐོབ་གྲོལ།། སྟོང་པ་ཆོས་སྐུ་ཀ་དག་ངོ་སྤྲད
300b3 པས།། སྣང་ཤེས་གཉིས་མེད་ཆོས་སྐུ་གདལ་བར་གྲོལ། གཅིག་ཤེས་པས་ནི་ཀུན་གྲོལ་ཆེན་པོའི་ཕྱིར།། གྲོལ་བ་དེ་དང་དེ་ཉིད་སྟེང་དུ་གྲོལ།། གྲོལ་བ་རང་བྱུང་མ་རྟོགས་གཞན་ན་མིན།། དབང་པོའི་སྒོ་རྣམས་ཐམས་ཅད་མ་བཅོས
300b4 པར།། ཅོག་གིས་བཞག་པས་རང་བཞིན་གྲོལ་བའི་གནད།། དེ་ལས་མ་བསྒྱུར་འགྱུར་མེད་བཅོས་སུ་མེད།། རྣལ་མ་སོ་མ་ལྷུག་པ་རང་ཡན་ཏེ།། ཕྱི་འདའ་ཁ་ཡན་ཀློང་དུ་གནས་པ་ཉིད།། མ་ཡེངས་མ་འཛིན་ངང་དུ་རང་སར་ཞོག། དབང
300b5 པོའི་སྒོ་རྣམས་དགག་པར་མི་བྱ་ཞིང་།། ལུས་ངག་བྱ་བ་སྤྱད་པར་ག་ལ་བྱ།། གཉིད་སོགས་སྤང་ཞིང་བླང་བྱ་ག་ལ་ཡོད།། དབྱིངས་ལ་དབྱིངས་ཤར་དབྱིངས་ཀྱི་ཀློང་དུ་གྲོལ།། མཁའ་ལ་གྲོལ་ལོ་མཉམ་པ་ཉིད་དུ་གྲོལ།། དབྱིངས་སུ་གྲོལ་ལོ
300b6 བཟང་ངན་མེད་པར་གྲོལ།། ཀློང་དུ་གྲོལ་ལོ་མཐོ་དམན་མེད་པར་གྲོལ།། གཅིག་ཏུ་གྲོལ་ལོ་སྐྱེ་ཤི་མེད་པར་གྲོལ།། གཅིག་གི་དབྱིངས་སུ་འབད་མེད་རྩོལ་མེད་གྲོལ།། མི་གནས་རང་དག་མ་སྤངས་རང་སར་གྲོལ།།
iiif viewer powered by OpenSeadragon
