| e-texts navigator |
| Wylie |
286a1 ཀྱེ་ཧོ།། ཉག་གཅིག་ཆ་ཤས་ཏི་ལ་ཆེ།། གཞོན་ནུ་བུམ་སྐུ་ཀུན་བཟང་མཆོག། ཨ་ཏི་ཆེན་པོའི་གྲུབ་མཐའ་གང་།། སྟོན་པས་འཁོར་ལ་བཀའ་སྩོལ་ཅིག། ཞུས་པའི་ལན་དུ་འདི་སྐད་གསུངས།། ཨ་ཏི
286a2 ཆེན་པོའི་ཀློང་བརྡལ་ལ།། གཏད་མེད་ཟང་ཐལ་ལྟ་བ་དང་།། དམིགས་གཏད་ཞེན་མེད་སྒོམ་པ་དང་།། བླང་དོར་མེད་པའི་སྤྱོད་པ་དང་།། འབྲས་བུ་རེ་དོག་མེད་པར་ཟད།། བཞི་ཡིས་བསྡམས་ཏེ་བསྟན་པ་ལ།། ལྟ
286a3 བ་གཏད་མེད་ཉིད་ལ་གསུམ།། མཉམ་ཉིད་འཛིན་གྲོལ་ཕྱོགས་མེད་ཟླ།། འཁོར་འདས་ཆོས་ཀུན་ཅིར་སྣང་ཡང་།། སྣང་སྟོང་ཆོས་ཉིད་དབྱེ་བ་མེད།། ཆོས་ཅན་མ་ཡིན་ཆོས་ཉིད་གཅིག། ལོགས་ནས་འབྱུང་བའི་རེ་ཆ
286a4 མེད།། ཡོད་མེད་མེད་མིན་འཛིན་པ་གྲོལ།། བདེན་རྫུན་ཐ་དད་གཉིས་ཆོས་དག། ཆོས་རྣམས་རང་བྱུང་རང་ཤར་ཀློང་།། ཆོས་མེད་གཏད་མེད་ཉིད་སྣང་བ།། སྣང་ན་རང་སྣང་རང་སྟོང་ངོ་།། སྣང་དང་སྟོང་པ་ཡེ་ནས
286a5 མཉམ།། ཆོས་ཅན་ཆོས་ཉིད་མཉམ་པར་བརྡལ།། ཡོད་མེད་མཐའ་གཉིས་རང་ཆོད་ཀློང་།། རང་དང་གཞན་གྱི་ཕྱོགས་འཛིན་མེད།། རྫུན་དང་བདེན་པར་གདོད་ནས་མཉམ།། ཅི་ཕྱིར་རིག་པ་དྲི་མེད་འདི།། ངོ་བོ
286a6 ཕྱོགས་ལྷུང་གང་ཡང་མེད།། དེ་ཕྱིར་གཏད་མེད་ཟང་ཐལ་ཏེ།། དཔེར་ན་ག་པུར་སྨན་དུག་བཞིན།། ཡེ་ནས་མཉམ་ཉིད་རང་ངོའི་སྦུབས།། ཆོས་རྣམས་མཉམ་ཉིད་མཐའ་གྲོལ་བས།། ལྷ་མི་རང་རྒྱུད་བཟུང་བས
iiif viewer powered by OpenSeadragon
