| e-texts navigator |
| Wylie |
219a1 རྩལ་ཕྱོགས་བཅུར་ཁྱབ།། སྐུ་གསུམ་ངོ་བོ་གཅིག་གི་དང་།། ཡེ་ཤེས་གསུམ་གྱི་རང་བཞིན་ཅན།། རང་གི་ངོ་བོ་གཅིག་ཏུ་གནས།། ངོ་བོ་དུས་གསུམ་འགྱུར་བ་མེད།། རང་བཞིན་རྟག་ཏུ་འགག་པ
219a2 མེད།། ཐུགས་རྗེ་ཀུན་ལ་རང་སྣང་ངོ་།། ངོ་བོ་ཉིད་དང་རང་བཞིན་དང་།། ཐུགས་རྗེ་ཡི་ནི་སྣང་བ་ཡང་།། བློ་ཅན་རྣམས་ལ་སྣང་བའོ།། ངོ་བོ་གང་དུའང་མ་གྲུབ་པས།། རང་བཞིན་སྣང་ཆ་གསལ་བར་སྣང་།། ཐུགས
219a3 རྗེའི་ཆ་ལ་ཡེ་ཤེས་གཉིས།། བྱ་དང་བྱེད་པ་མེད་པར་ཤར།། རང་བྱུང་རང་ཤར་རང་གྲོལ་ལོ།། རྟོགས་དང་མ་རྟོགས་སྔོན་རོལ་དུ།། སངས་རྒྱས་སེམས་ཅན་གཉིས་མ་ཕྱེ།། དངོས་པོ་གཤིས་ཀྱི་འདུག་ཚུལ་དེ།། གཞི
219a4 ཡི་གནས་ཚུལ་དེ་ལྟར་རོ།། གཞི་ལ་མི་མཐུན་མང་དུ་བཤད།། ངོ་བོ་ངེས་ཚིག་དབྱེ་བ་དང་།། མཐུན་དཔེ་དག་དང་བཞི་བཞིས་ཏེ།། ངོ་བོ་ཐིག་ལེ་ཉག་གཅིག་ཡིན།། ངེས་ཚིག་གཞི་ལ་རྩལ་རྫོགས་པས།། ཀུན་གྱི
219a5 ཀུན་གཞི་ཞེས་ཀྱང་བྱ།། དབྱེ་ན་སྐྱོན་ཅན་སྐྱོན་མེད་གཉིས།། སྐྱོན་ཅན་དྲུག་དང་བརྒྱད་ཀྱིས་བསྟན།། བསམ་ལས་གྲུབ་པའི་ཀུན་གཞི་ལ།། སྣ་ཚོགས་ངོས་ནས་ལྷུན་གྲུབ་གཞི།། འགྱུར་མེད་ཆ་ནས་མ་ངེས
219a6 གཞི།། མི་འགྱུར་ཆ་ནས་ངེས་ཅན་གཞི།། ཅིར་ཡང་སྒྱུར་བཏུབ་གཞི་མ་དང་།། ཐམས་ཅད་འབྱུང་ཕྱིར་ཁས་ལེན་གཞི།། སྣ་ཚོགས་ཁྲ་བོར་འདོད་པའི་གཞི།། སྣ་ཚོགས་སོགས་པའི་ཀུན་གཞི་དང་།། སྦྱོར་བ་ཀུན་གྱི
iiif viewer powered by OpenSeadragon
