| e-texts navigator |
| Wylie |
132a1 དྲོད་རྐང་པའི་མཐིལ་ནས་ཡལ། སྤྱི་བོ་ཚངས་པའི་བུ་ག་ནས་ཡར་འཐོན། སེམས་གློ་བའི་ནང་ནས་འཐོན་ནས་དབུགས་སྣ་སྒོར་ཆད། སངས་རྒྱས་སྙིང་གི་ནང་ནས་བྱོན་ནས་མིག་ནས་ཕར་ལ་དོན་པའི
132a2 དུས་སུ། སྣང་བ་ཐམས་ཅད་འོད་དུ་འཆར་ཏེ། ཤར་བ་དེ་རང་གིས་སངས་རྒྱས་སུ་ངོ་ཤེས་པས་རང་འོད་དང་སྐུ་ལ་ཐིམ་ནས་སངས་རྒྱ་བས། གདམས་ངག་ཐམས་ཅད་དམར་ཐག་སྣང་སྲིད་ཐམས་ཅད་སྐུ་དང་འོད་དུ
132a3 ཤར་བའི་དུས་བཅད་དོ།། ཞེས་གསུངས་སོ།། དེ་ནས་གསང་བའི་བདག་པོས་འདི་སྐད་ཅེས་ཞུས་སོ།། ཨེ་མ་སངས་རྒྱས་འོད་ཀྱི་ཕུང་པོ་ཆེན་པོ། གདམས་ངག་དེ་ནམ་དགོས་ན་ཞེས་ཞུས་པས། གདམས་ངག་འཆི
132a4 བའི་དུས་སུ་དགོས། འཆི་བའི་དུས་ཀྱི་དམར་ཟག་གར་བཅད་ཅེས་ཞུས་པས། སངས་རྒྱས་འོད་ཀྱི་ཕུང་པོས་བཀའ་སྩལ་པ། གསང་བའི་བདག་པོ་རང་འཆི་བའི་དུས་སུ། འཆི་ལུགས་གཉིས་ཡིན་ཏེ། ཀུན་ཏུ་བཟང
132a5 པོའི་ངང་དུ་འཆི་བ་དང་། ཀུན་ཏུ་བཟང་མོའི་ངང་དུ་འཆི་བའོ།། ཀུན་ཏུ་བཟང་མོའི་ངང་དུ་འཆི་ན་ནད་ཐམས་ཅད་སྲེག་པ་རྩ་ལ་ཞུགས་ནས། འཆི་བས་ན་ཚ་ཟུག་གཟེར་ཆུང་བར་ཉལ་དེར་འཆི་བས་སོ།། ཀུན་ཏུ
132a6 བཟང་པོའི་ནང་དུ་འཆི་ན། ནད་སྙིང་ལ་འདུས་ནས། ན་ཚ་ཟུག་གཟེར་ཤིན་ཏུ་ཆེ་བར་འཆི་བ་ཡིན་ཏེ། ན་ཚ་ཟུག་གཟེར་ལྷག་པ་རེ་ལ། རྟོགས་པའི་ཤེས་རབ་ལྷག་པ་རེ་སྐྱེ་བས། བདག་འཆི་བའི་དུས་ཀྱི་དམར་ཐག
iiif viewer powered by OpenSeadragon
