| e-texts navigator |
| Wylie |
105b1 ཡང་།། གཟུང་འཛིན་ཞེན་རྟོག་གཞི་ལ་མེད།། མ་ཀི་ཏ་ཡིས་གང་ཐེབས་བཞིན།། ལྟ་བ་ངོ་བོ་ཉིད་རྟོགས་པས།། ཅི་དྲན་མ་བསྒོམས་ཆོས་ཉིད་གསལ།། བཞག་བླང་མེད་པ་རྒྱུད་དུ་གནས།། བི་ཤྭ་ཀརྨས་བྱས་ལེགས
105b2 བཞིན།། རྣལ་འབྱོར་སྤྱོད་ལམ་ཐམས་ཅད་དུ།། ཡེ་ཤེས་རྩ་བ་དོན་གྱིས་ཟིན།། ཉེས་པའི་སྐྱོན་གྱིས་གོས་མེད་པ།། ཡིད་བཞིན་ནོར་བུའི་ཡོན་ཏན་བཞིན།། རང་སེམས་ཆོས་སྐུར་དོན་རྟོགས་པས།། མི་ཡི་ལུས་ལ
105b3 སངས་རྒྱས་ཐུགས།། གདུལ་བྱ་གཟུགས་སྐུ་ཤུགས་ལས་འབྱུང་།། དེ་ཡང་རྡོ་རྗེ་སེམས་དཔའ་ཉོན།། དེ་དག་ངོ་བོ་གཅིག་གཅིག་ལ།། ཚིག་གིས་མཚོན་པ་ཐ་དད་ཀྱང་།། ཡུལ་མེད་རང་གསལ་ཉིད་དུ་འདུས།། རྫོགས
105b4 པ་ཆེན་པོ་རྨད་བྱུང་དོན་གྱི་སྙིང་པོ་རང་བྱུང་བདེ་བ་འཁོར་ལོའི་རྒྱུད་ལས། ངེས་དོན་རྩ་བ་གཅིག་པར་བསྟན་པའི་ལེའུ་སྟེ་གཉིས་པའོ།། །། དེ་ནས་རྡོ་རྗེ་སེམས་དཔའ་ཡིས།། འདུས་པའི་འཁོར་ལ་ཕན་དོན
105b5 དུ།། ཡིད་ཀྱིས་དྲན་པས་འདི་སྐད་གསོལ།། སྣང་མེད་ངོ་བོ་གནས་ལུགས་གང་།། གཞི་ལ་འཕོ་འགྱུར་ཇི་ལྟར་མེད།། སེམས་ཅན་ཀུན་ལ་ཇི་ལྟར་ཡོད།། ཀུན་རིག་རྒྱལ་པོས་བཤད་དུ་གསོལ།། དེ་སྐད་ཞུས་པའི་དོན
105b6 གསན་ནས།། འདུས་པའི་འཁོར་ལ་བཀའ་སྩལ་པ།། སྣང་མེད་ངོ་བོ་གནས་ལུགས་ནི།། དུས་གསུམ་མེད་པའི་སྔོན་རོལ་ན།། འདས་པ་བས་ཀྱང་རང་བྱུང་སྔ།། རྒྱུ་རྐྱེན་མེད་པའི་སྔོན་རོལ་དུ།། འབྲས་བུ་རང་བྱུང
iiif viewer powered by OpenSeadragon
