| e-texts navigator |
| Wylie |
31a1 འདབ་ཆགས་ཚོགས།། ཤ་ཟ་ཁྲག་འཐུང་རུས་པ་འཇོམས།། བམ་དང་རུལ་དང་མྱགས་པ་དང་།། བྱེ་དང་བྲལ་དང་གཞིག་པ་དང་།། ཟོས་དང་འཐོར་དང་རབ་ཏུ་འཐོར།། བྲུལ་དང་ཟགས་དང་བརླག་པ
31a2 དང་།། རྩོད་དང་རྒོད་དང་གླལ་བ་དང་།། འཇིགས་ཤིང་གདུག་དང་རྔམ་པ་དང་།། རོལ་པའི་ལོངས་སྤྱོད་རབ་ཏུ་སྦྲུལ།། ཀུན་ཀྱང་གདུག་པའི་སེམས་འཆང་ཞིང་།། གསོད་གཅོད་ཤག་གཏུབ་ལུས་ཀྱི་ལས།། ཚིག་རྩུབ
31a3 བརླང་བའི་ང་རོར་འབྱིན།། ཁྲོས་པའི་བརྟུལ་ཞུགས་དྲག་པོ་ཡིས།། མ་ལུས་འདུལ་ཞིང་ཚར་གཅོད་པའི།། མངོན་པར་གཅོད་ལ་རབ་ཏུ་བཀོད།། འདི་ལྟར་མཐོང་ཞིང་སྣང་གྱུར་བ།། ཀུན་རྫོབ་ཙམ་དུ་སྣང་བ
31a4 ལས།། སེམས་ཅན་གཅིག་གི་བ་སྤུ་ལ།། ཅུང་ཟད་གནོད་པ་ཡོད་མེད་དེ།། རང་གི་རྣམ་རྟོག་བདེ་བར་སྤྱོད།། ངེས་པའི་དེ་ཉིད་ཁོ་ནའོ།། ཆོ་འཕྲུལ་ཆེན་པོ་བསྟན་པའི་གླེང་གཞིའི་ལེའུ་སྟེ་དང་པོའོ།། །། དེ་ནས
31a5 སངས་རྒྱས་ཐམས་ཅད་ཀྱིས།། རྡོ་རྗེ་འཆང་བའི་རྒྱལ་པོ་ཡིས།། དུས་གསུམ་རྒྱལ་བ་སྲས་བཅས་ཀྱིས།། ཐོག་མ་མེད་པའི་དུས་ཉིད་ནས།། མ་ལུས་བསྟན་པ་བསྲུང་མཛད་པའི།། གསང་བདག་ཆེན་པོར་དབང་བསྐུར
31a6 ཕྱིར།། གནོད་སྦྱིན་ལག་ན་རྡོ་རྗེ་འཆང་།། ལྔ་བརྒྱའི་གྲོགས་དང་བཅས་པ་ཡིས།། སོ་སོ་གཙོ་ཆེན་མདུན་ཉིད་ནས།། རང་གི་སྟན་ལས་རབ་ཏུ་ལངས།། མངོན་དུ་སྤྱོད་པའི་སྤྲུལ་པ་མཛད།། ཐུགས་ཀྱི་གནས་པའི་ས་བོན
iiif viewer powered by OpenSeadragon
