| e-texts navigator |
| Wylie |
59b1 སྤོས།། ཡེ་ཤེས་གསང་བའི་རྡོ་རྗེ་འདི།། རྣལ་འབྱོར་དབང་ཕྱུག་ཆེན་པོ་དང་།། ཡེ་ཤེས་མ་མོ་མཁའ་འགྲོ་དང་།། སྐུ་གསུང་ཐུགས་ཀྱི་མི་ཟད་རྒྱན།། འཁོར་ལོ་གསང་བའི་ངངལ་བཞུགས།། ཞེས་གསུངས་སོ།། དེ
59b2 ནས་འཁོར་རྣམས་དགྱེས་ཏེ་རྗེས་སུ་ཡི་རང་བར་གྱུར་ཏོ།། མ་མོ་སྲིད་པའི་རྒྱུད་ལུང་ཟླ་གསང་ཐིག་ལེ་བུད་མེད་ཀྱི་རྒྱུད་ལས། རྗེས་སུ་བཟུང་བའི་ལེའུ་སྟེ་བཅུ་གཉིས་པའོ།། །། མ་མོ་ཟླ་གསང་ཐིག་ལེའི་རྒྱུད
59b3 ཅེས་བྱ་བ་རྫོགས་སོ།། རྒྱ་གར་གྱི་པཎྜི་ཏ་གུ་ཧྱ་གསང་བ་ལས། འབྲོག་མི་དཔལ་གྱི་ཡེ་ཤེས་ཀྱིས་བསྒྱུར་བའོ།། །། ཐུགས་ཀྱི་ཡང་སྙིང་མ་མོ་འབུམ་ཏིག་གི་རྒྱུད། བཅོམ་ལྡན་འདས་དཔལ་ཧེ་རུ་ཀ
59b4 རྟག་པ་ཆེན་པོ་ལ་ཕྱག་འཚལ་ལོ།། བྱང་ཆུབ་སེམས་ཁྱབ་གདལ་བའི་རང་བཞིན་ལ་ཡུམ་དངོས་གྲུབ་ཆེན་པོར་བསྟན་པ་དང་།། ཐུགས་ཀྱི་སྒྲོམ་བུ་ལས་ཕྱུང་བའི་དགོངས་པའི་བརྣག་པ་མཐར་ཕྱིན་པའི་དོན་དུ
59b5 གསུངས་པ་ལས། གནོད་འདུལ་ལྷ་ཡིས་ཡང་གསོལ་པ།། འཇིག་རྟེན་པ་ཡི་ཆོས་རྣམས་ལས།། སེམས་ཉིད་མྱ་ངན་ཇི་ལྟར་བཟླ།། རྟག་ཆད་རྣམ་གཉིས་གང་དུ་བསྡུ།། ཡང་དག་རྫོགས་ཀྱིས་བཀའ་སྩོལ་ཅིག། དེ
59b6 སྐད་གསོལ་པ་གསན་ནས་ཀྱང་།། ཉག་གཅིག་ཡབ་ཀྱིས་བཀའ་སྩལ་པ།། ཉོན་ཅིག་གཡུང་དྲུང་ཡང་དག་པ།། སྣོད་ཀྱི་འཇིག་རྟེན་ཀུན་བཟང་པོ།། བཅུད་ཀྱི་འཇིག་རྟེན་སངས་རྒྱས་རྒྱུ།། ཕྱི་ནང་སྣོད་བཅུད་རྣམ་པར
iiif viewer powered by OpenSeadragon
