| e-texts navigator |
| Wylie |
58b1 བདུན་ངེས་པ་ཡིན།། རང་ཉིད་གང་འདོད་སྒོ་དེ་དབྱེ།། མི་འདོད་སྒོ་རྣམས་སྔགས་ཀྱིས་དགག། རླུང་ཟླ་ཧཱུཾ་སེམས་སྒྲ་ཡིས་དྲངས།། བདེ་འགྲོ་ལ་ནི་སྦྱོར་བར་བྱེད།། རྨ་མེད་ན་ཚོད་མཐུན་པའི་རོ།། བསངས་དང
58b2 བགེགས་བསྐྲད་ལྷར་བསྐྱེད་ལྟར།། དང་པོར་གནས་སྲུང་བསྲུང་འཁོར་བསྒོམ།། རྟེན་ལ་གནས་མཆོག་མཉེས་པར་བྱ།། སྣ་ནས་གཞུགས་ཤིང་སྦྱང་བ་ནི།། རྟགས་དང་ངེས་པར་ལྡན་པ་ན།། མི་སེམས་གཅིག་ལ
58b3 ལུས་གཉིས་པར།། ན་ས་གཡས་གཡོན་སྙིང་གང་ཞུགས།། གང་དུ་བཅུག་པའི་གནས་དེར་སོང་།། གཞན་གྱི་གྲོང་ལ་ཞུགས་ཞེས་བྱ།། སྒོ་རྣམས་ཡང་ནི་དགག་པ་དང་།། ཚངས་པ་སྟོང་པར་དབྱེ་བ་དང་།། སྙིང་གར
58b4 ཧཱུཾ་མཐིང་དྲངས་པ་དང་།། དྲོད་གཤེར་མངལ་སྒོ་བདེ་གནས་སུ།། མདའ་འམ་སྒྱོགས་ཀྱི་འཁྲུལ་འཁོར་འདྲ།། ཡང་གསལ་གཡོས་ནི་ཕྱི་དང་ནང་།། ཧཾ་ཞེས་བྱ་བས་རིམ་པར་ནི།། ཉི་མ་ཟླ་བ་རཱ་ཧུ་ལ།། གཟའ་ཡིས
58b5 ཟིན་པར་གྱུར་པ་ན།། ཕྱག་རྒྱ་ཆེན་པོའི་རིག་འཛིན་ཐོབ།། ཅེས་གསུངས་སོ།། མ་མོའི་རྒྱུད་ལུང་ཟླ་གསང་ཐིག་ལེའི་རྒྱུད་ལས། རྣལ་འབྱོར་འཆི་ཁའི་ལམ་ཡེ་ཤེས་སུ་རོལ་པ་སྟེ་ལེའུ་བཅུ་གཅིག་པའོ།། །། དེ
58b6 ནས་བཅོམ་ལྡན་འདས་དགྱེས་ནས་འཁོར་རྣམས་ཀྱིས་བསྟོད་པ། ཨེ་མ་ཧོ།། རབ་ཏུ་བཟང་བའི་ཡེ་ཤེས་ནི།། དངོས་པོ་ཀུན་ལ་རབ་ཏུ་གནས།། དངོས་པོར་འཛིན་པ་ལོག་པ་སྟེ།། ལོག་པར་ཤེས་པ་སྐྱོན་དང
iiif viewer powered by OpenSeadragon
