| e-texts navigator |
| Wylie |
31b1 རྒྱ་གར་སྐད་དུ། ཀྲོ་དྷ་ཨཱརྱ་ཨ་ཙ་ལ་ནཱ་ཐ་ཏནྟྲ། བོད་སྐད་དུ། ཁྲོ་བོ་མི་གཡོ་མགོན་པོའི་རྒྱུད། དཔལ་ཁྲག་འཐུང་གི་རྒྱལ་པོ་ལ་ཕྱག་འཚལ་ལོ།། འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན
31b2 འདས་ཁྲག་འཐུང་གི་རྒྱལ་པོ། འོག་མིན་སྟུག་པོ་བཀོད་པའི་ཞིང་ཁམས་ན། མཐའ་དང་དབུས་མེད་པའི་གཞལ་ཡས་ཁང་། རྒྱ་ཁྱོན་དཔག་ཏུ་མེད་པ་ན་ཡུམ་དང་གཉིས་སུ་མེད་པ་མཉམ་པའི་ངང་ལ་བཞུགས
31b3 སོ།། ཡང་དེའི་ཚེ་དེའི་དུས་ན། ཀརྨ་ཧེ་རུ་ཀ་དང་། གཟིག་གི་མགོ་ཅན་དང་། ཁཱ་ཏའི་མགོ་ཅན་དང་། མགོ་བརྙན་གྱི་ཚོགས་གྲངས་མེད་པ། ཁྱད་པར་གྱི་བྱེ་བྲག་རྣམ་པ་བསམ་གྱི་མི་ཁྱབ་པར་བཞུགས་སོ།། གདུག
31b4 པའི་འཁོར་གྲངས་མེད་པའི་ནང་ནས། ཕྲིན་ལས་ཀྱི་མངའ་བདག་ཁྲོ་བོ་ཀརྨ་ཧེ་རུ་ཀས། ཡུམ་གཏུན་ཁུང་མ་དང་། རོལ་པའི་ངང་ཚུལ་བཟུང་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།། ཨེ་མ་ཧོ། སྦྱོར
31b5 བའི་ཕྱག་རྒྱ་ཇི་ལྟར་ལགས། ཁྲོ་བོའི་ང་རོ་ཇི་ལྟར་ལགས།། བརྡའ་ཡི་ཕྱག་རྒྱ་ཇི་ལྟར་ལགས།། ཞེས་གསོལ་པས། དེ་ནས་བཅོམ་ལྡན་འདས་ཁྲག་འཐུང་གི་རྒྱལ་པོས། གསང་བའི་སྔགས་འདི་གསུངས་སོ།། ཨེ་མཧོ
31b6 རང་བཞིན་ཁྲོས་པ་ཡིས།། འོད་དང་འབར་བ་འཕྲོས་པ་ཡིས།། སངས་རྒྱས་དུས་གསུམ་དྲག་པོར་བསྐུལ།། དེ་ཉིད་མ་བཅོས་བྱང་ཆུབ་སེམས།། དེ་ཉིད་གསང་བའི་ངང་ཚུལ་ཤར།། སྦྱོར་བའི་ཕྱག་རྒྱ་ལྷན་ཅིག་སྐྱེས།།
iiif viewer powered by OpenSeadragon
