| e-texts navigator |
| Wylie |
30a1 གནས་སུ་ནི།། ས་བོན་བསམ་ལ་སྐུ་བསྐྱེད་དེ།། རྡོ་རྗེའི་ཆོ་ག་གསུམ་གྱིས་བསྐྱེད།། ཡོངས་སུ་རྫོགས་པའི་སྐུ་དེ་ལ།། ཕྱི་ནང་གསང་བའི་དབང་ཡང་བསྐུར།། བྱིན་གྱིས་བརླབ་པའི་སྔགས་དག
30a2 ལ།། གསང་བའི་གནས་སུ་བྱིན་གྱིས་བརླབས།། ཡེ་ཤེས་དཀྱིལ་འཁོར་སྤྱན་དྲང་མཆོད།། རང་བཞིན་གནས་སུ་དེ་བཞུགས་པར།། ཡོངས་སུ་བལྟས་ལ་སྔགས་ལ་སྦྱར།། སྲས་ཀྱི་དམ་པར་རབ་བསྐྱེད་ལ།། བྱིན
30a3 བརླབས་དབང་ཡང་བསྐུར་བ་ཡིན།། དུག་དང་མ་རུངས་པ་ཡང་བྱུག། བཟླས་ཡུངས་ཐུན་ཡང་བརྡེག་པ་ཡིན།། དུག་ལ་སོགས་པའི་ཐུན་ཡང་བརྡེག། ཞབས་འོག་གསང་བའི་དཀྱིལ་འཁོར་དུ།། བསད་པའི་སྦྱོར་བ
30a4 བྱས་པས་ནི།། ཐང་གཅིག་ཡུད་ལ་དེ་རླག་འགྱུར།། དུར་ཁྲོད་རས་མ་བླངས་ནས་ནི།། དུག་དང་མ་རུངས་པ་ཡིས་བྱུག། མ་དེ་ར་ཡི་ཤིང་བུ་ལ།། པདྨའི་སྣོད་དུ་ངད་པས་བསགས།། དེ་ལ་བསེ་ཤིང་ཞོ་ཡིས
30a5 སྦྱངས།། དུར་ཁྲོད་རྐང་གི་སྨྱུ་གུས་བྲི།། རྔ་མོ་བོང་བུའི་གཟུགས་བྲིས་ལ།། དེ་སྟེངས་འབད་ཅིང་འཐབ་པ་བྲི།། དེ་ལ་གསང་སྔགས་འབུམ་དུ་བཟླས།། དེ་ཡི་རྩིག་པའི་རྨང་དུ་བཟླས།། བརྒྱ་རྩ་བརྒྱད་དུ་ཐེམ་པ
30a6 དང་།། ས་བརྐོས་བཅུག་ལ་མི་མངོན་སྦ།། དེ་ཡིས་དབྱེ་བར་གདོན་མི་ཟ།། དུར་ཁྲོད་རོ་རས་ས་མེ་རླུང་།། དེ་དག་འཁོར་ལོ་རབ་བྲིས་ལ།། འཁོར་ལོའི་དབུས་སུ་གཟུགས་བརྙན་བྲི།། རྔ་མོ་སྐེ་རིང་རྩལ་དང
iiif viewer powered by OpenSeadragon
