| e-texts navigator |
| Wylie |
19a1 ལྡན་འདས།། སངས་རྒྱས་ཀུན་གྱི་རྒྱུ་ཡིན་པས།། འཁོར་བ་རང་བྱུང་གཞན་ལས་སྤྲིན།། དེ་བས་སེམས་ཅན་ཐམས་ཅད་ནི།། སངས་རྒྱས་སྙིང་པོ་ཅན་ཞེས་བྱ།། མ་རིག་པ་ཡི་སེམས་ཅན་གྱིས།། འཁོར
19a2 བའི་སྡུག་བསྔལ་མྱོང་བར་འགྱུར།། སེམས་ཅན་ཀུན་གྱི་རང་བཞིན་ནི།། ཆོས་ཀྱི་དབྱིངས་ཀྱི་རང་བཞིན་ཏེ།། ཀུན་ལ་ཁྱབ་པའི་ནམ་མཁའོ།། དེ་མ་མཐོང་བས་དེ་མི་མཐོང་།། སྙིང་པོ་ཆོས་ཀྱི་དོན་ལ་ནི།། རྟོག་གེ་པ
19a3 ཡིས་མི་རྙེད་དེ།། འགའ་ཡང་བཙལ་བས་མི་རྙེད་དོ།། ཞེས་གསུངས་སོ།། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཡེ་ཤེས་ཐམས་ཅད་འདུས་པ་སངས་རྒྱས་མདུད་པའི་རྒྱུད་ལས། རང་བཞིན
19a4 ལྟ་བའི་ལེའུ་སྟེ་བཅུ་བཞི་པའོ།། །། དེ་ནས་དེ་བཞིན་གཤེགས་པ་བཛྲ་ཀཱི་ལ་ཡས་འཁོར་རྣམས་ལ་སྤྱན་རྒྱས་པར་གཟིགས་ཏེ། འདི་སྐད་ཅེས་བཀའ་སྩལ་ཏོ།། ཁྱོད་རྣམས་ལ་མ་འོངས་པའི་རྣལ་འབྱོར་པ་རྣམས
19a5 དང་། སེམས་ཅན་དབུགས་དབྱུང་བ་དང་། འདས་པ་དང་། མ་འོངས་པ་དང་། ད་ལྟར་གྱི་སངས་རྒྱས་ཀྱི་གདུང་འཛིན་པའི་ཕྱིར།། རྟག་པ་དང་པོ་འདི་ཁྱེད་ཀྱིས་ཡང་དག་པར་ཆོངས་ཤིག་དད་པ་དང་ལྡན་པ་རྣམས
19a6 ལ་བྱོས་ཤིག་སྐྱེ་བོ་མཆོད་པ་ལ་དགའ་བ། འདོད་ཆགས་ཆེ་བ་རྣམས་ལ། ཚུལ་བཞིན་དུ་བཤད་པའི་དབང་སྐུར་ལ་བཤད་པ་བྱོས་ཤིག་ཅེས་གསུངས་སོ།། དེ་ནས་འཁོར་རྣམས་ཀྱིས། སྟོན་པས་གསུངས་པ་ལ
iiif viewer powered by OpenSeadragon
