| e-texts navigator |
| Wylie |
14b1 སྤྲོས་ཏེ།། ནམ་མཁའི་དཀྱིལ་དུ་བརྟེན་པར་གནས།། དེ་ནས་དཔལ་ཆེན་ཁྲོ་བོའི་རིགས།། བསྐུལ་བར་བྱ་ཕྱིར་སྔགས་འདི་བརྗོད།། ཨོཾ་བཛྲ་ས་མ་ཡ་སྟྭཾ། ཨོཾ་བཛྲ་ས་མ་ཡ་ཧཱུཾ། ཨོཾ་བཛྲ་ས་མ་ཡ་ཧོ། ཞེས་གསུངས
14b2 སོ།། དེ་ནས་ཡང་འདི་གསུངས་སོ།། བདག་དང་རྒྱལ་བ་གཉིས་མེད་པའི།། རིགས་ཀྱི་རྒྱལ་མཚན་མི་ནུབ་ཕྱིར།། བདག་གི་སྲས་དང་གཞན་གྱི་སྲས།། བྱང་ཆུབ་སེམས་ཀྱི་ཐིག་ལེ་དེ།། ཧོ་གཉིས་བར་དུ་གཞག་བྱ
14b3 སྟེ།། ཆོས་སྐུ་བྱང་ཆུབ་སེམས་སུ་གནས།། སྒྱུ་མའི་ཕྱག་རྒྱ་འོད་འབར་ཏེ།། ཐབས་དང་ཤེས་རབ་ལྡན་བྱས་པ།། བསྙེན་པ་དང་ནི་ཉེ་བར་སྒྲུབ།། སྒྲུབ་པ་སྒྲུབ་པ་ཆེན་པོ་ཡིས།། གསང་བའི་ཕྱག་རྒྱ་རྒྱས་མཛད
14b4 དེ།། རྗེས་སུ་སྦྱོར་བ་བརྩམ་པར་བྱ།། དེ་ནས་དཀྱིལ་འཁོར་ཐམས་ཅད་ནི།། ནམ་མཁའི་དབྱིངས་སུ་བརྟན་པར་གནས།། དེ་ཡིས་ཡེ་ཤེས་བརྟན་པར་གནས།། གསང་བའི་བུམ་པ་ལས་བྱུང་བའི།། འཁོར་ལོ་བཞི་ལ
14b5 རབ་ཏུ་དམིགས།། གང་ཞིག་འདི་ལ་མོས་འགྱུར་བ།། རྡོ་རྗེ་རིག་པ་འཛིན་པ་སྟེ།། བླ་ན་མེད་པ་འཐོབ་པར་བྱེད།། རྒྱབ་ཀྱིས་ཕྱོགས་ཤིང་འདུན་པ་མེད།། བླུན་པོས་མི་ཤེས་ལོག་པར་བལྟ།། གཤིས་ངན་དུ་ནི་ཤི་གྱུར
14b6 ནས།། འོ་དོད་འབོད་ཅིང་ལྟུང་བར་འགྱུར།། དེ་བས་ཐབས་ལ་ཡིད་ཆེས་བྱ།། ཞེས་གསུངས་སོ།། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཡེ་ཤེས་ཐམས་ཅད་འདུས་པ་སངས་རྒྱས་མདུད་པའི
iiif viewer powered by OpenSeadragon
