| e-texts navigator |
| Wylie |
60b1 ཨེ་མ་ཧོ།། ཡང་དག་དོན་ལ་མ་ཡེངས་ཀྱང་།། ཀུན་ཀྱང་ཁྲག་འཐུང་རང་བཞིན་ཏེ།། ངེས་པའི་དོན་འདི་ཁྱོད་ཀྱིས་ཉོན།། ཧཱུཾ་སྟོང་གསུམ་སྟོང་གི་འཇིག་རྟེན་ན།། དབུས་ཕྱོགས་སྟོང་གི་འཇིག་རྟེན་ན།།
60b2 བརྟན་གཡོ་རྩི་ཤིང་ནགས་ཚལ་ཀུན།། ཀུན་ཀྱང་རྡོ་རྗེ་ཕུར་པའི་ལྷ།། ཞལ་གསུམ་ཕྱག་དྲུག་ཞབས་བཞིར་བགྲད།། མཐིང་ནག་མེ་ཡི་འོད་འཕྲོ་ཞིང་།། རྒོད་དང་གཤེ་དང་ཁྲོ་བའི་ཚུལ།། ཕྱག་དྲུག་འཇིགས
60b3 པའི་མཚོན་ཆ་ཡིས།། འགྲོ་དྲུག་བྷ་གའི་དབྱིངས་སུ་སྦྱོར།། ཞབས་བཞིས་བདུད་བཞི་ཟིལ་གྱིས་གནོན།། ཞལ་ནས་ཀི་ལའི་སྔགས་ཟློས་ཞིང་།། གནས་འདིར་སྤྱན་འདྲེན་གཤེགས་སུ་གསོལ།། གནས་འདིར་སྤྱན
60b4 འདྲེན་གཤེགས་ནས་ཀྱང་།། དཀྱིལ་འཁོར་འདི་ལ་བརྟན་པར་བཞུགས།། ཕུར་པ་འདི་ལ་དབང་ཞིག་སྐུར།། ཕུར་པ་འདི་ལ་བྱིན་གྱིས་རློབས།། རྟགས་དང་མཚན་མ་དབྱུང་བ་དང་།། རིག་འཛིན་བདག་ལ
60b5 དངོས་གྲུབ་སྩོལ།། ཨོཾ་བཛྲ་ཀཱི་ལི་ཀི་ལ་ཡ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཧཱུཾ་སྟོང་གསུམ་སྟོང་གི་འཇིག་རྟེན་ན།། ཤར་ཕྱོགས་སྟོང་གི་འཇིག་རྟེན་ན།། བརྟན་གཡོ་རྩི་ཤིང་ནགས་ཚལ་ཀུན།། ཀུན་ཀྱང་བྷུདྡྷ་ཕུར་པའི་ལྷ།། ཞལ
60b6 གསུམ་ཕྱག་དྲུག་ཞབས་བཞིར་བགྲད།། དཀར་གསལ་མེ་ཡི་འོད་འཕྲོ་ཞིང་།། ཁྲོ་དང་བཞད་དང་གཤེད་དང་ཚུལ།། ཕྱག་དྲུག་འཇིགས་པའི་མཚོན་ཆ་ཡིས།། འགྲོ་དྲུག་བྷ་གའི་དབྱིངས་སུ་སྦྱོར།། ཞབས་བཞིས
iiif viewer powered by OpenSeadragon
