| e-texts navigator |
| Wylie |
366b1 ཅི་ནུས་ཀྱིས།། ཁྲོ་བོ་ལ་ནི་མཆོད་པར་བྱ།། ཉི་མ་རེ་རེ་ཆོ་ག་བཞིན།། བཟླས་པ་དག་ཀྱང་སྟོང་དུ་བྱ།། དེ་ལྟར་རྟག་ཏུ་བྱས་པ་ཡིས།། འདོད་པའི་འབྲས་བུ་ཐོབ་པར་འགྱུར།། འཇིག་རྟེན་ཐམས་ཅད་དགའ་བར
366b2 ཡང་།། གདོན་མི་ཟ་བར་འགྲུབ་པར་འགྱུར།། དེ་ཡི་དགྲ་ཡང་མེད་པར་འགྱུར།། ནད་མེད་འགྱུར་བར་གདོན་མི་ཟ།། དེ་ཡི་ལོངས་སྤྱོད་འཕེལ་བར་འགྱུར།། རྒྱལ་པོའང་དེ་ཡི་དབང་དུ་འགྱུར།། གང་ཞིག་རྟག་པར
366b3 ཆོ་ག་འདིས།། གཤིན་རྗེའི་གཤེད་ནི་ཟློས་བྱེད་ན།། དེ་ལས་དེ་ཡི་དབང་པོ་དང་།། གཡོ་དང་མི་གཡོ་འཇིག་རྟེན་རྣམས།། བྱང་ཆུབ་སེམས་ལྡན་དེ་ཡི་ནི།། དབང་དུ་འགྱུར་བར་གདོན་མི་ཟ།། འཇམ་དཔལ་གྱི་རྩ
366b4 བའི་ཆོ་ག་ཞིབ་མོ་ཁྲོ་བོ་རྣམ་པར་རྒྱལ་བའི་ཕྱི་མའི་ཡང་ཕྱི་མ་ལས་གཤིན་རྗེ་རབ་ཏུ་འཇོམས་པའི་ཡི་གེ་འབྲུ་གཅིག་པའི་བརྟུལ་ཞུགས་རིམ་པར་ཕྱེ་བ་སྟེ་བཅུ་གསུམ་པའོ།། །། དེ་ནས་གཞན་ཡང་བརྟུལ
366b5 ཞུགས་ཀྱིས།། བསྒྲུབ་པའི་ལས་རྣམས་བཤད་པར་བྱ།། དངོས་གྲུབ་མཆོག་རྣམས་ཐམས་ཅད་ནི།། གཤིན་རྗེ་རབ་ཏུ་འཇོམས་པ་འདི།། བརྟུལ་ཞུགས་དག་ནི་འདི་ཉིད་ཀྱིས།། རྣམ་པ་ཀུན་ཏུ་བསྒྲུབ་པར་བྱ།། ཕལ
366b6 ཆེར་དངོས་གྲུབ་མཆོག་རྣམས་ནི།། བརྟུལ་ཞུགས་མེད་པས་མི་འགྲུབ་སྟེ།། དེ་བས་གཤིན་རྗེ་འཇོམས་པ་ཡི།། བརྟུལ་ཞུགས་སྤྱད་པ་བྱས་ནས་སུ།། དངོས་གྲུབ་མཆོག་རྣམས་ལེགས་པར་བསྒྲུབ།། མཁས་པས
iiif viewer powered by OpenSeadragon
