| e-texts navigator |
| Wylie |
300a1 པདྨའི་རིགས་དང་། ཁ་ཅིག་ལ་ནི་ཕྲིན་ལས་ཀྱི་རིགས་དང་། ཁ་ཅིག་ལ་ནི་སྦྱིན་པ་ཆེན་པོའི་རིགས་དང་། ཁ་ཅིག་ལ་ནི་ཁྲོ་བོ་ཆེན་པོའི་རིགས་ལ་སོགས་པ་རྣམས་ཀྱི་སྐུ་གསུང་ཐུགས་རྡོ་རྗེ་ལས་བྱུང
300a2 བའི་འཁོར་གྱི་དཀྱིལ་འཁོར་དང་བཅས་པའི་རྣམ་པར་འཕྲུལ་པ་བསམ་གྱིས་མི་ཁྱབ་པར་རབ་ཏུ་བསྟན་ཏོ།། དེ་ནས་ཕྱོགས་བཅུའི་དཀྱིལ་འཁོར་གྱི་རྣམ་པར་སྣང་བའི་གཞལ་མེད་ཁང་ན་རང་བཞིན་སངས་རྒྱས་ཀྱི
300a3 ཞིང་གི་བཀོད་པ་དེ་དག་སོ་སོའི་གཙོ་བོ་ཆེན་པོ་རྣམས་ལ་སོ་སོའི་འཁོར་རྣམས་ཀྱིས་རང་གི་བསྟན་པའི་སྡེ་སྣོད་གསུང་དབྱངས་མི་ཟད་པའི་ཡན་ལག་བསམ་གྱིས་མི་ཁྱབ་པ་རྣམས་ཞུ་ཞིང་འགྲོ་བ་སེམས་ལ་སྣང
300a4 བར་གྱུར་ཏོ།། དེ་དག་ཐམས་ཅད་ཀྱི་ཡང་གཙོ་བོ་སངས་རྒྱས་ཐམས་ཅད་ཀྱི་ཡབ་རྗེ་བོ།། ཀུན་ཏུ་བཟང་པོ་ཉིད་ལ་ཞུ་ཞིང་འདྲི་བ་སེམས་ལ་སྣང་བར་གྱུར་ནས། ཐམས་ཅད་ཀྱིས་མགྲིན་གཅིག་ཏུ་འདི་སྐད་ཅེས
300a5 གསོལ་ཏོ།། ཨེ་མ་དཔལ་ཆེན་ཀུན་བཟང་མཆོག། དུས་གསུམ་སངས་རྒྱས་ཐམས་ཅད་ཀྱི།། སྐུ་གསུང་ཐུགས་ཀྱི་ཕྲིན་ལས་དང་།། ཡོན་ཏན་དཔག་མེད་ཇི་སྙེད་པ།། མ་ལུས་ཁྱོད་ཀྱི་ཟུགས་ལ་གནས།། བློ་ལྡན
300a6 རྣམས་ཀྱིས་བསྒྲུབ་བྱ་བ།། ཉིད་ཀྱི་སྔོན་དུ་བྱ་བ་དང་།། ཕྱི་མ་ཕྱི་མ་རབ་འབྱེད་པའི།། རྒྱུད་རྣམས་སུ་ནི་ལེགས་བཤད་ལས།། མ་ཚང་བ་རྣམས་ཁ་བསྐངས་ཤིང་།། ཐེ་ཚོམ་སོམ་ཉི་གཅད་པའི་ཕྱིར།། མ་ལུས་རྫོགས
iiif viewer powered by OpenSeadragon
