| e-texts navigator |
| Wylie |
195a1 གནས།། ངམ་ནག་སྐྱི་གཡའ་ཧོམ་ཁུང་འདྲ།། ཆུ་རོང་བྲག་འདབ་འདྲེ་སྲིན་འཁྲུགས།། བྱ་གཅན་རྔམ་པ་མ་རུངས་རྒྱུ།། གནམ་ས་གྲུ་གསུམ་ངམ་ནག་ཅིང་།། དུག་དང་དུག་ཤིང་མང་པོ་སྐྱེས།། སྟེང
195a2 ནས་ལྷུང་ལ་ཁད་འདྲ་དང་།། འོག་ནས་གྱེན་དུ་གཟེངས་པ་འདྲ།། ས་རྡོ་རི་བྲག་ཁྲོས་འདྲའི་གནས།། བྱེ་བྲག་གནས་ནི་བསམ་མི་ཁྱབ།། ཡེ་ཤེས་ལྷ་ཡི་དྲག་སྔགས་གནས།། སྤྱི་བོའི་ཁྲོད་དུ་མ་ཡིན་ཞིང་།། རབ་ཏུ
195a3 དབེན་ལ་བག་ཕེབས་པ།། བས་མཐའ་ཡངས་པའི་ས་ཕྱོགས་སོ།། འཇིག་རྟེན་པ་ཡི་དྲག་སྔགས་གནས།། དུར་ཁྲོད་ལ་སོགས་འདྲེ་སྲིན་རྒྱུ།། རབ་གནས་མ་བྱས་ས་ཕྱོགས་ཏེ།། ངང་གིས་འཇིགས་པའི་གནས་སུ
195a4 བསྒྲུབ།། གཞན་ཡང་བྱེ་བྲག་སོ་སོའི་གནས།། གང་ལ་གང་རིགས་གནས་སུའོ།། ཁྱད་པར་དྲག་སྔགས་བསྒྲུབ་པའི་གནས།། རབ་ནི་ས་དོང་མུན་པ་སྟེ།། རིམ་པ་བདུན་གྱི་ས་འོག་ན།། ལས་ཀྱི་གཤིན་རྗེ་གནས་པའི
195a5 ཕྱིར།། སྟོངས་གྲོགས་མཐུ་དཔུང་བྱེད་པའོ།། འབྲིང་ནི་ས་ཁེབས་བྲག་ཕུག་སྟོང་།། ངམ་ནག་མུན་པ་རབ་ཏུ་འཁྲིགས།། དྲེགས་པ་སྡེ་བརྒྱད་གནས་པ་སྟེ།། བྱང་ཕྱོགས་ཁ་བལྟའི་ཕུག་པ་ཤིས།། ལས་རྣམས་མྱུར་དུ
195a6 འགྲུབ་པར་འགྱུར།། སྐུ་གསུང་ཐུགས་རྟེན་མི་བཞུགས་གནས།། ཡང་ན་རབ་ཏུ་གནས་ཞིག་ཅིང་།། འབྱུང་པོས་བདག་བྱས་གཙུག་ལག་ཁང་།། མདོར་ན་འཇིག་རྟེན་དྲེགས་པའི་ཚོགས།། རྒྱུ་ཞིང་གནས་པའི་སར
iiif viewer powered by OpenSeadragon
