| e-texts navigator |
| Wylie |
353b1 མ་ཡིན་གྱི་དབྱིངས་ཉིད་དང་ལྡན་ཞིང་དབྱིངས་ཉིད་ཀྱང་མཁྱེན་པའི་ཡེ་ཤེས་ལས་མི་གཞན་པའི་ཐ་ཚིག་གོ། རྣམ་གཅིག་ཏུ་སེམས་དཔའ་ཕྱིར་ལྟ་བ་ནི་སྣོད་དང་བཅུད་ཀྱི་འཇིག་རྟེན་ཐམས་ཅད་དབང་བསྒྱུར་བའི
353b2 དོན། སེམས་མ་ནང་དུ་ལྟ་བ་ནི་སྣོད་དང་བཅུད་ཀྱི་འཇིག་རྟེན་ཐམས་ཅད་དབང་དུ་འདུས་པའི་དོན། སེམས་དཔའ་དང་སེམས་མ་ཕྱི་ནང་དུ་གཅིག་ལ་གཅིག་གཟིགས་པ་ནི་མཉེས་པར་བྱེད་པའི་ཐ་ཚིག་གོ། ཁྲོ་བོ
353b3 དང་ཁྲོ་མོ་རིལ་ཕྱིར་ལྟ་བ་ནི་ཕྱིའི་དངོས་པོ་དང་རྒོལ་བ་ལ་སོགས་པ་འཇོམས་ཤིང་འདུལ་བའི་དོན། དེ་ལ་དབྱིངས་ནི་དཔེར་ན་ཉི་མའི་དཀྱིལ་འཁོར་ལྟ་བུའོ།། མཁྱེན་པའི་ཡེ་ཤེས་ནི་ཉི་མའི་འོད་སྣང་ཞིང་གསལ་བ
353b4 ལྟ་བུའོ།། དེའི་བྱིན་བརླབས་ནི་དྲོ་ཞིང་འཇམ་པ་ལྟ་བུའོ།། ཕྱིའི་དངོས་པོ་ལ་སོགས་པ་འཇོམས་ཤིང་འདུལ་བ་ནི་རྩི་ཤིང་བསྐམས་པ་དང་ཚིག་པ་ལྟ་བུ་སྟེ།། ལྷ་མོ་དང་སེམས་མ་ནི་ཆོས་ཀྱི་དབྱིངས་རིག་པའི་དོན
353b5 སེམས་ལ་སྣང་བའོ།། ལྷ་དང་སེམས་དཔའ་ནི་དབྱིངས་ལ་སྣང་བའི་དོན་མཐོང་བའོ།། དབྱིངས་ཉིད་ལ་སྣང་བ་དང་མཐོང་བའི་བྱིན་བརླབས་ཀྱི་ངང་གིས་དངོས་པོ་དང་རྒོལ་བའི་རང་བཞིན་ལྷུན་གྱིས་འཇོམས་ཤིང
353b6 དབྱིངས་སུ་སྦྱོར་བར་འདུལ་བ་ནི།། ཁྲོ་བོ་དང་ཁྲོ་མོ་ལས་རྣམ་བཞི་རང་བཞིན་དུ་མཛད་ཅིང་ཐུགས་རྗེས་འཇིག་རྟེན་སྐྱོང་བའི་དོན་ནོ།། འཇིག་རྟེན་སྐྱོང་བ་ལ་སོགས་པ་ནི་བྱིན་གྱིས་བརླབས་ལས་ཕོ་ཉ་ལྟར་གནས
iiif viewer powered by OpenSeadragon
