| e-texts navigator |
| Wylie |
197a1 བྱིན་གྱིས་བརླབས་ནས་སྣོད་དུ་རུང་བར་བྱས་སོ།། དེ་ནས་ཡང་རྡོ་རྗེ་ཆོས་ཀྱིས་སྟོན་པའི་ཞལ་དུ་བལྟས་ནས་འདི་སྐད་ཅེས་གླེངས་སོ།། ཨེ་མ་ཧོ་བདེ་གཤེགས་བཅོམ་ལྡན་འདས།། གསུང་མཆོག
197a2 བཀའ་ནི་དྲི་མ་མེད།། བདག་ཅག་འཁོར་ཚོགས་མ་འཚལ་ན།། བདེ་བར་གཤེགས་པས་བཤད་དུ་གསོལ།། དེ་ནས་ཡང་གསང་བ་མཆོག་གི་བདག་པོ་དེས། སྤྲོས་པ་མེད་ཅིང་བརྗོད་པ་ལས་འདས་པའི་ཏིང་ངེ་འཛིན
197a3 ལ་སྙོམས་པར་ཞུགས་ཏེ་འདི་སྐད་ཅེས་བཀའ་སྩལ་ཏོ།། རྡོ་རྗེ་ཆོས་དང་། རིགས་ལྔ་དང་། འཁོར་དུ་འདུས་པའི་བྱང་ཆུབ་སེམས་དཔའ་ཇི་སྙེད་འདུས་པ་ཀུན་ཉོན་ཅིག། བྱང་ཆུབ་སེམས་ཀྱི་མཚན་ཉིད་ནི།། བརྗོད
197a4 མེད་སྨྲ་བསམ་ཀུན་རྟོག་བྲལ།། དངོས་མེད་བྱང་ཆུབ་སེམས་ཞེས་བརྗོད།། བརྗོད་པ་ཞེས་བྱ་ཀུན་རྫོབ་ཡིན།། ཡང་དག་ཉིད་ལ་བརྗོད་པ་མེད།། རང་བྱུང་སྐུ་སྟེ་བདེ་བའི་མཆོག། མ་བཅོས་དོན་དམ་ངང་ཉིད
197a5 ལ།། སངས་རྒྱས་སེམས་ཅན་གཉིས་སུ་མེད།། རང་གི་ལུས་ངག་ཡིད་གསུམ་དང་།། གཉིས་མེད་མ་བཅོས་རྡོ་རྗེ་སྟེ།། ལུས་ངག་ཡིད་གསུམ་དམིགས་མེད་པས།། མ་བཅོས་པ་ཡི་སེམས་ཉིད་ཀྱིས།། དོན་དམ་ཀུན
197a6 རྫོབ་གཉིས་སུ་སྣང་།། དེར་སྣང་དབྱིངས་ལས་བསྐྱོད་པ་མེད།། དེ་ལྟར་རིག་པའི་སྐྱེས་བུ་དེ།། གཉིས་མེད་བྱང་ཆུབ་མཆོག་སེམས་བསྐྱེད།། ཅེས་གསུངས་སོ།། དེ་ནས་འཁོར་རིགས་ལྔ་དང་། དེར་འདུས་པའི་བྱང
iiif viewer powered by OpenSeadragon
