| e-texts navigator |
| Wylie |
71a1 བ་སྤྱོད་པ་མན་ངག་གི་སྙིང་པོ་ཞེས་བྱ་བའི་རྒྱུད་རྫོགས་སོ།། །། @#།། རྒྱ་གར་སྐད་དུ། སརྦ་བུདྡྷ་ས་མ་ཡོ་ག་ཏནྟྲ་རཱ་ཛ་ནཱ་མ། བོད་སྐད་དུ་སངས་རྒྱས་ཐམས་ཅད་མཉམ་པར
71a2 སྦྱོར་བ་ཞེས་བྱ་བ་རྒྱུད་ཀྱི་རྒྱལ་པོ།། བཅོམ་ལྡན་འདས་ཡེ་ཤེས་དབུགས་འབྱིན་གྱི་རྒྱལ་པོ་ཤིན་ཏུ་རྣམ་པར་གྲོལ་བ་ཉིད་ལ་ཕྱག་འཚལ་ལོ།། འདི་སྐད་བདག་གིས་གོ་བ་ཉིད་ཀྱི་ཐོས་པའི་དུས་ན། དུས་གསུམ་སངས
71a3 རྒྱས་འདུས་པའི་སྐུ།། སྣ་ཚོགས་སྣང་བ་གཅིག་པུ་ཉིད།། འདི་ནི་རང་བྱུང་བཅོམ་ལྡན་འདས།། གཅིག་པུ་རབ་ཏུ་ཆེ་བའི་ལྷ།། རྨོངས་པ་གདུང་བ་སེལ་བའི་འོད།། རང་རིག་དཀྱིལ་འཁོར་འོད་གསལ་ཞིང་།། བརྗིད
71a4 མདངས་གཟི་ཆེན་རབ་ཏུ་ཆེ།། རྡོ་རྗེ་སེམས་དཔའ་བདེ་བའི་མཆོག། དཔལ་ལྡན་དགྱེས་པ་ཡེ་ཤེས་སྐུ།། ངོ་བོ་ཉིད་ལས་མ་གཡོས་བཞིན།། གཅིག་ནི་ཀུན་ཏུ་སྣང་བ་དེ།། སེམས་དཔའ་སངས་རྒྱས་ཀུན་གྱི
71a5 དངོས།། སོ་སོར་རང་རིག་འདུས་པའི་དཔལ།། སྐུ་དང་གསུང་དང་ཐུགས་དང་སྐུ།། ཡོན་ཏན་ཕྲིན་ལས་ཕྱོགས་དུས་ཀུན།། མ་ལུས་མི་ལུས་ལུས་མེད་གནས།། འོག་མིན་རང་བྱུང་ཆོས་ཀྱི་དབྱིངས།། གསང་བ་མཆོག
71a6 གི་དགྱེས་པ་ན།། དུས་གསུམ་བདག་པོ་རྡོ་རྗེ་འཆང་།། རྣམ་པར་ཐར་པའི་དབུ་མངའ་ཞིང་།། ཕ་རོལ་ཕྱིན་དྲུག་ཕྱག་རྒྱ་འབར།། བརྟུལ་ཞུགས་མཉམ་ཉིད་སྐྱིལ་མོ་ཀྲུང་།། ཡེ་ཤེས་སྐུ་ནི་ཟང་ཐལ་ཞལ།། གཏི་མུག
iiif viewer powered by OpenSeadragon
