| e-texts navigator |
| Wylie |
403b1 འོངས་གར་མི་འགྲོ།། འོང་དང་འགྲོ་བར་བྱ་བ་མིན།། ཤིན་ཏུ་བརྟག་དཀའ་མི་དམིགས་པ།། མཐའ་དང་དབུས་ཀྱང་བརྟག་ཏུ་མེད།། གཟུང་འཛིན་བྲལ་བའི་རང་ཉིད་ནི།། དམིགས་མེད་ཚུལ་དུ་དེ་ལྟར་སྣང་།། དབྱིངས
403b2 དང་དབྱིངས་ཀྱི་ཡེ་ཤེས་ཀྱང་།། རང་རིག་ཁོ་ན་ཙམ་དུ་ཟད།། སེམས་ཅན་མ་ལུས་ཐམས་ཅད་ཀྱིས།། དེ་ལྟར་ཁོང་དུ་ཆུད་པར་བྱོས།། ཉོན་མོངས་སྡུག་བསྔལ་མེད་པ་དང་།། བླ་མེད་འབྲས་བུ་ཐོབ་པར་འགྱུར།། སེམས
403b3 ཅན་མ་ལུས་ཐམས་ཅད་ལ།། སྙིང་རྗེའི་ཐག་པ་མ་ཆགས་པར།། ཉོན་མོངས་ལམ་ལས་གྲོལ་བྱེད་ཅིང་།། བྱམས་པ་དག་གིས་མཉེས་པར་གྱིས།། དེ་བཞིན་འཁོར་བའི་བཙོན་ར་ལ།། སྙིང་རྗེའི་ཞགས་པ་ཆེར་བརྐྱང
403b4 ནས།། ཉོན་མོངས་འདམ་ནས་འདྲེན་པར་བྱེད།། སྙིང་རྗེ་ཆེན་པོ་སྐྱེ་མ་བྱེད།། དེ་བཞིན་སྐྱེ་བོ་ཕལ་རྣམས་ལ།། ལས་ཀྱི་སྒྲིབ་པས་མི་གོས་ཤིང་།། ཐམས་ཅད་མངོན་པར་སངས་རྒྱས་པར།། དགའ་བ་དག་ལ་འགྱོད་པ
403b5 མེད།། སེམས་ཅན་ང་དང་བདག་མེད་ལ།། ཐུགས་རྗེས་གཉིས་རྟོག་མི་འབྱེད་དེ།། བུ་གཅིག་འདྲ་བར་བློ་གཞག་བྱ།། ཐམས་ཅད་དྲི་མ་མེད་པར་བྱ།། ཆོས་རྣམས་ཐམས་ཅད་སྟོང་པ་བས།། དེ་ལ་དངོས་དང་རྟོག་པ
403b6 མེད།། ནམ་མཁའི་ངང་དུ་གནས་པ་ལ།། དེ་ལ་བཅོས་ཤིང་བསྒྱུར་དུ་མེད།། ཆོས་རྣམས་ཐམས་ཅད་མཚན་ཉིད་མེད།། སྣང་བ་ཐམས་ཅད་དངོས་མེད་པས།། ཡོད་དང་མེད་པ་ཐམས་ཅད་ཀུན།། མཚན་ཉིད་མེད་པས་མི
iiif viewer powered by OpenSeadragon
