| e-texts navigator |
| Wylie |
257a1 མཆོག། མཐའ་དབུས་མེད་པའི་ཡེ་ཤེས་ནི།། གཅིག་ཅེས་འདི་ཞེས་བརྗོད་དུ་མེད།། ནམ་མཁའ་རང་འབྱུང་རྟག་པ་ལྟར།། འཕོ་འགྱུར་མེད་པས་དེ་བཞིན་ནོ།། ནམ་མཁའ་མཐའ་དབུས་མེད་པ
257a2 བཞིན།། རང་འབྱུང་ཡེ་ཤེས་ཐོག་མཐའ་མེད།། མ་བྱུང་མ་སྐྱེས་བྱང་ཆུབ་སེམས།། ཡེ་ཤེས་ཉི་མའི་འོད་ལྟར་གསལ།། སངས་རྒྱས་སེམས་ཅན་གྲོལ་ཐར་ཀུན།། མ་ལུས་རང་རིག་འོད་གསལ་བས།། རང་བྱུང་ཡེ
257a3 ཤེས་རང་སྣང་ཕྱིར།། མཁྱེན་དང་བསྒྲིབས་པ་ཆུང་ཟད་མེད།། མཁྱེན་པའི་ཡེ་ཤེས་ཉག་གཅིག་ལ།། རང་གི་ཆ་ཤས་ཆོས་ཕྲལ་བས།། ནམ་མཁའི་མཐའ་ཐུག་ཆོས་རྣམས་ཀུན།། སྐད་ཅིག་མ་འདྲེས་ཚུལ
257a4 དུ་མཁྱེན།། རང་རིག་བྱང་ཆུབ་སེམས་ཉིད་ལས།། མཐོ་དམན་བླང་དོར་མ་དམིགས་པས།། འཁོར་བའི་ངོ་བོར་རང་སྣང་ཡང་།། མ་ཆགས་སྐྱོན་མེད་པདྨ་འདྲ།། དཔག་མེད་ཡོན་ཏན་ངོ་བོ་རྣམས།། རང་འབྱུང་རིག
257a5 པ་རང་སྣང་བས།། མ་ལུས་ངོ་མཚར་རྒྱ་མཚོ་རྣམས།། རང་སྣང་གཞན་ལས་ཐོབ་བྱ་མེད།། བྱིན་བརླབས་ཆོ་འཕྲུལ་རྨད་ཀྱི་ཆོས།། རང་འབྱུང་ཉིད་ལས་རྣམ་པར་སྤྲོ།། ཚུལ་ནི་རྣམ་པ་སྣ་ཚོགས་ཏེ།། དག་དང་མ་དག
257a6 ཁྱད་པར་གྱིས།། ངོ་བོ་གཅིག་ལས་མ་གཡོས་ཀྱང་།། མོས་པས་མཐོང་ཚུལ་དེ་བཞིན་ནོ།། གསུང་ནི་ནམ་མཁས་ཁྱབ་པར་ནི།། ཕྱོགས་བཅུ་ཁྱབ་པར་སྒྲ་སྒྲོགས་པ།། མོས་པ་བཞིན་དུ་སྣ་ཚོགས་པའི།། བསམ་ཡས
iiif viewer powered by OpenSeadragon
