| e-texts navigator |
| Wylie |
245a1 གང་བརྟེན་ནས།། ཡེ་ཤེས་ཐིག་ལེ་རྒྱ་དཔག་མེད།། རིམ་པས་མཐར་ཟུག་གནས་སུ་འགྱུར།། གང་ཞིག་འདི་ལ་འདྲིས་གོམས་པས།། རྒྱུ་བ་ཐིག་ལེར་ཐིམ་པ་དང་།། དྲན་རྟོག་ནམ་མཁར་གསལ་བ
245a2 དང་།། བདེ་ཆེན་སྔོན་དུ་སྨིན་པ་ཡིས།། འཆི་མེད་སངས་རྒྱས་ས་ལ་སྦྱོར།། འཇིགས་པ་ཀུན་ལས་གྲོལ་བ་དང་།། ལྷ་མོ་ཚོགས་ཀྱིས་བྱིན་བརླབས་ནས།། རོལ་རྩེད་སྣ་ཚོགས་སྒྱུར་བྱེད་ཅིང་།། ཐབས་དང་ཤེས་རབ
245a3 གཉིས་མེད་ཅིང་།། ལོངས་སྤྱོད་རྫོགས་པའི་ཞལ་མཐོང་ཞིང་།། རྡོ་རྗེ་དབང་གིས་མཚམས་སྦྱར་ནས།། ཡི་གེ་འཁོར་ལོ་ཚོགས་མཆོག་མཉེས།། ནམ་མཁའི་མཐར་ཟུག་བར་དུ་ནི།། བདེ་ཆེན་ཡེ་ཤེས་ཟག་པ
245a4 མེད།། ཡེ་ཤེས་རྒྱ་མཚོ་བྱིན་བརླབས་ཅན།། ནམ་མཁའ་ལྟ་བུར་དཔག་མེད་པ།། རྒྱལ་བ་ཀུན་གྱི་ངོ་བོར་འགྱུར།། རྡོ་རྗེ་སེམས་དཔའ་སྒྱུ་འཕྲུལ་དྲ་བ་གསང་བ་མེ་ལོང་གི་རྒྱུད་ལས་ཕྲིན་ལས་མཐའ་ཡས་པ་བཤད
245a5 པའི་ལེའུ་སྟེ་བཅུ་པའོ།། །། དེ་ནས་གཞན་ཡང་བཤད་བྱ་བ།། གསང་བའི་ལམ་ལ་གང་དགའ་བས།། ཐུན་མོང་མ་གྱུར་གསང་བའི་ལམ།། རིམ་པ་ཉིད་དུ་བཤད་པར་བྱ།། དད་དང་བརྟུལ་ཞུགས་ཆེ་བ
245a6 དང་།། ཐེག་པ་ཆེན་པོར་རིགས་ངེས་ཤིང་།། སྙིང་བརྩེ་དབང་དང་དམ་ཚིག་ལྡན།། སྒྲུབ་ལ་བརྩོན་པའི་གང་ཟག་གིས།། ལུས་དང་ལོངས་སྤྱོད་འཚོ་བ་དང་།། བུ་དང་ཆུང་མ་རྒྱལ་སྲིད་ཀྱིས།། དང་པོར་བླ་མ་མཉེས
iiif viewer powered by OpenSeadragon
