| e-texts navigator |
| Wylie |
226a1 འབྲུ་གསུམ་སྐུ་གསུང་ཐུགས་ལྡན་སྦྱིན།། སྙིང་གར་རྡོ་རྗེ་བརྟན་བྱས་ལ།། དམ་ཚིག་ལེགས་པར་དབོག་པར་བྱ།། ཙནྡན་དཀར་དམར་བྱིན་བརླབས་ཆུ།། ལན་གསུམ་བླུད་ལ་སྣོད་དོར་རོ།། དེ་ནས
226a2 རང་གིས་དམ་བསྒྲགས་ཏེ།། གསང་བའི་དོན་ལ་ངེས་པར་བྱ།། རང་རང་འབྲེལ་བའི་ལྷ་ཉིད་ལ།། རིན་ཆེན་དོར་ཏེ་བརྟག་པར་བྱ།། སྔགས་དང་ཕྱག་རྒྱས་དེ་བཀུག་ལ།། བསྟིམ་ལ་དབྱེར་མེད་གནས་པ་ལ།། རྟག་ཏུ
226a3 བྱིན་བརླབས་གནས་པའི་ཕྱིར།། ལེགས་པར་བརྟན་པའི་ཆོ་ག་བྱ།། མི་ཤེས་རབ་རིབ་བསལ་བྱས་ལ།། འཁོར་ལོ་མངོན་པའི་ང་རྒྱལ་བྱ།། དེ་ནས་ལྷ་དང་དཀྱིལ་འཁོར་གྱི།། དག་པ་རིམ་གྱིས་བསྟན་པར་བྱ།། དེ
226a4 ནས་བླ་མ་སངས་རྒྱས་ལ།། མ་ལུས་ཅི་ཡོད་དབུལ་བར་བྱ།། བྱིན་བརླབས་ཆོ་ག་དག་པ་ཡི།། དཀྱིལ་འཁོར་མཆོད་དང་བསྒོམས་པ་དང་།། ཞུགས་པའི་ཡོན་ཏན་བསམ་མི་ཁྱབ།། རྡོ་རྗེ་འཛིན་པ་ཉིད་དུ
226a5 གྱུར།། དེས་ན་རིགས་སུ་ངེས་པ་ཡིས།། དང་པོར་འཇུག་པའི་རིམ་པ་བསྟན།། རྩ་བ་ཡན་ལག་ཀུན་ཐོབ་ནས།། རིམ་པ་བཞིན་དུ་དབང་བསྐུར་རོ།། དེ་ནས་བླ་མའི་བཀའ་མནོས་ལ།། འདོད་པའི་དངོས
226a6 གྲུབ་བསྒྲུབ་པར་བྱ།། རྡོ་རྗེ་སེམས་དཔའ་སྒྱུ་འཕྲུལ་དྲ་བ་གསང་བ་མེ་ལོང་གི་རྒྱུད་ལས་དབང་བསྐུར་བ་མ་ལུས་པ་བཤད་པའི་ལེའུ་སྟེ་བདུན་པའོ།། །། དེ་ནས་གཞན་ཡང་བཤད་བྱ་བ།། རྡོ་རྗེ་དམ་ཚིག་བླ་ན
iiif viewer powered by OpenSeadragon
