| e-texts navigator |
| Wylie |
20a1 བའི་ཐིག་ལེས་རྒྱས།། བདེ་བའི་ཆོ་འཕྲུལ་ཕྱོགས་བཅུར་སྣང་།། ལ་ལ་བལྟ་ཞིང་ཆགས་པ་དང་།། ལ་ལར་འཁྱུད་ཅིང་རྨོངས་མཛད་དེ།། བསྡམས་པས་བཞད་དང་ཞལ་སྤྲོད་དང་།། དགོད་དང་སྒེག
20a2 དང་འཛིན་པ་དང་།། བསྐྱོད་དང་ཕྱོགས་བཅུར་བགྲོད་པ་ཡིས།། མ་ཆགས་པ་ནི་དེ་བཞིན་ཏེ།། ཆགས་པ་སྨིན་ཅིང་རྒྱས་པར་མཛད།། རྨོངས་དང་བརྒྱལ་བས་ཀུན་བསྡུས་ཏེ།། མ་ལུས་བདེ་བ་ཆེན་པོར་ཐིམ།། བདེ
20a3 ཆེན་གསང་བའི་ཕྱག་རྒྱ་ཡིས།། ནམ་མཁའི་དབྱིངས་ལྟར་རྒྱས་བཏབ་པས།། ཐམས་ཅད་བདེ་བ་ཆེན་པོའི་དབྱིངས།། རང་བྱུང་གསང་བ་ཐིག་ལེའི་དབྱིངས།། ཐམས་ཅད་མ་ལུས་བྱང་ཆུབ་སེམས།། རང་སྣང་དཀྱིལ
20a4 འཁོར་ཕྱག་རྒྱའི་ཚོགས།། གཉིས་མེད་ཡེ་ཤེས་སྣ་ཚོགས་མཆོག། མི་དམིགས་མི་གནས་དེ་བཞིན་ཉིད།། རྒྱལ་བའི་དཀྱིལ་འཁོར་མ་ལུས་པ།། སྐུ་གསུང་ཐུགས་ཀྱི་དེ་བཞིན་ཉིད།། དག་མཉམ་བདེ་བས་རྒྱས་བཏབ
20a5 ཅིང་།། དུས་བཞི་མཉམ་པའི་ངོ་བོར་གསལ།། འཇིག་རྟེན་འདས་དང་འཇིག་རྟེན་པ།། མ་ལུས་ཐུགས་ཀྱི་དཀྱིལ་འཁོར་ཉིད།། སངས་རྒྱས་བྱང་ཆུབ་སེམས་དཔའ་དང་།། ཞིང་དང་འཁོར་ལོ་རོལ་མོར་བཅས།། ཇི
20a6 སྙེད་དངོས་དང་དངོས་མིན་པ།། ཐམས་ཅད་བདེ་བ་ཆེན་པོ་ཉིད།། ལམ་དང་བྲལ་བའི་ཁྱད་པར་དང་།། ཡོན་ཏན་ལྷུན་རྫོགས་བསམ་མི་ཁྱབ།། ནམ་མཁའི་དབྱིངས་དང་མཉམ་པ་ཡི།། སྒྱུ་འཕྲུལ་དྲ་བའི་དཀྱིལ
iiif viewer powered by OpenSeadragon
