| e-texts navigator |
| Wylie |
334a1 ངེས་པ་ལས། གླུ་གར་རྩེ་འཇོ་བྲོ་གར་གྱི་དམ་ཚིག་ཅེས་བྱ་བ་འདི། ངེས་པར་ཆེད་དུ་བརྗོད་པ་འདི་བརྗོད་དོ།། ཕྱོགས་བཅུ་མཐའ་ཡས་དུས་བཞི་ཡི།། ཐམས་ཅད་དབྱེར་མེད་མཎྜ་ལའི།། ཉི་ཟླ་ཤར
334a2 བའི་གཞལ་ཡས་ལ།། པདྨ་ཆགས་མེད་གདན་བཏིང་ནས།། རིན་ཆེན་ཟད་མེད་ཕོ་བྲངས།། ཆེ་ཆུང་ཚད་ནི་དཔག་མེད་པའི།། བྱང་ཆུབ་བདེ་གསལ་དཀྱིལ་འཁོར་ལ།། བདེ་ལྡན་བྱང་ཆུབ་རབ་བཀོད་ནས།། མ་ལུས
334a3 ཀུན་བསྡུས་དབྱིངས་བསྡུས་ནས།། ལུས་བསྐྱོད་ཡན་ལག་བསྐུལ་བསིག་དང་།། དབང་པོ་ལྔ་ཡི་ལྟ་སྤྱོད་ཀུན།། ཕྱག་རྒྱ་ཆེན་པོ་ཡིན་པར་བཤད།། གོང་གི་དཀྱིལ་འཁོར་གསལ་བསྒོམས་ནས།། བདག་ཉིད་དབྱིངས
334a4 ལས་མི་གཞན་ཕྱིར།། མཉམ་ལ་མཉམ་པར་གནས་པར་བསྒོམ།། བདག་ཉིད་ལྷ་ཡི་དཀྱིལ་འཁོར་དུ།། ལྷག་པའི་དཀྱིལ་འཁོར་གསལ་བསྒོམས་ནས།། བྲོ་ཐབས་གར་གྱི་ཕྱག་རྒྱ་དང་།། གླུ་དབྱངས་ཚིག་གི་སྒྲ
334a5 བསྒྲགས་ཤིང་།། ཕྱོགས་བཅུའི་སྐྱེ་གནས་མ་ལུས་ཀུན།། རྡོ་རྗེ་ལྷུན་གྲུབ་སྐུ་མཐོང་ཞིང་།། ཆོས་ཀྱི་དུང་ཆེན་སྒྲ་ཡང་ཐོས།། སྒྲིབ་གཉིས་བྱང་ནས་བྱང་ཆུབ་འགྲུབ།། བདེ་མཐོང་རྙེད་པ་གྲགས་འགྱུར་བ།། བསོད
334a6 ནམས་ཚོགས་ཆེན་འགྲུབ་པར་འགྱུར།། ཐབས་དང་ཤེས་རབ་ལྡན་གྱུར་ནས།། ཐམས་ཅད་དབྱེར་མེད་དབྱིངས་སུ་སྦྱོར།། གཉིས་མེད་དབྱིངས་གྱུར་བྱང་ཆུབ་སེམས།། འོད་ཟེར་འབར་བས་ཕྱོགས་བཅུར
iiif viewer powered by OpenSeadragon
