| e-texts navigator |
| Wylie |
67a1 པོ་ཡིན།། ཐམས་ཅད་སྐྱེ་མེད་བདག་ཉིད་ཞི་བ་སྟེ།། ཨ་དང་པར་ནི་རྣམ་ལྡན་པས།། ཤེས་རབ་སྐྱེ་མེད་ཞི་བ་སྟེ།། དེ་ལྟར་བལྟས་པ་དེར་སྣང་སྟེ།། དེ་ཡང་ཅི་ཡི་ཕྱིར་ཞེ་ན།། རང་བཞིན་གཅིག་ཏུ་མ
67a2 ངེས་པས།། འཛིན་པ་མ་སྤངས་སྐྱོན་སྣང་ཕྱིར།། འཁྲུལ་པ་ཀུན་ཏུ་བཙལ་ན་སྐྱོན།། སྣང་འདོད་རྩོལ་སེམས་བདེ་བ་ཡང་།། དེ་ནི་དེ་སྒྲིབ་སྒྲོན་ཅན་ཡིན།། ལམ་བགྲོད་ཐབས་ཀྱི་ཡིག་འབྲུ་དང་།། གཟུགས་བརྙན
67a3 འཛིན་དང་ཆ་ལུགས་བསྒོམ།། མཚན་དང་དཔེ་བྱད་འཁོར་ཚོགས་འཛིན།། ཆོས་ཉིད་རང་བཞིན་དངོས་བྲལ་བས།། དེ་ལྟར་བསྒོམ་པ་བྱིས་པ་ཡིན།། བྱང་ཆུབ་ཡན་ལག་ཀུན་གྱི་སྒོ།། ཆ་ལུགས་བསྒོམ་པ་ཆུ་ཟླ
67a4 བཞིན།། དེ་ལྟར་བསྒོམས་ཀྱང་སྐྱོན་ཅན་ཡིན།། མ་གོས་མ་ཆགས་འབྱུང་གྱུར་ཀྱང་།། བསྒོམས་པས་བྱིས་པའི་སྤྱོད་ཡུལ་ཡིན།། དཀྱིལ་འཁོར་ཆ་ལུགས་ཁྲོ་གཉེར་གྱིས།། ཁྲོ་བདག་ཆེན་པོའི་ལུས་གཟུང་ནས།། ཡི
67a5 གེ་མངོན་དུ་བྱུང་ན་ཡང་།། ཞི་བའི་རང་བཞིན་དམ་པ་སྟེ།། ངང་ཉིད་རང་བཞིན་དག་པའི་དངོས།། ཞི་བ་དེ་ཉིད་མཐོང་བ་མིན།། མཉམ་པའི་རྒྱལ་པོས་དེ་སྐད་གསུངས།། རྒྱུད་ཀྱི་རྒྱལ་པོ་ཆེན་པོ་བྱང་ཆུབ་ཀྱི་སེམས
67a6 ལུང་ཆེན་པོའི་མདོ་ལས། བདེ་བ་དང་ཆགས་པ་སྤངས་པའི་ལེའུ་སྟེ་བཅོ་བརྒྱད་པའོ།། །། དེ་ནས་འཁོར་དེར་འདུས་པ་རྣམས་ཀྱིས། བྱང་ཆུབ་ཀྱི་སེམས་རྡོ་རྗེ་ལ་འདི་སྐད་ཅེས་གསོལ་ཏོ།། སེམས་དཔའ་ཆེན་པོ།།
iiif viewer powered by OpenSeadragon
