| e-texts navigator |
| Wylie |
56b1 སེམས་ཅན་གཉིས་མ་མཐོང་།། རང་བཞིན་གཅིག་སྟེ་གཉིས་མེད་དོ།། སེམས་ཀྱི་རང་བཞིན་སྐྱེ་མེད་དེ།། ཐུགས་རྗེས་བཟུང་བའི་མཚན་མ་མེད།། སྙིང་རྗེ་ཆེན་པོ་ཅིར་མི་མཛད།། ཡང་དག་ཟབ་མོ་ཆེན་པོ་ཡིན།། ཆེ
56b2 བའི་ཆེ་བ་ཟབ་མོ་ཡིན།། ཆེ་བའི་དོན་ཉིད་མཉམ་པ་ཡིན།། བྱང་ཆུབ་མེད་དེ་ངན་སོང་མེད།། དེ་བས་གཉིས་མེད་ཆོས་ཀྱི་དབྱིངས།། ཆོས་དབྱིངས་གཉིས་མེད་ཡོན་ཏན་གཏེར།། ཡོན་ཏན་ཅིར་ཡང་བསྔགས་པ
56b3 མེད།། ཡོན་ཏན་རྒྱ་མཚོར་སྒྲོས་མི་འདོགས།། དོན་རྣམས་ཇི་བཞིན་མི་བསྐྱོད་དེ།། ཆོས་ཉིད་ནམ་མཁའ་ལྟ་བུའི་དངོས།། སྐྱོན་རྣམས་མ་ལུས་དག་པའོ།། བྱ་བའི་ཡུལ་རྣམས་ངང་གིས་སྟོང་།། བྱ་བ་མེད་པས་རང
56b4 བཞིན་གྲོལ།། འགྲོ་བ་ཞི་བ་ཆེན་པོའི་ངང་།། དེ་ཕྱིར་རང་བཞིན་གྲོལ་བ་སྟེ།། གཞན་ནས་འབྱུང་བར་འགྱུར་མ་ཡིན།། རང་བྱུང་ཡེ་ཤེས་བཙལ་མེད་པས།། བཙལ་མེད་དམ་པ་ཞི་བ་ཡིན།། གྲོལ་ནས་གྲོལ་བའི་ལམ
56b5 ཡང་སྟོན།། སྣང་ཕྱིར་གྲོལ་བ་ཆེན་པོ་སྟེ།། གྲོལ་དང་མ་གྲོལ་གཉིས་མེད་དོ།། འཁོར་བ་མྱ་ངན་འདས་ཉིད་དུ།། གཉིས་སུ་སྒྲོ་བཏགས་ཡོད་མ་ཡིན།། དེ་ལྟ་བུར་ནི་སུས་མཐོང་བ།། མཚན་མའི་གཡུལ་ལས་རྒྱལ་བ
56b6 ཡིན།། དེ་ལྟ་བུ་ནི་སུས་འཛིན་པ།། སངས་རྒྱས་ཡིན་ཏེ་རྒྱལ་བའི་སྲས།། ཞེས་གསུངས་སོ།། རྒྱུད་ཀྱི་རྒྱལ་པོ་ཆེན་པོ་བྱང་ཆུབ་ཀྱི་སེམས་ལུང་ཆེན་པོའི་མདོ་ལས། ཆོས་ཉིད་ཀྱི་ལེའུ་སྟེ་གཉིས་པའོ།། །། དེ་ནས
iiif viewer powered by OpenSeadragon
